9630

Tibetan	ལམ་གྱི་རྒྱན་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལམ་གྱི་རྒྱན་བཅུ་སྟེ། 1. བྱང་ཆུབ་སེམས་དཔའ་འདོད་པའི་ཁམས་ནས་ཀྱང་མི་གཡོ་ལ། གཟུགས་དང་། གཟུགས་མེད་པ་ལ་སྤྱོད་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་འཇུག་ཀྱང་། དེ་དག་གི་དབང་གིས་མི་སྐྱེ་བ་འདི་ནི་ལམ་གྱི་རྒྱན་དང་པོའོ། ། 2. བྱང་ཆུབ་སེམས་དཔའ་ཉན་ཐོས་ཀྱི་ལམ་མངོན་སུམ་དུ་གྱུར་པའི་ཡེ་ཤེས་ལ་ཞུགས་ཀྱང་། ལམ་དེས་འབྱུང་བ་ཡང་མ་ཡིན་པ་འདི་ནི་ལམ་གྱི་རྒྱན་གཉིས་པའོ། ། 3. བྱང་ཆུབ་སེམས་དཔའ་རང་སངས་རྒྱས་ཀྱི་ལམ་ལ་མངོན་སུམ་དུ་གྱུར་པའི་ཡེ་ཤེས་སྣང་བར་མཁས་ཀྱང་། སྙིང་རྗེ་ཆེན་པོའི་སྟོབས་རྒྱུན་མི་གཅོད་པ་འདི་ནི་ལམ་གྱི་རྒྱན་གསུམ་པའོ། ། 4. བྱང་ཆུབ་སེམས་དཔའ་གཡོག་འཁོར་མང་པོ་དང་ལྡན་ཞིང་། གཡོག་འཁོར་ལྷ་དང་མི་རྣམ་པར་དག་པ་དང་ལྡན་ཞིང་ལྷའི་བུ་མོ་བརྒྱ་སྟོང་གིས་རོལ་མོ་བརྡུང་བ་དང་། དཀྲོལ་བའི་སྒྲ་ཕྱུང་སྟེ་བརྗོད་པ་ལ་དཔྱོད་ཀྱང་། བྱང་ཆུབ་སེམས་དཔའི་ལམ་དང་ལྡན་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་མི་འདོར་བ་འདི་ནི་ལམ་གྱི་རྒྱན་བཞི་པའོ། ། 5. བྱང་ཆུབ་སེམས་དཔའ་འགྲོ་བ་ཐམས་ཅད་ཀྱི་རྩེ་དགའ་ལ་དགོད་པ་དང་། སེམས་ཅན་དང་འདྲེས་ཤིང་འབུར་ལྡོག་པ་བྱེད་ཀྱང་། སེམས་ཀྱི་སྐད་ཅིག་གཅིག་ལ་ཡང་བྱང་ཆུབ་སེམས་དཔའི་ཏིང་ངེ་འཛིན་མཉམ་པ་ཉིད་མི་འདོར་བ་འདི་ནི་ལམ་གྱི་རྒྱན་ལྔ་པའོ། ། 6. བྱང་ཆུབ་སེམས་དཔའ་འཇིག་རྟེན་གྱི་ཆོས་ཐམས་ཅད་དང་མ་འདྲེས་ཤིང་འཇིག་རྟེན་གྱི་ཕ་རོལ་ཏུ་ཕྱིན་པ་ཡིན་ཡང་། སེམས་ཅན་བསྒྲལ་བའི་ཕྱིར། ཕ་རོལ་ཏུ་མི་འགྲོ་བའི་ལམ་ཡང་མི་གཏོང་བ་འདི་ནི་ལམ་གྱི་རྒྱན་དྲུག་པའོ། ། 7. བྱང་ཆུབ་སེམས་དཔའ་ཡང་དག་པ་ཇི་ལྟ་བཞིན་གྱི་ཡེ་ཤེས་སྣང་བ་ལ་ཞུགས་པའི་ལམ་ལ་གནས་ཀྱང་། ལམ་ངན་པར་ཞུགས་པའི་སེམས་ཅན་གྱི་ཕྱིར་ཟློག་པའི་ཕྱིར་ལམ་མ་ཡིན་པ་དང་། ལམ་ངན་ པ་ཡང་གནོན་ལ། ལམ་དེས་འཁོར་བ་འཛིན་པ་ཡང་མ་ཡིན་ཏེ། དེས་དག་པར་མི་སེམས་པ་འདི་ནི་ལམ་གྱི་རྒྱན་བདུན་པའོ། ། 8. བྱང་ཆུབ་སེམས་དཔའ་རྟག་ཏུ་ཚུལ་ཁྲིམས་ལེགས་པར་བསྲུངས་པ་དང་ལྡན་ཞིང་། དེ་བཞིན་གཤེགས་པའི་ཚུལ་ཁྲིམས་རྣམ་པར་དག་པ་ལ་རྟེན་པས་ལུས་དང་། ངག་དང་། ཡིད་ཀྱི་ལས་ཀྱི་མཐའ་ཁ་ན་མ་ཐོ་མེད་པ་དང་ལྡན་ཡང་། ཚུལ་ཁྲིམས་ངན་པ་དང་ལྡན་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར། སོ་སོའི་སྐྱེ་བོ་ཐ་མལ་པའི་སྤྱོད་པ་ཐམས་ཅད་སྟོན་ཅིང་། བྱང་ཆུབ་སེམས་དཔའི་ལམ་ལ་རྟེན་པས་བསོད་ནམས་ཀྱི་ཚོགས་རྣམ་པར་དག་པ་ཐམས་ཅད་ཡོངས་སུ་རྫོགས་པ་ཡིན་ཡང་། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དང་། མི་ཁོམ་པ་དང་། དབུལ་བར་སྐྱེས་པའི་ལམ་དུ་ཞུགས་པའི་སེམས་ཅན་ཐམས་ཅད་རྣམ་པར་བཟློག་པའི་ཕྱིར་། དེ་དག་གི་ལམ་དུ་སྐྱེས་པ་ཡང་སྟོན་ལ་། ལམ་དེ་དག་ལ་ཡང་དག་པར་གཞོལ་བ་ཡང་མ་ཡིན་པ་འདི་ནི་ལམ་གྱི་རྒྱན་བརྒྱད་པའོ། ། 9. བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ལ་གཞན་གྱི་དྲིང་མི་འཇོག་ཅིང་ཐོགས་པ་མེད་པའི་སྤོབས་པ་ཐོབ་པ། སངས་རྒྱས་ཀྱི་ཆོས་ཐམས་ཅད་ལ་ཡེ་ཤེས་ཀྱི་སྣང་བས་རྣམ་པར་ལྟ་བ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པ། སངས་རྒྱས་ཐམས་ཅད་ཀྱི་མཉམ་པ་ཉིད་ལ་རབ་ཏུ་གནས་པ། སངས་རྒྱས་ཀྱི་ཐམས་ཅད་ཀྱི་ཆོས་ཀྱི་སྐུ་དང་། ལུས་གཅིག་ཏུ་གྱུར་པ། སེམས་ཅན་ཐམས་ཅད་ཀྱི་ཆོས་ཀྱི་སྙིང་པོའི་ཚུལ་ཅན་དགོངས་པའི་སྣང་བ་ཁོང་དུ་ཆུད་པ། ཐེག་པ་ཐམས་ཅད་ཀྱི་མཉམ་པ་ཉིད་ལ་རབ་ཏུ་གནས་པ། སངས་རྒྱས་ཐམས་ཅད་སྤྱོད་ཡུལ་ལ་མངོན་པར་མོས་པ། འགྲོ་བ་ཐམས་ཅད་ཀྱི་ཡིད་དུ་འོང་བ། སེམས་ཅན་གྱི་ཁམས་ཐམས་ཅད་ཀྱི་ངོར་ལྟ་བ། འགྲོ་བ་ཐམས་ཅད་ཀྱི་སློབ་དཔོན་དུ་བྱ་བ་ཡིན་ཡང་། ཆོས་ཡོངས་སུ་བཙལ་བར་བྱ་བ་རྒྱུན་མི་གཅོད་ཅིང་། ངོ་མཚར་གྱིས་ཡོངས་སུ་ཟིན་པར་སྣང་བས། སྲི་ཞུའི་ལས་ཐམས་ཅད་ལ་གནས་ཏེ། མཁན་པོ་དང་། སློབ་དཔོན་དུ་སྟོན་ཀྱང་། དེ་ཉིད་འགྲོ་བ་ཐམས་ཅད་ཀྱི་སློབ་དཔོན་དུ་གྱུར་པ་ཡིན་ཏེ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ནི་ཐབས་མཁས་པ་དང་ལྡན་པར་བྱང་ཆུབ་སེམས་དཔའི་ལམ་ལ་ཤིན་ཏུ་གནས་པ་ཡིན་པས། དེ་དག་ནི་ཐབས་གང་དང་གང་གིས་སེམས་ཅན་རྣམས་འདུལ་བར་འགྱུར་བ་དེ་དང་དེའི་ཐབས་སེམས་ཅན་ལ་ཡོངས་སུ་སྟོན་ཏེ། འདི་ནི་ལམ་གྱི་རྒྱན་དགུ་པའོ། ། 10 .བྱང་ཆུབ་སེམས་དཔའ་དགེ་བའི་རྩ་བ་ཐམས་ཅད་ཡོངས་སུ་འདུས་ཤིང་། བྱང་ཆུབ་སེམས་དཔའི་སྤྱོད་པ་དང་། རྫུ་འཕྲུལ་ཐམས་ཅད་ཐོབ་པ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བས་མངོན་པར་དབང་བསྐུར་བ། ཆོས་ཐམས་ཅད་ལ་དབང་བའི་དབང་ཕྱུག་གི་ཕ་རོལ་ཏུ་ཕྱིན་པ་ཐོབ་པ། ཆགས་པ་མེད་ཅིང་དྲི་མ་མེད་པའི་ཐབས་དང་ལྡན་པ། འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་པར་དེ་བཞིན་གཤེགས་པའི་སྐུ་ཡང་དག་པར་སྟོན་པ། ཆོས་ཀྱི་འཁོར་ལོ་ཐོགས་པ་མེད་པར་བསྐོར་བའི་བྱིན་གྱི་རླབས་དང་ལྡན་པ། འཇིག་རྟེན་གྱི་ཐམས་ཅད་དུ་ཁྱབ་པའི་ལུས་དང་གཟུགས་བདོག་པ། ཆོས་ཐམས་ཅད་ཀྱི་ཕ་རོལ་ཏུ་ཕྱིན་པ་དམ་པ་དང་ལྡན་པ། བྱང་ཆུབ་སེམས་དཔའི་དབང་ཐམས་ཅད་རབ་ཏུ་ཐོབ་པ། འགྲོ་བ་ཐམས་ཅད་ཀྱི་ཞིང་དུ་སྐྱེ་བ་ཡོངས་སུ་སྟོན་པ་ལ་མཁས་པ། འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་དང་ཡུལ་གཅིག་ཏུ་གྱུར་པ་ཡང་ཡིན་ལ། བྱང་ཆུབ་སེམས་དཔའི་སྤྱོད་པ་ཡང་རྒྱུན་མི་གཅོད་ཅིང་། བྱང་ཆུབ་སེམས་དཔའ་ཆོས་ཉིད་ཀྱང་རྣམ་པར་མི་སྤོང་། བྱང་ཆུབ་སེམས་དཔའི་ལས་ལས་ཀྱང་རྣམ་པར་མི་ལྡོག བྱང་ཆུབ་སེམས་དཔའི་ལམ་ལས་ཀྱང་ཕྱིར་མི་ལྡོག བྱང་ཆུབ་སེམས་དཔའི་སྤྱོད་པ་ཡང་རྒྱུན་མི་གཅོད། བྱང་ཆུབ་སེམས་དཔའི་ཉེ་བར་ལེན་པ་ཡང་འཆད་པར་མི་བྱེད། བྱང་ཆུབ་སེམས་དཔའི་ཐབས་མཁས་པ་ལས་ཀྱང་ཕྱིར་མི་ལྡོག བྱང་ཆུབ་སེམས་དཔའི་བྱ་བ་ཡང་ཐོགས་པར་མི་བྱེད། བྱང་ཆུབ་སེམས་དཔའི་མངོན་པར་འདུ་བྱེད་པའི་སྟོབས་ཀྱིས་ཀྱང་ཡོངས་སུ་སྐྱོ་བ་མེད་ཅིང་། བྱང་ཆུབ་སེམས་དཔའི་སྤྱོད་པའི་བྱིན་གྱི་རླབས་ཀྱང་རིང་དུ་འཕང་བ་མ་ཡིན་ཏེ། དེ་ཅིའི་ཕྱིར་ཞེ་ན། དེ་ལྟར་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པ་དང་། ཐམས་ཅད་མཁྱེན་པ་ཉིད་ཀྱི་སྒོ་ལ་རྣམ་པར་ལྟ་བ་དེ་ལྟ་བུས་ནི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་དུ་འབྱུང་བའི་ཕྱིར་ཏེ། འདི་ནི་ལམ་གྱི་རྒྱན་བཅུ་པའོ། །
Tibetan Source	《ཕལ་ཆེན་ང་པ་》ཤ་314བ་1ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number