1370

Tibetan	ཐོད་རྒལ་སྒོམ་པའི་ཡུལ་གང་ལ་གསལ་བ་གསུམ།
Tibetan Alternate
Tibetan Definition	དེ་ཡང་། མདོ་རྒྱུད་རིན་པོ་ཆེའི་མཛོད་དེབ་གཟུགས་གླེགས་བམ་བཞི་པ་མདོ་རྒྱུད་རིན་པོ་ཆེའི་མཛོད་ཀྱི་རྒྱས་འགྲེལ་སྐབས་ཉེར་གཉིས་པ་ཐོད་རྒལ་སྒོམ་པའི་རིམ་པ་ལས་བྱུང་བ་སྟེ། 1.ཡུལ་གྱི་གནས་སྤྱིར་བསྟན་པ་ནི། ཕྱི་ཡུལ་ནམ་མཁའ་ནང་ཡུལ་དབྱིངས་རྣམ་དག ། ཅེས་ཕྱིའི་ཡུལ་ནམ་མཁའ་སྟོང་པ་དང་། ནང་གི་ཡུལ་དབྱིངས་རྣམ་པར་དག་པའི་སྒྲོན་མ་གཉིས་ནི། རིག་པ་ལུ་གུ་རྒྱུད་འཆར་བའི་ཡུལ་དུ་གསལ་ཏེ། ཐལ་འགྱུར་ལས། དབྱིངས་ནི་ཕྱི་དང་ནང་དུ་སྟེ། ། ཕྱི་ནི་སྤྲིན་བྲལ་མཁའ་ལ་འཛིན། ། ནང་དབྱིངས་སྒྲོན་མ་ལམ་དུའོ། ། ཞེས་སོ། ། ཕྱིའི་ཡུལ་ནམ་མཁའ་སྟོང་པ་ལ་རིག་པ་གཏད་པས་དེ་དང་མཚུངས་པའི་ཉམས་སྟོང་གསལ་ལ་རྣམ་དག་ཏུ་འཆར་བའི་ཕྱི་ནམ་མཁའ་བཤད་དེ། དེ་ཉིད་ལས། འདི་ཉིད་ཡུལ་གནད་འདི་ལྟ་སྟེ། ། སྤྲིན་བྲལ་ཕྱི་ཡུལ་སྟོང་པ་ལ། ། རྣལ་འབྱོར་ནམ་མཁའི་བྱ་ལམ་གནས། ། འདི་རང་མ་བྲལ་ཆོས་ཉིད་དོ། ། ཞེས་པ་དང་། སྡུད་པ་ལས། དོན་དེ་གང་ཡིན་ནམ་མཁའ་དག་ལ་བལྟ་བར་གྱིས། ། ཞེས་པ་དང་། ཡུམ་བར་མ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་འདོད་པས་ནམ་མཁའ་རྣལ་འབྱོར་དུ་བྱའོ། ། ཞེས་པ་དང་། ནམ་མཁའ་ཆེ་ལས། རྣལ་འབྱོར་ནམ་མཁའི་བྱ་ལམ་གནས། ། ནམ་མཁའ་སྟོང་པ་སྐྱེ་མེད་ཅིང་། ། སྐྱེ་མེད་དེ་ནི་ནམ་མཁའ་བཞིན། ། ཞེས་པ་དང་། ཐལ་འགྱུར་ལས། ཡུལ་ལ་སྣང་བའི་མཚན་ཉིད་ནི། ། ནམ་མཁའ་སྔོ་བསངས་རྫི་མེད་ལ། ། འོད་དང་ཁ་དོག་དབྱིངས་ཉིད་དང་། ། ཡེ་ཤེས་ལྔ་ཡི་རང་སྣང་གསལ། ། ཞེས་སོ། ། དེ་ལྟར་ཕྱིའི་ནམ་མཁའ་ལ་ནང་དབྱིངས་སྣང་བ་ནི་སྣང་བ་དང་སྟོང་པ་གཉིས་སུ་མེད་པའི་དབྱིངས་ཞེས་བྱ་སྟེ། སྔ་མ་ལས། ཕྱི་དང་ནང་ཀུན་ཆོས་ཀྱི་དབྱིངས། ། རྣམ་པར་དག་པའི་སྤྱོད་ཡུལ་ལ། ། སངས་རྒྱས་སེམས་ཅན་གཉིས་མེད་དེ། ། ལས་ཀྱིས་བཅོས་སུ་ག་ལ་ཡོད། །ཅེས་སོ། ། དེ་ལྟར་ཡུལ་ནམ་མཁའ་སྟོང་པ་དབྱིངས་སྣང་། དབྱིངས་ཀྱི་ར་བར་རིག་པ་ལུ་གུ་རྒྱུད་འགུལ་འཕྲིག་མེད་པར་བཞག་ནས་བལྟ་བ་ནི། རྫོགས་པ་ཆེན་པོ་འདིའི་ལུགས་ཀྱི་གཏད་སོའི་འབེམ་མངོན་སུམ་རང་ངོ་ལ་ལྟ་བ་དབྱིངས་རིག་གཉིས་སུ་མེད་པའི་དགོངས་པ་ཞེས་བྱ་བར་འདོད་དེ། ཡི་གེ་མེད་པ་ལས། སྐྱེ་བ་མེད་པའི་མངོན་སུམ་སངས་རྒྱས་ཀྱིས། ། ཡུལ་མེད་རྣམ་པར་དག་པའི་ནམ་མཁའ་མཐོང་། ། ཞེས་སོ། ། 2.སྒྲོན་མའི་གནད་བྱེ་བྲག་ཏུ་བཤད་པ་ལ་གསུམ་སྟེ། (1)སྔོན་འགྲོ་ནི། དབེན་པར་མཚམས་བཅས་མུན་ཁང་མི་གཡོའི་གནད། ། སྤྱིར་འཁོར་བའི་བྱ་བ་སྤངས་ལ་དབེན་པར་གནས་པ། བྱེ་བྲག་ཏུ་ཞག་ཉི་ཤུ་རྩ་གཅིག་གི་བར་ལ་ཕྱིའི་བྱ་བ་ཐམས་ཅད་སངས་ནས་མཚམས་དམ་པར་བཅད་དེ་བླ་མ་དང་མཁའ་འགྲོ་མཆོད་ནས་རྒྱ་མཚོ་ཨར་གཏད་ཀྱི་མུན་ཁྲིད་ལ་འཇུག་པ། སྒོམ་ཁང་མུན་པས་བརྒྱན་པར་གཅིག་པུར་མི་གཡོ་བ་གསུམ་གྱིས་གནས་པ་སྟེ། ཐལ་འགྱུར་ལས། སྒྲོན་མ་ལྟེམས་པ་འདི་ལྟ་སྟེ། ། དད་ལྡན་འཁོར་བའི་ཡིད་བྲལ་བས། ། བླ་མ་མཆོད་དང་གཏོར་མ་བྱ། ། འཁོར་བའི་འབྲེལ་བ་ཀུན་སྤངས་ལ། ། དབེན་པའི་ཕྱོགས་མ་དུར་ཁྲོད་དུ། ། གྲོགས་སྤངས་གཅིག་པུར་གནས་པར་བྱ། ། ཞེས་སོ། ། (2)དངོས་གཞི་ལ་གཉིས་ཏེ། [1]རྩོལ་མེད་ལའང་གཉིས་ལས། <1>རྩོལ་མེད་རང་གདངས་ནམ་མཁའི་རྣལ་འབྱོར་ནི། གཟིགས་སྟངས་སྨིན་མཁའ་དུ་བ་སྨིག་རྒྱུ་སོགས། ལྟ་སྟངས་དང་གཟིགས་སྟངས་གསུམ་བསྟུན་ཏེ་སྨིན་མཚམས་ནས་སོར་བཅུ་གཉིས་ཀྱི་ཚད་ཀྱི་ནམ་མཁའ་ལ་མིག་མི་འགུལ་སེམས་མ་ཡེངས་རླུང་རབ་ཏུ་དལ་བ་གསུམ་གནད་དུ་བསྣུན་པ་སྟེ། སྒྲོན་མ་སྣང་བྱེད་ལས། མཚན་དུས་རང་གི་གནས་ཁང་དུ། ། ཉིན་མོ་བཞིན་དུ་རྟག་ཏུ་ལྟ། ། ཞེས་སོ། ། དེ་ལ་དང་པོ་དུ་བ་ལྟ་བ་དང་། སྤྲིན་དཀར་པོ་ལང་ལོང་ལྟ་བུ་དང་། སྨིག་རྒྱུ་ལྟ་བུ་དང་། སྐར་མ་ལྟ་བུ། མར་མེ་ལྟ་བུ་དང་། མཐིང་ག་ཁྱབ་པ་ཆེན་པོའི་འོད་རེ་ཁཱ་ནག་པོའི་རྣམ་པ་ན་རོ་ལྟ་བུ་མཐོང་སྟེ། འོད་ཟེར་དང་ཐིག་ལེ་དང་དབྱིངས་རིག་གི་སྟོང་གཟུགས་ཚད་མེད་པ་འཆར་རོ། ། <2>རང་གནད་རྒྱ་མཚོའི་རྣལ་འབྱོར་ནི། གནད་གསུམ་བལྟེམས་པས་སྣང་བ་དཔག་མེད་འཆར། ། ཞེས་འདུག་སྟངས་དང་གཟིགས་སྟངས་རླུང་གནད་གསུམ་བསྟུན་ལ་མཐེབ་མཛུབ་གསུམ་གྱིས་མི་བྱ་བར་གཉིས་ཀྱི་ཙཀྵུའི་འབྲས་བུ་བལྟམས་པས་དང་པོ་དམར་ངམ་པ་དང་ལྗང་སེར་དང་མཐིང་གའི་སྣང་བ་ལ་འོད་ཙེར་ཙེར་ཡོད་པ་སྙམ་བྱེད་པ་དང་། ཐིག་ལེ་སྟོང་པའི་སྒྲོན་མ་དངོས་དམར་སེར་དུ་འཆར་དུས་དར་ཅིག་བལྟེམས་ལ་ཤེས་པ་སྣང་བ་དེར་བལྟ་བ་མ་ཡེངས་པས་མཐེབ་མཛུབ་བཏང་ནས་རྒྱ་མཚོ་དྭངས་སུ་བཅུག་ལ་བལྟའོ། ། ཡང་སྣང་བ་དེ་ཀུན་མི་གསལ་བར་སོང་་དུས་ལྟེམ་ཞིང་ཡང་དྭངས་སུ་བཅུག་པས་ཞག་གསུམ་བཞིན་མ་ལྟེམས་ཀྱང་སྣང་ནས་དེ་ཉིད་ལ་དྭངས་བཅུག་ནས་བསྒོམས་པ་གཅིག་པུས་ཆོག་གོ ། སྣང་བ་ནི་རྩི་བཟང་བ་རྣམས་ལ་འོད་དང་། ཐིག་ལེ་དང་། ལུ་གུ་རྒྱུད་དང་། དབྱིངས་སྣང་དཔག་ཏུ་མེད་པ་འཆར་ལ། ངན་པ་རྣམས་ལ་འཕེལ་སྣང་ཅུང་ཟད་ཉུང་སྟེ། དོན་ལ་ཤེས་པ་སྟོང་གསལ་གྱི་ངང་ལ་བསྒོམས་པས་འཆར་སྣང་མང་ཉུང་འདྲའོ། ། དེ་དག་ནི་ངེས་པའི་དབྱིངས་རིག་གི་སྣང་བ་ཞེས་བྱའོ། ། མ་ངེས་པའི་སྟོང་གཟུགས་ལ་ཚད་མེད་དོ། ། ལྷའི་སྐུ་སྣ་ཚོགས་དང་། འགྲོ་བ་དྲུག་གི་སྣང་བ་དང་། ཡུལ་ཐག་རིང་པོའི་ལྗོངས་དང་། རྒྱ་མཚོའི་གླིང་དང་། ལྷ་ལ་སོགས་པའི་ཡུལ་དང་། རི་མོ་དང་། མཆོད་རྟེན་དང་། པདྨ་དང་། འདྲེ་དང་། རོ་དང་། རི་བོ་བརྩེགས་པ་ལ་སོགས་པ་བརྗོད་ཀྱིས་མི་ལང་བ་འཆར་བ་ནི། རྩ་འདབ་མ་དག་པ་རྣམས་སུ་ནང་གི་རླུང་འདུས་པའི་སྣང་བ་ཡིན་ཏེ་ལྟ་སྟངས་བསྒྱུར་བས་རང་ལོག་ལ་འགྲོ་བ་ཡིན་ནོ། ། གཞན་ཡང་འོད་རྩ་དྭངས་པས་ཕྱི་རོལ་རྒྱང་རིང་པོ་དང་ལུས་ཀྱི་ནང་ཟང་ཐལ་དུ་མཐོང་བ་དང་། སྒོམ་ཁང་ལ་ཟང་ཐལ་དུ་ཕྱིར་འཐོན་པ་འབྱུང་སྟེ། དབུ་མའི་འོད་རྩར་རླུང་ཟིན་པའི་གནད་ལས་འབྱུང་བ་ཙམ་ལས་བཟང་ངན་འདྲ་སྟེ་རློམ་སེམས་དང་འཛིན་པ་མེད་པར་བྱའོ། ། གནད་དེ་དག་ནི་ཐལ་འགྱུར་ལས། གསུམ་པོས་བལྟེམས་པ་མ་ཡིན་པར། ། རང་གི་མཐེབ་དང་མཛུབ་མོ་ཡིས། ། ཐིག་ལེ་སྟོང་པའི་སྒྲོན་མ་བལྟེམས། ། བལྟེམས་པ་དེ་ལས་གང་བྱུང་བ། ། ཆོས་ཉིད་མངོན་སུམ་སྣང་བའོ། ། ཞེས་པ་དང་། སྒྲོན་མ་འབར་བ་ལས། རང་གི་མཐེབ་དང་མཛུབ་མོ་ཡིས། ། ཙཀྵུའི་ཕུག་དང་འགྲམ་བཙིར་ན། ། མངོན་དུ་སྣང་དེ་ཡིད་ཆེས་ཀྱིས། ། དེ་ནི་རྩོལ་མེད་རང་གྲོལ་ལོ། ། ཞེས་སོ། ། ། [2]རྩོལ་བཅས་ཀྱི་གནད་ནི། རྒྱང་ཞགས་བལྟེམས་དང་འོད་རྩ་ཆུང་དུ་ལྟེམས། ། ཞེས་རྒྱུང་ཞགས་བལྟེམས་པ་དང་འོད་རྩ་ཆུང་དུ་ལྟེམས་པ་གཉིས་འཇུག་པ་གཅིག་དུས་གཅིག་ལ་བྱས་པས་སྣང་བ་འོད་གསལ་དུ་མཆེད་པ་དང་། ཤེས་པ་བདེ་གསལ་མི་རྟོག་པའི་ཏིང་ངེ་འཛིན་ཕེབས་པ་དུས་མཉམ་དུ་འབྱུང་སྟེ། དེ་ལས། རྩོལ་བ་ཅན་དེ་ཡང་འདི་ལྟར། ། རང་གི་མཇིང་པའི་ཕྱི་རོལ་རྩ། ། འཕྲུག་ཅིང་འཕར་བ་དྲག་པ་ལ། ། སོར་དང་མཛུབ་ཀྱིས་ཡང་བཙིར་ནས། ། མིག་གི་འདུག་སྟངས་མཁས་པས་བཅའ། ། འོད་ནི་མདའ་གང་ཚུན་ཆད་གསལ། ། དེ་ལ་མཆེད་པའི་དུས་རྣམས་བཟུང་། ། འདི་ཡི་ཐབས་ཀྱི་མན་ངག་ཏུ། ། འདི་ཀུན་དེ་ཡིས་དེར་འགྱུར་རོ། ། ཞེས་སོ། ། (3)རྗེས་སྣང་བའི་འཆར་ཚུལ་ལ་སྣང་བ་དང་པོར་མཐོང་བའི་ཉམས་དང་། གོང་དུ་མཆེད་པ་རྫོགས་པའི་ཉམས་གཉིས་ལས། ། [1]བལྟམས་པའི་སྣང་བ་ཁ་དོག་ལྔ་འཆར་ཞིང་། ། ཞེས་དང་། ཐལ་འགྱུར་ལས། དེ་ལྟར་བལྟམས་པའི་སྣང་བ་ནི། ། དང་པོ་དམར་པོ་དག་པ་ཡིས། ། དབང་རྫོགས་ཟླུམ་པོ་རང་གསལ་རྫོགས། ། མཛུབ་གཉིས་དག་ལས་གསུམ་དུ་འགྱུར། ། དེ་ནས་ཡང་ཡང་བལྟམས་པ་ཡིས། ། ཡེ་ཤེས་ལྔ་ཡི་ཁ་དོག་ནི། ། དཀར་དམར་ལྗང་གུ་མཐིང་སེར་གྱི། ། ཡུལ་ལ་སྣང་སྟེ་རྩོལ་བའོ། ། ཞེས་སོ། ། [2]འོད་ལྔ་རེ་ལྡེ་ཡུལ་གྲུ་སྐུ་ཚོམ་བུ། ། ཞེས་དང་ཐལ་འགྱུར་ལས། དེ་ནས་རྩོལ་བྲལ་ཕྱིར་སྣང་སྟེ། ། རླུང་གི་ཆ་ཡི་འགྲོ་འོང་དང་། ། མེ་ལོང་དག་གི་དབྱིབས་ཙམ་ཡང་། ། གཉིས་དང་གསུམ་གྱི་ཆར་སྣང་ངོ་། ། དེ་ཉིད་རྟག་ཏུ་གོམས་པ་ལས། ། ཁ་དོག་ལྔ་ཡི་འོད་ཀྱི་ཡང་། ། རེ་ལྡེ་ཙམ་ལས་གྲུ་ཆད་སྣང་། ཡུལ་གྲུ་ཙམ་ལས་མཐོང་ཚད་དོ། ། དེ་ལ་གོམས་པའི་ཚད་རྙེད་ནས། ། ཐིག་ལེའི་ནང་དུ་སྐུ་དང་བཅས། ། ཕྱེད་སྐུ་དག་ཏུ་ཡུན་འགའ་གནས། ། དེ་ལས་ལྔ་ལྔ་ཟུང་དུ་བཅས། ། རབ་ཏུ་གསལ་བའི་ཐིག་ལེས་འབྲེལ། ། ཡབ་ཡུམ་སྐུ་ཡི་སྣང་བ་ཅན། ། འཁྲུལ་སྣང་ཟད་ནས་ཞིང་ཁམས་སོ། ། འདི་དུས་ལུས་ངག་ཡིད་ཀྱི་ཚད། ། སོ་སོའི་སྣང་བ་མཐོང་དུས་ཀྱི། ། རང་ལ་སྨིན་པས་རྟགས་རྫོགས་ཏེ། ། ཟད་པའི་ཚད་རྣམས་མངོན་པར་སྣང་། ། འདི་ལ་བརྩོན་འགྲུས་ཆེ་ཆུང་གིས། ། ཞག་དང་ཟླ་བ་ལོ་རྣམས་ཀྱིས། ། སོ་སོའི་དུས་ལ་ངེས་པར་འགྲུབ། ། འགྱུར་བ་མེད་པའི་དུས་དག་ལ། ། སོ་སོའི་ཚད་ལ་ཕེབས་པའོ། ། ཞེས་སོ། ། 3.དབྱིངས་རིག་གི་གནད་གཏན་ལ་དབབ་པ་ལ་གཉིས་ཏེ། (1)དབྱིངས་རིག་གི་རྣམ་པར་གཞག་པ་སྤྱིར་བསྟན་པ་ལ་གསུམ་སྟེ། [1]ངོ་བོ་སྤྱིར་བསྟན་པའི་ངོ་བོ་གཉིས་ནི། <1>ངོ་བོ་དབྱིངས་མཐིང་རིག་པ་ལུ་གུ་རྒྱུད། ། ཅེས་དབྱིངས་ཀྱི་ངོ་བོ་མཐིང་ག་ལས་ཁ་དོག་ལྔར་མཆེད་པའི་འོད་མདངས་ཡིན་ལ། རིག་པའི་ངོ་བོ་དངོས་ནང་ན་ཡོད་ཀྱང་མདངས་ཕྱིར་གསལ་བས་རིག་པ་ཞེས་བཏགས་ཏེ་ལུ་གུ་རྒྱུད་དུ་སྣང་བ་ནི། མུ་ཏིག་ཕྲེང་བ་ལས། དཔེར་ན་གསེར་གྱི་ལུ་གུ་རྒྱུད། ། བཟོ་བོ་མཁས་པས་བརྒྱུས་པ་ལྟར། ། རིག་པས་ཐམས་ཅད་ཤེས་ཤིང་རིག ། རྟོག་མེད་འཁོར་བས་གོས་པ་མེད། ། ལུ་གུ་རྒྱུད་ནི་འབྲེལ་ཆགས་སོ། ། ཞེས་པ་དང་། སེང་གེ་རྩལ་རྫོགས་ལས། རིག་པའི་ཡེ་ཤེས་སྒྲོན་མ་ནི། ། སེམས་ཅན་ཀུན་ལ་རང་ཆས་ཏེ། ། རྣམ་པ་གཉིས་ཀྱི་ཚུལ་དུ་འཆར། ། ཐིག་ལེ་སྟོང་པའི་སྒྲོན་མ་དང་། ། རིག་པ་དབྱིངས་ཀྱི་སྒྲོན་མའོ། ། འདུ་འབྲལ་མེད་པའི་ཚུལ་དུ་འཆར། ། ཞེས་སོ། ། <2>ཁྱད་པར་བསྟན་པ་ལ་ལྔ་ལས། 1)རྟེན་དངོས་ནི། ཙིཏྟ་ན་གཞི་འཛིན་པའི་རིག་པ་ལ་བརྟེན་པ་ནི་མར་མེའི་འོད་མར་མེ་ལ་བརྟེན་པ་ལྟར་རིག་པ་དངོས་ཀྱི་འོད་ཁྱིམ་དང་མདངས་སུ་གནས་ཏེ། ནོར་བུ་འཕྲ་བཀོད་ལས། རང་གི་ཙིཏྟའི་དཀྱིལ་འཁོར་གྱི། ། ཐིག་ལེ་ཉག་གཅིག་རང་རྫོགས་ན། ། ཡེ་ནས་གནས་པའི་རྫོགས་ཆེན་དོན། ། གསང་དོན་རྫོགས་པ་རིག་པའི་ཀློང་། ། ཐིག་ལེ་སྟོང་པའི་སྒྲོན་མ་དང་། ། རང་བྱུང་དབྱིངས་ཀྱི་སྒྲོན་མ་གཉིས། ། སྟོང་དང་མི་སྟོང་མཐའ་ལས་འདས། ། རྩོལ་བ་མེད་པར་མངོན་གནས་པའི། ། སྣང་བ་རྫོགས་ཕྱིར་རང་གནས་པ། ། ཞེས་པ་དང་། དབྱིངས་དང་རིག་པས་རབ་བརྒྱན་ཏེ། ། ལྷུན་རྫོགས་ཐིག་ལེ་ཆེན་པོར་གནས། ། ཞེས་སོ། ། 2)མཚན་ཉིད། དེ་ལ་གཉིས་ལས། དབྱིངས་དེས་རིག་པའི་རང་ཡུལ་བྱེད་པའི་འོད་མདངས་དོན་དམ་གྱི་འབྱུང་ལྔར་གནས་ཤིང་རིག་པ་དེ་རླུང་གི་འགྲོ་འོང་དུ་ཡོད་པ་དབྱིངས་ཀྱི་ར་བར་གཏོད་པ་པོའི་རང་བཞིན་ཏེ། སེང་གེ་རྩལ་རྫོགས་ལས། རིག་པའི་མཚན་ཉིད་འདི་ལྟ་སྟེ། ། ཕྲ་བ་ཉིད་དང་འཕྲོ་བ་དང་། ། ལུ་གུ་རྒྱུད་དང་འགུལ་བའོ། ། དབྱིངས་ཀྱི་མཚན་ཉིད་འདི་ལྟ་སྟེ། ། ཡངས་དང་ལྷུན་སྟུག་སྟོང་མཐའ་ཡས། ། གསལ་དང་དྲོ་དང་བསིལ་བ་དང་། ། ཡང་ཞིང་གཡོ་བའི་བདག་ཉིད་འཛིན། ། ཁྱབ་དང་མུ་ཁྱུད་ར་བའོ། ། ཞེས་སོ། ། དབྱིངས་སྣང་ནི་ཡེ་ཤེས་ལྔའི་རང་མདངས་ཡིན་ལ་དེའི་མཚན་ཉིད་ནི། ཡང་དེ་ལས། ཡེ་ཤེས་མཚན་ཉིད་འདི་ལྟ་སྟེ། ། འབྱུང་དང་བྱུང་དང་རང་གསལ་དང་། ། ཡེ་དང་ཤེས་དང་རྟོགས་པའོ། ། གསལ་དང་འཚེར་དང་འབྱམས་ཡས་ཉིད། ། ཅེས་སོ། ། ལུ་གུ་རྒྱུད་ལས་སྐུའི་སྣང་བ་གྲངས་མེད་པ་འཆར་ལ། དེའི་མཚན་ཉིད་ཀྱང་རྩལ་རྫོགས་ལས། སྐུ་ཡི་མཚན་ཉིད་འདི་ལྟ་སྟེ། ། འགྱུར་བ་མེད་དང་གསལ་བ་དང་། ། སྟོང་པ་དང་ནི་རྟོག་བྲལ་ལོ། ། ཞེས་སོ། ། 3)གནས་ནི་མིག་གཉིས་ཏེ། མིག་ཟུར་ཉིད་ནས་དབྱིངས་འབྱུང་བས། ། ཞེས་པས་སོ། ། 4)དུས་ནི་རྣལ་འབྱོར་པ་རྣམས་ལ་ཚེ་འདིར་འཆར་ལ། སེམས་ཅན་ཀུན་ལ་བར་དོར་འཆར་རོ། ། 5)རྟོགས་པ་ནི་ཆོས་ཉིད་པ་ལ་ཆོས་ཉིད་ཀྱི་གསལ་སྣང་དུ་རྟོགས་ལ། སེམས་ཅན་ལ་མཐོང་ཡུལ་ཙམ་དུ་རྟོགས་པའི་མིང་བརྗོད་དོ། ། སེང་གེ་རྩལ་རྫོགས་ལས། སེམས་ཅན་ཀུན་གྱི་སྣང་བ་བཤད། ། སྣང་བ་དེ་ཉིད་འདི་ལྟ་སྟེ། ། གནས་དང་དུས་དང་རྟོགས་པའོ། ། གནས་ནི་བྲི་གུ་ཏ་ན་གནས། ། དུས་ནི་བར་མ་དོ་ན་འཆར། ། ནམ་མཁའ་དབྱིངས་ཀྱི་སྒྲོན་མར་རྟོགས། ། དེ་ཡང་མཐོང་བའི་དུས་སུ་བསྟན། ། ཞེས་སོ། ། ། [2]རྣམ་དབྱེ་བྱེ་བྲག་ཏུ་བཤད་པ་ནི། གཞི་ལམ་འབྲས་བུའི་དབྱིངས་རིག་རྣམ་པ་གསུམ་སྟེ། (1)གཞིའི་དབྱིངས་རིག་ལའང་བྱ་བ་རྫོགས་པའི་གཞི་རིག་པ་ཀ་དག་གི་སྣང་བ་ཡིན་ལ། རྟོགས་བྱེད་ཐབས་ཀྱི་གཞི་ནི་དེའི་སྣང་བ་ནང་དབྱིངས་ད་ལྟ་སྙིང་ག་ན་འོད་མདངས་སུ་གསལ་བའོ། ། (2)ལམ་གྱི་དབྱིངས་རིག་ནི། མངོན་སུམ་ཡུལ་ལ་ཤར་དུས་འོད་ཀྱི་མུ་ཁྱུད་ནི་དབྱིངས་ལ། རྡོ་རྗེ་ལུ་གུ་རྒྱུད་སྐུ་ལྔའི་ཐིག་ལེས་འབྲེལ་བ་རིག་པའོ། ། (3)འབྲས་བུའི་དབྱིངས་རིག་ནི། འབྲས་བུ་ལ་ཡང་དབྱིངས་འོད་ལྔའི་ཞིང་སྣང་ནམ་མཁའ་ཁྱབ་པར་སྣང་སྟེ། རིག་པ་ཤེས་རབ་ཀྱི་རྟོག་པས་སྐུར་སྨིན་ཏེ་ཞི་ཁྲོའི་ཚོམ་བུ་དང་དཀྱིལ་འཁོར་དུ་གསལ་བ་རྣམས་སོ། ། དེ་ལྟར་ན་དབྱིངས་རབ་ཡེ་ཤེས་ཁ་དོག་རིག་པ་སྐུ་རྣམས་འདུ་འབྲལ་མེད་པ་ནི་དབྱིངས་རིག་འདུ་འབྲལ་མེད་པའི་ཡེ་ཤེས་ཞེས་བྱའོ། ། དེ་ཡང་དབྱིངས་ཀྱི་ཁ་དོག་གི་ཆ་ལ་ཡེ་ཤེས་ཀྱི་སྣང་བ་ཟེར་ཡང་དབྱིངས་ཀྱི་བྱེ་བྲག་ཡིན་ནོ། ། སེང་གེ་རྩལ་རྫོགས་ལས། དེ་ཡང་དབྱིངས་དང་རིག་པ་བཤད། ། དེ་ཡི་བཤད་ལུགས་འདི་ལྟ་སྟེ། ། གཞི་ལ་གནས་པའི་དབྱིངས་རིག་དང་། ། ལམ་ལ་སྣང་བའི་དབྱིངས་རིག་དང་། ། མཐའ་ལ་སྐྱོལ་བའི་དབྱིངས་རིག་གོ ། གཞི་ཡི་དབྱིངས་རིག་རྣམ་གཉིས་ནི། ། རྟོགས་བྱེད་ཐབས་ཀྱི་གཞི་དང་ནི། ། བྱ་བ་རྫོགས་པའི་གཞི་རུ་བཤད། ། རྟོགས་བྱེད་ཐབས་ཀྱི་གཞི་ཡི་དུས། ། བག་ཆགས་ཕུང་པོ་འདི་ལ་བཤད། ། བྱ་བ་རྫོགས་པའི་གཞི་གནས་ནི། ། ཆོས་ཉིད་ཀ་དག་སྣང་བར་བཤད། ། རྟོགས་བྱེད་ཐབས་ཀྱི་གཞི་བཤད་པ། ། དབྱིངས་ནི་དབྱིངས་ཀྱི་སྒྲོན་མ་ལ། ། རིག་པ་ལུ་གུ་རྒྱུད་དུ་གསལ། ། ལམ་ལ་སྣང་བའི་དབྱིངས་རིག་ནི། ། དབྱིངས་ནི་འོད་ཀྱི་མུ་ཁྱུད་ལ། ། རིག་པ་སྐུ་ལྔའི་སྣང་བར་བཤད། ། མཐའ་ལ་སྐྱོལ་བའི་དབྱིངས་རིག་ནི། ། དབྱིངས་ནི་རང་བཞིན་སྣང་བ་ལ། ། རིག་པ་སྐུ་དང་ངོ་བོར་བསྟན། ། དེ་ཕྱིར་དབྱིངས་དང་རིག་པ་བཤད། ། དེ་བཞིན་ཉིད་དུ་རབ་ཏུ་གནས། ། དབྱིངས་དང་རིག་པ་ཡེ་ཤེས་གསུམ། ། འདུ་བྲལ་མེད་པའི་ཚུལ་དུ་གནས། ། ཞེས་སོ། ། [3]རྟོགས་པར་གདམས་པ་ནི། མན་ངག་གནད་དུ་བསྣུན་ན་དབྱིངས་རིག་ཤེས། ། ཞེས་རིག་པའི་ངོ་བོ་ཆོས་སྐུ་དྲི་མེད་ཀ་དག་ཡིན་པས་ལྟ་སྒོམ་ཉམས་ལེན་ལས་འདས་པ་ཡིན་ཀྱང་བྱུང་ན་གཡག་ཡོད་དུ་སོང་བས་ཉམས་སུ་མ་བླངས་ན་ཕན་མེད། རྡོས་བཅས་ཀྱི་ལུས་དང་འཁྲུལ་རྟོག་གི་སེམས་དག་ལ་དབྱིངས་རིག་གི་མན་ངག་གནད་དུ་བསྣུན་དགོས་པས་ན་དབྱིངས་རིག་ཤེས་དགོས་ཏེ། ཡི་གེ་མེད་པ་ལས། ཨེ་མ་དངོས་པོ་མེད་པའི་སྣང་བ་ངོ་མཚར་ཆེ་བ་སྟེ་རགས་པའི་འབྱུང་བ་ལྔས་བསྒྲིབས་པས་ལུས་མེད་པ་ལ་སྣང་བ་མ་ནུས་སོ། ། རིག་པ་རང་སྣང་གི་ངོ་བོ་ལྷུན་བརྗིད་དེ་ཕྲ་བའི་ཉོན་མོངས་པས་བསྒྲིབས་པས་རྟག་མ་ཐུབ་པའོ། ། ཆོས་ཉིད་ལ་བཀོད་པའི་སྣང་བ་གསལ་དྭངས་ཏེ་སྣ་ཚོགས་དུ་མའི་སྤྱོད་པས་བསྒྲིབས་ནས་མངོན་སུམ་དུ་མེད་དོ། ། དེ་ཡང་རིག་པའི་ངོ་བོ་བཟུང་བར་དཀའ་ཡང་ཡེ་ཤེས་ཀྱི་རྩལ་དལ་བས་འགྲུབ། རིག་པའི་དབྱིངས་མི་འགྱུར་བར་གནས་ཀྱང་རིག་པའི་སྟོབས་སྐྱོན་ཟད་པས་འགྲུབ། རིག་པའི་རང་བཞིན་ཀུན་ལ་ཁྱབ་ཀྱང་ཆོས་ཀྱི་སྐུ་གདམས་ངག་ལ་ཐུག་གོ་ཞེས་གསུངས་སོ། ། (2)ཉམས་སུ་ལེན་ཚུལ་བྱེ་བྲག་ཏུ་བཤད་པ་ནི། སོ་སོའི་གནད་ནི། ལུས་ཡུལ་རིག་གནད་མི་འགུལ་དལ་བ་གཅེས། ། ཞེས་རིག་པའི་ཡེ་ཤེས་ལུས་ལ་གནས་པས་དང་པོ་ལུས་གནད་འདུག་སྟངས་ལས་མི་འདའ་བ་གཅེས། ཡུལ་གྱི་གནད་ནམ་མཁའ་ཡིན་པས་མཛོད་སྤུའི་ནམ་མཁའ་ལ་མི་འགྱུར་བར་བལྟ་བ་གཅེས། རིག་པའི་གནད་ལུ་གུ་རྒྱུད་དབྱིངས་ཀྱི་ར་བར་བཅུག་ནས་མི་འགུལ་བར་འཇོག་པ་ལ་མིག་མི་འགུལ་ཞིང་རླུང་རབ་ཏུ་དལ་བ་གཅེས་པ་སྟེ། དུང་ཡིག་ཅན་ལས། རིག་པ་རྟེན་ས་ལུས་ཡིན་ཏེ། ། ལུས་ཤིག་མེད་ན་མེད་པ་སྟེ། ། ཡོད་ན་ཡེ་ཤེས་ཡོད་པར་ངེས། ། དེ་ལྟར་ལུས་ལ་ཡོད་པ་དེ། ། ཆོས་ཅན་སྤྱི་ཡི་མཚན་ཉིད་ཀྱིས། ། སྤྱི་བོའི་གཙུག་ནས་རྐང་མཐིལ་བར། ། བརྟག་དཔྱད་རྣམ་པ་སྣ་ཚོགས་ཀྱིས། ། དཔྱད་པས་དེ་ཉིད་རྙེད་པ་མིན། ། མོ་དང་པྲ་ལ་སོགས་པ་ཡི། ། རྩིས་ནི་རྣམ་པ་སྣ་ཚོགས་ཀྱིས། ། བལྟས་ཤིང་དཔྱད་ཀྱང་རྙེད་པ་མིན། ། འོ་ན་གཏན་མེད་ཡིན་ཞེ་ན། ། གཏན་དུ་མེད་པ་མ་ཡིན་ཏེ། ། ལུས་ངག་བལྟེམས་ན་མངོན་དུ་སྣང་། ། དཔེར་ན་ལུས་ལ་ཁྲག་ཁྱབ་སྟེ། ། སྐྱེས་བུ་གླེན་པ་འགའ་ཞིག་གིས། ། གང་གང་ལུས་ལ་ཁྲག་བཙལ་བས། ། གཅིག་ཀྱང་འབྱུང་བ་མ་ཡིན་ནོ། ། འོ་ན་ལུས་ལ་ཁྲག་མེད་དམ། ། ལུས་ལ་མེད་པ་མ་ཡིན་ཏེ། ། ཐམས་ཅད་ཁྱབ་ཅིང་ཁྲག་ལ་བརྟེན། ། སྐྱེས་བུ་ཐབས་དང་ལྡན་པ་ཡིས། ། རྩ་ལ་གཏར་ན་ཁྲག་འབྱུང་ལྟར། ། ལུས་གནད་ཡེ་ཤེས་དེ་བཞིན་ནོ། ། ཡུལ་གྱི་གནད་ནི་ནམ་མཁའ་སྟེ། ། འདི་ཉིད་མི་ཤེས་ཁ་ཅིག་གིས། ། ཉིན་དང་མཚན་མོ་མེད་པ་རུ། ། ནམ་མཁའ་ཉིད་ལ་བལྟ་བྱས་ཀྱང་། ། འདི་ཉིད་མཐོང་བ་མ་ཡིན་ནོ། ། གཏན་དུ་མེད་པ་མ་ཡིན་ཏེ། ། འདི་ཉིད་གོམས་པའི་རྣལ་འབྱོར་པས། ། སྐད་ཅིག་ཉིད་ལ་དོན་ཤེས་འགྱུར། ། རིག་པའི་གནད་ནི་ཉིན་མཚན་དུ། ། རྟག་ཏུ་དེ་ཉིད་ལ་གནས་བྱ། ། གཞན་པའི་སེམས་ཀྱིས་སྐད་ཅིག་ཀྱང་། ། ཡེངས་ཤིང་འབྲལ་བར་མི་བྱའོ། ། འོ་ན་གནད་གསུམ་ཡེ་ཤེས་དེ། ། འདི་ཉིད་མ་གཏོགས་གཞན་རྣམས་ཀྱིས། ། མཐོང་བ་དག་ནི་མེད་དམ་ཅི། ། གཞན་ལྟ་སྤྱོད་པའི་རྣལ་འབྱོར་པས། ། འདི་ཉིད་མ་བསྟན་བར་དུ་ནི། ། ཇི་ལྟར་བརྟགས་ཀྱང་མཐོང་བ་མིན། ། དམ་པའི་གདམས་ངག་འདི་བསྟན་ན། ། བ་རྣམས་ལུས་ལ་འོ་མས་ཁྱབ། ། མཁས་པས་ནུ་མ་ནས་འཐེན་ན། ། འོ་མ་དག་ནི་འབྱུང་བ་བཞིན། ། མངོན་དུ་གསལ་ཏེ་ལུས་གནད་ཀྱི། ། རྟག་ཏུ་གོམས་དང་ཁྱད་མེད་མཐོང་། ། བཤན་པ་སྨད་འཚོང་སྡིག་ཅན་ལ། ། འདི་ཉིད་བསྟན་པས་གྲོལ་ཐོབ་འགྱུར། ། ཉན་ཐོས་རང་སངས་རྒྱས་རྣམས་དང་། ། བྱང་སེམས་སྒྲིབ་པ་བྲལ་བས་ཀྱང་། ། འདི་ཉིད་གནད་གསུམ་གདེང་མེད་ན། ། རྡུལ་ཕྲན་ཙམ་ཡང་། མཐོང་མི་འགྱུར། ། གཞན་དག་གིས་ནི་སྨོས་ཅི་དགོས། ། དེས་ན་གོམས་དང་ཐབས་ཉིད་གཅེས། ། ཞེས་སོ། །
Tibetan Source	《མདོ་རྒྱུད་མཛོད་ཚི་པ་》ཤ་256.16ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number