11499

Tibetan	ཞང་ཞུང་རྒན་རྩིས་ཉིན་གྲངས་སུམ་བརྒྱ་དྲུག་ཅུ་རྩ་ལྔའི་གནམ་གཤིས་འགྱུར་ལྡོག་གི་དཔྱད་རྩིས།
Tibetan Alternate
Tibetan Definition	ཞང་ཞུང་རྒན་པོའི་ངག་རྩིས་ཞེས་པ་ནི། སྔོན་ཚེ་ཞང་ཞུང་རྒྱལ་པོའི་མྱོས་ཡུལ་དུ་གཡུང་དྲུང་བོན་གྱི་བསྟན་པ་ཤིན་ཏུ་དར་ཞིང་རྒྱས་པའི་དུས་སུ། ཞང་རྩིས་རྒན་པོ་བེར་ཆུ་ཐོགས་པ་བརྒྱ་ཡི་ནང་དུ་རྒྱུད་ཁུངས་རྟོགས་པའི་མི་བདུན་ཡོད་པར་གསུངས་ཤིང་། དེ་ལས་ཀྱང་ཤེས་རབ་ཆེ་བའི་མི་བཞི་ཡིས་རྒྱ་ཞང་བོད་སོགས་ཀྱི་རྩིས་རིག་རྒྱ་མཚོའི་མཐའ་བཅད་དེ་བཀོད་པའི་དཔེ་རྙིང་ཁུངས་བཙུན་ཞིག་ལས་བྱུང་བར་གསུངས་སོ། ། དེའི་སྡོམ་ཚིག་སོགས་ནི་འདི་ལྟར། དགུན་ཉི་ལྡོག་ནས་ཉི་གཟའ་སོ་ལྔ་བགྲང་། ། བྱ་གཟའ་སོ་བརྒྱུད་སྨལ་ཞག་སོ་བདུན་དང་། ། ནུར་ཞག་གཉིས་དང་དབྱུག་ཞག་བཅོ་ལྔ་དང་། ། སོན་མཇུག་ཞག་ལྔ་ཁུ་བྱུག་སླེབ་ཞག་བཞི། ། དེ་ནས་བཅུ་དྲུག་གནའ་རེའུ་སྔ་ཤོས་སྐྱེ། ། དེ་ནས་བཅོ་ལྔར་ཉི་ཁྱིམ་ཟུག་ཅེས་དྲན། ། དེ་ནས་བཅུ་དྲུག་དབྱར་ཉི་ལྷོ་རུ་ལྡོག ། དེ་ཡི་རྩེ་ཉིན་དབྱར་གྱི་ཆུང་གསུམ་མམ། སྣུལོག་ཞག་ཉེར་གཅིག་སྨལ་ཞག་བཅོ་ལྔ་དང་། ། ནམ་བར་གསུམ་དང་སྲིན་མོའི་གདོང་ཆར་གསུམ། ། ཕག་བདུན་ནམ་གསུམ་ཝ་ཞག་བཅོ་ལྔ་དང་། ། གཞུང་ཞག་ཉེར་གཅིག་དབྱར་ཤུལ་ཞག་པོ་ལྔ། ། ལྷོ་སྒོའི་གནམ་སྐས་ཤྭ་ངུས་སུམ་ཅུ་བདུན། ། མཆེ་ཞག་ཉེར་གཉིས་སྣ་རུའི་འོད་ཞག་བརྒྱད། ། གཉན་གྱི་རུ་འཕྲག་ཞག་ནི་བཅོ་ལྔ་དང་། ། དགུན་ཉི་ཁྱིམ་ཞུགས་ཞག་བདུན་དེ་རྫོགས་མཚམས། ། དགུན་ཉི་ལྷོ་ནས་བྱང་ལྡོག་བྱ་གཟའ་སོགས། ། གོང་ལྟར་བགྲངས་པས་ལོ་གཅིག་ཉིན་ཞག་གྲངས། ། སུམ་བརྒྱ་རེ་ལྔ་ཡོད་པ་དེ་གྲངས་འགྲིག ། ཅེས་པ་དེ་དག་ལས། 1.དེ་ནས་ཉི་ལྡོག་རྗེས་མའི་ཞག་དེ་ནས། ། གཟའ་སོ་ལྔ་བགྲང་ངོ་དང་པོ་ནི། ། ཀྱེན་ཚེ་ཞག་བདུན་དེ་ཡི་སྔ་ཞག་བཞི། ། ཁ་བ་འབབ་བམ་ལྷགས་པ་ངད་གྲོང་འབྱུང་། ། ཕྱི་ཞག་གསུམ་ནི་ནམ་བར་ཞེས་སུ་གྲགས། ། 2.དེ་ནས་ཀྱི་སྨན་ཞག་བདུན་ཕྱི་ཞག་གཉིས། ། ནམ་བར་ཞེས་བརྗོད་གུང་ལེན་ཞག་པོ་བདུན། ། སྔ་ཞག་ལྔ་ལ་ཁ་དུས་ཕྱི་ཞག་གཉིས། ། ནམ་བར་ཟེར་ཏེ་ལོག་ཞག་ཉེར་གཅིག་སོང་། ། དེ་ཉིད་དབྱར་གྱི་ཆུང་གསུམ་དོད་དུ་སྦྱར། ། དེ་ཡི་མིང་འདོགས་རྣམ་གྲངས་འགའ་ཞིག་གིས། ། དྲུག་སུ་གོང་བར་འོག་སྡེ་རེ་རེ་ལ། ། བདུན་བདུན་བགྲངས་པས་ལོག་ཞག་ཉེར་གཅིག་བརྗོད། ། དྲུག་སུའི་དོན་ནི་བྱ་རྒོད་གཤོག་རྩེ་དང་། ། སྤྱང་མོའི་གདོང་རྩེ་འབྲོང་གི་རྭ་རྩེ་དང་། ། ཁྱིམ་བྱའི་ཅོད་པན་འུག་པའི་སྤུ་རུ་དང་། ། མ་ཡི་དྲུག་ལག་དང་དྲུག་བཤད་སྲོལ་སྣང་། ། 3.དེ་ནས་སུ་ལུ་ཞག་བདུན་དྲུག་ཤེལ་བདུན། ། རྫོགས་ཚེ་ཉི་གཟའ་སོ་ལྔ་ཐིམ་པ་ཡིན། ། ཉི་གཟའ་དེ་རྣམས་གྲང་རེས་དྲོ་རེས་བྱེད། ། དེ་སྐབས་སྲོད་ལ་རྒྱུ་སྐར་ཝ་འཆར་ཡོང་། ། ལ་སྐར་ཀྲོང་ཀྲོང་སྲོད་ལ་ཤར་དུས་སུ། ། རྐྱང་ཆུང་ཀྲོང་ཀྲོང་ང་ཡི་ཆུ་ཆག་ཟེར། ། 4.དེ་ནས་བྱ་གཟའ་སོ་བརྒྱད་འདྲེན་པའི་ཚུལ། ། ལྷོ་གཤོག་བྱང་གཤོག་བྱ་བར་དག་དང་གསུམ། ། དང་པོ་ལྷོ་གཤོག་ཞག་ནི་བཅུ་གཅིག་ལ། ། དེ་ཡི་དང་པོ་དྲུག་གཤོག་ཞག་གསུམ་ཚེ། ། དྲུག་གཤོག་འཐབ་ཅེས་ཁ་རླུང་འཚུབ་ཉེན་ཡོད། ། 5.དེ་ནས་གཤོག་ངོས་ཞག་བཞིར་གྲང་བའི་སྒང་། ། དཔུང་ཞག་གཅིག་དང་ཁ་གདོང་ཞིག་པོ་གསུམ། ། ཁ་གདོང་དཀྱིལ་ན་དགུན་གྱི་སྙིང་པོ་ཞེས། ། ཉི་ལྡོག་རྗེས་ནས་ཞག་པོ་ཞེ་ལྔ་སོང་། ། འདི་ཉིད་དྲོ་ཡང་ཁ་བ་ཡོང་ཉེན་ཆེ། ། ལྷོ་གཤོག་འདི་སྐབས་རོང་གི་ཤིང་བལ་ལམ། ། གྲོ་ག་ལ་སོགས་བྱུང་དུ་སླེབ་ཀྱང་སྲིད། ། ལྷོ་བྱང་གཤོག་བར་ཨ་ནུ་ཀུ་ཞེས་པ། ། ཞག་གཅིག་ས་གཏོར་རྡོ་གཏོར་རླུང་ཆེན་ལྡང་། ། 6.དེ་ནས་བྱང་གཤོག་ཞག་ནི་བཅུ་གཉིས་ལ། ། དང་པོ་མཇིང་རིང་ཞག་གསུམ་མཇིང་ཐུང་གཅིག ། མཇིང་རིང་མཇིང་ཐུང་ཉི་མ་དྲོ་ཞེས་ཟེར། ། མཇིང་ཐུང་དག་ལ་ཁ་བ་བབས་པ་ན། ། བྱ་སྐྱུགས་ཟེར་བས་ཁ་བ་ཆུང་བར་འདོད། ། 7.དེ་ནས་བྱ་མགོ་ཞག་གསུམ་ཞྭ་མོ་བཞི། ། ཁྲག་འཛག་རྣག་འཛག་ཞེས་པ་ཤིན་ཏུ་གྲང་། ། རྐང་ཕྲན་ཕྱི་ཕྲ་གཅིག་འདི་ཁ་དུས་ཡིན། ། བྱང་གཤོག་འདི་སྐབས་བྱང་གི་སྤུ་བལ་སོགས། ། རླུང་གིས་བསྐྱོད་ནས་ལྷོ་རོང་འབྱོར་ཞེས་སྨྲ། ། གསུམ་པ་བྱ་བར་ཟླ་ཕྱེད་འདྲེན་ལུགས་ཀྱང་། ། བྱེ་རྐང་གཡུ་རྐང་ནམ་བར་ཆུ་བོ་དང་། ། བྱ་ཕྲུག་དང་ལྔ་རེ་རེར་ཞག་གསུམ་རེ། ། བཅོ་ལྔ་དག་ལ་གཡུ་རྐང་ཚུགས་པ་ནས། ། མངའ་རིས་ཕྱོགས་སུ་རྟ་ལ་བྱི་ཆུ་བསྲུང་། ། ནམ་བར་གསུམ་ལ་ཤིན་ཏུ་གྲང་བའི་ངོ་། ། བྱ་ཕྲུག་གསུམ་ལ་ཁ་བ་འབབ་དུས་ཡིན། ། དེ་ཡིས་བྱ་གཟའ་སོ་བརྒྱད་རྫོགས་པ་སྟེ། ། ནམ་བྱ་མ་བུ་གྲོལ་རྟགས་ད་ཀྱི་དུས།[ ] ། རྟ་ཆུང་འཆར་རོ། ། 8.དེ་མཚམས་སྨལ་ཞག་གི། ། མགོ་ཟིན་སྨལ་པོའི་སྨད་ཚིགས་ཞག་བརྒྱད་ལ། ། ཕྱི་ཞག་གཉིས་ནི་ནམ་བར་ཞེས་སུ་གྲགས། ། དེ་ལ་གཤེར་བྱུང་སྨལ་ནི་ངེས་པ་ཟེར། ། མ་མོ་རེ་ལ་ལུ་གུ་རེ་ཡོང་བརྗོད། ། འདི་སྐབས་རྨིག་པ་ས་འོག་དག་ནས་ཐོན། ། རྨིག་པའི་ཁོང་སེལ་ཁ་བ་འབབ་ཅེས་ཟེར། ། ཟེར། ། 9.དེ་ནས་ཚིགས་ངན་ཞག་གཅིག་དེ་ཡི་ཚེ། ། མཐོ་དམའ་མཉམ་པའི་ཞིང་ལ་སྔ་འདེབས་རན། ། འདི་ཡི་སྐབས་སུ་སྨལ་པོའི་རྐེད་པ་ལ། ། ལྷག་སོར་ཟངས་མའི་ཀོ་ལྷན་བརྒྱབ་པས་ན། ། ཁྲག་འཛག་རྣག་འཛག་ཞེས་ཟེར་ཤིན་ཏུ་གྲང་། ། 10.དེ་ནས་སྟོད་ཚིགས་དྲུག་གི་ཕྱི་ཞག་གཉིས། ། ནམ་བར་བརྗོད་ལ་སྟོད་ཚིགས་ཞག་གཉིས་མཚམས། ། བྱ་ལོང་ལྷོ་ནས་བྱང་བགྲོད་དེ་ཡི་དུས། ། བྱ་ལོང་འོང་སྐྱེས་ཁ་ཆར་འབབ་ངོ་ཡོད། ། སྟོད་ཚིགས་དྲུག་སྐབས་ཉ་མོའི་འགུལ་རླུང་ལྡང་། ། ཉ་མཁར་རྒྱུ་མཚོའི་གཏིང་ནས་འཇིག་པར་བྱེད། ། སྙིང་ཞག་གཅིག་སྐབས་དཔྱིད་ཀྱི་ཉིན་མཚན་མཉམ། ། འོལ་པ་དག་ཀྱང་བོད་དུ་སླེབ་པའི་དུས། ། དཔྱིད་སྟོན་ཉིན་མཚན་མཉམ་པའི་ཉི་མ་དེར། ། དྲོ་ཞིང་རླུང་མེད་མཆིལ་པས་སྐད་འདོན་ན། ། སྔ་ཆུ་ལེགས་ཤིང་ཡུལ་ངད་ངར་བ་ཚ། ། སྤྲིན་ཁུག་སྣ་རིང་ཕོ་རོག་སྐད་སྒྲོག་ཚེ། ། བར་ཆུ་ལེགས་ལ་སྤྲིན་རྒྱ་བར་མེད་འཐིབས། ། ཐལ་རླུང་རླངས་ཆུང་དྲེའུ་སྐད་འདོན་ན། ། དེ་ཚེ་ཕྱི་ཆུ་ལེགས་པའི་མཚན་མར་བཟུང་། ། འདྲེས་མ་བྱུང་ན་ལེགས་ཉེས་ཅི་ཡང་སྲིད། ། གོང་ནས་སྨལ་པོའི་ལག་གཡས་ཞག་བདུན་ལ། ། སྔ་ཞག་གསུམ་ནི་ཕོ་མཆིན་ཕྱི་ཞག་བཞི། ། ནམ་བར་འདོད་ལ་ལག་གཡས་དེ་བདུན་སྐབས། གཤེར་རློན་བྱུང་ཚེ་སླར་ཡང་བདུན་བདུན་མཚམས། ། རླན་གཤེར་འབྱུང་ངོ་གཡུ་ལག་ཞག་བཞིའི་དུས། ། གཡུ་ལག་བོད་ཀྱི་སོ་ནམ་རེམ་དགོས་ཟེར། ། འདི་ཡི་ཟིན་ཉིན་བར་འདེབས་ཚུགས་པ་ཡིན། ། 11.དེ་ནས་རྐེད་སྟོང་ཞག་བཞི་དབུ་ཞག་གསུམ། ། གྲང་ངར་བྱུང་ན་རལ་དཀྲུགས་ཞག་པོ་གསུམ། ། དེ་ལ་ཁ་ཆར་འབེབས་ངོ་སྨལ་ཞག་རྫོགས། ། སྨལ་ཞག་དེ་རྣམས་གྲང་ན་ལུག་ལ་ངན། ། ཁྱོན་བསྡོམས་དགུན་ཞག་བརྒྱ་དང་བཅུ་ཐམ་རྫོགས། ། 12.དེ་ནས་ནུར་ཞག་གཉིས་མཐར་ཕྱི་འདེབས་ཚུགས། ། དེ་མཚམས་ཉི་སྐར་དབྱུག་ཟིན་དབྱུག་པའི་ཞག ། བཅོ་ལྔའི་བར་དུ་ཁ་བ་བབས་པ་ན། ། ཕྱུག་པོའི་སྔོ་ཐུད་ཐུལ་ཞེས་དགེ་བའི་འབྲས། ། དེ་སྐབས་དབྱུག་པ་ཉི་མའི་འོད་ཀྱིས་སྒྲིབ། ། དབྱུག་ཞག་ཐིམ་དང་ཕྱི་འདེབས་རྫོགས་དང་མཚུངས། ། 13.དེ་ནས་སོན་མཇུག་ཞག་པོ་ལྔ་དང་བཅས། ། འདེབས་ཞག་ལྔ་བཅུ་ཐེམ་མོ་འདི་ཕན་ལ། ། སོ་ནམ་བྱས་ཀྱང་སྨིན་པར་དཀའ་བ་ཡིན། ། 14.དེ་ནས་ཞག་བཞིར་ཁུ་བྱུག་བོད་དུ་སླེབ། ། དེ་ཉིན་ཁ་ལྷགས་ཆེ་ལ་སྤྲིན་སྣ་ཐུང་། ། སྐྱ་རིགས་འཁོར་བུར་འཆའ་ལ་སྦལ་སྐད་འདོན། ། དེ་ཚེ་སེར་བ་རྒོད་ལ་གནམ་སྤྲིན་མེད། ། ས་ལ་སྦྲུམ་འདར་འུག་སྐད་སྒྲོག་སེར་མེད། ། སྤྱིར་ན་ཁུ་བྱུག་ཁྱོས་མ་ཆར་འབེབ་ངོ་། ། ཡར་མར་ཁུ་བྱུག་སྟོང་གསུམ་དག་ཀྱང་བགྲང་། ། དེ་སྐབས་སྲོད་ལ་ལག་སོར་འཆར་བའི་དུས། ལུག་རིད་རིགས་ཀྱང་དྭངས་ཤིང་ཆུ་བཟང་འགྲོ། ། 15.དེ་ནས་བཅུ་དྲུག་རྫོགས་མཐར་གནའ་རེའུ་སྐྱེ། ། དེ་རྗེས་བཅོ་ལྔ་ཉི་ཁྱིམ་ཟུག་ཅེས་སྨྲ། ། 16.དེ་ནས་ཞག་བཅུར་ཉི་མའི་དུག་ཆར་དང་། ། ལྷག་མ་དྲུག་ནི་ཉི་མ་ལོག་ཆར་བཅས། ། བཅོ་ལྔ་བཅུ་དྲུག་གང་རུང་དབྱོར་ཉི་ནི། ། སྲིད་གསུམ་རྒྱལ་མོའི་ཞལ་ངད་བ་དན་གྱིས། ། ལྷོ་རུ་འཕེན་ཅིང་རྟ་ལྗང་ལྡོག་པར་བྱེད། ། 17.དེ་ཡི་ཕྱི་ཉིན་ལོག་ཞག་ཉེར་གཅིག་གམ། ། དབྱར་གྱི་ཆུང་གསུམ་ཞེས་གྲགས་དང་པོ་ནི། ། སྒྱེད་པུ་ཞག་བཞི་ནམ་བར་ཞག་པོ་གསུམ། ། སྨིན་དྲུག་བཞི་དང་ནམ་གསུམ་བི་རྫི་བཞི། ། ནམ་བར་གསུམ་སྟེ་ལོག་ཞག་ཉེར་གཅིག་ཐེམ། ། དེ་ཚེ་རྟ་ལ་ཆུ་དཔྱད་བྱས་ན་ལེགས། ། 18.དེ་ནས་སྨྲལ་ཞག་བཅོ་ལྔ་བགྲང་བའི་སྐབས། ། སྨལ་ཆར་ཞག་བདུན་གསེར་སྲང་ཁྲི་རི་མ། ། ཞེས་གྲགས་དེ་ཚེ་རྒྱལ་གྱི་ཆུ་དམར་རྒྱས། ། རྐྱང་ཕྲུག་སྐྱེ་ཞིང་རྟ་ལ་ཆུ་བཤན་རོན། ། སྨལ་པོ་སྐེམ་ན་ཝ་ལ་གཤེར་ཞེས་གྲགས། ། 19.དེ་ནས་ནམ་བར་གསུམ་དང་སྲིན་མོ་ཡི། ། ཞག་གསུམ་རིང་ལ་སྲིན་མོའི་གདོང་ཆར་འབེབས། ། 20.དེ་ནས་གསང་ཕག་ཞག་བདུན་དཀྱིལ་མ་ལ། ། ཕག་སྙིང་ཞེས་གྲགས་མར་སོགས་བཅུད་མཆོག་འགྱུར། ། ཕག་མོའི་ཉན་ཆེར་མཚན་མོར་འབབ་པར་འདོད། ། ཟ་ལེ་འབྲི་ཡི་འོ་མའི་དུས་ཀྱང་ཟེར། ། དེ་ལ་སེར་བ་འབེབ་པའི་ཉེན་ཡང་སྲིད། ། སྨལ་ཞོད་ཕག་སྐེམ་ཞིང་ལ་ལོ་ལེགས་ཤིང་། ། སྨྲལ་ཕག་གཉིས་ཀར་བབས་ནས་རྩྭ་སྤུངས་སྐྱེ། ། དུད་འགྲོ་དག་ལ་རྨིག་སྐྱོན་ཡོང་ཞེས་འཛེར། ། དེ་སྐབས་གྲོག་མ་འབུ་ལ་གཤོག་པ་འཐོག ། 21.དེ་ནས་ནམ་བར་གསུམ་དང་ཝ་ཟླ་ཕྱེད། ། སྔ་ཞག་ལྔ་ལ་ལ་ཕག་འཛིང་པ་ཟེར། ། ཆར་ཆེར་འབབ་ལ་ལྷག་མ་ཞག་བཅུ་ལ། ། ཝ་ཆར་ཟིམ་བུར་འབབ་ཅིང་འདི་ཡི་སྐབས། ། ཝ་ལྷགས་སེ་བོ་སྐྱ་ནི་ཤ་ར་ར། ། གོས་མེད་རྣམས་ལ་གོས་ཤིག་དགོས་ཟེར་ཞིང་། ། སྟོན་སེར་རླུང་གི་མགོ་བོ་ཚུགས་པ་ཡིན། ། 22.དེ་ནས་གཞུང་ཞག་ཉེར་གཅིག་དག་ལའང་། ། དང་པོ་བོང་བུ་ཞུག་པོ་དགུ་ཡི་རིང་། ། རླན་ནམ་གཤེར་བྱུང་སྟོན་རྫི་མི་ཡོང་བཤད། ། འདི་སྐབས་བོང་བུའི་འདྲེ་སད་འོང་ངོ་ཡོད། ། 23.དེ་ནས་ནམ་བར་ཞིག་དང་ཕུག་རོན་ཞག ། དགུ་ཡི་ཚེ་ལ་གཤེར་རམ་རླན་བབས་ན། ། སྟོན་རྫི་ཡོང་ཞེས་སྟོན་ཀ་ཁ་བ་འབབ། ། འདི་སྐོར་ཕུག་རོན་ལྡིང་སད་འབྱུང་ཞེས་བཤད། ། པུ་ཤུད་ལྷོ་ནས་བྱང་ཐོན་གཞུང་ཞག་ཐིམ། ། 24.དེ་ནས་བཟུང་སྟེ་རྟ་ལ་སྟོན་རྩྭ་བསྲུང་། ། དེ་རྗེས་དབྱར་ཤུལ་ཞག་པོ་བཞིའམ་ལྔ།་། སྐབས་བསྟུན་དཔྱད་ལ་དེ་སྐོར་ཉིན་མོ་འགྱུར། ། མཚན་མོ་མི་འགྱུར་བ་ཡི་དུས་ཞེས་གྲགས། ། 25.དེ་མཚམས་སྟོན་གྱི་ཉིན་མཚན་མཉམ་ཞིབ་ལྟོས། ། དེ་ཡི་དང་པོར་བྱ་ལོང་ལྷོ་རུ་བགྲོད། ། བྱ་ལོང་སོང་ཤུལ་གཤེར་རླན་འབྱུང་དོགས་ཡོད། ། ཉིན་མཚན་མཉམ་པའི་བརྟག་པ་དཔྱིད་ལྟར་དྲན། ། འདི་ནས་ལྷོ་སྤྲིན་སྨུག་པོ་མཁའ་རུ་དྭངས། ། ས་གཞིའི་དྲོད་ནི་གཏིང་ནས་འཆོར་ཞེས་བརྗོད། ། 26.དེ་ནས་ཤྭ་ངུ་ཞག་ནི་སོ་བདུན་ནམ། ། འགའ་ཞིག་སྟོན་གྱི་ལྷོ་སྒོའི་གནམ་སྐས་བརྗོད། ། དང་པོ་ཁྲ་སྐོར་ཞག་བཞི་བགྲང་བའི་སྐབས། ། ཐོ་རེངས་རྒྱུ་སྐར་ཁྲ་དབོ་འཆར་བ་མངོན། ། ཤཱ་ངུ་སྙིང་པོ་དག་ལ་ཞག་པོ་བརྒྱད། ། དེ་ལ་ཤུ་པོའི་རྭ་སད་འབྱུང་ངོ་ཟེར། ། འདི་ཕན་ལོ་ཏོག་བཞག་ཀྱང་སྨིན་མི་འགྱུར། ། བཙས་མ་ལ་འབད། ། 27.དེ་ནས་བྱ་མ་ལ། ། ཞག་ནི་བཅོ་ལྔ་དེ་ཚེ་ཁ་ཆར་བབས། ། ཡར་ཀྱེན་ཁ་བའི་སྒོ་ལྕགས་ཞེས་གྲགས་པས། ། དགུན་ཉི་ལྡོག་བར་ཁ་བ་མི་ཡོང་བཤད། ། 28.དེ་ནས་བྱ་ཕྲུག་དག་ལ་ཞག་བཅུ་སྟེ། ། ཁ་བ་བབས་ན་སྟོན་བྱ་སྐྱུགས་པའམ། ། མར་རྐྱེན་ཁ་བའི་ལྡེ་མིག་ཀྱང་ཟེར་བས། ། དགུན་ཉི་ལྡོག་བར་དུས་མིན་ཁ་ཆར་འབྱུང་། ། དེ་མཐར་ལྷོ་སྒོའི་གནམ་སྐས་ཤུ་ཞག་ཐེམ། ། 29.དེ་ནས་མཆེ་ཞག་ཉེར་གཅིག་བརྩི་བ་ལ། ། དང་པོ་དམུ་ཡི་མཆེ་བ་ཞག་པོ་བདུན། ། དེ་ནས་བདུད་ཀྱི་མཆེ་བ་ཞག་བདུན་དང་། ། བཙན་གྱི་མཆེ་བ་ཞག་བདུན་མ་མོ་ཡི། ། མཆེ་ཞག་གཅིག་སྟེ་བྱ་ལས་རྔམ་ཆེན་འཛེམ། ། 30.དེ་ནས་ཞག་བརྒྱད་བར་དུ་ཐོ་རེངས་དུས། ། སྐར་མ་སྣ་རུ་ཞེས་པ་བྱང་ནས་འཆར། ། དེ་ཡི་འོད་ལ་ཤིན་ཏུ་བཀའ་གཉན་ཟེར། ། 31.དེ་ནས་གཉན་བར་ཞག་ནི་བཅོ་ལྔ་ལ། ། གཉན་གྱི་རུ་འཕྲག་ཞེས་པ་ཤིན་ཏུ་གཉོན། ། དེ་ཡང་སྲོད་ལ་སྨལ་པོའི་གཞུ་གཉན་ཅིང་། ། ནམ་ཕྱེད་རྟ་ཕོའི་དབལ་གཉན་ཐོ་རེངས་སུ། ། ལག་སོར་རྩེ་གཉན་ཞེས་གྲགས་བཤད་སྲོལ་གཅིག ། སྨལ་པོ་ལག་རིང་ལག་གིས་མདའ་གཞུ་རྡེག ། ཟངས་མཆུ་དམར་པོ་ཤ་དང་ཁྲག་ལ་རྔམ། ། མ་མོ་ཐང་ཆེན་ས་ལ་ཡུལ་ཞེས་ཟེར། ། དེ་ཚེ་བག་མ་གཏོང་ལེན་མི་རུང་ཞིང་། ། བུ་ཚ་གང་སྐྱེས་ཅུང་ཟད་ངན་པའི་ལྟས། ། འགྲོགས་པའི་གྲོགས་ནི་སོ་སོར་དབྱེ་བ་ཡིན། ། ཕྱི་ནང་གང་ཡང་ལ་ཆའི་དུད་པ་འཛེམ། ། སྦྲ་མི་ཚེམ་ཞིང་རིམ་གྲོ་འགྱུར་ཆེ་འོ། ། 32.དེ་མཚམས་དགུན་གྱི་ཉི་མ་ཁྱིམ་དུ་ཞུགས། ། དེ་ཚེ་ཁ་བ་བྱུང་ན་དགུན་གྱི་དུས། ། ཁ་བ་ཆུང་ཞེས་བརྗོད་ལ་དེ་ནས་ཞག ། བརྒྱད་ཀྱི་ཐོག་ནས་དགུན་ཉི་ལྡོག་པར་བྱེད། ། ས་བདག་སྐྱེས་སོགས་རིམ་བཞིན་བྱེད་པར་འགྱུར། ། དེ་ཉིན་ཁ་བ་བབས་ན་དགུན་གྱི་རིང་། ། གཟའ་མིག་དེ་ལ་ཁ་བ་འབབ་ཅེས་གླེང་། ། དེ་དག་ཞང་ཞུང་རྒན་རྩིས་ཞེས་སུ་འདོད། ། ཅེས་འབྱུང་བ་ལྟར། ། རྩིས་ལུགས་འདི་ནི་ཐུན་མོང་མ་ཡིན་པ་ཞིག་ཡིན། འདིའི་ལུགས་ལ་ལོ་གཅིག་ཧྲིལ་པོར་ཉིན་ཞག་སུམ་བརྒྱ་དྲུག་ཅུ་རེ་ལྔ་ཡོད་པར་ངོས་འཛིན་བྱས་ཡོད་པ་མ་ཟད། ལྡོག་གཉིས་མཉམ་གཉིས་ཀྱང་གསལ་པོར་ངོས་ འཛིན་བྱས་ཡོད་པ་མ་ཟད། ལྡོག་གཉིས་མཉམ་གཉིས་ཀྱང་གསལ་པོར་ངོས་འཛིན་བྱས་ཡོད། འོན་ཀྱང་ཟླ་བ་བཅུ་གཉིས་ཀྱི་ཐ་སྙད་ཡེ་མ་སྦྱར་བར་སྣ་ཚོགས་ཞག་གི་ཐ་སྙད་ལོ་གཅིག་ཁོར་མོ་ཡུག་ཏུ་རྫོགས་པར་སྦྱར་ཡོད། ཞག་པོ་དེ་རྣམས་ཀྱི་སྐབས་སོ་སོར་ཡང་ཕྱི་རང་བྱུང་ཁམས་སུ་འགྱུར་བ་སྣ་ཚོགས་འབྱུང་གི་ཡོད་པར་བརྟེན། དེ་དག་གི་མིང་ཡང་དེ་དང་མཐུན་པའི་ཆ་ནས་སྣ་ཚོགས་སུ་བཏགས་ཡོད་པ་ཀུན་ཀྱང་སྣོད་བཅུད་ཀྱི་དེ་དང་མཐུན་པའི་ཆ་ནས་སྣ་ཚོགས་སུ་བཏགས་ཡོད་པ་ཀུན་ཀྱང་སྣོད་བཅུད་ཀྱི་ཁམས་དང་འབྲེལ་བ་དམ་ཟབ་ཡོད་པ་ཞིག་ཡིན་ནོ། ། ཞུག་དེ་དག་འདྲེན་ལུགས་མདོར་བསྡུས་ན་འདི་ལྟར། དགུན་ཉི་ལྡོག་ནས་ཉི་གཟའ་སོ་ལྔ། དེ་རྗེས་བྱ་གཟའ་སོ་བརྒྱད། དེ་རྗེས་སྨྲལ་ཞག་སོ་བདུན། དེ་རྗེས་ནུར་ཞག་གཉིས། དེ་རྗེས་དབྱུག་ཞག་བཅོ་ལྔ། དེ་རྗེས་སོན་མཇུག་ཞག་ལྔ། དེ་རྗེས་ཁུ་བྱུག་སླེབ་་ཞག་བཞི། དེ་རྗེས་གནའ་རེའུ་སྐྱེ་ཞག་བཅུ་དྲུག དེ་རྗེས་ཉི་ཁྱིམ་ཟུག་ཞག་བཅོ་ལྔ། དེ་རྗེས་དབྱར་ཉི་ལྷོ་རུ་ལྡོག་ཞག་བཅུ་དྲུག དེ་རྗེས་ལོག་ཞག་ཉེར་གཅིག དེ་རྗེས་སྨྲལ་ཞག་བཅོ་ལྔ། དེ་རྗེས་ནམ་བར་ཞག་གསུམ། དེ་རྗེས་སྲིན་མོའི་གདོང་ཆར་ཞག་གསུམ། དེ་རྗེས་གསང་ཕག་ཞག་བདུན། དེ་རྗེས་ནམ་བར་ཞག་གསུམ། དེ་རྗེས་ཝ་ཞག་བཅོ་ལྔ། དེ་རྗེས་གཞུང་ཞག་ཉེར་གཅིག དེ་རྗེས་དབྱར་ཤུལ་ཞག་ལྔ། དེ་རྗེས་ཤུ་ངུ་ཞག་སོ་བདུན་དེ་རྗེས་མཆེ་ཞག་ཉེར་གཉིས། དེ་རྗེས་སྣ་རུའི་འོད་ཞག་བརྒྱད། དེ་རྗེས་གཉན་བར་ཞག་བཅོ་ལྔ། དེ་རྗེས་དགུན་ཉི་ཁྱིམ་ཞུགས་ཞག་བདུན་བཅས་ཞག་པོ་སུམ་བརྒྱ་དྲུག་ཅུ་རེ་ལྔའོ། །
Tibetan Source	《རྩིས་རིག་ལ་འཇུག་པའི་སྒོ་》དེབ་གཟུགས་ཤ་20.8ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number