103605

སློང་བར་རིགས་པའི་སྤང་ལྟུང་ (1)

Part of speech	མིང་ཚིག
Definition	མདོ། འདུལ་བ། སློང་བར་རིགས་པ་ནི་རང་ཉིད་ལ་ཡོ་བྱད་ཐམས་ཅད་སློང་བར་རིགས་ལ། དེ་བཞིན་དུ་སྣམ་སྦྱར་ལྟ་བུ་གང་མེད་པ་དེ་དང་དེ་སློང་བར་རིགས་སོ། །ཚད་ནི་ནོར་བདག་གཅིག་ལ་ཁྱིམ་པའི་སྟོད་གཡོགས་སྨད་གཡོགས་སམ་རབ་ཏུ་བྱུང་བའི་སྟོད་གཡོགས་སྨད་གཡོགས་ཀྱང་རུང་སྟེ་ཟུང་གཅིག་སློང་བར་བྱའོ། །ཁྱིམ་པའི་སྟོད་གཡོགས་སྨད་གཡོགས་ཆུང་ཚད་ཐོབ་ན་འབྲིང་ཚད་དུ་ཁ་བསྐང་བ་དང་། འབྲིང་ཚད་ཐོབ་ན་ཆེ་ཚད་དུ་ཁ་བསྐང་སློང་བར་མི་བྱ་ཞིང་། ལྷག་པོ་ཐོབ་ན་ཡང་སྦྱིན་མི་དགོས་སོ། །རབ་ཏུ་བྱུང་བའི་ཆུང་ཚད་ཐོབ་ན་འབྲིང་ཚད་དུ་ཁ་བསྐང་བ་དང་། འབྲིང་ཚད་ཐོབ་ན་ཆེ་ཚད་དུ་ཁ་བསྐང་བ་བླང་བར་བྱ་ཞིང་། ཆེ་ཚད་ལས་ལྷག་པ་ཐོབ་ན་ཡང་སྦྱིན་པར་བྱའོ། །དེ་ལྟར་ན་འདི་ལ་ལྟུང་བ་འབྱུང་བའི་སྒོ་གསུམ་ཡོད་དེ། བདག་པོ་གཅིག་ལ་ཟུང་གཅིག་ལས་ལྷག་པ་བླངས་ན་ཉེས་བྱས། ཐོབ་ན་དངོས་གཞི། ཁྱིམ་པའི་སྟོད་གཡོགས་སྨད་གཡོགས་ཆུང་ཚད་འབྲིང་ཚད་ཐོབ་པ་ལས་ཁ་བསྐང་བ་བླངས་ན་ཉེས་བྱས། ཐོབ་ན་དངོས་གཞི། རབ་ཏུ་བྱུང་བའི་ཆེ་ཚད་ལས་ལྷག་པ་ཐོབ་པ་མི་སྦྱིན་པར་སེམས་ན་ཉེས་བྱས། ཐག་བཅད་ན་དངོས་གཞིའོ། །ཞེས་ཀུན་མཁྱེན་གོ་རམས་པའི་འདུལ་བའི་སྤྱི་དོན་ལས་སོ། ། མདོ་ལས་སྟོད་གཡོགས་སྨད་གཡོགས་བཅས་ཞེས་པས་བསྟན། མཚན་གཞི་ནི། ཆོས་གོས་རྣམ་གསུམ་མེད་པའི་དགེ་སློང་གིས་ཁྱིམ་པ་ཉེ་དུ་མ་ཡིན་པ་ལ་སྟོད་གཡོགས་དང་སྨད་གཡོགས་ཟུང་གཅིག་ལས་ལྷག་པའི་གོས་བསླངས་ཏེ་ལག་ཏུ་ཐོབ་པའི་བཅས་པའི་ཁ་ན་མ་ཐོ་བ་དེ་ཡིན་ཏེ། བྱིན་གྱིས་བརླབས་པར་བྱ་བ་ཐམས་ཅད་མེད་ན་སློང་བར་རིགས་པ་ཉིད་དོ། །ཞེས་པ་ནས་བཟུང་སླང་བར་བྱ་བ་ཉིད་དོ། །གང་ཡང་རུང་བའོ། །ཚད་དེ་ལས་ལྷག་པ་ནི་སླང་བར་བྱ་བ་ཉིད་མ་ཡིན་ནོ། །ཞེས་དང། ཆོས་གོས་ཕྲོགས་པ་ལ་སོགས་ཀྱི། །མང་པོ་རྙེད་པར་གྱུར་ན་ཡང། །དྲན་པས་སྟོད་གཡོགས་སྨད་གཡོགས་ལས། །ལྷག་པར་སླང་བར་མི་བྱའོ། །ཞེས་གསུངས་པའི་ཕྱིར། འདི་ནི་ཉེར་དགས་གྲོང་ཁྱེར་ཕྲེང་བ་ཅན་གྱི་དགེ་སློང་བཞི་བཅུ་ཆོམ་རྐུན་པས་བཅོམ་པ་སྦྱིན་བདག་ལ་གོས་སློང་དུ་གནང་བའི་གྲོགས་ལྡན་ལ་ཕྱིན་པས། གོས་གྲངས་མང་དུ་རྙེད་པར་དགེ་སློང་སོ་སོ་ལ་སྟོད་གཡོགས་སྨད་གཡོགས་ཙམ་རེ་སྦྱིན་ནས་གཞན་དག་ཉེར་དགའ་རང་གིས་བྱས་པ་ལ་བརྟེན་ནས་བཅས་སོ། །ཞེས་པཎ་ཆེན་ངག་དབང་ཆོས་གྲགས་ཀྱི་འདུལ་བའི་སྤྱི་དོན་ཐུབ་བསྟན་རྒྱས་པའི་ཉིན་བྱེད་ལས་སོ། །
Domain	ཆོས་ལུགས།