9342

Tibetan	བྱང་ཆུབ་སེམས་དཔའི་ཆོས་མ་འདྲེས་པ་བཅུ།དེ་ཡང་།
Tibetan Alternate
Tibetan Definition	ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་སྟེ། 1. འདི་ལ་བྱང་ཆུབ་སེམས་དཔའ་རྣམས་མ་བསྟན་པར་ཕ་རོལ་ཏུ་ཕྱིན་པ་རྣམས་ལ་བརྩོན་ཞིང་གཏོང་བ་ཡོངས་སུ་གཏོང་བ་ལ་འཇུངས་པ་དང་བྲལ་བ་ཡིན། ཚུལ་ཁྲིམས་ཡོངས་སུ་དག་ལ་ཚུལ་ཁྲིམས་ངན་པ་ཐམས་ཅད་རབ་ཏུ་བསལ་བ་ཡིན། བཟོད་པ་ཕུན་སུམ་ཚོགས་ལ་བསམ་པ་མི་སྒུལ་བ་ཡིན། བརྩོན་འགྲུས་ཆེན་པོ་དང་ལྡན་ལ་དུས་ཐམས་ཅད་དུ་ཕྱིར་མི་ལྡོག་པ་ཡིན། ཤིན་ཏུ་མཉམ་པར་གཞག་པའི་ཡེ་ཤེས་དང་ལྡན་ལ། འཁྲུག་པ་ཐམས་ཅད་ཡོངས་སུ་སྤངས་པ་ཡིན། ཤེས་རབ་ཀྱིས་ཤིན་ཏུ་བྱུང་ཞིང་སྡིག་པའི་ལྟ་བ་དང་བྲལ་བ་ཡིན་ཏེ། དེ་ལྟར་མ་བསྟན་པར་ཕ་རོལ་ཏུ་ཕྱིན་པ་ལ་བརྩོན་པ་འདི་ནི་བྱང་ཆུབ་སེམས་དཔའ་རྣམས་ཀྱི་མ་འདྲེས་པའི་ཆོས་ཏེ། དེ་ལྟར་ཕ་རོལ་ཏུ་ཕྱིན་པའི་ལམ་དང་མཐུན་པ་འདི་ནི། བྱང་ཆུབ་སེམས་དཔའི་མ་འདྲེས་པའི་ཆོས་དང་པོའོ། ། 2. བྱང་ཆུབ་སེམས་དཔའ་རྣམས་ནི་སེམས་ཅན་གྱི་ཁམས་ཡོངས་སུ་སྡུད་ཅིང་། འཇིག་རྟེན་གྱི་ཟང་ཟིང་དང་། ཆོས་ཀྱི་སྦྱིན་པ་ཡོངས་སུ་གཏོང་བའི་ངང་ཚུལ་ཅན་བཞིན་འཛུམ་པ། སྙན་པར་སྨྲ་བ། ཚིག་འཇམ་པ། སེམས་ཅན་ཐམས་ཅད་ཀྱི་སེམས་མངོན་པར་དགའ་བ། དོན་ཡང་དག་པ་ཇི་ལྟ་བ་བཞིན་ལ་རབ་ཏུ་སྦྱོར་བ། སངས་རྒྱས་ཀྱི་བྱང་ཆུབ་ཀྱི་དོན་ཁོང་དུ་ཆུད་པར་བྱེད་པ། མི་མཉམ་པའི་སེམས་མེད་པ། སེམས་ཅན་ཐམས་ཅད་ལ་སྙོམས་པར་དོན་དུ་སེམས་པ་དག་སྟེ། དེ་ལྟར་མ་བསྟན་པར་སེམས་ཅན་གྱི་ཁམས་ཡོངས་སུ་བསྡུ་བའི་ཕྱིར་ནན་ཏན་དུ་བྱེད་པ་དེ་ནི། བྱང་ཆུབ་སེམས་དཔའ་རྣམས་ཀྱི་མ་འདྲེས་པ་སྟེ། དེ་ལྟར་བསྡུ་བའི་དངོས་པོའི་ལམ་དང་མཐུན་པ་འདི་ནི། བྱང་ཆུབ་སེམས་དཔའ་རྣམས་ཀྱི་མ་འདྲེས་པ་གཉིས་པའོ། ། 3. བྱང་ཆུབ་སེམས་དཔའ་རྣམས་ནི་ཡོངས་སུ་བསྔོ་བའི་ཚུལ་ལ་མཁས་ཤིང་། རྣམ་པར་སྨིན་པ་ལ་རེ་བ་མེད་པར་སངས་རྒྱས་ཀྱི་བྱང་ཆུབ་ཀྱི་རྗེས་སུ་སོང་བར་ཡོངས་སུ་བསྔོ་ཞིང་། འཇིག་རྟེན་གྱི་སྙོམས་པར་འཇུག་པ་ཐམས་ཅད་ལ་ཡེ་བརྔམ་པ་མེད་པས། དེ་བཞིན་གཤེགས་པའི་ཡེ་ཤེས་ལ་རབ་ཏུ་གནས་ཤིང་སེམས་ཅན་གྱི་དོན་དུ་ཡོངས་སུ་བསྔོ་སྟེ། དེ་ལྟར་མ་བསྟན་པར་དགེ་བའི་རྩ་བ་ཐམས་ཅད་བརྩམ་པ། སངས་རྒྱས་ཀྱི་ཡེ་ཤེས་དེ་ལྟར་ཚོལ་ཞིང་སེམས་ཅན་གྱི་དོན་ཡོངས་སུ་ཚོལ་བ་འདི་ནི། བྱང་ཆུབ་སེམས་དཔའ་རྣམས་ཀྱི་མ་འདྲེས་པ་སྟེ། འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་གསུམ་པའོ། ། 4. བྱང་ཆུབ་སེམས་དཔའ་རྣམས་ནི་ཐབས་མཁས་པའི་ཕ་རོལ་ཏུ་ཕྱིན་པའི་དམ་པ་ཐོབ་པས། སེམས་ཅན་ཐམས་ཅད་ཀྱི་རྗེས་སུ་འབྲང་ཞིང་འཇིག་རྟེན་པ་ཐམས་ཅད་ཀྱི་ལམ་ལ་ཡོངས་སུ་སྐྱོ་བ་མེད་པའི་ཡིད་དང་ལྡན་ཏེ། འཕགས་པའི་སྤྱོད་ཡུལ་ལ་མངོན་དུ་བལྟས་ལ། ཉན་ཐོས་དང་། རང་སངས་རྒྱས་ཐམས་ཅད་ཀྱི་འབྱུང་བ་ལས་ཕྱིར་ཕྱོགས་ཏེ། སེམས་ཅན་ཐམས་ཅད་ཡོངས་སུ་སྨིན་པ་ལ་མངོན་པར་བརྩོན་ཞིང་། བདག་གི་བདེ་བ་ལ་ཆགས་པ་མེད་དེ། བསམ་གཏན་དང་། རྣམ་པར་ཐར་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་འཇུག་པ་དང་། རྣམ་པར་ལྡང་བ་ལ་མཁས་པས་རང་གི་དབང་དུ་གྱུར་པའི་ཏིང་ངེ་འཛིན་ཐོབ་ཅིང་། འཁོར་བས་ཡོངས་སུ་སྐྱོ་བ་མེད་པའི་སེམས་དང་ལྡན་ཏེ། འཁོར་བ་ལ་བཟའ་ཤིང་གི་ར་བ་ལྟ་བུའི་འདུ་ཤེས་ཆེན་པོ་ཐོབ་པ་དང་། བདུད་ཀྱི་ཁྱིམ་ཐམས་ཅད་ན་གནས་པ་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ཀྱི་དབང་ཆེན་པོ་ཡོངས་སུ་སྟོན་ཅིང་། སྐྱེ་བའི་སྐྱེ་མཆེད་ཐམས་ཅད་དུ་གཟུགས་བརྙན་བྱུང་བར་གྱུར་ལ། ཞགས་པ་ཐུབ་པའི་རབ་ཏུ་བྱུང་བ་ཐམས་ཅད་ཀྱི་ལྟ་བ་དང་བྲལ་ཏེ། འཇིག་རྟེན་པའི་རང་བཟོ་དང་། སྔགས་དང་། གཙུག་ལག་དང། ཡི་གེ་དང་། ཤོད་ཐབས་དང་། གྲངས་དང་། རྩིས་དང་། རང་གི་རྩེད་མོ་དང་། འཇིག་རྟེན་པའི་དགའ་བ་ཐམས་ཅད་ཡོངས་སུ་སྟོན་ཅིང་། བུད་མེད་ཀྱི་ཆོ་ག་དང་། མཚན་མ་དང་། ཆ་ལུགས་དང་། སྒྱུ་རྩལ་ཐམས་ཅད་ཀྱི་ཚུལ་ལ་མཁས་པ། འཇིག་རྟེན་པ་དང་། འཇིག་རྟེན་ལས་འདས་པའི་ཆོས་མཉན་པ་དང་། དཔྱད་པ་དང་། དྲི་བ་དང་། བརྟགས་པ་ཤིན་ཏུ་བསྟེན་པའི་ཕ་རོལ་ཏུ་ཕྱིན་པའི་མཆོག་ཐོབ་པ། འཇིག་རྟེན་པ་དང་། འཇིག་རྟེན་ལས་འདས་པའི་དགོས་པའི་ཕ་རོལ་ཏུ་ཕྱིན་པའི་མཆོག་ཐོབ། སེམས་ཅན་ཐམས་ཅད་ཀྱི་ངོར་བལྟ་བ་དབང་དང་ལྡན་པ། རང་སངས་རྒྱས་ཐམས་ཅད་ཀྱི་ཆོ་ག་དང་། སྤྱོད་ལམ་ཡོངས་སུ་སྟོན་པ། ཐེག་པ་ཆེན་པོ་ལ་ཡང་དག་པར་ཞུགས་པ། དེ་བཞིན་གཤེགས་པའི་རྣམ་པར་འཚང་རྒྱ་བ་སྐད་ཅིག་སྐད་ཅིག་ཏུ་སྟོན་པ་སྤྱོད་པའི་རྒྱུན་ཡོངས་སུ་མི་གཅོད་པ་སྟེ། དེ་ལྟར་ཐབས་མཁས་པའི་ཕ་རོལ་ཏུ་ཕྱིན་པའི་མཆོག་ཐོབ་ཀྱང་། བསྟན་པ་མེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་མ་འདྲེས་པའི་ཆོས་ཏེ། འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་བཞི་པའོ། ། 5. གཞན་ཡང་བྱང་ཆུབ་སེམས་དཔའ་ཟུང་དང་སྣྲེལ་ཞི་ལ་མཁས་ཤིང་ཡེ་ཤེས་ཀྱི་རྣམ་པར་རྩེ་བ། ཡེ་ཤེས་ཀྱི་ཕ་རོལ་ཏུ་ཕྱིན་པའི་མཆོག་ཐོབ་པས། འདི་ལྟར་མྱ་ངན་ལས་འདས་པ་ལ་གནས་ཀྱང་འཁོར་བའི་སྒོ་ཡོངས་སུ་སྟོན་པ། སེམས་ཅན་མེད་པའི་མཐའི་སྤྱོད་ཡུལ་དང་ལྡན་ཡང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་མ་བཏང་བ་ཤིན་ཏུ་དུལ་བ་དང་། ཞི་བའི་ཕ་རོལ་ཏུ་ཕྱིན་པའི་མཆོག་ཐོབ་ཀྱང་། ཉོན་མོངས་པའི་འབར་བ་སེམས་ཅན་ལ་ཡོངས་སུ་སྟོན་པ། ཆོས་ཀྱི་ཡེ་ཤེས་གཅིག་ཏུ་སྟུག་པའི་ལུས་དང་ལྡན་ཡང་། སེམས་ཅན་གྱི་སྒོ་མཐའ་ཡས་པ་ཡོངས་སུ་སྟོན་པ། བསམ་གཏན་ཆེན་པོ་ལ་བསམ་གཏན་འཆའ་ཡང་། འདོད་པའི་དགའ་བ་ཐམས་ཅད་ཀྱིས་རྩེ་ཞིང་ལོངས་སྤྱོད་པར་སེམས་ཅན་ལ་རྣམ་པར་སྟོན་པས་གཅིག་ཏུ་དགའ་བར་དགའ་ཞིང་མོས་པ། ཁམས་གསུམ་པ་ཐམས་ཅད་ལས་ཕྱིར་བལྟས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་བསམ་པ་མ་བཏང་བ། རྟག་ཏུ་ཆོས་ཀྱི་དགའ་བས་དགའ་ཞིང་མོས་ཀྱང་། ལྷའི་བུ་མོ་བརྒྱ་ཕྲག་སྟོང་གི་སྒྲ་རབ་ཏུ་ཕྱུང་བ་དང་རྩེ་བ། མཚན་དང་དཔེ་བྱད་བཟང་པོ་དང་། དགེ་བའི་མཆོག་བརྒྱ་ཕྲག་སྟོང་གིས་བརྒྱན་པའི་ལུས་དང་ལྡན་ཡང་དབུལ་བ་ཐམས་ཅད་ཀྱི་ཚུལ་ཡོངས་སུ་སྟོན་པ། རྟག་ཏུ་ཁ་ན་མ་ཐོ་བ་མེད་པའི་ལས་དགེ་བ་སྤྱད་ཀྱང་། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བ་ཡང་ཡོངས་སུ་སྟོན་པ། སངས་རྒྱས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པའི་མཆོག་ཐོབ་ཀྱང་། བྱང་ཆུབ་སེམས་དཔའི་ཡེ་ཤེས་ཀྱི་ལུས་ལས་གྱེན་དུ་མ་གཡོས་པ་དག་སྟེ། དེ་ལྟར་བྱང་ཆུབ་སེམས་དཔའ་རྣམས་ནི་ཡེ་ཤེས་མུ་མེད་པ་དང་ལྡན་པས། དེའི་ཕྱིར་དེ་དག་ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཀྱང་ཁོང་དུ་ཆུད་པར་དཀའ་ན། སེམས་ཅན་བྱིས་པ་གཞན་གྱིས་ལྟ་སྨོས་ཀྱང་ཅི་དགོས་ཏེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་ལྔ་པའོ། ། 6. བྱང་ཆུབ་སེམས་དཔའ་རྣམས་ནི་། ལུས་དང་། ངག་དང་། ཡིད་ཡེ་ཤེས་སྔོན་དུ་འགྲོ་བ་དང་ལྡན་པ་སྟེ། ལས་ཤིན་ཏུ་དག་པར་སྤྱོད་ཅིང་སྲོག་གཅོད་པ་དང་བྲལ་བ་ནས། སྡིག་པའི་ལྟ་བའི་བར་དང་བྲལ་བས། བྱམས་པ་ཕུན་སུམ་ཚོགས་ཤིང་ཡང་དག་པའི་ལྟ་བ་ལ་ཞུགས་པ་ཡིན་ཏེ། དེ་ལྟར་ལུས་དང་། ངག་དང་། ཡིད་ཀྱི་ལས་ཡེ་ཤེས་སྔོན་དུ་འགྲོ་བ་དང་ལྡན་པ་འདི་ནི། བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་སྟེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་དྲུག་པའོ། ། 7. བྱང་ཆུབ་སེམས་དཔའ་རྣམས་ནི་སྙིང་རྗེ་ཆེན་པོ་དང་ལྡན་པས། སེམས་ཅན་ཐམས་ཅད་ཡོངས་སུ་མི་གཏོང་ཞིང་། སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རང་གི་ལུས་ཀྱིས་ལེན་པར་མཁས་པས་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་གྱི་སེམས་ཅན་གྱི་དོན་དུ་ཡོངས་སུ་སྐྱོ་བ་མེད་པའི་སེམས་དང་ལྡན་ཞིང་། སེམས་ཅན་གྱི་ཁམས་ཐམས་ཅད་དགྲོལ་བ་ལ་ཞུགས་པ། འདོད་པའི་དགའ་བ་ཐམས་ཅད་ཀྱིས་རྩེ་ཞིང་ཡོངས་སུ་ལོངས་སྤྱོད་པ་ལ་ཆགས་པ་མེད་པའི་ཡིད་དང་ལྡན་པས་རྟག་ཏུ་སེམས་ཅན་རྣམས་སྡུག་བསྔལ་གྱི་ཕུང་པོ་ལས་དགྲོལ་བ་ལ་མངོན་པར་བརྩོན་པ་སྟེ། དེ་ལྟར་སྙིང་རྗེ་ཆེན་པོའི་སྟོབས་ཡོངས་སུ་མི་གཏོང་བ་འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་སྟེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་བདུན་པའོ། ། 8. བྱང་ཆུབ་སེམས་དཔའ་རྣམས་ནི། འགྲོ་བ་ཐམས་ཅད་ཀྱི་ཡིད་དུ་འོང་ཞིང་མཐོང་ན་དགའ་བ་སྟེ། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ཀྱིས་ཕྱག་བྱ་བ། འགྲོ་བ་ཐམས་ཅད་མཐོང་བར་སྨོན་པ། སེམས་ཅན་ཐམས་ཅད་མངོན་པར་དགའ་བའི་སེམས་དང་ལྡན་པ་དག་སྟེ། དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའ་རྣམས་སྔོན་ནས་ལས་ཀྱི་མཐའ་ཁ་ན་མ་ཐོ་བ་མེད་པ་དང་ལྡན་ཞིང་། ཡོངས་སུ་དག་པའི་ལས་ཀྱི་ཚུལ་གྱིས་སྤྱོད་པས། དེའི་ཕྱིར་དེ་དག་མཐོང་བས་འགྲོ་བ་ཐམས་ཅད་མི་ངོམས་པ་ཡིན། དེ་ལྟར་འགྲོ་བ་ཐམས་ཅད་མཐོང་བར་མངོན་པར་དགའ་བ་དེ་ནི། བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་སྟེ། ། འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་བརྒྱད་པའོ། ། 9. བྱང་ཆུབ་སེམས་དཔའ་རྣམས་ནི་ཐམས་ཅད་མཁྱེན་པ་ཉིད་ཀྱི་སེམས་བརྟན་པ་དང་ལྡན་པའི་ལྷག་པའི་བསམ་པའི་གོ་ཆ་ཤིན་ཏུ་བགོས་པས་དེ་དག་ཇི་ལྟར་ཉོན་མོངས་ཤིང་། བྱིས་པའི་སྐྱེ་བོའི་འདུ་འཛི་དང་ཇི་ལྟར་བརྟེན་ཏམ། ཉན་ཐོས་དང་། རང་སངས་རྒྱས་ཀྱི་ཚོགས་ཀྱི་ནང་དུ་ཇི་ལྟར་ཕྱིན་ཀྱང་རུང་སྟེ། ཐམས་ཅད་མཁྱེན་པའི་སེམས་རིན་པོ་ཆེ་བཟང་པོ་འོད་དང་ལྡན་པ་དེ་འཇིག་བར་མི་བྱེད་དོ། ། དེ་ནི་འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆེན་པོ་རྒྱན་བཟང་པོ་ཞེས་བྱ་བ་དེ་ཆུ་དང་བར་བྱེད་པ་ནི། པདྨའི་རྫིང་བུ་ཇི་ལྟར་རྙོགས་ཀྱང་རུང་སྟེ། ནང་དུ་བཙུག་ན་ནོར་བུ་རིན་པོ་ཆེའི་འོད་གསལ་ཞིང་བཟང་བ་དེ་ཉིད་རྣམ་པར་མི་སྤོང་སྟེ། ཆུ་དེ་ཐམས་ཅད་ཀྱང་རྙོག་པ་མེད་པར་རབ་ཏུ་དང་བར་བྱེད་དོ། ། དེ་བཞིན་དུ་བྱང་ཆུབ་སེམས་དཔའ་ཡང་། བྱིས་པའི་སྐྱེ་བོའི་འདུ་འཛི་ཇི་ལྟར་བརྟེན་ཀྱང་། ཐམས་ཅད་མཁྱེན་པའི་སེམས་རིན་པོ་ཆེ་འོད་གསལ་ཞིང་། སྣང་བ་བཟང་པོ་དེ་ཆུད་ཟོས་པར་མི་བྱེད་དེ། སེམས་ཅན་དེ་དག་ཀྱང་ཉོན་མོངས་པའི་རྙོག་པ་དེ་ལས་ཟློག་ཅིང་། ཐམས་ཅད་མཁྱེན་པའི་སེམས་རིན་པོ་ཆེ་འོད་གསལ་ཞིང་། སྣང་བ་དེ་ཉིད་ལ་རབ་ཏུ་འགོད་དོ། ། དེ་ལྟར་ཇི་ལྟར་ཉོན་མོངས་པར་གྱུར་ཀྱང་རུང་། བྱིས་པའི་སྐྱེ་བོའི་འདུ་འཛི་དང་ཇི་ལྟར་བརྟེན་ཏམ། ཉན་ཐོས་དང་། རང་སངས་རྒྱས་ཀྱི་ཚོགས་ཀྱི་ནང་དུ་ཇི་ལྟར་ཕྱིན་ཀྱང་རུང་སྟེ། ཐམས་ཅད་མཁྱེན་པའི་སེམས་རིན་པོ་ཆེ་དེ་ཉིད་འཇིག་པར་མི་བྱེད་པ་དེ་ནི། བྱང་ཆུབ་སེམས་དཔའི་ཆོས་མ་འདྲེས་པ་སྟེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་དགུ་པའོ། ། 10 .བྱང་ཆུབ་སེམས་དཔའ་རྣམས་ནི་རང་གི་ཡུལ་གྱི་ཡེ་ཤེས་ཀྱི་ཆོས་ལ་དབང་བསྒྱུར་བའི་ཕ་རོལ་ཏུ་ཕྱིན་པ་དམ་པ་ཐོབ་པ་སྟེ། རང་བྱུང་གི་ཡེ་ཤེས་ཀྱི་དབང་བསྐུར་བས་དབང་བསྐུར་ཞིང་། གོ་འཕང་སྐྱོན་མེད་པ་ལ་གནས་ཀྱང་དགེ་བའི་བཤེས་གཉེན་ལ་གནས་པ་རིང་དུ་མི་སྤོང་ཞིང་། དེ་བཞིན་གཤེགས་པ་ལ་རིམ་གྲོར་བྱ་བའི་རྒྱུན་མི་གཅོད་དེ། དེ་ལྟར་ཚུལ་ཕུན་སུམ་ཚོགས་པ་དང་། འགྲོ་བ་ཐམས་ཅད་དུ་དགེ་བའི་བཤེས་གཉེན་བསྟེན་པ་ལས་ཕྱིར་མི་ལྡོག་ཅིང་། དེ་བཞིན་གཤེགས་པ་ལ་རིམ་གྲོར་བྱ་བ་རྒྱུན་མི་གཅོད་པ་དེ་ནི་བྱང་ཆུབ་སེམས་དཔའི་ཆོས་མ་འདྲེས་པ་སྟེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་བཅུ་པའོ། །
Tibetan Source	《ཕལ་ཆེན་ང་པ་》ཤ་288བ་3ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number