9999

Tibetan	ཤེས་རབ་རང་བྱུང་གི་སྒྲོན་མ་རྒྱས་པར་བཤད་པ་བཅུ་གཅིག
Tibetan Alternate
Tibetan Definition	དེ་ཡང་། ཚིག་དོན་མཛོད་ལས་བྱུང་བ་སྟེ། 1. ངོ་བོ་ནི། སྒྲོན་མ་གཞན་ལ་ཁྱབ་བྱེད་དུ་ཡོད་པའི་ཤེས་རབ་ཀྱི་རྣམ་པ་སྟེ། སྒྲོན་མ་འབར་བ་ལས། ཤེས་རབ་རང་བྱུང་སྒྲོན་མ་ནི། འདི་ལྟར་སྒྲོན་མ་ཐམས་ཅད་ཀྱི། ། ཤེས་བྱེད་ཚུལ་དུ་གནས་པས་ན། ། ཀུན་ཀྱི་ཆ་ལ་འདི་ཉིད་པས། ། འབྱེད་པའི་ཤེས་རབ་ཉིད་པས་ནི། ། འབྱེད་པ་མེད་པའི་ཚུལ་དུ་གནས། ། ཆ་ཕྲ་བསྐྱེད་པའི་ངོ་བོར་ནི། ། ཡེ་ཐོག་ཉིད་ནས་གནས་པའོ། ། ཞེས་སོ། ། 2. ངེས་ཚིག་ནི། དེ་ཉིད་ལས། ཤེས་པ་དངོས་དང་དངོས་མེད་པའི། ། སྣང་བ་ཀུན་ལ་རབ་ཞུགས་ནས། ། སྤྱི་ཡི་དོན་རྣམས་ཤེས་པ་དང་། ། མ་བཙལ་བཞག་པའི་གདེང་རྙེད་དེ། ། རང་གི་ཡེ་ཤེས་ཚད་རྣམས་ཤེས། ། རང་བཞིན་དག་པའི་ཆོས་སྐུ་ནི། ། སུས་མ་རྙེད་པར་རང་རིག་པས། ། ཀུན་ལས་ཁྱད་འཕགས་རབ་ཏུ་སྣང་། །གཉིས་སུ་མེད་པར་སྣང་བར་བྱེད། ། མོས་ནི་རང་ངོ་ཁྱབ་པའོ། ། 3. མཚན་ཉིད་ནི། སྤྲོས་བྲལ་རང་བྱུང་གི་ཡེ་ཤེས་གང་ཞིག་ཆོས་ཅན་དང་ཆོས་ཉིད་རང་དང་སྤྱིའི་ཆོས་མཚན་ཉིད་མཚན་ཉིད་ཕྱིན་ཅི་མ་ལོག་པར་རྟོགས་པས་ཤེས་བྱ་ཤེས་ཤིང་སྤང་བྱ་སྤོང་བ་སྟེ། སྒྲོན་མ་འབར་བ་ལས། སྣང་དང་མི་སྣང་ཆོས་རྣམས་ཀུན། །རང་བཞིན་མེད་པར་སུས་ཤེས་པ། །འདི་ནི་དེ་ཡི་མཚན་ཉིད་དོ། །ཞེས་པ་དང་། ཐལ་འགྱུར་ལས། ཤེས་རབ་དག་གི་མཚན་ཉིད་ནི། ། མཁས་པ་ཚིག་འཇུག་གཞི་མ་སྡུད། ། ཉོན་མོངས་ལས་དང་བག་ཆགས་སྲེག ། སྨིན་བྱེད་འཁོར་འདས་སྲོག་གཅོད་པའོ། ། ཞེས་སོ། ། 4. དབྱེ་བ་ནི། དེ་ལ་ལྔ་སྟེ། གཞི་གནས་རང་བྱུང་གི་ཤེས་རབ་ཀྱིས་ཆོས་ཐམས་ཅད་ཀྱི་རྟེན་བྱེད་ལ། སྣང་བ་ཅེར་འཛིན་གྱི་ཤེས་རབ་ཀྱིས་དབྱིངས་རིག་ཐད་ཀར་རྟོགས་པ། དྲན་པ་འགག་མེད་ཀྱི་ཤེས་རབ་ཀྱིས་མཉམ་གཞག་ཏུ་གསལ་དངས་ཕྱེད་པ། སོ་སོར་རྟོག་པའི་ཤེས་རབ་ཀྱིས་སྤྱི་དང་རང་གི་མཚན་ཉིད་ཤེས་པ། འཇུག་བྱེད་རྣམ་གསུམ་གྱི་ཤེས་རབ་ཀྱིས་ཐོས་བསམ་སྒོམ་པའི་མཚམས་ཕྱེད་པ་སྟེ། སྔ་མ་ལས། དབྱེ་བ་རྣམ་པ་ལྔ་ཡིན་ཏེ། ། གཞི་གནས་རང་བྱུང་ཤེས་རབ་ཀྱིས། ། ལུས་སོགས་ཆོས་ཀྱི་རྟེན་རྣམས་བྱེད། ། སྣང་བ་ཅེར་འཛིན་ཤེས་རབ་ཀྱིས། །དབྱིངས་དང་རིག་པའི་དྲན་པ་འཛིན། ། དྲན་པ་འགག་མེད་ཤེས་རབ་ཀྱིས། ། ཤེས་པ་རྩེ་གཅིག་ཡུལ་རྣམས་སྡུད། ། སོ་སོར་རྟོག་པའི་ཤེས་རབ་ཀྱིས། ་། སྤྱི་དང་རང་གི་མཚན་ཉིད་འབྱེད། ། འཇུག་བྱེད་རྣམ་གསུམ་ཤེས་རབ་ཀྱིས། ། རང་བཞིན་བར་དོར་གཏན་ལ་འབེབས། །ཞེས་སོ། ། 5. རྟེན་ནི༑ སྣང་སྲིད་འཁོར་འདས་ཀྱིས་བསྡུས་པའི་ཆོས་དང་རང་གི་མཚན་ཉིད་རྣམས་ལ་ཤེས་བྱ་དང་ཤེས་བྱེད་དུ་བརྟེན་ལ། རང་བྱུང་གི་ཡེ་ཤེས་ལ་ལྡན་པ་དང་། ལྡན་ཆོས་སུ་ངོ་བོ་གཅིག་པར་བརྟེན་པ་སྟེ། ཐལ་འགྱུར་ལས། ཤེས་རབ་རང་བྱུང་བརྟེན་པ་ནི། ། ཚིག་དང་ཡིན་མིན་རྟོག་པ་དང་། ། གྲུབ་པའི་མཐའ་དང་ལྟ་སྒོམ་དང་། ། ཆོས་ཉིད་ལ་ནི་བརྟེན་པའོ། །ཞེས་སོ། ། 6. སྒོ་ནི། དབང་པོ་ལྔ་སྟེ། སྒྲོན་མ་འབར་བ་ལས། འཆར་བྱེད་སྒོ་ནི་དབང་པོ་ལྔ། ། ཁྱད་པར་སྣ་ནས་འཆོར་བར་བྱེད། ། དེ་རྟགས་མཚན་མོའི་དུས་ཉིད་དུ། ། གློ་དང་སྦྲིད་པ་དྲག་པོ་དང་། ། ཤིན་ཏུ་གློ་དྲག་བུས་པའི་ཚེ། ། དམར་ལ་དྭངས་པའི་འོད་ཟེར་ནི། ། མེ་སྟག་བཞིན་དུ་རྣམ་པར་འཕྲོ། ། དེ་ཡི་ཚད་དང་རྟགས་དེ་ཡིས། ། འཆར་བར་བྱེད་པའི་སྒོ་ངོས་ཟིན། ། ཞེས་སོ། ། 7. ཡུལ་ནི། རང་ངོའི་ཡུལ་རིག་པ་འཇུག་ཡུལ་ཆོས་དང་ཆོས་ཉིད་ཐམས་ཅད་ཡིན་ཏེ། ཐལ་འགྱུར་ལས། ཤེས་རབ་ཡུལ་ནི་ཚིག་དང་དོན། ། ཚིག་དོན་འབྲེལ་པར་འདོད་པ་ཡི། ། མཚོན་པས་ཤེས་དང་བརྗོད་པས་སོ། ། མཚོན་པ་དཔེ་དང་བརྡ་མཚོན་དང་། ། ཚིག་གིས་མཚོན་པ་མཐའ་མར་བརྗོད། །བརྗོད་པས་ཤེས་པ་ཐ་སྙད་དང་། ། ངོ་སྤྲད་པ་དང་འཁྲིད་པ་དང་། ། ལ་བཟླ་ཤན་འབྱེད་དག་གིས་སོ། ། ཞེས་སོ། ། 8. གནས་ནི། ངོ་བོ་སྙིང་གའི་འོད་རྩ་བཞི་དང་ཤེས་རབ་ཀྱི་རང་རྩལ་ཟེར་མདངས་ཀྱི་མ་རྩ་ཐམས་ཅད་ཀྱི་ནང་ན་གནས་པས་ལུས་ལ་ཁྱབ་སྟེ། གང་དུ་རིག་ཀྱང་ཤིས་པས་ཚོར་བ་དེས་ཤེས་ལ་རླུང་གི་རྟ་ལ་ཞོན་པས་རང་རྩལ་རྩ་འདབ་འགར་འཐུམས་དུས་ཤེས་པ་རྨུགས་ཤིང་མི་གསལ་ལ་རྩྭ་ཟང་ཐལ་དུ་རང་རྩལ་ཚུད་དུས་ཤེས་པ་གསལ་ལ་ངར་ཆེ་བ་སྟེ། མདོར་ན་ངོ་བོ་སྙིང་དང་རྩལ་རྩ་རྣམས་ན་རླུང་གི་རྟ་ལ་ཞོན་ནས་རྒྱུ་སྟེ། སྒྲོན་མ་འབར་བ་ལས། སྐྱེད་པར་བྱེད་པའི་རྩ་བཞི་ན། ། འགྱུ་དང་འགུལ་དང་འཕྲུག་པ་དང་། ། ཡང་ཞིང་བསྐྱོད་པའི་བདག་ཉིད་དུ། །ཙིཏྟའི་དཀྱིལ་འཁོར་ཉིད་དུ་འཁོར། ། དྭངས་མ་ཤེས་པའི་བཅུད་རྣམས་ནི། ། མེ་སྟག་ཡར་བའི་མཚན་ཉིད་དུ། ། ལྔ་བཞི་ལས་ཀྱི་རླུང་དང་བཅས། །ཤེས་པ་གསལ་གསལ་རིག་རིག་པོ། ། ཤེས་རབ་རྣམས་ཀྱི་རང་བཞིན་དུ། ། རོ་མ་རྐྱང་མ་ཀུན་འདར་མ། ། ཤེལ་བུག་ཁོག་པ་སྟོང་པའི་ནང་། །གསལ་བ་ཤེས་རབ་ཆེན་པོར་ཞུགས།་། མིང་གཞི་འདུས་པའི་ཡེ་གདངས་སུ། ། ཐམས་ཅད་འབྱེད་པའི་ངོ་བོར་ནི། ། ནས་ལུས་ཀྱི་ཆ་ལ་གནས། ། སྐབས་སུ་རླུང་གིས་རང་གཟུང་བས། ། ཤེས་པ་དྲན་མེད་རྨུགས་པར་ཡང་། ། ཤེས་རབ་རྩལ་རྣམས་རྒྱས་འཐུམས་པས། ། གསལ་བའི་ཆ་མེད་རྨུགས་པར་འགྱུར། ། རླུང་གིས་ཤེས་རབ་རྩལ་བསྐྱེད་ཚེ། ། སྔོན་མ་ཐོས་པའི་ཆོས་རྣམས་ཀྱང་། ། ཡིད་ལ་དྲན་ཞིང་གསལ་བར་འཆར། ། གསལ་དང་མི་གསལ་རྩལ་རྣམས་ནི། ། རླུང་གི་གཡོ་འགུལ་ཉིད་ལས་འབྱུང་། ། ལུས་དཀྱིལ་རྩ་ནང་གནས་པའོ། ། ཞེས་སོ། ། 9. ཚད་ནི། ཤེས་རབ་ལྔ་པོ་དེས་རང་རང་གི་འཇུག་ཡུལ་ལ་ཞུགས་པས་གདེང་ཚད་དུ་ལོངས་པའི་ཚད་དུ་ཕྱིན་པ་ནི། ཡང་དེ་ཉིད་ལས། གཞི་གནས་ཤེས་རབ་རབ་བྱུང་ཚད། ། ཆོས་ཀུན་མཉམ་པའི་ཉམས་སྐྱེས་ན། ། ཤེས་པ་བརྟན་པའི་གདེང་རྙེད་ཡིན། ། དེ་ཉིད་འགྱུར་བ་མ་ཡིན་པར། །རྟག་ཏུ་རྒྱུད་ལ་གནས་པ་ན། །འདི་ནི་གཞི་གནས་ཤེས་རབ་ཡིན། །འདི་ཡིས་ལུས་ཀྱང་ཡང་བ་དང་། ། ཤེས་པ་རྣམས་ནི་གསལ་བའོ། ། སྣང་བ་རེར་འཛིན་ཤེས་རབ་ཚད། ། ཅོག་གཞུག་ཉམས་སུ་མྱོང་བའི་རྟགས། ། ལུས་དཀྱིལ་ཁ་དོག་ལྔ་ཡི་འོད། །རྩོལ་བ་མེད་པར་ཕྱིར་ཤར་ནས། ། འདི་ལ་ཤེས་པ་རང་ས་ཟིན། ། ལུས་ཀྱང་ས་ལ་རེག་པ་མེད། ། འདི་ཡིས་ཤེས་པ་གར་གཏད་པའི། ། བེམས་པོ་རྣམས་ཀྱང་འགུལ་བར་ནུས། ། རང་རྩལ་འབྱོངས་པའི་ཚད་ཡིན་ནོ། ། དྲན་པ་འགག་མེད་ཤེས་རབ་ཚད། །ཤེས་པ་གཞན་ལ་འཇུག་པ་མེད། །གཅིག་པུར་འདུག་པར་དགའ་བ་དང་། ། དབེན་པའི་ས་ལ་རྟག་ཏུ་དད། །མི་དང་འགྲོགས་སྙིང་མི་འདོད་པར། །ཤེས་པ་རྩེ་གཅིག་འགྱུར་བ་མེད། ། གཞན་གྱིས་བརྗོད་པའི་གཏམ་ལ་ཡང་། ། གཉིས་སུ་འཛིན་པ་ཉིད་དང་བྲལ། ། ལྟ་བ་མི་འགྱུར་གདེང་ ཉིད་དུ། ། ནམ་མཁའ་དག་ལ་འགྲོ་བ་སྙམ། ། སེམས་དེ་གར་གཏད་ས་དེར་འགག །.ཕ་རོལ་རྣམས་ཀྱི་རྐྱེན་གྱིས་ཀྱང་། ། འདི་ལ་བསྒྱུར་དུ་ག་ལ་ནུས། ། བག་མེད་ཤེས་པ་བདེ་ཡངས་པ། ། འདི་ཉིད་སྐྱེས་པའི་མི་དེ་ནི། །དྲན་པ་འགག་མེད་ཤེས་རབ་ཟིན། ། སོ་སོར་རྟོག་པའི་ཤེས་རབ་ཚད། ། ། ཀུན་གཞི་དང་ནི་ཆོས་སྐུ་ཡང་། ། འདི་ལྟར་ཕྱི་བཏགས་འདི་ལྟ་བུ།་། ལུས་ལ་ཞེན་པའི་བློ་བྲལ་ནས། །རིག་པ་གར་གཏད་སར་གནས་ཏེ། ། ལུས་ནི་བེམས་པོ་བཞིན་དུ་འགྱུར། ། སེམས་དང་ཡེ་ཤེས་ཕྱེད་པ་ནི། ། འགྱུ་བྱེད་རྣམས་ཀྱི་སྒོ་ཡང་འགག ། འབྱུང་བ་དྭངས་སྙིགས་སུས་ཕྱེད་པ། ། རིགས་པའི་སྣང་བ་རང་འགགས་ཏེ། ། ལུ་གུ་རྒྱུད་ལ་བདེ་བར་སྤྱོད། ། དེ་བཞིན་འཁོར་འདས་སུས་ཕྱེད་པ། ། འཁྲུལ་པའི་བློ་རྣམས་སྐྱེ་མི་སྲིད། །གལ་ཏེ་སྐྱེས་ཀྱང་ཕན་གནོད་བྲལ། ། དེ་ལ་སོགས་པའི་རང་ཤེས་ཀྱིས། ། འཁོར་འདས་གཏན་ལ་ཕེབས་པ་ནི། ། སོ་སོར་རྟོག་པའི་ཤེས་རབ་བོ། ། འཇུག་བྱེད་རྣམ་གསུམ་ཤེས་རབ་ཚད། ། ཆོས་ཀུན་ཚིག་གཅིག་སྨོས་པ་ན། ། དེ་ཡི་གཞུང་ཀུན་ཤེས་པར་ནི། ། ཐོས་པའི་ཤེས་རབ་ཚད་དུ་ཕྱིན། ། ཤེས་པས་གང་ལ་བསམ་པ་ཡི། ། བཟུང་དེ་རྒྱུད་ལ་བདེ་ཤར་ནས། ། བསམ་པ་ཡང་ནི་དེ་བཞིན་འབྱོངས། ། གང་བྱུང་རྐྱེན་གྱིས་མི་གནོད་པར། ། འཁྲུལ་རྟོག་ཞེན་པ་རང་འགགས་ནས། ། འདིས་ནི་བསྒོམ་པའི་ ཤེས་རབ་རྙེད། ། ཅེས་སོ། ། 10. དཔེ་ནི། དཔེར་ན་སྣང་བར་བྱེད་པས་སྒྲོན་མེ་དང་འདྲ་ལ། མཆེད་ཅིང་སྤྲོ་ཐུབ་པས་སྨྲ་བ་ལ་མེ་སྟག་མཆེད་པ་ལྟ་བུ་སྟེ། མུ་ཏིག་ཕྲེང་བ་ལས། དཔེར་ན་སྲེག་བྱེད་སྒྲོན་མེ་ལྟར། ། ཤེས་པས་ཆོས་རྣམས་ཅིག་ཅར་རྟོགས། ། ཞེས་པ་དང་། སྒྲོན་མ་འབར་བ་ལས། ། དཔེར་ན་སྤྲ་བ་རླན་མེད་ལ། ། མེ་སྟག་ཕྲ་བ་ཉིད་ཕྲད་ཀྱང་། ། ཕྲ་བ་ཀུན་མཆེད་མེས་བསྲེགས་བཞིན། ། ཤེས་རབ་ཀྱིས་ནི་བག་ཆགས་བསྲེག ། འདི་ཀུན་ཤེས་རབ་སྒྲོན་མའོ། ། ཞེས་སོ། ། 11. གནད་ནི། དེ་ནས་གང་ལ་འཆར་བ་ཡུལ་གྱི་གནད་བསྟན་པ་ལ་གསུམ་སྟེ། ཡུལ་གྱི་གནད་སྤྱིར་བསྟན་པ། སྒྲོན་མའི་གནད་བྱེ་བྲག་ཏུ་བཤད་པ། དབྱིངས་རིག་གནད་གཏན་ལ་དབབ་པའོ། ། དང་པོ་ནི་ཕྱིའི་ཡུལ་ནམ་མཁའ་སྟོང་པ་དང་། ནང་གི་ཡུལ་དབྱིངས་རྣམ་པར་དག་པའི་སྒྲོན་མ་གཉིས་ནི། རིག་པ་ལུ་གུ་རྒྱུད་འཆར་བའི་ཡུལ་དུ་གསལ་ཏེ། ཐལ་འགྱུར་ལས། དབྱིངས་ནི་ཕྱི་དང་ནང་དུ་སྟེ། ། ཕྱི་ནི་སྤྲིན་བྲལ་མཁའ་ལ་འཛིན། ། ནང་དབྱིངས་སྒྲོན་མ་ལམ་དུའོ། ། ཞེས་སོ། ། ཕྱིའི་ཡུལ་ནམ་མཁའ་སྟོང་པ་ལ་རིག་པ་གཏད་པས་དེ་མཚུངས་པའི་ཉམས་སྟོང་གསལ་རྣམ་དག་ཏུ་འཆར་བའི་ཕྱིར་ནམ་མཁའ་བཤད་ཏེ། དེ་ཉིད་ལས། འདི་ཉིད་ཡུལ་གནད་འདི་ལྟ་སྟེ། ། སྤྲིན་བྲལ་ཕྱི་ཡུལ་སྟོང་པ་ལ། ། རྣལ་འབྱོར་ནམ་མཁའི་བྱ་ལམ་གནས། ། འདི་དང་མ་བྲལ་ཆོས་ཉིད་དོ། །
Tibetan Source	《ཀློང་ཆེན་མཛོད་བདུན་ག་པ་》ཤ་60 ན་2 ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number