10289

Tibetan	ཐིག་ལེ་སྟོང་པའི་སྒྲོན་མ་རྒྱས་པར་བཤད་པ་བཅུ་གསུམ།
Tibetan Alternate
Tibetan Definition	དེ་ཡང་། ཚིག་དོན་མཛོད་ལས་བྱུང་བ་སྟེ། 1. ངོ་བོ་ནི། རང་གསལ་ཀ་དག་སྟོང་པའི་རང་མདངས་སུ་གནས་ཏེ། སྒྲོན་མ་འབར་བ་ལས། ཐིག་ལེ་སྟོང་པའི་སྒྲོན་མ་ནི། ། ཆོས་རྣམས་ཀུན་གྱི་ཡིད་ཆེས་པས། ། འདི་ཉིད་སུ་ཡིས་ཤེས་པ་དེ། ། ཐིག་ལེའི་སྐུ་ལ་ལོངས་སྤྱོད་དེ། །གོམས་པ་རྣམས་ཀྱི་སྤྱོད་ཡུལ་ཐོབ། །དེ་ཕྱིར་དེ་ཡི་ངོ་བོ་ནི། ། ཉག་གཅིག་ཆ་ཕྲ་སྤྲོས་དང་བྲལ། ། སྟོང་པའི་མུ་བྲལ་རང་གསལ་ཆེ། ། རང་བཞིན་རང་གསལ་མཉམ་པ་ཉིད། ། མི་རྟོག་སྤྲོས་བྲལ་ཟླུམ་པོར་གནས། ། མ་བསྐུར་རང་དབང་བཞི་རྫོགས་ཕྱིར། ། དམར་པོ་རང་གསལ་ཡེ་ནས་དྭངས། ། དྲི་མ་མེད་ཅིང་ཀ་དག་པས། ། བོདག་འཆིང་ཉོན་མོངས་རྣམས་དང་བྲལ། ། རང་གིས་རང་གསལ་ངོ་བོ་སྟོང་། ། འདི་ནི་དེ་ཡི་ངོ་བོར་འདོད། །ཅེས་སོ། ། 2. ངེས་ཚིག་ནི། མུ་ཏིག་ཕྲེང་བ་ལས། ཐིག་ནི་འགྱུར་བ་ཡོད་མ་ཡིན། ། ལེ་ནི་ཁྱབ་ཅིང་ཡུལ་ལ་སྣང་། ། སྟོང་པ་དངོས་པོ་མཚན་མ་མེད། ། སྒྲོན་མས་མུན་སེལ་སྣང་བར་འགྱུར། ། ཞེས་པ་དང་། སྔ་མ་དེ་ཉིད་ལས། ཐིག་ནི་མི་འགྱུར་དྲང་པོ་ལ། ། ཡེ་ནས་བཅོས་པ་ཉིད་དང་བྲལ། ། ལེ་ནི་གདལ་བ་ཆེན་པོ་ལ། ། སྣང་བ་རྣམས་ནི་རང་སར་རྫོགས། ། སྟོང་པ་དངོས་པོ་འཛིན་པ་ནི། །ཡུལ་ལ་ཞེན་པའི་བློ་རྣམས་བཀག ། རང་བཞིན་སྟོང་པ་ཆེན་པོ་ཡི། ། གསལ་པར་རང་ཞེན་བློ་མི་སྣང་། ། སྒྲོན་མས་འོད་ལྔ་སྣང་བར་ནི། ། བྱས་ཏེ་རང་ངོ་ གསལ་རིག་བཅས། ། འདི་རྣམས་ངེས་པའི་ཚིག་ཡིན་ནོ། ། ཞེས་སོ། ། 3. མཚན་ཉིད་ནི་ཚོན་གང་འོད་ཀྱི་ཐིག་ལེ་གང་ཞིག་རང་གསལ་ཟླུམ་ཞིང་ཟུག་རྔུ་དང་བྲལ་བ་སྟེ། ཐལ་འགྱུར་ལས། ཐིག་ལེ་སྟོང་པའི་མཚན་ཉིད་ནི། ། ཟླུམ་ཞིང་རང་བཞིན་ཀུན་གསལ་བ། ། དམར་དྭངས་ཁ་དོག་གསལ་བའི་འོད། ། སྤྲོས་དང་བཅས་ཏེ་མཆེད་པར་བྱེད། །ཅེས་པ་དང་། སྒྲོན་མ་འབར་བ་ལས། མཚན་ཉིད་སྟོང་པ་གསལ་བས་ཁྱབ། ། རང་ངོ་ལུས་ཀྱི་མཐའི་རྣམས་ཟད། ། ཅེས་སོ། ། 4. དབྱེ་བ་ནི་ལྔ་སྟེ། གཞི་གནས་རིག་པའི་ཐིག་ལེ་སྟོང་པ་སྙིང་ག་ན་གནས། ལུས་གནས་རྩའི་ཐིག་ལེ་སྟོང་པ་རྩ་རྣམས་ན་གནས། ཀུན་རྫོབ་རྒྱུའི་ཐིག་ལེ་རོ་མ་ན་གནས། དོན་དམ་སྤྲོས་མེད་ཀྱི་ཐིག་ལེ་སྟོང་པ་རྐྱང་ན་གནས། རང་བྱུང་འབྲས་བུའི་ཐིག་ལེ་སྟོང་པ་མིག་ན་གནས་པའོ། ། འདི་དག་ཀྱང་རང་ངོ་ཡེ་ནས་སྟོང་པས་ཐིག་ལེ་སྟོང་པའི་ཁོངས་སུ་གཏོགས་པའི་ཕྱིར་དབྱེ་བ་ཙམ་དུ་ཟད་མོད། དོན་ལ་མིག་གཉིས་ལ་ལྟོས་ནས་གཉིས་སུ་འགྱུར་བ་ཁོ་ནའོ། ། 5. རྟེན་ནི། ངོ་བོ་འོད་རྩ་གཉིས་ལ་བརྟན། སྣང་བ་ཡེ་ཤེས་ལྔ་ལ་བརྟེན། རྣམ་པ་ཐིག་ལེ་གསལ་བ་ལ་བརྟེན། འགྲོ་འོང་རང་གནས་རླུང་ལ་བརྟེན། ཡུལ་ནམ་མཁའ་སྟོང་པ་ལ་བརྟེན། གནས་མིག་གི་དབུས་ན་བརྟེན། ། སྐྱེ་མཆེད་ངེས་པ་མཐོང་བྱེད་ཀྱི་རྣམ་ཤེས་ལ་བརྟེན་པ་སྟེ། ཐལ་འགྱུར་ལས། ཐིག་ལེ་སྟོང་པའི་བརྟེན་པ་ནི། ། རྣམ་ཤེས་ཉིད་དང་བར་སྣང་དང་། ། རྩ་དང་རླུང་དང་ཐིག་ལེ་དང་། ། ཡེ་ཤེས་དག་ལ་བརྟེན་པའོ། ། ཞེས་སོ། ། 6. གནས་ནི༔ ངོ་བོའི་གནས་སྙིང་ག ། གདངས་ཀྱི་གནས་མིག་གཉིས་ཏེ། སྒྲོན་མ་འབར་བ་བ་ལས། སེམས་ཅན་ཀུན་གྱི་ལུས་ཀྱི་དཀྱིལ། ། ཙིཏྟ་རིན་ཆེན་གཞལ་ཡས་ལས། ། ཞེས་སོ། ། 7. ཡུལ་ནི། འོད་ལྔར་གསལ་བ་དང་། དེ་ལས་མཆེད་པའི་ཕྱེད་སྐུ་དང་། སྐུ་རྐྱང་དང་། ཡབ་ཡུམ་དང་། ཚོམ་བུ་དང་། དཀྱིལ་འཁོར་དང་། དཀྱིལ་འཁོར་ཆེན་པོའི་སྣང་བ་དྲུག་དང་ལོངས་སྐུ་ལས་སྤྲུལ་སྐུ་དེ་ལས་ཟེར་གྱི་སྐུ་འཕྲོ་བས་གསུམ་དང་། ཞི་ཁྲོ་གཉིས་དང་། ཐུབ་པ་དྲུག་གི་རྣམ་པར་ཡུལ་དུ་སྣང་བ་ཐམས་ཅད་ཀྱི་ནམ་མཁའ་དག་པས་གསལ་བ་དང་། མི་དག་པས་དྲོ་བ་དང་། ཆུ་དག་པས་བསེལ་བ་དང་། ས་དག་པས་ཡང་བ་དང་། རླུང་དགུ་པས་གཡོ་བའི་རང་བཞིན་ཅན་ཏེ། དེ་ཡང་ཐལ་འགྱུར་ལས། ཐིག་ལེའི་ཡུལ་ནི་ཁ་དོག་སྟེ། ། ལྔ་དང་དྲུག་དང་གསུམ་གཅིག་དྲུག ། གསལ་དང་དྲོ་དང་བསིལ་བ་དང་། ། ཞིང་གཡོ་བའི་བདག་ཉིད་འཛིན། ། དོན་དག་ཆོས་ཉིད་ཡང་འབྱུང་པའོ། ། ཞེས་སོ། ། 8. སྒོ་ནི་དེ་ཉིད་ལས། རྐྱེན་གྱིས་མ་བསྒྲིབས་སེམས་ཅན་མིག ། ཙཀླུ་ཞེས་པའི་སྒོ་ནས་ནི། ། ཉི་མའི་དཀྱིལ་འཁོར་བཞིན་དུ་ཡང་། ། རང་གི་འོད་དང་ཟེར་ཉིད་དུ། ། རང་ཆས་རྣམས་སུ་རྣམ་པར་སྣང་།། ཞེས་སོ། ། 9. རང་བཞིན་ནི། ཀ་དག་གི་རང་སྣང་སུས་ཀྱང་མ་བྱས་པར་རང་སྣང་བ་སྟེ། དེ་ཉིད་ལས། ཐོག་མའི་ཀ་དག་ཆེན་པོ་ལ། །རང་བཞིན་ཉིད་ནི་འདི་ལྟ་བུ། ། སུས་ཀྱང་མ་བྱས་རང་གསལ་བར། ། ཡེ་ཉིད་ནས་ནི་རང་བཞིན་ནོ། ། ཞེས་སོ། ། 10. ཚད་གང་ཞེ་ན། ཚད་ནི། ཉམས་སུ་བླངས་དུས་ནམ་མཁར་སྣང་ལ་གོམས་པའི་ཚད་དེ། སྒྲོན་མ་འབར་བ་ལས། ཐིག་ལེ་སྤྲོ་དང་བསྡུ་མེད་པར། ། བར་སྣང་ཉིད་དུ་སུས་ཟིན་པ། ། དེ་ཡི་ཚད་དུ་དེ་གྱུར་ཏོ། ། ཞེས་སོ། ། 11. དངོས་གང་ཞེ་ན། དངོས་ནི། མིག་བཙིར་དུས་སྣང་བའི་འོད་དམར་སེར་ཚོན་གང་བ་དེ་ཡིན་ཏེ། དེ་ཡང་འགྲོ་དྲུག་སོ་སོའི་སྣང་ཚུལ་ནི། ལྷ་ལ་ཕྱིར་སྣང་དུ་བལྟར་ཡོད་པ་ལས་འདོད་ལྷ་རྣམས་ལ་རང་མཐོ་གང་། གཟུགས་ཁམས་པ་རྣམས་ལ་རང་ཁྲུ་གང་། ལྷ་མིན་རྣམས་ལ་རིགས་གཉིས་ལས་ལྷའི་རིགས་ཅན་དུ་གཏོགས་པ་རྣམས་ལ་འོད་ཟེར་རབ་ཏུ་གསལ་བ་ཕྱག་གང་། ། གཞན་རྣམས་ལ་ཕྲ་མོ་སོར་བཞི་པ། མི་རྣམས་ལ་མཐེབ་གང་། དུད་འགྲོ་རྣམས་ལ་རང་གནས་ཙམ་ལས་བལྟར་མེད་དོ། ། ཡི་དྭགས་རྣམས་ལ་རང་ངོ་ ཕྲ་ཞིང་འཕྲིག་པ་ཏིལ་འབྲུ་ཙམ། དམྱལ་བ་རྣམས་ལ་རང་གནས་རྟ་ཇའམ་ཏིལ་ཉག་ཡང་ཆུང་ཙམ་མོ། ། ཞེས་སོ། ། 12. དཔེ་ནི་མུ་ཏིག་ཕྲེང་བ་ལས། ། དཔེར་ན་རྨ་བྱའི་མདོངས་ལྟ་བུ། ། ཞེས་དང་། སྒྲོན་མ་འབར་བ་ལས། དཔེར་ན་རྨ་བྱའི་མདོངས་དང་མཚུངས། ། དེ་བཞིན་ཕྲ་བའི་མིག་དང་ནི། ། ཡང་ན་དེ་བཞིན་ཉ་ཡི་མིག་། དེ་བཞིན་སྲོག་ཆགས་རྐུན་མོའི་མིག ། འདི་རྣམས་བཞིན་དུ་གནས་པའོ། ། ཞེས་སོ། ། 13. གནད་དེ་ཉམས་སུ་ལེན་པའི་གནད་ནི། ཐལ་འགྱུར་ལས། ཐིག་ལེའི་སྒྲོན་མ་བལྟེམ་པ་གནད། ། རྩེ་དང་མཐེབ་མཛུབ་མ་བྲལ་བས། ། ཡེ་ཤེས་གོང་དུ་འཕེལ་བའི། ། ཞེས་པ་དང་། སྔ་མ་དེ་ཉིད་ལས། རང་གི་མཐེབ་དང་མཛུབ་མོ་ཡིས། ། ཙ ཀྴ྄ུའི་ཕུག་དང་འགྲམ་བཙིར་ན། ། མངོན་དུ་སྣང་སྟེ་ཡིད་ཆེས་ཀྱིས། ། ཞེས་སོ། །
Tibetan Source	《ཀློང་ཆེན་མཛོད་བདུན་ག་པ་》ཤ་55བ་2ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number