11408

Tibetan	ལྟུང་བྱེད་དགུ་བཅུ།
Tibetan Alternate
Tibetan Definition	དེ་ཡང་། སྡོམ་པ་གསུམ་རྣམ་པར་ངེས་པའི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ལས་བྱུང་བ་སྟེ། དེ་ཡང་གོང་དུ་དྲངས་པ་དང་མཚུངས་པས་ཉིས་བཟློས་ལྟ་བུར་གྱུར་དོགས་བཏང་སྙོམས་བྱས་ཏེ་སྐབས་འདིར་ལྟུང་བྱེད་སོ་སོའི་གླེང་གཞི་གསུངས་པ་ཤིན་ཏུ་གལ་ཆེ་བས་ཆ་ཚང་དྲངས་པ་འདི་ལྟ་སྟེ། 1.རྫུན་སྨྲའི་ལྟུང་བྱེད་ནི། གཉན་ཡོད་དུ་ཤཱཀྱ་ལག་རྒྱུད་ལི་བཅས་ཏེ། དངོས་པོ་ལྷག་སྦོམ་པོ་ཉེས་བྱས་སུ་གྱུར་པའི་རྫུན་བཞི་དང་། ལྟུང་བྱེད་རང་གི་ནང་ཚན་གྱི་རྫུན་དྲུག་བཤད་པ། དེ་རྣམས་ལས་གཞན་པའི་དགེ་སློང་གིས་ཤེས་བཞིན་དུ་རྫུན་སྨྲས་པ་ཉན་པ་པོས་བརྡའ་འཕྲོད་ཅིང་དོན་གོ་བའོ། ། དེ་ལ་རྫུན་བཞི་ནི། ། (1)རྫུན་སྨྲའི་ཕམ་པ། (2)གཞི་མེད་དང་བག་ཙམ་གྱི་ལྷག་མ། (3)ཤེས་བཞིན་དུ་ཆོས་མ་ཡིན་པ་ཆོས་སུ་སྨྲ་བ། (4)ཆོས་ཡིན་པ་ལ་མ་ཡིན་པར་སྨྲ་བ་སྦོམ་པོར་གྱུར་པའི་རྫུན་དང་། གསོ་སྦྱོང་གི་དུས་སུ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིས་པ་ལོ་ཅང་མི་སྨྲ་བས་འདའ་བར་བྱེད་པའི་ཉེས་བྱས་རྣམས་སོ། ། ལྟུང་བྱེད་ཀྱི་ནང་ཚན་གཞན་པ་དྲུག་ནི། (1)བཤེས་ངོར། (2)འཕྱ་བ། (3)ཟས་ཅུང་། (4)སྐུར་འདེབས། (5)ཉེར་འཇོག (6)ཁྱད་གསོད་རྣམས་སོ། ། 2.སྐྱོན་བརྗོད་ཀྱི་ལྟུང་བྱེད། འདི་ནས་ལྔ་བརྒྱད་དགུ་གསུམ་པོ་མ་གཏོགས་དྲུག་སྡེ་ལ་བཅོས་ཏེ། དགེ་སློང་གིས་ཡུལ་དགེ་སློང་གཞན་ལ་ཡུལ་དུས་དེར་སྐྱོན་དུ་གྲགས་པའི་ཚིག་ཕན་སེམས་མ་ཡིན་པར་བརྗོད་པ་ཕ་རོལ་པོས་གོ་བའོ། ། 3.ཕྲ་མ་བྱེད་པའི་ལྟུང་བྱེད། དགེ་སློང་གིས་ཡུལ་དགེ་སློང་མཐུན་པ་དག་ཕྲ་མའི་ཚིག་གིས་འབྱེད་པར་བྱེད་པའོ། ། 4.སྐྱོ་ངོགས་བྱེད་པའི་ལྟུང་བྱེད། དགེ་སློང་གཉིས་རྩོད་པ་དགེ་འདུན་གྱིས་ཆོས་ཕྱོགས་སུ་ཞི་བར་བྱས་ཟིན་ཅིང་། རང་དང་གོ་བྱ་ཞི་བྱེད་ཀྱི་ལས་དེ་བྱེད་པ་ལ་གཏོགས་པས་བླུམས་པ་སླར་དབྱེ་འདོད་ཀྱིས་རྩོད་པ་དེ་ལེགས་པར་མ་ཞི་བས་ཡང་ཞི་བར་བྱེད་དགོས་སོ་ཞེས་སྔར་བྱས་ཀྱི་ལས་སྐྱོ་སྔོགས་ཀྱིས་བཤིག་པར་རྩོམ་པའི་ཚིག་ སྨྲས་ཤིང་དོན་གོ་བའོ། ། 5.བུད་མེད་ལ་ཆོས་སྟོན་པའི་ལྟུང་བྱེད། འཆར་ཀ་ལ་བཅས་ཏེ། ཁྲིམས་གྲོགས་མེད་པར་ཡུལ་ཉན་འདོད་ཀྱི་བུད་མེད་ལ་དེས་མི་ཤེས་པའི་ཆོས་འདུས་བྱས་མི་རྟག་ཅེས་པ་ལྟ་བུའི་ཚིག་ལྔའམ་དྲུག་ལས་ལྷག་པར་བསྟན་པའོ། ། 6.འདོན་པའི་ལྟུང་བྱེད། དགེ་སློང་གིས་རྒོད་བག་གི་བསམ་པས་བསྙེན་པར་མ་རྫོགས་པ་དང་ལྷན་ཅིག་ཏུ་ཆོས་ཀྱི་ཚིག་གདངས་སྣ་ཚོགས་ཀྱིས་འདོན་པར་བྱས་ནའོ། ། 7.གནས་ངན་ལེན་གྱི་ལྟུང་བྱེད། ཕམ་ལྷག་གང་རུང་བྱུང་བའི་དགེ་སློང་ལ་གནས་ངན་ལེན་གླེང་བར་མ་བསྐོས་བཞིན་དུ་བརྗོད་ཡུལ་དགེ་སློང་མིན་པའི་གང་ཟག་བསླབ་བྱ་ལ་མི་མཁས་པའི་དྲུང་དུ་ཕམ་ལྷག་གི་ལྟུང་བ་བརྗོད་ཅིང་གོ་བའོ། ། 8.མི་ཆོས་བླ་མའི་ལྟུང་བྱེད། ཉ་པའི་རིགས་ཀྱི་དགེ་སློང་ལྔ་བརྒྱ་ལ་བཅས་ཏེ། མི་ཆོས་བླ་མའི་ཡོན་ཏན་ཐོབ་པའི་དགེ་སློང་གིས་ཡུལ་བསྙེན་པར་མ་རྫོགས་པ་ལ་དགོས་པ་ཁྱད་པར་ཅན་མེད་བཞིན་དུ་དེ་ཐོབ་བོ་ཞེས་སྨྲས་པ་ཡུལ་གྱིས་གོ་བའོ། ། 9.བཤེས་ངོར་བྱེད་པའི་ལྟུང་བྱེད། མཛའ་བོ་དང་ས་ལས་སྐྱེས་ལ་བཅས་ཏེ། དགེ་འདུན་གྱི་བྱ་བ་བྱེད་པའི་དགེ་སློང་ལ་ཟས་ལས་གཞན་པའི་རུང་བ་ཚད་ལྡན་གྱི་ཡོ་བྱད་ཅུང་ཟད་བྱིན་པ་ལ་མི་བཟོད་པས། དགེ་འདུན་གྱི་རྫས་གང་ཟག་ལ་བཤེས་ངོར་བྱས་ནས་སྦྱིན་ནོ་ཞེས་འཕྱས་པ་ཕ་རོལ་པོས་གོ་བའོ། ། 10.ཁྱད་དུ་གསོད་པའི་ལྟུང་བྱེད། གསོ་སྦྱོང་གི་དུས་ལྟ་བུ་སོ་ཐར་གྱི་མདོ་འདོན་པའི་ཚེ་བསླབ་པའི་གཞི་ཕྲ་ཞིང་ཕྲ་བ་འདི་དག་འདོན་པས་ཅི་བྱ་ཞེས་ཁྱད་དུ་གསོད་པའི་ཚིག་སྨྲས་པ་གཞན་གྱིས་གོ་བའོ། ། 11.ས་བོན་སྐྱེ་བ་འཇིག་པའི་ལྟུང་བྱེད་ནི། འདི་དང་བཅུ་པ་དྲུག་སྡེ་ལ་བཅས་ཏེ། དགེ་སློང་གིས་ནས་སོགས་ས་བོན་དང་། མྱུ་གུ་སོགས་སྐྱེ་བ་གང་རུང་། རང་གི་ཆོས་སུ་གྲུབ་པ། མ་ཉམས་པ། རུང་བ་མ་བྱས་པ། རང་རྩིས་བཅིངས་པ་སོགས་ཀྱི་རྐྱེན་དང་ལྡན་པ་མ་ཡིན་པར། རང་གིས་ཉམས་པར་བྱེད་དམ་གཞན་བྱེད་དུ་འཇུག་ཀྱང་རུང་སྟེ། ཉམས་པའི་ཚེ་ཤིང་རེ་རེ་དང་། རྩྭ་ཉག་མ་རེ་རེ་དང་། ས་བོན་རེ་རེ་ལ་དེ་དང་དེ་འཇོམས་པའི་ལྟུང་བྱེད་རེ་རེར་འགྱུར་ཞིང་། སྟར་ཁ་ལ་སོགས་པའི་འབྲས་བུ་སྨིན་པ་སྡོང་བུ་ལས་བྲལ་བར་བྱས་པ་ལ་སོགས་ལ་ཉེས་བྱས་སོ། ། འདིར་རུང་བར་བྱས་པ་ནི། ཤིང་ཐོག་སོགས་ལ་མེས་རེག་པ་དང་། མཚོན་དང་སེན་མོ་དང་ནེ་ཙོ་སོགས་ཀྱིས་རྨ་གཏོད་པ་སོགས་ཀྱིས་རུང་བ་དང་། དུས་རུང་མ་གཏོགས་པའི་སྨན་གཞན་གསུམ་ཕྱི་དྲོ་ལོངས་སྤྱོད་པའི་ཚེ་ཆུ་དྲང་མོ་གཏོར་བས་རུང་བར་བྱས་པའོ། ། 12.འཕྱ་བའི་ལྟུང་བྱེད། མཛའ་བོ་དང་ས་ལས་སྐྱེས་དག་ལ་བཅས་ཏེ། དགེ་འདུན་གྱི་ཞལ་ཏ་ཆོས་དང་མཐུན་པར་བྱས་སམ་བྱེད་བཞིན་པའི་དགེ་སློང་རང་ལ་གནས་མལ་སོགས་ངན་པ་སྟོབ་པ་པོ་མ་ཡིན་ཀྱང་། བདག་གི་ངོར་འདིས་ངན་པ་སྟོབ་བོ་ཞེས་སོགས་དངོས་སུའམ། ཁ་ཅིག་འདི་ལྟར་བྱེད་དོ་ཞེས་ཟུར་གྱིས་འཕྱ་ནའང་རུང་སྟེ་འཕྱས་པ་གོ་བའོ། ། བགྲངས་པ་ལས་དངོས་གཞིའོ། ཞེས་པས་འཕྱ་བ་པོ་དེ་ཉིད་དགེ་འདུན་གྱིས་གསོལ་བའི་ལས་ཀྱིས་ངན་པའི་གྲངས་སུ་བཅུག་པ་དེའི་ཚེ་དངོས་གཞིར་འགྱུར་བའོ། ། 13.བསྒོ་བ་རྣར་གཟན་པའི་ལྟུང་བྱེད། འདི་དང་དགུ་པ་ཀཽ་ཤམྦིར་འདུན་པ་ལ་བཅས་ཏེ། དགེ་སློང་ལྟུང་བ་བྱུང་བ་ཕྱིར་བཅོས་ལ་འགོད་པའི་ཕྱིར་ལྟུང་བ་གླེང་བ་ལྟ་བུ་ཆོས་མཐུན་གྱི་བསྒོ་བ་དང་དྲི་བ་དྲིས་པ་ན། དེ་མ་ཐོས་པ་ལྟར་རམ་ཁྱད་གསོད་ལྟ་བུས། དེའི་ལན་མི་སྨྲ་བར་ལན་གཞན་ལོག་པར་འདེབས་པའི་ཚིག་སྨྲས་པ་ཡུལ་གྱིས་གོ་བའོ། ། 14.ཁྲི་དང་ཞེས་པ་གནས་མལ་གྱི་ལྟུང་བྱེད། གཉན་ཡོད་དུ་དགེ་སློང་རབ་ཏུ་མང་པོ་ལ་བཅས་ཏེ། ཁྲི་དང་ཁྲིའུ་སོགས་དགེ་འདུན་གྱི་གནས་མལ་ལ་སྤྱད་ནས་རང་གིས་མ་བསྡུས་ཤིང་གཞན་ལའང་མ་བཅོལ་བར་བླ་གབ་མེད་སར་བོར་བས་ཆུད་ཟོས་པའམ། མ་ཟོས་ཀྱང་གནས་མལ་གྱི་ཉེ་འཁོར་ནས་འདོམ་ཞེ་དགུ་འདས་ཏེ་ཕྱིན་པའོ། ། 15.འདིང་བའི་ལྟུང་བྱེད། ལྷོ་ལམ་ནས་འོངས་པའི་དགེ་སློང་གཉིས་ལ་བཅས་ཏེ། དགེ་འདུན་གྱི་གཙུག་ལག་ཁང་སྲོག་ཆགས་སྐྱེ་བའི་ཉེས་དམིགས་ཡོད་སར་རྩྭ་ལ་སོགས་པའི་འདིང་བ་བཏིང་བ་རང་ངམ་གཞན་བསྐོས་ཀྱིས་མ་བསྡུས་པར་བོར་བས་སྲོག་ཆགས་སྐྱེས་པ་སོགས་ཆུད་ཟོས་སམ། ་མ་ཟོས་ཀྱང་ཉེ་འཁོར་ལས་འདས་ཏེ་སོང་བའོ། ། 16.སྐྲོད་པའི་ལྟུང་བྱེད། འདི་དང་ཕྱི་མ་གཉིས་ཀ་འཆར་ཀ་ལ་བཅས་ཏེ། དགེ་འདུན་གྱི་གཙུག་ལག་ཁང་ནས་དགེ་སློང་གཞན་ཞེ་སྡང་གིས་སྐྱོད་དེམ་སྐྱོད་དུ་བཅུག་པས་དེ་ཕྱི་རོལ་ཏུ་འཐོན་པའོ། ། 17.ཕྱིས་གནོན་བྱེད་པའི་ལྟུང་བྱེད། དགེ་འདུན་གྱི་གཙུག་ལག་ཁང་དུ་སྔར་ཞུགས་པའི་དགེ་སློང་གཞན་ལ་ཐོ་འཚམས་པའི་བསམ་པས་ལུས་ངག་གང་རུང་གིས་གནོད་པ་བརྩམས་ཏེ་ཟིལ་གྱིས་མནན་པའོ། ། 18.རྩ་བ་འབྱུང་བའི་ལྟུང་བྱེད། གཉན་ཡོད་དུ་ཉེར་དགའ་ལ་བཅས་ཏེ། དགེ་འདུན་གྱི་གཙུག་ལག་ཁང་གི་སྟེང་ཐོག་སྙི་བ་ལ་གནས་མལ་གྱི་ཁྲི་རྐང་རྣོན་པོ་གཙུག་སྟེ་འདུག་པས་བུག་པ་ཐོལ་བྱུང་དུ་བརྡོལ་བའོ། ། 19.འདེབས་པའི་ལྟུང་བྱེད། སྲོག་ཆགས་དང་བཅས་པའི་ཆུ་དང་རྩྭ་ཤིང་སོགས་ལ་དེར་ཤེས་བཞིན་དུ་འདེབས་པ་དང་སྤྱོད་པ་གང་རུང་བྱེད་དམ་བྱེད་དུ་བཅུག་པས་སྲོག་ཆགས་ཇི་སྙེད་ཤི་བ་དེ་སྙེད་ཀྱི་ལྟུང་བའོ། ། 20.རིམ་པ་ལྷག་པར་རྩིག་པའི་ལྟུང་བྱེད་ནི། གཞི་མི་བརྟན་པ་དང་ཆུ་ཁུང་མ་གཏོད་པ་སོགས་འཇིག་རྐྱེན་ཡོད་པར་ཤེས་བཞིན་དུ་སྤྱོད་ལམ་བཞི་ཤོང་ཡན་ཆད་ཀྱི་གཙུག་ལག་ཁང་རང་ངམ་བསྐོས་པས་ཉིན་གཅིག་ལ་ཕ་གུའི་རིམ་པ་འཇིམ་པ་དང་བཅས་པ་གཉིས་སམ་གསུམ་ལས་ལྷག་པ་བརྩིགས་པའོ། ། བཅུ་ཚན་གསུམ་པ་མ་བསྐོས་པའི་སྡེ་ཚན་ནི། འདི་མན་དགེ་སློང་མར། ། མ་བསྐོས་ཆོས་སྟོན་བསྐོས་ཀྱང་ཉི་ནུབ་དང་། ། ཁ་ཟས་ཕྱིར་སྟོན་གོས་བརྩེམས་གོས་སྦྱིན་དང་། ། དོན་མཐུན་ལམ་འགྲོགས་གྲུ་དེ་ གྱེན་མཐུར་འགྲོ། ། དབེན་པར་གཅིག་འདུག་པ་དང་འགྲེང་བ་དང་། ། སྦྱོར་བཅུག་ཟས་ཟ་རྣམས་ནི་སྤང་བར་བྱ། ། འདི་མན་ཞེས་པ་བཅུ་ཚན་གཅིག་པུ་འདི་དགེ་སློང་མ་ཉིད་ལ་བརྟེན་པར་ཤེས་པའི་ཆེད་དུའོ། །་ 21.མ་བསྐོས་པར་སྟོན་པའི་ལྟུང་བྱེད་ནི། འདི་དང་དྲུག་པ་བདུན་པ་བཅུ་པ་རྣམས་དྲུག་སྡེ་ལ་བཅས་ཏེ། དགེ་སློང་མའི་སྟོན་པར་མ་བསྐོས་སམ། བསྐོས་ཀྱང་མཚན་ཉིད་དང་མི་ལྡན་པའི་དགེ་སློང་གིས་དགེ་སློང་མ་ལ་ཆོས་བསྟན་ཅིང་དེས་གོ་བའོ། ། 22.ཉི་མ་ནུབ་ཀྱི་བར་དུ་སྟོན་པའི་ལྟུང་བྱེད། འདི་དང་གསུམ་པ་དག་དགའ་བྱེད་ལ་བཅས་ཏེ། དགེ་སློང་མའི་སྟོན་པར་བསྐོས་ཀྱང་འཇིགས་པ་དང་བཅས་པའི་གནས་སུ་དགེ་སློང་མ་ལ་ཉི་མ་ནུབ་ནས་ ཀྱང་ཆོས་བསྟན་ཅིང་དེས་གོ་བའོ། ། 23.ཟས་ངོར་སྟོན་པའི་ལྟུང་བྱེད་ནི། དགེ་སློང་མའི་སྟོན་པར་འོས་ཤིང་བསྐོས་པས་རྙེད་པའི་ཕྱིར་ཆོས་མི་སྟོན་ཀྱང་། ཕྲག་དོག་གིས་ཟས་ཅུང་ཟད་ཙམ་གྱི་ཕྱིར་ཆོས་སྟོན་པར་བྱེད་དོ་ཞེས་སྐུར་པ་བཏབ་ཡུལ་གྱི་གོ་བའོ། ། 24.གོས་བྱེད་པའི་ལྟུང་བྱེད་ནི། འདི་དང་བརྒྱུད་པ་དང་དགུ་པ་རྣམས་འཆར་ཀ་ལ་བཅས་ཏེ། ཉེ་དུ་མ་ཡིན་པའི་དགེ་སློང་མའི་གོས་བརྩེམས་ཏེ་བཟོ་གྲུབ་པའོ། ། 25.གོས་སྦྱིན་པའི་ལྟུང་བྱེད་ནི། དེད་དཔོན་ལས་རབ་ཏུ་བྱུང་བའི་དགེ་སློང་ལ་བཅས་ཏེ། ཉེ་དུ་མ་ཡིན་པའི་དགེ་སློང་མ་ལ་བཤེས་ངོ་ཙམ་གྱི་ཕྱིར་རང་གི་ཆོས་གོས་རུང་བ་ཚད་ལྡན་བྱིན་པ་དེས་ལག་ཏུ་ཐོབ་པའོ། ། 26.ལྷན་ཅིག་ལམ་དུ་འགྲོ་བའི་ལྟུང་བྱེད་ནི། དགེ་སློང་གང་འཇིགས་པ་མེད་པའི་སའི་ལམ་དུ་ཉེ་དུ་མ་ཡིན་པའི་དགེ་སློང་མ་དང་ལྷན་ཅིག་དོན་མཐུན་པས་འགྲོན་ཐབས་སུ་འགྲོགས་ཏེ་འགྲོ་ན་རླུང་གྲགས་རེ་རེ་འདས་པ་ལ་ལྷུང་བ་རེ་རེ་དང་། རྒྱང་གྲགས་ཕྱེད་རེ་ལ་ཉེས་བྱས་སོ། ། 27.ལྷན་ཅིག་གྱུར་འཇུག་པའི་ལྟུང་བྱེད་ནི། སྔར་བཞིན་དགེ་སློང་མ་དང་ལྷན་ཅིག་གྲུར་ཞུགས་ནས་ཐད་ཀ་མིན་པར་རྒྱུན་ལས་བཟློག་སྟེ་རྐྱེན་དང་རྒྱུན་ཕྱོགས་སུ་མཐུར་དུ་ཕྱིན་ནས་རྒྱང་གྲགས་ལས་འདས་པའོ། ། 28.ལྷན་ཅིག་འདུག་པའི་ལྟུང་བྱེད། ཡུལ་ཉེ་དུ་མ་ཡིན་པའི་བུད་མེད་དང་དབེན་པ་སྐྱབས་ཡོད་དུ་ཁྲིམས་གྲོགས་མེད་པར་འདོམ་གང་ཙམ་གྱིས་བར་ཆོད་ཀྱང་གཉིས་ཀ་ས་ལ་འདུག་ནའོ། ། 29.ལྷན་ཅིག་འགྲེང་བའི་ལྟུང་བྱེད། དབེན་པར་བུད་མེད་དམ་ཁྱད་པར་དགེ་སློང་མ་དང་བར་འདོམ་གང་ཙམ་དུ་གཉིས་ཀ་འགྲེངས་ཏེ་གནས་ནའང་ལྟུང་བའོ། ། 30.ཟས་སྦྱོར་དུ་འཇུག་པའི་ལྟུང་བྱེད། དགེ་སློང་གིས་དགེ་སློང་མ་ཉེ་དུ་མ་ཡིན་པ་སྦྱིན་བདག་ཁྱིམ་པ་ལ་དགེ་སློང་རང་ཡོན་ཏན་དང་མི་ལྡན་ཡང་ལྡན་ནོ་ཞེས་རྫུན་གྱི་སྒོ་ནས་དུས་རུང་གི་ཟས་སྦྱོར་དུ་བཅུག་སྟེ་ཐོས་པའོ། ། 31.ཡང་ཡང་ཟ་བའི་ལྟུང་བྱེད། འདི་ནས་བཞི་པའི་བར་དང་དགུ་པ་དང་བཅུ་པ་རྣམས་དྲུག་སྡེ་ལ་བཅས་ཏེ། བསོད་སྙོམས་ལན་གཅིག་གིས་གསོ་མི་ནུས་པའི་ནད་ཀྱིས་བཏབ་པ་དང་། དགེ་འདུན་དང་མཆོད་རྟེན་གྱི་ལས་དང་། མུ་གེའི་དུས་དང་། དཔག་ཚད་ཕྱེད་དུ་ཕྱིན་པ་མ་ཡིན་ཞིང་། སྲ་བརྐྱང་མ་བཏིང་བའི་དགེ་སློང་གིས། ཁྱིམ་པ་ཉེ་དུ་མ་ཡིན་པ་ལ་ཁྲུ་གང་ཡན་ཆད་ཀྱི་གོས་ཀྱི་རྙེད་པ་མེད་པའི་དུས་རུང་གི་ཁ་ཟས་དུས་ཉི་མ་གཅིག་ལ་ཁྱིམ་གཞན་དུ་ཟོས་ཟིན་ནས་ཡང་ཟས་ཀྱི་བསོད་སྙོམས་གཉིས་དང་གསུམ་སོགས་བསླངས་ཏེ་ཡང་ཡང་ཟོས་པའོ། ། 32.འདུག་གནས་སུ་ཟོ་བའི་ལྟུང་བྱེད་ནི། ཉེ་དུ་མ་ཡིན་པའི་ཁྱིམ་པའི་གནས་མུ་སྟེགས་པའི་འདུག་གནས་སུ་ཞག་གཅིག་ལས་ལྷག་པར་བསྡད་ནས་སྦྱིན་བདག་གིས་མ་སྟབས་པར་ཉི་མ་གཉིས་པའི་ཟས་ཟོས་པའོ། ། 33.ལྷུང་བཟེད་དོ་གསུམ་ལས་ལྷག་པ་ལེན་པའི་ལྟུང་བྱེད་ནི། ཉི་དུ་མ་ཡིན་པའི་ཁྱིམ་ནས་ཅི་བདེར་སྟོབ་པ་མ་ཡིན་པར་དུས་རུང་གི་ཟས་ལྷུང་བཟེད་ཆེ་ཚད་གང་ངམ། འབྲིང་ཚད་དོའམ། ཆུང་ཚད་གསུམ་སྟེ་བྲེ་ཕྱེད་དང་ལྔ་བསླང་དུ་རུང་ལ། དེ་ལས་ལྷག་པ་བསླངས་ཏེ་གནས་གཞན་དུ་ཁྱེར་ནས་ཟོས་པའོ། ། 34.སྤངས་པ་ཟ་བའི་ལྟུང་བྱེད་ནི། མུ་གེའི་དུས་དང་ནད་པ་མ་ཡིན་པའི་དགེ་སློང་གིས་དུས་རུང་གི་ཟས་བཟའ་བཅའ་གང་རུང་ཟོས་རྗེས། ད་དེ་རིང་མི་ཟའོ་སྙམ་དུ་བློས་བཅད་ཅིང་ངག་ཏུ་བརྗོད་ནས། སླར་ཡང་ལྷག་པོར་མ་བྱས་པར་དེ་ཉིད་ཟོས་པའོ། ། གལ་ཏེ་སྤངས་པ་ཟ་ན། ཡུལ་དགེ་སློང་གནས་མ་བཏང་བའི་མདུན་དུ་ཙོག་པུས་བཟུང་ནས་གསོལ་བ་བཏབ་པས། ཡུལ་དེས་བླངས་ནས་ཁམ་གཉིས་སམ་གསུམ་གྱི་ཕུད་ཟ་ཞིང་། ཟས་སྤངས་པ་ཡིན་ན་ཟ་མི་དགོས། གང་ལྟར་ཡང་དེས་ཟ་བ་པོ་ལ་གཏད་ནས་ཟར་རུང་ངོ་། ། ཟས་བརྩམས་པས་ལྡང་བར་མི་བྱའོ། ། ཞེས་པའི་དོན་ཟས་ཟ་བའི་འཕྲོ་མ་རྫོགས་པ་ལ་ལངས་ནས་ལྷག་མ་ཕྱིས་ཟ་ན་བརྩམས་ལྡང་ངོ་། ། 35.སྤངས་པ་སྟོབ་པའི་ལྟུང་བྱེད་ནི། གཉན་ཡོད་དུ་དགེ་སློང་རྒན་ཞུགས་ཤིག་ལ་བཅས་ཏེ་ཡུལ་དགེ་སློང་གཞན་གྱིས་སྤངས་པའི་ཟས་ལྷག་པོར་མ་བྱས་བཞིན་དུ་དེ་ལ་ངན་སེམས་ཀྱིས་ལྟུང་བ་འབྱུང་བའི་ཆེད་དུ་ལྷག་པོར་བྱས་སོ་ཞེས་རྫུན་གྱིས་སྟོབ་པའི་ཚིག་སྨྲས་པ་དེས་གོ་ནས་ཟོས་ན་སྟོབ་པ་པོ་ལ་ལྟུང་བའོ། ། 36.འདུས་ཤིང་ཟ་བའི་ལྟུང་བྱེད་ནི། རྒྱལ་པོའི་ཁབ་ཏུ་ལྷས་སྦྱིན་འཁོར་བཅས་ལ་བཅས་ཏེ། ཡང་ཡང་ཟ་བའི་སྐབས་ལྟར་ན་བ་སོགས་གནང་བའི་དུས་མ་ཡིན་པར་མཚམས་ནང་དུ་བསམ་པ་མི་མཐུན་པས་ཀུན་ནས་བསླངས་ཏེ་དགེ་འདུན་སྤྱི་ལས་ལོགས་སུ་དགེ་སློང་གསུམ་ཡན་ཆད་དང་ལྷན་ཅིག་འདུས་ནས་དུས་རུང་གི་ཟས་ཟོས་པའོ། ། 37.དུས་མ་ཡིན་པར་ཟ་བའི་ལྟུང་བྱེད། གཉན་ཡོད་དུ་གཞོན་ནུ་བཅུ་བདུན་སྡེ་ལ་བཅས་ཏེ། དུས་རུང་གི་ཟས་ཟ་བའི་དུས་མ་ཡིན་པ་གང་ཞེ་ན། དགེ་སློང་རང་གང་དུ་གནས་པའི་གླིང་གི་ཉི་མ་ཕྱེད་ཡོལ་ནས་སྐྱ་རེངས་དང་པོ་མ་ཤར་གྱི་བར་ཏེ། དུས་དེར་ན་བ་སོགས་ཀྱི་རྐྱེན་མེད་པར་ཟོས་ན་མགུལ་དུ་ཇི་ཙམ་མིད་པ་དེ་སྙེད་ཀྱི་ལྟུང་བར་འགྱུར་ཞིང་། ནད་པས་ཀྱང་ཟ་བའི་ཚེ་ནད་པ་ལ་འདི་ལྟར་གནང་བ་ཡིན་སྙམ་དུ་དུས་དྲན་བྱ་དགོས་སོ། ། 38.གསོག་འཇོག་བྱས་པ་ཟ་བའི་ལྟུང་བྱེད་ནི། དགེ་སློང་ནག་པོ་པ་ལ་བཅས་ཏེ། ན་བ་སོགས་ཀྱི་རྐྱེན་མེད་པར་སྨན་བཞི་པོ་གང་རུང་བྱིན་ལེན་བྱས་པར་རང་དུས་ལས་འདས་པས་གསོག་འཇོག་ཏུ་སོང་ཞིང་མ་ཞིག་པ་མུ་གེའི་དུས་མིན་པར་ཟོས་པའོ། ། འདིར་གསོག་འཇོག་ལས་འཕྲོས་པ་བཞི་སྟེ། ལག་ཉ། མཚམས་བཙོས། ཞག་ལོན། དགེ་སློང་གིས་བཙོས་པའོ། ། (1)ཆུད་ཟ་བ་སོགས་ཀྱི་རྐྱེན་མེད་པར་ཟས་གང་ལ་བྱིན་ལེན་མ་བྱས་པའི་གོང་དུ་དགེ་སློང་རང་གིས་རེག་པའོ། ། (2)དགེ་སློང་རང་དབང་བའི་མཚམས་དངོས་སམ་དེའི་ཉེ་འཁོར་གྱི་ནང་དུ་ཟས་རྗེན་པ་ཞིག་བཙོས་པ། (3)མཚམས་ནང་དེར་དེ་འདྲའི་དངོས་པོས་ཞག་ལོན་པ། (4)དེ་འདྲའི་དངོས་པོ་མཚམས་ཀྱི་ཕྱི་ནང་གང་རུང་དུ་དགེ་སློང་གིས་བཙོས་པའོ། ། དེ་བཞི་ནད་ལ་ཕན་པའམ་མུ་གེའི་དུས་མིན་པར་ཟོས་ན་ཉེས་བྱས་སུ་འགྱུར་རོ། ། 39.བྱིན་ལེན་མ་བྱས་པར་ཟ་བའི་ལྟུང་བྱེད་ནི། གནས་སྒྲ་མི་སྙན་ནམ་དེ་དང་འདྲ་བ་མ་ཡིན་པ། བདག་ཉིད་ཟན་ཆད་པ་དང་ནད་ལ་ཕན་པ་སོགས་ཀྱི་རྐྱེན་མེད་པར་ཆུ་དང་སོ་ཤིང་མ་གཏོགས་སྨན་བཞི་གང་རུང་བྱིན་ལེན་མ་བྱས་པ་ལ་དེར་འདུ་ཤེས་པས་ཁམ་གཅིག་ཡན་ཆད་མིད་པ་ནའོ། ། བྱིན་ལེན་ནི། ནོད་པ་སྟོབ་པ་པོའི་གློ་དང་རྒྱབ་ན་གནས་པ་མ་ཡིན་པ་ལ་མཚམས་གཞན་གྱིས་བར་མ་ཆོད་པར་སྟོབ་ཅིང་། ནོད་པ་པོས་ཀྱང་ལག་གཉིས་གན་རྐྱལ་དུ་བཀན་པས་བླང་ངོ་། ། བྱིན་ལེན་འཇིག་པའི་རྒྱུ་ནི། ལུང་རྣམ་འབྱེད་ལས། ཕྱོགས་དང་འདྲིལ་དང་རེག་པ་དང་། ། བསྔོས་དང་དགེ་སློང་མིན་གྱུར་དང་། ། ངོ་བོ་འགྱུར་དང་སྐྱེ་བ་འགྱུར། ། དོར་བ་ཡིས་ནི་བྱིན་ལེན་འཇིག ། ཅེས་སོ། ། 40.ཟས་བསོད་པ་སློང་བའི་ལྟུང་བྱེད་ནི། རང་ཉིད་ན་བ་ལ་སོགས་པའི་རྐྱེན་མེད་ཅིང་དངོས་པོ་འོ་མ་སོགས་ཡུལ་དུས་དེར་བསོད་པར་གྲགས་པ་ཞིམ་པའི་ཟས་བཟང་པོ་ཁྱིམ་པ་ཉེ་དུ་མ་ཡིན་པས་ཅི་བདེར་མ་སྟབས་ཀྱང་ཆོག་མི་ཤེས་པར་བསླངས་ཏེ་ཟོས་པའོ། ། 41.སྲོག་ཆགས་དང་བཅས་པའི་ཆུར་སྤྱོད་པའི་ལྟུང་བྱེད་ནི། ཀཽ་ཤམྦྷིར་འདུན་པ་ལ་བཅས་ཏེ། རང་དོན་དུ་སྲོག་ཆགས་དང་བཅས་པའི་ཆུ་ལ་ཁྲུས་དང་བཏུང་བ་དང་གོས་འཁྲུད་པ་དང་འགོག་ཅིང་བསྒྱུར་བ་སོགས་དང་། རྩྭ་ཤིང་གཅོད་ཅིང་མེར་འཇུག་པ་སོགས་སེམས་ཅན་འཆི་བར་མཐོང་ཡང་ལྟོས་མེད་དུ་ལོངས་སྤྱོད་ན་ཤི་བ་དེ་སྙེད་ཀྱི་ལྟུང་བའོ། ། དེས་ན་མར་མེའི་འོད་ཁང་བྱ་བ་དང་། ཆུ་ཚགས་བཅང་བར་བྱ་ཞིང་། ཆུ་ཚགས་ཀྱི་དབྱེ་བ་ལ། དཔྱངས་ཚགས་དང་། བུམ་ཚགས་ལྕེའུ་ཅན་དང་། ཆུ་ཚགས་གྲུ་གསུམ་དང་། རིལ་བ་ཞབས་ཚགས་ཅན་དང་། གསལ་ཚགས་རྣམས་སོ། ། 42.ཉལ་པོ་བྱེད་པའི་ལྟུང་བྱེད་ནི། འདི་དང་གསུམ་པ་བརྒྱད་པ་དགུ་པ་བཅུ་པ་རྣམས་འཆར་ཀ་ལ་བཅས་ཏེ། ཁྱིམ་པ་ཕོ་མོ་རང་ཁྱིམ་དུ་ཉལ་པོ་བྱེད་པ་ལ་ཞུགས་པའམ་དེར་ཕྱོགས་པ་ལ། དེ་དང་ཉེ་བའི་སར་ཉལ་ལམ་འདུག་སྟེ། དེ་དག་གིས་དགེ་སློང་དེར་ཡོད་པ་ཚོར་བའོ། ། 43.ཉལ་པོ་བྱེད་པའི་ཁྱིམ་དུ་འགྲོ་བའི་ལྟུང་བྱེད་ནི། ཉེ་བའི་སར་ཞེས་པའི་གནས་སུ་དགེ་སློང་གི་བར་ན་སྐྱབས་ཡོད་པར་ཞེས་དང་། ཉལ་ལམ་འདུག་སྟེ་ཞེས་པའི་གནས་སུ་འགྲེངས་ཏེ་གནས་པ་ཞེས་བརྗེ་བ་མ་གཏོགས་སྔར་ལྟར་རོ། ། 44.གཅེར་བུ་པ་ལ་ཟས་བྱིན་པའི་ལྟུང་བྱེད་ནི། ཀུན་དགའ་བོ་ལ་བཅས་ཏེ། མུ་སྟེགས་གཅེར་བུ་པ་ཕོ་མོ་གང་རུང་ལ་ནད་པ་དང་ཉེ་དུ་དང་དགེ་བ་ལ་སྦྱོར་བའི་དོན་མ་ཡིན་པར་རང་དང་དེ་གཉིས་ཀས་ཟར་རུང་བའི་དུས་རུང་གི་ཟས་རང་གི་ལག་གིས་བྱིན་ཅིང་དེས་ཐོབ་པའོ། ། 45.དམག་ལ་བལྟ་བའི་ལྟུང་བྱེད། འདི་དང་དྲུག་པ་དང་བདུན་པ་རྣམས་དྲུག་སྡེ་ལ་བཅས་ཏེ། རྒྱལ་པོས་བོས་པ་ལ་སོགས་རྐྱེན་དགོས་དང་མི་ལྡན་པའི་དགེ་སློང་གིས་རང་གི་གནས་ཀྱི་ཉེ་འཁོར་ལས་འདས་ཏེ་དམག་གི་དཔུང་ལ་བལྟས་པས་མཐོང་བ་ན་ལྟུང་བྱེད་དོ། ། 46.དམག་གི་ནང་དུ་ཞུགས་པའི་ལྟུང་བྱེད་ནི། སྔར་བཞིན་རྐྱེན་དགོས་མེད་པར་དམག་གི་ནང་དུ་ཞག་གཅིག་གམ་གཉིས་ལས་ལྷག་པར་བསྡད་པའོ། ། 47.དཔུང་གི་ཡན་ལག་ཉམས་སུ་མྱོང་བའི་ལྟུང་བྱེད་ནི། རྐྱེན་དགོས་ཀྱིས་དམག་ནང་དུ་སྡོད་དགོས་པའི་ཚེ་ཡང་རོང་དགར་གོ་མཚོན་ལ་རེག་པ་དང་དམག་དཔུང་གི་རུ་བཤམ་བཀོད་སོགས་བྱས་པའོ། ། 48.བརྡེག་པའི་ལྟུང་བྱེད་ནི། ཁྲོ་བས་དགེ་སློང་གཞན་ལ་བརྡེག་གམ་རྡེག་ཏུ་བཅུག་པས་ཐོག་པ་ན་བརྡེག་ཐེངས་དེ་སྙེད་ཀྱི་ལྟུང་བ་རེ་རེའོ། ། 49.བརྡེག་པར་གཟས་པའི་ལྟུང་བྱེད་ནི། ཁྲོ་བས་དགེ་སློང་གཞན་ལ་བརྡེག་པར་བརྩམས་པ་སྟེ་རྡེག་ཚུལ་བྱས་པ་དེས་གོ་བའོ། ། 50.གནས་ངན་ལེན་འཆབ་པའི་ལྟུང་བྱེད་ནི། མཐོལ་ཡུལ་མཚན་ཉིད་དང་ལྡན་པ་ཡོད་པའི་དབུས་སུ་དགེ་སློང་གཞན་ལ་གནས་ངན་ལེན་གྱི་ལྟུང་བ་ཕམ་ལྷག་གང་རུང་བྱུང་བ་ངོ་ཤེས་སམ་ཡིད་གཉིས་ཟ་བ་དགོས་པ་ཁྱད་པར་ཅན་མེད་པར་བཅབས་ཏེ་མཚན་མོ་འདས་ན་ལྟུང་བྱེད་དེ། ཕམ་ལྷག་ལས་གཞན་པའི་ལྟུང་བ་འཆབ་ན་ཉེས་བྱས་སོ། ། 51.ཟན་གཅོད་དུ་འཇུག་པའི་ལྟུང་བྱེད་ནི། འདི་དང་བཞི་པ་དྲུག་པ་བདུན་པ་རྣམས་ཉེར་དགའ་ལ་བཅས་ཏེ། ཁྱིམ་པ་དགེ་སློང་གཞན་ལ་དུས་རུང་གི་ ཟས་འདྲེན་པ་ན་དགེ་སློང་ལ་ངན་སེམས་ཀྱིས་དེ་འགོག་པའི་ཚིག་སྨྲས་ནས་གཅོད་དུ་བཅུག་སྟེ་ཁྱིམ་པས་དོན་གོ་བའོ། ། 52.མེ་ལ་རེག་པའི་ལྟུང་བྱེད་ནི། འདི་དང་བརྒྱད་པ་ དགུ་པ་བཅུ་པ་རྣམས་དྲུག་སྡེ་ལ་བཅས་ཏེ། རྒོད་བག་གི་བསམ་པས་མེ་ལ་རིག་གམ་རེག་ཏུ་བཅུག་ནས་རེག་པའི་ཚེ་ནའོ། ། དེ་ཡང་ཆོས་ལྡན་གྱི་བྱ་བའི་ཆེད་དུ་མེ་ལ་རེག་དགོས་ན། དུས་འདིའི་ཚེ་སྟོན་པས་གནང་བ་ཡིན་སྙམ་དུ་དུས་དྲན་བྱས་ནས་རེག་ན་ལྟུང་བར་མི་འགྱུར་རོ། ། 53.འདུན་པ་ཕྱིར་བསྒྱུར་གྱི་ལྟུང་བྱེད་ནི། དགའ་བོ་ལ་བཅས་ཏེ། དགེ་འདུན་གྱིས་དགེ་སློང་གི་ཆེད་དུ་ལས་བྱས་ཤིང་ཆགས་པ་ལ་དང་པོར་འདུན་པ་ཕུལ་ནས། སླར་བདག་གི་འདུན་པ་ཕྱིར་བྱིན་ཅིག་ཅེས་ལྡོག་པའི་ཚིག་སྨྲས་ཏེ་དོན་གོ་བའོ། ། ལས་མ་ཟིན་གོང་དུ་ཕྱིར་སྒྱུར་ན་ནི་ལས་དེ་མི་ཚོགས་པར་ཟད་ཀྱི། དེ་ལྟུང་བ་འདི་འབྱུང་བ་མ་ཡིན་ནོ། ། 54.ནུབ་ལྷག་ཉལ་གྱི་ལྟུང་བྱེད་ནི། དགེ་སློང་གིས་བསྙེན་པར་མ་རྫོགས་པའི་གང་ཟག་དང་ལྷན་ཅིག་གནས་གཅིག་ཏུ་ནུབ་གཉིས་ཉལ་དུ་རུང་ལ། དེ་ལས་ལྷག་པར་ན་སོགས་ཀྱི་རྐྱེན་དགོས་མེད་པར་ནུབ་གསུམ་འདས་ནས་བཞི་པའི་སྐྱ་རེངས་ཤར་བའོ། ། གལ་ཏེ་གནས་ཁང་གཅིག་ཏུ་ཉལ་ཀྱང་བར་དུ་ཁྲུ་ཕྱེད་དང་དགུས་ཆོད་ན་ལྟུང་བ་མེད་དེ། མདོར། འདི་ལ་བྱ་གག་འཕུར་ནས་འབབ་པའི་ལམ་ནི་བར་དུ་ཆོད་པ་ཉིད་ཡིན་ནོ། ། ཞེས་པས་གནས་གཅིག་པར་མི་འགྱུར་བའི་ཕྱིར་རོ། ། 55.སྡིག་ལྟ་མི་གཏོང་བའི་ལྟུང་བྱེད་ནི། དགེ་སློང་འཆི་ལྟས་ལ་བཅས་ཏེ། ཆང་འཐུང་བ་དང་ཕྱི་དྲོ་ཟ་བ་སོགས་ལ་ཉེས་པ་མི་འབྱུང་ངོ་ཞེས་སྡིག་ལྟའི་ཆོས་ལུགས་སྨྲ་བ་ཉིད་ཟློག་བྱེད་ལྔ་པའི་མཐའ་ལ་མ་བཏང་བའོ། ། 56.སྤངས་པའི་རྗེས་ཕྱོགས་ཀྱི་ལྟུང་བྱེད་ནི། དགེ་འདུན་གྱིས་གནས་ནས་ཕྱུངས་པའི་དགེ་སློང་དང་ལྷན་ཅིག་གཏམ་ཕེབས་པར་སྨྲ་བ་སོགས་སྤྱོད་ལམ་མཐུན་པར་བྱས་ནས་མཚན་དེའི་མཐའི་སྐད་ཅིག་མ་འདས་པའོ། ། 57.བསྙིལ་བ་སྡུད་པའི་ལྟུང་བྱེད་ནི། སྡིག་ལྟ་མི་གཏོང་བའི་དགེ་ཚུལ་དགེ་འདུན་གྱིས་བསྙིལ་བ་དང་ལྷན་ཅིག་ཉལ་བ་སོགས་སྤྱོད་ལམ་ལ་མཐུན་པར་བྱས་ནས་མཚན་མཐའ་འདས་པའོ། ། 58.ཁ་མ་བསྒྱུར་བར་གོས་གྱོན་པའི་ལྟུང་བྱེད་ནི། ཆུ་ཚགས་མ་གཏོགས་རུང་བའི་ཚོན་གསུམ་གྱིས་ཁ་མ་བསྒྱུར་བའི་གོས་ཁྲུ་གང་ཡན་ཆད་ཁ་དོག་དཀར་པོ་ཅན་གཞན་གྱིས་གཡོགས་མེད་པར་གྱོན་ན་ལྟུང་བྱེད་དང་། ནག་པོ་དང་ཁྲ་བོ་དང་ཚོན་ཆེན་བརྒྱུད་ཀྱིས་ཁ་བསྒྱུར་བ་ལ་ཉེས་བྱས་སོ། ། 59.རིན་པོ་ཆེ་ལ་རེག་པའི་ལྟུང་བྱེད་ནི། ཆུད་འཛའ་བ་དང་སྦྱིན་བདག་བསོད་ནམས་འདོད་པས་སྟབས་པ་དང་ཆོས་འཆད་པ་སོགས་དོན་ཁྱད་པར་ཅན་སྒྲུབ་པའི་སྐབས་མ་ཡིན་པར་རང་མི་དབང་བའི་ནོར་བུ་དང་མུ་ཏིག་སོགས་རིན་པོ་ཆེའམ། དེར་མིང་གིས་སྨོས་པ་མདའ་མདུང་སོགས་དམག་ཆས་དང་། རྔ་བོ་ཆེ་སོགས་རོལ་མོའི་ཆས་ལ་རྒོད་བག་གི་བསམ་པར་རང་ངམ་བསྐོས་པས་རེག་པའོ། ། 60.ཁྲུས་བྱེད་པའི་ལྟུང་བྱེད་ནི། ཚ་བའི་དུས་དབྱར་ཟླ་གསུམ་དང་ནད་ལ་ཕན་པ་སོགས་གནང་བའི་དུས་མ་ཡིན་པར་སྔར་ཁྲུས་བྱས་ནས་ཟླ་བ་ཕྱེད་མ་འདས་པའི་སྔ་རོལ་ཏུ་ཆུ་ལ་རང་དགར་ཁྲུས་བྱས་ཏེ་ལུས་ཕྱེད་ཆུར་ནུབ་པའོ། ། 61.དུད་འགྲོ་གསོད་པའི་ལྟུང་བྱེད་ནི། འདི་དང་གཉིས་པ་དང་དྲུག་པ་རྣམས་འཆར་ཀ་ལ་བཅས་ཏེ། གསོད་འདོད་ཀྱི་བསམ་པས་དུད་འགྲོའི་རིགས་སུ་གཏོགས་པ་གསོད་དམ་གསོད་དུ་བཅུག་སྟེ་རང་མ་ཤི་བའི་གོང་དུ་ཤི་ན་ཇི་སྙེད་ཤི་བ་དེ་སྙེད་ཀྱི་ལྟུང་བའོ། ། 62.འགྱོད་པ་བསྐྱེད་པའི་ལྟུང་བྱེད་ནི། དགེ་སློང་གཞན་ཡིད་མི་བདེ་བར་བྱ་བའི་ཕྱིར་ཁྱོད་ལ་སྡོམ་པ་མ་སྐྱེས་ཞེས་སམ་མ་ཉམས་སོ་ཞེས་སོགས་འགྱོད་པ་བསྐྱེད་པའི་ཚིག་སྨྲས་པ་དེས་གོ་བའོ། ། 63.གག་ཚིལ་བྱེད་པའི་ལྟུང་བྱེད་ནི། འདི་དང་བཞི་པ་བཅུ་བདུན་སྡེ་ལ་བཅས་ཏེ། དགེ་སློང་གཞན་གྱི་ལུས་ལ་སྐྱི་གཡའ་བར་བྱ་བའི་བསམ་པས་མཆན་ཁུང་སོགས་ལ་རེག་སྟེ་གག་ཚིག་སྒོག་པའོ། ། 64.ཆུ་ལ་རྩེ་བའི་ལྟུང་བྱེད་ནི། རྒོད་བག་གི་བསམ་པས་ལུས་ཕྱེད་ནུབ་པའི་ཆུ་ལ་ཚེས་སམ་རྩེར་བཅུག་པ་ལས་གྱུར་པའོ། ། 65.བུད་མེད་དང་ལྷན་ཅིག་ཉལ་བའི་ལྟུང་བྱེད་ནི། མ་འགགས་པ་ལ་བཅས་ཏེ། དགེ་སློང་གིས་ཁྲིམས་གྲོགས་མེད་པར་བུད་མེད་དང་ལྷན་ཅིག་གནས་གཅིག་ཏུ་གཉིས་ཀ་ཉལ་བའི་སྤྱོད་ལམ་གྱིས་མཚན་མོའི་མཐའ་འདས་པའོ། ། 66.དངངས་པར་བྱེད་པའི་ལྟུང་བྱེད་ནི། དགེ་སློང་གིས་དགེ་སློང་གཞན་དངངས་པར་བྱེད་འདོད་པས་ཡིད་དུ་མི་འོང་བའི་འཇིགས་པ་སྣ་ཚོགས་སྟོན་ནམ་སྟོན་དུ་བཅུག་པས་དེ་སྐྲག་པ་སྐྱེས་པའོ། ། 67.སྦེད་པའི་ལྟུང་བྱེད་ནི། དྲུག་སྡེ་ལ་བཅས་ཏེ། དགེ་སློང་གིས་རབ་བྱུང་སྡེ་ལྔ་གང་ཡང་རུང་བ་དེའི་ཆོས་གོས་དང་ལྷུང་བཟེད་སོགས་འཚོ་བའི་ཡོ་བྱད་རྐུ་འདོད་དང་ཕན་སེམས་མ་ཡིན་པར་སྦེད་དམ་སྦེད་དུ་བཅུག་སྟེ་སྦས་པའོ། ། 68.གདེངས་མེད་པར་སྤྱོད་པའི་ལྟུང་བྱེད་ནི། ཉེར་དགའ་ལ་བཙས་ཏེ། དགེ་སློང་གཞན་གྱི་གོས་སྔར་རང་གིས་བྱིན་པ་རྐུ་སེམས་དང་ཡིད་གཅུགས་མིན་པར་དེས་གནང་བའི་གདེངས་མེད་བཞིན་དུ་སླར་བླངས་ནས་ཅི་དགར་ལོངས་སྤྱོད་པའོ། ། 69.སྐུར་འདེབས་ཀྱི་ལྟུང་བྱེད་ནི། མཛའ་བོ་དང་ས་ལས་སྐྱེས་ལ་བཅས་ཏེ། མཐོང་ཐོས་དོགས་གསུམ་གྱི་གཞི་མེད་པའི་དགེ་སློང་གཞན་ལ་ལྷག་མ་བཅུ་གསུམ་གང་རུང་གིས་སྐུར་པ་བཏབ་ཅིང་གོ་བའོ། ། 70.བུད་མེད་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། གཉན་ཡོད་དུ་འགྲོ་བའི་དགེ་སློང་ཞིག་ལ་བཅས་ཏེ། དགེ་སློང་གིས་ཉེ་དུ་མ་ཡིན་པའི་བུད་མེད་དང་ལྷན་ཅིག་སྐྱེས་པའི་ཁྲིམས་གྲོགས་མེད་པར་ལམ་དུ་འགྲོ་ན་རླུང་གྲགས་རི་རེ་འདས་པ་ལྟུང་བ་རེ་རེ་དང་། དེའི་ཕྱེད་ལ་ཉེས་བྱས་སོ། ། 71.རྐུན་མ་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། འགྲོན་ལམ་དུ་འགྲོ་བའི་དགེ་སློང་ལ་བཅས་ཏེ། དགེ་སློང་གིས་ཆོམ་རྐུན་ནམ་ཤོ་གམ་མ་བྱིན་པའི་ཚོང་པ་དང་ལྷན་ཅིག་ལམ་དུ་འགྲོ་ནའང་སྔ་མ་དང་མཚུངས་ཏེ། རྒྱང་གྲགས་རེ་རེ་ལ་ལྟུང་བའོ། ། 72.ཉི་ཤུ་མ་ལོན་པ་རྫོགས་པར་བྱེད་པའི་ལྟུང་བྱེད་ནི། མོངྒལ་གྱི་བུ་ལ་བཅས་ཏེ། བསྒྲུབ་བྱ་སྐྱེས་པ་མངལ་བཤོལ་རྩིས་ཀྱང་ལོ་ཉི་ཤུ་མ་ལོན་པ་ལ་དེར་འདུ་ཤེས་སམ་ཐེ་ཚོམ་ཟ་བས་བསྙེན་རྫོགས་ཕོག་ན། ལས་བརྗོད་པ་གསུམ་པའི་བྱ་བ་བརྗོད་པ་རྫོགས་ནས་བྱེད་པ་བརྗོད་པའི་འགོ་བརྩམ་པའི་ཚེ་མཁན་པོ་ལ་ལྟུང་བྱེད་དང་། སློབ་དཔོན་དང་དགེ་འདུན་ལ་ཉེས་བྱས་སོ། ། 73. ས་བརྐོ་བའི་ལྟུང་བྱེད། འདི་དང་བཞི་པ་དང་ལྔ་པ་ རྣམས་དྲུག་སྡེ་ལ་བཅས་ཏེ། དགེ་སློང་གིས་འཇིག་རྟེན་ལ་གྲགས་པའི་ས་སྲ་ཞིང་འཐས་པར་གནས་པ་དགོས་པ་ཁྱད་པར་ཅན་མེད་པར་བརྐོའམ་རྐོར་བཅུག་སྟེ་སོར་བཞི་ཡན་ཆད་བརྐོས་པའོ། ། 74.མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་ནི། སྦྱིན་བདག་གིས་དུས་ཇི་ཙམ་མགྲོན་དུ་བོས་པ་ལས་ལྷག་པ་འདུག་པའམ། ཚིགས་བཞག་པ་མེད་ན་ཟླ་བ་བཞི་ལས་ལྷག་པར་སྡོད་ནས་ཟས་ཟོས་པའོ། ། 75.བསླབ་པ་ཉེ་བར་འཇོག་པ་སྤོང་བའི་ལྟུང་བྱེད་ནི། དགེ་སློང་གཞན་གྱིས་རང་ཉིད་བསླབ་པ་ལ་སློབ་པར་བསྐུལ་བ་ན། བསྐུལ་པ་པོ་ལ་ཁྱོད་ཀྱིས་མི་ཤེས་པས་གཞན་ཤེས་པ་ལ་མ་དྲིས་ཀྱི་བར་དུ་མི་སློབ་བོ་ཞེས་པ་ལྟ་བུའོ་ཁྱད་གསོད་ཀྱིས་སྤོང་བའི་ཚིག་བརྗོད་ཅིང་གོ་བའོ། ། 76.ཉན་རྣ་བྱེད་པའི་ལྟུང་བྱེད་ནི། ཉེར་དགའ་ལ་བཅས་ཏེ། དགེ་སློང་རང་དང་རྩོད་ཟླར་གྱུར་པའི་དགེ་སློང་གཞན་གཉིས་མན་ཆད་གྲོས་བྱེད་པ་ལ་རྩོད་པ་ཞི་འདོད་མ་ཡིན་པར་འཐབ་མོ་དེ་སྦྱར་བའི་ཆེད་དུ་ཉན་རྣ་བྱས་པས་རང་གིས་དོན་གོ་བའོ། ། 77.མི་སྨྲ་བར་འགྲོ་བའི་ལྟུང་བྱེད་ནི། དགའ་བོ་ལ་བཅས་ཏེ། རང་ཁ་སྐོང་དུ་འོས་པའི་དགེ་སློང་གིས་གསོ་སྦྱོང་སོགས་དགེ་འདུན་གྱི་ཆོས་ལྡན་གྱི་ལས་གྲལ་དུ་དང་པོར་འདུས་ནས་གསོལ་བ་ཙམ་ཡང་མ་བྱས་པའི་གོང་དུ་དགེ་འདུན་མཐུན་པ་སྒྲུབ་བྱེད་ཀྱི་འདུན་པ་མ་ཕུལ་བའམ་ལྟག་འོག་གི་དགེ་སློང་ལ་འགྲོ་བ་མི་སྨྲ་བར་ཐོས་པའི་ཉེར་འཁོར་ལས་འདས་ཏེ་ཕྱིན་པའོ། ། གསོལ་བ་ཐོས་ནས་ཕྱིན་ན་ཉེས་བྱས་དང་། རང་ཁ་སྐོང་དུ་མི་འོས་པ་སོགས་ལ་ལྟུང་བ་མེད་དོ། ། 78.མ་གུས་པའི་ལྟུང་བྱེད་ནི། གླང་ཆེན་ལྷས་ཀྱི་བདག་པོའི་བུ་ནག་པོ་ལ་བཅས་ཏེ། དགེ་སློང་གིས་སངས་རྒྱས་དངོས་སུ་བཞུགས་པ་དང་། དགེ་སློང་གི་དགེ་འདུན་དང་། དགེ་འདུན་གྱི་ཐ་སྙད་པ་དགེ་བསྐོས་ཏེ་གསུམ་པོ་གང་ཡང་རུང་བས་ཆོས་ལྡན་གྱི་བཀའ་བསྒོ་བའི་དོན་ལ་ཁོ་བོས་སྒྲུབ་མི་ནུས་སོ་ཞེས་བཤད་སྦྱང་མེད་པར་མ་གུས་པས་དེ་ལས་བཟློག་སྟེ་འགུལ་བར་བྱས་པའོ། ། 79.ཆང་འཐུང་བའི་ལྟུང་བྱེད་ནི། ལེགས་འོངས་ལ་བཅས་ཏེ། ཕབས་བཏབ་པ་འབྲུའི་ཆང་དང་རྒུན་ཆང་སོགས་བཅོས་པའི་ཆང་དང་། དེ་དག་གི་སྦང་མ་དང་ཚིགས་མ་སོགས་མྱོས་པའི་ནུས་པ་ཅན་རྣམས་འཐུང་ངམ་ཟ་བར་འདོད་པས་མགུལ་དུ་མིད་པ་ན་ལྟུང་བྱེད་དེ། བསྐོལ་བས་ཆང་གི་རོ་ནུས་ཉམས་པར་བྱས་པ་དང་། ནད་པ་ལ་ཕན་པའི་ཕྱིར་ཁ་ལ་བསྲེལ་བ་ཙམ་དང་ལུས་ལ་བཀུད་པ་ཙམ་ལ་ཉེས་པ་མེད་དོ། ། 80.དུས་མིན་པར་གྲོང་དུ་འགྲོ་བའི་ལྟུང་བྱེད་དེ། དུས་མ་ཡིན་པ་ཕྱི་དྲོ་སྟེ། རང་གླིང་གི་ཉི་མ་ཕྱེད་ཡོལ་ནས་སྐྱ་རེངས་མ་ཤར་གྱི་བར་དུ་རྐྱེན་དགོས་མེད་ཅིང་དེར་འཁོད་ཀྱི་གྲོགས་ལ་མ་སྨྲས་པར་ཁྱིམ་པའི་གྲོང་དུ་རྒྱུ་བར་བྱེད་པས་སྒོ་གཏན་དང་ཉེ་འཁོར་འདས་པའོ། ། 81.གྲོང་གཞན་དུ་རྒྱུ་བའི་ལྟུང་བྱེད་ནི། འདི་དང་དྲུག་པ་དང་བཅུ་པ་རྣམས་ཉེར་དགའ་ལ་བཅས་ཏེ། དགེ་སློང་གིས་སྔ་དྲོ་རང་ཚིག་གིས་སྦྱིན་བདག་ཁྱིམ་པའི་གནས་སུ་ཟས་ལ་སྤྱན་དྲངས་ནས། དུས་ལ་བྲིམ་ཞེས་མ་བསྒོས་པར་རང་ཉིད་ཁྱིམ་གཅིག་ནས་གཅིག་ཏུ་རྒྱུ་བས་ཁྱིམ་གསུམ་འདས་ཏེ་དགེ་འདུན་གྱི་གདུགས་ཚོད་ལ་གནོད་པ་དང་། ཕྱི་དྲོ་ཁྱིམ་བཞི་ཕན་ཆད་འདས་པས་དགེ་འདུན་གྱི་ཆོས་ཀྱི་ལོངས་སྤྱོད་ལ་གནོད་པའོ། ། 82.རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་ནི། འཆར་ཀ་ལ་བཅས་ཏེ། ཆོས་ལྡན་གྱི་དོན་དུ་བོས་པ་སོགས་དགོས་པ་ཁྱད་པར་ཅན་མེད་བཞིན་དུ་རྒྱལ་པོ་བཙུན་མོ་དང་ལྷན་ཅིག་རྩེ་བའི་ཁབ་སྟེ་བཙུན་མོ་དང་བཅས་པའི་ཕོ་བྲང་དུ་ཉི་མ་དམར་ཐག་ཆོད་ནས་སྐྱ་རེངས་ཐ་མ་མ་ཤར་གྱི་བར་འགྲོ་ན་གནས་དེའི་སྒོ་གཏན་ནམ། དེའི་ཉེ་འཁོར་འདས་པར་སླེབ་པའོ། ། ནུབ་མོར་མ་ཟད་ཉིན་མོ་ཕྱིན་ནས་མཚན་ལ་དེར་ཉལ་ཀྱང་འདྲའོ། ། 83.བསླབ་གཞི་ཁྱད་དུ་གསོད་པའི་ལྟུང་བྱེད་ནི། འདི་དང་ལྔ་པ་དག་དྲུག་སྡེ་ལ་བཅས་ཏེ། སོ་ཐར་གྱི་མདོ་ལན་གཉིས་ཡན་ཆད་ཐོས་ཤིང་མདོ་དེ་ལ་དོན་དེ་ཡོད་པ་སྔར་ནས་ཤེས་ཀྱང་ཤེས་རིན་མི་ཆོག་པར་སྟོན་པའི་ཕྱིར། གསོ་སྦྱོང་གི་དུས་སུ་དོན་འདི་ཡོད་པ་ད་གདོད་ཤེས་སོ་ཞེས་འདུལ་བར་གཏོགས་པའི་བསླབ་པ་ཁྱད་གསོད་ཀྱི་ཚིག་སྨྲས་པ་ཕ་རོལ་པོས་གོ་ན་ལྟུང་བྱེད་དང་། མདོ་སྡེ་སོགས་ལ་ཉེས་བྱས་སོ། ། 84.ཁབ་རལ་འཆོས་པའི་ལྟུང་བྱེད་ནི། འདི་དང་བདུན་པ་དང་བརྒྱད་པ་དང་དགུ་པ་རྣམས་དགེ་སློང་རབ་ཏུ་མང་པོ་ལ་བཅས་ཏེ། དཀོན་ཞིང་རིན་ཐང་ཆེ་བའི་རྫས་བ་སོ་སོགས་ལ་ཁབ་རལ་བྱེད་དམ་བྱེད་དུ་བཅུག་སྟེ་ཟིན་པའོ། ། 85.ཁྲི་རྐང་འཆོས་པའི་ལྟུང་བྱེད་ནི། དགེ་སློང་གིས་དགེ་འདུན་གྱི་ཁྲིའམ་ཁྲེའུའི་རྐང་པ་བུ་གར་གཞུག་པ་མན་ཆད་ཁྲུ་གང་ཚད་ཡིན་པས་དེ་ལས་ལྷག་པ་བཟོའམ་བཟོར་བཅུག་སྟེ་ཟིན་པའོ། ། 86.ཤིང་བལ་གྱིས་གོས་པར་བྱས་པའི་ལྟུང་བྱེད་ནི། དགེ་འདུན་གྱི་ཁྲི་དང་ཁྲིའུའི་སྟེང་དུ་དགེ་སློང་གིས་ངན་སེམས་ཀྱིས་ཤིང་བལ་བརྡལ་ཏེ་གོས་པར་བྱས་པའོ། ། 87.-89.གདིང་བ་ཚད་ལྷག་བྱེད་པ་དང་། གཡན་དགབ་ཚད་ལྷག་བྱེད་པའི་ལྟུང་བྱེད་དང། དབྱར་གྱི་གོས་རས་ཆེན་ཚད་ལྷག་བྱེད་པའི་ལྟུང་བྱེད་གསུམ་ནི། དགེ་སློང་གིས་རང་དོན་དུ་དེ་གསུམ་རང་རང་གི་ཚད་ལས་ལྷག་པ་བྱེད་དམ་བྱེད་དུ་བཅུག་སྟེ་ཟིན་པ་ན་དེ་དང་དེའི་ལྟུང་བྱེད་དོ། ། ཚད་ནི། གདིང་བ་སྲིད་དུ་ཁྲུ་གསུམ་དང་ཞེང་དུ་ཁྲུ་དོ་དང་སོར་དྲུག གཡན་དགབ་ཀྱི་སྲིད་དུ་ཁྲུ་དྲུག་དང་ཞེང་དུ་ཁྲུ་གསུམ། རས་ཆེན་གྱི་སྲིད་དུ་ཁྲུ་དགུ་དང་། ཞེང་དུ་ཁྲུ་གསུམ་དང་སོར་བཅོ་བརྒྱད་དོ། ། དེ་ཡང་ཁྲུ་དང་སོར་གྱིས་འཇལ་བ་ཐམས་ཅད་ལ་རང་རང་གི་འཇལ་བྱེད་ཀྱི་ཕྱེད་ཀྱིས་ལྷག་ན་ལྟུང་བའོ། ། འདི་དག་གི་ལྟུང་བ་བཤགས་པའི་ཚེ། ཁབ་རལ་བཅོག་ཅིང་ཁྲིའི་ཤིང་བལ་བསྡུས་ནས་དང་། ཁྲི་རྐང་གདིང་གཡན་རས་ཆེན་བཞིའི་ལྷག་པོ་བཅད་ནས་བཤགས་དགོས་ཤིང་། བཤགས་ཡུལ་གྱིས་བཅག་གམ། བསྡུས་སམ། བཅད་དམ་ཞེས་མ་དྲིས་ན་ཉེས་བྱས་སོ། ། 90.བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་ནི། སྟོན་པའི་ལུས་ཚད་ཙམ་མེད་པར་དེའི་ཆོས་གོས་ཀྱི་ཚད་དམ། དེ་བས་ལྷག་པ་བྱེད་དམ་བྱེད་དུ་བཅུག་སྟེ་ཟིན་པ་ལས་གྱུར་པའོ། ། དེ་ལ་སྟོན་པའི་ཆོས་གོས་ཀྱི་ཚད་ནི། སྲིད་དུ་སྟོན་པ་རང་གི་ཁྲུ་ལྔ་ཡིན་པས་མི་ཕལ་པའི་ཁྲུ་བཅོ་ལྔ་དང་། ཞེང་དུ་སྟོན་པའི་ཁྲུ་གསུམ་ལ་ཕལ་པའི་ཁྲུ་དགུ་ཡོད་དེ། སྟོན་པའི་ཁྲུ་རེ་ལ་མི་འབྲིང་པོའི་ཁྲུ་གསུམ་ཡོད་པའི་ཕྱིར་རོ། །
Tibetan Source	《སྔ་འགྱུར་བཀའ་མའི་》གླེགས་བམ་ཇི་པ་ཤ་69བ་1ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number