8759

Tibetan	རྒྱང་ཞགས་ཆུའི་སྒྲོན་མའི་རང་བཞིན་རྒྱས་པར་བཤད་པ་བཅུ།
Tibetan Alternate
Tibetan Definition	དེ་ཡང་། ཀློང་ཆེན་མཛོད་བདུན་གྱི་ཚིག་དོན་མཛོད་ལས་བྱུང་བ་སྟེ། 1. ངོ་བོ་ནི། རྒྱང་ཞགས་ཆུའི་སྒྲོན་མའི་ངོ་བོས་སྣང་བ་གཉིས་ཀྱི་ཆ་འཛིན་པས་འཁོར་འདས་མཐུན་པར་ལྟ་བ་སྟེ། སྒྲོན་མ་འབར་བ་ལས། རྒྱང་ཞགས་ཆུ་ཡི་སྒྲོན་མ་ཡིས། ། ངོ་བོ་སྣང་བ་གཉིས་ཀ་སྡུད། ། མཐོང་བྱེད་འཛིན་ཆ་མ་འགགས་ཕྱིར། ། གཉིས་ཀའི་ཆ་འཛིན་ལྟ་བས་ན། ། འཁོར་འདས་མཐུན་པའི་ལྟ་བའོ། ། ཞེས་སོ། ། 2. ངེས་ཚིག་ནི། མུ་ཏིག་ཕྲེང་བ་ལས། རྒྱང་ནི་སྒོ་ལྔའི་རྟ་ཕོ་ལ། ། ཡིད་ཀྱི་རྣམ་ཤེས་ཞོན་ནས་རྒྱུ། ། ཡུལ་རྣམས་ཀུན་ལ་འཇུག་ཅིང་སྡུད། ། ཞགས་པས་བཟུང་བའི་ཡུལ་ཉིད་ནི། ། འཛིན་པའི་སེམས་ཀྱིས་རྣམ་པར་བཟུང་། ། ཆུས་ནི་དྭངས་སྙིགས་འབྱེད་པར་བྱེད། ། དེ་ཡང་གཉིས་ན་ཆ་མཉམ་སྟེ། ། མདོར་ན་དབང་པོའི་དྭངས་མ་ཡིན། ། ཞེས་དང་། སྔ་མ་ལས། ངེས་པའི་ཚིག་ནི་འདི་ལྟ་བུ། ། རྒྱང་ནི་རིང་བའི་རྒྱུད་འཛིན་པས། ། གཟུགས་སུ་སྣང་བ་འཛིན་པ་དང་། ། ཁ་དོག་ལ་སོགས་སྡུད་པ་དང་། ། རིག་པའི་སྐུ་ཡང་རྒྱང་རིང་ནས། ། མཐོང་བྱེད་འཛིན་པར་བྱེད་པ་དང་། ། འཁོར་བ་རྟོགས་པའི་ཆ་ནས་ནི། ། རྒྱང་དུ་འཕེན་པས་རྒྱང་ཞེས་བྱ། ། དེ་བཞིན་མ་རྟོགས་ཕྱོགས་ནས་ཀྱང་། ། མྱང་འདས་འཕེན་པས་རྒྱང་ཡིན་ནོ། ། དེ་བཞིན་འཁོར་བའི་སྣང་ཆ་ནས། ། གཟུགས་དང་འདོད་ཡོན་ལྔ་རྣམས་ནི། ། འདི་ཡིས་འཆིང་བས་ཆགས་པ་ཡིན། ། དབང་པོའི་ཡུལ་ལ་སྣང་བ་ཡིས། ། དྲན་བསམ་བདག་ཏུ་འདིས་འཛིན་པས། ། ཞགས་པ་ཞེས་ནི་རྒྱང་ནས་འཛིན། ། དེ་བཞིན་ནམ་མཁའ་སྤྲིན་བྲལ་ལ། ། རིག་པ་བདག་མེད་སྐུར་སྣང་བ། ། སྣང་བ་ཡེངས་སུ་མི་འཇུག་པར། ། འདི་ཡིས་འཛིན་པས་ཞགས་ཞེས་བྱ། ། ཆུ་ནི་སྣང་བ་དེ་དག་ལ། ། ཞན་པ་རང་སར་ལོག་ནས་ནི། ། ཀུན་ལ་ཆགས་པའི་སེམས་མེད་པར། ། སྣང་བ་རང་སར་བཞག་པས་ནི། ། བདག་འཛིན་བྲལ་བས་ཆུ་ཞེས་བྱ། ། སྒྲོན་ནི་རང་གི་སྣང་བ་ཀུན། ། གོང་ནས་གོང་དུ་འཕེལ་བ་ཡི། ། རིག་པའི་ཡེ་ཤེས་གསལ་བས་སྒྲོན། ། འབྱུང་བ་རགས་པའི་སྣང་བ་ཀུན། ། རང་ཤེས་སྤྱོད་པ་འགག་མེད་ཅིང་། ། དབང་པོའི་རང་སྒོར་གསལ་བས་སྒྲོན། ། རིག་པ་ཕྱི་ཡི་དབྱིངས་བཞག་པས། ། ནང་དབྱིངས་རང་སར་དག་སྟེ་སྣང་། ། ཉམས་ཀྱི་སྣང་བ་འདིས་བསྐྱེད་པས། ། དབྱིངས་རིག་འདྲེས་པས་མ་ཡང་ཡིན། ། དབང་པོ་ཀུན་གྱི་དྭངས་མ་ཡི། ། འཆར་བྱེད་སྒོ་ནི་མིག་ཡིན་པས། ། ཀུན་གྱི་གཞི་འཛིན་མ་ཞེས་བྱ། ། ཞེས་སོ། ། 3. མཚན་ཉིད་ནི། གཟུགས་སྣང་འཛིན་རུང་དུ་སྐྱེས་པ་གང་ཞིག་ཡེ་ཤེས་ཀྱི་སྣང་བ་མཐོང་བས་འཁྲུལ་སྣང་འགག་བྱེད་དུ་གནས་པ་སྟེ། ཐལ་འགྱུར་ལས། རྒྱང་ཞགས་སྒྲོན་མའི་མཚན་ཉིད་ནི། ། ཁྱབ་པས་འཇུག་ལ་འཇུག་པས་ཁྱབ། ། འབྱུང་བ་བཞི་དག་བྱེད་པར་གནས། ། འཛིན་འཇུག་མཆེད་དང་བྱེད་པའོ། ། ཞེས་དང་། ། སྒྲོན་མ་འབར་བ་ལས། འདི་ཡི་མཚན་ཉིད་འདི་ལྟ་བུ། ། འཆར་བྱེད་འགག་པ་མེད་པ་ཡི། ། དབང་པོའི་དྭངས་མ་མིག་གི་སྒོར། ། བསྐྱེད་པས་པད་མའི་སྤྱན་དུ་གནས། ། རང་གི་མཚན་ཉིད་དབང་པོ་འཛིན། ། འབྱུང་བ་ལས་ནི་འཕེན་པ་དང་། ། སྡུད་དང་འཛིན་དང་མཆེད་པར་སྣང་། ། ཡེ་ཤེས་ལས་ནི་ལྟ་བ་དང་། ། གནས་དང་གོང་མ་འཛིན་པའོ། ། དབང་པོས་ཡུལ་དང་ཡུལ་ཅན་དང་། ། ཡུལ་མེད་རྣམས་ནི་རང་འཛིན་པའོ། ། ཞེས་སོ། ། 4. དབྱེ་བ་ནི། འདི་ལ་དབྱེ་ན་གསུམ་སྟེ། འབྱུང་བའི་དྭངས་མ་འདུས་པའི་རྒྱང་ཞགས་དབང་རྟེན་དྭངས་པ་ཟར་མའི་མེ་ཏོག་ལྟ་བུ་དང་། དབང་པོ་འདུས་པའི་རྒྱང་ཞགས་དབང་པོ་གཟུགས་ཅན་པ་གཟུགས་ལ་འཛིན་ནུས་སུ་སྐྱེས་པ་མིག་གི་དབང་པོ་དང་། ཡེ་ཤེས་འདུས་པའི་རྒྱང་ཞགས་འོད་རྩ་དྭངས་པའི་ཆ་སྣ་འོད་གསལ་གྱི་སྣང་བ་མཐོང་བྱེད་དུ་གནས་པ་སྟེ། དེ་ཉིད་ལས། དབྱེ་བ་རྣམ་པ་གསུམ་ཡིན་ནོ། ། འབྱུང་བའི་དྭངས་མ་རང་འདུས་པའི། ། རྒྱང་ཞགས་ཆུ་ཡི་སྒྲོན་མ་དང་། ། ཡེ་ཤེས་འདུས་པའི་རྒྱང་ཞགས་དང་། ། དབང་པོ་འདུས་པའི་རྒྱང་ཞགས་སོ། ། ཞེས་སོ། ། 5. རྟེན་ནི། རྟེན་ནི་རང་གནས་མིག་ལ་བརྟེན་ལ་མཐོང་བྱེད་ཀྱི་ཆ་དེ་སྣང་ཡུལ་དེ་ལ་བརྟེན་པས་དག་མ་དག་གཉིས་ལ་བརྟེན་པ་སྟེ། ཐལ་འགྱུར་ལས། རྒྱང་ཞགས་རྟེན་ནི་སྣང་བ་ལ། ། དག་དང་མ་དག་བྱེ་བྲག་གིས། ། ལས་དང་ཚོགས་པ་དག་དང་ནི། ། སྐུ་དང་ཡེ་ཤེས་གཉིས་ལ་བརྟེན། ། ཞེས་སོ། ། 6. བཞུགས་ཚུལ་ནི། བཞུགས་ཚུལ་ནི་སྣང་བ་འཛིན་བྱེད་དུ་རང་གསལ་འགག་མེད་ཆེན་པོར་བཞུགས་ཏེ། སྒྲོན་མ་འབར་བ་ལས། གནས་དང་གོང་མ་འཛིན་པར་བཞུགས། ། ཞེས་སོ། ། 7. གནས་ནི། གནས་ནི་དེ་ཉིད་ལས། འདི་ཡི་གནས་ནི་མིག་ཡིན་ཏེ། ། མཐེང་བྱེད་འགག་པ་མེད་པ་ཡིས། ། ཡུལ་རྣམས་འཛིན་པར་བྱེད་པ་ཡིན། ། ཞེས་སོ། ། 8. ཡུལ་ནི། ཡུལ་ནི་སྣང་ཡུལ་འཁྲུལ་པ་དེའི་དོན་རང་མཚན་གྱི་ཚ་སྟེ་དྭངས་མ་འདུས་པའི་ཡུལ་ལོ། ། དེ་ལ་གཟུགས་ཞེས་མིང་གི་ཆ་དེ་དབང་པོའི་རྒྱང་ཞགས་ཀྱི་ཡུལ་ལོ། ། འོད་སྣང་སྟོང་གཟུགས་ནི་ཡེ་ཤེས་ཀྱི་རྒྱང་ཞགས་ཀྱི་ཡུལ་ཏེ། དེ་ཉིད་ལ་བསླབ་པར་བྱ་བ་ནི། ཐལ་འགྱུར་ལས། རྒྱང་ཞགས་ཡུལ་ནི་གཟུགས་ལ་སོགས། ། སྡུད་ཅིང་འཛིན་ལ་འཕེན་པར་བྱེད། ། གནད་ཀྱིས་བཅིང་དང་ཞགས་པ་དང་། ། དབང་པོ་སྒྱུར་དང་རྩ་བ་བཅད། ། འདྲེན་ཅིང་གཟུགས་ལ་བསླབ་པར་བྱ། ། ཞེས་སོ། ། 9. དཔེ་ནི། མཚོན་དཔེ་ནི་ལྕགས་ཀྱུ་ལྟ་བུ་སྟེ། མུ་ཏིག་ཕྲེང་བ་ལས། དཔེར་ན་འཛིན་བྱེད་ལྕགས་ཀྱུ་ལྟར། ། ཞེས་པ་དང་། སྒྲོན་མ་འབར་བ་ལས། ། དཔེར་ན་འཛིན་བྱེད་ལྕགས་ཀྱུ་ཡིས། ། གང་སྣང་སྣ་ནས་འཛིན་པ་བཞིན། ། འཁོར་དང་མྱ་ངན་འདས་པ་ཡི། ། སྣ་གཉིས་འདི་ཡིས་འཛིན་པར་བྱེད། ། ཅེས་སོ། ། 10 .གནད་ནི། ཇི་ལྟར་ཉམས་སུ་ལེན་པའི་གནད་ནི། སྤྱིར་སྣང་ཡུལ་གཏད་དུས་རིག་པ་དལ་བ་རླུང་དལ་བ་ཡུལ་མི་རྟོག་པ་གསུམ་ཡིན་ལ། འདིར་མིག་མི་འགུལ་བ་གཙོ་བས་ལྟ་སྟངས་དང་སྦྱར་བ་སྟེ། ཐལ་འགྱུར་ལས། སྒྲོན་མའི་གནད་ནི་ངས་བཤད་ཀྱི། ། ལྷ་བུ་སྐལ་ལྡན་ཁྱོད་ཉོན་ཅིག ཡུལ་དང་རིག་པ་རླུང་དག་གིས། ། ཆོས་ཉིད་ལམ་དུ་གཟུང་པའི་ཕྱིར། ། ཡེ་ཤེས་རྫོགས་པས་ཆོས་ཉིད་དག ། འདི་ཡང་སྒྲོན་མའི་གནད་ཡིན་ནོ། ། རྒྱང་ཞགས་འགུལ་བ་མེད་པ་གནད། ། འདི་དུས་ལྟ་སྟངས་གསུམ་དང་སྦྱར། ། ཞེས་སོ། །
Tibetan Source	《 ཀློང་ཆེན་མཛོད་བདུན་ག་པ་》ཤ་53བ་7ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number