From Rangjung Yeshe Wiki - Dharma Dictionary
< Dictionaries(diff) ← Older revision | Latest revision (diff) | Newer revision → (diff)
Jump to navigation
Jump to search
| མགོ་ཅན
|
| Tibetan Definition
|
(བརྡ་སྤྲོད) ཡི་གེ་གཞན་གྱི་མགོར་བརྩེག་རྒྱུའི་ཡི་གེ་ (ར་ལ་ས) གསུམ་ལ། མགོ་ཡིག་ཟེར། མགོ་ཡིག་གང་ལ་བརྩེག་སའི་ཡི་གེ་ (རྐ་ལྐ་སྐ) ལྟ་བུ་ལ། མགོ་ཅན་ཟེར། གནའ་དེང་གི་མཁས་པ་ཕལ་ཆེར་གྱིས་ “མགོ་ཡིག་དང་མགོ་ཅན” གཉིས་ཉ་ཉུང་མཉམ་བསྲེ་བྱེད་པ་དཔེར་ན། མཁས་དབང་ཚེ་ཏན་ཞབས་དྲུང་རིན་པོ་ཆེའི་«སུམ་འགྲེལ་ཐོན་མིའི་ཞལ་ལུང་༡༦»ལས་ཀྱང་། ག་ད་བ་མ་འ་སྟེ་སྔོན་འཇུག་ལྔ། ག་ང་ད་ན་བ་མ་འ་ར་ལ་ས་སྟེ་རྗེས་འཇུག་བཅུ། ད་ས་སྟེ་ཡང་འཇུག་གཉིས། ར་ལ་ས་སྟེ་ “མགོ་ཅན” གསུམ། ཡ་ར་ལ་ཝ་སྟེ་ “འདོགས་ཅན” བཞི་རྣམས་དང་། ཞེས་མགོ་ཡིག་ལ། མགོ་ཅན་དང་། འདོགས་ཡིག་ལ། འདོགས་ཅན་ཞེས་ནོར་ནས་ཐ་སྙད་སྦྱར་འདུག་ཅིང་། «གསེར་ཏོག་སུམ་འགྲེལ༡༧»ལས་ཀྱང་། བདུན་པ་འདོགས་ཅན་གྱི་ཡི་གེ་བཤད་ན། ཡ་དང་ར་དང་ལ་དང་ཝའོ། །ཞེས་དང་། དེའི་མཇུག་ཉིད་ལས། འདོགས་ཅན་འཕུལ་བའི་སྔོན་འཇུག་གི་ཡི་གེ་བཞི་སྟེ་ད་བ་མ་འའོ། །ཞེས་འབྱུང་བ་རྣམས་ཀྱང་ལེགས་པར་མི་སྣང་ངོ་། །«དུང་དཀར་བློ་བཟང་འཕྲིན་ལས་ཀྱི་གསུང་འབུམ་པོད་༼ ཇ་པ ༽ཤོག་གྲངས་༥»ལས། ར་ལ་ས་གསུམ་མགོ་ཅན་ཏེ། །གོ་དོན་ནི། གསལ་བྱེད་སུམ་ཅུའི་ནང་ནས་ར་ལ་ས་གསུམ་ནི་མགོ་ཅན་གྱི་ཡི་གེ་ཡིན། མགོ་ཅན་ཟེར་བའི་གོ་དོན་ནི། རང་གི་འཇུག་ཡུལ་གྱི་མིང་གཞིའི་ཡི་གེ་རྣམས་ཀྱི་མགོར་བརྩེགས་ནས་ཡོད་པས་ན་མིང་དེ་ལྟར་བཏགས་པ་ཡིན། ཞེས་གསུངས་འདུག ལར་ནས་༼ ར་མགོ ལ་མགོ ས་མགོ ༽གསུམ་ལ་འཐད་ལྡན་གྱི་མིང་ཚིག་ཅིག་གཏན་འབེབས་གནང་མི་འདུག་ཅིང་། སི་ཏུ་འགྲེལ་ཆེན་ལས་ཀྱང་དེ་དག་ལ་མགོ་ཟེར་བ་ཙམ་དང་། ཡ་ར་ལ་ཝ་རྣམས་ལ་འདོགས་ཟེར་བ་ཙམ་ལས་མི་འབྱུང་སྟེ། དེ་ཉིད་ལས། མགོ་ཅན་དང་འདོགས་ཅན་རྣམས་ལའང་མགོ་དང་འདོགས་ཀྱི་ཡི་གེ་སོ་སོའི་གནས་དང་མཐུན་པའི་བརྗོད་པ་སོ་སོར་འབྱུང་དགོས་པ་དཔེར་ན་སྒྲ་ལྟ་བུ་ལ་ས་ག་ར་རྣམས་རིམ་པར་རང་སྒྲ་ཐོན་ཙམ་དུ་མྱུར་བར་ཀློག་པ་ལྟ་བུ་དང་། ཞེས་པ་ཙམ་མོ། །མགོ་ཡིག་མགོ་ཅན་གྱི་ཁྱད་པར་ནི། (ར་ལ་ས) སྟེ། ར་མགོ ལ་མགོ ས་མགོ་གསུམ་ལ་མགོ་ཅན་དང་། (ཡ་ར་ལ་ཝ) སྟེ། ཡ་བཏགས། ར་བཏགས། ལ་བཏགས། ཝ་བཏགས་རྣམས་ལ་འདོགས་ཅན་ཞེས་ཐ་སྙད་འདོགས་རྐྱང་གནང་གི་འདུག དེ་ནི་ཤིན་ཏུ་ནོར་བ་སྟེ། མགོ་ཅན་ནི་མགོ་གང་ལ་ལྡན་པ་དེ་ལ་ཟེར་གྱི་མགོ་ལ་མགོ་ཅན་ཞེས་བརྗོད་མི་རིགས་པའི་ཕྱིར། དཔེར་ན་བ་ལང་ལ་རྭ་ཅན་ཞེས་བརྗོད་ཀྱི་རྭ་ལ་རྭ་ཅན་ཞེས་བརྗོད་མི་རིགས་པ་དང་སྒོ་ནས་ཀུན་ནས་མཚུངས་སོ། །དེས་ན། ར་མགོ་ (ར་ལ་ས) སོགས་གསུམ་ལ། (མགོ་ཡིག) དང་། ར་སོགས་བཏགས་པའམ་བརྩེགས་པའི་ཡི་གེ་ (རྐ་ལྐ་སྐ) ལ། (མགོ་ཅན) དང་། ཡ་བཏགས་ (ཡ་ར་ལ་ཝ) སོགས་བཞི་ལ། (འདོགས་ཡིག) ཡ་སོགས་བཏགས་པའི་ཡི་གེ་ (ཀྱ་ཀྲ་ཀླ་ཀྭ) ལ། (འདོགས་ཅན) ཞེས་ཐ་སྙད་གདགས་དགོས་སོ། །གནས་ཚུལ་འདི་ཆུང་ཆུང་ཞིག་རེད་སྙམ་ནས་སྣང་ཆུང་དང་གཙིགས་ཆུང་གཏན་ནས་མཛད་མི་རིགས། གང་ལགས་ཤེ་ན། དེང་སང་བོད་ཀྱི་རིག་གནས་འཁྱར་འཁྱོར་ཤེས་པའི་བོད་རིགས་དང་དབྱིན་ཇི་མགོ་སེར་བ་མང་པོས་བསྒྲིགས་པའི་བོད་ཡིག་སློབ་དེབ་མང་པོའི་ནང་དེ་དག་ཉ་ཉུང་མཉམ་བསྲེ་བྱས་ཏེ་བྲིས་པའི་དེབ་ཉོག་མང་དུ་སྣང་བའི་ཕྱིར་རོ། །
|