11079

Tibetan	སྤང་ལྟུང་སུམ་ཅུ།
Tibetan Alternate
Tibetan Definition	ཁག་གསུམ་པ། སྡོམ་པ་གསུམ་རྣམ་པར་ངེས་པའི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ལས་བྱུང་བ་སྟེ། སྤང་བ་ལྟུང་བྱེད་ཀྱི་སྡེ་ལ་བསྟན་བཤད་གཉིས་ལས། དང་པོ་སྤང་བ་ལྟུང་བྱེད་སུམ་ཅུའི་སྡེ་བཤད་པ། ཞེས་པ་སྟེ། གང་ལ་ལྟུང་བ་བྱུང་བའི་དངོས་པོ་དེ་སྤངས་པའི་སྒོ་ནས་ཕྱིར་བཅོས་དགོས་ཤིང་། མ་བཅོས་ན་རྣམ་སྨིན་ངན་སོང་དུ་ལྟུང་བར་བྱེད་པས་ན་སྤང་ལྟུང་ཞེས་སྟེ། དེའི་མཚན་ཉིད་ནི། བསྙེན་པར་རྫོགས་པའི་རྒྱུད་ཀྱི་བཅས་འགལ་གང་ཞིག སྤང་བ་ལྟུང་བྱེད་ཀྱི་མིང་གིས་ཕྱིར་བཅོས་ན་དག་ཏུ་རུང་བའོ། ། དེ་རྒྱས་པར་དབྱེ་ན། 1.གོས་ལྷག་འཆང་བའི་སྤང་བ་ནི། ཆང་འབྲལ་འཇོག་གསུམ་གཉན་ཡོད་དུ་དགེ་སློང་མང་པོ་ལ་བཅས། དེ་ཡང་སྲ་བརྐྱང་མ་བཏིང་བའི་གང་ཟག་གིས། རང་དབང་ཞིང་བདག་ཏུ་བཟུང་བའི་གོས་ལྷག་པོ། ཚད་འཁོར་གསུམ་ཁེབས་པའི་མཐའི་ཚད་དུ་ལོངས་པའམ། གལ་ཏེ་བྱིན་གྱིས་བརླབ་རུང་གི་ཆོས་གོས་རྣམ་གསུམ་ཡོད་པ་དང་། མེད་ཀྱང་ཆོས་གོས་ཀྱི་ཁ་བསྐང་བའི་རེ་བ་མེད་ན་ཁྲུ་གང་གི་ཚད་དུ་ལོངས་པ། རང་མིང་ངམ་རྣམ་བརྟགས་གང་རུང་གིས་བྱིན་གྱིས་མ་བརླབས་པའམ་བརླབས་ཀྱང་ཤན་དང་རྗེས་སུ་འབྲེལ་བས། རང་སྟོབས་སམ་ཤན་སྟོབས་གང་རུང་གིས་ཞག་བཅུ་འདས་ནས་བཅུ་གཅིག་པའི་སྐྱ་རེངས་དང་པོ་ཤར་བའོ། ། འདི་ལ་གོས་ལྷག་པོ་ལྟ་ཅི་སྨོས། རང་དབང་ཞིང་གནས་སྐབས་དབང་བྱར་ཡོད་པའི་གོས་རྙེད་ནས་ཞག་བཅུའི་ནང་དུ། གོས་བྱིན་བརླབས་ཅན་སྔར་མེད་ན་འཚོ་བའི་ཡོ་བྱད་བཅུ་གསུམ་པོ་གང་རུང་དུ་རང་མིང་གིས་བྱིན་གྱིས་རློབ་ཅིང་། གལ་ཏེ་བྱིན་བརླབས་ཅན་སྔ་མ་ཡོད་ན། ཕྱིས་རྙེད་པ་དེ་ཞེ་ཐག་པ་ནས་གཞན་ལ་བསྔོ་བ་དང་། ལྷག་པོའམ་མཁོ་བའི་ཡོ་བྱད་དུ་རྣམ་བརྟགས་ཀྱིས་བྱིན་གྱིས་བརླབ་པ་གང་རུང་བྱ་དགོས་པ་ཡིན་ནོ། ། འོ་ན་སྤང་བ་བསྐྱེད་པ་ལ་བྱིན་གྱིས་མ་བརླབས་པའི་གོས་དེས་རང་སྟོབས་ཉིད་ཀྱིས་ཞག་བཅུ་འདས་དགོས་སམ་སྙམ་ན། མི་དགོས་ཏེ། བྱིན་གྱིས་མ་བརླབས་པའི་གོས་སྔ་མས་ཞག་གཅིག་ནས་དགུའི་བར་གང་རུང་ལོན་ལ། དེའི་རྗེས་སུ་གོས་གཉིས་པ་ཞིག་རྙེད་ན། དེ་ཉིད་ཀྱི་ཉིན་པར་སྔ་མའི་ཞག་ཤན་ཕྱི་མ་ལ་འབྱུང་བས། སྔ་མས་ཞག་གང་ལོན་དེ་ཕྱི་མས་ཀྱང་ལོན་པར་འཇོག་དགོས་པའི་ཕྱིར་ཏེ། འདི་ལ་གཞན་ཡོད་ན་བྱིན་གྱིས་མ་བརླབས་པ་དེའི་ཤན་ཚུན་ཆད་ནས་སོ། ། ཞེས་གསུངས་པའི་ཕྱིར། བྱིན་གྱིས་བརླབས་པ་ཙམ་གྱིས་ཉེས་པ་དེ་ཁེགས་སམ་ཞེ་ན། སྔ་ཕྱི་གཉིས་ཀ་བརླབས་པའམ། ཤན་མ་འདྲེས་གོང་དུ་སྔ་མ་དེ་བརླབས་ན་ཁེགས་མོད། སྔ་མ་བྱིན་གྱིས་མ་བརླབས་ན་ཕྱི་མ་བརླབས་ཀྱང་སྔ་མའི་ཤན་སྟོབས་ཀྱིས་དེའི་ཉེས་པ་མི་ཁེགས་ཏེ། འབྲེལ་ཀྱང་རྗེས་སུ་ཞུགས་པ་དང་བཅས་པ་ལའོ། ། ཞེས་སོ། ། སྔ་མ་བརླབས་པས་རྟིང་མ་ལ་ཤན་མི་འབྱུང་ནའང་། དེས་རྟིང་མ་བྱིན་གྱིས་བརླབས་པའི་གོ་མི་ཆོད་དེ། རྟིང་མས་ཞག་བཅུ་ལོན་པའི་ཚེ་རང་སྟོབས་ཀྱིས་ལྟུང་བ་བསྐྱེད་པ་བཞིན་ནོ། ། སྤྱིར་ཤན་གྱི་རྣམ་གྲངས་ལ་བཞི་སྟེ། གོས་ཀྱི། ལྷུང་བཟེད་ཀྱི། སྨན་གྱི། ལྟུང་བའི་ཤན་ནོ། ། དང་པོ་ལ། ཞག་བཅུ་པའི་དང་། ཟླ་འཇོག་གི་ཤན་གཉིས་ཡོད། དེ་གཉིས་སྤྱིར་བཏང་ལ་བརྡེག་བྱ་རྡེག་བྱེད་དུ་མི་རུང་མོད། དམིགས་བསལ་ལ་མུ་བཞི་ཡོད་དེ། སྔར་རྙེད་པའི་ཟླ་འཇོག་གི་གོས་ཏེ། ཕྱིས་ཆོས་གོས་ཡོངས་རྫོགས་རྙེད་པའི་སྟོབས་ཀྱིས་ཞག་བཅུ་པའི་གོས་སུ་རིགས་ལོག་ཅིང་། གོས་ཕྱི་མ་དེ་སྔ་མའི་ཕྱི་དྲོ་དེ་ཀ་རྙེད་པ་ཡིན་ན་ཤན་མི་འབྱུང་ལ། ཞག་ཕྱི་མ་རྣམས་ལ་རྙེད་ན་ཤུན་ཀྱང་འབྱུང་བ་དང་། ཡང་གོས་སྔ་རྟིང་གཉིས་ཀ་ཟླ་བར་བཞག་ཏུ་རུང་བའི་གོས་ཡིན་ན་རིག་མ་ལོག་མོད། རྟིང་མ་རྙེད་པའི་གོས་དེ་ཞག་ཕྱི་མའམ། ཞག་དེ་ཀའི་ནང་དུ་རྙེད་པའི་ཁྱད་པར་ལས་ཤན་འབྱུང་མི་འབྱུང་སྟེ། དེ་ལྟར་མུ་བཞིའོ། ། དེས་ན་གོས་དང་ལྷུང་བཟེད་ཀྱི་ཤན་ནི། རྡེག་བྱེད་བྱིན་གྱིས་མ་བརླབས་པ་ཉིད་ཀྱིས། བརྡེག་བྱ་རང་དང་དུས་མཉམ་པའམ་རྟིང་ལ་རྙེད་པའི་གོས་དང་ལྷུང་བཟེད་བྱིན་གྱིས་བརླབས་མ་བརླབས་གང་ཡིན་ཀྱང་འདྲ་སྟེ་ཤན་འཇུག་པ་ཡིན་ནོ། ། སྨན་གྱི་ཤན་ནི་རྡེག་བྱེད་གྱིས་བརླབས་པ་ཉིད་ཀྱིས། བརྡེག་བྱ་བྱིན་གྱིས་བརླབས་པ་དང་མ་བརླབས་པ་གཞན་ལ་ཤན་རྡེག་པ་ཡིན་ཅིང་། དེ་ཡང་སྔ་དྲོ་ཐུན་ཚོད་དུ་རུང་བའི་སྨན་གཉིས་དང་། ཞག་དང་པོ་ལ་ཞག་བདུན་པའི་སྨན་བུ་རམ་ལྟ་བུ་གཉིས་རྙེད་པ་ལས། སྨན་གཅིག་བྱིན་གྱིས་བརླབས། གཅིག་མ་བརླབས་པར་བཞག་པ་ན། ཐུན་ཚོད་ཀྱི་མཐའ་དང་ཞག་བདུན་པ་འདས་ནས་བརྒྱད་པའི་སྐྱ་རེངས་ཤར་བའི་ཚེ་བྱིན་གྱིས་བརླབས་པས་རང་སྟོབས་དང་། མ་བརླབས་པས་ཤན་སྟོབས་ཀྱི་གསོག་འཇོག་གི་སྤང་བ་བསྐྱེད་ལ། ཡང་དུས་མི་མཉམ་པའི་དབང་དུ་བྱས་ན། ཐུན་ཚོད་ཀྱི་སྨན་སྔ་དྲོ་རྙེད་པ་དང་། ཚེས་གཅིག་ལྟ་བུར་བུ་རམ་གྱི་སྨན་རྙེད་པ་བྱིན་གྱིས་བརླབས་ནས་བཞག་ཕྱི་དྲོ་ཐུན་ཚོད་ཀྱི་སྨན་གཉིས་པ་དང་། ཞག་གཉིས་ནས་བདུན་གྱི་བར་བུ་རམ་གྱི་སྨན་གཉིས་པ་རྙེད་པ་བྱིན་གྱིས་བརླབས་སམ་མ་བརླབས་ཀྱང་འདྲ་སྟེ། རང་རང་གི་དུས་འདས་པའི་ཚེ་སྔ་མས་རང་སྟོབས་དང་ཕྱི་མས་ཤན་སྟོབས་ཀྱི་སྤང་ལྟུང་བསྐྱེད་ཅིང་། ཁྱད་པར་ཞག་བདུན་པའི་སྨན་ཤན་ནི་བུ་རམ་གྱིས་བུ་རམ་ལ་རྡེག་པ་ལྟ་བུ་སྨན་སྔ་ཕྱི་རིགས་མཐུན་པ་དགོས་ཏེ། ཞག་བདུན་པ་ནི་རིགས་མཐུན་པ་ལའོ། ། ཞེས་གསུངས་པའི་ཕྱིར། གཞན་རྣམས་ལ་ནི་བཅས་པ་རིགས་འདྲ་བས་ཆོག་གི་རྫས་སྔ་ཕྱི་རིགས་མཐུན་པ་མི་དགོས་ཤིང་། འཚོ་བཅངས་ཀྱི་སྨན་ནི་ཇི་སྲིད་འཚོའི་བར་དུ་གནང་བས་ཤན་མི་འབྱུང་ངོ་། ། ལྟུང་བའི་ཤན་ནི། སྤང་ལྟུང་སུམ་ཅུ་ལས་གང་རུང་བྱུང་བ་ཕྱིར་བཅོས་མ་བྱས་པའི་བར་ལ་གོས་སོགས་འཚོ་བའི་ཡོ་བྱད་གང་རྙེད་ཀྱང་རུང་སྟེ། ལྟུང་བ་སྔ་མ་དེ་ཕྱིར་བཅོས་བྱེད་པའི་ཚེ་དེའི་རྒྱུར་གྱུར་པའི་རྫས་དེ་ཉིད་དུ་མ་ཟད། ཡོ་བྱད་རྟིང་མ་དེ་རྣམས་ཀྱང་སྔ་མའི་ཤན་གྱིས་སྤོང་དགོས་པ་ཡིན་ཏེ། ལྟུང་བ་དེ་ཡོད་ན་ཡོ་བྱད་ཙམ་བདག་གིར་བྱས་པ་ལ་སྤང་པ་ཉིད་དོ། ། ཞེས་སོ། ། འཆང་འབྲལ་འཇོག་གསུམ་གྱི་ཉེས་པ་འདི་ནི། ས་བརྐྱང་བཏིང་ཚགས་ཀྱི་གང་ཟག་ལ་མི་འབྱུང་སྟེ། དེ་ལ་དེ་གསུམ་བག་ཡངས་ཀྱི་ཚུལ་དུ་གནང་བའི་ཕྱིར་རོ། ། 2.འབྲལ་བའི་སྤང་བ་ནི། སྣམ་སྦྱར་ལ་འབྲལ་བའི་གནང་བ་མ་ཐོབ་ཅིང་སྲ་བརྐྱང་མོ་བཏིང་བའི་གང་ཟག་གིས་འཇིགས་བཅས་ཀྱི་དགོན་པ་ལས་གཞན་དུ་བྱིན་གྱིས་བརློབས་པའི་ཆོས་གོས་གསུམ་པོ་ཐམས་ཅད་དམ་གང་རུང་བཞག་པའི་གནས་ཉེ་འཁོར་དང་བཅས་པ་ལས་ཞག་གཅིག་བྲལ་ནས་ཞག་ཕྱི་མའི་སྐྱ་རེངས་ཤར་བའོ། ། 3.ཟླ་འཇོག་གི་སྤང་བ་ནི། སྲ་རྐྱང་མ་བཏིང་ཞིང་ཆོས་གོས་གསུམ་གང་རུང་མེད་པའི་གང་ཟག་གིས་ཁ་བསྐང་བའི་རེ་བ་དང་བཅས་པའི་ཆོས་གོས་ཀྱི་རྒྱུ་ཁྲུ་གང་གི་ཚད་དུ་ལོངས་ཤིང་འཁོར་གསུམ་མི་ཁེངས་པ། བྱིན་གྱིས་མ་བརླབས་པའམ། བརླབས་ཀྱང་ཤན་དང་རྗེས་སུ་འབྲེལ་བས། རང་སྟོབས་སམ་ཤན་སྟོབས་གང་རུང་གིས་ཞག་སུམ་ཅུ་འདས་ནས་སོ་གཅིག་པའི་སྐྱ་རེངས་ཤར་བའོ། ། 4.ཆོས་གོས་འཁྲུར་འཇུག་པའི་སྤང་བ་ནི། གཉན་ཡོད་དུ་འཆར་ཀ་ལ་བཅས་ཏེ། བདུན་རྒྱུད་ཚུན་ཆད་ཀྱི་ཉེ་དུ་མ་ཡིན་པའི་དགེ་སློང་མ་ལ་རང་གི་ཆོས་གོས་གསུམ་དང་གདིང་བ་རྙིང་པ་ལས་གང་རུང་འཁྲུར་བཅུག་པ་ན། གོས་ཀྱི་ཕྱོགས་གཅིག་ཙམ་འཁྲུ་བའི་ལས་བྱས་པའོ། ། 5.གོས་ལེན་པའི་སྤང་བ་ནི། འདི་ནས་བསྐུར་བའི་བར་དྲུག་ཀ་གཉན་ཡོད་དུ་ཉེར་དགའ་ལ་བཅས་ཏེ། ཆོས་གོས་རྣམ་གསུམ་ཡོད་པའི་དགེ་སློང་གིས་ཉེ་དུ་མ་ཡིན་པའི་དགེ་སློང་མ་ལ་འཁོར་གསུམ་ཁེབས་པའི་མཐའི་ཚད་དུ་ལོངས་པ་ཡན་ཆད་ཀྱི་གོས་བསླངས་པས་ལག་ཏུ་ཐོབ་པའོ། ། 6.སློང་བའི་སྤང་བ་ནི། ཆོས་གོས་རྣམ་གསུམ་ཡོད་པའི་དགེ་སློང་གིས་ཉེ་དུ་མ་ཡིན་པའི་ཁྱིམ་པ་ལ་འཁོར་གསུམ་ཁེབས་པའི་ཚད་དུ་ལོངས་པའི་གོས་བསླངས་ཏེ་ཐོབ་པའོ། ། 7.སློང་བར་རིགས་པའི་སྤང་བ་ནི། ཆོས་གོས་རྣམ་གསུམ་མེད་པའི་དགེ་སློང་གིས་ཁྱིམ་པ་ཉེ་དུ་མ་ཡིན་པ་ལ་བསླངས་པས་གོས་མང་པོ་སྟེར་ནའང་སྟོད་གཡོགས་དང་སྨད་གཡོགས་ཙམ་བླང་རིགས་ཀྱིས། དེ་ལས་ལྷག་པ་ལེན་ན་ལྟུང་བའོ། ། 8.དཔགས་པ་སློང་བའི་སྤང་བ་ནི། ཁྱིམ་པ་ཉེ་དུ་མ་ཡིན་པས་སྦྱིན་གནས་དགེ་སློང་རང་ཉིད་ལ་སྟེར་བར་བསམ་པའི་གོས་འདི་འབུལ་ཞེས་བློས་དཔགས་པ་ལས། དངོས་སུ་འབུལ་ལོང་མེད་པར་སྔ་ཚོམས་སུ་རིན་དང་ཁྲུ་ཚད་ཀྱིས་དྲན་པ་བརྗོད་ནས་བསླངས་པས་ཐོབ་པའོ། ། 9.སོ་སོ་ནས་དཔགས་པ་སློང་བའི་སྤང་བ་ནི། ཉེ་དུ་མ་ཡིན་པའི་ཁྱིམ་བདག་ཕོ་མོ་སོ་སོ་ནས་གོས་རེ་རེའམ་མང་པོ་དགེ་སློང་རང་ལ་འབུལ་བར་དཔགས་པ་དེ་ཐོས་ནས་འབུལ་མི་འབུལ་བརྟག་པའི་བསམ་པས་དྲན་པ་བརྗོད་དེ་བསླངས་པས་ཐོབ་པའོ། ། འདི་གཉིས་རང་ལ་བསྔོས་ཚོད་ལས་ལྷག་པའི་དངོས་པོ་ཐོབ་པ་ཞིག་དགོས་གསུངས་ནའང་། མདོའི་དངོས་བསྟན་ལ་འབུལ་ལོང་མེད་པར་སྔ་ཚོམས་སུ་བླངས་པའི་ཉེས་པ་ཉིད་གསལ་ལོ། ། 10.བསྐུར་བའི་སྤང་བ་ནི། སྦྱིན་བདག་ཕོ་ཉ་བ་ཞལ་ཏ་པ་སྟེ་ཁྱིམ་པ་གསུམ་ལས། སྦྱིན་བདག་གིས་གོས་སྒྲུབ་ཏུ་བཅུག་པ་ལས། སྦྱིན་བདག་གིས་གོས་རིན་རུང་བ་མ་ཡིན་པ་གསེར་དངུལ་ལྟ་བུ་ཞིག་བསྐུར་བ་ཕོ་ཉས་དགེ་སློང་ལ་ཕུལ་བས། དེ་ལེན་དུ་མི་རུང་ཞེས་སྤངས་པ་ན། ཕོ་ཉ་དེས་དགེ་སློང་རང་གི་ཞལ་ཏ་པ་ལ་གཏད་ནས་གོས་བསྒྲུབ་ཏུ་བཅུག་པས། གོས་དུས་སུ་མ་བྱུང་ན་དགེ་སློང་གིས་ཞལ་ཏ་པ་ལ་དངོས་སུ་བསྐུལ་བ་གསུམ་བྱ། དེ་ལ་མ་བྱུང་ན་ལན་གསུམ་མཐོང་སར་ཅང་མི་སྨྲ་བས་ལྡང་ནས་བསླངས་པ་ལ་ཉེས་པ་མེད་ཅིང་། དེ་ལས་ལྷག་པར་བྱས་པས་གོས་ཐོབ་ན་སྤང་བར་འགྱུར་རོ། ། 11-13.རིན་ཐང་ཆེ་བའི་དངོས་པོ་སྲིན་བལ་སོགས་ཀྱི་སྟན་སྤང་བ་དང་། གང་དུ་བལ་ནག་དཀོན་སར་བལ་ནག་འབའོ་ཞིག་གི་སྟན་སྤང་བ་དང་། བལ་ནག་པོ་སྟན་གྱི་ཆ་གཉིས་ལས་ལྷག་པའི་སྟན་སྤང་བ་སྟེ། དེ་ལྟར་དེ་རྒྱུ་གསུམ་ལས་རང་ངམ་གཞན་ལ་བསྐོས་པས་སྟན་ནང་ཚང་ཅན་གསར་དུ་བྱེད་ན། དེ་དག་བཀྲམ་པ་ཙམ་གྱིས་དེ་དང་དེའི་སྤང་བའོ། ། 14.ལོ་དྲུག་གི་སྤང་བ་ནི། སྟན་སྔ་མ་ཡོད་བཞིན་དུ་གནང་བ་མ་ཐོབ་པར་ལོ་དྲུག་གི་ནང་དུ་སྟན་ནང་ཚང་ཅན་གཉིས་པ་བྱས་ཤིང་ཟིན་པའོ། ། 15.མཐོ་གང་གི་སྤང་བ་ནི། ཚད་ལྡན་གྱི་འདིང་བ་རྙིང་པ་ཡོད་ན་གསར་དུ་བཟོ་བའི་ཚེ་རྙིང་པ་ནས་ཆུང་ཐ་ཡང་བདེ་བར་གཤེགས་པའི་མཐོ་གང་སྟེ་མིའི་ཁྲུ་ཕྱེད་དོ་གསར་པ་ལ་མ་བསླན་པར་ལོངས་སྤྱད་པའོ། ། 16.ལམ་དུ་བལ་ཐོགས་པའི་སྤང་བ་ནི། འདི་ནས་ཉོ་ཚོང་གི་བར་ལྔ་དྲུག་སྡེ་ལ་བཅས་ཏེ། རང་དབང་བའི་དངོས་པོ་བལ་ལ་སོགས་པའི་ཁུར་ཆེན་པོ་ཆགས་སེམས་ཀྱིས་ཁྱེར་ནས་ཉི་མ་གཅིག་གི་ནང་དུ་རྒྱང་གྲགས་ལས་འདས་པ་སྟེ། དེ་ཡང་དགེ་ཚུལ་ལྟ་བུ་འཁུར་ཁྱེར་གྲོགས་གཞན་མེད་ན་དཔག་ཚད་གསུམ་ཚུན་ཆད་གནང་བས། དེ་ནས་བརྩམས་ཏེ་རྒྱང་གྲགས་གཅིག་གི་མཐར་ཕྱིན་པའམ། ཁྱེར་གྲོགས་ཡོད་ན་དང་པོ་ནས་བརྩམས་ཏེ་རྒྱང་གྲགས་འདས་པའོ། ། 17.བལ་འཁྲུར་འཇུག་པའི་སྤང་བ་ནི། ཉེ་དུ་མ་ཡིན་པའི་དགེ་སློང་མ་ལ་དགེ་སློང་གིས་བལ་འཁྲུ་བ་དང་རྨེལ་བ་དང་འཚེད་དུ་བཅུག་པ་ལས་དེས་དེ་དང་དེ་བྱས་པའོ། ། 18.རིན་ཆེན་ལ་རེག་པའི་སྤང་བ་ནི། དགེ་སློང་གིས་གསེར་དངུལ་སོགས་རུང་བ་མ་ཡིན་པ་ལ་རུང་བ་མ་བྱས་པའི་རིན་པོ་ཆེ་ཆུད་ཟ་བ་སོགས་ཀྱི་ཉེས་པ་མེད་བཞིན་དུ་ཆགས་སེམས་ཀྱིས་རེག་གམ་རེག་ཏུ་བཅུག་སྟེ་བདག་གིར་བྱས་པའོ། ། རུང་བ་བྱ་ཚུལ་གསུམ་སྟེ། སྦྱིན་བདག་བདག་པོ་ཉིད་དུ་མོས་སུ་གཞུག་པ་དང་། ཞལ་ཏ་བྱེད་པ་བདག་པོ་ཉིད་དུ་ཁས་ལེན་དུ་གཞུག་པ། བྱིན་གྱིས་བརླབས་པའོ། ། 19.མངོན་ཚན་ཅན་གྱི་སྤང་བ་ནི། དགེ་སློང་གིས་ཉེ་དུ་མ་ཡིན་པའི་ཁྱིམ་པར་འདོད་ཞེན་གྱིས་ཁེ་སྤོགས་འདོད་པས་ཚོང་ཟོག་རིན་པོ་ཆེ་སོགས་མངོན་མཚན་ཅན་འབུན་བསྐྱེད་དུ་བཏང་བས། དེ་ལས་བསྐྱེད་གོས་ཁྲུ་གང་དུ་ལོངས་པ་ཐོབ་པའོ། ། 20.ཉོ་ཚོང་བྱེད་པའི་སྤང་བ་ནི། དགེ་སློང་གིས་ཁེ་སྤོགས་འདོད་པའི་ཆེད་དུ་ཁྱིམ་པ་ཉེ་དུ་མ་ཡིན་པ་ལ་རིན་པོ་ཆེ་ལས་གཞན་པའི་དངོས་པོ་འབྲུ་དང་གོས་སོགས་མོད་ན་ཉོ་ཞིང་དཀོན་ན་ཚོང་བར་བྱེད་པས་བསྐྱེད་ཐོབ་པའོ། ། 21.ལྷུང་བཟེད་འཚང་བའི་སྤང་བ་ནི། དྲུག་སྡེ་ལ་བཅས་ཏེ། རང་གི་ལྷུང་བཟེད་ཚད་ལྡན་བྱིན་གྱིས་མ་བརླབས་པའམ་བརླབས་ཀྱང་ཤན་སྟོབས་ཀྱིས་ཞག་བཅུའི་བར་བཅངས་ནས་བཅུ་གཅིག་པའི་སྐྱ་རེངས་ཤར་བའོ། ། 22.ལྷུང་བཟེད་ལྷག་པོ་འཚོལ་བའི་སྤང་བ་ནི། འདི་ནས་བྱིན་ཕྱོགས་ཀྱི་བར་བཞི་ཉེར་དགའ་ལ་བཅས་ཏེ། རྒྱུ་དབྱིབས་ཁ་དོག་གིས་རུང་ཞིང་མཐེ་བོའི་ལྟོ་གང་གི་ལྷག་མར་ཕུལ་དགུ་ཤོང་བ་ཡན་ཆད་ཀྱི་ལྷུང་བཟེད་སྤྱད་བཟོད་རང་ལ་ཡོད་བཞིན་དུ་ཁྱིམ་པ་ཉེ་དུ་མ་ཡིན་པ་ལ་བསླངས་པས་ལག་ཏུ་ཐོབ་པའོ། ། འདི་ཡང་བྱིན་གྱིས་མ་བརླབས་བར་ཞག་བུ་འདས་ན་ལྟུང་བ་སྔ་མར་འགྱུར་རོ། ། 23.བལ་འཐག་ཏུ་འཇུག་པའི་སྤང་བ་ནི། ཉེ་དུ་མ་ཡིན་པའི་ཐགས་མཁན་ལ་གླ་རྔན་མེད་པར་རང་ངམ་བསྐོས་པས་གོས་འཐག་ཏུ་བཅུག་སྟེ་ལག་ཏུ་ཐོབ་པའོ། ། 24.འཐག་པ་བཀྱེད་པའི་སྤང་བ་ནི། ཉེ་དུ་མ་ཡིན་པའི་ཁྱིམ་པས་རང་ལ་འབུལ་རྒྱུའི་གོས་འཐག་པ་ན། བདག་པོས་མ་གནང་བར་བསྔོས་ཚོད་ལས་ལྷག་པ་བཀྱེད་དུ་བཅུག་སྟེ་ཐོབ་པའོ། ། 25.བྱིན་འཕྲོག་གི་སྤང་བ་ནི། དགེ་སློང་གིས་རང་དང་ལྟ་མཚན་མཐུན་པའི་དགེ་སློང་གཞན་ལ་གོས་སམ་ལྷུང་བཟེད་སོགས་ཡོ་བྱེད་སྔར་བྱིན་པ་ཕྲོགས་ཏེ་ཕ་རོལ་པོ་ལས་བྲལ་བའོ། ། 26.གཏད་པ་ལས་བྱུང་བའི་སྤང་བ་ནི། འདི་དང་དགོན་པའི་འབྲལ་སྤང་གཉིས་གཉན་ཡོད་དུ་དྲུག་སྡེ་ལ་བཅས། དེ་ཡང་དབྱར་གནས་པའི་དགེ་འདུན་ལ་ཕུལ་བའི་རྙེད་པ་དབྱར་ནང་དུ་བདག་གིར་བྱས་པ་དང་། སོ་སོར་བགོས་པ་དང་། དགག་དབྱེའི་ཕྱི་དེ་ཉིན་མ་བགོས་པ་སྟེ། དེ་ལྟར་སྔས་ཕྱིས་ཀྱི་ལྟུང་བ་གསུམ་མོ། ། གལ་ཏེ་ལུང་ལས། གཏད་པ་ལས་བྱུང་བའི་གོས་ལྔ་པོ། ནད་པ་དང་། ནད་པའི་ཕྱིར་དང་། འཆི་བ་དང་། འཆི་བའི་ཕྱིར་དང་། འགྲོ་བར་ཆས་པ་ལ་སྦྱིན་པ། ཞེས་གསུངས་པ་ལྟར། དགག་དབྱེའི་གོང་རོལ་ཏུ་སྦྱིན་བདག་གིས་གཏད་པའི་རྙེད་པ་རྐྱེན་ལྡན་དེ་དག་ལ་རྐྱེན་དབང་གིས་དབྱར་མཐའི་ཞག་བཅུའི་ནང་དུ་སོ་སོར་སྦྱིན་པ་ལ་ཉེས་པ་མེད་ཅིང་། དབྱར་ནང་དུ་ཆོས་སྨྲ་བའི་རྙེད་པ་དང་། ནད་པའི་རིམ་གྲོ་ལ་སོགས་པའི་ཆེད་དུ་སྦྱིན་པའི་རྙེད་པ་ནི་འདིར་མི་གཏོགས་སོ། ། 27.དགོན་པ་བའི་འབྲལ་སྤང་ནི། དགེ་སློང་དགོན་པ་བས་བྱིན་རླབས་ཅན་གྱི་ཆོས་གོས་རྣམ་གསུམ་དང་ཞག་དྲུག་ཚུན་ཆད་བྲལ་ཀྱང་ཉེས་པ་མེད་པར་གནང་ལ། གལ་ཏེ་འཇིགས་པ་དང་བྲལ་ཀྱང་ཞག་དྲུག་ན་མ་སླེབ་བར་བདུན་པའི་སྐྱ་རེངས་ཤར་བའི་ཚེ་སྤང་བའོ། ། 28.དབྱར་གྱི་རས་ཆེན་གྱི་སྤང་བ་ནི། གཉན་ཡོད་དུ་དགེ་སློང་རབ་ཏུ་མང་པོ་ལ་བཅས་ཏེ། དབྱར་གྱི་གོས་རས་ཆེན་རང་ཉིད་དབྱར་སྔ་ཕྱི་གང་ཁས་ལེན་པ་དེའི་ཟླ་གཅིག་གི་སྔ་རོལ་དུ་བཙལ་ཞིང་རྙེད་ན་ཚོལ་སྔས་པའི་སྤང་བ་དང་། དགག་དབྱེ་ཟིན་པའི་འོག་ཏུ་ཟླ་ཕྱེད་ལས་འདས་པར་བཅངས་ན་བཞག་འཕྱིས་ཀྱི་སྤང་བའོ། ། 29.སྔོས་སྒྱུར་གྱི་སྤང་བ་ནི། གཉན་ཡོད་དུ་ཉེར་དགའ་ལ་བཅས་ཏེ། ཁྱིམ་པས་དགེ་འདུན་ནམ་དགེ་སློང་གཞན་ལ་བསྔོས་པའི་གོས་དང་ལྷུང་བཟེད་ལྟ་བུའི་རྙེད་པ་རང་ཉིད་ལ་བསྒྱུར་ཏེ་བདག་གིར་བཟུང་བའོ། ། 30.གསོག་འཇོག་གི་སྤང་བ་ནི། རྒྱལ་པོའི་ཁབ་ཏུ་འཕགས་པ་པི་ལིནྟའི་ལྷན་ཅིག་གནས་པ་ལ་བཅས་ཏེ། ཞག་བདུན་པའི་སྨན་སྨོས་པ་ནི་མདོའི་དངོས་བསྟན་ལྟར་དཔེ་ཙམ་དུ་ཟད་པས། འདིར་སྨན་བཞི་གང་རུང་རང་དུས་ལས་འདས་པར་བཅངས་པ་ལ་གསོག་འཇོག་གི་སྤང་བ་སྟེ། རང་རང་གི་དུས་ནི། བྱིན་གྱིས་མ་བརླབས་ན་སྨན་བཞི་པོ་གང་ཡིན་ཀྱང་། སྔ་དྲོ་བྱིན་ལེན་བྱས་པ་གུང་ཚིགས་ལས་འདས་པ་དང་། དེ་བཞིན་དུ་ཕྱི་དྲོ་དང་། འོད་དམར་ གྱི་མཐའ་དང་། སྲོད་ཀྱི་མཐའ་དང་། མཚན་མོའི་ཐུན་ཐ་མ་བཞི་པོ་རེ་རེ་བཞིན། སྔ་མ་སྔ་མར་བྱིན་ལེན་བྱས་པ། ཕྱི་མ་ཕྱི་མའི་དུས་ལས་འདས་ནའོ། ། བྱིན་གྱིས་བརླབས་ན། དུས་རུང་ལ་ནི་བྱིན་རླབས་མ་བཤད་ཀྱང་བྱིན་ལེན་སྔ་དྲོ་བྱས་པ་ཕྱི་དྲོ་མ་ཞིག་པར་བཅངས་པ་དང་། ཐུན་ཚོད་དུ་རུང་བ་སྔ་དྲོ་བརླབས་པ་ཞག་དེའི་མཚན་མོའི་མཐའ་འདས་པ་དང་། ཞག་བདུན་པའི་སྨན་བརླབས་པ་བརྒྱུད་པའི་སྐྱ་རེངས་ཤར་བའི་ཚེ་ན་དང་། འཚོ་བཅངས་གྱི་སྨན་ནི་ནད་སོས་ཀྱི་བར་དུ་བརླབས་པ་ནད་ལས་གྲོལ་ནས་ཀྱང་བཅངས་པ་སྟེ། འདི་ཇི་སྲིད་འཚོའི་བར་དུ་བརླབས་པ་ལ་ནི་གསོག་འཇོག་ཏུ་མི་འགྱུར་རོ། ། དེ་ལྟར་སྤང་ལྟུང་སུམ་ཅུ་ལས་ཕྱིར་བཅོས་ཀྱི་ཚེ་བྱིན་ཕྲོགས་དང་ལྷུང་བཟེད་ཚོལ་བ་གཉིས་ཀྱི་རྫས་རྩ་བ་ནས་སྤང་དགོས་ཤིང་། གཞན་རྣམས་ཞག་གཅིག་གི་རིང་སྤང་བ་སྔོན་དུ་བཏང་བས་ཆོག་གོ །
Tibetan Source	《སྔ་འགྱུར་བཀའ་མའི་》གླེགས་བམ་ཇི་པ་ཤ་62བ་2ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number