10855

Tibetan	དེ་བཞིན་གཤེགས་པ་དོན་གྱི་དབང་གཟིགས་ནས་བསོད་སྙོམས་ལ་རྒྱུ་བ་མཛད་པ་ཉི་ཤུ་རྩ་གཅིག
Tibetan Alternate
Tibetan Definition	དེ་ཡང་། འཕགས་པ་བུད་མེད་ལུང་བསྟན་པའི་མདོ་ལས་བྱུང་བ་སྟེ། 1.གཟུགས་ཀྱི་སྐུ་བཟང་པོ་བསྟན་པའི་ཕྱིར་དེ་བཞིན་གཤེགས་པ་བསོད་སྙོམས་ལ་རྒྱུ་བ་མཛད་དེ། དེར་སེམས་ཅན་གང་དག་གིས་དེ་བཞིན་གཤེགས་པའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་རྣམ་པ་ཐམས་ཅད་ཀྱི་མཆོག་དང་ལྡན་པ་མཐོང་བ་དེ་དག་དེ་བཞིན་གཤེགས་པའི་གཟུགས་ཀྱི་སྐུའི་མཚན་ཐོབ་པར་བགྱི་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དོ། ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། དོ། ། 2.དེ་བཞིན་གཤེགས་པ་གྲོང་དང་། གྲོང་ཁྱེར་དུ་བསོད་སྙོམས་ལ་གཤེགས་ན་ལོང་བ་རྣམས་ཀྱིས་ནི་གཟུགས་རྣམས་མཐོང་བར་འགྱུར། སེམས་ཅན་འོན་པ་རྣམས་ཀྱིས་ནི་སྒྲ་ཐོས་པར་འགྱུར། སེམས་ཅན་སྨྱོན་པ་རྣམས་ཀྱིས་ནི་དྲན་པ་རྙེད་པར་འགྱུར། སེམས་ཅན་གཅེར་བུ་རྣམས་ཀྱིས་ནི་གོས་རྙེད་པར་འགྱུར། སེམས་ཅན་བཀྲེས་པ་རྣམས་ཀྱིས་ནི་ཟས་རྙེད་པར་འགྱུར། སེམས་ཅན་སྐོམ་པ་རྣམས་ཀྱིས་ནི་བཏུང་བ་རྙེད་པར་འགྱུར་ལ། སེམས་ཅན་སུ་ལའང་འདོད་ཆགས་སམ། ཞེ་སྡང་ངམ། གཏི་མུག་དང་། ཕྲག་དོག་དང་། སེར་སྣ་དང་། ཁྲོ་བ་དང་། རྒྱུགས་པ་དང་། འཚབ་པ་དང་། ཡོངས་སུ་གདུང་བའི་གནོད་པ་མ་མཆིས་སོ། ། སེམས་ཅན་ཐམས་ཅད་བྱམས་པའི་སེམས་དང་ལྡན་ཏེ། གཅིག་ལ་གཅིག་ཕ་མའི་འདུ་ཤེས་བསྐྱེད་པར་འགྱུར་ཏེ། དེར་སེམས་ཅན་མང་པོས་དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་པའི་ཡོན་ཏན་ཕུན་སུམ་ཚོགས་པ་དེ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 3.དེ་བཞིན་གཤེགས་པ་ནི་གྲོང་དང་། གྲོང་ཁྱེར་དང་། གྲོང་རྡལ་དུ་གཤེགས་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་མཆོད་པའི་ལས་བགྱི་བའི་སླད་དུ་ཕྱི་བཞིན་འབྲང་སྟེ། དེར་སངས་རྒྱས་ཀྱི་མཐུས་མི་རྣམས་ཀྱིས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་བཅོམ་ལྡན་འདས་ལ་མཆོད་པར་བགྱིད་པ་མཐོང་ནས་དེ་དག་དེ་བཞིན་གཤེགས་པ་ལ་འདོད་པ་སྐྱེ་སྟེ། དེ་བཞིན་གཤེགས་པ་ནི་ངོ་མཚར་ཆེ་བ་ནས་རྨད་དུ་བྱུང་བའི་ཆོས་དང་ལྡན་ནོ་སྙམ་སྟེ། དེ་དག་གིས་དེ་བཞིན་གཤེགས་པ་ལ་འདོད་པ་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 4.དེ་བཞིན་གཤེགས་པ་བསོད་སྙོམས་ལ་རྒྱུ་བ་མཐོང་ནས་སེམས་ཅན་དཔག་ཏུ་མེད་པ་ལོངས་སྤྱོད་དང། དབང་ཕྱུག་གི་རྒྱགས་ཤིང་མྱོས་པ་དང་། གཟུགས་དང་། རིགས་དང་། འཚོ་བ་དང་། ནད་མེད་པས་རྒྱགས་ཤིང་མྱོས་པ་འདི་རྣམས་འདི་སྙམ་ཏུ་སེམས་ཏེ། འདི་འཁོར་ལོས་བསྒྱུར་བའི་རྒྱལ་སྲིད་བོར་ནས་རབ་ཏུ་བྱུང་ཞིང་བསོད་སྙོམས་ལ་རྒྱུ་ཞེས་གྲག་སྟེ། དེས་ཀྱང་འདི་ལྟར་ང་རྒྱལ་བཅོམ་ན། ཀྱེ་མ། བདག་ཅག་གིས་ཀྱང་ང་རྒྱལ་གཞོམ་པར་བྱའོ་སྙམ་སྟེ། དེ་དག་གིས་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 5.དེ་བཞིན་གཤེགས་པ་གྲོང་དང་། གྲོང་ཁྱེར་དུ་བསོད་སྙོམས་ལ་རྒྱུ་བ་ན་ལྷ་གཟི་བྱིན་ཆེ་བ་རྣམས་ཀྱིས་དགོངས་པ་ལ་བལྟས་ནས། འདི་སྐད་དུ། འདི་ལ་ནི་བཀྲེས་པ་དང་། སྐོམ་པའི་གནོད་པའང་མེད་ལ། ལུས་ཉམ་ཆུང་བའང་མེད་ཀྱི། སེམས་ཅན་རྣམས་ལ་སྙིང་བརྩེ་བ་ཆེད་ཆེར་བྱས་ནས་བསོད་སྙོམས་ལ་རྒྱུ་བར་བྱེད་ཀྱི། བདག་ཅག་ཀྱང་དེ་བཞིན་དུ་སེམས་ཅན་རྣམས་ལ་སྙིང་བརྩེ་བ་ཆེད་ཆེར་བྱ་བའི་སེམས་ཀྱིས་བསོད་སྙོམས་ལ་རྒྱུ་བར་བྱའོ་ཞེས་སྨྲ་ཞིང་དེ་དག་གིས་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 6.སེམས་ཅན་ལེ་ལོ་ཅན་སྙོམས་ལས་ཅན་དེ་བཞིན་གཤེགས་པ་ལ་ལྟ་བ་དང་། ཕྱག་འཚལ་བ་དང་། བསྙེན་བཀུར་བགྱི་བའི་སླད་དུ་མི་མཆི་བ་དེ་དག་དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་ན་འབད་མི་འཚལ་བར་མཐོང་བར་འགྱུར་ལ། མཐོང་ནས་ཀྱང་དགའ་བ་དང་། མཆོག་ཏུ་དགའ་བ་ཆེན་པོ་ཐོབ་པར་འགྱུར་ཏེ། དགའ་བོ་དང་། མཆོག་ཏུ་དགའ་བ་ཐོབ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 7.སངས་རྒྱས་བཅོམ་ལྡན་འདས་རྣམས་ནི་མཐོང་ན་དོན་ཡོད་པ་སྟེ། ཐ་ན་སེམས་ཅན་གང་དག་གིས་སེམས་ཀྱི་སྐད་ཅིག་མ་གཅིག་ཙམ་ལ་ཞི་བའི་མིག་གིས་དེ་བཞིན་གཤེགས་པ་མཐོང་ནའང་དེ་འབའ་ཞིག་གིས་ཀྱང་དེ་དག་ཐམས་ཅད་ཡོངས་སུ་མྱ་ངན་ལས་འདའ་བར་འགྱུར་བའི་བར་གྱི་རྒྱུར་འགྱུར་ཏེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 8.དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་ན་སེམས་ཅན་བཅིང་བས་བཅིངས་པ་རྣམས་བཅིང་བ་ལས་གྲོལ་བར་འགྱུར་ལ། དེ་དག་གིས་དེ་བཞིན་གཤེགས་པའི་མཐུས་བདག་ཅག་བཅིང་བ་འདི་དག་ལས་གྲོལ་བར་གྱུར་ཏོ་ཞེས་ཤེས་ཏེ། དེ་བཞིན་གཤེགས་ པ་ལ་བྱས་པ་གཟོ་བ་དང་། བྱས་པ་ཚོར་བར་གྱུར་ནས་བླ་ན་མེད་པ་ཡང་དག་པར་རྫོགས་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 9.རིགས་ཀྱི་བུའམ། རིགས་ཀྱི་བུ་མོ་དེ་བཞིན་གཤེགས་པའི་ཡོན་ཏན་བསྔགས་པ་ཐོས་ན། ཀྱེ་མ་མ་ལ། བདག་ཅག་གིས་དེ་བཞིན་གཤེགས་པ་ལ་བསོད་སྙོམས་དབུལ་བར་བྱའོ། ། ཆོས་གོས་དབུལ་བ་དང་། མཆོད་པ་དང་། བཀུར་སྟིར་བྱ་བ་ཅིའང་རུང་བས་མཆོད་པ་བྱའོ། ། སྙམ་དུ་སེམས་པ་དེ་ལྟ་བུ་དག་མཆིས་ལ་དེ་དག་ལས་ཀྱང་མས་བསྲུངས་པའམ། ཕས་བསྲུངས་པའམ། མིང་པོས་བསྲུངས་པའམ། ཕུ་ནུ་མོས་བསྲུངས་པའམ། ཁྱིམ་ཐབས་ཀྱིས་བསྲུངས་པའམ། མཛའ་བོས་བསྲུངས་པ་རྣམས་དེ་དང་། དེའི་རྐྱེན་གྱིས་དེ་བཞིན་གཤེགས་པའི་ཐད་དུ་མཆི་མི་ནུས་སྟེ། དེ་དག་གིས་དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་པ་མཐོང་ན་ཚིམ་ཞིང་མགུ་ལ་རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་ནས་དེ་བཞིན་གཤེགས་པ་ལ་བསོད་སྙོམས་དབུལ་བར་བགྱིད་དོ། ། ཕུལ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 10.དེ་བཞིན་གཤེགས་པ་ལ་རྒྱལ་ཆེན་བཞིའི་ལྷ་རྣམས་ཀྱིས་ལྷུང་བཟེད་ཕུལ་ནས་དེ་བཞིན་གཤེགས་པས་བཞེས་པ་མཆིས་ཏེ། དེར་སེམས་ཅན་ལོངས་སྤྱོད་ཆུང་བ་དང་། ཆུང་ངུ་སྦྱིན་པར་འཚལ་བ་གང་དག་ལགས་པ་དེ་དག་གིས་ནི་དེ་བཞིན་གཤེགས་པའི་ལྷུང་བཟེད་གང་བར་མཐོང་ངོ། སེམས་ཅན་ལོངས་སྤྱོད་ཆེ་ཞིང་མང་དུ་སྦྱིན་པར་འཚལ་བ་གང་དག་ལགས་པ་དེ་དག་གིས་ནི་དེ་བཞིན་གཤེགས་པའི་ལྷུང་བཟེད་མ་གང་བར་མཐོང་ནས་དེ་དག་གིས་ཇི་ཙམ་དགོས་པ་ཕུལ་ཏེ། ལྷུང་བཟེད་གང་བར་བགྱིས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 11.དེ་བཞིན་གཤེགས་པའི་ལྷུང་བཟེད་ཀྱི་ནང་དུ་བཅའ་བ་དང་། བཟའ་བ་དང་། མྱང་བར་བྱ་བ་རོ་བརྒྱ་དང་ལྡན་པ་བླུགས་ན། བཅའ་བ་དང་། བཟའ་བ་དང་། མྱང་བར་བྱ་བ་དེ་དག་འདྲེ་བར་མི་འགྱུར་ཏེ། ཇི་ལྟར་སྣོད་ཐ་དད་བའི་ནང་ན་མཆིས་པ་དེ་ཁོ་ན་བཞིན་དུ་མཆིས་ཏེ། དེར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མང་པོ་དག་གིས་དེ་བཞིན་གཤེགས་པའི་ལྷུང་བཟེད་ཀྱི་ཆོ་འཕྲུལ་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 12.དེ་བཞིན་གཤེགས་པའི་ལྷུང་བཟེད་ཀྱི་ནང་དུ་དགེ་སློང་ཐམས་ཅད་ཀྱི་ཟས་བླུགས་ཀྱང་དེས་ལྷུང་བཟེད་མ་གང་བའམ། གང་བར་ཡང་མི་འགྱུར་ཏེ། དེར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མང་པོ་དག་གིས་དེ་བཞིན་གཤེགས་པའི་ལྷུང་བཟེད་ཀྱི་ཆོ་འཕྲུལ་དེ་ལྟ་བུ་མཐོང་སྟེ་ངོ་མཚར་དུ་གྱུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེ ད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 13.དེ་བཞིན་གཤེགས་པའི་སྐུ་ནི་གཅིག་ཏུ་མཁྲེགས་ཤིང་ཁོང་སྟོང་མ་ལགས་ལ་རྡོ་རྗེ་ལྟར་མཁྲེགས་པ་སྟེ། དེ་བཞིན་གཤེགས་པའི་སྐུ་ལ་ཕོ་བའམ། ལོང་ཀའང་མི་མངའ། ཕྱི་སའང་མི་མངའ། གཅིན་ཡང་མི་མངའ་མོད་ཀྱི། འོན་ཀྱང་བསོད་སྙོམས་ལ་རྒྱུ་བ་དང་། བཤོས་གསོལ་བ་དེ་ལྟར་ཡང་གདའ་ལ་ཁོང་དུ་ཆུད་པའང་མི་མངའ་སྟེ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་མང་པོ་དག་གིས་དེ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 14.དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་ན་སེམས་ཅན་མང་པོ་དག་གིས་བསོད་སྙོམས་མང་པོའམ། ཉུང་ངུའམ། བཟང་པོའམ། ངན་པའང་རུང་སྟེ་དབུལ་བར་བགྱིད་ལ། སེམས་ཅན་དེ་དག་གིས་ཀྱང་དེ་བཞིན་གཤེགས་པ་ལ་སེམས་བསྐྱེད་པའི་ཡོན་ཏན་མཐར་ཐུག་པར་བགྱིད་མི་ནུས་ཏེ། ལྷ་དང་། མི་རྣམས་ཀྱི་ཕུན་སུམ་ཚོགས་པ་མང་པོ་དག་ཀྱང་ཉམས་སུ་མྱོང་བར་འགྱུར་ལ། ཡོན་ཏན་དེ་ཡང་ཡོངས་སུ་མྱ་ངན་ལས་འདའ་བར་འགྱུར་བའི་བར་དུ་བས་པར་མི་འགྱུར་ཏེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 15.དེ་བཞིན་གཤེགས་པ་ནི་རྟག་ཏུ་མཉམ་པར་བཞག་པ་སྟེ་ཏིང་ངེ་འཛིན་ལས་ཉམས་པ་མི་མངའ་ལ། དེར་ཚངས་པའམ། དེ་མ་ཡིན་པའི་གཟུགས་ན་སྤྱོད་པའི་ལྷ་གཟི་བྱིན་ཆེ་བ་གཟི་བྱིན་ ཆེ་བ་རྣམས་ཀྱིས་དེ་བཞིན་གཤེགས་པ་བསོད་སྙོམས་ལ་རྒྱུ་ཞིང་ཏིང་ངེ་འཛིན་ལས་ཀྱང་མི་གཡོ་བ་མཐོང་ན་དེ་དག་འདི་སྙམ་དུ་སེམས་ཏེ། འདི་ནི་སེམས་ཅན་གྱི་དོན་ལ་བརྩོན་པ་ཡིན་གྱི། ཟས་འདོད་པ་མ་ཡིན་པར་ཐེ་ཚོམ་མེད་དོ་སྙམ་ནས། དེ་དག་དགའ་བ་ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། 16.གལ་ཏེ་དེ་བཞིན་གཤེགས་པ་བསོད་སྙོམས་ལ་རྒྱུ་བ་མི་མཛད་དེ། ཞལ་ཟས་ཀྱང་མི་གསོལ་བོར་གྱུར་ན་ནི་དེ་ལྟ་ན་རིགས་ཀྱི་བུ་དང་། རིགས་ཀྱི་བུ་མོ་ལེགས་པར་གསུངས་པའི་ཆོས་འདུལ་བ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་དག་ཀྱང་ཟས་མི་བཟའ་བ་ལ་ཞུགས་ཏེ་བདག་ཅག་ཀྱང་བསོད་སྙོམས་ལ་རྒྱུ་བར་མི་བྱ། ཟས་ཀྱང་བཟའ་བར་མི་བྱའོ་སྙམ་ནས་དེ་དག་བཀྲེས་ཤིང་ཉམ་ཆུང་བར་གྱུར་པས་ཁྱད་པར་ཐོབ་པར་རྟོགས་པར་མི་ནུས་ཏེ། དེ་དག་གིས་མ་འོངས་པ་ན་ཁྱད་པར་ཐོབ་པའི་བསམ་པ་རྫོགས་པར་མཛད་པའི་ཕྱིར་ཡང་དེ་བཞིན་གཤེགས་པ་བསོད་སྙོམས་ལ་རྒྱུ་ཞིང་གསོལ་བར་མཛད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 17.དེ་བཞིན་གཤེགས་པ་ནི་འཕགས་པའི་རིགས་རྣམས་ཡང་དག་པར་ཡོངས་སུ་གཟུང་བའི་ཕྱིར་བསོད་སྙོམས་ལ་རྒྱུ་བ་མཛད་དོ། ། 18.སྐྱེ་བོ་ཕྱི་མ་ལ་ཐུགས་བརྩེ་བའི་ཕྱིར་བསོད་སྙོམས་ལ་རྒྱུ་སྟེ། ཕྱི་མའི་དུས་ན་བྲམ་ཟེ་དང་། ཁྱིམ་བདག་མ་དད་པ་རྣམས། འདི་སྐད་དུ། གལ་ཏེ་འདི་དག་གི་སྟོན་པ་ཉིད་ཀྱིས་ཀྱང་བསོད་སྙོམས་ལ་རྒྱུ་བ་མ་བྱས་ན་འདི་དག་ཅིའི་ཕྱིར་བསོད་སྙོམས་ལ་རྒྱུ་བར་བྱེད་ཅེས་དེ་དག་དགེ་སློང་དང་། དགེ་སློང་མ་ལ་ཤས་ཆེར་མི་དགའ་བར་མི་འགྱུར་བར་བྱ་བའི་ཕྱིར་རོ། ། དེ་བས་ན་དེ་དག་ཀྱང་འདི་སྙམ་དུ་སེམས་ཏེ། འདི་དག་གི་སྟོན་པས་ཀྱང་བསོད་སྙོམས་ལ་རྒྱུ་བར་བྱས་ན་འདི་དག་ཅིའི་ཕྱིར་བསོད་སྙོམས་ལ་རྒྱུ་བ་མི་བྱེད་སྙམ་སྟེ། དེ་དག་གིས་བསྔགས་པའང་བརྗོད་པར་བགྱིད་ལ། བསོད་སྙོམས་ཀྱང་སྟེར་བར་འགྱུར་ཏེ། འདི་སྐད་དུ། བསོད་སྙོམས་ལ་རྒྱུ་བ་འདི་ནི་གཙུག་ལག་ལས་འབྱུང་བའི་བསོད་སྙོམས་ཡིན་ནོ། ། སྤྱོད་པ་འདི་ནི་དེ་བཞིན་གཤེགས་པས་བསྔགས་པ་ཡིན་ནོ་ཞེས་ཀྱང་སྨྲ་བར་འགྱུར་ཏེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 19.རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། བློན་པོའི་བུ་རྣམས་ལས་ལེགས་པར་གསུངས་པའི་ཆོས་འདུལ་བ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་དག་བདག་ཅག་ནི་འདི་ལྟར་རིགས་ཆེན་པོར་སྐྱེས་པ་ཡིན་ན་ཟས་ཀྱི་ཕྱིར་ཁྱིམ་ནས་ཁྱིམ་དུ་བསོད་སྙོམས་ལ་ཅིའི་ཕྱིར་རྒྱུ་བར་བྱ་སྙམ་སྟེ། ངོ་ཚ་ནས་བསོད་སྙོམས་ལ་རྒྱུ་བར་མི་བགྱིད་པ་དེ་དག་དེ་བཞིན་གཤེགས་པའི་བསོད་སྙོམས་དང་། གཟི་བྱིན་དང་ལྡན་པའི་སྐུའི་རྗེས་སུ་སློབ་ཅིང་བསོད་སྙོམས་ལ་རྒྱུ་བར་འགྱུར་ཏེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 20.དེ་བཞིན་གཤེགས་པ་རྣམས་ཀྱིས་ནི་འཇིག་རྟེན་དང་མཐུན་པར་མཛད་འཚལ་ཏེ། ཇི་ལྟ་ཇི་ལྟར་སེམས་ཅན་རྣམས་ཡོངས་སུ་ སྨིན་པར་འགྱུར་བ་དེ་ལྟ་དེ་ལྟར་མཐུན་པར་མཛད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། ། 21.དེ་བཞིན་གཤེགས་པ་ལ་ནི་སྒྲིབ་པའམ། སྐྱེམས་པའང་མི་མངའ། ཉམ་ཆུང་བའང་མི་མངའ། ཆགས་པའང་མི་མངའ། ཆགས་པར་འགྱུར་བའང་མི་མངའ། སྡིག་པ་བཞེད་པའང་མ་ལགས། གསོག་པའང་མི་མངའ་མོད་ཀྱི་འོན་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འཇིག་རྟེན་དང་མཐུན་པར་མཛད་པ་དང་། སེམས་ཅན་ཡོངས་སུ་སྨིན་པར་མཛད་པའི་སླད་དུ་བསོད་སྙོམས་ལ་རྒྱུ་བ་མཛད་དོ། །
Tibetan Source	《མདོ་བ་པ་》ཤ་328ན་5ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number