10442

Tibetan	དངོས་པོ་བཅོ་ལྔ།
Tibetan Alternate
Tibetan Definition	དེ་ཡང་། འཕགས་པ་དམ་པའི་ཆོས་དྲན་པ་ཉེ་བར་གཞག་པ་ལས་བྱུང་བ་ཡོངས་སུ་ཤེས་པར་བྱ་བའི་དངོས་པོ་སྟེ། 1.དང་པོ་ཁོ་ནར་དངོས་པོ་གོས་ངུར་སྨྲིག་ཉིད་ཡོངས་སུ་ཤེས་པར་བྱ་སྟེ། གང་རྒྱགས་པ་ཡང་དག་པར་སྐྱེད་པར་མི་བྱེད་པའི་གོས་ངུར་སྨྲིག་གི་རྣམ་པ་དེ་ལྟ་བུ་བགོ་བར་བྱའོ། ། དེ་ཅིའི་ཕྱིར་ཞེ་ན། གོས་ངུར་སྨྲིག་གི་རྒྱགས་པས་མྱོས་པ་ནི་ལུས་བོང་ལྟར་སྤྱོད་ཅིང་འགྲོ་བ་འབྱེད་པར་བྱེད་པ་ཡིན་ལ། རྒྱུགས་པའི་ལུས་དེ་སྒེག་པ་ལྷུར་ལེན་པར་འགྱུར་རོ། ། དེ་ནི་དགེ་བའི་ཆོས་སྒྲུབ་པར་མི་བྱེད་ལ། བུད་མེད་ལ་ལྟ་བ་ལྷུར་ལེན་པར་བྱེད་དོ། ། དེ་རྒོད་པ་ལ་འཇུག་པར་བྱེད་དེ། དེ་ལྟར་སེམས་ཡང་བ་གཞན་གང་ཡིན་པ་དེའང་གོས་ཀྱིས་རྒྱགས་པར་འགྱུར་རོ། ། དེ་ལྟ་བས་ན་བགོ་བར་བྱ་བ་དེ་ནི་གང་གིས་དྲོ་བ་དང་། གྲང་བའི་འཇིགས་པར་མི་འགྱུར་ཞིང་། གང་གིས་ལུས་གཡོག་པ་ཙམ་དུ་གྱིས་ཤིག་དང་། དེ་ནི་བག་མེད་པའི་འགྲོ་བའི་དབང་དུ་མི་འགྱུར་ཞིང་། འཆི་བའི་དུས་ནའང་འགྱོད་པ་ཡོད་པར་མི་འགྱུར་རོ། ། དངོས་པོ་ཡོངས་སུ་ཤེས་པར་བྱ་བའི་འདི་ནི་ཡོངས་སུ་ཤེས་པར་བྱ་བ་དང་པོ་ཡིན་ནོ། ། 2.དངོས་པོ་གང་ཡོངས་སུ་ཤེས་པར་བྱ་བ་གཉིས་པ་ནི་དགེ་སྦྱོང་ཆོག་ཤེས་པར་གནས་པས་ཤེས་པར་བྱ་བ་ཡིན་ཏེ། བདག་ཤེས་པའམ། རབ་ཏུ་བྱུང་བ་གང་གིས་ཚུལ་ཁྲིམས་དང་ལྡན་པར་འགྱུར་སྙམ་ནས། དེའི་རྗེས་སུ་འཇུག་པར་བྱེད་ལ་སྦྱིན་པ་དག་དང་། སྦྱིན་པ་པོ་ལས་མལ་སྟན་དང་། ན་བའི་གསོས་སྨན་གྱི་རྐྱེན་གྱི་ཡོ་བྱད་དང་། དེ་དང་མཐུན་པ་དང་། དེ་དང་འདྲ་བ་དག་ལེན་པར་མི་བྱེད་པ་དེ་ནི། དེ་ལྟར་བར་ཆད་འབྱུང་བར་མི་འགྱུར་ཏེ། འདི་ནི་ཡོངས་སུ་ཤེས་པར་བྱ་བའི་དངོས་པོ་གཉིས་པ་ཡིན་ནོ། ། 3.གཞན་ཡང་ཡོངས་སུ་ཤེས་པར་བྱ་བའི་དངོས་པོ་གསུམ་པ་ནི་དེའི་ཆགས་པས་མལ་སྟན་ཡིད་ལ་མི་བྱ་བ་དང་། དགོན་པ་དང་། ཚལ་དེ་དག་ན་གནས་པ་བཏང་ནས། གང་དུ་ཡོན་ཏན་དང་ལྡན་པར་འགྱུར་བ་མ་ཡིན་པ་བསོད་སྙོམས་སམ། ཐུག་པ་མང་པོ་སྦྱིན་པ་དེ་དག་འདོད་པས་གྲོང་གི་ནང་ངམ། གྲོང་ཁྱེར་གྱི་ནང་དུ་གནས་པ་དེ་ནི་དེའི་བར་ཚད་ཆེན་པོ་འབྱུང་ལ། དགེ་བའི་ཆོས་མི་སྒྲུབ་པ་དེ་དང་། ཆོག་མི་ཤེས་པ་དེ་དང་ཡང་དག་ལྡན་པར་འགྱུར་རོ། ། དགེ་སྦྱོང་གི་མཆོག་ནི་འདི་ཡིན་ཏེ། འདི་ལྟ་སྟེ། ཆོག་ཤེས་པ་དང་། བག་ཡོད་པའོ། ། ཆོག་མི་ཤེས་པ་དེ་དག་ཉིད་ལ་དགའ་བ་གང་ཡིན་པ་དེ་ནི་བསླུས་པར་འགྱུར་ཞིང་། མི་ངན་པ་དག་ལ་བར་ཆད་འབྱུང་སྟེ། ངན་སྐྱུགས་ཟོ་བ་དང་མཚུངས་སོ། ། 4.དངོས་པོ་བཞི་པ་ཡོངས་སུ་ཤེས་པར་བྱ་སྟེ། དེ་ཡང་གང་ཞེ་ན། འདི་ལྟ་སྟེ། ཁ་ཏོན་རབ་ཏུ་ཤེས་ལ། ཁ་ཏོན་འདོན་པ་དང་། ཡང་དག་པར་ལྡན་པ་ཤེས་པ་དེ་ཙམ་གྱིས་ཆོག་སྟེ་ལྷག་པར་མི་བསླབ་བོ། བདག་གིས་ལྷག་པར་སོ་སོར་ཤེས་ན། སྦྱིན་བདག་དང་། སྦྱིན་པ་པོ་དག་གིས་རྣ་ལམ་དུ་ཐོས་པ་ཡིན་ནོ་སྙམ་ནས། ན་བའི་གསོས་སྨན་རྐྱེན་གྱི་ཡོ་བྱད་རྣམས་བདག་ལ་སྦྱིན་པར་བྱེད་དོ། །དེ་བདག་ལ་བར་ཆད་དང་ལྡན་པར་འགྱུར་བས། དེ་ནི་བདག་ལ་འོས་པ་མ་ཡིན་ནོ་སྙམ་པའི་བདག་ཉིད་དེ་ནི་ཆོག་ཤེས་པ་ཡིན་ཏེ། དགེ་སློང་དེ་ལྟ་བུ་ནི་ཆོག་ཤེས་པ་ཡིན་ནོ། ། 5.དངོས་པོ་ལྔ་པ་ཡོངས་སུ་ཤེས་པར་བྱ་བ་ནི་གང་གིས་འདོད་པ་ཆུང་བ་དང་། ཆོག་ཤེས་པ་དང་། བག་ཡོད་པ་ལ་གནས་པ་ཡིན་ཏེ། དངོས་པོ་དེ་གང་ཞེ་ན། འདི་ལ་དགེ་སྦྱོང་གང་ཞིག་དགེ་འདུན་གྱིས་མངགས་སམ། ནད་པའི་ཕྱིར་རམ། ནོར་རྫས་ཀྱི་ཕྱིར་མངགས་པའམ། སྦྱིན་པ་པོ་དང་། སྦྱིན་བདག་གིས་དྲུང་དུ་མངགས་པ་ལས་ཁྱིམ་ལ་ཉེ་བར་སྟེན་པར་བྱེད་ལ། དེ་སྦྱིན་བདག་དེ་དག་གིས་དྲུང་ན་བཏུང་བ་དག་ཀྱང་འཐུང་ཞིང་འདུག་ན། དེ་ནི་དེའི་ཀུན་འབྱུང་བའི་བར་ཆད་དོན་མེད་པར་གྱུར་ལ། ལུས་ཡོངས་སུ་ངལ་བ་དོན་མེད་པ་དང་། རྩོལ་བ་དོན་མེད་པར་འགྱུར་རོ། ། དེ་ཅིའི་ཕྱིར་ཞེ་ན། དེའང་དེ་མངོན་པར་འདོད་ཅིང་རོ་ལ་འཆུམས་པས་ཉམས་པ་ཁྱིམ་དེ་ཉིད་དུ་འགྲོ་སྟེ། དེ་དེར་ཡང་བ་ཉིད་ཀྱིས་འགྲོ་བར་བྱེད་དོ། ། དེ་ནི་བདག་ལ་ཕན་པར་མི་བྱེད་ལ། ནད་པ་ལའང་ཕན་པར་མི་བྱེད་ཅིང་། ་དགེ་འདུན་གྱི་བྱ་བའང་སྒྲུབ་པར་མི་བྱེད་དོ། ། རྒྱུ་ཡང་བ་རྣམས་ཀྱི་ནང་ན་མཆོག་ནི་འདི་ཡིན་ཏེ། འདི་ལྟ་སྟེ། ཁྱིམ་གཅིག་ཏུ་འཇུག་ཅིང་བཟའ་བཏུང་ལ་དགའ་བ་ཉིད་དང་། གང་ཅུང་ཟད་སྨྲ་བ་དང་འཆལ་པ་ཡིན་ཏེ། ཆོས་གསུམ་པོ་དེ་དག་ནི་འཇིག་རྟེན་པ་དང་། འཇིག་རྟེན་ལས་འདས་པས་སྨད་པར་བྱ་བའི་གནས་ཡིན་ནོ། ། དེ་ལྟ་བས་ན་དེ་དག་ནི་ཆོག་ཤེས་པ་དང་། བག་ཡོད་པ་ལ་གནས་པ་དག་གིས་ཡོངས་སུ་སྤང་བར་བྱའོ། ། 6.དངོས་པོ་དྲུག་པ་ཡོངས་སུ་ཤེས་པར་བྱ་བ་ནི། དགེ་སྦྱོང་འདོད་ཆེན་ཆུང་བས་སམ། རབ་ཏུ་བྱུང་བ་བསོད་སྙོམས་ལ་ཡང་དག་པར་གནས་པས། ཇི་ཙམ་དུ་ཉིན་གཅིག་འགྲངས་པའི་བསོད་སྙོམས་དེ་ཙམ་ཞིག་བླང་བར་བྱ་ཡི། སང་དག་གི་ནི་སོ་སོར་བསགས་པར་མི་བྱའོ། ། དེ་ལ་མངོན་པར་ཆགས་པར་གྱུར་ན་དེའི་སེམས་དེ་ཡང་བར་འགྱུར་ཏེ། བསམ་གཏན་དང་། འདོན་པ་དག་ལ་སེམས་དང་བ་མེད་པར་འགྱུར་རོ། ། བསོད་སྙོམས་འདི་དག་ཟད་པར་མ་གྱུར་ཅིག་སྙམ་ནས། དེ་ལྟར་ཆུང་ངུ་ལ་ཆགས་པའང་བར་ཆད་དུ་འགྱུར་ན། རྙེད་པ་དང་། བཀུར་སྟི་དེ་དག་ལ་མངོན་པར་ཆགས་པ་ལྟ་སྨོས་ཀྱང་ཅི་དགོས་ཏེ་དངོས་པོ་ཡོངས་སུ་འཛིན་པ་གང་ཡིན་པ་དེ་དག་ནི་སྲེད་པས་ལྷག་པར་བཅིངས་པ་ཡིན་ནོ། ། 7.དངོས་པོ་བདུན་པ་ཡོངས་སུ་ཤེས་པར་བྱ་བ་དེ་གང་ཡིན་ཞེ་ན། འདི་ལ་མ་ཐོས་པ་དང་། མ་མཐོང་བའི་ཡུལ་དང་། ཡོངས་སུ་རྒྱུ་བ་རྣམས་རྒྱུ་བ་ན། རིགས་ཆེན་པོ་ལས་རབ་ཏུ་འབྱུང་བའི་དགེ་སྦྱོང་འདོད་ཆེན་ཆུང་བས་སྨྲ་བར་མི་བྱ་སྟེ། འདི་ལྟར་བདག་རིགས་ཆེ་གེ་མོ་ཞིག་ལས་རབ་ཏུ་བྱུང་ངོ་ཞེའམ། བདག་རིགས་ཆེན་པོ་ལས་རབ་ཏུ་བྱུང་ངོ་ཞེས་དེ་སྐད་བདག་ཉིད་ཀྱིས་སྨྲ་བར་མི་བྱའོ། ། གཞན་ཡང་ལྷན་ཅིག་གནས་པའམ། ཉེ་གནས་ཤིག་སྨྲ་ནའང་ཕྱིར་བཟློག་པར་བྱའོ། ། འདི་ལྟར་དགེ་སྦྱོང་གི་དངོས་པོ་ཙམ་ཉིད་ལས་སྦྱིན་པ་དག་དང་། སྦྱིན་པ་པོ་དག་མལ་སྟན་དང་། ན་བའི་གསོས་སྨན་གྱི་རྐྱེན་གྱི་ཡོ་བྱད་རྣམས་བདག་ལ་སྦྱིན་པར་བྱེད་དེ། དེས་ནི་བདག་དངོས་པོ་ཡོངས་སུ་འཛིན་པ་དང་ལྡན་པར་འགྱུར་ལ། ཇི་སྟེ་མ་བླངས་ན་བདག་གི་ཉེ་གནས་དེའི་ཡིད་མི་དགའ་བར་འགྱུར་རོ། ། དེ་གལ་ཏེ་བདག་ལ་ཡིད་མི་དགའ་བར་བྱེད་ན་དེ་དེ་དག་གི་བར་ཆད་དུ་འགྱུར་ཏེ། འཇིག་རྟེན་ཕ་རོལ་ལ་ཕན་པར་མི་འགྱུར་རོ། ། དངོས་པོ་ཡོངས་སུ་བཟུང་བའང་དེ་ལྟར་ཡོངས་སུ་ཤེས་པར་བྱ་སྟེ། དགེ་སློང་དེ་ལྟ་བུ་ནི་འདོད་ཆེན་ཆུང་བར་འགྱུར། སྲིད་པས་མི་ཟིན་པར་འགྱུར། སེམས་གཡེངས་པར་མི་འགྱུར། དྲན་པ་ཉེ་བར་གནས་པར་འགྱུར། དམ་པའི་ཆོས་དང་། བསམ་གཏན་ལ་གནས་པའི་ཀུན་དགའ་བ་ལ་མངོན་པར་དགའ་བར་འགྱུར། ལུས་ལ་ལུས་ཀྱི་རྗེས་སུ་བལྟ་བ་དང་། སེམས་ལ་སེམས་ཀྱི་རྗེས་སུ་བལྟ་བ་དང་། ཚོར་བ་ལ་ཚོར་བའི་རྗེས་སུ་བལྟ་བ་དང་། ཆོས་ལ་ཆོས་ཀྱི་རྗེས་སུ་བལྟ་བར་འགྱུར་ཏེ། འདོད་ཆེན་ཆུང་བ་དེ་ནི་སྲིད་པའི་བཙོན་ར་ལས་འབྲོས་པར་ནུས་སོ། ། 8.འདི་ལ་དགེ་སློང་འདོད་ཆེན་ཆུང་བ་ཆོག་ཤེས་པ། རྙེད་པ་དང་། བཀུར་སྟིའི་འཇིགས་པ་དང་བྲལ་བས་དངོས་པོ་བརྒྱད་པ་ཡོངས་སུ་ཤེས་པར་བྱ་སྟེ། དངོས་པོ་ཡོངས་སུ་ཤེས་པར་བྱ་བ་དེ་གང་ཞེ་ན། འདི་ལ་སྐྱེ་བོ་མང་པོ་འཛིན་པ་སྣོད་སྤྱད་དང་། ཡོ་བྱད་མང་བ། ལྷན་ཅིག་གནས་པ་མང་བ། རྙེད་པ་དང་། བཀུར་སྟི་ལ་མངོན་པར་དགའ་བ་མང་བ། རོ་ལ་འཆུམས་པ། སྤྱན་འདྲེན་པ་ལ་ཤིན་ཏུ་ཡིད་ཞུགས་པ། གཉེན་འདུན་ལྟ་འདོད་པའི་དགེ་སྦྱོང་གི་ཡུལ་རྒྱུ་བའི་བྱ་བའམ། ལྷན་ཅིག་གནས་པའམ། འགྲོ་བར་མི་བྱའོ། ། དེ་ཅིའི་ཕྱིར་ཞེ་ན། བག་མེད་པས་ཕྲོགས་པའི་དགེ་སློང་དེ་ཇི་ལྟར་རྙེད་པ་དང་། བཀུར་སྟི་ལ་མངོན་པར་དགའ་བ་དེ་ལྟར་དེའང་སྐྱེ་བོས་ཤེས་པར་འགྱུར་ལ། དེ་ལྟར་འགྲོགས་པ་དེ་ལའང་རྙེད་པ་དང་། བཀུར་སྟིས་གོས་པར་འགྱུར་རོ། ། གལ་ཏེ་བླང་བ་དག་ཇི་སྟེ་ལེན་པར་མི་བྱེད་ན། སྣོད་སྤྱད་དང་། ཡོ་བྱད་མང་བ་དང་། སྤྱན་འདྲེན་པ་ལ་མངོན་པར་དགའ་བ་དེའི་ཡིད་ཀྱི་འདུན་པ་ལ་མངོན་པར་གནོད་པར་འགྱུར་རོ། ། སྦྱིན་བདག་དང་། སྦྱིན་པ་པོ་རྣམས་ཀྱི་དྲུང་དུའང་སོང་ནས། དགེ་སློང་འདོད་ཆེན་ཆུང་བ་དེ་ལ་སྨོད་པར་བྱེད་དེ། འདི་ལྟར་དགེ་སློང་འདི་ནི་ཚུལ་འཆོས་པ། སྐྱེ་པོ་ཐམས་ཅད་སླུ་བར་བྱེད་པ་ཡིན་ལ་ནང་གི་ཡིད་ནི་སྡིག་པ་ཅན་ཡིན་ནོ་ཞེས་དེ་ལྟར་དེ་ལའང་གནོད་པར་བྱེད་ལ། བདག་ཉིད་ལའང་གནོད་པར་བྱེད་དོ། ། དེ་ལྟ་བས་ན་འདོད་ཆེན་ཆུང་བའི་དགེ་སློང་དང་། འདོད་ཆེན་ཆེ་བ་དང་ལྷན་ཅིག་ཡིད་ཀྱི་ཉེས་པས་གནས་པར་མི་བྱའོ། ། 9.འདི་ལྟར་འདོད་ཆེན་ཆུང་བའི་དགེ་སློང་འཁོར་བས་འཇིགས་ཤིང་སྐྲག་པ། རྙེད་པ་དང་། བཀུར་སྟི་དང་བྲལ་བ། རྟག་ཏུ་སེམས་མཉམ་པར་བཞག་པས་དངོས་པོ་དགུ་པ་ཡོངས་སུ་ཤེས་པར་བྱའོ། ། དངོས་པོ་ཡོངས་སུ་ཤེས་པར་བྱ་བ་གང་ཞེ་ན། འདི་ལྟར་ཁྱིམ་ན་གནས་པ་རིག་པའི་གནས་རྣམས་ལ་གོམས་པ་གང་ཡིན་པ་དེ་དག་རབ་ཏུ་བྱུང་བར་གྱུར་ནས། དེ་རྣམས་བསྒྲགས་པར་མི་བྱ་སྟེ། འདི་ལྟ་སྟེ། སྨན་པའམ། རི་མོ་མཁན་ནམ། གར་མཁན་ནམ། གཏོར་མཁན་ནམ། རྣམ་པ་དེ་ལྟ་བུ་དང་མཐུན་པའམ། རིག་པའི་གནས་གཞན་དག་ཀྱང་རུང་བསྒྲགས་པར་མི་བྱའོ། ། དེ་ཅིའི་ཕྱིར་ཞེ་ན། བདག་རྙེད་པ་དང་། བཀུར་སྟི་ལ་མངོན་པར་དགའ་བར་སྦྱིན་བདག་དང་སྦྱིན་པ་པོས་མངོན་པར་ཤེས་པར་གྱུར་ན། དེ་ནི་བདག་གི་བར་ཆད་དུ་འགྱུར་ཞིང་དེ་ལ་རྣམ་པར་ཆགས་ན། དགེ་བའི་ཆོས་རྣམས་སྒྲུབ་པར་མི་འགྱུར། སེམས་རྩེ་གཅིག་ཏུ་མི་འགྱུར། བསམ་གཏན་གྱི་ཟས་རྣམས་ལ་བདག་གི་སེམས་དང་བར་མི་འགྱུར། དེ་བདག་གི་བར་ཆད་དུ་འགྱུར། བདག་དང་གཞན་ལ་ཕན་པ་ཉམས་པར་འགྱུར་རོ། ། ལྷན་ཅིག་གནས་པ་ལྷུར་མི་བྱ་སྟེ། ཡིད་དེ་དང་ཆགས་པ་དེ་ནི་ཕན་པར་མི་འགྱུར་བས་དེ་ལྟ་བས་ན་ཡོངས་སུ་སྤང་བར་བྱའོ། ། 10.གཞན་ཡང་དགེ་སློང་འདོད་ཆེན་ཆུང་བ་བློ་དང་ལྡན་པ་རྙེད་པ་དང་བཀུར་སྟི་སྤོང་བར་འདོད་པས། དངོས་པོ་བཅུ་པ་ཡོངས་སུ་ཤེས་པར་བྱ་སྟེ། འདི་ལྟར་གྲོང་ཁྱེར་དང་ཉེ་བ་ནའམ། གྲོང་དང་ཉེ་བ་ནའམ། རིའི་བོར་དང་། ཉེ་བ་ནའམ། ཚོད་འདུས་དང་ཉེ་བའི་གཙུག་ལག་ཁང་ན་གནས་པ་གང་ཡིན་པ་འདི་དག་མཐོང་སྟེ། དགེ་སློང་དང་དགེ་སློང་མ་རྣམས་ཀྱིས་གང་བ་དང་། ཁ་ཟས་ཀྱིས་གང་བ་དང་། ཆང་འཐུང་བས་གང་བ་དང་། ཉོ་ཚོང་བྱེད་པས་གང་བ་དང་། སྦྱོར་བ་བྱེད་པས་གང་བ་དང་། ཁང་པ་ཆུང་ངུའི་ནང་ན་གནས་པའི་སྟེན་གྲོགས་རྣམས་དང་དགེ་སློང་དག་ལྷན་ཅིག་གནས་པ་མཐོང་ན། དགེ་སློང་འདོད་ཆེན་ཆུང་བ། ཡིད་ཞི་བ། བདུད་ཀྱི་འཆིང་བ་གཅོད་པར་འདོད་པས་གནས་པར་མི་བྱའོ། ། དེ་ཅིའི་ཕྱིར་ཞེ་ན། གྲོང་ཁྱེར་པའམ། གྲོང་མིའམ། རི་བྲག་ན་གནས་པའམ། ཚོང་འདུས་ན་གནས་པ་དེ་དག་གིས་དགེ་སློང་མི་བརྟན་པ་དེ་དག་ཚུལ་ཁྲིམས་འཆལ་བར་ཁོང་དུ་ཆུད་ཅིང་རིག་ནས། དགེ་སློང་གཅིག་པོ་དེ་ལ་རྙེད་པ་དང་བཀུར་སྟི་བྱེད་དོ། །དེ་གལ་ཏེ་སོ་སོར་བླངས་ན་ནི། འདོད་ཆེན་ཆུང་བར་མི་འགྱུར་ལ། ཇི་སྟེ་སོ་སོར་མ་བླངས་ན་ནི་སྦྱིན་པ་པོ་དེ་རྣམས་ཀྱི་བར་ཆད་དུ་འགྱུར་ཞིང་གཅིག་པོ་དེ་ལ་སྦྱིན་པ་བྱིན་པ་གང་ཡིན་པ་དེ་ལ་ཞེ་སྡང་གི་སེམས་རབ་ཏུ་ཉེས་པའི་དགེ་སློང་གཞན་གང་ཡིན་པ་དེ་དག་ལའང་བར་ཆད་དུ་འགྱུར་རོ། ། སྐྱོན་དེ་དག་རྟོགས་ནས་དགེ་སློང་འདོད་ཆེན་ཆུང་བས་ཀུན་ཏུ་སྤྱོད་པ་དང་འདྲེས་པ་རྣམས་དང་ལྷན་ཅིག་གནས་པར་མི་བྱའོ། ། 11.གཞན་ཡང་དངོས་པོ་བཅུ་གཅིག་པ་ཡོངས་སུ་ཤེས་པར་བྱ་སྟེ། འདི་ལྟར་འཇིག་རྟེན་པའི་ཤེས་པས་ལྟས་དག་སྟོན་པའི་ཤེས་པ་གང་ཡིན་པ་དེའང་དེས་གཞན་དག་ལ་སྤྱི་བར་མི་བྱའོ། །འདི་ལྟར་དགྲ་བཅོམ་པ་ཡིན་ནོ་སྙམ་དུ་ཤེས་ནས། དེ་ལ་རྙེད་པ་དང་བཀུར་སྟིས་མཚོད་པ་བྱེད་ལ་དེ་ནི་དེའི་བར་ཆད་དུ་འགྱུར་རོ། ། འདོད་ཆེན་ཆུང་བ་སེལ་བར་མི་འགྱུར་རོ། ། 12.གཞན་ཡང་དངོས་པོ་བཅུ་གཉིས་པ་ཡོངས་སུ་ཤེས་པར་བྱ་སྟེ། འདི་ལྟར་གང་གིས་ཞིང་འདི་ལ་སྦྱིན་པ་ཆེན་པོ་སྦྱིན་པར་བྱེད་དོ་སྙམ་ནས། རྨད་དུ་བྱུང་བ་བསྟན་པའི་ཕྱིར་བཅོམ་ལྡན་འདས་ཀྱི་རིང་བསྲེལ་དག་ཁྱེར་ནས། གྲོང་ཁྱེར་ནས་གྲོང་ཁྱེར་དང་། གྲོང་ནས་གྲོང་དང་། རི་བྲག་ནས་རི་བྲག་དང་། ཚོང་འདུས་ནས་ཚོང་འདུས་སུ་འགྲོའོ། ། དེ་ཡང་ཐོས་པ་ཉུང་བ་ཡིན་ལ། དེས་འདོད་ཆེན་ཆུང་བ་ཤིན་ཏུ་ཐོས་པ་མང་པོ་དང་ལྡན་པ་དེ་ལ་ཆེད་དུ་བརྗོད་ཅིང་གཟེངས་བསྟོད་དེ་ཡང་དག་པར་དགའ་བར་བྱས་ནས་འཇུག་པར་བྱེད་དོ། ། འདི་སྙམ་དུ་སྦྱིན་བདག་དང་སྦྱིན་པ་པོ་རྣམས་ལ་ཐོས་པ་མང་པོས་ཆོས་འཆད་ལ། རིང་བསྲེལ་རྣམས་ལའང་གུས་པའི་སྦྱིན་བདག་དང་། སྦྱིན་པ་པོ་དག་ཡོན་འབུལ་བར་བྱེད་དེ། ནོར་རྫས་དེ་དག་བདག་གིར་བྱའོ་སྙམ་དུ་སེམས་ན། འདོད་ཆེན་ཆུང་ཞིང་ཤིན་ཏུ་ཆོག་ཤེས་པ་དེ་དེ་དང་ལྷན་ཅིག་འགྲོགས་པར་མི་བྱ། འཁོད་པར་མི་བྱའོ། གཞན་གྱི་སྐྱོན་དེས་ཚུལ་ཁྲིམས་འཚོལ་བ་དེའང་སྦྱིན་བདག་དང་། སྦྱིན་པ་པོ་དག་གིས་ཤེས་པར་འགྱུར་ཏེ། དེ་དག་གི་བར་ཆད་དུ་འགྱུར་རོ། ། དེ་ལྟ་བས་ན་ཡང་དག་པ་ཡིད་ལ་བྱེད་པའམ། གཤིན་རྗེའི་གནས་ལ་འཇིགས་ཤིང་སྐྲག་པའམ། བག་མེད་པས་འཇིགས་པ་ནི་ཚུལ་ཁྲིམས་འཆལ་པ་དང་ལྷན་ཅིག་འགྲོགས་པར་མི་བྱ། གནས་པར་མི་བྱའོ། ། 13.དངོས་པོ་བཅུ་གསུམ་པ་ཡོངས་སུ་ཤེས་པར་བྱ་སྟེ། དགེ་སློང་འདོད་ཆེན་ཆུང་བ། བསོད་སྙོམས་སྤྱོད་པ། བག་ཡོད་པར་གནས་པ། རོ་ལ་ཆགས་པ་རྣམ་པར་སྤངས་པས་གཞན་གྱིས་དྲོད་མི་ཟིན་པར་རྟག་ཏུ་བརྟན་པ་དང་ལྡན་པར་བྱའོ། ། 14.དངོས་པོ་བཅུ་བཞི་པ་ཡོངས་སུ་ཤེས་པར་བྱ་སྟེ། ཕྱག་དར་ཁྲོད་ན་གནས་པའམ། ཕྱག་དར་རྣམས་ཀྱིས་ཆོག་ཤེས་པ་ནི། ཆོག་ཤེས་པར་བྱ་བའི་དོན་དུ་གོས་ཤིན་ཏུ་ཟད་པ་དག་གྱོན་པར་བྱེད་དོ། ། 15.དགེ་སློང་ཆོག་ཤེས་པ་བདུད་ཀྱི་སྡེ་འཇོམས་པར་བྱེད་པས་དངོས་པོ་བཅོ་ལྔ་པ་ཡོངས་སུ་ཤེས་པར་བྱ་སྟེ། སྡིག་པའི་གྲོགས་པོ་སྤངས་པ། གཅིག་པུ་གནས་ཤིང་གཅིག་པུ་གནས་པར་སྟོན་པ་ནི་ཐོག་མ་མེད་པའི་དུས་ནས་ཞུགས་པ། ཉོན་མོངས་པའི་རི་སྲ་བ་སྦྱོང་བར་བྱེད་དོ། ། དེ་ལྟར་ཆོག་ཤེས་པ་ནི་ཤིན་ཏུ་བདེ་བ་དང་ལྡན་ཞིང་འཆི་བའི་ཚེའང་གཤིན་རྗེའི་མིའི་དབང་དུ་འགྲོ་བར་མི་འགྱུར་རོ། ། གཤིན་རྗེའི་ཕོ་ཉ་གཟུགས་དང་། བཞིན་དང་། མིག་མི་སྡུག་པར་བསྒྱུར་བ་རྣམས་མཐོང་བར་མི་འགྱུར་ལ། ཤིན་ཏུ་འཇིགས་པ་མེད་པར་འགྱུར་རོ། །
Tibetan Source	《མདོ་འ་པ་》ཤ་386བ་3ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number