From Rangjung Yeshe Wiki - Dharma Dictionary
< Dictionaries(diff) ← Older revision | Latest revision (diff) | Newer revision → (diff)
Jump to navigation
Jump to search
| བླ་མ་དབུ་མ་པ
|
| Tibetan Definition
|
(རྣམ་ཐར) དབུ་མ་པ་དཔའ་བོ་རྡོ་རྗེ་སྟེ། ཐོག་མར་བླ་མ་འདི་པས་རྗེ་ཙོང་ཁ་པ་ཆེན་པོའི་ཞབས་ལ་གཏུགས་ནས། དབྱངས་ཅན་མའི་རྗེས་གནང་ཞིག་ཞུས་ནས་སློབ་མར་གྱུར་ལ། ཕྱིས་སུ་རྗེ་ཙོང་ཁ་པ་ཆེན་པོས་བླ་མ་ཁོང་པ་ལས་འཇམ་དབྱངས་ཆོས་སྐོར་སོགས་གསན་ཏེ་བླ་མའི་གཙོ་བོ་ཞིག་ཏུ་གྱུར་ཏོ། །ཁོང་ལ་གྲུབ་ཆེན་དཔའ་བོ་རྡོ་རྗེ་ཡང་ཞུ། མཁས་གྲུབ་ཆོས་རྗེས་མཛད་པའི་རྗེའི་གསང་བའི་རྣམ་ཐར་ལས། བླ་མ་དབུ་མ་པ་དེ་ཡང་སྐུ་ཚེ་དཔག་ཏུ་མེད་པའི་སྔ་རོལ་ནས་ཚོགས་གཉིས་རྒྱ་ཆེན་པོ་བསགས་ཤིང་། ཁྱད་པར་དུ་སྐུ་ཚེ་ལན་གྲངས་མང་པོར་རྗེ་བཙུན་འཇམ་པའི་དབྱངས་ཀྱིས་རྗེས་སུ་བཟུང་བའི་མཐུས། སྐུ་ཚེ་འདིར་བསྙེན་སྒྲུབ་སོགས་ལ་འབད་པ་ཆེར་མ་མཛད་པར་ཡང་། བྱིས་པ་གཞོན་ནུའི་དུས་ཉིད་ནས་མདོ་ཁམས་སུ་ཕྱུགས་རྫི་མཛད་པའི་ཚེ། ལུས་ཀྱི་ཁོང་པའི་ནང་སྙིང་གི་ཐད་ཙམ་ནས། ཨ་ར་པ་ཙ་ནའི་སྔགས་ཀྱི་སྒྲ་འུར་འུར་བ་འོང་ཞིང་། དེ་བྱུང་རེས་ཀྱིས་ལུས་ཀྱི་བ་སྤུ་ཟིང་བྱེད་ཅིང་། ཐུགས་བཟུང་མི་ཐུབ་པ་འདྲ་བ་འོང་བ་ཞིག་ཡོད་དེ། ལན་ཅིག་དེ་ལྟར་བྱུང་བས་རྐྱེན་བྱས་ནས་བརྒྱལ་བར་གྱུར་ཅིང་། བརྒྱལ་བ་སངས་པ་དང་། མདུན་ན་རྗེ་བཙུན་འཇམ་པའི་དབྱངས་སྐུ་མདོག་ནག་པོ་ཞིག་འདུག་པ་དངོས་སུ་གཟིགས་པའི་སྣང་བ་བྱུང་། དེ་རྗེས་རྗེས་གནང་དང་སྒྲུབ་པའི་ལུང་གསན་ནས། བསྙེན་སྒྲུབ་ལ་ཤིན་ཏུ་འགྲུས་པར་མཛད་པས་རྣམ་པར་ཐར་པ་ཐུན་མོང་བར་བསྙད་པ་ལྟར་སྐུ་དང་གསུང་གི་སྣང་བ་རྒྱུན་ཆགས་སུ་འོང་བ་ཞིག་ཡོད་པར་སྣང་། ཞེས་གསུངས། རྗེ་བཙུན་ཙོང་ཁ་པ་ཆེན་པོས་གཙང་རོང་དུ་བླ་མ་འདི་དང་མཇལ་ནས། བླ་མ་དབུ་མ་པས་ལོ་ཙཱ་བ་མཛད། རྗེ་རིན་པོ་ཆེས་འདྲི་བ་པོ་མཛད་ནས། རྗེ་བཙུན་འཇམ་པའི་དབྱངས་ལ་ཆོས་སྤྱི་དང་ལྷག་པའི་དབུ་མའི་ལྟ་བའི་སྐོར་ལ་དྲི་བ་མང་དུ་མཛད་ཅིང་། རྗེ་བཙུན་འཇམ་པའི་དབྱངས་ཀྱི་གསུང་ནས། སྣང་ཕྱོགས་དང་སྟོན་ཕྱོགས་ལ་ཉེ་རིང་གཏན་ནས་བྱེད་མི་ཉན། ཁྱད་པར་སྣང་བ་ལ་གཙིགས་སུ་བྱེད་དགོས་ཞེས་ཡང་ཡང་གསུང་བའི་སྐོར་སོགས་རྒྱས་པར་གོང་གི་གསང་རྣམ་དུ་གསལ་ལོ། །བླ་མ་དབུ་མ་པ་འདི་ཉིད་རྗེའི་བླ་མའི་བླ་མ་དང་སློབ་མ་གཉིས་ཀ་ཡིན་ཞིང་། ཐོག་མར་བླ་མ་དབུ་མ་པས་རྗེ་ཙོང་ཁ་པ་ཆེན་པོ་ལས། དབྱངས་ཅན་མའི་རྗེས་གནང་ཞུས་ནས་ཆོས་འབྲེལ་གསན། ཕྱིས་སུ་རྗེ་ཙོང་ཁ་པ་ཆེན་པོའི་བླ་མའི་གཙོ་བོར་གྱུར་པ་ཡིན་ནོ། །རྗེའི་རྣམ་ཐར་དད་པའི་འཇུག་ངོགས་ལས། བླ་མ་རྗེ་བཙུན་པ་ (རྗེ་བཙུན་རེད་མདའ་བ) དང་དཔོན་སློབ་ (འདིའི་དཔོན་སློབ་ཅེས་པ་རྗེ་བཙུན་རེད་མདའ་བ་དང་། རྗེ་ཙོང་ཁ་པ་ཆེན་པོ་ལ་ཞུ་བ་ཡིན) གསུང་གླེང་མཛད་པའི་དགོས་པ་འགའ་ཞིག་གི་ཕྱིར་དུ་གཙང་ལ་བྱོན། རོང་གི་སྣུབས་ཆོས་ལུང་དུ་བཞུགས། ཚོགས་པའི་མཁན་པོ་རིན་པོ་ཆེ་གྲགས་པ་བཤེས་གཉེན་པ་ལ་བཀའ་ལུང་ཅི་རིགས་པ་གསན། དེ་དུས་རྗེ་འདི་པའི་ཞབས་འབྲིང་ལ་ཡོད་པའི་སྔོ་ཕྱི་དཔོན་པོ་བསོད་ནམས་གྲགས་དང༌། མདོ་སྨད་པ་དགེ་བཤེས་ཤེས་རབ་གྲགས། ཞེས་པ་གཉིས་ཀྱིས། བླ་མ་དབུ་མ་པ་བརྩོན་འགྲུས་སེངྒེ་བདེ་མཆོག་སྟེང་ཞེས་པའི་དབེན་གནས་ཤིག་ན་བཞུགས་པའི་དྲུང་དུ་མཇལ་བ་ལ་ཕྱིན། ཆོས་འབྲེལ་ཞུས། གསུང་གླེང་བྱུང་བས། ཁོང་པ་ན་རེ། ངེད་ཁྱེད་ཀྱི་སློབ་དཔོན་པ་དེ་ལ་དབྱངས་ཅན་མའི་རྗེས་གནང་ཞིག་ཞུ་དགོས་གསུངས། དེ་ནས་ཁོང་པ་དང་རྗེ་འདི་པ་ཞལ་འཛོམ་མཛད་དེ། རྗེ་འདི་ལ་དབྱངས་ཅན་མའི་རྗེས་གནང་ཞུས། དེའི་ཚེ་གསུང་གླེང་ཞིབ་ཏུ་མཛད་པས། བླ་མ་དབུ་མ་པ་ཁོང་རང་ལ་མདོ་ཁམས་ན་ཕྱུགས་མ་སྐྱོང་བའི་དུས་ཉིད་ནས་རྗེ་བཙུན་འཇམ་པའི་དབྱངས་ཀྱི་སྐུ་དང་གསུང་གི་སྣང་བ་ནར་མར་འོང་ཚུལ་དང༌། དེ་ལ་སྔ་ཕྱིར་བརྟག་པ་བྱས་ཚུལ་ལ་སོགས་པ་ཞིབ་པར་ཞུས་ནས། ད་དུང་ངེད་འདི་ལ་གཏིང་ནས་ངེས་པ་རྙེད་པ་མེད་པས་བརྟག་དཔྱད་ཡང་དག་ཅིག་ཐུགས་ལ་འདོགས་པར་ཞུ། ད་ལན་ཡང་རྗེ་བཙུན་གྱི་སྐུའི་སྣང་བ་དེའི་གསུང་ནས། རང་ར་ལ་དབྱངས་ཅན་མའི་རྗེས་གནང་ཞུ་བ་ལ་རྒྱུག་གསུངས་ནས་འོངས་པ་ཡིན། ཞེས་གསུངས་པ་ལ་རྗེ་འདི་པས་དབུ་མའི་ལྟ་བ་སོགས་ཆོས་ཀྱི་གནད་ཟབ་མོ་རྣམས་ཀྱི་དྲི་གཏུགས་མཛད་པ་སོགས་ཀྱི་སྒོ་ནས་ལེགས་པར་བརྟགས་པས་བརྟག་ཐུབ་པར་འདུག་པས། ཐུགས་ཡིད་གཉིས་ཟ་དགོས་པར་མི་གདའ། གསོལ་བ་དྲག་ཏུ་ཐོབ་མཛོད། འོན་ཀྱང་རྗེ་བཙུན་གྱི་སྐུ་དང་གསུང་རང་མཚན་པ་ད་ལྟ་དབང་ཤེས་ལ་སྣང་བ་མིན། ཡི་དམ་གྱི་སྐུ་དངོས་ཀྱིས་གཏད་པའི་རྣམ་པ་ཡིད་ཤེས་ལ་དངོས་སུ་སྣང་བ་ཞིག་ཡིན། ངེད་ཀྱང་འཇམ་པའི་དབྱངས་ཀྱི་སྒྲུབ་སྐོར་མན་ངག་སོགས་འདི་ཕྱོགས་ལ་ཤེས་འདོད་ཆེ་བར་ཡོད་པས་ཞུ་དགོས་ནའང༌། ད་ལན་རྗེ་བཙུན་རེད་མདའ་བའི་དྲུང་ནས་སྟག་ཚང་དུ་འབྱོན་པ་དང་དཔོན་སློབ་དུས་ངེས་མཛད་པའི་མཇལ་ཕྲད་དགོས་པར་ཡོད་པ་སོགས་ཀྱིས་བྲེལ་ནས་མི་འགྲུབ་པར་འདུག །རྗེས་སུ་རྟེན་འབྲེལ་ཞིག་ཅིས་ཀྱང་སྒྲིག་འཚལ་ཞེས་གསུངས། ཞེས་གསུངས་སོ། །
|