10716

Tibetan	རྩ་ལྟུང་བཅོ་བརྒྱད།
Tibetan Alternate
Tibetan Definition	དེ་ཡང་། སྡོམ་པ་གསུམ་རྣམ་པར་ངེས་པའི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ལས་བྱུང་བ་སྟེ། 1.རྒྱལ་པོ་ལ་ངེས་པ་ལྔ་ནི། (1)དཀོན་མཆོག་གི་དཀོར་འཕྲོག་པ་ནི། སངས་རྒྱས་ཀྱི་མཆོད་རྟེན་ནམ་སྐུ་གཟུགས་ཀྱི་རྫས་དང་། དམ་པའི་ཆོས་གླེགས་བམ་དང་ཆོས་སྨྲ་བའི་ཆ་རྐྱེན། དགེ་འདུན་རིས་སུ་ཆད་པའམ་མ་ཆད་པ་ལ་བསྔོས་ཤིང་འདུ་བའི་རྫས་ཞིང་ལ་སོགས་པ་གང་ཡང་རུང་བ། རིན་ཐང་མ་ཚང་ཡང་འདྲ་སྟེ། ཀུན་སློང་དྲག་པོས་འཕྲོག་པ་དང་རྐུ་བར་བྱེད་དམ། གཞན་བྱེད་དུ་བཅུག་ཀྱང་ཕམ་པར་འགྱུར་ཞིང་། དགེ་འདུན་ལས་རྐུ་ན་བདག་ཉིད་དེའི་གྲངས་སུ་གཏོགས་པར་ཤེས་ན་ལྟུང་བ་མེད་དོ། ། (2)དམ་ཆོས་སྤོང་བ་ནི། ཐེག་པ་གསུམ་གང་ཡང་རུང་བའི་ལུང་གི་ཆོས་སྡེ་སྣོད་གསུམ་དང་། རྟོགས་པའི་ཆོས་བསླབ་པ་གསུམ་ལས་གང་རུང་དུ་གཏོགས་ པའི་དགེ་བ་རྣམས་སྟོན་པའི་བཀའ་དང་ཐར་པ་ཐོབ་པའི་ཐབས་མ་ཡིན་ནོ་ཞེས་རང་གིས་སྤོང་བར་བྱེད་དམ་གཞན་སྤོང་དུ་འཇུག་པའོ། ། (3)དགེ་སྦྱོང་ལ་ཆད་པས་གཅོད་པ་ནི། བསླབ་པ་བཟུང་མ་བཟུང་གི་རབ་བྱུང་ངམ། ཚུལ་ཁྲིམས་འཆལ་མ་འཆལ་གྱི་དགེ་སློང་གང་ཡིན་ཀྱང་རུང་སྟེ་རབ་བྱུང་གི་ཆོ་ལུགས་འཛིན་པ་ལ། ཀུན་སློང་ཞེ་སྡང་བས། དེའི་ངུར་སྨྲིག་གི་གོས་འཕྲོག་གམ་བརྡེག་གམ། བཙོན་དུ་འཇུག་གམ། ཁྱིམ་སར་འབེབས་སམ། གསོད་པར་བྱེད་པ་ལས་གང་རུང་རེ་རེའམ་མང་དུ་བྱས་སམ་བྱེད་དུ་བཅུག་པའོ། ། (4)མཚམས་མེད་པ་ལྔ་བྱེད་པ་ནི། ཕ་མ་དགྲ་བཅོམ་གསུམ་གསོད་པ། དགེ་འདུན་གྱི་དབྱེན་བྱེད་པ། སངས་རྒྱས་ལ་ངན་སེམས་ཀྱིས་ཁྲག་འབྱིན་པ་སྟེ་མཚམས་མེད་པའི་ལས་ལྔ་ལས་གང་ཡང་རུང་བ་བྱེད་པའོ། ། (5)ལོག་ལྟ་འཛིན་པ་ནི། ལས་རྒྱུ་འབྲས་མེད་ཅེས་ལོག་པར་ལྟ་བས་མི་དགེ་བ་བཅུ་ལས་གང་ཡང་རུང་བ་ཞིག་བྱེད་དམ་བྱེད་དུ་བཅུག་པ་སྟེ། འདི་ནི་སེམས་ཀྱི་ལས་ཡིན་པས་སྐྱེས་ཙམ་ཉིད་ནས་དགེ་རྩ་ཆད་པས་ལྟུང་བར་འགྱུར་མོད། མི་དགེ་བའི་ལས་ལ་སྤྱོད་པའི་ཡན་ལག་གཞན་མ་ཚང་ན་ཤིན་ཏུ་ལྕི་བར་འགྱུར་རོ། ། 2.བློན་པོ་ལ་ངེས་པ་ལྔ་ནི། གྲོང་ལྗོངས་གྲོང་ཁྱེར་གྲོང་བརྡལ་ཡུལ་འཁོར་རྣམས། ། འཇོམས་པར་བྱེད་པའང་བློན་པོར་ངེས་པ་ལྔ། ། ཞེས་པ་སྟེ། གྲོང་ནི་ཁྱིམ་གཅིག་པ་ལ་སོགས་པ་དང་། ལྗོངས་ནི་མི་རིགས་བཞི་གནས་པའི་ཕྱོགས་དང་། གྲོང་ཁྱེར་ནི་བཟོ་སྣ་བཅོ་བརྒྱད་ཡོད་པའི་གནས་དང་། གྲོང་བརྡལ་ནི་ཚོང་པ་མང་པོ་འདུ་བའི་གནས་དང་། ཡུལ་འཁོར་ནི་ཙམ་པ་ཀ་སོགས་ཡུལ་ཆེན་པོ་རྣམས་ལས་གང་ཡང་རུང་བ་ཞེ་སྡང་གིས་མེ་ལ་སོགས་པས་འཇོམས་པར་བྱེད་པའོ། ། འང་སྒྲ་ནི། སྡུད་པར་བྱེད་པ་སྟེ། ལོག་ལྟ་དོར་བའི་སྔར་གྱི་རྩ་ལྟུང་དང་པོ་བཞི་དང་། དེའི་སྟེང་དུ་གྲོང་སོགས་འཇོམས་པ་ལྔ་པོ་གཅིག་ཏུ་བགྲངས་པའང་རྩ་ལྟུང་ཡིན་པས་བློན་པོར་ངེས་པ་ལྔའོ། ། 3.ཕལ་པ་ལ་ངེས་པ་སྟེ་ལས་དང་པོ་བའི་རྩ་ལྟུང་བརྒྱད་ནི། (1)བློ་མ་སྦྱངས་པའི་སེམས་ཅན་ལ་སྣོད་མ་བརྟགས་པར་ཟབ་མོ་སྟོང་པ་ཉིད་བསྟན་པས་སྐྲག་ནས་བྱང་ཆུབ་ཀྱི་སེམས་བཏང་སྟེ་ཉན་རང་གི་བྱང་ཆུབ་ཏུ་སྨོན་ན་སྟོན་པ་པོ་ལ་ལྟུང་བར་འགྱུར་ཞིང་། གལ་ཏེ་ཡུལ་ཀྱང་འཇུག་སྡོམ་དང་ལྡན་ན་དེ་ལའང་ལྟུང་བ་འབྱུང་ངོ་། ། (2)སངས་རྒྱས་སྒྲུབ་པའི་ལམ་དུ་ཞུགས་པ་ལ་དེར་ཤེས་བཞིན་དུ་ཁྱོད་ཀྱིས་རྒྱུ་ཕྱིན་དྲུག་ལ་སྤྱོད་པ་དང་འབྲས་བུ་སངས་རྒྱས་ཐོབ་པར་མི་ནུས་པས་ཉན་ཐོས་སམ་རང་རྒྱལ་དུ་སེམས་སྐྱེད་ཅིག་དང་། དེས་ཁྱོད་འཁོར་བ་ལས་ངེས་པར་འབྱུང་བར་འགྱུར་རོ་ཞེས་རྫོགས་བྱང་ལས་ཕྱིར་ལྡོག་པར་བྱེད་པའོ། ། (3)ཉན་ཐོས་ཀྱི་རིགས་ཅན་སོ་སོ་ཐར་པ་ལ་སློབ་པའམ། རབ་ཏུ་བྱུང་ཟིན་ཀྱང་སློབ་པར་འདོད་པ་དག་ལ། དགོས་པ་ཁྱད་པར་ཅན་མེད་པར་ཁྱོད་སོ་ཐར་ལ་བསླབས་པས་ཅི་ཞིག་བྱ་སྟེ། རྫོགས་བྱང་དུ་སེམས་བསྐྱེད་ལ་ཐེག་པ་ཆེན་པོ་ལྷོགས་ཤིག་དང་། དེས་ཉེས་པར་བྱས་པའི་ལས་རྣམས་བྱང་ཆུབ་ཀྱི་སེམས་ཀྱི་མཐུས་འཇོམས་སོ་ཞེས་ཐེག་ཆེན་ལ་སློབ་ཏུ་འཇུག་པའོ། ། (4)ཉན་ཐོས་ཀྱི་ཐེག་པས་ཆགས་སོགས་ཉོན་མོངས་པ་སྤོང་མི་ནུས་པས་ཐེག་ཆེན་ཉིད་ལ་སློབས་ཤིག ཅེས་ཉན་ཐོས་ལ་ཐར་ལམ་མེད་པར་རང་འཛིན་ཅིང་། དགོས་པ་ཁྱད་པར་ཅན་མེད་པར་གཞན་ཡང་འཛིན་དུ་འཇུག་པའོ། ། (5)རྙེད་བཀུར་གྱི་ཕྱིར་རྙེད་བཀུར་ཅན་གྱི་བྱང་སེམས་གཞན་ལ་ཕྲག་དོག་གིས་དེའི་སྐྱོན་བདེན་པའམ་རྫུན་པ་གང་རུང་བརྗོད་པས་སྨོད་ཅིང་། བདག་ཉིད་ལ་མི་ལ་བླ་མའི་ཡོན་ཏན་མེད་ཀྱང་ཡོད་པར་བསྒྲགས་པ་གཞན་གྱིས་གོ་བའོ། ། (6)རྙེད་བཀུར་གྱི་ཕྱིར་མ་རྟོགས་བཞིན་དུ་བདག་གིས་ཆོས་ཟབ་མོ་སྟོང་པ་ཉིད་མངོན་སུམ་དུ་རྟོགས་སོ་ཞེས་མི་ཆོས་བླ་མའི་རྫུན་ལོག་པར་སྨྲས་པ་གཞན་གྱིས་གོ་བའོ། ། (7)རྒྱལ་རིགས་ལྟ་བུ་དབང་པོ་ཆེ་དང་། ཆོས་འདི་པའི་དགེ་སྦྱོང་ཕྲ་མོས་ཕྱེ་ནས། དབང་པོ་ཆེའི་ཕྱོགས་ལ་བརྟེན་ཏེ། དགེ་སྦྱོང་ལ་ནོར་གྱི་ཆད་པ་གཅོད་དུ་འཇུག་པ་དང་། དེའི་རྐྱེན་གྱིས་དགེ་སྦྱོང་གིས་དཀོན་མཆོག་གི་དཀོར་བརྐུས་ནས་ཕྲ་མ་བྱེད་པ་ལ་ཕག་སུག་ཏུ་ཕུལ་བ། དེ་དག་ཕྲ་མ་བྱེད་པ་རང་གིས་ལེན་ནམ། དབང་པོ་ཆེ་ལ་བྱིན་པས་ནོར་བདག་གིར་བྱས་ན་དེ་གཉིས་ཀ་ལ་ལྟུང་བར་འགྱུར་རོ། ། (8)ཆོས་ལྡན་གྱི་དགེ་སྦྱོང་ལ་གནོད་པའི་ཁྲིམས་ངན་བཅས་ཏེ། ཞི་གནས་ཀྱིས་མཚོན་པའི་རྣལ་འབྱོར་འདོར་དུ་འཇུག་པ་དང་། དགེ་སློང་སྤོང་བ་བསམ་གཏན་པའི་ལོངས་སྤྱོད་ཕྲོགས་ནས་ཀློག་པ་ཁ་ཏོན་པ་ལ་སྟེར་བའམ་སྟེར་དུ་འཇུག་པ་སྟེ། ལེན་པ་པོ་ཡང་འཕྲོག་པ་པོའི་ཕྱོགས་སུ་གཏོགས་ན་རྩ་ལྟུང་འབྱུང་ངོ་། །
Tibetan Source	《སྔ་འགྱུར་བཀའ་མའི་གླེགས་བམ་ཇི་པ་》ཤ་147ན་6ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number