9771

Tibetan	སངས་རྒྱས་རྣམས་ཆོས་ཉིད་རབ་ཏུ་ཐོབ་པའི་ཕྱིར་འབྱུང་བར་འགྱུར་བའི་སང་འི་སངས་རྒྱས་འབྱུང་བ་ཁོང་དུ་ཆུད་པ་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གཉིས་ལས་བྱུང་བ་སྟེ། 1. དཔེའི་སྒོ་དང་པོས་ཁོང་དུ་ཆུད་པར་བྱ་བ་འདིས་བྱང་ཆུབ་སེམས་དཔའ་་སེམས་དཔའ་ཆེན་པོས༑དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། གཞན་ཡང་འདི་ལྟ་སྟེ། དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་འབྱུང་བར་འགྱུར་བའི་ཚེ། གཅིག་ཏུ་སྡུག་ཅིང་ཐ་མི་དད་པ་ཞེས་བྱ་བའི་སྤྲིན་ཆེན་པོའི་ཆར་འབབ་སྟེ། དེ་ནི་སྟོང་གསུམ་གྱི་སྟོང་ཆེན་པོ་ཡོངས་སུ་སྒྲུབ་པའི་རླུང་གི་དཀྱིལ་འཁོར་མ་གཏོགས་པར་སའི་ཕྱོགས་གཞན་གྱིས་གཟུང་བའམ། བཟོད་པར་མི་ནུས་སོ། ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འབྱུང་བའི་ཚེ། དེ་བཞིན་གཤེགས་པའི་རིགས་ཐ་མི་དད་པ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་འབབ་སྟེ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཉིད་ཀྱི་སྟོབས་དང་ཤུགས་ཀྱིས་བསྒྲུབས་པའི་སེམས་ཀྱི་རྒྱུད་མ་གཏོགས་པར་བྱང་ ཆུབ་སེམས་དཔའི་བསམ་པ་དམའ་དང་ཉན་ཐོས་དང་། རང་སངས་རྒྱས་ཐམས་ཅད་ཀྱིས་གཟུང་བའམ། བཟོད་པར་མི་ནུས་སོ། ། 2. ཁོང་དུ་ཆུད་པར་བྱ་བའི་སྒོ་གཉིས་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། གཞན་ཡང་འདི་ལྟ་སྟེ། དཔེར་ན། སྤྲིན་ཆེན་པོའི་ཆར་དེ་དག་འབབ་པའི་ཚེ། གང་ནས་ཀྱང་འོངས་པ་མེད་ལ་གང་དུ་ཡང་འགྲོ་བ་མེད་དེ། སེམས་ཅན་རྣམས་ཀྱི་ལས་ཀྱི་ཚོགས་ཆེན་པོས་ཆར་རབ་ཏུ་འབབ་པ་ཡང་ཡོད་དོ། ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་སྦྱིན་ཆེན་པོ་ཆར་མངོན་པར་འབབ་པ་ཡང་གང་ནས་ཀྱང་འོངས་པ་མེད་ལ། གང་དུ་ཡང་འགྲོ་བ་མེད་དེ། བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའི་སྟོབས་དང་ཤུགས་ཆེན་པོས་ཆར་མངོན་པར་འབང་པ་ཡང་ཡོད་དོ། ། 3. ཁོང་དུ་ཆུད་པར་བྱ་བའི་སྒོ་གསུམ་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱུས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། གཞན་ཡང་འདི་ལྟ་སྟེ། དཔེར་ན། སྤྲིན་ཆེན་པོའི་ཆར་མངོན་པར་འབབ་པ་དེ་དག་ནི། སྟོང་གསུམ་གྱི་སྟོང་ཆེན་པོར་གཏོགས་པའི་སེམས་ཅན་ཐམས་ཅད་ཀྱིས་ཤེས་པའམ། བགྲང་བར་སླ་བ་མ་ཡིན་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ནི། སྤྲིན་ཆེན་པོའི་ཆར་དེ་ལ་སེམས་དཔས་མགོ་རྨོངས་པར་འགྱུར་རོ། ། སྤྲིན་ཆེན་པོའི་ཆར་དེ་ལ་བལྟས་པས་མིག་འཁྲུགས་པར་འགྱུར་རོ། ། སྟོང་གསུམ་གྱི་སྟོང་ཆེན་པོའི་དབང་ཕྱུག་ཆེན་པོ་ནི་མ་གཏོགས་ཏེ། དེའི་སྔོན་གྱི་དགེ་བའི་རྩ་བ་ཡོངས་སུ་སྦྱངས་པའི་ཁྱད་པར་གྱིས་དེ་ལ་ཆུང་ངུ་ན་ཆར་པའི་ཐིགས་པ་གཅིག་ཀྱང་མ་རིག་པར་མི་འབབ་བོ། ། དེ་བཞིན་དུ་དེ་བཞིན་གཤེགས་པ་དེ་དག་ཡང་དག་པར་འབྱུང་བའི་ཚེ། དེ་བཞིན་གཤེགས་པའི་ཆོས་ཀྱི་སྤྲིན་གྱི་ཆར་མངོན་པར་འབབ་པ་ཡང་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཤེས་པའམ་བསམ་པར་མི་ནུས་ཏེ། དེ་དག་ནི་དེ་བཞིན་གཤེགས་པའི་ཆོས་ཀྱི་སྦྱིན་གྱི་ཆར་ལ་སེམས་པས་མགོ་རྨོངས་པར་འགྱུར་རོ། ། འགྲོ་བ་ཐམས་ཅད་ཀྱི་དབང་ཕྱུག ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་མ་གཏོགས་ཏེ། བློ་ཤིན་ཏུ་སྦྱངས་པའི་མཐུ་དང་། ཤུགས་ཀྱིས་དེ་དག་ལ་ཆུང་དུ་ན་ཚིག་དང་། ཡི་གེ་འགའ་ཙམ་ཡང་མ་རིག་པར་སེམས་ཅན་གཞན་གྱི་སེམས་ཀྱི་རྒྱུད་ལ་མི་འབབ་བོ། ། 4. ཁོང་དུ་ཆུད་པར་བྱ་བའི་སྒོ་བཞི་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། གཞན་ཡང་འདི་ལྟ་སྟེ། དཔེར་ན། སྤྲིན་ཆེན་པོའི་ཆར་དེ་དག་འབབ་པའི་ནང་ན། རབ་ཏུ་ཞི་བར་བྱེད་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་མེའི་ཕུང་པོ་དེ་རབ་ཏུ་ཞི་བར་བྱེད་དོ། ། འབྱུང་བར་བྱེད་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ལས་ཆུའི་ཕུང་པོ་དེ་དག་འབྱུང་ངོ་། ། ཡོངས་སུ་གཅོད་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་ཆུའི་ཕུང་པོ་དེ་དག་ཡོངས་སུ་གཅོད་དོ།༑ ཡོངས་སུ་བསྒྲུབ་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་ནོར་བུ་རིན་པོ་ཆེ་མང་པོ་ཡོངས་སུ་འགྲུབ་པར་བྱེད་དོ། ། རྣམ་པར་འབྱེད་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་རྣམ་པར་འབྱེད་དོ། ། དེ་བཞིན་གཤེགས་པ་ཡང་དག་པར་འབྱུང་བ་ལའང་། རབ་ཏུ་ཞི་བར་བྱེད་པ་ཞེས་བྱ་བ་དེ་བཞིན་གཤེགས་པའི་རྒྱུ་མཐུན་པའི་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སེམས་ཅན་ཐམས་ཅད་ཀྱི་ཉོན་མོངས་པ་འབར་བ་ཐམས་ཅད་རབ་ཏུ་ཞི་བར་བྱེད་དོ། ། འབྱུང་བར་བྱེད་པ་ཞེས་བྱ་བ་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སེམས་ཅན་ཐམས་ཅད་ཀྱི་དགེ་བའི་རྩ་བའི་ཚོགས་ཐམས་ཅད་ཡང་དག་པར་འབྱུང་བར་བྱེད་དོ། ། ཡོངས་སུ་གཅོད་པ་ཞེས་བྱ་བ་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སེམས་ཅན་ཐམས་ཅད་ཀྱི་ཉོན་མོངས་པ་དང་ལྟ་བའི་རྣམ་པ་ཐམས་ཅད་ཡོངས་སུ་གཅོད་དོ། ། ཡོངས་སུ་སྒྲུབ་པ་ཞེས་བྱ་བ་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་ཐམས་ཅད་མཁྱེན་པའི་ཆོས་རིན་པོ་ཆེ་ཡོངས་སུ་གྲུབ་པར་བྱེད་དོ། ། རྣམ་པར་འབྱེད་པ་ཞེས་བྱ་བ་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སེམས་ཅན་ཐམས་ཅད་ཀྱི་སེམས་དང་བསམ་པ་རྣམ་པར་འབྱེད་དོ། ། 5. ཁོང་དུ་ཆུད་པར་བྱ་བའི་སྒོ་ལྔ་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། ཆར་སྤྲིན་ཆེན་པོ་ཡང་རོ་གཅིག་ལ། ཆུའི་ཕུང་པོ་ཡང་རྣམ་པར་མི་རྟོག་མོད་ཀྱི། དེ་ལྟར་རྣམ་པ་ཚད་མེད་པར་ཐ་དད་པའི་ཆར་རྣམ་པར་ཕྱེ་བ་འབབ་བོ། ། དེ་བཞིན་དུ་དེ་བཞིན་གཤེགས་པའི་ཐུགས་རྗེ་ཆེན་པོའི་ཆར་སྤྲིན་རོ་གཅིག་པ་ལས། དེ་ལྟར་ཚད་མེད་ཅིང་རྣམ་པ་ཐ་དད་པའི་ཆོས་ཀྱི་ཆར་སྣ་ཚོགས་འབབ་སྟེ། དེ་བཞིན་གཤེགས་པ་ཡང་ཡོངས་སུ་འབྱུང་ངོ་། ། ཆོས་རྣམ་པར་ཕྱེ་བ་ཚད་མེད་པ་ཡང་སྣང་ཞིང་ཡོད་དོ། ། 6. ཁོང་དུ་ཆུད་པར་བྱ་བའི་སྒོ་དྲུག་པ་འདིས་ཀྱང་བྱུང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། གཞན་ཡང་འདི་ལྟ་སྟེ། སྟོང་གསུམ་གྱི་སྟོང་ཆེན་པོ་ཡོངས་སུ་འགྲུབ་པར་འགྱུར་བའི་ཚེ། ཐོག་མ་ཉིད་དུ་གཟུགས་ལ་སྤྱོད་པའི་ལྷའི་བུ་རྣམས་ཀྱི་གཞལ་མེད་ཁང་ཡོངས་སུ་འགྲུབ་པར་འགྱུར་རོ། ། དེའི་འོག་ཏུ་དེ་མ་ཡིན་པའི་སེམས་ཅན་ལྷག་མ་གཞན་རྣམས་ཀྱི་གནས་རྣམ་པར་ཕྱེ་བ་སྣ་ཚོགས་འགྲུབ་པར་འགྱུར་རོ། ། དེ་བཞིན་དུ་དེ་བཞིན་གཤེགས་པ་ཡང་དག་པར་འབྱུང་བའི་ཚེ་ཡང་། ཐོག་མ་ཉིད་དུ་བྱང་ཆུབ་སེམས་དཔའི་ཡེ་ཤེས་ཀྱི་རྒྱུད་རྣམས་འབྱུང་བར་འགྱུར་རོ། ། དེའི་འོག་ཏུ་རང་སངས་རྒྱས་ཀྱི་ཡེ་ཤེས་ཀྱི་རྒྱུད་རྣམས་འབྱུང་ངོ་། །དེའི་འོག་ཏུ་ཉན་ཐོས་ཀྱི་དག་པའི་རྩ་བའི་ཡེ་ཤེས་ཀྱི་རྒྱུད་རྣམས་འབྱུང་བར་འགྱུར་རོ། ། དེའི་འོག་ཏུ་དེ་མ་ཡིན་པའི་སེམས་ཅན་གཞན་གྱི་འདུས་བྱས་ཀྱི་དགེ་བའི་རྩ་བ་དང་། ཤེས་པའི་རྒྱུད་རྣམས་འབྱུང་བར་འགྱུར་རོ། ། དེ་ལྟར་དཔེར་ན། ཆར་སྤྲིན་ཆེན་པོ་ཡང་རོ་གཅིག་ལ། ཆུའི་ཕུང་པོ་ཡང་རྣམ་པར་མི་རྟོག་པ་ལས། སེམས་ཅན་གྱི་དགེ་བའི་རྩ་བ་རྣམ་པ་ཐ་དད་པས་གཞལ་མེད་ཁང་རྣམ་པ་ཐ་དད་པ་ཡོད་ཅིང་སྣང་ངོ་། ། དེ་བཞིན་དུ་དེ་བཞིན་གཤེགས་པའི་ཐུགས་རྗེ་ཆེན་པོའི་ཆར་སྤྲིན་རོ་གཅིག་པ་ལས། སེམས་ཅན་གྱི་སྣོད་རྣམ་པ་ཐ་དད་པའི་ཕྱིར། དགེ་བའི་རྩ་བ་རྣམ་པ་ཐ་དད་པ་ཡོད་ཅིང་སྣང་བར་གྱུར་ཏོ། ། 7. ཁོང་དུ་ཆུད་པར་བྱ་བའི་སྒོ་བདུན་པ་འདིས་ཀྱང་བྱང་ཚུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། གཞན་ཡང་འདི་ལྟ་སྟེ། ཆུས་འཇིག་པའི་བསྐལ་པ་ཆེན་པོ་འབྱུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངས་ཆེན་མཚོ་གཅིག་ཏུ་གྱུར་པའི་ཚེ། ཆོས་ཉིད་ཐོབ་པས་དེ་བཞིན་གཤེགས་པ་འབྱུང་བའི་ཡོན་ཏན་རིན་པོ་ཆེས་རྣམ་པར་བརྒྱན་པ་ཞེས་བྱ་བའི་པདྨོ་མང་པོ་འབྱུང་སྟེ། དེ་དག་གིས་ནི་ཆུའི་བསྐལ་པ་ཐམས་ཅད་ཀུན་ནས་ཁེབས་སོ། ། དེ་དག་ནི་འཇིག་རྟེན་ཐམས་ཅད་ཀུན་ནས་ཁེབས་སོ། ། དེ་དག་ནི་འཇིག་རྟེན་ཐམས་ཅད་འོད་ཀྱིས་རྒྱས་པར་འགེངས་ཏེ། པདྨོ་དེ་དག་བྱུང་བ་དང་། ལྷའི་བུ་དབང་ཕྱུག་ཆེན་པོ་དང་།གནས་གཙང་མའི་རིགས་ཀྱི་ལྷའི་བུ་གཞན་རྣམས་ཀྱིས་ཀྱང་བསྐལ་པ་འདི་ལ་ནི་ཡང་དག་པར་རྫོགས་པའི་སངས་རྒྱས་འདི་སྙེད་ཅིག་འབྱུང་བར་འགྱུར་རོ་ཞེས་བྱ་བ་ཁོང་དུ་ཆུད་དོ། ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་འགྲུབ་པའི་ཚེ། རླུང་གི་དཀྱིལ་འཁོར་དག་ཅིང་འོད་གསལ་བ་ཞེས་བྱ་བ་ལྡང་སྟེ། དེ་ནི་གཟུགས་ལ་སྤྱོད་པའི་ལྷ་རྣམས་ཀྱི་གཞལ་མེད་ཁང་ཡོངས་སུ་གནས་པར་བྱེད་དོ། ། རླུང་གི་དཀྱིལ་འཁོར་དག་ཅིང་དང་ལ་འོད་གསལ་བས་རྒྱན་བཟང་པོ་ཞེས་བྱ་བ་ལྡང་སྟེ། དེ་ནི་འདོད་པ་ལ་སྤྱོད་པའི་ལྷའི་བུ་རྣམས་ཀྱི་ལྷའི་གཞལ་མེད་ཁང་ཡོངས་སུ་འགོད་དོ། །རླུང་གི་དཀྱིལ་འཁོར་གཅིག་ཏུ་སྡུག་ཅིང་ཐ་མི་དད་པ་ཞེས་བྱ་བ་ལྡང་སྟེ། དེ་ནི་ཁོར་ཡུག་དང་། ཁོར་ཡུག་ཆེན་པོའི་རི་རྣམས་ཡོངས་སུ་གཞོག་པ་བྱེད་དོ། ། རླུང་གི་དཀྱིལ་འཁོར་ཁྱད་པར་དུ་འཕགས་ཞེས་བྱ་བ་ལྡང་སྟེ། དེ་ནི་རི་རབ་རིའི་རྒྱལ་པོ་ཡོངས་སུ་གཞོག་པ་བྱེད་དོ། །རླུང་གི་དཀྱིལ་འཁོར་བརྟན་པ་ཞེས་བྱ་བ་ལྡང་སྟེ། དེ་ནི་རི་ཆེན་པོ་བཅུ་ཡོངས་སུ་གཞོག་པ་བྱེད་དོ། ། བཅུ་གང་ཞེ་ན། འདི་ལྟ། (1)སེང་ལྡེང་ཅན། (2)དྲང་སྲོང་རི། (3)བདུད་ལས་རྒྱལ། (4)བདུད་ལས་ཤིན་ཏུ་རྒྱལ། (5)གཉའ་ཤིང་འཛིན། (6)ས་འཛིན། (7)བཏང་བཟུང་། (8)བཏང་བཟུང་ཆེན་པོ། (9)སྤོས་ཀྱི་ངད་ཅན། (10) ཁ་བ་ཅན་ནོ། ། རླུང་གི་དཀྱིལ་འཁོར་རབ་ཏུ་གནས་པ་ཞེས་བྱ་བ་ལྗང་སྟེ། དེ་ནི་ས་ཆེན་པོ་ཀུན་ནས་གནས་པར་བྱེད་དོ། ། རླུང་གི་དཀྱིལ་འཁོར་རྣམ་པར་བཀོད་པ་ཞེས་བྱ་བ་ལྡང་སྟེ། དེ་ནི་ས་བླའི་ལྷ་དང་། ཀླུ་དང་། དྲི་ཟའི་ཁྱིམ་ཀུན་ནས་གནས་པར་བྱེད་དོ། ། རླུང་གི་དཀྱིལ་འཁོར་མཛོད་མི་ཟད་པ་ཞེས་བྱ་བ་ལྡང་སྟེ། དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་རྒྱ་མཚོ་ཆེན་པོ་ཀུན་ནས་གནས་པར་བྱེད་དོ། ། རླུང་གི་དཀྱིལ་འཁོར་རྣམ་པར་སྣང་བའི་དཀྱིལ་པོ་སྣང་འཁོར་ཞེས་བྱ་བ་ལྡང་སྟེ། དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རིན་པོ་ཆེའི་རིགས་ཐམས་ཅད་ཀུན་ནས་གནས་པར་བྱེད་དོ། ། རླུང་གི་དཀྱིལ་འཁོར་རྩ་བ་བརྟན་པ་ཞེས་བྱ་བ་ལྡང་སྟེ། དེ་ནི་ཡིད་བཞིན་གྱི་ཤིང་ཐམས་ཅད་ཀུན་ནས་གནས་པར་བྱེད་དོ། ། དེ་ལྟར་ཆར་སྤྲིན་ཆེན་པོའི་ཆར་རོ་གཅིག་ཏུ་འབབ་པ་དང་། ཆུའི་ཕུང་པོ་རྣམ་པར་མི་རྟོག་པ་ལས་ཆོས་ཉིད་ཐོབ་པ་དང་། སེམས་ཅན་རྣམས་ཀྱི་དགེ་བའི་རྩ་བ་ཐ་དད་པའི་ཁྱད་པར་གྱིས་རླུང་གི་དཀྱིལ་འཁོར་རྣམ་པ་ཐ་དད་པ་ཡོད་ཅིང་སྣང་ངོ་། ། རླུང་གི་དཀྱིལ་འཁོར་རྣམ་པ་ཐ་དད་པར་གྱུར་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་ཡོད་ཅིང་སྣང་ངོ་། ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་བའི་རྩ་བའི་ཚོགས་ཐམས་ཅད་ཤིན་ཏུ་བསགས་པ། བླ་ན་མེད་པའི་ཡེ་ཤེས་ཆེན་བ་ལ་མངོན་དུ་གྱུར་པ་རྣམས་འབྱུང་བའི་ཚེ། ཡེ་ཤེས་ཀྱི་འོད་ཟེར་ཆེན་པོ་བསམ་གྱིས་མི་ཁྱབ་པ། དེ་བཞིན་གཤེགས་པའི་རིགས་རྒྱུན་མི་འཆད་པ་ཞེས་བྱ་བ་འཇིག་རྟེན་གྱི་ཁམས་མ་ལུས་པ་ཐམས་ཅད་རྒྱས་པར་འགེངས་པ་འབྱུང་སྟེ། འོད་ཟེར་དེས་ནི་དེ་བཞིན་གཤེགས་པ་དང་། དབང་བསྐུར་བ་ཐོབ་པའི་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་བྱང་ཆུབ་སེམས་དཔའ་འདི་སྙེད་ཅིག ། དེ་བཞིན་གཤེགས་པའི་མཐུ་འདིས་ཡང་དག་པར་འགྲུབ་པར་འགྱུར་རོ་ཞེས་བྱ་བར་ཐུགས་སུ་ཆུད་དོ། ། དེ་ལྟར་དེ་བཞིན་གཤེགས་པ་འབྱུང་བར་འགྱུར་བའི་ཚེ། དེ་བཞིན་གཤེགས་པ་ཐམས་ཅད་ཀྱི་རིགས་འབྱུང་བའི་མཐུས། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་འོད་བཟང་པོ་དྲི་མ་མེད་པ་ཞེས་བྱ་བ་འབྱུང་ སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་ཟག་པ་མེད་ཅིང་། མི་ཟད་པ་ཡང་དག་པར་འགྲུབ་པར་འགྱུར་རོ། ། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་ཀུན་ཏུ་སྣང་བ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་བསམ་གྱིས་མི་ཁྱབ་པ། ཆོས་ཀྱི་དབྱིངས་སུ་གཞོལ་བ་ཡང་དག་པར་འགྲུབ་པར་འགྱུར་རོ། ། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ། དེ་བཞིན་གཤེགས་པའི་རིགས་ཡང་དག་པར་འབྱུང་བ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་སྟོབས་མི་སྒུལ་བ་ཡང་དག་པར་འགྲུབ་པར་འགྱུར་རོ། ། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་ཟིལ་གྱིས་མི་ནོན་ཅིང་། ཡང་དག་པར་འཕགས་པ་ཞེས་བྱ་བ་འབྱུང་སྟེ། ་འོད་ཟེར་དེས་དེ་བཞིན་གཤེགས་པ་རྣམས་ཀྱི་སྟོབས་དང་མི་བསྙེངས་པ་ཟིལ་གྱིས་མི་ནོན་པའི་ཡེ་ཤེས་ཡང་དག་པར་འགྲུབ་པར་འགྱུར་རོ། ། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་་ཆེན་པོ་ཐམས་ཅད་མངོན་པར་མཁྱེན་པ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་ཐམས་ཅད་དུ་བརྗོད་པ་ལས་འདས་ཤིང་། ཐམས་ཅད་དུ་ཐོགས་པ་མེད་པ་ཡང་དག་པར་འགྲུབ་པར་འགྱུར་རོ། ། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་སྤྲུལ་པས་མངོན་པར་བསྒྲུབས་པ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་མཐོང་ཞིང་ ཐོས་པ་དང་། དེ་དང་འགྲོགས་པ་དོན་ཡོད་པས་དགེ་བའི་རྩ་བ་ཆུད་མི་ཟ་བའི་ཡེ་ཤེས་ཡང་དག་པར་འགྲུབ་པར་འགྱུར་རོ། ། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་མཉམ་པ་ཉིད་ཀྱི་རྗེས་སུ་སོང་བ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་བསོད་ནམས་དང་ཡེ་ཤེས་མི་ཟད་པའི་ཚོགས་འགྲོ་བ་ཐམས་ཅད་ཉེ་བར་འཚོ་བ་ཡང་དག་པར་འགྲུབ་པར་འགྱུར་རོ།། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་འཇུག་པར་དཀའ་བ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་དཀོན་མཆོག་གསུམ་གྱི་རིགས་རྒྱུན་མི་གཅོད་ཅིང་། ཡེ་ཤེས་ཟབ་མོ་ཐུགས་སུ་ཆུད་པ་ཡང་དག་པར་འགྲུབ་པར་འགྱུར་རོ། ། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་རྒྱན་སྣ་ཚོགས་ཅན་ཞེས་བྱ་བ་འབྱུང་སྟེ།འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་མཚན་དང་དཔེ་བྱད་བཟང་པོའི་རྒྱན་སྣ་ཚོགས་ཀྱིས་འགྲོ་བ་ཐམས་ཅད་རྣམ་པ་ཐམས་ཅད་དུ་དགའ་བར་འགྱུར་བ་ཡང་དག་པར་འགྲུབ་བོ། །དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་འོད་ཟེར་ཆེན་པོ་ཚེ་མི་འཕྲོགས་པ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་སངས་རྒྱས་ཀྱི་ཡུལ་ཆོས་ཀྱི་དབྱིངས་ཀྱིས་ཀླས་པ།ནམ་མཁའི་མཐས་གཏུགས་པར་སྐུ་ཚེའི་ཚད་རྒྱུན་མི་འཆད་པ་ཡང་དག་པར་འགྲུབ་པར་འགྱུར་ཏེ། དེ་ལྟར་དེ་བཞིན་གཤེགས་པའི་ཐུགས་རྗེ་ཆེན་པོའི་ཆར་སྤྲིན་ཆེན་པོ་རོ་གཅིག་པ་དང་། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་གྱི་དཀྱིལ་འཁོར་ཆེན་པོ་རོ་གཅིག་པ་དང་། བྱང་ཆུབ་སེམས་དཔས་ཡང་དག་པར་བསྒྲུབས་པའི་ཆོས་ཉིད་ཐོབ་པ་དང་། སེམས་ཅན་གྱི་བསམ་པ་དང་། དབང་པོ་དང་། བརྩོན་འགྲུས་རྣམ་པ་ཐ་དད་པའི་ཆོས་ཉིད་ཐོབ་པས། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་འོད་ཟེར་རང་བཞིན་གཅིག་པ་ལས་རྣམ་པ་ཐ་དད་དུ་གྱུར་པ་ཡོད་ཅིང་སྣང་ངོ་། ། ཡེ་ཤེས་ཀྱི་འོད་ཟེར་རྣམ་པ་ཐ་དད་པ་ལས། དེ་བཞིན་གཤེགས་པ་འབྱུང་བ་ཡང་དག་པར་འགྲུབ་པ་རྣམ་པ་ཐ་དད་པ་ཡང་ཡོད་ཅིང་སྣང་ངོ་། ། དེ་བཞིན་གཤེགས་པོ་ཡང་དག་པར་འགྲུབ་པ་རྣམ་པར་ཕྱེ་བའི་རོ་གཅིག་པ་ལས། ཡོན་ཏན་རྣམ་པ་ཐ་དད་པའི་རྒྱུན་ཚད་མེད་བསམ་གྱིས་མི་ཁྱབ་པ་འབྱུང་ཞིང་། དེ་བཞིན་གཤེགས་པའི་བྱིན་གྱི་རླབས་ཀྱིས། སེམས་ཅན་རྣམས་ཀྱིས་ཀྱང་དེ་བཞིན་ཤེས་པར་འགྱུར་བ་ལ་ལྟོས། དེ་ནི་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བྱིན་གྱིས་མ་བརླབས་ན། སེམས་ཅན་སྔོན་ཆད་དེ་བཞིན་གཤེགས་པ་ལ་དགེ་བའི་རྩ་བ་མ་བསྐྱེད་པས། དེ་བཞིན་གཤེགས་པའི་ཡེ་ཤེས་ལ་ཆུང་དུ་ན་ཆ་ཤས་གཅིག་ཙམ་བསྟན་པ་ཡང་ཤེས་པར་འགྱུར་བའམ། ཁོང་དུ་ཆུད་པར་འགྱུར་བའི་གནས་མེད་སྐབས་མེད་དེ། དེ་ནི་གནས་མ་ཡིན་ནོ། ། དེ་ལྟར་དེ་བཞིན་གཤེགས་པའི་མཐུའི་ཁྱད་པར་གྱིས་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་མཐུ་ལ་འཇུག་ཅིང་རྟོག་པ་དང་ཁོང་དུ་ཆུད་པར་བྱེད་ཀྱང་། ་དེ་བཞིན་གཤེགས་པ་ལ་རྟོག་པ་མི་མངའ། རྣམ་པར་རྟོག་པ་མི་མངའ་སྟེ། འབྱུང་བ་མེད་ཅིང་ཀུན་ནས་འབྱུང་བ་མེད་ལ་ཡང་དག་པར་འགྲུབ་པ་མེད་དེ། བྱ་བ་མེད་ཅིང་དེ་ལ་བྱེད་པ་སུ་ལའང་མེད་མོད་ཀྱི། ཡང་དག་པར་འབྱུང་བའི་གྲངས་སུ་བགྲང་བ་ཡང་ཡོད་དོ། ། 8. ཁོང་དུ་ཆུད་པར་བྱ་བའི་སྒོ་བརྒྱད་པ་འདིས་ཀྱང་བྱང་ཆུབ་སེམས་དཔའ་སེམས་དབའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། གཞན་ཡང་འདི་ལྟ་སྟེ། རླུང་གི་དཀྱིལ་འཁོར་ཆུའི་ཕུང་པོའི་འཛིན་པ་བཞི་ནི། ནམ་མཁའ་ལ་གནས་ཤིང་ལྡང་ངོ་། ། བཞི་གང་ཞེ་ན། འདི་ལྟ་སྟེ། (1)རླུང་གི་དཀྱིལ་འཁོར་བརྟན་པ། (2)རླུང་གི་དཀྱིལ་འཁོར་གནས་པ། (3)རླུང་གི་དཀྱིལ་འཁོར་མི་ཉམས་པ། (4)རླུང་གི་དཀྱིལ་འཁོར་སྙིང་པོ་དང་ལྡན་པ་ཞེས་བྱ་བ་དག་སྟེ། རླུང་གི་དཀྱིལ་འཁོར་ཆེན་པོ་དེ་བཞི་ནི་རབ་ཏུ་ལྡང་ཞིང་ཆུའི་ཕུང་པོ་འཛིན་ཏེ། ཆུའི་ཕུང་པོ་ལ་གནས་པའི་ས་ཆེན་པོ་ནི་མི་འཇིག ། རྣམ་པར་མི་འཇིག་པས་དེའི་ཕྱིར་ས་ནི་ཆུ་ལ་གནས་སོ། ། ཆུ་ནི་རླུང་ལ་གནས་སོ། ། རླུང་ནི་ནམ་མཁའ་ལ་གནས་སོ། ། ནམ་མཁའ་ནི་མི་གནས་པ་ཞེས་བྱ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་ཚུལ་དེ་ལྟ་བུར་གནས་སོ། ། དེ་བཞིན་དུ་དེ་བཞིན་གཤེགས་པ་འབྱུང་བའི་ཚེ། དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་ཤེས་རབ་ཀྱི་སྣང་བ་ཆགས་པ་མེད་པ་ལ་གནས་པ་བཞི་ལྡང་སྟེ། དེ་དག་ནི་འགྲོ་བ་ཐམས་ཅད་ཀྱི་དགེ་བའི་རྩ་བ་ཡོངས་སུ་འཛིན་ཏོ། བཞི་གང་ཞེ་ན། འདི་ལྟ་སྟེ། (1)དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་བསྡུ་བས་སེམས་ཅན་ཡོངས་ས་སུ་དགའ་བར་འགྱུར་བ་ཞེས་བྱ་བ། (2)ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་ཆོས་རྣམ་པོར་དགོད་པ་ལ་འགྲོ་བ་མོས་པར་བྱེད་པ་ཞེས་བྱ་བ། (3)ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་དགེ་བའི་རྩ་བ་ཐམས་ཅད་ཡོངས་སུ་སྲུང་བ་ཞེས་བྱ་བ། (4)ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་འཁོར་བ་ཐམས་ཅད་ཟག་པ་མེད་པའི་དབྱིངས་སུ་ཁོང་དུ་ཆུད་པ་ཞེས་བྱེ་བ་དག་སྟེ། བཞི་པོ་དེ་དག་ནི་ཤེས་རབ་ཀྱི་སྣང་བ་ཆགས་པ་མེད་པ་ལ་གནས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་རྣམས་ཏེ། དེ་དག་ནི་འགྲོ་བ་ཐམས་ཅད་བྱམས་པ་ཆེན་པོས་ཡོངས་སུ་བསྐྱེད་པ་དང་། ཐུགས་རྗེ་ཆེན་པོས་འགྲོ་བ་ཐམས་ཅད་ཡོངས་སུ་འགྲོལ་ཞིང་གཟུང་བའི་ཕྱིར་ལྡང་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་ལ་གནས་པའི་བྱང་'ཆུབ་སེམས་དཔའ་ནི་འགྲོ་བ་མང་པོ་རྣམ་པར་ཕྱེ་བ་འབྱམས་་་ཀླས་པའི་ནང་ན། ཐབས་མཁས་པ་ལ་གནས་པའི་བྱམས་པ་ཆེན་པོས་སེམས་ཅན་ཐམས་ཅད་ཉེ་བར་འཚོ་བ་ཡིན་ཏེ། དེ་བ་ཡིན། ནམ་བཞིན་གཤེགས་པ་འབྱུང་བ་ནི་ཚུལ་དེ་ལྟ་བུར་འགྲུབ་ཅིང་དེ་ལྟར་གནས་པ་ཡིན་ཏེ། ཤེས་རབ་ཀྱི་སྣང་བ་ཆགས་པ་མེད་པ་ནི་མི་གནས་པའོ། ། 9. ཁོང་དུ་ཆུད་པར་བྱ་བའི་སྒོ་དགུ་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། གཞན་ཡང་འདི་ལྟ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འགྲུབ་པ་ནི། ཚད་མེད་པའི་སེམས་ཅན་རྣམས་ཡོངས་སུ་སྤྱོད་པ་རྣམ་པ་ཐ་དད་པས་ཉེ་བར་འཚོ་བ་ཡིན་ཏེ། འདི་ལྟར་ཆུ་ལ་གནས་པའི་སེམས་ཅན་པ་ཅན་རྣམས་ཀྱང་གནས་ཀྱིས་ཉེ་བར་འཚོ་བ་ཡིན།: སེམས་ཅན་སའི་སྟེང་ན་འཁོད་པ་རྣམས་ཀྱང་ང་སའི་སྟེང་ན་ཡོད་པའི་རྣམ་པ་ཚད་མེད་པས་ཉེ་བར་འཚོ་བ་ཡིན། གཞལ་མེད་ཁང་ན་གནས་པ་རྣམས་ཀྱང་གཞལ་མེད་ཁང་གིས་ཉེ་བར་འཚོ་བ་མཁའ་ལ་གནས་པ་རྣམས་ཀྱང་བར་སྣང་གི་གནས་ཀྱིས་ཉེ་བར་འཚོ་བ་ཡིན། དེ་བཞིན་དུ་དེ་བཞིན་གཤེགས་པ་ཡང་དག་པར་གྲུབ་པ་ཡང་རྣམ་པ་ཚད་མེད་པས་འགྲོ་བ་ཐམས་ཅད་ཉེ་བར་འཚོ་བ་ཡིན་ཏེ། འདི་ལྟར་མཐོང་བར་དགའ་བ་དང་། དད་ཅིང་མོས་པར་གྱུར་པའི་སེམས་ཅན་རྣམས་ཀྱང་སངས་རྒྱས་མཐོང་བས་ཉེ་བར་འཚོ་བ་ཡིན། ཚུལ་ཁྲིམས་ཀྱི་སྟོབས་ཀྱི་མཐུ་ལ་གནས་པ་རྣམས་ཀྱང་། སངས་རྒྱས་ཀྱི་ཚུལ་ཁྲིམས་ཀྱིས་ཉེ་བར་འཚོ་བ་ཡིན། བསམ་གཏན་དང་། ཚད་མེད་པ་ལ་གནས་པ་རྣམས་ཀྱང་། འཕགས་པ་འཇིག་རྟེན་ལས་འདས་པའི་མངོན་པར་ཤེས་པས་ཉེ་བར་འཚོ་བ་ཆོས་ཀྱི་སྒོ་སྣང་བ་ལ་གནས་པ་རྣམས་ཀྱང་རྒྱུ་ཆུད་མི་ཟ་བས་ཉེ་བར་འཚོ་བ་ཡིན། སྣང་བ་མེད་པ་ལ་གནས་པ་རྣམས་ཀྱང་། ཆོས་འབྱམས་ཀླས་པ་ཆུད་མི་ཟ་བས་ཉེ་བར་འཚོ་བ་ཡིན་པས། དེའི་ཕྱིར་དེ་བཞིན་ཤེགས་པ་ཡང་དག་པར་གྲུབ་པ་ནི། འགྲོ་བ་ཐམས་ཅད་ཉེ་བར་འཚོ་བ་ཡིན་ཞེས་བྱའོ། ། 10. ཁོང་དུ་ཆུད་པར་བྱ་བའི་སྒོ་རྣམ་པ་བཅུ་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། ། བྱང་ཆུབ་སེམས་དཔའ་སེམས་དཔའི་ཆེན་པོས། བ་ཡིན། དེ་བཞིན་གཤེགས་པ་སྐྱེ་བང་འབྱུང་བ་བསྟན་པ་ནི་དེ་ལྟ་བུར་ཤེས་པར་བྱ་སྟེ། སྤྱོད་པ་ཡོངས་སུ་བསྒྲུབས་པ་ཚད་མེད་པས་ན། ·ཚད་མེད་པར་ཤེས་པར་བྱའོ། །ཕྱོགས་བཅུ་ཐམས་ཅད་རྒྱས་པར་འགེངས་པས་ན། ཤིན་ཏུ་ཡངས་པར་ཤེས་པར་བྱའོ། ། ། སྐྱེ་བ་དང་འཇིག་པའི་གནས་དང་བྲལ་བས་ན། ལེན་པ་མེད་ཅིང་འདོར་བ་མེད་པར་ཤེས་པར་བྱའོ། ། སེམས་ཅན་ཐམས་ཅད་ལ་བདག་མེད་པས་ན། མཉམ་པར་ཤེས་པར་བྱའོ། ། སེམས་ཅན་ཐམས་ཅད་ཟད་མི་ཤེས་པའི་ཞིང་དུ་གྱུར་པས་ན། མི་འཕྲོགས་པར་ཤེས་པར་བྱའོ། ། འདུས་བྱས་དང་། འདུས་མ་བྱས་མཉམ་པ་ཉིད་དུ་ཐུགས་སུ་ཆུད་པས་ན། མི་གཉིས་པར་ཤེས་པར་བྱའོ། ། སྔོན་ཡོངས་སུ་སྨིན་པར་བྱས་པའི་སེམས་ཅན་གྱི་བསམ་པའི་ཁྱད་པར་ཡོངས་སུ་རྫོགས་པར་མཛད་པས་ན་འགྲོ་བ་ཐམས་ཅད་ཉེ་བར་འཚོ་བར་ཤེས་པར་བྱའོ། ། དེ་དག་ལ་སོགས་པ་རྣམ་པར་བྱང་བ་རྣམ་བ་ཐ་དད་པ་ཚད་མེད་པ་ཤིན་ཏུ་བསྟན་པའི་སྒོས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་འབྱུང་ཞིང་ཡང་དག་པར་འགྲུབ་པ་བསྟེན་པ་ཤེས་བར་བྱའོ། །
Tibetan Source	《ཕལ་ཆེན་ང་པ་》ཤ་111བ་3ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number