10990

Tibetan	རྡོ་རྗེ་སེམས་དཔའི་དམ་ཚིག་གི་ཡན་ལག་བརྟུལ་ཞུགས་ཉི་ཤུ་རྩ་ལྔ།
Tibetan Alternate
Tibetan Definition	དེ་ཡང་། སྡོམ་པ་གསུམ་རྣམ་པར་ངེས་པའི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ལས་བྱུང་བ་སྟེ། དང་པོ། སྡིག་པ་ལྔ་སྤང་བ་ནི། 1.སྲོག་ཆགས་ཕྲ་མོ་ཡན་ཆད་ཀྱི་སྲོག་གཅོད་པ་ལྟ་ཅི་སྨོས་སྐད་ཅིག་ཙམ་མནར་སེམས་པས་འཚེ་བར་བྱེད་པ། 2.རང་འདོད་ཀྱི་གཞན་བསླུ་བའི་བསམ་པས་རྫུན་སྨྲ་བ། 3.དུད་འགྲོ་ཡན་ཆད་ཀྱིས་བདག་ཏུ་བཟུང་བའི་གཞན་ནོར་རྐུ་བ། 4.གཞན་གྱིས་བདག་ཏུ་བཟུང་བའི་བུད་མེད་བསྟེན་པ་སོགས་འདོད་པས་ལོག་པར་གཡེམ་པ། 5.ཉེས་པ་བསྐྱེད་པའི་གཞི་ཆང་གི་བཏུང་བས་མྱོས་པར་བྱེད་པ་དང་ལྔ་ནི་འཁོར་བའི་གནས་སུ་འཆིང་བྱེད་དམ་པོ་རྡོ་རྗེའི་ཞགས་པ་དང་མཚུངས་ཤིང་རང་གཞན་གྱི་བདེ་དགེ་ཐམས་ཅད་འཇོམས་པར་བྱེད་པས་ན་དེ་རྣམས་ཕྱོགས་མཐུན་ཆར་གཏོགས་དང་བཅས་པ་སྤང་བར་བྱ་དགོས་ལ། དེ་ལྔ་བསྲུང་ནུས་ཤིང་འདོད་ན་བརྟུལ་ཞུགས་ལྷག་མ་ཉི་ཤུ་སྦྱིན་པར་བྱ་བ་ཡིན་པས་བསླབ་པའི་གཞི་ལྔ་ཞེས་གསུངས་སོ། ། གཉིས་པ་ཉེ་བའི་སྡིག་པ་ལྔ་སྤང་བ་ནི། 1.ཤོ་དང་མིག་མངས་སོགས་ཆོ་ལོ་རྩེ་བ། 2.བཟའ་བ་དང་རིན་གྱི་དོད་དུ་བསད་པའི་ཤ་སོགས་ཁ་ན་མ་ཐོ་བ་ཆོས་དང་མི་མཐུན་པའི་ཟས་ཟ་བས་འཚོ་བ། 3.ཉོན་མོངས་པ་ཅན་གྱི་ཀུན་ནས་བསླངས་པའི་དམག་འཁྲུག་དང་ཚོང་གི་གཏམ་སོགས་ངག་འཁྱལ་སྣ་ཚོགས་པའི་ཚིག་ངན་སྨྲ་བ། 4.རིག་བྱེད་ལས་བྱེད་པའི་ཕ་མེས་ཀྱི་མཚུན་ལ་གསོལ་བ་སོགས་ཀྱིས་སྤྱོད་པ་དང་གྲོལ་བར་ལྟ་བ་དང་ཕྱུགས་ཀྱིས་མཆོད་སྦྱིན་བྱ་བ་འབྱུང་པོའི་ཆོས། 5.རང་གིས་བསད་པའི་ཤ་མ་གཏོགས་ལས་ཀྱིས་ཤི་བའི་ཤ་མི་ཟ་ཞིང་གོས་དཀར་པོ་དང་བྱ་གག་གི་བཏུང་བ་འབའ་ཞིག་བསྟེན་པ་སོགས་ལྷ་མིན་གྱི་ཆོས་ལུགས་ཀླ་ཀློའི་ཆོས་ཏེ། བྱེ་བ་ངན་པ་དེ་རྣམས་ཀྱིས་འདུས་འདས་ན་དགེ་བའི་ཕྱོགས་ཉམས་པར་བྱེད་པའི་ཕྱིར། ཉེ་བའི་སྡིག་པ་ལྔ་ཞེས་གྲགས་པ་བྱ་བར་རིགས་པ་མ་ཡིན་པས་དེ་རྣམས་མི་བྱའོ། ། གསུམ་པ་གསོད་པ་ལྔ་སྤང་བ་ནི། བ་ལང་བྱིས་པ་སྐྱེས་པ་བུད་མེད་དང་། ། མཆོད་རྟེན་བསྙེན་པ་གསོད་པ་ལྔ་རུ་གྲགས། ། ཞེས་པ་སྟེ། རྐང་པ་དང་པོའི་གསོད་པ་བཞི་པོ་འདི་རྣམས་སྔར་གྱི་འཚེ་བའི་ནང་དུ་འདུ་ནའང་འདིར་ལོགས་སུ་དགར་ཏེ་འཆད་པ་ནི། མུ་སྟེགས་བྱེད་མང་པོ་ཞིག་སྤྱིར་འཚེ་བ་སྡིག་པ་ཡིན་ཀྱང་དགེ་བར་འདོད་པའི་སྐབས་ཡོད་པ་དགག་པའི་ཕྱིར་ཏེ། ཇི་ལྟར་ན། 1.མཐོ་རིས་འདོད་པའི་མཆོད་སྦྱིན་གྱི་དོན་དུ་བ་ལང་གསོད་པ། 2.མ་མོ་མཆོད་པ་ལ་བྱིས་པ་གསོད་པ། 3.མིའི་མཆོད་སྦྱིན་སྐྱེས་པའི་དོན་དུ་སྐྱེས་པ་གསོད་པ། 4.བུད་མེད་ཀྱི་དོན་དུ་བུད་མེད་གསོད་པ། 5.ལྷ་མིའི་བླ་མ་གསོད་པ་ཞེས་སངས་རྒྱས་སྲས་བཅས་ཀྱི་སྐུ་གཟུགས་དང་བཀའི་གླེགས་བམ་དང་མཆོད་རྟེན་རྣམས་བསྣུན་ཏེ་བཤིག་པ་ལ་གསོད་པའི་སྒྲས་བཏགས་པ་འདི་ནི་ཀླ་ཀློ་རྣམས་ཆོས་སུ་འདོད་པ་དགག་པའི་དོན་དུ་མ་ཟད་ཤིན་ཏུ་སྡིག་ཆེ་བས་སྨོས་པ་སྟེ། དེ་ལྟར་གསོད་པ་ལྔ་ལས་ལྡོག་པར་བྱའོ། ། བཞི་པ་འཁུ་བ་ལྔ་སྤང་བ་ནི། 1.ཆོས་དང་འཇིག་རྟེན་གང་རུང་གིས་སྦྲེལ་བའི་མཉམ་པོར་འགྲོགས་པའི་དགེ་གྲོགས། 2.ལུགས་གཉིས་ཀྱིས་བཀུར་བར་འོས་པའི་རྗེ་བོ་རྒན་རབས་སོགས། 3.ལྷ་མིའི་བླ་མ་སངས་རྒྱས། 4.དགེ་སློང་གི་དགེ་འདུན། 5.ཡིད་རྟོན་པར་འོས་པའི་ཡུལ་མཁན་སློབ་སོགས་བླ་མ་སྟེ། ཡུལ་ལྔ་པོ་དེ་ལ་ཁོང་ཁྲོ་སྒོམ་ཞིང་འཁང་བ་ནི་འཁུ་བ་ལྔ་སྟེ་སྤང་བར་བྱའོ། ། དེ་ལྟར་སྡིག་པ་དང་། ཉེ་བའི་སྡིག་པ་དང་། གསོད་པ་དང་། འཁུ་བ་ལྔ་ལྔ་སྟེ་ཉི་ཤུ་པོ་འདི་རྣམས་ནི་འཕྲལ་སྤྱོད་ལམ་གྱི་སྒོ་ནས་སྤང་ཞིང་ལྡོག་པ་ལ་འབད་པར་བྱ་བ་ཡིན་ནོ། ། ལྔ་པ་ཆགས་པ་ལྔ་སྤང་བ་ནི། གཟུགས་སྒྲ་དྲི་རོ་རེག་བྱ་ཡུལ་ལྔ་ལ། ། མིག་དང་རྣ་བ་སྣ་ལྕེ་ལུས་དབང་ལྔ། ། ཞེན་པར་མི་བྱེད་བརྟུལ་ཞུགས་ཉེར་ལྔའོ། ། ཞེས་པ་སྟེ། མིག་གི་དབང་པོ་ཡུལ་གཟུགས་ལ་ཆགས་པ་ནས་ལུས་དབང་རེག་བྱ་ལ་ཆགས་པའི་བར་ཏེ། དབང་ཤེས་ཀྱི་རྗེས་སུ་འབྲང་བའི་རྣམ་རྟོག་ཡུལ་ལྔ་ལ་ཞེན་པས་ཆགས་པའོ། ། དེ་རྣམས་ནི་ཡང་སྲིད་འཕེན་ནུས་ཀྱི་ལས་སུ་རྫོགས་པས་སྤང་བར་བྱ་དགོས་མོད། འོན་ཀྱང་སོ་སྐྱེ་འདོད་ཁམས་པས་རྩ་བ་ནས་ལྡོག་པར་མི་ནུས་ནའང་། ཉིན་རེ་བཞིན་ཐུན་གསུམ་ལ་སོགས་པར་བཅད་ནས་གཉེན་པོ་སྒོམ་པ་ལ་འབད་པར་བྱ་ཞིང་། གཉེན་པོའང་བསྐྱེད་རིམ་གྱིས་ཡུལ་དབང་ལྷ་སྐུར་བསྒྱུར་བ་དང་། རྫོགས་རིམ་སོ་སོར་སྡུད་པའི་རྣལ་འབྱོར་གྱིས་དབང་པོ་ལྔ་ཡུལ་ལྔ་ལ་འཇུག་པ་གཅོད་པའོ། ། དེ་ལྟར་བརྟུལ་ཞུགས་ཀྱི་གཙོ་བོ་ཆགས་པ་ལྔ་སྤོང་ཐབས་ནི་སོར་སྡུད་ཡིན་ལ། དེ་རྡོ་རྗེ་སེམས་དཔའི་ལམ་དུ་བཤད་པ་ལྟར་འདིར་ཡང་སྲིད་པའི་བདག་པོ་རྡོ་རྗེ་སེམས་དཔའི་བརྟུལ་ཞུགས་ཉེར་ལྔ་ཞེ་བ་སོ། །
Tibetan Source	《སྔ་འགྱུར་བཀའ་མའི་གླེགས་བམ་ཇི་པ》ཤ246བ2ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number