9538

Tibetan	བཟོད་པ་ཕུན་སུམ་ཚོགས་པ་བཅུ།
Tibetan Alternate
Tibetan Definition	དེ་ཡང་། འཕགས་པ་དཀོན་མཆོག་སྤྲིན་ཞེས་བྱ་བའི་མདོ་ལས་བྱུང་བ་བྱང་ཆུབ་སེམས་དཔའ་རྣམས་ཀྱི་བཟོད་པ་ཕུན་སུམ་ཚོགས་པ་བཅུ་སྟེ། 1. ནང་གི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་གང་འདི་དག་ནང་གི་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དེ་དག་བཟོད་ཅིང་དང་དུ་ལེན་ལ་ཡོངས་སུ་ཡི་མི་ཆད་དེ། བྱང་ཆུབ་སེམས་དཔའ་ནང་གི་བཟོད་པ་ཕུན་སུམ་ཚོགས་པ་ཡིན་ནོ། ། 2. ཕྱིའི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་མ་ལས་སྨོས་པའམ། ཕ་ལས་སྨོས་པའམ། ཉེ་དུ་ལས་སྨོས་པའམ། མཁན་པོ་ལས་སྨོས་པའམ། སློབ་དཔོན་ལས་སྨོས་པའི་ཚིག་གི་ལན་ངན་དུ་བརྗོད་པ་དང་། ངན་དུ་སྨོས་པ་ཕ་རོལ་ལས་ཐོས་སམ། སངས་རྒྱས་སམ། ཆོས་སམ། དགེ་འདུན་ལ་མི་སྙན་པར་བརྗོད་པ་ཐོས་ན། མི་ཁྲོ་ཞིང་གནོད་པར་མི་སེམས་ལ་འཁོན་དུ་མི་འཛིན་ཏེ། དེ་བཟོད་ཅིང་དང་དུ་ལེན་ལ་གནོད་སེམས་མི་མང་བ་ཡིན་ཏེ། བྱང་ཆུབ་སེམས་དཔའ་ཕྱིའི་བཟོད་པ་ཕུན་སུམ་ཚོགས་པ་ཡིན་ནོ། 3. ཆོས་ཀྱི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་གང་འདི་དག་མདོ་སྡེ་ཟབ་མོ་ཟབ་མོ་དག་ལས་དེ་བཞིན་གཤེགས་པས་ཆོས་བསྟན་པ་རྒྱུད་ཆད་པ། མཚམས་སྦྱོར་བ་ལས་རྣམ་པར་གྲོལ་བ་བསྡུར་མེད་པ་འདི་ལྟ་སྟེ། ཆོས་ཐམས་ཅད་ཐོག་མ་ནས་ཞི་བའོ། ། ཆོས་ཐམས་ཅད་རང་བཞིན་གྱི་མྱ་ངན་ལས་འདས་པའོ། ། ཞེས་བསྟན་པ་དེ་དག་ཐོས་ཀྱང་མི་འཇིགས། མི་དངང་། སྐྲག་པར་མི་འགྱུར་ཏེ། ཆོས་འདི་དག་མ་ཤེས་མ་ཐོས་པར་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་མི་ནུས་སོ། ། སྙམ་དུ་སེམས་ཏེ། དེའི་ཕྱིར་གང་ཆོས་འདི་དག་འཛིན་པ་དང་། སེམས་པ་དང་། སྒོམ་པ་དང་། ཡོངས་སུ་ཀློག་པ་དང་། མོས་པ་འདི་ནི། ཆོས་ཀྱི་བཟོད་པ་ཞེས་བྱ་སྟེ། བྱང་ཆུབ་སེམས་དཔའ་ཆོས་ཀྱི་བཟོད་པ་ཕུན་སུམ་ཚོགས་པ་ཡིན་ནོ། ། 4. སངས་རྒྱས་ཀྱིས་གནང་བའི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་ཁྲོ་བའི་བསམ་པ་སྐྱེས་སམ། གནོད་སེམས་ཀྱི་བསམ་པ་སྐྱེས་ན། འདི་ལྟར་ཁྲོ་བ་འདི་གང་ནས་བྱུང་། གང་དུ་འགག གང་ལས་འབྱུང་། ཇི་ལྟར་འབྱུང་། ཅིའི་དོན་དུ་འབྱུང་ཞེས་ཡོངས་སུ་རྟོག་སྟེ། དེས་དེ་ལྟར་ཡོངས་སུ་བརྟགས་ན། ཁྲོ་བའི་སྐྱེ་བའང་ཡང་དག་པར་རྗེས་སུ་མི་མཐོང་། འགག་པའང་ཡང་དག་པར་རྗེས་སུ་མི་མཐོང་། གང་ལ་སྐྱེ་བ་དེ་ཡང་དག་པར་རྗེས་སུ་མི་མཐོང་། ཇི་ལྟར་སྐྱེ་བ་དེའང་ཡང་དག་པར་རྗེས་སུ་མི་མཐོང་། རྐྱེན་གང་གིས་སྐྱེ་བ་དེའང་ཡང་དག་པར་རྗེས་སུ་མི་མཐོང་སྟེ། དེ་དེའི་ཕྱིར་བཟོད་ཅིང་དང་དུ་ལེན་ལ་ཀུན་ནས་ལྡང་བ་མི་མངའ་བ་ཡིན་ཏེ། བྱང་ཆུབ་སེམས་དཔའ་སངས་རྒྱས་ཀྱིས་གནང་བའི་བཟོད་པ་ཕུན་སུམ་ཚོགས་པ་ཡིན་ནོ། ། 5. ཉི་ཚེ་བ་མ་ཡིན་པའི་བཟོད་པ་ཕུན་སུམ་ཚོགས་པ་ནི། བྱང་ཆུབ་སེམས་དཔའ་ནི། ཉིན་པར་བཟོད་ལ་མཚན་མོ་མི་བཟོད་པའམ། མཚན་མོ་བཟོད་ལ་ཉིན་པར་མི་བཟོད་པའམ། བདག་གི་ཡུལ་ན་བཟོད་ལ་གཞན་གྱི་ཡུལ་ན་མི་བཟོད་པའམ། གཞན་གྱི་ཡུལ་ན་བཟོད་ལ་བདག་གི་ཡུལ་ན་མི་བཟོད་པའམ། བཤེས་པ་ལ་བཟོད་ལ་མི་བཤེས་པ་ལ་མི་བཟོད་པའམ། མི་བཤེས་པ་ལ་བཟོད་ལ་བཤེས་པ་ལ་མི་བཟོད་པ་མ་ཡིན་གྱི། བྱང་ཆུབ་སེམས་དཔའ་ནི། དུས་ཐམས་ཅད་དུའང་བཟོད། ཡུལ་ཐམས་ཅད་དུའང་བཟོད། ཐམས་ཅད་ལའང་བཟོད་པ་ཡིན་ཏེ། འདི་ནི། བྱང་ཆུབ་སེམས་དཔའི་ཉི་ཚེ་བ་མ་ཡིན་པའི་བཟོད་པ་ཕུན་སུམ་ཚོགས་པ་ཡིན་ནོ། ། 6. ཐ་དད་མེད་པའི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་ཕ་དང་། མ་དང་། བླ་མ་དང་། བུ་དང་། བུ་མོ་དང་། ཆུང་མ་དང་། ཉེ་དུ་དང་། སྣག་གི་གཉེན་མཚམས་ལ་བཟོད་ལ། གཞན་ལ་མི་བཟོད་པ་མ་ཡིན་གྱི། བྱང་ཆུབ་སེམས་དཔའ་ནི། ཐ་ན་གདོལ་པ་གཞོན་ནུ་ཡན་ཆད་ལའང་བཟོད་དེ། བྱང་ཆུབ་སེམས་དཔའ་ཐ་དད་པ་མེད་པའི་བཟོད་པ་ཕུན་སུམ་ཚོགས་པ་ཡིན་ནོ། ། 7. དགོས་པ་མི་ལྟ་བའི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་དོན་གྱི་ཕྱིར་བཟོད་པ་མ་ཡིན། འཇིགས་པའི་ཕྱིར་མ་ཡིན། ཕན་ཐོགས་སུ་རེ་བའི་ཕྱིར་མ་ཡིན། འཇིག་རྟེན་གྱི་ཚུལ་ གྱིས་མ་ཡིན་ནོ། ། ངོ་ཚ་བས་བཟོད་པ་མ་ཡིན་གྱི། བྱང་ཆུབ་སེམས་དཔའ་ནི། རྟག་པར་ཡང་བཟོད་པ་མང་བ་ཡིན་ཏེ། བྱང་ཆུབ་སེམས་དཔའ་དགོས་པ་ལ་མི་ལྟ་བའི་བཟོད་པ་ཕུན་སུམ་ཚོགས་པ་ཡིན་ནོ། ། 8. རྣམ་པར་མི་འཁྲུགས་པའི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་ནམ་དེ་ལ་ཁྲོ་བ་སྐྱེད་པའི་རྐྱེན་གང་གིས་ཟིལ་གྱིས་ནོན་ན། ཁུ་ཚུར་གྱིས་འཚོག་པར་འགྱུར་བའམ། ཐལ་མོས་འཚོག་པར་འགྱུར་བའམ། དབྱིག་པས་རྡེག་པར་འགྱུར་བའམ། མཚོན་གྱིས་འདེབས་པར་འགྱུར་བའམ། མི་གཙིགས་པའི་ཚིག་གིས་ངན་དུ་བརྗོད་པར་འགྱུར་བ་དེ་ལྟ་བུའི་རྐྱེན་མ་བྱུང་གི་བར་དུ་བཟོད་པ་མ་ཡིན་གྱི། བྱང་ཆུབ་སེམས་དཔའ་ནི། གལ་ཏེ་ལ་ལ་ཞིག་གིས་བརྡེགས་སམ། བསྡིགས་སམ། སྤྱོས་སམ། བརྒྱད་ན། དེ་ལ་བྱང་ཆུབ་སེམས་དཔས་འདི་སྙམ་དུ་བདག་ཉིད་ཀྱིས་ལས་འདི་དག་བྱས་ཏེ་བདག་ཉིད་ལ་རྣམ་པར་སྨིན་པར་འགྱུར་རོ། ། མས་མ་བྱས། ཕས་མ་བྱས། ཉེ་དུ་དང་། སྣག་གི་གཉེན་མཚམས་གང་ཡང་རུང་བ་དག་གིས་མ་བྱས་ཏེ། ལས་འདི་དག་བདག་ཉིད་ཀྱིས་བྱས་པས། དེའི་ཕྱིར་བདག་ཉིད་ལ་རྣམ་པར་སྨིན་པར་འགྱུར་གྱི། ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། དེ་བཞིན་དུ་ཆུའི་ཁམས་དང་། མེའི་ཁམས་དང་། རླུང་གི་ཁམས་ལ་རྣམ་པར་སྨིན་པར་མི་འགྱུར་རོ། ། དེ་བཞིན་དུ་ནང་གི་སའི་ཁམས་ལ་རྣམ་པར་སྨིན་པར་མི་འགྱུར། དེ་བཞིན་དུ་ཆུའི་ཁམས་དང་། མེའི་ཁམས་དང་། རླུང་གི་ཁམས་ལ་རྣམ་པར་སྨིན་པར་མི་འགྱུར་རོ་སྙམ་དུ་སེམས་གཞག་པར་བྱའོ། ། དེ་དེ་ལྟར་མ་ལོག་པར་རྟོག་པས་དེའི་རྒྱུ། དེའི་རྐྱེན། དེའི་གཞིས་རྣམ་པར་དཀྲུགས་ཀྱང་བཟོད། རྣམ་པར་མ་དཀྲུགས་ཀྱང་བཟོད་དེ། བྱང་ཆུབ་སེམས་དཔའ་རྣམ་པར་མི་འཁྲུག་པའི་བཟོད་པ་ཕུན་སུམ་ཚོགས་པ་ཡིན་ནོ། 9. སྙིང་རྗེའི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་རྒྱལ་པོའམ། བློན་པོ་ཆེན་པོ་ཕྱུག་ཅིང་ནོར་མང་བ། ལོངས་སྤྱོད་ཆེ་བ། སེམས་ཅན་སྡུག་བསྔལ་བ་རྣམས་ཀྱི་བདག་པོར་འགྱུར་ལ། དེ་ལ་སེམས་ཅན་གཞན་དེ་དག་གིས་མི་སྙན་པར་བརྗོད་ཀྱང་རུང་། ཀྱལ་ཀྱང་རུང་། གཙེས་ཀྱང་རུང་སྟེ། མི་ཁྲོ་ཞིང་གནོད་སེམས་སུ་མི་བྱེད་ལ། བདག་པོར་གྱུར་པ་ལྟ་བུར་མི་སྟོན་གྱི། གཞན་དུ་ན་དེ་འདི་སྙམ་དུ་སེམས་ཅན་འདི་དག་ནི། བདག་ཉིད་ཀྱིས་བཟུང་བ་སྟེ། སེམས་ཅན་འདི་དག་ནི། བདག་ཉིད་ཀྱིས་ཡོངས་སུ་བསྐྱང་བར་བྱ་བ་ཡིན་ལ། དེ་ལྟར་ཡོངས་སུ་བསྲུང་བ་ན་བརླག་པར་བྱ་བ་ནི། བདག་གི་མི་ཆའོ། ། ཞེས་དེ་དེའི་ཕྱིར་སྙིང་རྗེའི་སེམས་ཉེ་བར་བཞག་སྟེ་བཟོད་ཅིང་དང་དུ་ལེན་ལ་གནོད་སེམས་མི་མང་བ་ཡིན་ཏེ། བྱང་ཆུབ་སེམས་དཔའ་སྙིང་རྗེའི་བཟོད་པ་ཕུན་སུམ་ཚོགས་པ་ཡིན་ནོ། ། 10 .དམ་བཅས་པ་ལས་སྒྲོལ་བར་བྱེད་པའི་བཟོད་པ་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་འདི་སྙམ་དུ་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་སྤྱན་སྔར་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་འཁོར་བའི་རྒྱ་མཚོའི་འདམ་དུ་བྱིང་བའི་སེམས་ཅན་རྣམས་བསྒྲལ་བར་བགྱིའོ། ། ཞེས་སེངྒའི་སྒྲ་བསྒྲགས་ཀྱི། སེམས་ཅན་ཐམས་ཅད་བསྒྲལ་བ་དང་། སེམས་ཅན་ཐམས་ཅད་དགྲོལ་བ་དང་། སེམས་ཅན་ཐམས་ཅད་དུལ་བ་དང་ཞི་བ་ལ་རབ་ཏུ་བཀོད་པར་བརྩོན་པ་ལ་བདག་ཉིད་ཁྲོ་བ་མང་བ་དང་། གནོད་སེམས་མང་བ་དང་། མི་བཟོད་པ་མང་བ་དང་། ཕོག་སྙ་བྱེད་པ་ནི། བདག་གི་མི་ཆའོ་སྙམ་དུ་སེམས་སོ། ། དཔེར་ན། སྨན་པ་ཐུར་མ་ཅན་ཞིག་ཡོད་ལ། སེམས་ཅན་རྣམས་ཀྱང་རབ་རིབ་ཀྱིས་ལྡོངས་པར་གྱུར་ནས་སྨན་པ་དེས་འདི་སྙམ་དུ་བདག་གིས་སེམས་ ཅན་འདི་དག་གི་རབ་རིབ་ཀྱི་སྐྱོན་བསལ་བར་བྱའོ། ། ཞེས་བསམ་ལ། དེ་ནས་སྨན་པ་དེ་བདག་ཉིད་ཀྱང་ལྡོངས་པར་གྱུར་ན། དེ་ཇི་སྙམ་དུ་སེམས། ཇི་ག་སྨན་པ་དེས་སེམས་ཅན་དེ་དག་གི་རབ་རིབ་ཀྱི་སྐྱོན་ཐམས་ཅད་བསལ་བར་ནུས་སམ། གསོལ་པ། བཅོམ་ལྡན་འདས། དེ་མ་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་བྱང་ཆུབ་སེམས་དཔའ་ཡང་འདི་ལྟར་འཇིག་རྟེན་མི་ཤེས་པའི་རབ་རིབ་ཀྱིས་ལྡོངས་པའི་གཏི་མུག་གི་དྲི་མ་ཤེས་རབ་ཀྱི་མིག་གིས་བསལ་བར་འདོད་ལ། བདག་ཉིད་ཀྱང་མི་ཤེས་པའི་རབ་རིབ་ཀྱིས་ལྡོངས་ན་བདག་གི་མི་ཆའོ་སྙམ་དུ་སེམས་ཏེ། དེ་དེའི་ཕྱིར་བཟོད་ཅིང་དང་དུ་ལེན་ལ་གནོད་སེམས་མི་མང་བ་ཡིན་ཏེ། བྱང་ཆུབ་སེམས་དཔའ་དམ་བཅས་པ་ལས་སྒྲོལ་བར་བྱེད་པའི་བཟོད་པ་ཕུན་སུམ་ཚོགས་པ་ཡིན་ནོ། ། ཆོས་བཅུ་པོ་དེ་དག་དང་ལྡན་ན། བྱང་ཆུབ་སེམས་དཔའ་བཟོད་པ་ཕུན་སུམ་ཚོགས་པ་བཅུ་ཡིན་ནོ། །
Tibetan Source	《མདོ་ཚ་པ་》ཤ་26ན་3ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number