2585

Tibetan	གྲུབ་མཐའི་ཚིག་གིས་མི་མཚོན་པར་བསྟན་པ་བཞི།
Tibetan Alternate
Tibetan Definition	དེ་ཡང་། མདོ་རྒྱུད་རིན་པོ་ཆེའི་མཛོད་དེབ་གཟུགས་གླེགས་བམ་བཞི་པ་མདོ་རྒྱུད་རིན་པོ་ཆེའི་མཛོད་ཀྱི་རྒྱས་འགྲེལ་སྐབས་ཉི་ཤུ་པ་རྫོགས་ཆེན་ཨ་ཏིའི་ལྟ་བ་གཏན་ལ་ཕབ་པ་ལས་བྱུང་བ་སྟེ། 1.མངོན་པའི་ང་རྒྱལ་ཅན་གྱིས་མི་རྟོགས་པར་བསྟན་པ་ནི། རྟོག་གེ་སྨྲོས་པའི་ང་རྒྱལ་གྱིས་མི་རྟོགས། ། ཞེས་ད་ནི་གྲུབ་པའི་མཐའི་ཚིག་འགའ་ཞིག་འཇལ་བ་རྣམས་ཀྱིས་ཡང་དག་པའི་དོན་ཇི་ལྟ་བ་ཉིད་མི་རྟོགས་པར་བསྟན་པ་ནི། ཕྱོགས་ཆོས་དང་རྗེས་སུ་འགྲོ་ལྡོག་གི་ཁྱབ་པ་བརྩི་ཞིང་། རྟགས་མཐུན་ཕྱོགས་དང་མི་མཐུན་ཕྱོགས་ལ་ཞུགས་སམ་མ་ཞུགས་ཞེས་པ་ལ་སོགས་པ་རང་རང་གི་ཀུན་རྟོག་གཡོ་ཞིང་ཉོན་མོངས་པའི་བུད་ཤིང་ཕྱིན་ཅི་ལོག་གི་སྤུད་པའི་སྤར་བས་སྡུག་བསྔལ་དུ་མའི་མེ་དཔུང་རབ་ཏུ་འབར་ཞིང་། རང་དང་གཞན་གྱི་རྒྱུད་བསྲེགས་པ་ལ་མཁས་པ་མངོན་པའི་ང་རྒྱལ་རི་བོ་དང་མཉམ་པའི་གང་ཟག་གིས་མི་རྟོགས་ཏེ། ལང་ཀར་གཤེགས་པ་ལས། བྱིས་པ་ངན་པ་རྟོག་གེ་བ། ། རོ་དང་འདྲ་བས་དེ་དག་བརྟགས ། ཞེས་པ་དག་གིས་བརྟགས་པའི་ཀུན་ཏུ་སྤྲོས་པའི་དྲ་བ་ཆེན་པོ་སྟོང་དུ་མཆེད་པའི་ཆོས་ལྟར་མ་ཡིན་གྱི། ཆོས་དང་སེམས་ཀྱི་གནས་ལུགས་ཡེ་ནས་རྣམ་པར་དག་པས་གྲུབ་བསལ་མེད་པ་སྟེ། ནམ་མཁའ་རིན་པོ་ཆེའི་མདོ་དང་གཤེད་དམར་གྱི་རྒྱུད་ལས་ཇི་ལྟར་གསུངས་པ་ཉིད་བྱམས་པས་མངོན་རྟོགས་རྒྱན་དང་རྒྱུད་བླར་བཀོད་པ་ལས། འདི་ལ་བསལ་བྱ་ཅི་ཡང་མེད། ། བཞག་པར་བྱ་བ་ཅུང་ཟད་མེད། ། ཡང་དག་ཉིད་ལ་ཡང་དག་བལྟ། ། ཡང་དག་མཐོང་ན་རྣམ་པར་གྲོལ། ། ཞེས་པ་ལྟ་བུའམ། དྲི་མ་ཡེ་ནས་མེད་པས་བྱང་བ་དང་། ཡོན་ཏན་ཡེ་ནས་རྫོགས་པས་ཆུབ་པ་དང་། འཆར་ཚུལ་ཅིར་ཡང་མ་འགགས་པས་བྱང་ཆུབ་ཀྱི་སེམས་ཞེས་བྱ་སྟེ། སྐུ་གསུམ་ཡེ་ནས་ལྷུན་གྲུབ་ཏུ་བསྟན་པ་ནི། ཀུན་བྱེད་ལས། བྱང་བའི་དོན་ནི་འདི་ལྟ་སྟེ། ། སྙིང་པོ་བྱང་ཆུབ་སེམས་དེ་ནི། ། རང་བྱུང་ཡེ་ནས་རྣམ་དག་པས། ། ཀུན་བྱེད་རྒྱལ་པོས་བྱས་པ་ཀུན ། ཀུན་བཟང་ཉིད་དུ་རྣམ་དག་པས། ། བྱང་ཞེས་བྱ་བར་བཤད་པ་ཡིན། ། ཆུབ་ཅེས་བྱ་བ་འདི་ལྟ་སྟེ། ། སྙིང་པོ་རང་བྱུང་ཡེ་ཤེས་དེས། ། སྣང་བ་དང་ནི་སྲིད་པ་དང་། ། སྣོད་དང་བཅུད་ཀྱིས་བསྡུས་པ་དང་། ། དུས་གསུམ་སངས་རྒྱས་ཐམས་ཅད་དང་། ། ཁམས་གསུམ་རྒྱུད་དྲུག་སེམས་ཅན་དང་། ། དེ་བཞིན་ཉིད་ནི་ཐམས་ཅད་ལ། ། ཀུན་ལ་ཆུབ་སྟེ་ཁྱད་པར་གནས། ། དེས་ན་ཚུབ་ཅེས་བྱ་བར་བཤད། ། སེམས་ཀྱི་དོན་ནི་འདི་ལྟ་སྟེ། ། སྙིང་པོ་རང་བྱུང་ཡེ་ཤེས་དེས། ། སྣང་སྲིད་སྣོད་བཅུད་ཐམས་ཅད་ལ། ། འཇུག་ཅིང་དབང་སྒྱུར་གསལ་བར་སྤྱོད། ། དེས་ན་སེམས་ཞེས་བྱ་བར་བཤད། ། ཅེས་སོ། ། 2.གྲུབ་མཐའི་དབྱེ་བས་མི་རྟོགས་པར་བསྟན་པ་ནི། སྣ་ཚོགས་གྲུབ་མཐའི་དབྱེ་བས་གཤིས་མི་རྟོགས། ། གཤིས་སེམས་ཉིད་རྣལ་མའི་དོན་ནི་སྨྲ་བསམ་བརྗོད་པ་ལས་འདས་པས་བསམ་བརྗོད་ཀྱི་གྲུབ་མཐས་མི་རྟོག་སྟེ། གྲུབ་མ་གྲུབ་དང་མཐའ་དབུས་གཉིས་སུ་མེད་པས་གྲུབ་མཐའ་ཞེས་གདགས་སུ་མེད་པ་དང་ནམ་མཁའ་ལྟ་བུའི་རང་བཞིན་གང་དུའང་རྒྱ་མ་ཆད་པ་འདིའི་ལུགས་སོ་ཞེས་ཕྱོགས་སུ་མ་ལྷུང་བ་སྟེ། ཀུན་བྱེད་ལས། ཆོས་ཀུན་ནམ་མཁའི་མཚན་ཉིད་དེ། ། ནམ་མཁའི་མཚན་ཉིད་དེ་བཞིན་ཉིད། ། ཅེས་སོ། ། དོན་དེ་ལྟ་བུ་བློས་བསམ་དུ་མེད་པ་ལ་བསམས་པས་འཁྲུལ་བའི་ཕྱིར་ཚིག་དང་ཡི་གེ་མེད་པ་ཉིད། དེ་ལས་ཚིག་དང་ཡི་གེའི་དོན་བརྟགས་པས། ཚིག་ཡིག་དོན་ལ་བརྟགས་མེད་པས། ། རྟོག་མེད་མཉམ་པ་དེ་བཞིན་ཉིད། ། དེ་ཡང་ནམ་མཁའི་དགོངས་པར་གནས། ། བསམ་དུ་མེད་པའི་དོན་འདི་ནི། ། ནམ་མཁའ་བཞིན་དུ་ཡེ་གནས་སོ། ། ཞེས་སོ། ། 3.གཞི་མ་གྲུབ་པ་ལ་དཔྱད་པས་མི་རྟོགས་པར་བསྟན་པ་ནི། མཁར་ཚལ་བསམ་ནས་མཐུན་མིན་ཕྱོགས་བཟུང་དཔྱད། ། ཅེས་རང་རང་གི་གྲུབ་མཐས་འཇལ་བ་ཐམས་ཅད་ནམ་མཁའ་སྐྱེད་མོས་ཚལ་བློ་མཐུན་དུ་བཞག་ནས། དེའི་མཐུན་ཕྱོགས་མི་མཐུན་ཕྱོགས་རྩོད་པ་ལྟར། ཤེས་བྱ་ཞེས་པ་ལྟ་བུའི་སྤྱིར་རློམས་ནས་དངོས་པོ་དངོས་མེད་ལ་སོགས་པ་རང་རང་གི་རྟོག་པ་རློམས་པའི་སྤྱི་བྱེ་བྲག་གི་ཕུང་པོ་དབྱེ་གཞི་གཟུགས་ལ་སོགས་པ་བྱེ་བྲག་ཏུ་བྱེད་པ་ཐམས་ཅད་ཕ་རོལ་གྱི་གཤིས་ལ་མ་གྲུབ་པར་བློས་སྒྲོ་བཏགས་ནས་འཇལ་བ་སྟེ། འཁྲུལ་སྣང་གཞི་མེད་པ་ལ་རྣམ་དབྱེ་གཞི་བཅས་ཀྱི་གྲུབ་མཐས་སྒྲིབ་པ་ཀུན་བརྟགས་ལ་སོགས་པ་ལས་གཞན་མེད་པས་དགོས་པ་མེད་དེ། རིགས་པ་དྲུག་ཅུ་པའི་འགྲེལ་པར། ཁྱེད་ཅག་ཐོག་མ་མེད་པའི་ཀུན་ནས་ཉོན་མོངས་པའི་འཆིང་བས་བཅིངས་པར་མ་ཟད། ད་དུང་ཡང་རང་གི་གྲུབ་མཐའ་ངན་པས་སྦྱར་བའི་འཆིང་བས་བཅིངས་པ་དར་གྱི་སྲིན་བུ་རང་གི་ཁ་ཆུས་འཆིང་བ་བཞིན་དུ། ཞེས་པ་ལྟར་ཡིན་ནོ། ། དེའང་གཤིས་ནམ་མཁའ་དང་འདྲ་བས་རྣམ་དབྱེ་ངོ་བོ་ཉིད་ཀྱིས་མེད་པར་རྟོགས་པར་བྱ་སྟེ། ཀུན་བྱེད་ལས། ཆོས་ཀུན་བྱང་ཆུབ་སེམས་ཡིན་དེ་དཔེ་ནི། ། ཀུན་དཔེ་ནམ་མཁའ་ལྟ་བུའི་རང་བཞིན་དུ། ། བྱང་ཆུབ་སེམས་ཀྱི་དོན་ཡང་དེ་བཞིན་ནོ། ། ཞེས་སོ། ། 4.བློས་བྱས་ཀྱི་སྒོམ་པས་བསླད་པར་གདམས་པ་ནི། སེམས་ཉིད་དག་པར་བཅོས་བསྒྱུར་དྲི་མས་བསླད། ། ཅེས་འདི་ལྟར་གཟོད་ནས་ལྷུན་གྱིས་གྲུབ་པའི་རང་བཞིན་ལ་ནི་བསྐྱེད་པ་དང་རྫོགས་པས་སྤྲོས་པ་འཆེལ་པོ་ལས་བླང་དོར་མེད་པའི་ངོ་བོ་མི་མཐོང་བས་ལྷུན་མཉམ་རྫོགས་པ་ཆེན་པོར་ལ་བཟླ་བ་ནི། ཀུན་བྱེད་ལས། མཚན་མ་གྲངས་ལ་དགའ་བའི་གདུལ་བྱ་ལ། ། ཚོགས་དང་དཀྱིལ་འཁོར་བསྐྱེད་དུ་ཡོད་པར་བསྟན། ། གང་ཞིག་སྐུ་གསུམ་ལམ་ལ་བརྟེན་བྱས་ནས། ། མཚན་མོ་གྲངས་ཀྱི་སྒོ་ནས་རྟོག་བྱེད་པ། ། བསྐལ་བ་བྱེ་བ་བརྒྱ་ཕྲག་ཡུན་རིང་དུ། ། དཀྱིལ་འཁོར་བསྐྱེད་དུ་མེད་པའི་དོན་མི་རྟོགས། ། ཀྱེ་དེ་བས་སྟོན་པ་ཀུན་བྱེད་རྒྱལ་པོ་ངས། ། ཚོགས་དང་དཀྱིལ་འཁོར་རང་བཞིན་ལྷུན་རྫོགས་པས། ། མ་བྱས་རང་བཞིན་གྲུབ་པའི་ཆོས་ཉིད་ལ། ། བསྐྱེད་ཅིང་བསམ་དུ་མེད་པའི་དོན་རྟོགས་ན། ། ཀུན་བྱེད་རྒྱལ་པོའི་དཀྱིལ་འཁོར་རྟོགས་པ་ཡིན། ། ཞེས་སོ། །
Tibetan Source	《མདོ་རྒྱུད་མཛོད་མི་པ་》ཤ་104.2ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number