Choying Dzo - Chapter 4

_ch 4_
//kun 'dus byang chub sems kyi rang bzhin ni/_
/ snang ba ma yin snang ba'i chos las 'das/_
/stong pa ma yin stong pa'i chos las 'das/_
/yod pa ma yin dngos po mtshan ma med/_
/med pa ma yin 'khor 'das kun la khyab/_
/yod med ma yin lhun mnyam gdod ma'i dbyings/_
/phyogs dang ris med gzhi rtsa dngos po med/_
/rgyun chad med pas rig pa byang chub klong /_
/'pho dang 'gyur med mkha' dbyings ye nas gdal/_
/rang byung ye shes ye zla med pa'i don/_
/mi skye mi 'gag thig le gcig tu 'dus/_
/ma nges kun khyab phyogs mtha' yongs kyis med/_
/lhun mnyam mi g.yo rdo rje snying po'i gdung /_
/'du 'bral med pa'i dbyings mchog rab 'byams 'di/_
/tshig gis mtshon pa'i spyod yul ma yin te/_
/shes rab klong rdol so sor rang rig yul/_
/bsam brjod spros dang bral ba'i rnal 'byor pas/_
/mtshon dang mi mtshon med par thag bcad de/_
/sgom dang bsgom par bya ba ma rnyed pas/_
/bying rgod rnam rtog dgra bo bsad ma dgos/_
/ye nas spyi blugs gnas pa'i chos nyid la/_
/bdag dang gzhan du rtog pa mi mnga' bas/_
/khams gsum 'di nyid rang bzhin mnyam pa'i zhing /_
/dus gsum rgyal ba rang snang dag pa ste/_
/spang blang med par thams cad phyam gcig pas/_
/gzhan nas thob par bya ba rdul tsam med/_
/chos kun sems nyid klong chen der gsal la/_
/mnyam pa'i don la g.yos pa cung zad med/_
/phyi dang nang med 'char nub rnyog pa med/_
/mtha' yi mun sel rtsa ba byang chub sems/_
/gang yang ma spangs gol sa shugs la chod/_
/'gro ba'i snang tshul sna tshogs 'jig rten dang /_
/dag pa'i sangs rgyas sku dang ye shes kyang /_
/rtogs dang ma rtogs rtsal las shar ba yi/_
/rol pa ma 'gags nam mkha'i dbyings khyab kyang /_
/chos dbyings ngang la rtogs dang ma rtogs tsam/_
/rtogs pas bde gshegs dag pa'i snang ba dang /_
/ma rtogs ma rig gzung 'dzin bag chags las/_
/sna tshogs snang yang dbyings las g.yos pa med/_
/byang chub sems ni kun gyi dngos gzhi ste/_
/mtshan nyid ma 'gags sna tshogs cir shar yang /_
/rang gsal chos nyid dag pa'i dbyings su gsal/_
/dbye gsal med do rgya yan rig pa'i 'gros/_
/zang thal ye shes rang byung klong yangs shing /_
/ma bsgribs phyi nang med par 'od gsal bas/_
/rang rig sems kyi me long 'od po che/_
/'dod 'byung nor bu rin chen chos kyi dbyings/_
/btsal ba med pa thams cad rang byung bas/_
/rang byung ye shes 'dod dgur 'byung ba'i dpal/_
/che ba'i yon tan rnam grangs ji snyed pa/_
/dbyings las dbyings byung thabs mchog ma 'gags shar/_
/thams cad skye med dbyings su lhun rdzogs pas/_
/dngos po zil gnon stong nyid byang chub klong /_
/stong pa zil gnon byang chub rang rig klong /_
/byang chub sems la snang stong ye nas med/_
/gnyis med ma zhen bsam yas cho 'phrul 'byung /_
/dus gsum dus med skye med chos kyi dbyings/_
/mi 'gyur mi phyed 'dus ma byas pa'i klong /_
/dus gsum sangs rgyas rig pa'i ye shes dbyings/_
/gzung 'dzin zil gnon rang rig byang chub klong /_
/phyi dang nang med chos nyid lhun yangs so/_
/chos dbyings rin po che'i mdzod las/_
byang chub sems kyi rang bzhin bstan pa'i le'u ste bzhi pa'o//

back to Choying Dzo