8236

Tibetan	གཟུངས་བརྒྱད།
Tibetan Alternate
Tibetan Definition	དེ་ཡང་། འཕགས་པ་དེ་བཞིན་གཤེགས་པའི་སྙིང་རྗེ་ཆེན་པོ་ངེས་པར་བསྟན་པའི་མདོ་ལས་བྱུང་བ་སྟེ། 1. སྒྲ་དབྱངས་རྣམ་པར་དག་པ་ཞེས་བྱ་བའི་གཟུངས་ནི། འདི་ལ་བྱང་ཆུབ་སེམས་དཔའ་གཟུགས་འདི་ལ་རབ་ཏུ་གནས་པ་ན་ཆགས་པ་མེད་པ་ལ་འཇུག་པའི་སྒོ་ཤིན་ཏུ་རྣམ་པར་དག་པས་སྙིང་པོ་དང་ལྡན་པའི་བློས་ཤིན་ཏུ་གནས་ཏེ་ཆོས་བསྟན་པའི་བྱིན་གྱི་རླབས་ངེས་པར་བྱས་ནས་ཆོས་སྟོན་པ་ན་སངས་རྒྱས་ཀྱི་ཞིང་གཅིག་དབྱངས་ཀྱིས་གོ་བར་བྱེད་དོ། ། གཉིས་སམ། གསུམ་མམ། བཞིའམ། ལྔའམ། བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། བརྒྱའང་དབྱངས་ཀྱིས་གོ་བར་བྱེད་དོ། ། སངས་རྒྱས་ཀྱི་ཞིང་སྟོང་དབྱངས་ཀྱིས་གོ་བར་བྱེད་པ་ནས་སངས་རྒྱས་ཀྱི་ཞིང་སྟོང་ཕྲག་བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། བརྒྱའི་བར་དུ་དབྱངས་ཀྱིས་གོ་བར་བྱེད་དོ། ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་མཐའ་ཡས་མུ་མེད་པའི་བར་དག་དབྱངས་ཀྱིས་གོ་བར་བྱེད་དོ། ། དེས་རྒྱང་གྲགས་ཀྱི་ཚད་ཙམ་གྱི་སེངྒེའི་ཁྲི་བྱིན་གྱིས་བརླབས་ཏེ། དེ་ལ་འདུག་ནས་ཆོས་སྟོན་ཏོ། ། ཇི་ལྟར་མོས་པའི་སེམས་ཅན་རྣམས་མོས་པ་དེ་ལྟ་བུས་ཚིམ་བར་བྱ་བའི་ཕྱིར་དཔག་ཚད་ཕྱེད་ཀྱི་ཚད་ཙམ་མམ། དཔག་ཚད་ཀྱི་ཚད་ཙམ་མམ། རི་རབ་ཀྱི་ཚད་ཙམ་མམ། ཚངས་པའི་འཇིག་རྟེན་གྱི་ཚད་ཙམ་གྱི་སེངྒེའི་ཁྲི་བྱིན་གྱིས་བརླབས་ཏེ། དེ་ལ་འདུག་ནས་ཆོས་སྟོན་ཏེ། ། དེ་ལྟར་སེངྒེའི་ཁྲི་དེ་ལ་འདུག་པ་ན་ཕྱོགས་བཅུའི་སངས་རྒྱས་ཐམས་ཅད་སྣང་བར་གྱུར་ཏོ། ། སངས་རྒྱས་བཅོམ་ལྡན་འདས་དེ་དག་གིས་ཆོས་གང་བཤད་པ་དེ་ཐམས་ཅད་ཀྱང་ཐོས་སོ། ། ཐོས་ནས་ཀྱང་གཟུངས་ཀྱི་སྟོབས་ཀྱིས་ཀུན་ཏུ་འཛིན་ཏོ། ། མི་བརྗེད་དོ། ། ཆོས་དེས་ཆོས་ཀྱི་དོན་སོ་སོར་མྱོང་བར་བྱེད་དོ། ། དེ་ཆོས་གཞན་ཉན་པས་ཆོས་སྟོན་པ་ལ་སྒྲིབ་པར་མི་བྱེད་དོ། ། ཆོས་སྟོན་པས་ཆོས་ཉན་པ་ལ་སྒྲིབ་པར་མི་བྱེད་དོ། ཡི་གེའི་སྒྲ་གཅིག་ལ་འཇུག་པས་ཡི་གེའི་སྒྲ་ཐམས་ཅད་ལ་འཇུག་པ་སྟོན་ཏོ། ། ཡི་གེའི་དང་པོ་ཨ་ཞེས་བྱ་བ་བརྗོད་པའི་ཚུལ་གྱིས་ཆོས་ཀྱི་སྒོ་མཐའ་ཡས་པ་བརྗོད་དེ། ། འདི་ལྟ་སྟེ། འོང་བ་མེད་པའི་མཚན་ཉིད་ཀྱི་ཚུལ་གྱིས་ཆོས་ཐམས་ཅད་ནི། འོང་བ་མེད་པའོ། ། འཕོ་བ་མེད་པའི་ཚུལ་གྱིས་ཆོས་ཐམས་ཅད་ནི། སོང་བ་མེད་པའོ། ། གནས་མེད་པའི་ཚུལ་གྱིས་ཆོས་ཐམས་ཅད་ནི། གནས་པ་མེད་པའོ། ། གཟོད་མ་ནས་རྣམ་པར་དག་པའི་ཕྱིར་ཆོས་ཐམས་ཅད་ནི། ངོ་བོ་ཉིད་མེད་པའོ། ། གཟོད་མ་ནས་མ་སྐྱེས་པའི་ཕྱིར་ཆོས་ཐམས་ཅད་ནི། རྩ་བ་མེད་པའོ། ། གཟོད་མ་ནས་བྱུང་བ་མེད་པའི་ཕྱིར་ཆོས་ཐམས་ཅད་ནི། མཐའ་མ་མེད་པའོ། ། རྣམ་པར་འགྲོ་བ་མེད་པའི་ཚུལ་གྱིས་ཆོས་ཐམས་ཅད་ནི། ཟད་པ་མེད་པའོ། ། མངོན་པར་འདུ་བ་མེད་པའི་ཚུལ་གྱིས་ཆོས་ཐམས་ཅད་ནི། མ་སྐྱེས་པའོ། ། བྱེད་པ་པོ་མེད་པའི་ཚུལ་གྱིས་ཆོས་ཐམས་ཅད་ནི། སྐྱེ་བ་མེད་པའོ། ། རྒྱུ་བ་མེད་པའི་ཚུལ་གྱིས་ཆོས་ཐམས་ཅད་ནི། འབྱུང་བ་མེད་པའོ། ། ཕན་ཚུན་ཡང་དག་པར་འདུ་བའི་ཚུལ་གྱིས་ཆོས་ཐམས་ཅད་ནི། མི་མཐུན་པ་མེད་པའོ། ། བདག་པོ་མེད་པའི་ཚུལ་གྱིས་ཆོས་ཐམས་ཅད་ནི། མ་འགགས་པའོ། ། སྨོན་པ་མེད་པའི་ཕྱིར་ཆོས་ཐམས་ཅད་ནི། རྒྱུ་བ་མེད་པའོ། ། མི་རྟོག་ཅིང་རྣམ་པར་མི་རྟོག་པའི་ཚུལ་གྱིས་ཆོས་ཐམས་ཅད་ནི། སྤྲོས་པ་མེད་པའོ། ། ཤིན་ཏུ་སྒྲ་ལ་ཞུགས་པའི་ཕྱིར་ཆོས་ཐམས་ཅད་ནི། བརྗོད་པ་མེད་པའོ། ། སྒྲ་མེད་པའི་ཕྱིར་ཆོས་ཐམས་ཅད་ནི། སྨྲ་བ་མེད་པའོ། ། རྣམ་པར་གནས་པ་མེད་པའི་ཕྱིར་ཆོས་ཐམས་ཅད་ནི། བསྟན་དུ་མེད་པའོ། ། རྟོག་པ་མེད་པའི་ཕྱིར་ཆོས་ཐམས་ཅད་ནི། རྣམ་པར་བརྟགས་པ་མ་ཡིན་པའོ། ། རྣམ་པར་བསྒྲུབས་པ་མ་ཡིན་པའི་ཕྱིར་ཆོས་ཐམས་ཅད་ནི། རློམ་སེམས་མེད་པའོ། ། རློམ་སེམས་མེད་པའི་ཕྱིར་ཆོས་ཐམས་ཅད་ནི། གཡོ་བ་མེད་པའོ། ། ནམ་མཁའ་དང་མཉམ་པའི་ཕྱིར་ཆོས་ཐམས་ཅད་ནི། རྣམ་པར་ཤེས་པ་མེད་པའོ། ། ཚིག་གི་ལམ་མེད་པའི་ཕྱིར་ཆོས་ཐམས་ཅད་ནི། ཐ་སྙད་མེད་པའོ། ། ཡུལ་ན་མི་གནས་པའི་ཕྱིར་ཆོས་ཐམས་ཅད་ནི། གནས་མེད་པའོ། ། ཕྱོགས་ན་མི་གནས་པའི་ཕྱིར་ཆོས་ཐམས་ཅད་ནི། སྐྱེ་བ་མེད་པའོ། ། ཉོན་མོངས་པ་མེད་པའི་ཕྱིར་ཆོས་ཐམས་ཅད་ནི། གཟོད་མ་ནས་རྣམ་པར་དག་པའོ། ། བདག་གི་རང་བཞིན་མེད་པའི་ཕྱིར་ཆོས་ཐམས་ཅད་ནི། བདག་མེད་པའོ། ། གཟོད་མ་ནས་རྣམ་པར་དག་པའི་ཕྱིར་ཆོས་ཐམས་ཅད་ནི། སེམས་ཅན་མེད་པའོ། ། དབང་པོ་མེད་པའི་ཕྱིར་ཆོས་ཐམས་ཅད་ནི། སྲོག་མེད་པའོ། ། དོན་དང་བྲལ་བའི་ཕྱིར་ཆོས་ཐམས་ཅད་ནི། གང་ཟག་མེད་པའོ། ། ནང་ཉེ་བར་ཞི་བའི་ཕྱིར་ཆོས་ཐམས་ཅད་ནི། གཟོད་མ་ནས་སྟོང་པའོ། ། མཐའ་མེད་པར་གྱུར་པའི་ཕྱིར་ཆོས་ཐམས་ཅད་ནི། མཚན་མ་མེད་པའོ། ། ཉེ་བར་བབ་ལེན་པ་མེད་པའི་ཕྱིར་ཆོས་ཐམས་ཅད་ནི། སྨོན་པ་མེད་པའོ། འདུས་བྱས་མ་ཡིན་པའི་ཕྱིར་ཆོས་ཐམས་ཅད་ནི། མངོན་པར་འདུ་བྱེད་པ་མེད་པའོ། ། གནས་མེད་པ་དང་། གནས་ལས་ཤིན་ཏུ་འདས་པའི་ཕྱིར་ཆོས་ཐམས་ཅད་ནི། འདུས་མ་བྱས་པའོ། ། གཞན་གྱི་དྲིང་མི་འཇོག་པའི་ཕྱིར་ཆོས་ཐམས་ཅད་ནི། ཐུན་མོང་མ་ཡིན་པའོ། ། ལེན་པ་མེད་པའི་ཕྱིར་ཆོས་ཐམས་ཅད་ནི། བླང་བ་མེད་པའོ། ། འདོར་བ་མེད་པའི་ཕྱིར་ཆོས་ཐམས་ཅད་ནི། ངོར་བ་མེད་པའོ། ། ལུས་མེད་པའི་ཕྱིར་ཆོས་ཐམས་ཅད་ནི། ངོ་བོ་ཉིད་མེད་པའོ། ། རྣམ་པར་དག་པའི་ཕྱིར་ཆོས་ཐམས་ཅད་ནི། རྣམ་པ་མེད་པའོ། ། བྱེད་པ་པོ་མེད་པའི་ཕྱིར་ཆོས་ཐམས་ཅད་ནི། ལས་མེད་པའོ། ། འཕོ་བ་མེད་པའི་ཕྱིར་ཆོས་ཐམས་ཅད་ནི། རྣམ་པར་སྨིན་པ་མེད་པའོ། ། ས་བོན་མེད་པའི་ཕྱིར་ཆོས་ཐམས་ཅད་ནི། གདུང་བ་མེད་པའོ་འཛིན་པ་མེད་པའི་ཕྱིར་ཆོས་ཐམས་ཅད་ནི། མཚན་མ་མེད་པའོ། ། མདུད་པ་མེད་པའི་ཕྱིར་ཆོས་ཐམས་ཅད་ནི། ལོག་པའི་ལས་མེད་པའོ། ། རྣམ་པར་བསྒྲུབས་པ་མ་ཡིན་པའོ། ། ཟག་པ་མི་སློང་བའི་ཕྱིར་ཆོས་ཐམས་ཅད་ནི། ཟག་པ་མེད་པའོ། ། གཟོད་མ་ནས་བྱུང་བ་མེད་པའི་ཕྱིར་ཆོས་ཐམས་ཅད་ནི། མ་བྱུང་བའོ། གཉེན་པོ་མེད་པའི་ཕྱིར་ཆོས་ཐམས་ཅད་ནི། གསལ་བའོ། ། རྣམ་པ་སྣ་ཚོགས་མེད་པའི་ཕྱིར་ཆོས་ཐམས་ཅད་ནི། གཉེན་པོ་མེད་པའོ། ། འབྱུང་བ་ཆེན་པོ་ལས་མ་བྱུང་བའི་ཕྱིར་ཆོས་ཐམས་ཅད་ནི། གཟུགས་ཅན་མ་ཡིན་པའོ། ། ཚོར་བ་མེད་པའི་ཕྱིར་ཆོས་ཐམས་ཅད་ནི། ཚོར་བ་མེད་པའོ། འདུ་ཤེས་ཀྱི་ལམ་ལས་ཤིན་ཏུ་འདས་པའི་ཕྱིར་ཆོས་ཐམས་ཅད་ནི། འདུ་ཤེས་མེད་པའོ། ། སྲེད་པ་དང་བྲལ་བའི་ཕྱིར་ཆོས་ཐམས་ཅད་ནི། འདུ་བྱེད་པ་མེད་པའོ། ། སོ་སོར་རྣམ་པར་རིག་པ་མེད་པའི་ཕྱིར་ཆོས་ཐམས་ཅད་ནི། རྣམ་པར་ཤེས་པ་མེད་པའོ། ། ཁམས་ནམ་མཁའ་དང་མཚུངས་པའི་ཕྱིར་ཆོས་ཐམས་ཅད་ནི། ཁམས་མེད་པའོ། ། ཡུལ་གྱི་ལམ་ལས་ཤིན་ཏུ་འདས་པའི་ཕྱིར་ཆོས་ཐམས་ཅད་ནི། འདྲེན་པ་མེད་པའོ། ། རྒྱུ་བ་མེད་པའི་ཕྱིར་ཆོས་ཐམས་ཅད་ནི། ཡུལ་མེད་པའོ། ། ཀུན་བརྟགས་པ་མ་ཡིན་པའི་ཕྱིར་ཆོས་ཐམས་ཅད་ནི། འདོད་པ་མེད་པའོ། ། འཇུག་པ་མེད་པའི་ཕྱིར་ཆོས་ཐམས་ཅད་ནི། གཟུགས་མེད་པའོ། ། ངེས་པར་སེམས་པ་མེད་པའི་ཕྱིར་ཆོས་ཐམས་ཅད་ནི། གཟུགས་མེད་པ་མ་ཡིན་པའོ། ། འཁྲུགས་པ་སྤངས་པའི་ཕྱིར་ཆོས་ཐམས་ཅད་ནི། འཁྲུགས་པ་མེད་པའོ། ། གཟུང་བ་མ་ཡིན་པའི་ཕྱིར་ཆོས་ཐམས་ཅད་ནི། བསམ་གྱིས་མི་ཁྱབ་པའོ། ། གཉིས་སུ་དབྱེར་མེད་པའི་ཕྱིར་ཆོས་ཐམས་ཅད་ནི། ཡིད་མེད་པའོ། ། ཡུལ་གྱི་ལམ་ལས་ཤིན་ཏུ་འདས་པའི་ཕྱིར་ཆོས་ཐམས་ཅད་ནི། གཟུང་བ་མ་ཡིན་པའོ། ། རྟག་པ་མེད་པའི་ཕྱིར་ཆོས་ཐམས་ཅད་ནི། ཀུན་གཞི་མེད་པའོ། ། རྟེན་པ་དང་མི་མཐུན་པ་མེད་པའི་ཕྱིར་ཆོས་ཐམས་ཅད་ནི། ཐེར་ཟུག་མ་ཡིན་པའོ། ། མཚན་མ་མེད་པའི་ཕྱིར་ཆོས་ཐམས་ཅད་ནི། མིང་མེད་པའོ། ། ཕན་ཚུན་གཅིག་ནས་གཅིག་ཏུ་བརྒྱུད་པ་མེད་པའི་ཕྱིར་ཆོས་ཐམས་ཅད་ནི། འདྲེས་པ་མེད་པའོ། ། གནས་མེད་པའི་ཕྱིར་ཆོས་ཐམས་ཅད་ནི། ། གནས་མེད་པའོ། ། འགྱོད་པ་མེད་པའི་ཕྱིར་ཆོས་ཐམས་ཅད་ནི། བརྗོད་པ་མེད་པའོ། ། སྡིག་པ་དང་བྲལ་བའི་ཕྱིར་ཆོས་ཐམས་ཅད་ནི། འགྱོད་པ་མེད་པའོ། ། དྲི་མ་མེད་པའི་ཕྱིར་ཆོས་ཐམས་ཅད་ནི། བག་ཆགས་མེད་པའོ། ། གཟོད་མ་ནས་རྣམ་པར་དག་པའི་ཕྱིར་ཆོས་ཐམས་ཅད་ནི། དྲི་མ་མེད་པའོ། ། ཉོན་མོངས་པ་མེད་པའི་ཕྱིར་ཆོས་ཐམས་ཅད་ནི། གཟོད་མ་ནས་རྣམ་པར་དག་པའོ། ། རྟེན་པ་མེད་པའི་ཕྱིར་ཆོས་ཐམས་ཅད་ནི། ཉོན་མོངས་པ་མེད་པའོ། ། གཡོས་པ་མེད་པའི་ཕྱིར་ཆོས་ཐམས་ཅད་ནི། རྟེན་པ་མེད་པའོ། ། ཆགས་པ་མེད་པར་འཇུག་པའི་ཕྱིར་ཆོས་ཐམས་ཅད་ནི། གཡོ་བ་མེད་པའོ། ། སྒྲིབ་པ་མེད་པའི་ཕྱིར་ཆོས་ཐམས་ཅད་ནི། ཆགས་པ་མེད་པར་འཇུག་པའོ། ། ནམ་མཁའ་དང་མཚུངས་པའི་ཕྱིར་ཆོས་ཐམས་ཅད་ནི། སྒྲིབ་པ་མེད་པའོ། ། རྣམ་པར་རྟོག་པ་མེད་པའི་ཕྱིར་ཆོས་ཐམས་ཅད་ནི། ནམ་མཁའ་དང་མཚུངས་པའོ། ། རྒྱུ་བ་མེད་པའི་ཕྱིར་ཆོས་ཐམས་ཅད་ནི། གཟུགས་ཅན་མ་ཡིན་པའོ། ། སྣང་བ་མེད་པའི་ཕྱིར་ཆོས་ཐམས་ཅད་ནི། བསྟན་དུ་མེད་པའོ། ། སྣང་བ་དང་བྲལ་བའི་ཕྱིར་ཆོས་ཐམས་ཅད་ནི། སྣང་བ་མེད་པའོ། མི་མཉམ་པ་མེད་པའི་ཕྱིར་ཆོས་ཐམས་ཅད་ནི། མཉམ་པ་མེད་པའོ། ། ནམ་མཁའ་དང་མཚུངས་བའི་ཕྱིར་ཆོས་ཐམས་ཅད་ནི། ། མི་མཉམ་པ་མེད་པའོ། ། གསལ་བ་མེད་པའི་ཕྱིར་ཆོས་ཐམས་ཅད་ནི། མུན་པ་མེད་པའོ། ། གཉེན་པོ་མེད་པའི་ཕྱིར་ཆོས་ཐམས་ཅད་ནི། སྣང་བ་མེད་པའོ། ། ལྟུང་བ་དང་བྲལ་བའི་ཕྱིར་ཆོས་ཐམས་ཅད་ནི། ཁ་ན་མ་ཐོ་བ་མེད་པའོ། ། ལས་བྱས་པ་མེད་པའི་ཕྱིར་ཆོས་ཐམས་ཅད་ནི། ཁ་ན་མ་ཐོ་བ་མེད་པའོ། ། རྫུན་པ་སླུ་བའི་ཆོས་ཡིན་པའི་ཕྱིར་ཆོས་ཐམས་ཅད་ནི། ཇི་ལྟ་བ་བཞིན་དུ་མ་ཡིན་པའོ། ། གཟོད་མ་ནས་གནས་པའི་ཕྱིར་ཆོས་ཐམས་ཅད་ནི། ཕྱེ་བ་མེད་པའོ། ། གཟུགས་ཅན་མ་ཡིན་པའི་ཕྱིར་ཆོས་ཐམས་ཅད་ནི། ལྟ་བ་པོ་མེད་པའོ། ། སྒྲ་མེད་པའི་ཕྱིར་ཆོས་ཐོམས་ཅད་ནི། ཉན་པ་པོ་མེད་པའོ། ། དྲི་མེད་པའི་ཕྱིར་ཆོས་ཐམས་ཅད་ནི། སྣོམ་པ་པོ་མེད་པའོ། ། རོ་མེད་པའི་ཕྱིར་ཆོས་ཐམས་ཅད་ནི། མྱང་བ་པོ་མེད་པའོ། ། རེག་བྱ་མེད་པའི་ཕྱིར་ཆོས་ཐམས་ཅད་ནི། རེག་པ་པོ་མེད་པའོ། ། ཆོས་མེད་པའི་ཕྱིར་ཆོས་ཐམས་ཅད་ནི། རྣམ་པར་ཤེས་པ་པོ་མེད་པའོ། ། སེམས་དང་། ཡིད་དང་། རྣམ་པར་ཤེས་བ་དང་བྲལ་བའི་ཕྱིར་ཆོས་ཐམས་ཅད་ནི། དམིགས་པ་མེད་པའོ། ། བྱང་ཆུབ་དང་མཚུངས་ཤིང་འདྲ་བའི་ཕྱིར་ཆོས་ཐམས་ཅད་ནི། བསམ་གྱིས་མི་ཁྱབ་པའོ། ། གཟོད་མ་ནས་མ་སྐྱེས་པའི་ཕྱིར་ཆོས་ཐམས་ཅད་ནི། གཟོད་མ་ནས་ཡོངས་སུ་མྱ་ངན་ལས་འདས་པའོ། ། དེ་ལྟར་སྒྲ་དབྱངས་རྣམ་པར་དག་པའི་གཟུངས་རབ་ཏུ་ཐོབ་པའི་བྱང་ཆུབ་སེམས་དཔའ་ཡི་གེ་དང་པོ་ཨ་ཞེས་བྱ་བ་ཡོངས་སུ་བརྗོད་པ་ན་བསྐལ་པའམ། བསྐལ་པ་ལས་ལྷག་པར་ཆོས་སྟོན་ཀྱང་ཡི་གེ་ཨ་ཞེས་བྱ་བའི་སྒྲ་མི་འདོར་བར་སྟོན་ཏོ། ། དེ་བཞིན་དུ་སྦྱར་ཏེ། ཡི་གེ་ཐམས་ཅད་ཀྱི་ནང་ནས་ཡི་གེ་གང་དང་གང་གིས་ཆོས་སྟོན་པར་རྩོམ་པའི་ཡི་གེ་དེ་དང་དེ་ཟད་པར་མི་འགྱུར་རོ། ། རྒྱུན་ཆད་པ་མེད་པར་ཆོས་ཀྱི་ཚུལ་དོན་དང་ཚིག་འབྲུ་དང་ལྡན་པ་སྟོན་ཏོ། ། གཟུངས་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ནི། ། སྤྱོད་ལམ་གྱིས་ལུས་རྣམ་པར་དག་པ་ཡིན་ནོ། ། སྤོབས་པས་ངག་རྣམ་པར་དག་པ་ཡིན་ནོ། ། བྱམས་པ་སྒོམ་པས་སེམས་རྣམ་པར་དག་པ་ཡིན་ནོ། ། ཆོས་དང་ཟང་ཟིང་སྦྱིན་པ་ལ་སེར་སྣ་མེད་པས་སྦྱིན་པ་རྣམ་པར་དག་པ་ཡིན་ནོ། ། ཚུལ་ཁྲིམས་ཉམས་པ་མེད་པས་ཚུལ་ཁྲིམས་རྣམ་པར་དག་པ་ཡིན་ནོ། ། ཞེ་འགྲས་པའི་སེམས་མེད་པས་བཟོད་པ་རྣམ་པར་དག་པ་ཡིན་ནོ། ། ལེགས་པར་བྱེད་པའི་ལས་བྱེད་པས་བརྩོན་འགྲུས་རྣམ་པར་དག་པ་ཡིན་ནོ། ། དེ་ལ་མ་ཆགས་པས་བསམ་གཏན་རྣམ་པར་དག་པ་ཡིན་ནོ། ། ཡེ་ཤེས་ཀྱི་སྣང་བ་རབ་རིབ་མེད་པས་ཤེས་རབ་རྣམ་པར་དག་པ་ཡིན་ནོ། ། ཁ་ན་མ་ཐོ་བ་མེད་པས་ལས་རྣམ་པར་དག་པ་ཡིན་ནོ། ། ལྷའི་མིག་ཡོངས་སུ་དག་པས་མིག་རྣམ་པར་དག་པ་ཡིན་ནོ། ། ལྷའི་སྣང་བ་ཐོབ་པ་དང་། དེ་བཞིན་གཤེགས་པ་ཐམས་ཅད་ཀྱིས་ཆོས་བསྟན་པ་ཉན་པས་རྣ་བ་རྣམ་པར་དག་པ་ཡིན་ནོ། ། དེ་བཞིན་གཤེགས་པའི་ཚུལ་ཁྲིམས་ཀྱི་དྲི་ལ་སྣོམ་པའི་ཕྱིར་སྣ་རྣམ་པར་དག་པ་ཡིན་ནོ། ། རོ་ཞིམ་པོ་ལ་བརྐམ་པ་མེད་པའི་ཕྱིར་ལྕེ་རྣམ་པར་དག་པ་ཡིན་ནོ། ། བརྫུས་ཏེ་སྐྱེ་བས་མངལ་གྱི་དྲི་མས་མི་གོས་པའི་ཕྱིར་ལུས་རྣམ་པར་དག་པ་ཡིན་ནོ། ། ཆོས་རབ་ཏུ་འབྱེད་པ་ལ་མཁས་པས་སེམས་རྣམ་པར་དག་པ་ཡིན་ནོ། ། མཚན་གྱིས་ལེགས་པར་བརྒྱན་པས་གཟུགས་རྣམ་པར་དག་པ་ཡིན་ནོ། ། ཡིད་དུ་འོང་བའི་སྒྲ་བརྗོད་པས་སྒྲ་རྣམ་པར་དག་པ་ཡིན་ནོ། ། ཚུལ་ཁྲིམས་དང་། ཐོས་པ་དང་། གཏོང་བའི་དྲིས་ཡོངས་སུ་བསྒོས་པས་དྲི་རྣམ་པར་དག་པ་ཡིན་ནོ། ། སྐྱེས་བུ་ཆེན་པོའི་མཚན་རོ་བྲོ་བའི་མཆོག་ཐོབ་པས་རོ་རྣམ་པར་དག་པ་ཡིན་ནོ། ། འཇམ་ཞིང་མཉེན་པའི་རྐང་ལག་ཐོབ་པས་རེག་པ་རྣམ་པར་དག་པ་ཡིན་ནོ། ། ཆོས་ལ་སྣང་བ་ཐོབ་པས་ཆོས་རྣམ་པར་དག་པ་ཡིན་ནོ། ། ཇི་ལྟར་ཐོས་པའི་ཆོས་རྣམས་མ་བརྗེད་པས་དྲན་པ་རྣམ་པར་དག་པ་ཡིན་ནོ། ། བདུད་ཀྱི་ལམ་ལས་ཤིན་ཏུ་འདས་པས་བློ་གྲོས་རྣམ་པར་དག་པ་ཡིན་ནོ། ། ཆོས་ཟབ་མོ་རྟོགས་པར་ཁོང་དུ་ཆུད་པས་རྟོགས་པ་རྣམ་པར་དག་པ་ཡིན་ནོ། ། གཟུངས་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ནི། སངས་རྒྱས་ཀྱི་ཞིང་ཇི་སྙེད་སྒྲས་གོ་བར་བྱེད་པ་དེ་སྙེད་འོད་ཀྱིས་རྒྱས་པར་འགེངས་སོ། ། འདི་ལྟ་སྟེ། གཟུངས་འདི་ཉིད་ཀྱི་མ་འདྲེས་པའི་ཁྱད་པར་རབ་ཏུ་ཐོབ་པས་འོད་དེས་ཕྱོགས་བཅུའི་སངས་རྒྱས་ཐམས་ཅད་ཀྱིས་གསུངས་པའི་ཆོས་ཀྱི་ཚུལ་འབྱུང་བར་བྱེད་དོ། ། སྒྲ་དབྱངས་རྣམ་པར་དག་པའི་གཟུངས་འདི་ནི། གང་ཅུང་ཟད་གཞོལ་བར་འཇུག་པ་སྟེ། སྒྲ་དབྱངས་རྣམ་པར་དག་པའི་གཟུངས་འདི་བསྟན་པ་ནི། ཚད་མེད་དེ། ཡི་གེ་རྣམ་པར་ཕྱེ་བས་བསམ་གྱིས་མི་ཁྱབ་པའོ། ། ངེས་པར་བསྟན་པས་མཐའ་ཡས་པའོ། ། རྣམ་པར་གདོན་མི་ཟ་བས་ཚད་མེད་པའོ། ། བཤད་པས་ཐུག་པ་མེད་པའོ། ། གཞོལ་བར་འཇུག་པས་ཆགས་པ་མེད་པའོ། ། 2. མི་ཟད་པའི་ཟ་མ་ཏོག་ཅེས་བྱ་བའི་གཟུངས་ནི། གཟུངས་ཀྱི་བསྟན་པ་མི་ཟད་པ་སྟེ། གཟུགས་མི་རྟག་གོ ། ཞེས་མི་རྟག་པར་བསྟན་པ་མི་ཟད་པ་དང་། གཟུགས་སྡུག་བསྔལ་ལོ། ། ཞེས་སྡུག་བསྔལ་བར་བསྟན་པ་མི་ཟད་པ་དང་། གཟུགས་བདག་མེད་པའོ། ། ཞེས་བདག་མེད་པར་བསྟན་པ་མི་ཟད་པ་དང་། གཟུགས་ཞི་པའོ། ། ཞེས་ཞི་བར་བསྟན་པ་མི་ཟད་པ་དང་། གཟུགས་དབེན་པའོ། ། ཞེས་དབེན་པར་བསྟན་པ་མི་ཟད་པ་དང་། གཟུགས་དབུ་བ་རྔོས་པ་ལྟ་བུའོ། ། ཞེས་དབུ་བ་རྡོས་པ་ལྟ་བུར་བསྟན་པ་མི་ཟད་པ་དང་། གཟུགས་སྒྱུ་མ་ལྟ་བུའོ། ། ཞེས་སྒྱུ་མ་ལྟ་བུར་བསྟན་པ་མི་ཟད་པ་དང་། གཟུགས་སྨིག་རྒྱུ་ལྟ་བུའོ། ། ཞེས་སྨིག་རྒྱུ་ལྟ་བུར་བསྟན་པ་མི་ཟད་པ་དང་། གཟུགས་ཆུའི་ཟླ་བ་ལྟ་བུའོ། ། ཞེས་ཆུའི་ཟླ་བ་ལྟ་བུར་བསྟན་པ་མི་ཟད་པ་དང་། གཟུགས་རྨི་ལམ་ལྟ་བུའོ། ། ཞེས་རྨི་ལམ་ལྟ་བུར་བསྟན་པ་མི་ ཟད་པ་དང་། གཟུགས་བྲག་ཅ་ལྟ་བུའོ། ། ཞེས་བྲག་ཅ་ལྟ་བུར་བསྟན་པ་མི་ཟད་པ་དང་། གཟུགས་མིག་ཡོར་ལྟ་བུའོ། ། ཞེས་མིག་ཡོར་ལྟ་བུར་བསྟན་པ་མི་ཟད་པ་དང་། གཟུགས་གཟུགས་བརྙན་ལྟ་བུའོ། ། ཞེས་གཟུགས་བརྙན་ལྟ་བུར་བསྟན་པ་མི་ཟད་པ་དང་། གཟུགས་ངོ་བོ་ཉིད་མེད་པའོ། ། ཞེས་ངོ་བོ་ཉིད་མེད་པར་བསྟན་པ་མི་ཟད་པ་དང་། གཟུགས་དངོས་པོ་མེད་པའོ། ། ཞེས་དངོས་པོ་མེད་པར་བསྟན་པ་མི་ཟད་པ་དང་། གཟུགས་གནས་མེད་པའོ། ། ཞེས་གནས་མེད་པར་བསྟན་པ་མི་ཟད་པ་དང་། གཟུགས་སྟོང་པའོ། ། ཞེས་སྟོང་པར་བསྟན་པ་མི་ཟད་པ་དང་། གཟུགས་མཚན་མ་མེད་པའོ། ། ཞེས་མཚན་མ་མེད་པར་བསྟན་པ་མི་ཟད་པ་དང་། གཟུགས་སྨོན་པ་མེད་པའོ། ། ཞེས་སྨོན་པ་མེད་པར་བསྟན་པ་མི་ཟད་པ་དང་། གཟུགས་མངོན་པར་འདུ་བྱེད་པ་མེད་པའོ། ། ཞེས་མངོན་པར་འདུ་བྱེད་པ་མེད་པར་བསྟན་པ་མི་ཟད་པ་དང་། གཟུགས་མ་སྐྱེས་པའོ། ། ཞེས་མ་སྐྱེས་པར་བསྟན་པ་མི་ཟད་པ་དང་། གཟུགས་སྐྱེ་བ་མེད་པའོ། ། ཞེས་སྐྱེ་བ་མེད་པར་བསྟན་པ་མི་ཟེད་པ་དང་། གཟུགས་སྔོན་གྱི་མཐར་ངོ་བོ་ཉིད་མེད་པའོ། ། ཞེས་སྔོན་གྱི་མཐར་ངོ་བོ་ཉིད་མེད་པར་བསྟན་པ་མི་ཟད་པ་དང་། གཟུགས་ཕྱི་མའི་མཐར་ངོ་བོ་ཉིད་མེད་པའོ། ། ཞེས་ཕྱི་མའི་མཐར་ངོ་བོ་ཉིད་མེད་པར་བསྟན་པ་མི་ཟད་པ་དང་། གཟུགས་བར་དུ་ངོ་བོ་ཉིད་མེད་པའོ། ། ཞེས་བར་དུ་ངོ་བོ་ཉིད་མེད་པར་བསྟན་པ་མི་ཟད་པ་དང་། གཟུགས་རབ་ཏུ་ཞི་བའོ། ། ཞེས་རབ་ཏུ་ཞི་བར་བསྟན་པ་མི་ཟད་པ་དང་། གཟུགས་ཉེ་བར་ཞི་བའོ། ། ཞེས་ཉེ་བར་ཞི་བར་བསྟན་པ་མི་ཟད་པ་དང་། གཟུགས་རྒྱུ་བ་མེད་པའོ། ། ཞེས་རྒྱུ་བ་མེད་པར་བསྟན་པ་མི་ཟད་པ་དང་། གཟུགས་སྤྲོས་པ་མེད་པའོ། ། ཞེས་སྤྲོས་པ་མེད་པར་བསྟན་པ་མི་ཟད་པ་དང་། གཟུགས་བསམ་གྱིས་མི་ཁྱབ་པའོ། ། ཞེས་བསམ་གྱིས་མི་ཁྱབ་པར་བསྟན་པ་མི་ཟད་པ་དང་། ། གཟུགས་མཚུངས་པ་མེད་པའོ། ། ཞེས་མཚུངས་པ་མེད་པར་བསྟན་པ་མི་ཟད་པ་དང་། གཟུགས་བདག་མེད་པའོ། ། ཞེས་བདག་མེད་པར་བསྟན་པ་མི་ཟད་པ་དང་། གཟུགས་སེམས་ཅན་མེད་པའོ། ། ཞེས་སེམས་ཅན་མེད་པར་བསྟན་པ་མི་ཟད་པ་དང་། གཟུགས་སྲོག་མེད་པའོ། ། ཞེས་སྲོག་མེད་ པར་བསྟན་པ་མི་ཟད་པ་དང་། གཟུགས་གསོ་བ་མེད་པའོ། ། ཞེས་གསོ་བ་མེད་པར་བསྟན་པ་མི་ཟད་པ་དང་། གཟུགས་གང་ཟག་མེད་པའོ། ། ཞེས་གང་ཟག་མེད་པར་བསྟན་པ་མི་ཟད་པ་དང་། གཟུགས་བེམ་པོའོ། ། ཞེས་བེམ་པོར་བསྟན་པ་མི་ཟད་པ་དང་། གཟུགས་གཡོ་བ་མེད་པའོ། ། ཞེས་གཡོ་བ་མེད་པར་བསྟན་པ་མི་ཟད་པ་དང་། གཟུགས་བྱེད་པ་མེད་པའོ། ། ཞེས་བྱེད་པ་མེད་པར་བསྟན་པ་མི་ཟད་པ་དང་། གཟུགས་རྩྭ་དང་། རྩིག་པ་དང་། ཤིང་དང་། བོང་བ་དང་། མིག་ཡོར་ལྟ་བུའོ། ། ཞེས་རྩྭ་དང་། རྩིག་པ་དང་། ཤིང་དང་། བོང་བ་དང་། མིག་ཡོར་ལྟ་བུར་བསྟན་པ་མི་ཟད་པ་དང་། གཟུགས་རྣམ་པར་བསྒྲུབས་པའི་མཚན་ཉིད་དོ། ། ཞེས་རྣམ་པར་བསྒྲུབས་པའི་མཚན་ཉིད་དུ་བསྟན་པ་མི་ཟད་པ་དང་། གཟུགས་འབྱུང་བ་ཆེན་པོ་བཞི་ལས་གྱུར་པའོ། ། ཞེས་འབྱུང་བ་ཆེན་པོ་བཞི་ལས་གྱུར་པར་བསྟན་པ་མི་ཟད་པ་དང་། གཟུགས་སྒྲ་མེད་པའོ། ། ཞེས་སྒྲ་མེད་པར་བསྟན་པ་མི་ཟད་པ་དང་། གཟུགས་རྣམ་པར་རིག་པ་མ་ཡིན་པའོ། ། ཞེས་རྣམ་པར་རིག་པ་མ་ཡིན་པར་བསྟན་པ་མི་ཟད་པ་དང་། གཟུགས་བརྗོད་དུ་མེད་པའོ། ཞེས་བརྗོད་དུ་མེད་པར་བསྟན་པ་མི་ཟད་པ་དང་། གཟུགས་རང་གི་ངང་གིས་ཡོངས་སུ་དག་པའོ། ། ཞེས་རང་གི་ངང་གིས་ཡོངས་སུ་དག་པར་བསྟན་པ་མི་ཟད་པ་དང་། གཟུགས་རྟེན་ཅིང་འབྲེལ་བར་འབྱུང་བའོ། ། ཞེས་རྟེན་ཅིང་འབྲེལ་བར་འབྱུང་བ་བསྟན་པ་མི་ཟད་པ་དང་། གཟུགས་ཆད་པ་མེད་པའོ། ། ཞེས་ཆད་པ་མེད་པར་བསྟན་པ་མི་ཟད་པ་དང་། གཟུགས་རྟག་པ་མེད་པའོ། ། ཞེས་རྟག་པ་མེད་པར་བསྟན་པ་མི་ཟད་པ་དང་། གཟུགས་བྱེད་པ་པོ་མེད་པའོ། ། ཞེས་བྱེད་པ་པོ་མེད་པར་བསྟན་པ་མི་ཟད་པ་དང་། གཟུགས་ཚོར་བ་པོ་མེད་པའོ། ། ཞེས་ཚོར་བ་པོ་མེད་པར་བསྟན་པ་མི་ཟད་པ་དང་། གཟུགས་དེ་བཞིན་ཉིད་ལ་རབ་ཏུ་གནས་པའོ། ། ཞེས་དེ་བཞིན་ཉིད་ལ་རབ་ཏུ་གནས་པར་བསྟན་པ་མི་ཟད་པ་དང་། གཟུགས་ཡང་དག་པའི་མཐའ་ལ་རབ་ཏུ་གནས་པའོ། ། ཞེས་ཡང་དག་པའི་མཐའ་ལ་རབ་ཏུ་གནས་པར་བསྟན་པ་མི་ཟད་པ་དང་། གཟུགས་ང་ཡི་བ་མེད་པའོ། ། ཞེས་ང་ཡི་བ་མེད་པར་བསྟན་པ་མི་ཟད་པ་དང་། གཟུགས་ཡོངས་སུ་འཛིན་པ་མེད་པའོ། ། ཞེས་ཡོངས་སུ་འཛིན་པ་མེད་པར་བསྟན་པ་མི་ཟད་པ་དང་། གཟུགས་ཟིན་པ་མེད་པའོ། ། ཞེས་ཟིན་པ་མེད་པར་བསྟན་པ་མི་ཟད་པ་དང་། གཟུགས་བསམ་གྱིས་མི་ཁྱབ་པའོ། ། ཞེས་བསམ་གྱིས་མི་ཁྱབ་པར་བསྟན་པ་མི་ཟད་པ་དང་། གཟུགས་མཚུངས་པ་མེད་པའོ། ། ཞེས་མཚུངས་པ་མེད་པར་བསྟན་པ་མི་ཟད་པ་དང་། གཟུགས་ཚད་མེད་པའོ། ། ཞེས་ཚད་མེད་པར་བསྟན་པ་མི་ཟད་པ་དང་། གཟུགས་ཐུག་པ་མེད་པའོ། ། ཞེས་ཐུག་པ་མེད་པར་བསྟན་པ་མི་ཟད་པ་དང་། གཟུགས་བྱང་ཆུབ་ཀྱི་རང་བཞིན་ནོ། ། ཞེས་བྱང་ཆུབ་གྱི་རང་བཞིན་དུ་བསྟན་པ་མི་ཟད་པ་དང་། གཟུགས་ནམ་མཁའ་དང་མཉམ་པའོ། ། ཞེས་ནམ་མཁའ་དང་མཉམ་པར་བསྟན་པ་མི་ཟད་པ་དང་། གཟུགས་མྱ་ངན་ལས་འདས་པའི་རང་བཞིན་ནོ། ། ཞེས་མྱ་ངན་ལས་འདས་པའི་རང་བཞིན་དུ་བསྟན་པ་མི་ཟད་པའོ། ། དེ་བཞིན་དུ་ཕུང་པོ་རྣམས་དང་། ཁམས་རྣམས་དང་། སྐྱེ་མཆེད་རྣམས་དང་། མིང་གི་ཚོགས་དང་། ཚིག་གི་ཚོགས་དང་། ཡི་གེའི་ཚོགས་ཐམས་ཅད་དང་། ཆོས་ཐམས་ཅད་ཀྱི་བར་དུའང་སྒྲ་གཅིག་བརྗོད་པ་ལ་འཇུག་པས་བསྟན་པ་མི་ཟད་པ་ཤེས་པར་ཐམས་ཅད་ལ་རྒྱས་པར་སྦྱར་རོ། ། འབྱུང་བ་ཆེན་པོ་བཞི་ལས་གྱུར་པ་ལུས་ཀྱི་ཟ་མ་ཏོག་འདིའི་མི་ཟད་པ་ཡོངས་སུ་བརྗོད་པ་ཤེས་པ་དང་། རིན་པོ་ཆེའི་ཟ་མ་ཏོག་ཆོས་ཀྱི་རྣམ་གྲངས་མི་ཟད་པ་ལ་འཇུག་པ་ཤེས་པ་དང་། བསྟན་པ་ཤེས་པ་མི་ཟད་པ་འདི་ནི། མི་ཟད་པའི་ཟ་མ་ཏོག་གི་གཟུངས་ཞེས་བྱ་སྟེ། གང་ཅུང་ཟད་འཇུག་པ་ཙམ་ཞིག་བསྟན་གྱི། བསྐལ་པའམ་དེ་ལས་ལྷག་པར་ཡང་མི་ཟད་པའི་ཟ་མ་ཏོག་ཅེས་བརྗོད་དུ་ཡོད་དོ། ། 3. འཁྱིལ་བ་མཐའ་ཡས་ཞེས་བྱ་བའི་གཟུངས་ནི། མཐའ་ཞེས་བྱ་བ་ཆད་པ་དང་། རྟག་པའོ། ། འཁྱིལ་བ་ཞེས་བྱ་བ་ནི། རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག ། སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་པའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ། ། དེ་ལ་སྔགས་ཀྱི་དགོངས་པ་མཐའ་ཡས་པ་དང་། སྔགས་བསྟན་པའི་སྒོ་མཐའ་ཡས་པ་དང་། གཞོལ་བར་འཇུག་པ་མཐའ་ཡས་པ་འདི་ནི། འཁྱིལ་བ་མཐའ་ཡས་པའི་གཟུངས་ཞེས་བྱའོ། ། མཐའ་ཞེས་བྱ་བ་ནི། ལེན་པ་དང་། འདོར་བའོ། ། འཁྱིལ་བ་ཞེས་བྱ་བ་ནི། མི་ལེན་མི་འདོར་བའོ། ། མཐའ་ཞེས་བྱ་བ་ནི། སྐྱེ་བ་དང་། འགགས་པའོ། ། འཁྱིལ་བ་ཞེས་བྱ་བ་ནི། སྐྱེ་བ་མེད་པ་དང་། འགགས་པ་མེད་པའོ། ། མཐའ་ཞེས་བྱ་བ་ནི། ཀུན་ནས་ཉོན་མོངས་པ་དང་། རྣམ་པར་བྱང་བའོ། ། འཁྱིལ་བ་ཞེས་བྱ་བ་ནི། རང་བཞིན་གྱིས་རྣམ་པར་དག་པའོ། ། མཐའ་ཞེས་བྱ་བ་ནི། མཚན་མ་དང་། སྤྲོས་པའོ། ། འཁྱིལ་བ་ཞེས་བྱ་བ་ནི། ཀུན་ཏུ་འབྱུང་བ་མེད་པའོ། ། མཐའ་ཞེས་བྱ་བ་ནི། རྟོག་པ་དང་། ། རྣམ་པར་རྟོག་པའོ། ། འཁྱིལ་བ་ཞེས་བྱ་བ་ནི། རྟོག་པ་མེད་པ་དང་། རྣམ་པར་རྟོག་པ་མེད་པའོ། ། མཐའ་ཞེས་བྱ་བ་ནི། རྒྱུ་དང་། ལྟ་བའོ། ། འཁྱིལ་བ་ཞེས་བྱ་བ་ནི། རྒྱུ་དང་། ལྟ་བ་ཡོངས་སུ་ཤེས་པའོ། ། མཐའ་ཞེས་བྱ་བ་ནི། མིང་དང་། གཟུགས་སོ། འཁྱིལ་བ་ཞེས་བྱ་བ་ནི། རྣམ་པར་རིག་བྱེད་མ་ཡིན་པའོ། ། མཐའ་ཞེས་བྱ་བ་ནི། འདུས་བྱས་དང་། འདུས་མ་བྱས་པའོ། ། འཁྱིལ་བ་ཞེས་བྱ་བ་ནི། འཁོར་གསུམ་ཡོངས་སུ་དག་པའོ། ། མཐའ་ཞེས་བྱ་བ་ནི། ནང་དང་། ཕྱིའོ། ། འཁྱིལ་བ་ཞེས་བྱ་བ་ནི། རྣམ་པར་ཤེས་པ་མི་གནས་པའོ། ། མཐའ་ཞེས་བྱ་བ་ནི། ལས་དང་། རྣམ་པར་སྨིན་པའོ། ། འཁྱིལ་བ་ཞེས་བྱ་བ་ནི། ལས་མེད་པ་དང་། རྣམ་པར་སྨིན་པ་མེད་པའོ། ། མཐའ་ཞེས་བྱ་བ་ནི། དགེ་བ་དང་། མི་དགེ་བའོ། ། འཁྱིལ་བ་ཞེས་བྱ་བ་ནི། མངོན་པར་འདུ་བྱེད་པ་མེད་པའོ། ། མཐའ་ཞེས་བྱ་བ་ནི། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པའོ། ། འཁྱིལ་བ་ཞེས་བྱ་བ་ནི། གཉིས་སུ་མེད་པའོ། ། མཐའ་ཞེས་བྱ་བ་ནི། ལས་དང་། ཉོན་མོངས་པ་རྣམས་སོ། ། འཁྱིལ་བ་ཞེས་བྱ་བ་ནི། རང་བཞིན་གྱིས་འོད་གསལ་བའོ། ། མཐའ་ཞེས་བྱ་བ་ནི། བདག་དང་། བདག་མེད་པའོ། ། འཁྱིལ་བ་ཞེས་བྱ་བ་ནི། ཤིན་ཏུ་རྣམ་པར་དག་པའོ། མཐའ་ཞེས་བྱ་བ་ནི། འཁོར་བ་དང་། མྱ་ངན་ལས་འདས་པའོ། ། འཁྱིལ་བ་ཞེས་བྱ་བ་ནི། ཆོས་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པའོ། ། དེ་ལྟར་མཐའ་ཡས་པ་བསྟན་པ་ཚད་མེད་དོ། ། འཁྱིལ་པ་སྟན་པ་ཚད་མེད་དོ། འཁྱིལ་བ་མཐའ་ཡས་པའི་གཟུངས་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ནི། མཐའ་ཡས་པའི་རྗེས་སུ་སོང་། ཆོས་འཁྱིལ་བའི་རྗེས་སུ་སོང་བས་བསྐལ་པ་བརྒྱ་སྟོང་ཕྲག་མཐའ་ཡས་པར་ཆོས་སྟོན་ཀྱང་དོན་དང་ཚིག་འབྲུས་གཟུངས་ཀྱི་ཡེ་ཤེས་འདིའི་མཐར་མི་ཕྱིན་ཏོ། ། འདི་ནི། འཁྱིལ་བ་མཐའ་ཡས་པའི་གཟུངས་ལ་གཞོལ་བར་འཇུག་པ་དང་། རྗེས་སུ་འགྲོ་བར་བསྟན་པ་དང་། ཡེ་ཤེས་ཀྱི་སྣང་བ་རྗེས་སུ་རྟོགས་པ་དང་། རྣམ་པར་དག་པའི་སྒོ་ལ་རབ་རིབ་མེད་པའི་ཡེ་ཤེས་ཀྱི་རྗེས་སུ་འགྲོ་བ་རྗེས་སུ་རྟོགས་པའོ། ། 4. རྒྱ་མཚོའི་ཕྱག་རྒྱ་ཞེས་བྱ་བའི་གཟུངས་ནི། དཔེར་ན། གླིང་བཞི་པ་ཆེན་པོའི་འཇིག་རྟེན་གྱི་ཁམས་ན་གང་དག་གཟུགས་སུ་སྣང་བ་དང་། སེམས་ཅན་གྱི་གཟུགས་སུ་སྣང་བའམ། རིའི་གཟུགས་སུ་སྣང་བའམ། ཤིང་གི་གཟུགས་སུ་སྣང་བའམ། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་དང་། ལོ་ཏོག་གི་གཟུགས་སུ་སྣང་བའམ། ཟླ་བ་དང་། ཉི་མ་དང་། སྐར་མ་དང་། ནོར་བུ་དང་། སྤྲིན་དང་། མེ་དང་། གློག་གི་གཟུགས་སུ་སྣང་བའམ། གྲོང་དང་། གྲོང་ཁྱེར་དང་། གྲོང་རྡལ་གྱི་དབྱིབས་ཀྱི་གཟུགས་སུ་སྣང་བའམ། གཞལ་མེད་ཁང་དང་། ལོངས་སྤྱོད་ཀྱི་གཟུགས་སུ་སྣང་བའམ། སྐྱེད་མོས་ཚལ་དང་། ཆུ་མིག་དང་། མཚེའུ་དང་། ལྟེང་ག་དང་། འབབ་ཆུའི་གཟུགས་སུ་སྣང་བའམ། ཉེ་བར་སྤྱོད་པའམ། ཡོངས་སུ་སྤྱོད་པ་ཐམས་ཅད་ཀྱི་གཟུགས་སུ་སྣང་བ་ངན་པ་དང་། འབྲིང་དང་། རབ་དང་། གཟུགས་སུ་སྣང་བ་དེ་དག་ཐམས་ཅད་རྒྱ་མཚོ་ཆེན་པོ་ལ་རྒྱ་དང་བཅས་པར་མི་ཉུང་། མི་མང་། ལྷག་པ་མེད་པས་དེའི་ཕྱིར་རྒྱ་མཚོ་ཆེན་པོ་ཞེས་བྱའོ། ། དེ་བཞིན་དུ་རྒྱ་མཚོའི་ཕྱག་རྒྱུའི་གཟུངས་ལ་རབ་ཏུ་གནས་པའི་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ལ་ལུས་རྒྱ་དང་མཚུངས་པ་ཡིན་ནོ། ། སེམས་ཅན་ཐམས་ཅད་ལ་ངག་རྒྱ་དང་མཚུངས་པ་ཡིན་ནོ། ། སེམས་ཅན་ཐམས་ཅད་ལ་སེམས་རྒྱ་དང་མཚུངས་པ་ཡིན་ནོ། ། ཕྱོགས་བཅུ་དག་ན་སངས་རྒྱས་བཅོམ་ལྡན་འདས་ཆོས་སྟོན་པའི་གསུང་གི་འཕྲིན་ལས་ཇི་སྙེད་འཇུག་པ་དེ་དག་བྱང་ཆུབ་སེམས་དཔའ་དེའི་ཁའི་སྒོ་ནས་ཕྱག་རྒྱས་བཏབ་པ་དང་མཚུངས་པར་འབྱུང་ངོ་། ། བྱང་ཆུབ་སེམས་དཔའ་དེ་བཞིན་གཤེགས་པའི་ཕྱག་རྒྱས་བཏབ་སྟེ་གང་ཅི་བརྗོད་པ་དེ་ཐམས་ཅད་དེ་བཞིན་གཤེགས་པའི་ཕྱག་རྒྱས་རྣམ་པར་མི་རྟོག་པར་ཕྱག་རྒྱ་ཐམས་ཅད་སྟོན་པ་ལ་གཞན་གྱི་དྲིང་མི་འཇོག་པར་འགྱུར་རོ། ། དེ་ལ་ཕྱག་རྒྱ་བསྟན་པ་ནི། འདི་ཡིན་ཏེ། འདི་ལྟ་སྟེ། ཨ་ཞེས་བྱ་བ་ནི། མངོན་པར་འདུ་བྱེད་མེད་པའི་ཕྱག་རྒྱའོ། ། ར་ཞེས་བྱ་བ་ནི། ཆོས་ཐམས་ཅད་ལ་འདོད་ཆགས་དང་བྲལ་བ་ཐོབ་པའི་ཕྱག་རྒྱའོ། ། པ་ཞེས་བྱ་བ་ནི། དོན་དམ་པ་བསྟན་པའི་ཕྱག་རྒྱའོ། ། ཙ་ཞེས་བྱ་བ་ནི། མིག་རྣམ་པར་དག་པའི་ཕྱག་རྒྱའོ། ། ན་ཞེས་བྱ་བ་ནི། མིང་དང་གཟུགས་ཐམས་ཅད་ཡོངས་སུ་ཤེས་པའི་ཕྱག་རྒྱའོ། ། ལ་ཞེས་བྱ་བ་ནི། སྲེད་པའི་འཁྲི་ཤིང་དང་བྲལ་བའི་ཕྱག་རྒྱའོ། ། ད་ཞེས་བྱ་བ་ནི། སྟོབས་བཅུ་ཡོངས་སུ་དག་པའི་ཕྱག་རྒྱའོ། ། བ་ཞེས་བྱ་བ་ནི། སྟོབས་དང་བྱང་ཆུབ་ཀྱི་ཡན་ལག་ཡོངས་སུ་དག་པའི་ཕྱག་རྒྱའོ། ། ཌ་ཞེས་བྱ་བ་ནི། ཁྲག་ཁྲུག་དང་བྲལ་བ་དང་། གདུང་བས་གདུངས་པ་དང་བྲལ་བའི་ཕྱག་རྒྱའོ། ། ཥ་ཞེས་བྱ་བ་ནི། མངོན་པར་ཤེས་པ་དྲུག་ཐོབ་པའི་ཕྱག་རྒྱའོ། ། བ་ཞེས་བྱ་བ་ནི། གཡོན་ཕྱོགས་ཀྱི་ལམ་རྣམ་པར་སྤངས་པའི་ཕྱག་རྒྱའོ། ། ཏ་ཞེས་བྱ་བ་ནི། དེ་ཁོ་ན་བསྟན་པའི་ཕྱག་རྒྱའོ། ། ཡ་ཞེས་བྱ་བ་ནི། ཇི་ལྟ་བ་བཞིན་གྱི་ཕྱག་རྒྱའོ། ། སྟ་ཞེས་བྱ་བ་ནི། ཁེངས་པའི་ཐ་བ་དང་བྲལ་བའི་ཕྱག་རྒྱའོ། ། ཀ་ཞེས་བྱ་བ་ནི། ཐེ་ཚོམ་དང་བྲལ་བའི་ཕྱག་རྒྱའོ། ། ས་ཞེས་བྱ་བ་ནི། བདེན་པ་བསྟན་པའི་ཕྱག་རྒྱའོ། ། མ་ཞེས་བྱ་བ་ནི། ལམ་རྣམ་པར་དག་པའི་ཕྱག་རྒྱའོ། ། ག་ཞེས་བྱ་བ་ནི། ཟབ་མོ་ལ་འཇུག་པའི་ཕྱག་རྒྱའོ། ། སྠ་ཞེས་བྱ་བ་ནི། མཐུ་དང་སྟོབས་ཀུན་ཏུ་བསྟན་པའི་ཕྱག་རྒྱའོ། ། ཛ་ཞེས་བྱ་བ་ནི། རྒ་ཤི་ལས་ཤིན་ཏུ་འདའ་བའི་ཕྱག་རྒྱའོ། ། ཤྭ་ཞེས་བྱ་བ་ནི། གཅན་གཟན་གྱི་ཉེས་པ་རྣམ་པར་སྤངས་པའི་ཕྱག་རྒྱའོ། ། དྷ་ཞེས་བྱ་བ་ནི། ཆོས་ཀྱི་དབྱིངས་འདྲེས་པ་མེད་པའི་ཕྱག་རྒྱའོ། ། ཤ་ཞེས་བྱ་བ་ནི། ཞི་གནས་ཡོངས་སུ་རྫོགས་པའི་ཕྱག་རྒྱའོ། ། ཁ་ཞེས་བྱ་བ་ནི། ནམ་མཁའ་མི་ཟད་པའི་ཆོས་ཉིད་ཀྱི་ཕྱག་རྒྱའོ། ། ཀྵ་ཞེས་བྱ་བ་ནི། ཟད་པ་ཤེས་པ་དང་། མི་སྐྱེ་བ་ཤེས་པའི་ཕྱག་རྒྱའོ། ། སུ་ཞེས་བྱ་བ་ནི། རྨུགས་པའི་སྒྲིབ་པ་རྣམ་པར་སྤངས་པའི་ཕྱག་རྒྱའོ། ། ས་ཞེས་བྱ་བ་ནི། སེམས་ཅན་ཐམས་ཅད་ཀུན་ཏུ་ཤེས་པར་བྱེད་པའི་ཕྱག་རྒྱའོ། ། ཧ་ཞེས་བྱ་བ་ནི། ཉམས་པ་ལ་རྟེན་པའི་ཆོས་རྣམ་པར་སྤངས་པའི་ཕྱག་རྒྱའོ། ། བྷ་ཞེས་བྱ་བ་ནི། དངོས་པོ་དང་། དངོས་པོ་མེད་པ་རྗེས་སུ་རྟོགས་པར་བྱེད་པའི་ཕྱག་རྒྱའོ། ། ཚ་ཞེས་བྱ་བ་ནི། འདོད་པ་དང་། ཞེ་སྡང་དང་། འཇིག་པ་དང་། གཏི་མུག་རྣམ་པར་སྤོང་བའི་ཕྱག་རྒྱའོ། ། སྨྲ་ཞེས་བྱ་བ་ནི། དྲན་པ་དང་། ཤེས་བཞིན་དང་། བརྗེད་པ་མེད་པའི་ཕྱག་རྒྱའོ། ། ཧྭ་ཞེས་བྱ་བ་ནི། བོད་པའི་ཕྱག་རྒྱའོ། ། ས་ཞེས་བྱ་བ་ནི། ཉོན་མོངས་པ་ཐམས་ཅད་དོར་པའི་ཕྱག་རྒྱའོ། ། གྷ་ཞེས་བྱ་བ་ནི། ཐིབས་པོ་དང་། ལིང་ཏོག་དང་། མ་རིག་པ་སེལ་བའི་ཕྱག་རྒྱའོ། ། ཎ་ཞེས་བྱ་ནི། མཐར་ཐུག་པར་འགྲོ་བའི་ཕྱག་རྒྱའོ། ། ཎ་ཞེས་བྱ་བ་ནི། གྱ་ནོམ་པའི་ཆོས་རྗེས་སུ་རྟོགས་པར་བྱེད་པའི་ཕྱག་རྒྱའོ། ། ཕ་ཞེས་བྱ་བ་ནི། འབྲས་བུ་ཐོབ་པར་བྱེད་པའི་ཕྱག་རྒྱའོ། ། སྐ་ཞེས་བྱ་བ་ནི། ཕུང་པོ་ཡོངས་སུ་ཤེས་པར་བྱ་བའི་ཕྱག་རྒྱའོ། ཛྭ་ཞེས་བྱ་བ་ནི། རིམས་ནད་སེལ་བའི་ཕྱག་རྒྱའོ། ། ཤྴུ་ཞེས་བྱ་བ་ནི། ངོ་མཚར་རྨད་དུ་བྱུང་བའི་ཆོས་མངོན་པར་རྫོགས་པར་བྱང་ཆུབ་པར་བྱ་བའི་ཕྱག་རྒྱའོ། ། བ་ཞེས་བྱ་བ་ནི། ལམ་གྱི་རྒྱུན་གཅོད་ཅིང་མྱ་ངན་ལས་འདས་པ་རྗེས་སུ་ཐོབ་པར་བྱེད་པའི་ཕྱག་རྒྱའོ། ། ལ་ཞེས་བྱ་བ་ནི། ཡི་གེའི་མཐའ་ཐུག་པ་མེད་པའི་ཕྱག་རྒྱའོ། ། དེ་ལྟར་བྱང་ཆུབ་སེམས་དཔའ་རྣམ་པ་ཇི་སྙེད་ཀྱིས་ཆོས་སྟོན་པའི་ཡི་གེ་དེ་དག་ཐམས་ཅད་ཀྱི་ཕྱག་རྒྱ་བསྟན་པ་རབ་ཏུ་ཤེས་ཏེ། འདི་ནི། རྒྱ་མཚོའི་ཕྱག་རྒྱའི་གཟུངས་ཀྱི་སྒོར་འཇུག་པའོ། ། 5. པདྨ་བཀོད་པ་ཞེས་བྱ་བའི་གཟུངས་ནི། འདི་ལ་བྱང་ཆུབ་སེམས་དཔའ་གཟུངས་འདི་ལ་རབ་ཏུ་གནས་པ་ནི། འཁོར་གྱི་དཀྱིལ་འཁོར་གང་དང་གང་དུ་ཆོས་བསྟན་པ་དེ་དང་། དེར་དེའི་པདྨའི་སྟན་སྣ་ཚོགས་པ་བལྟ་ན་སྡུག་པ་འབྱུང་སྟེ། དེ་པདྨའི་སྟན་དེ་ལ་འདུག་མ་ཐག་ཏུ་སྟེང་གི་བར་སྣང་ལས་པདྨའི་ཆར་འབབ་པོ། ། པདྨ་དེ་དག་ལས་ཀྱང་ཆོས་བསྟན་པ་རྣམ་པ་སྣ་ཚོགས་འབྱུང་སྟེ། འདི་ལྟ་སྟེ། ཟབ་མོ་བསྟན་པ་དང་། སྣ་ཚོགས་བསྟན་པ་དང་། དཔེ་བརྗོད་པ་བསྟན་པ་དང་། མདོ་དང་། དབྱངས་ཀྱིས་བསྙད་པ་དང་། ལུང་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། གླེང་གཞི་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བ་དང་། སྐྱེས་པའི་རབས་དང་། རྨད་དུ་བྱུང་བའི་སྡེ་དང་། ཤིན་ཏུ་རྒྱས་པ་དང་། ཆོས་གཏན་ལ་དབབ་པ་བསྟན་པ་དག་སྟོན་པར་འགྱུར་རོ། ། པདྨ་ལས་ཆོས་བརྗོད་པ་བྱུང་བ་དེའང་དེ་མེད་པའི་སྡུག་བསྔལ་ཡང་དག་པར་ཟད་པར་འགྱུར་རོ། ། བྱང་ཆུབ་སེམས་དཔའ་དེའང་བཏང་སྙོམས་སུ་བྱེད་ཅིང་མི་སྨྲ་བ་དང་། མཉམ་པར་བཞག་པའི་གནས་ཀྱང་མི་འདོར་རོ། ། པདྨ་འབྱུང་བ་ལས་ངེས་པར་བྱུང་བ་དེའང་དེ་བྱེད་པའི་སྡུག་བསྔལ་ཡང་དག་པར་ཟད་པར་འགྱུར་ཏེ། སངས་རྒྱས་ཀྱི་མཛད་པའང་བྱེད་དོ། ། བྱང་ཆུབ་སེམས་དཔའ་དེའི་ལུས་ཀྱི་སྤུའི་ཁུང་བུ་ཐམས་ཅད་ནས་འོད་ཟེར་དག་འབྱུང་ངོ་། ། འོད་ཟེར་དེ་དག་ལས་ཀྱང་པདྨ་དག་འབྱུང་ངོ་། ། པདྨ་དག་ལས་ཀྱང་བྱང་ཆུབ་སེམས་དཔའི་གཟུགས་རྣམས་འབྱུང་སྟེ། དེ་དག་ཕྱོགས་བཅུ་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ཏུ་དོང་ནས་སངས་རྒྱས་ཀྱི་མཛད་པ་བྱེད་དེ། འདི་ནི། པདྨ་བཀོད་པའི་གཟུངས་ཀྱི་སྒོར་འཇུག་པའོ། ། 6. ཆགས་པ་མེད་པའི་སྒོར་འཇུག་པ་ཞེས་བྱ་བའི་གཟུངས་ནི། བསྟན་པ་གཅིག་ལ་མི་ཆགས་སོ། ། བསྟན་པ་གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་དང་། བཅུ་དག་ལ་མི་ཆགས་སོ། ། བསྟན་པ་ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། དྲུག་ཅུ་དང་། བདུན་ཅུ་དང་། བརྒྱད་ཅུ་དང་། དགུ་བཅུ་དང་། བརྒྱ་དག་ལ་མི་ཆགས་སོ། ། བསྟན་པ་སྟོང་ལ་མི་ཆགས་སོ། ། བསྟན་པ་བྱེ་བ་བརྒྱ་ཕྲག་སྟོང་ལ་མི་ཆགས་སོ། ། བསྟན་པ་ཐེར་འབུམ་དང་། ཁྲག་ཁྲིག་དང་། གཏམས་དང་། དཀྲིགས་དང་། མི་འཁྲུགས་པ་དང་། ཚད་མེད་པ་དང་། གྲངས་མེད་པ་དང་། མཚུངས་པ་མེད་པ་དང་། གཞལ་དུ་མེད་པ་དང་། དཔག་ཏུ་མེད་པ་ལ་མི་ཆགས་སོ། ། བསྟན་པ་གངྒཱའི་ཀླུང་གི་བྱེ་མའི་རྡུལ་ཕྲ་རབ་ཀྱི་རྡུལ་སྙེད་ལ་མི་ཆགས་སོ། ། བསྟན་པ་ཛམྦུའི་གླིང་གི་རྡུལ་ཕྲ་རབ་ཀྱི་རྡུལ་སྙེད་ལ་མི་ཆགས་སོ། ། བསྟན་པ་གླིང་བཞི་པའི་རྡུལ་ཕྲ་རབ་ཀྱི་རྡུལ་སྙེད་ལ་མི་ཆགས་སོ། ། བསྟན་པ་སྟོང་གསུམ་གྱི་སྟོང་ཆེན་པོ་ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ལ་མི་ཆགས་སོ། ། བསྟན་པ་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་ཀྱི་རྡུལ་ཕྲ་རབ་ཀྱི་རྡུལ་སྙེད་ལ་མི་ཆགས་པ་ནས་བསྟན་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ལ་མི་ཆགས་སོ། ། དེ་ལྟར་ཆོས་ཀྱི་སྒོ་གང་དང་གང་བརྩམས་པའི་ཆོས་ཀྱི་སྒོ་དེ་དང་དེའི་བསྟན་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་དག་བསྟན་པ་གཅིག་གིས་སྟོན་ཏོ། ། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། བརྒྱ་དང་། སྟོང་དང་། ཚད་མེད་པའི་བསྟན་པས་སྟོན་ཏེ། ལྡན་པ་དང་། འབྱོར་པ་ དང་། ཤིན་ཏུ་ངེས་པའི་ཚིག་དང་། དོན་དང་། ཚིག་འབྲུ་དང་ལྡན་པར་སྟོན་ཀྱང་ཆགས་པ་མེད་ཅིང་རྒྱུན་ཆད་པ་མེད་དེ། འདི་ནི། ཆགས་པ་མེད་པའི་སྒོར་འཇུག་པ་ཞེས་བྱ་བའི་གཟུངས་སོ། ། 7. སོ་སོ་ཡང་དག་པར་རིག་པ་རྣམ་པར་ངེས་པ་ལ་འཇུག་པ་ཞེས་བྱ་བའི་གཟུངས་ནི། གང་དོན་སོ་སོ་ཡང་དག་པར་རིག་པ་བསྟན་པ་མི་ཟད་པ་ཤེས་པ་དང་། ཆོས་སོ་སོ་ཡང་དག་པར་རིག་པ་བསྟན་པ་མི་ཟད་པ་ཤེས་པ་དང་། ངེས་པའི་ཚིག་སོ་སོ་ཡང་དག་པར་རིག་པ་བསྟན་པ་མི་ཟད་པ་ཤེས་པ་དང་། སྤོབས་པ་སོ་སོ་ཡང་དག་པར་རིག་པ་བསྟན་པ་མི་ཟད་པ་ཤེས་པ་སྟེ། ཤེས་པ་འདི་ལྟ་བུ་རབ་ཏུ་ཐོབ་པ་དེ་ལ་ཤར་ཕྱོགས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་གཅིག་ཏུ་འདུས་ཏེ་རང་རང་གི་སྐད་ཀྱིས་དོན་ལ་མཁས་པ་ཡོངས་སུ་དྲིས། གང་དག་ལྷོ་ཕྱོགས་ཀྱི་སེམས་ཅན་དེ་དག་གིས་ནི། ཆོས་ལ་མཁས་པ་ཡོངས་སུ་དྲིས། གང་དག་ནུབ་ཕྱོགས་ཀྱི་སེམས་ཅན་དེ་དག་གིས་ནི། ངེས་པའི་ཚིག་ལ་མཁས་པ་ཡོངས་སུ་དྲིས། ། གང་དག་བྱང་ཕྱོགས་ཀྱི་སེམས་ཅན་དེ་དག་གིས་ནི། སྤོབས་པ་ལ་མཁས་པ་ཡོངས་སུ་དྲིས་ན། དེ་ལ་བྱང་ཆུབ་སེམས་དཔའི་དག་གི་ལས་ཀྱང་དེ་སྙེད་དུ་ཚད་མེད་དེ། དུས་གཅིག་ཏུ་བརྗོད་ཅིང་སྐད་སྣ་ཚོགས་ལ་འཇུག་པ་ལ་བརྗེད་པར་མི་འགྱུར། སེམས་གཡེང་བར་མི་འགྱུར་རོ། ། སྐད་ལ་འཇུག་པ་ཤེས་བས་སྐད་ཐམས་ཅད་ཀྱི་རྗེས་སུ་ཞུགས་ཏེ། སྐད་ཅིག་བརྗོད་པས་སེམས་ཅན་ཐམས་ཅད་ཀྱི་སེམས་ཀྱི་རྣམ་པར་རིག་པ་ཚིམ་པར་བྱེད་དེ། འདི་ནི། སོ་སོ་ཡང་དག་པར་རིག་པ་རྣམ་པར་ངེས་པ་ལ་འཇུག་པ་ཞེས་བྱ་བའི་གཟུངས་སོ། ། 8. སངས་རྒྱས་ཀྱི་རྒྱན་བྱིན་གྱིས་བརླབས་པ་ཞེས་བྱ་བའི་གཟུངས་ནི། འདི་ལ་བྱང་ཆུབ་སེམས་དཔའ་གཟུངས་འདི་ལྟ་བུ་རབ་ཏུ་ཐོབ་པ། ཆོས་ཀྱི་སྟན་ཆེན་པོ་ལ་འདུག་པ། འཁོར་གྱི་དཀྱིལ་འཁོར་ཆེན་པོའི་དབུས་ན་འདུག་པའི་སྤྱི་གཙུག་གི་དྲང་ཐད་ཀྱི་སྟེང་ན་དེ་བཞིན་གཤེགས་པའི་སྐུ་གསེར་གྱི་མདོག་ཅན། མཚན་དང་དཔེ་བྱད་ཀྱིས་ལེགས་པར་བརྒྱན་པའི་ལུས་དང་ལྡན་པའི་གཟུགས་འབྱུང་སྟེ། དེ་བཞིན་གཤེགས་པའི་གཟུགས་དེས་ཕྱག་གཡས་པ་དེའི་སྤྱི་གཙུག་ཏུ་འཇོག་གོ ། ཕྱག་བཞག་མ་ཐག་ཏུ་བྱང་ཆུབ་སེམས་དཔའ་དེ་སངས་རྒྱས་ཀྱི་རྒྱན་གྱིས་བརྒྱན་པའི་ལུས་ཀྱི་ལས་དང་ལྡན་པར་འགྱུར་རོ། ། སངས་རྒྱས་ཀྱི་རྒྱན་གྱིས་བརྒྱན་པའི་ངག་གི་ལས་དང་ལྡན་པར་འགྱུར་རོ། ། སངས་རྒྱས་ཀྱི་རྒྱན་གྱིས་བརྒྱན་པའི་དྲན་པའི་ལས་དང་ལྡན་པར་འགྱུར་རོ། ། དེ་ཆོས་དེ་ལྟ་བུ་དང་ལྡན་ཏེ། འཁོར་ཐམས་ཅད་ཀྱི་སེམས་ཀྱི་བསམ་པ་ལ་འཇུག་པས་སོ་སོ་ཅི་རིགས་པར་ཆོས་སྟོན་ཏེ། ། ཞག་གཅིག་གམ། ཞག་གཉིས་སམ། ཞག་གསུམ་མམ། ཞག་བཞིའམ། ཞག་བདུན་ནམ། ཟླ་བ་ཕྱེད་དམ། ཟླ་བ་གཅིག་གམ། དུས་སམ། ལོ་ཁྱུད་འཁོར་རམ། ལོ་བརྒྱའམ། སྟོང་ངམ། ལོ་བརྒྱ་ཕྲག་སྟོང་ངམ། ཇི་ཙམ་དུ་འདོད་པ་དེ་ཙམ་དུ་ཁ་ཟས་དང་བྲལ་བའི་རྒྱུད་ཀྱིས་ཆོས་སྟོན་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་ཤིན་ཏུ་ཡོངས་སུ་བཟུང་བའི་ཕྱིར་དེའི་ཆོས་ཀྱི་སྒོ་ཡོངས་སུ་ཟད་པར་མི་འགྱུར། ལུས་དང་སེམས་ངལ་བར་མི་འགྱུར་རོ། ། དེ་ལ་ཤེས་པ་ཆེན་པོ་བཞི་དང་ལྡན་པར་འགྱུར་བ་གང་ཞེ་ན། (1)སེམས་ཅན་གྱི་བསམ་པ། (2)ཚིག་རབ་ཏུ་དབྱེ་བ་ཤེས་པ། (3)སོ་སོ་ཡང་དག་པར་རིག་པ་མི་ཟད་པ་ཤེས་པ། (4)ཐེག་པ་ཇི་ལྟར་རྣམ་པར་དགོད་པ་ཤེས་པ་དང་། སོ་སོ་ཅི་རིགས་པར་བསྟན་པ་ཤེས་པ་དང་ལྡན་པར་འགྱུར་བ་དང་བཞིའོ། ། འདི་ནི། སངས་རྒྱས་ཀྱི་རྒྱན་བྱིན་གྱིས་བརླབས་པའི་གཟུངས་ཀྱིས་གང་ཅུང་ཟད་གཞོལ་བའི་སྒོར་འཇུག་པ་ཞེས་པའོ། ། གཟུངས་འདི་ནི། མི་ཟད་པ། ཐུག་པ་མེད་པའི་རྗེས་སུ་སོང་བ། དེ་བཞིན་གཤེགས་པའི་མཚམས་དང་བཅས་པ་དང་། བསྟན་པ་ཚད་མེད་པའོ། ། བྱང་ཆུབ་སེམས་དཔའ་རྣམས་ཀྱི་གཟུངས་ནི། བརྒྱད་པོ་འདི་དག་སྟེ། གཟུངས་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་རྣམས་ནི། སངས་རྒྱས་ཐམས་ཅད་ཀྱིས་གསུངས་པ་ཀུན་ཏུ་འཛིན་ཏོ། ། ཆོས་སྟོན་པ་ནི། མི་ཟད་པར་འགྱུར་རོ། ། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པར་འགྱུར་རོ། །
Tibetan Source	《མདོ་ད་པ་》ཤ་280བ་5ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number