9275

Tibetan	བྱང་ཆུབ་སེམས་དཔའ་ནེམ་ནུར་མེད་བའི་ཆོས་བཅུ།
Tibetan Alternate
Tibetan Definition	དེ་ཡང་། འཕགས་པ་དཀོན་མཆོག་སྤྲིན་ཞེས་བྱ་བའི་མདོ་ལས་བྱུང་བ་སྟེ། 1. དེ་བཞིན་གཤེགས་པའི་སྐུའི་གསང་བ་ལ་མངོན་པར་དད་ནི། འདི་ལ་བྱང་ཆུབ་སེམས་དཔའ་འདི་སྙམ་དུ་སེམས་སོ། ། གང་འདི་དེ་བཞིན་གཤེགས་པའི་ཆོས་ཀྱི་སྐུ་དང་། ཞི་བའི་སྐུ་དང་། མི་མཉམ་པ་དང་མཉམ་པའི་སྐུ་དང་། ཚད་མེད་པའི་སྐུ་དང་། ཕལ་ལ་མེད་པའི་སྐུ་དང་། རྡོ་རྗེའི་སྐུ་ཞེས་བྱ་བ་ཐོས་པ་འདི་ནི། ཡང་དག་པའོ། ། འདི་ནི། དེ་ཁོ་ནའོ། ། འདི་ནི། མི་སླུ་བའོ་སྙམ་སྟེ། གནས་འདི་ལ་ནེམ་ནུར་མེད་ཅིང་ཐེ་ཚོམ་མེད་དེ། དེ་ལྟར་ན། བྱང་ཆུབ་སེམས་དཔའ་དེ་བཞིན་གཤེགས་པའི་སྐུའི་གསང་བ་ལ་མངོན་པར་དད་དོ། ། 2. བྱང་ཆུབ་སེམས་དཔའ་དེ་བཞིན་གཤེགས་པའི་གསུང་གི་གསང་བ་ལ་མངོན་པར་དད་ནི། དེ་འདི་ལྟར་སེམས་སོ། ། གང་འདི་དེ་བཞིན་གཤིགས་པའི་གསུང་གི་གསང་བ་དེ་བཞིན་གཤེགས་པ་ནི། མངོན་སུམ་དུ་ལུང་སྟོན་པ་དང་། གསང་སྟེ་ལུང་སྟོན་པ་དང་། ལྡེམ་པོ་དག་གིས་ཀྱང་སེམས་ཅན་རྣམས་ལ་ལུང་སྟོན་མོད་ཀྱི། དེ་བཞིན་གཤེགས་པ་ལ་འཁྲུལ་པའམ། ཅ་ཅོ་མེད་དེ། དེའི་ཕྱིར་དེ་ལ་བརྫུན་དུ་སྨྲ་བའི་ཉེས་པ་མི་འབྱུང་ངོ་། ། དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི། སྐྱོན་ཐམས་ཅད་སྤངས་པ། དྲི་མ་ཐམས་ཅད་སྤངས་པ། རྡུལ་ཐམས་ཅད་སྤངས་པ། ཡོངས་སུ་གདུང་བ་ཐམས་ཅད་དང་བྲལ་བ། ཉོན་མོངས་པ་མེད་པ། དབང་དུ་གྱུར་བ། ཞི་བ། དང་བ། ཡོངས་སུ་དག་པ། རྙོག་པ་མེད་པ། རྣམ་པར་གསལ་བ་སྟེ། གང་དེ་བཞིན་གཤེགས་པ་རྣམས་ལ་འཁྲུལ་པའམ། ཅ་ཅོ་འབྱུང་བ་དེ་ནི། གནས་མ་ཡིན་ཞིང་སྐབས་མེད་དོ། ། ཞེས་ཐོས་པ་འདི་ནི། ཡང་དག་པའོ། ། འདི་ནི། དེ་ཁོ་ནའོ། ། འདི་ནི། མི་སླུ་བའོ་སྙམ་སྟེ། གནས་འདི་ལ་ནེམ་ནུར་མེད། ཐེ་ཚོམ་མེད་དེ། དེ་ལྟར་ན། དེ་བཞིན་གཤེགས་པའི་གསུང་གི་གསང་བ་ལ་མངོན་པར་དད་དོ། ། 3. བྱང་ཆུབ་སེམས་དཔའ་དེ་བཞིན་གཤེགས་པའི་ཡིད་ཀྱི་གསང་བ་ལ་མངོན་པར་དད་ནི། དེ་འདི་ལྟར་སེམས་སོ། ། གང་འདི་དེ་བཞིན་གཤེགས་པའི་ཡིད་ཀྱི་གསང་བ་དེ་བཞིན་གཤེགས་པས་ཅི་དགོངས་པའི་དོན་གང་སེམས་དང་འགྲོགས་པ། སེམས་ལ་གནས་པ་དེ་ནི། དེ་བཞིན་གཤེགས་པའི་བྱིན་གྱི་རླབས་ཀྱིས་གྱུར་པ་མ་གཏོགས་པར་ཉན་ཐོས་དང་། རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། སེམས་ཅན་ཐམས་ཅད་ཀྱིས་ཤེས་པར་མི་ནུས་སོ། ། དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི། ཟབ་ཅིང་གཏིང་དཔག་དཀའ་བ། བརྟག་པར་བྱ་བ་མ་ཡིན་པ། རྟོག་གེའི་སྤྱོད་ཡུལ་ལས་ཤིན་ཏུ་འདས་པ། དཔག་ཏུ་མེད་པ། རྒྱ་ཆེ་བ། ཡངས་པ། ནམ་མཁའི་དབྱིངས་དང་མཚུངས་པ། རྟོག་གེ་ཐམས་ཅད་ཀྱི་ཡུལ་ལས་འདས་པར་ཐོས་པ་འདི་ནི། ཡད་དག་པའོ། ། འདི་ནི། དེ་ཁོ་ནའོ། ། འདི་ནི། མི་སླུ་བའོ་སྙམ་སྟེ། གནས་འདི་ལ་ནེམ་ནུར་མེད། ཐེ་ཚོམ་མེད་པ་ཡིན་ཏེ། དེ་ལྟར་ན། དེ་བཞིན་གཤེགས་པའི་ཡིད་ཀྱི་གསང་བ་ལ་མངོན་པར་དད་དོ། ། 4. བྱང་ཆུབ་སེམས་དཔའ་བྱང་ཆུབ་སེམས་དཔའ་བྱང་ཆུབ་སེམས་དཔའི་ཡང་དག་པར་སྒྲུབ་པ་ལ་མངོན་པར་དད་ནི། དེ་འདི་ལྟར་སེམས་སོ། ། གང་འདི་ལྟར་སྟེ། བྱང་ཆུབ་ཀྱི་རྒྱུ། བྱང་ཆུབ་ཀྱི་གཞི། བྱང་ཆུབ་ཀྱི་ཕྱིར་བྱང་ཆུབ་སེམས་དཔའ་དེ་དག་སེམས་ཅན་གྱི་དོན་ལ་མངོན་དུ་ཕྱོགས་པ་དང་། སེམས་ཅན་གྱི་བྱ་བ་དང་། སེམས་ཅན་གྱི་བྱེད་པ་དང་། ཡོངས་སུ་མི་སྐྱོ་བ་དང་། མི་སྐྲག་པ་དང་། ཁུར་ཆེན་པོ་ཁྱེར་བ་དང་། མཐུ་བརྟན་པ་དང་། རྟུལ་བ་བརྟན་པ་དང་། ཕ་རོལ་ཏུ་ཕྱིན་པ་ཡང་དག་པར་སྒྲུབ་པ་དང་། སངས་རྒྱས་ཀྱི་ཆོས་རྣམས་མཐར་གྱིས་ཡང་དག་པར་སྒྲུབ་པ་དང་། ཐོགས་པ་མེད་པའི་བློ་དང་། མཐའ་ཡས་པའི་བློ་དང་། མི་མཉམ་པ་དང་མཉམ་པའི་བློ་དང་། ཕལ་ལ་མེད་པའི་བློ་དང་། བརྩོན་འགྲུས་བརྟན་པ་དང་། གོ་ཆ་བརྟན་པ་དང་། དམ་བཅས་པ་ལ་བརྟན་པ་དང་། དམ་བཅས་པ་ལས་མི་གཡོ་བ་དང་། དམ་བཅས་པ་ཕལ་ལ་མེད་པ་དེ་དག་ཐམས་ཅད་རིམ་གྱིས་འཕེལ་ཞིང་རྒྱས་པ་དང་། ཡངས་པར་ཡོངས་སུ་རྫོགས་པར་འགྱུར་རོ། ། ཞེས་ཐོས་པ་འདི་ནི། ཡང་དག་པའོ། ། འདི་ནི། དེ་ཁོ་ནའོ། ། འདི་ནི། མི་བསླུ་བའོ་སྙམ་སྟེ། གནས་འདི་ལ་དེ་ནེམ་ནུར་མེད། ཐེ་ཚོམ་མེད་དེ། དེ་ལྟར་ན། བྱང་ཆུབ་སེམས་དཔའ་ཡང་དག་པར་སྒྲུབ་པ་ལ་མངོན་པར་དད་དོ། ། 5. – 6.བྱང་ཆུབ་སེམས་དཔའ་བྱང་ཆུབ་དང་། དེ་བཞིན་གཤེགས་པ་འབྱུང་བ་ལ་མངོན་པར་དད་ནི། དེ་འདི་ལྟར་སེམས་སོ། ། གང་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོར་འདུག་ནས་ལྷའི་མིག་ཆགས་པ་མེད་ཅིང་ཐོགས་པ་མེད་པ་སྒྲིབ་པ་མེད་པ་འཐོབ་བོ། ། ལྷའི་རྣ་བ་དང་། གཞན་གྱི་སེམས་ཤེས་པ་དང་། སྡོན་གྱི་གནས་རྗེས་སུ་དྲན་པའི་ཤེས་པ་དང་། རྫུ་འཕྲུལ་གྱི་རྣམ་པ་ཤེས་པ་དང་། ཟག་པ་ཟད་པ་ཤེས་པ་དང་། དུས་གསུམ་པོ་སྐད་ཅིག་གཅིག་དང་ལྡན་པས་ཤེས་པ་ཆགས་པ་མེད་པ། ཐོགས་པ་མེད་པ། སྒྲིབ་མེད་པ་འཐོབ་བོ། ། དེའི་ཕྱིར་སེམས་ཅན་གྱི་ཁམས་ལ་ཡང་དག་པ་ཇི་ལྟ་བ་བཞིན་དུ་ལྟ་སྟེ། སེམས་ཅན་འདི་རྣམས་ནི། ལུས་ཀྱི་ངན་དུ་སྤྱོད་པ་དང་ལྡན་པ། ངག་གི་ངན་དུ་སྤྱོད་པ་དང་ལྡན་པ། ངག་གི་ངན་དུ་སྤྱོད་པ་དང་ལྡན་པ། ཡིད་ཀྱི་ངན་དུ་སྤྱོད་པ་དང་ལྡན་པ། འཕགས་པ་ལ་སྐུར་པ་འདེབས་པ། ལོག་པར་ལྟ་བ་རྣམས་ཏེ། ལོག་པར་ལྟ་བའི་ལས་དང་། ཆོས་ཡང་དག་པར་བླངས་པའི་ཕྱིར་དེའི་རྒྱུ། དེའི་རྐྱེན། དེའི་གཞིས་ལུས་ཞིག་ནས་ཤི་བའི་འོག་ཏུ་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེའོ། ། སེམས་ཅན་འདི་རྣམས་ནི། ལུས་ཀྱི་ལེགས་པར་སྤྱོད་པ་དང་ལྡན་པ། ངག་གི་ལེགས་པར་སྤྱོད་པ་དང་ལྡན་པ། ཡིད་ཀྱི་ལེགས་པར་སྤྱོད་པ་དང་ལྡན་པ། འཕགས་པ་ལ་སྐུར་པ་མི་འདེབས་པ། ཡང་དག་པར་ལྟ་བ་རྣམས་ཏེ། ཡང་དག་པར་ལྟ་བའི་ལས་དང་། ཆོས་ཡང་དག་པར་བླངས་པའི་ཕྱིར་དེའི་རྒྱུ། དེའི་རྐྱེན། དེའི་གཞིས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེའོ་སྙམ་ནས་དེ་ལྟར་ཡང་དག་པ་ཇི་ལྟ་བ་བཞིན་དུ་སེམས་ཅད་གྱི་ཁམས་ལ་ལྟ་སྟེ། སེམས་ཅད་གྱི་ཁམས་དེ་ཉིད་ཀྱང་དགེ་བ་དང་། མི་དགེ་བའི་ལས་རྣམས་ལ་རྣམ་པར་ལྟའོ། ། དེའང་འདི་སྙམ་དུ་སེམས་ཏེ། སྔོན་བདག་བྱང་ཆུབ་སེམས་དཔའི་སྤྱད་པ་སྤྱོད་པས་གང་འདི་ལྟར་བདག་ཉིད་རྣམ་པར་སངས་རྒྱས་ནས་གཞན་ཡང་རྣམ་པར་སངས་རྒྱས་པར་བྱའོ། ། ཞེས་དམ་བཅས་པའི་བདག་གི་སྨོན་ལམ་དེ་ཡོངས་སུ་རྫོགས་སོ། ། བདག་གི་བརྣག་པ་དེ་ཡོངས་སུ་རྫོགས་སོ་སྙམ་མོ། ། ཞེས་ཐོས་པ་འདི་ནི། ཡང་དག་པའོ། ། འདི་ནི། དེ་ཁོ་ནའོ། ། འདི་ནི། མི་སླུ་བའོ་སྙམ་སྟེ། གནས་འདི་ལ་ནེམ་ནུར་མེད། ཐེ་ཚོམ་མེད་དོ། ། གང་ལ་བྱང་ཆུབ་སེམས་དཔའ་དེ་རྣམ་པར་སངས་རྒྱས་པ་དེ་ནི། བྱང་ཆུབ་ཅེས་བྱའོ། ། བདག་ཉིད་རྣམ་པར་སངས་རྒྱས་པས་དེས་ན། རྫོགས་པར་སངས་རྒྱས་ཞེས་བྱའོ། ། དེ་ལྟར་ན། བྱང་ཆུབ་སེམས་དཔའ་བྱང་ཆུབ་དང་། དེ་བཞིན་གཤེགས་པ་འབྱུང་བ་ལ་མངོན་པར་དད་དོ། ། 7. བྱང་ཆུབ་སེམས་དཔའ་ཐེག་པ་གཅིག་གི་ཚུལ་བསྟན་པ་ལ་མངོན་པར་དད་ནི། དེ་འདི་ལྟར་སེམས་སོ། ། གང་འདི་ཐེག་པ་ནི། གཅིག་ཁོ་ན་སྟེ། འདི་ལྟ་སྟེ། དེ་བཞིན་གཤེགས་པའི་ཐེག་པའོ། ། ཞེས་ཐོས་པ་འདི་ནི། ཡང་དག་པའོ། ། འདི་ནི། དེ་ཁོ་ནའོ། ། འདི་ནི། མི་སླུ་བའོ། ། འདི་ནི། དེ་བཞིན་པའོ། ། མ་ནོར་པའོ། ། གཞན་མ་ཡིན་པའོ། ། དེ་ཅིའི་ཕྱིར་ཞེ་ན། ཐེག་པ་གཞན་རྣམས་ཀྱང་འདི་ལས་བྱུང་ངོ་། ། དཔེར་ན། ཛམྦུ་གླིང་ན་གང་གླིང་ཡོད་པ་རྣམས་མིང་གིས་ཐ་དད་པར་ཤེས་མོད་ཀྱི། འོན་ཀྱང་དེ་དག་ནི། ཛམྦུའི་གླིང་དུ་འདུའོ། ། ཛམྦུའི་གླིང་ལ་བརྟེན་ཏོ། ཛམྦུའི་གླིང་གི་གྲངས་སུ་འགྲོའོ། ། དེའི་ཕྱིར་གླིང་གཅིག་ཁོ་ན་སྟེ། དེ་ནི། ཛམྦུའི་གླིང་ངོ་། ། དེ་བཞིན་དུ་ཐེག་པ་ཐམས་ཅད་ནི། དེ་ཞིན་གཤེགས་པའི་ཐེག་པར་འདུའོ། ། དེ་བཞིན་གཤེགས་པའི་ཐེག་པ་ལ་གནས་སོ། ། དེ་བཞིན་གཤེགས་པའི་ཐེག་པ་ལས་བྱུང་ངོ་། ། དེའི་ཕྱིར་ཐེག་པ་གཅིག་ཁོ་ན་སྟེ། འདི་ལྟར་དེ་བཞིན་གཤེགས་པའི་ཐེག་པའོ་སྙམ་སྟེ། གནས་འདི་ལ་དེ་ནེམ་ནུར་མེད། ཐེ་ཚོམ་མེད་དེ། བྱང་ཆུབ་སེམས་དཔའ་ཐེག་པ་གཅིག་གི་ཚུལ་བསྟན་པ་ལ་མངོན་པར་དད་དོ། ། 8. ཚུལ་སྣ་ཚོགས་བསྟན་པ་ལ་མངོན་པར་དད་ནི། དེ་འདི་ལྟར་སེམས་སོ། ། གང་འདི་མདོ་སྡེ་དེ་དང་དེ་དག་ལས་དེ་བཞིན་གཤེགས་པའི་ཚུལ་སྣ་ཚོགས་བཤད་པ་ཐོས་པ་འདི་ནི། ཡང་དག་པའོ། ། འདི་ནི། དེ་ཁོ་ནའོ། ། འདི་ནི། མི་སླུ་བའོ། ། དེ་ཅིའི་ཕྱིར་ཞེ་ན། འདུལ་བའི་དབང་གི་ཕྱིར་དེ་བཞིན་གཤེགས་པ་དད་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཆོས་སྟོན་ཏོ་སྙམ་སྟེ། གནས་འདི་ལ་ནེམ་ནུར་མེད། ཐེ་ཚོམ་མེད་དོ། བྱང་ཆུབ་སེམས་དཔའ་ཚུལ་སྣ་ཚོགས་བསྟན་པ་ལ་མངོན་པར་དད་དོ། ། 9. བྱང་ཆུབ་སེམས་དཔའ་དེ་བཞིན་གཤེགས་པའི་གསུང་སྒྲའི་དབྱངས་ཟབ་མོ་ལ་མངོན་པར་དད་ནི། དེ་འདི་ལྟར་སེམས་སོ། ། གང་དེ་དེ་བཞིན་གཤེགས་པའི་གསུང་སྒྲའི་དབྱངས་ཟབ་མོ་ཐོས་པ་འདི་ནི། ཡང་དག་པའོ། ། འདི་ནི། དེ་ཁོ་ནའོ། ། འདི་ནི། མི་སླུ་བའོ། ། དེ་ཅིའི་ཕྱིར་ཞི་ན། དགེ་བའི་རྩ་བ་ཆུང་ངུའི་ལྷའི་བུ་རྣམས་ཀྱི་དབྱངས་ཀྱང་ཟབ་ཅིང་སྙན་པ་ཡིན་ན། བསྐལ་པ་བརྒྱ་སྟོང་དུ་མར་དགེ་བའི་རྩ་བ་བསྒྲུབས་པའི་དེ་བཞིན་གཤེགས་པ་རྣམས་ཀྱི་ལྟ་ཅི་སྨོས་སྙམ་སྟེ། གནས་འདི་ལ་ནེམ་ནུར་མེད། ཐེ་ཚོམ་མེད་དེ། བྱང་ཆུབ་སེམས་དཔའ་དེ་བཞིན་གཤེགས་པའི་གསུང་སྒྲའི་དབྱངས་ཟབ་མོ་ལ་མངོན་པར་དད་དོ། ། 10 .བྱང་ཆུབ་སེམས་དཔའ་སེམས་ཅན་གྱི་བསམ་པ་ཇི་ལྟ་བ་བཞིན་དུ་འདུལ་བ་ལ་མངོན་པར་དད་ནི། དེ་འདི་ལྟར་སེམས་སོ། ། གང་འདི་དེ་བཞིན་གཤེགས་པས་བསམ་པ་དང་། བག་ལ་ཉལ་མཁྱེན་ཏེ། སེམས་ཅན་མོས་པ་ཐ་དད་པ་དང་། འདུལ་བ་ཐ་དད་པ་རྣམས་ལ་གསུང་སྒྲའི་དབྱངས་གཅིག་བརྗོད་པས་ཐེ་ཚོམ་གཅོད་ཅིང་ཡོངས་སུ་སྨིན་པ་ཇི་ལྟ་བ་བཞིན་དུ་སེམས་ཅན་རྣམས་འདུལ་ལོ། ། སེམས་ཅན་རྣམས་ཀྱང་སོ་སོ་ནས་དེ་བཞིན་གཤེགས་པ་བདག་ལ་ཆོས་སྟོན་ཏོ། ། དེ་བཞིན་གཤེགས་པ་བདག་ལ་ཆོས་སྟོན་ཏོ་སྙམ་བྱེད་ཀྱང་དེ་བཞིན་གཤེགས་པ་ནི། མི་རྟོག ། རྣམ་པར་མི་རྟོག་གོ ། ཞེས་ཐོས་པ་འདི་ནི། ཡང་དག་པའོ། ། འདི་ནི། དེ་ཁོ་ནའོ། ། འདི་ནི། མི་སླུ་བའོ་སྙམ་སྟེ། གནས་འདི་ལ་དེ་ནེམ་ནུར་མེད། ཐེ་ཚོམ་མེད་དེ། བྱང་ཆུབ་སེམས་དཔའ་སེམས་ཅན་གྱི་བསམ་པ་ཇི་ལྟ་བ་བཞིན་དུ་འདུལ་བ་ལ་མངོན་པར་དད་དོ། །
Tibetan Source	《མདོ་ཚ་པ་》ཤ་95ན་6ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number