9945

Tibetan	ཕྱི་བསྐྱེད་རིམ་རྡོ་རྗེ་སློབ་དཔོན་གྱི་དབང་ལུས་རྣམ་པར་དག་པ་བཅུ་གཅིག
Tibetan Alternate
Tibetan Definition	དེ་ཡང་། བླ་མ་བརྒྱུད་པའི་རིམ་པའི་མན་ངག་ལས་བྱུང་བ་སྟེ། 1. ཆུའི་དབང་ནི་མི་བསྐྱོད་པའི་ངོ་བོ་མེ་ལོང་ལྟ་བུའི་ཡེ་ཤེས་སོ། །དེ་བཞིན་གཤེགས་པ་ཐམས་ཅད་འོད་དུ་ཞུ་བའི་ཡེ་ཤེས་ཀྱི་བདུད་རྩིའི་ཆུས་དབང་བསྐུར་བ་ནི་དཔེར་ན་ཕྱི་རོལ་གྱི་དྲི་མ་དག་པར་བྱེད་པ་ལྟར་འདིར་ཡང་ཡེ་ཤེས་ཀྱི་ཆུས་མ་རིག་པའི་དྲི་མ་དག་པ་དང་ཉོན་མོངས་པའི་སྒྲིབ་པ་དག་པར་བྱེད་པ་དང་། ཤེས་བྱའི་སྒྲིབ་པ་དག་པར་བྱེད་པ་སྟེ། དེས་ཁྱོད་ཀྱིས་མ་རིག་པ་ཡེ་ཤེས་གང་གིས་དག་པར་བྱེད་པའོ་ཞེས་ཁོང་དུ་ཆུད་པར་བྱའོ། ། 2. ཅོད་པན་གྱི་དབང་ནི་རིན་ཆེན་འབྱུང་ལྡན་གྱི་ངོ་བོ་མཉམ་པ་ཉིད་ཡེ་ཤེས་ཀྱི་རང་བཞིན་གྱིས་དབང་བསྐུར་བ་ནི་མ་འོངས་པའི་དུས་ན་སངས་རྒྱས་ཀྱི་དབུའི་གཙུག་ཏོར་གྱི་ས་བོན་ནམ་ཆེ་བའི་ཡོན་ཏན་གྱི་ཡིད་བཞིན་གྱི་ནོར་བུ་ལྟར་འབྱུང་བའི་ས་བོན་དུ་སྟེར་བའོ། ། 3. རྡོ་རྗེའི་དབང་བསྐུར་བ་ནི་འོད་དཔག་ཏུ་མེད་པའི་ངོ་བོས་སོ་སོར་རྟོག་པའི་ཡེ་ཤེས་ཀྱི་རང་བཞིན་རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་འཁོར་ལོ་རྣམ་པར་དག་པའི་ཚུལ་དུ་རྡོ་རྗེ་སོར་བཅུ་གཉིས་པ་ལྟེ་བ་ཟླུམ་པོ་ཆོས་ཀྱི་དབྱིངས་མཐའ་ཐམས་ཅད་དང་བྲལ་བའོ། ། 4. དྲིལ་བུའི་དབང་བསྐུར་བ་ནི་དོན་ཡོད་གྲུབ་པའི་ངོ་བོ་བྱ་བ་ནན་ཏན་གྱི་ཡེ་ཤེས་རང་བཞིན་ཏེ། དགོངས་པ་སྔ་མའི་ཚུལ་གྱིས་རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་འཁོར་ལོ་རྣམ་པར་དག་པའི་ཚུལ་གྱིས་སོར་བཅུ་གཉིས་པའོ། ། ཁ་ཐུར་དུ་བལྟས་པ་ནི་ཤེས་རབ་ཀྱི་རང་བཞིན་པདྨ་མཚོན་པར་བྱེད་པའོ། ། དབྱེར་མི་བྱེད་པའི་གནས་ཆོས་ཀྱི་འབྱུང་གནས་རྟོགས་པའི་ཕྱིར་དྲིལ་བུའི་སྟེང་དང་འོག་གི་ཆ་ལ་རྡོ་རྗེའི་ཕྲེང་བ་ཟུང་གིས་མཛེས་པའོ། ། སྒྲ་དཀྲོལ་བ་ནི་ཐབས་དང་ཤེས་རབ་ཀྱི་རྡོ་རྗེ་དང་པདྨ་མཉམ་པར་སྦྱོར་བ་སྟེ། ཆོས་ཐམས་ཅད་རྟེན་ཅིང་འབྲེལ་བར་འབྱུང་བས་ན་རང་གི་ངོ་བོ་མ་སྐྱེས་པ་སྟེ། སྒྲ་དེ་ཡང་བཙལ་ན་གང་ནས་ཀྱང་མི་རྙེད་པ་སྟེ། ཡང་དག་པ་རང་བཞིན་མེད་ལ། དེ་བཞིན་དུ་ཆོས་ཐམས་ཅད་རང་བཞིན་མེད་པར་རྟོགས་པར་བྱེད་པའོ། ། 5. མིང་གི་དབང་བསྐུར་བ་ནི་རྣམ་པར་སྣང་མཛད་ཀྱི་ངོ་བོ་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ཏེ། ཆོས་ཐམས་ཅད་སྒྲོ་མ་བཏགས་པ་དང་། མིང་མེད་མཚོན་པོར་བྱེད་པའི་ཕྱིར་སྔར་གྱི་མིང་དོར་བའོ། ། ཕྱིས་ཀྱི་མིང་འདོགས་པ་ནི་མེ་ཏོག་གར་ལྟུང་བའི་རང་གི་རིགས་ཀྱི་ལྷ་ལས་མིང་དྲངས་ནས་འདོགས་པ་སྟེ། བླ་ན་མེད་པའི་བྱང་ཆུབ་ཀྱི་གོ་འཕང་ལ་འོས་པའམ་སྐལ་པ་དང་ལྡན་ནོ་ཞེས་བྱ་བའོ། ། དེ་ལྟར་དབང་པོ་ལྔ་པོ་དེ་དག་ནི་དེ་བཞིན་གཤེགས་པ་ལྔའི་ངོ་བོ་ཡིན་པས་རིགས་ལྔའི་དབང་ཞེས་བྱ་བའོ། །དེ་བཞིན་གཤེགས་པ་ལྔ་དང་ཡེ་ཤེས་ལྔའི་རང་བཞིན་གྱིས་མ་རིག་པ་བཀག་ནས་རིག་པའི་ངོ་བོར་བྱས་པས་ན་རིག་པའི་དབང་ལྔ་ཞེས་བྱའོ། ། 6. རིགས་གསུམ་དམ་ཚིག་ནི། (1)རྡོ་རྗེ་རིགས་ཀྱི་དམ་ཚིག་རྡོ་རྗེ་ནི་གཉིས་སུ་མེད་པའི་ཡེ་ཤེས་གཉིས་སུ་མེད་པའི་ཡེ་ཤེས་ཟུང་དུ་འཇུག་པ་བརྗོད་པར་བྱ་བ་ཡིན་པས་ཁྱོད་ཀྱིས་ནམ་ཡང་མི་འབྲལ་བར་བྱ་ཞིང་རྟོགས་པར་བྱ་བའི་དམ་ཚིག་གོ (2) དྲིལ་བུའི་དབང་རིགས་ཀྱི་དམ་ཚིག་ལ་དྲིལ་བུ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་རང་བཞིན་ཏེ། རྗོད་པར་བྱ་བ་ཡིན་པས་ཁྱོད་ཀྱིས་སེམས་ཅན་རྣམས་ལ་བསྒྲག་པར་བྱ་བའོ་ཞེས་རྟོགས་པར་བྱ་བ་ནི་དམ་ཚིག་གོ ། (3)ཕྱག་རྒྱ་རིགས་ཀྱི་དམ་ཚིག་ནི་རང་ཉིད་ཡི་དམ་ལྷའི་ངོ་བོར་རྟོགས་པར་བྱ་བ་ནི་དམ་ཚིག་གོ ། 7. སྣོད་དུ་བྱ་བ་ནི། དཀྱིལ་འཁོར་གྱི་དེ་ཁོ་ན་ཉིད་དང་། དཀྱིལ་འཁོར་གྱི་རྣམ་པར་དག་པ་དང་། ལྷའི་དེ་ཁོ་ན་ཉིད་དང་། ལྷའི་རྣམ་པར་དག་པ། སློབ་དཔོན་གྱི་ལས་དང་། དཀྱིལ་འཁོར་བསྒྲུབ་པའི་ལས་དང་། བཟའ་བ་ལ་སོགས་པའི་དམ་ཚིག་གོ ། 8. རྗེས་སུ་གནང་བ་ནི། སེམས་ཅན་ཀུན་ལ་ཕན་པའི་ཕྱིར། ། སེམས་ཅན་ཀུན་ལ་ཐམས་ཅད་དུ། ། ཇི་ལྟར་འདུལ་བ་སྣ་ཚོགས་ལ། ། ཆོས་ཀྱི་འཁོར་ལོ་བསྐོར་བར་གྱིས། ། ཁྱོད་ཀྱིས་སེམས་ཅན་རྣམས་ལ་ཆོས་བཤད་པ་དང་། དབང་བསྐུར་བར་གྱིས་ཤིག་པའི་གནང་བ་སྟེ། དེ་དག་བྱ་བའི་སྐལ་བ་དང་ལྡན་པར་རྟོགས་པར་བྱ་བའོ།། 9. རྡོ་རྗེའི་བརྟུལ་ཞུགས་ཀྱི་དབང་ནི། ཕྱི་རོལ་གྱི་དཀའ་ཐུབ་ཀྱི་བརྟུལ་ཞུགས་སྤངས་ཏེ་གཉིས་སུ་མེད་པ་འདི་ནི་ཁྱོད་ཀྱི་བརྟུལ་ཞུགས་ཡིན་པས་ཟུང་ཤིག་པའི་དོན་དུ་རྡོ་རྗེ་སྟེར་བའོ། ། 10. ལུང་བསྟན་པ་ནི། ཁྱོད་ཉིད་རྡོ་རྗེ་སེམས་དཔའ་སྟེ། སངས་རྒྱས་ཀུན་དང་མཚུངས་པའོ་ཞེས་ཁོང་དུ་ཆུད་པར་བྱའོ། ། ། 11. དབུགས་དབྱུང་བ་ནི། འདི་ནས་བཟུང་ནས་སླར་ངན་སོང་དུ་མི་ལྟུང་ངོ་ཞེས་བྱ་བའོ། ། དྲུག་པོ་འདི་དག་ནི་རྡོ་རྗེ་སེམས་དཔའི་ངོ་བོ་ཡིན་པས་ན་རྡོ་རྗེ་སེམས་དཔའི་དབང་ཞེས་བྱའོ། ། བུམ་པའི་བྱ་བ་ཐམས་ཅད་ལ་འཇུག་པ་ཡིན་པས་ན་བུམ་པའི་དབང་ཞེས་བྱ་བའོ། ། སླར་ངན་སོང་དུ་མི་སྐྱེ་བས་ན་ཕྱིར་མི་ལྡོག་པའི་དབང་ཞེས་བྱ་བའོ། ། ཆོས་བཤད་པའི་སྐལ་པ་དང་ལྡན་པས་ན་སློབ་དཔོན་གྱི་དབང་ཞེས་བྱ་བའོ། །ཡེ་ཤེས་ལྔའམ་རིགས་ལྔའི་ངོ་བོར་ལུས་དག་པར་བྱེད་པས་ན་ལུས་རྣམ་པར་དག་པའི་དབང་ཞེས་བྱ་བའོ།
Tibetan Source	《བསྟན་འགྱུར་རྒྱུད་ཅུ་པ་》ཤ་170 བ་3 ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number