7888

Tibetan	མཐོང་བའི་ལམ་བཤད་པ་ལ་བརྒྱད།
Tibetan Alternate
Tibetan Definition	1.མཚན་ཉིད་གཞག་པ་ནི། མཐོང་ལམ་དེ་ཉིད་གསར་མཐོང་། ། ཞེས་པ་སྟེ། མྱ་ངན་ལས་འདས་པར་བགྲོད་པའི་གཞི་གང་ཞིག དེ་ཁོ་ན་ཉིད་གསར་དུ་མངོན་པར་རྟོགས་པའི་གནས་སྐབས་ཀྱིས་བསྡུས་པའོ། 2. མཚན་གཞི་ངོས་བཟུང་བ་ནི། འདས་པ་ཡི། ། ཞི་ལྷག་མཚུངས་ལྡན། ། ཞེས་པ་སྟེ། ཕྱོགས་གཅིག་སྤོང་བའི་གཉེན་པོ་མཐོང་ལམ་གྱི་མཚན་གཞི་བདེན་པ་བཞི་ལ་བདག་མེད་པའི་ཆོས་ཉིད་མངོན་སུམ་དུ་མཐོང་སྟེ་འཇིག་རྟེན་ལས་འདས་པའི་ཞི་གནས་དང་ལྷག་མཐོང་མཚུངས་པར་ལྡན་པའོ། ། 3. རབ་ཏུ་དབྱེ་བ་ནི། རང་ངོར་དབྱེ་བ་མེད། ། གཙོ་བོར་བྱང་ཆུབ་ཡན་ལག་བདུན་ལ་བསླབ། ། ཅེས་པ་སྟེ། རྟེན་གང་ཟག་གིས་ཕྱེ་ན་ཞུགས་གནས་གཉིས་དང་། ཐེག་པས་ཕྱེ་ན་ཉན་རང་བྱང་སེམས་ཀྱི་མཐོང་ལམ་གསུམ་དང་། ངོ་བོས་ཕྱེ་ན་སྐད་ཅིག་མ་བཅུ་དྲུག་ལ་སོགས་པར་དབྱེར་ཡོད་ཀྱང་དེ་ནི་ཉན་ཐོས་དང་སྒོ་བསྟུན་པ་ཡིན་ཏེ། མཐོང་ལམ་རང་གི་ངོ་བོ་ནི་སྐད་ཅིག་མ་གཅིག་གིས་བསྡུས་པའི་ཕྱིར་དབྱེ་བ་བྱར་མེད་དོ། ། ལམ་འདིར་དྲན་པ་ཡང་དག་སོགས་བྱང་ཆུབ་ཀྱི་ཡན་ལག་བདུན་ལ་བསླབ་པའོ། ། 4. རང་བཞིན་གཏན་ལ་དབབ་པ་ལ་གཉིས་ཏེ། (1)མཐོང་སྤང་སྤོང་ཚུལ་གྱི་རྣམ་གཞག་ནི། མཐོང་སྤང་བརྒྱད་ཅུ་རྩ་བརྒྱད་དགུ་བཅུ་བཞི། ། བརྒྱ་རྩ་བརྒྱད་སོགས་འགག་དང་སྐྱེ་འགྱུར་དང་། ། གཉིས་མེད་ཡེ་ཤེས་སྐྱེས་པས་སྤོང་བར་འདོད། ། ལམ་འདིའི་རང་བཞིན་གཏན་ལ་དབབ་པ་ལ་གསུམ་སྟེ། [1]སྤང་བྱའི་མཚན་ཉིད་ནི། སྤྱིར་ཉོན་མོངས་པ་ཙམ་གྱི་མཚན་ཉིད་སེམས་ཀྱི་རྒྱུན་མ་ཞི་བར་བྱེད་པ་ཡིན་ལ། བྱེ་བྲག་ཏུ་མཐོང་སྤང་གི་མཚན་ཉིད་ཀུན་ཏུ་བརྟགས་པས་སེམས་རྒྱུད་རབ་ཏུ་ཞི་བར་བྱེད་པའོ། [2]སྤང་བྱའི་རབ་དབྱེ་ལ་གཉིས་ཏེ། <1>ངོ་བོའི་དབྱེ་བ་ནི་གཉིས་ཏེ། རྩ་ཉོན་དང་ཉེ་ཉོན་ནོ། ། རྩ་ཉོན་སྤངས་ན་ཉེ་ཉོན་ཤུགས་ལ་སྤང་བའི་ཕྱིར་དང་པོ་བཤད་ན། འདོད་ཆགས། ཁོང་ཁྲོ། ང་རྒྱལ། མ་རིག་པ། ཐེ་ཚོམ། ལྟ་བ་སྟེ་དྲུག་གོ ། ལྟ་བ་ལ་ལྔ། འཇིགས་ལྟ་མཐར་ལྟ་ལོག་ལྟ་གསུམ། ལྟ་བ་དང་ཚུལ་ཁྲིམས་བརྟུལ་ཞུགས་མཆོག་འཛིན་གཉིས་རྣམས་སོ། ། <2>སྤོང་ཚུལ་གྱི་དབྱེ་བ་ལ་གཉིས་ཏེ། མཐོང་སྤང་དང། སྒོམ་སྤང་ངོ་། ། དང་པོ་ནི། བྱེ་བྲག་སྨྲ་བའི་ལུགས་ལ། མཛོད་ལས། དེ་དག་བཅུ་དང་བདུན་བདུན་བརྒྱད། ། ལྟ་བ་གསུམ་གཉིས་མ་གཏོགས་པ། ། འདོད་ན་སྡུག་བསྔལ་ལ་སོགས་པ། ། མཐོང་བས་རིམ་བཞིན་སྤོང་བར་བྱེད། ། ཅེས་བརྒྱད་ཅུ་རྩ་བརྒྱད་དུ་འདོད་ལ། བསྡུ་བར་མཐོང་སྤང་དགུ་བཅུ་རྩ་བཞིར་བཤད་ཅིང་། ཀུན་བཏུས་ལས་འདོད་ཁམས་ན་ཀུན་ནས་ཉོན་མོངས་པ་ལྔ་དང་། ལྟ་བས་བསྡུས་པའི་ལྔ་སྟེ་བཅུ་པོ་བདེན་པ་བཞི་ལ་འཇུག་པས་བཞི་བཅུ། ཁམས་གོང་མ་གཉིས་ན་ཁོང་ཁྲོ་མེད་པས་དགུ་དགུ་དང་། དེ་རྣམས་བདེན་བཞི་ལ་འཇུག་པས་དགུ་བཞི་སོ་དྲུག་ཕྲག་གཉིས་བདུན་ཅུ་རྩ་གཉིས་ཏེ་བརྒྱ་རྩ་བཅུ་གཉིས་སུ་བཤད་དོ། ། འོ་ན་གཟུགས་མེད་ན་ལུས་ངག་གི་སྤྱོད་པ་སྡིག་པ་དག་གྲོལ་གྱི་རྒྱུར་འཛིན་པའི་ཚུལ་ཁྲིམས་དང་བརྟུལ་ཞུགས་མཆོག་འཛིན་བཞི་མི་འཐད་པས་མཐོང་སྤང་བརྒྱ་རྩ་བརྒྱད་དུ་འགྱུར་རོ་ཞེ་ན་འགྱུར་ཏེ། དེ་ན་ལུས་ངག་གི་སྤྱོད་པ་འདག་གྲོལ་གྱི་རྒྱུར་འཛིན་པ་མེད་ཀྱང་ལྟ་བ་ལ་རང་གྲོལ་གྱི་རྒྱུར་འཛིན་པ་ཡོད་པ་ཚུལ་ཁྲིམས་དང་བརྟུལ་ཞུགས་མཆོག་འཛིན་དུ་དོགས་པས་སོ། ། དེ་ལྟ་ན་འདི་ལྟ་བ་མཆོག་འཛིན་དུ་མི་འགྱུར་རམ་ཞེ་ན། མི་འགྱུར་ཏེ། ལྟ་བ་མཆོག་འཛིན་གྱི་རྣམ་པ་ནི་མཆོག་དང་གཙོ་བོ་ལ་སོགས་པར་འཛིན་པ་ཡིན་ལ། ཚུལ་ཁྲིམས་དང་བརྟུལ་ཞུགས་མཆོག་འཛིན་གྱི་རྣམ་པ་ནི་འདག་གྲོལ་སོགས་འཛིན་པ་ཡིན་པས་འཛིན་སྟངས་མི་འདྲའོ། ། འོ་ན་སྡུག་བསྔལ་དང་ཀུན་འབྱུང་ཁམས་གསུམ་དུ་གཏོགས་ཀྱང་འགོག་ལམ་ཟག་མེད་དེར་མ་གཏོགས་པས་ཁམས་གསུམ་སོ་སོའི་འགོག་པ་དང་ལམ་ཞེས་བཞག་པ་མི་འཐད་དོ་ཞེ་ན་སྐྱོན་མེད་དེ། བསྡུ་བ་ལས། ཁམས་གསུམ་གྱི་དབང་དུ་བྱས་པ་ཡིན་ནོ་ཞེས་བཤད་ཅིང་། དེའང་སྤང་བྱ་སྡུག་བསྔལ་ཀུན་འདོད་ཁམས་པ་ཡིན་པས་སྡུག་བསྔལ་རྒྱུ་དང་བཅས་པ་འགག་པ་ལ་འདོད་ཁམས་ཀྱི་འགོག་པ་ཞེས་བཏགས་ཤིང་། དེ་མངོན་སུམ་དུ་བྱེད་པའི་ཐབས་ལ་འདོད་ཁམས་ཀྱི་ལམ་དུ་བཏགས་ལ། ཁམས་གོང་མ་གཉིས་ཀྱི་འགོག་ལམ་ཡང་དེ་བཞིན་དུ་བཏགས་པས་སོ། ། འོ་ན་ཀུན་ལས་བཏུས་པར་མཐོང་སྤང་བརྒྱ་རྩ་བཅུ་གཉིས་དང་། བསྡུ་བར་དགུ་བཅུ་རྩ་བཞིར་བཤད་པ་འགལ་ལོ་ཞེ་ན། འདི་ལ་ཁ་ཅིག་རིམ་པ་བཞིན་དུ་རྣལ་འབྱོར་སྤྱོད་པ་དང་མདོ་སྡེ་པའི་ལུགས་ཡིན་ཟེར་ཡང་རགས་པ་དང་ཕྲ་བའི་རྣམ་པར་གཞག་པས་མདོ་ཐ་དད་ཀྱི་དགོངས་པར་འཆད་པ་ལེགས་སོ། ། [3]སྤང་བྱ་སྤོང་ཚུལ་ནི། ཉན་ཐོས་པ་དག མཛོད་ལས། འགོག་པར་འགྱུར་བའི་ལམ་གྱིས་ནི། ། དེ་ཡི་སྒྲིབ་པ་རབ་ཏུ་སྤོང་། ། ཞེས་འགག་འགྱུར་གྱི་ལམ་གྱིས་སྤོང་བར་འདོད་ལ། ཐེག་པ་ཐུན་མོང་བ་དེ་ཉིད་འདོན་པ་བསྒྱུར་ཏེ། སྐྱེ་བར་འགྱུར་བའི་ལམ་གྱིས་ནི། ། དེ་ཡི་སྒྲིབ་པ་རབ་ཏུ་སྤོང་། ། ཞེས་པ་གཉེན་པོ་སྐྱེ་འགྱུར་གྱི་ལམ་གྱིས་སྤོང་བར་འདོད་དོ། ། ཐེག་ཆེན་ཐུན་མོང་མིན་པ་ནི་དོན་དམ་པར་སྤང་བྱ་དང་གཉེན་པོ་མ་གྲུབ་པས་སྐྱེ་འགག་གཉིས་ཀ་མི་འཐད་དེ། མངོན་རྟོགས་རྒྱན་ལས། འདི་ལ་བསལ་བྱ་ཅི་ཡང་མེད། ། གཞག་པར་བྱ་བ་ཅུང་ཟད་མེད། ། ཅེས་དང་། སྤྱོད་འཇུག་ལས། དེ་ལྟར་སྟོང་པའི་དངོས་རྣམས་ལ། ། ཐོབ་པ་ཅི་ཡོད་ཤོར་ཅི་ཡོད། ། ཅེས་གསུངས་པ་ལྟར་རོ། ། ཀུན་རྫོབ་ཏུའང་བརྟགས་ན་གཉེན་པས་སྤང་བྱ་སྤོང་བར་མི་འདོད་དེ། སྤང་བྱ་ཡོད་ན་གཉེན་པོ་མེད་ལ། གཉེན་པོ་སྐྱེས་པ་ན་སྤང་བྱ་འགག་པས་དུས་མི་མཉམ་པ་ལ་ཕྲད་པ་མེད་པའི་ཕྱིར་རོ། ། མ་བརྟོགས་པའི་བློ་ངོར་ཡེ་ཤེས་སྐྱེས་པ་ལ་སྤང་བྱ་སྤངས་པ་ཞེས་ཐ་སྙད་དུ་འདོགས་ཏེ་སྲང་མདའི་མཐོ་དམའ་བཞིན་ནོ། ། (2)མཐོང་ལམ་སྐྱེ་ཚུལ་གྱི་རྣམ་གཞག་གི་ཁྱད་པར་བཞི་སྟེ། [1]རྟེན་གང་ལ་སྐྱེ་བ་ནི། གླིང་གསུམ་གྱི་སྐྱེས་པ་བུད་མེད་དང་འདོད་ཁམས་ཀྱི་ལྷ་ལ་སྐྱེ་སྟེ། དབང་པོ་རྣོ་ཞིང་སངས་རྒྱས་ཀྱི་ལུང་ཡོད་ལ་སྐྱོ་ཤས་ཆེ་བས་སོ། ། རྣམ་སྨིན་གྱི་ ལས་སྒྲིབ་ཆེན་པོས་བསྒྲིབས་པས་ངན་སོང་གསུམ་དང་། སྐྱོ་ཤས་མེད་པས་སྒྲ་མི་སྙན་དང་ཁམས་གོང་མ་གཉིས་ལ་མི་སྐྱེའོ། ། [2]ས་གང་ལ་བརྟེན་པ་ནི། ཉན་ཐོས་ཀྱི་མཐོང་ལམ་བསམ་གཏན་དྲུག་གང་རུང་ལ་བརྟེན་ཏེ། དེ་ལའང་ཆགས་བྲལ་སྔོན་དུ་མ་སོང་ན་བསམ་གཏན་དང་པོའི་ཉེར་བསྡོགས་ལ་དང་། སོང་ན་ནི་བསམ་གཏན་གྱི་དངོས་གཞི་ལ་བརྟེན་ནོ། ། འདོད་པའི་ས་ལ་མི་བརྟེན་ཏེ་མཐོང་ལམ་ནི་ཞི་ལྷག་མཚུངས་ལྡན་ཡིན་ལ། འདོད་པ་ནི་ཞི་གནས་ཆུང་ཞིང་རྣམ་གཡེང་ཤས་ཆེ་བས་སོ། ། ལྷག་མཐོང་ཤས་ཆུང་བས་གཟུགས་མེད་ལའང་མི་བརྟེན་ནོ། ། བསམ་གཏན་གཉིས་པའི་ཉེར་བསྡོགས་སོགས་ལ་འབད་ན་སྐྱེད་དུ་རུང་མོད་ཀྱི་ཞི་གནས་ཤས་ཆུང་བས་སྐྱེ་དཀའོ། ། དེ་ལྟ་ན་བསམ་གཏན་དང་པོའི་ཉེར་བསྡོགས་ལའང་མཚུངས་སོ་ཞེ་ན། མི་མཚུངས་ཏེ། མཐོང་ལམ་སྐྱེ་བ་བསམ་གཏན་གྱི་དངོས་གཞིའི་སེམས་ལ་བརྟེན་དགོས་ལ། དངོས་གཞི་མ་ཐོབ་ན་དང་པོའི་ཉེར་བསྡོགས་ཁོ་ན་སླ་བའི་ཕྱིར་རོ། ། གཉིས་པའི་ཉེར་བསྡོགས་ལ་མི་བརྟེན་ཏེ་དེ་བས་སླ་བའི་དང་པོའི་དངོས་གཞི་ལ་བརྟེན་པས་ཆོག་པས་སོ། ། རང་རྒྱལ་གྱིས་ནི་ཚོགས་སྤྱོད་བསམ་གཏན་ས་དྲུག་གང་རུང་དང་། བསེ་རུ་ལྟ་བུ་བསམ་གཏན་བཞི་པའི་དངོས་གཞི་ལ་བརྟེན་ནོ། ། འོ་ན་བསེ་རུ་ལྟ་བུ་དེ་ཤི་ནས་འདོད་ཁམས་ཁོ་ནར་སྐྱེ་བར་བཤད་པ་མི་རིགས་ཏེ། བསམ་གཏན་གསུམ་པ་མན་གྱི་ཉོན་མོངས་པ་སྤངས་པའི་ཕྱིར་ཞེ་ན། སྐྱོན་མེད་དེ། ལས་ཀྱིས་མི་སྐྱེ་ཡང་སྨོན་ལམ་གྱིས་སྐྱེ་བས་སོ། ། བྱང་སེམས་ཀྱིས་ནི་བསམ་གཏན་བཞི་པ་ཤིན་ཏུ་དག་པ་ལ་བརྟེན་ནོ། ། ཉེར་བསྡོགས་ལ་མི་བརྟེན་ཏེ་དེའི་གོང་དུ་ཆོས་རྒྱུན་གྱི་ཏིང་ངེ་འཛིན་ཐོབ་པས་སོ། ། [3]ཚུལ་ཇི་ལྟར་རྟོགས་པ་ནི། ཐེག་པ་ཐུན་མོང་ལུགས་ལ་ཉན་ཐོས་ཀྱིས་ཡུལ་བདེན་པ་བཞི་ལ་གང་ཟག་གི་བདག་མེད་རྟོགས་ཏེ། དེའང་རྣམ་པར་གཞག་པའི་བདེན་པ་ལ་དམིགས་པ་མ་ཡིན་གྱི་རྣམ་པར་གཞག་པའི་བདེན་པ་ཞེས་བྱ་བ་རང་གི་མཚན་ཉིད་ལ་དམིགས་པའོ། ། རང་རྒྱལ་གྱིས་གང་ཟག་དང་ཆོས་ཀྱི་བདག་གི་གཟུང་བ་རང་བཞིན་མེད་པར་རྟོགས། བྱང་སེམས་ཀྱིས་བདག་མེད་གཉིས་ཀ་རྟོགས་སོ། ། ཐེག་ཆེན་ཐུན་མོང་མ་ཡིན་པའི་ལུགས་ལ། ཡུམ་ལས། ཉན་ཐོས་ཀྱི་ས་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསླབ་པར་བྱའོ། ། ཞེས་གསུངས་པ་སོགས་ཀྱི་རྗེས་སུ་འབྲངས་ནས་འཕགས་པ་ཡབ་སྲས་སོགས་རིགས་ཅན་གསུམ་ཀས་བདག་མེད་རྟོགས་པ་ལ་ཁྱད་པར་མི་བཞེད་དོ། ། [4]སྐད་ཅིག་དུ་ལས་སྐྱེ་བ་གཉིས་ཏེ། <1>ཐེག་པ་ཐུན་མོང་བ་ནི། མཛོད་ལས། འཇིག་རྟེན་པ་ཡི་ཆོས་མཆོག་ལས། ། ཆོས་ཀྱི་བཟོད་པ་ཟག་པ་མེད། འདོད་སྡུག་བསྔལ་ལའོ་དེ་ལས་ནི། ། དེ་ཉིད་ལ་ཆོས་ཤེས་དེ་བཞིན། ། དུཿཁ་ལྷག་ལ་རྗེས་བཟོད་ཤེས། ། བདེན་པ་གསུམ་ལ་དེ་བཞིན་ནོ། ། ཞེས་གསུངས་པ་ལྟར་བྱེ་བྲག་ཏུ་སྨྲ་བ་ནི་ཆོས་མཆོག་གི་མཇུག་ཏུ་འདོད་པའི་སྡུག་བསྔལ་ལ་ཆོས་ཤེས་པའི་བཟོད་པ་དང་། དེ་ལ་ཆོས་ཤེས་པ། དེ་ནས་ཁམས་གོང་མའི་སྡུག་བསྔལ་ལ་རྗེས་སུ་ཤེས་པའི་བཟོད་པ་དང་། དེ་ལ་རྗེས་སུ་ཤེས་པ་སྟེ་སྐད་ཅིག་མ་བཞི་དང་། བདེན་པ་ལྷག་མ་གསུམ་ལའང་དེ་བཞིན་དུ་སྦྱར་བའི་སྐད་ཅིག་མ་བཅུ་དྲུག་གི་ཟག་མེད་ཤེས་རབ་ཀྱིས་བདེན་པ་མཐོང་བར་འདོད་ལ། དེའང་། མཛོད་ལས། བཟོད་དང་ཤེས་ལ་གོ་རིམ་བཞིན། ། བར་ཆད་མེད་དང་རྣམ་གྲོལ་ལམ། ། དེ་ལ་སྐད་ཅིག་བཅོ་ལྔ་ནི། ། མ་མཐོང་མཐོང་ཕྱིར་མཐོང་བའི་ལམ། ། བཅུ་དྲུག་པ་ལ་དེ་འབྲས་གནས། ། ཞེས་པ་ལྟར། བཟོད་པ་བརྒྱད་ནི་མཐོང་སྤང་གི་ཐོབ་པ་གཅོད་པས་བར་ཆད་མེད་པའི་ལམ་དང་། ཤེས་པ་བརྒྱད་ནི་བྲལ་བའི་ཐོབ་པ་ཉམས་སུ་མྱོང་བས་རྣམ་པར་གྲོལ་བའི་ལམ་སྟེ། དེ་དག་གི་སྐད་ཅིག་མ་བཅོ་ལྔ་ནི་མཐོང་ལམ་དངོས་ཡིན་ཞིང་བཅུ་དྲུག་པ་ནི་འབྲས་བུ་ཡིན་པ་དང་རྒྱུན་ཆགས་པའི་ཕྱིར་སྒོམ་ལམ་ཡིན་ནོ། ། ཐོག་ཆེན་དབུ་མའི་ལུགས་ལ་ཆོས་ཉིད་ཀུན་འགྲོའི་ཚུལ་གྱིས་མཐོང་བ་ལ་གསར་མཐོང་རིགས་མི་མཐུན་གྱི་དབྱེ་བ་མེད་པའི་ངོས་ནས་མཐོང་ལམ་སྐད་ཅིག་མ་རུ་བཞག་ལ། སྒྲོ་འདོགས་གཅོད་ཚུལ་དང་བོགས་འདོན་ཚུལ་གྱི་སྒོ་ནས་སྐད་ཅིག་མ་བཅུ་དྲུག་སྟེ། དེའང་ཁམས་གསུམ་གྱི་སས་བསྡུས་པའི་སྡུག་བསྔལ་མཐོང་སྤང་སྤོང་བའི་བར་ཆད་མེད་ལམ་ཆོས་བཟོད་བཞི་དང་། དེ་སྤངས་པའི་རྣམ་གྲོལ་ལམ་ནི་ཆོས་ཤེས་བཞི། དེ་རྣམས་ཀྱང་འཕགས་ཆོས་ཕྱི་མ་རྣམས་ཀྱི་རྒྱུ་མིན་དུ་འཛིན་པའི་སྒྲོ་འདོགས་གཅོད་པའི་བར་ཆད་མེད་ལམ་རྗེས་བཟོད་བཞི་དང་། དེ་སྤངས་པའི་རྣམ་གྲོལ་ལམ་ནི་རྗེས་ཤེས་བཞིའོ། ། བརྒྱད་སྟོང་འགྲེལ་ཆེན་ལས་འབྲས་བུ་མངོན་པར་རྟོགས་པ་ལ་ལྟོས་ནས་སྐད་ཅིག་མ་གཅིག་དང་། བདེན་པ་སོ་སོ་ལ་ལོག་རྟོག་བསལ་བའི་སྒོ་ནས་སྐད་ཅིག་མ་བཅུ་དྲུག་ཏུ་གསུངས་ཤིང་། ཐུབ་པ་དགོངས་རྒྱན་ལས་ནི་སྡུག་བསྔལ་ལ་ཆོས་བཟོད་མཐོང་ལམ་མཚན་ཉིད་པ་དང་། གཞན་རྣམས་བཏགས་པ་བར་གསུངས་ལ། གཞན་ཡང་དབང་པོའི་རིམ་པས་གཅིག་ནས་བཅུ་དྲུག་གི་བར་ཅི་རིགས་པར་སྐྱེ་བར་འདོད་ཅིང་། མངོན་པ་ཀུན་ལས་བཏུས་པའི་དགོངས་པས་ནི་སྐད་ཅིག་མ་བཅུ་དྲུག་རིམ་པ་བཞིན་བར་མ་ཆད་དུ་སྐྱེ་བར་གསལ་ཏེ། གཞན་དུ་ན་ཞུགས་གནས་ཀྱི་ཁྱད་པར་དང་དབང་པོའི་ས་མཚམས་ལ་སོགས་པ་དང་འགལ་བས་སོ། ། འདིར་སྐད་ཅིག་མ་ཞེས་པ་ནི་ལམ་དེ་དང་དེའི་བྱ་བ་རྫོགས་པ་ལ་སྐད་ཅིག་མར་བྱས་པའི་བྱ་རྫོགས་ཀྱི་སྐད་ཅིག་མའོ། ། <2>ཐུན་མོང་མ་ཡིན་པའི་ལུགས་ནི། ཡང་དག་པའི་དོན་ལ་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པ་ཞེས་གསུངས་པས་དོན་དམ་པར་མཐོང་བའི་ལམ་སྐྱེ་བར་མི་བཞེད་དེ། མདོ་ལས། སྐྱེ་བ་མེད་པ་བདེན་པ་གཅིག་ཡིན་ནོ། ། དེ་ལས་ཁ་ཅིག་བདེན་པ་བཞི་ཞེས་ཟེར། ། བྱང་ཆུབ་སྙིང་པོར་འདུག་ནས་བདེན་གཅིག་ཀྱང་། ། གྲུབ་པར་མ་མཐོང་བཞི་ལྟ་ག་ལ་ཞིག ། ཅེས་དང་། རིགས་པ་དྲུག་ཅུ་པ་ལས། གལ་ཏེ་ཆོས་ཤེས་མཇུག་ཐོགས་སུ། ། འདི་ལ་བྱེ་བྲག་ཡོད་ན་ནི། ། ཤིན་ཏུ་ཕྲ་བའི་དངོས་ལ་ཡང་། ། གང་གི་སྐྱེ་བ་རྣམ་བརྟགས་པ། ། རྣམ་པར་མི་མཁས་དེ་ཡིས་ནི། ། རྐྱེན་ལས་སྐྱེས་པ་དེ་མ་མཐོང་། ། ཞེས་གསུངས་པས་སོ། ། དེ་ལྟར་མདོ་ལས། མཐོང་ལམ་སྐད་ཅིག་མ་གཅིག་དང་བཅུ་དྲུག་ལ་སོགས་སྐྱེ་བར་བཤད་པ་ཅི་ཞེ་ན། དེ་ནི་དངོས་པོར་སྨྲ་བ་རྣམས་རྗེས་སུ་བཟུང་བའི་ཕྱིར་དགོངས་པ་ཡིན་ཏེ། དེ་ལ་དགོངས་གཞི་རྟེན་ཅིང་འབྲེལ་བར་འབྱུང་བ། དགོས་པ་དངོས་པོ་ལ་མངོན་པར་ཞེན་པ་རྣམས་གཞུག་པ། དངོས་གནོད་བྱེད་ནི། རྩ་ཤེ་ལས། བདག་ལས་མ་ཡིན་གཞན་ལས་མིན། ། གཉིས་ལས་མ་ཡིན་རྒྱུ་མེད་མིན། ། དངོས་པོ་གང་དང་གང་ན་ཡང་། ། སྐྱེ་བ་ནམ་ཡང་ཡོད་མ་ཡིན། ། ཞེས་གསུངས་པ་ལྟར་མུ་བཞིར་སྐྱེ་བ་བཀག་པས་ཁེགས་སོ། ། གཞན་ཡང་མཐོང་ལམ་སྐད་ཅིག་དུ་ལ་སྐྱེ་དཔྱོད་ན་དུ་ལ་འཇིག་པའང་དཔྱོད་དགོས་པས་ཧ་ཅང་ཐལ་ཏེ། ཡང་རྩ་ཤེ་ལས། འབྱུང་བ་དང་ནི་འཇིག་པ་དག ། མཐོང་ངོ་སྙམ་དུ་ཁྱོད་སེམས་ན། ། འབྱུང་བ་དང་ནི་འཇིག་པ་དག ། གཏི་མུག་ཉིད་ཀྱིས་བསླད་པ་ཡིན། ། ཞེས་གསུངས་པ་ལྟར་རོ། ། གལ་ཏེ་བརྟེན་ནས་སྐྱེས་པ་ཉིད་སྐྱེ་བ་མ་ཡིན་ནམ་ཞེ་ན། མ་དྲོས་པས་ཞུས་པ་ལས། གང་ཞིག་བརྟེན་ནས་སྐྱེས་པ་དེ་མ་སྐྱེ། ། དེ་ལ་སྐྱེ་བའི་རང་བཞིན་ཡོད་མ་ཡིན། ། རྐྱེན་ལ་རག་ལས་གང་དེ་སྟོང་པ་ཉིད། ། གང་གིས་སྟོང་ཉིད་ཤེས་དེ་བག་ཡོད་ཡིན། ། ཞེས་དང་། འཕགས་པ་ཀླུས། འདི་བརྟེན་འདི་འབྱུང་ཞེས་བྱ་བའི། ། འཇིག་རྟེན་ཚུལ་འདི་འགོག་མི་མཛད། ། རྟེན་འབྱུང་གང་དེ་རང་བཞིན་མེད། ། དེ་ལ་ཡོད་ཅེས་ཇི་ལྟར་ངེས། ། ཞེས་དང་། གང་ཕྱིར་རྟེན་འབྱུང་མ་ཡིན་པའི། ། ཆོས་འགའ་ཡོད་པ་མ་ཡིན་ལ། ། དེ་ཕྱིར་སྟོང་ཉིད་མ་ཡིན་པའི། ། ཆོས་འགའ་ཡོད་པ་མ་ཡིན་ནོ། ། ཞེས་བྱ་བ་སོགས་རྒྱས་པར་གསུངས་པས་ཆོས་ཐམས་ཅད་སྐྱེ་བ་མེད་པ་ཡིན་ནོ། ། 5. སྤང་རྟོགས་ཀྱི་ཁྱད་པར་ནི། ཇི་ལྟ་མངོན་སུམ་ཇི་སྙེད་ཅི་རིགས་རྟོགས། ། མཐོང་སྤང་གི་ས་བོན་རྩ་བ་ནས་སྤངས་པ་དང་ཆོས་ཉིད་ཇི་ལྟ་བའི་དོན་མངོན་སུམ་དུ་རྟོགས་ཤིང་ཆོས་ཅན་ཇི་སྙེད་པའི་དོན་ཡང་ཅི་རིགས་པར་རྟོགས་པ་སྟེ། མདོ་སྡེ་རྒྱན་ལས། དེ་ནས་ཆོས་དབྱིངས་གཉིས་ཀྱི་མཚན་ཉིད་དང་། ། བྲལ་བ་མངོན་སུམ་ཉིད་དུ་རྟོགས་པར་འགྱུར། ། ཞེས་གསུངས་པ་ལྟ་བུའོ། ། 6. ཡོན་ཏན་བརྗོད་པ་ནི། འཇིགས་པ་ལྔ་བྲལ་ཡོན་ཏན་བརྒྱ་བཅུ་གཉིས། ། མཐོང་ལམ་པ་ངན་སོང་སོགས་འཇིགས་པ་ལྔ་དང་བྲལ་བ་དང་། ཏིང་ངེ་འཛིན་བརྒྱ་ཐོབ་པ་སོགས་ཡོན་ཏན་བརྒྱ་ཕྲག་བཅུ་གཉིས་རྗེས་ཐོབ་ཏུ་འབྱུང་བའི་ནུས་པ་ཐོབ་པ་ལ་སོགས་པའོ། ། འོན་ཀྱང་དེ་ལ་ལྷན་སྐྱེས་ཀྱི་ང་བདག་གི་ཆ་ད་དུང་ཡོད་པས་དེ་ལས་འབྱུང་བའི་ཉོན་མོངས་པའི་ལྷན་སྐྱེས་བག་ཉལ་ཡོད་ཅིང་། དེས་ན་གང་ལའང་དངོས་འཛིན་མེད་བཞིན་དུ་བྱེད་དངངས་སྐད་ཅིག་མ་སྐྱེས་བུ་ལ་ཁའི་ཐོ་ཡོར་ལ་དངངས་པ་ལྟ་བུར་ཡོད་པར་འདོད་ལ། དེ་བཞིན་དུ་ཡེངས་དུས་འཁོར་བར་ལྟུང་དོགས་པའི་ཡ་ང་དང་སྙན་གྲགས་འདོད་པའི་ཀུན་བརྟགས་ཀྱི་ཆ་ཕྲ་མོ་ཡང་ཡོད་མོད། དེའང་སོ་སྐྱེ་བཞིན་གཞི་ཐུག་པ་ནི་མེད་དེ། དྲན་པ་སྐད་ཅིག་མ་ལ་ལྡོག་པས་གཉེན་པོ་བརྟེན་མི་དགོས་པའི་ཕྱིར་མདོར་ན་མཐོང་ལམ་ཐོབ་ནས་རྣམ་རྟོག་སྐྱེ་ཡང་སྐད་ཅིག་མ་གཉིས་པར་བཟློག་ཅིང་། ཡེ་ཤེས་ཀྱིས་དབང་བྱས་པ་ཡིན་པས་དེ་ཡན་ཆད་ལམ་ལ་འབད་རྩོལ་མི་དགོས་པར་ཤུགས་ཀྱིས་བགྲོད་པ་ཡིན་ཏེ་མདའ་མཐེབ་ཤུགས་ཀྱིས་བགྲོད་པ་དང་འདྲའོ་ཞེས་གསུངས་སོ། ། 7. བྱེད་ལས་གང་ཡིན་ནི། སྲིད་ལས་གྲོལ་ཞིང་མྱང་འདས་ས་གནོན་བྱེད། ། སྤང་བྱ་ཀུན་བརྟགས་ཀྱི་ཉོན་མོངས་ཐམས་ཅད་སྤངས་ཤིང་འཁོར་བར་འཕེན་པའི་རྒྱུ་ཟད་པས། སྲིད་པ་ལས་གྲོལ་ཞིང་འཁོར་བ་གཏན་དུ་སྤངས་ཏེ་མྱ་ངན་ལས་འདས་པའི་ས་གནོན་པར་བྱེད་པའོ། ། 8. ངེས་ཚིག་བསྟན་པ་ནི། ཟག་མེད་དགེ་བ་སྤོང་གཉེན་དང་པོར་བསྐྱེད། ། སྤྲོས་བྲལ་མངོན་སུམ་མཐོང་བ་ངེས་ཚིག་གོ ། ཟག་པ་དངོས་ཀྱི་གཉེན་པོར་གྱུར་པ་ཟག་མེད་ཀྱི་དགེ་བ་དང་། མཐོང་སྤང་གི་ཉོན་མོངས་པ་རྩ་བ་ནས་སྤོང་བར་བྱེད་པས་སྤོང་བའི་གཉེན་པོ་དང་། འཕགས་པའི་ཆོས་ཀྱི་ཐོག་མ་ཡིན་པས་འཇིག་རྟེན་ལས་འདས་པའི་སེམས་དང་པོར་བསྐྱེད་པ་ཞེས་ཀྱང་བྱ། སྔོན་མ་མཐོང་བའི་འཕགས་པའི་བདེན་པ་ཆོས་ཉིད་སྤྲོས་བྲལ་མངོན་སུམ་དུ་མཐོང་བའི་ལམ་ཡིན་པས་མཐོང་ལམ་ཞེས་བྱ་བ་ནི་དེའི་ངེས་ཚིག་གི་དོན་ནོ། ། འོ་ན་སྔར་སྦྱོར་ལམ་གྱི་སྐབས་ཀྱི་རྟོགས་པ་དང་ཁྱད་པར་ཅི་ཡོད་ཅེ་ན། མཐོང་ལམ་གྱི་རྟོགས་པ་ནི་ཆོས་ཉིད་རང་གི་མཚན་ཉིད་མངོན་སུམ་དུ་མཐོང་བ་ཡིན་ལ། སྦྱོར་ལམ་གྱི་རྟོགས་པ་ནི་དེའི་ཆ་ང་མཐུན་པའི་ཆོས་ཉིད་ཕྱོགས་ཙམ་རྟོགས་པའོ། །
Tibetan Source	《ཤེས་བྱ་ཀུན་ཁྱབ་》དེབ་སྨད་ཆ་ཤ་476.19ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number