101320

སྦས་པའི་རྣལ་འབྱོར་སྡེ་གསར་དབང་དགའ་ (1)

Part of speech

མིང་ཚིག

Definition

སྐུ་འཁྲུངས་ཡུལ་སྡེ་དགེ་འཇོ་མདའ། ཡབ་མགར་བ་བུ་དགའ་དང། ཡུམ་སྒྲོན་མ་ལྷ་དཀར་གཉིས་ལ་སྲས་གསུམ་ཡོད་པའི་འབྲིང་བ་རབ་བྱུང་བཅོ་ལྔ་པའི་ས་བྱི་ཕྱི་ལོ་ ༡༨༨༨ ལོ་བལྟམས། དགུང་གྲངས་ལྔར་སོན་པ་ན་ཡབ་གཞིས་ཁམས་སྟོད་སྐྱོ་བྲག་ཏུ་སྐྱས་སྤོས། སྐྱབས་མཆོག་གསལ་བསྟན་དུང་གསུམ་མདུན་སྐྲ་ཕུད་ཕུལ་ནས་ཚོགས་གྲལ་དུ་ཞུགས། མཚན་ཀརྨ་བློ་གྲོས་མཐར་ཕྱིན་དུ་གསོལ། ཡི་གེ་འབྲི་ཀློག་དང་། ཆོ་ག་ཆོས་སྤྱོད། རག་ཐིག་དབྱངས་རོལ་སོགས་ཚེགས་ཆུང་ངུས་བྱང་བར་མཁྱེན། དགུང་གྲངས་བཅོ་ལྔ་ཐོག་དཔལ་སྤུངས་སུ་ཕེབས་ནས། ཉིད་ཀྱི་གཅེན་པོ་མཁས་བཙུན་བཟང་པོའི་དཔལ་མངའ་སྟོབས་བཅུ་རབ་རྒྱས་སོགས་བཤེས་གཉེན་དུ་མའི་སྤྱན་སྔར་མདོ་རྒྱུད་རིག་གནས་ཀུན་ལ་རྟག་འགྲུས་ཀྱིས་སྦྱངས་པས་སྐྱེས་སྦྱང་གྱི་ཤེས་རབ་ཆེ་བར་གྲགས། དེ་ནས་རང་དགོན་གྱི་བླ་སྤྲུལ་སྒྲུབ་དཔོན་རྣམ་པའི་མདུན་ནས་ཀམ་ཚང་གཙོར་གྱུར་པའི་སྨིན་གྲོལ་མནོས་ཏེ་པད་སྡོང་སྒྲུབ་སྡེར་མཐོང་བརྒྱུད་ལྟར་བཅད་རྒྱ་མཐར་ཐོན་མཛད་པས་ཐབས་གྲོལ་ལམ་གྱི་དྲོད་རྟགས་མངོན་དུ་གྱུར། གྲུབ་མཆོག་ཀརྨ་མངྒའི་ཞབས་པད་གཙུག་ཏུ་བསྙེན་ཏེ་ཉེ་རིང་བརྒྱུད་སྲོལ་ཀུན་འདུས་མཉམ་མེད་འབའ་རོམ་རང་ལུགས་ཀྱི་ཆོས་སྐོར་ཡོངས་རྫོགས་དང་། ཁྱད་པར་ཨ་མཁར་སྙན་བརྒྱུད། རྫོགས་ཆེན་དཀོན་སྤྱིའི་ཁྲིད་རྐང་ཆ་ཚང་གསན་ཞུས་ཐོག གྲུབ་པའི་རྟགས་མཚན་བསམ་ལས་འདས། སྐྱོ་བྲག་བསྟན་བདག་རྣམ་གསུམ་གྱི་སྐུ་རིམ་གནད་སྨིན་དང། སྲུང་འཁོར་བྱད་མ་འབུམ་ཐུབ་གནང། ལྷག་པར་སྐྱབས་རྗེ་གསལ་བྱེད་རིན་པོ་ཆེ་སྐུ་ཚེ་དང་མཛད་འཕྲིན་མཐར་སོན་པའི་ལུང་བསྟན་པ་མངོན་དུ་གྱུར། སྐྱོ་བྲག་དབུ་རྩེ། སེང་རྫོང་སྒྲུབ་ཕུག ཚང་གསར་དང་སྐྱོ་བྲག་གི་སྒྲུབ་སྡེ། གདོང་ལ་ཀེའུ་ཚང་གི་དབེན་ཁྲོད་སོགས་སུ་སྐལ་ལྡན་ཆོས་མཛད་རྣམས་ལ་སྨིན་གྲོལ་སྙན་བརྒྱུད་ཀྱི་གདམས་པ་སྩལ་བས་ཐབས་གྲོལ་གྱི་ལམ་ལ་རང་བྱན་ཆུད་པའི་སློབ་ཚོགས་མང་དུ་བྱོན་པའི་ནང་ནས། བརྒྱུད་འཛིན་ཐུགས་ཀྱི་སྲས་མཆོག་འཇམ་དབྱངས་བློ་གྲོས་རིན་ཆེན་དང་། དུང་དཀར་སྐུ་ཕྲེང་བདུན་པ། བླ་མ་ཡེ་ཤེས་རབ་རྒྱས། བླ་མ་ཡེ་ཤེས་རྒྱལ་མཚན། བླ་མ་ཡེ་ཤེས་རྒྱ་མཚོ་སྟེ་ཡེ་ཤེས་རྣམ་གསུམ། མྱུ་རུ་ཚུལ་ཁྲིམས་རབ་བརྟན། ཀེ་ཚ་དགེ་ལེགས། ཀརྨ་ལྷ་བཟང། ཀུན་དགའ་ནོར་བཟང་སོགས་བསྟན་འཛིན་གྱི་སྐྱེས་བུ་རིག་འཛིན་ཕོ་མོ་དུ་མ་བྱུང། ཁྱད་པར་ཡི་དམ་གྱིས་ལུང་བསྟན་པའི་ནམ་མཁའི་སྙིང་པོའི་རྣམ་འཕྲུལ་རིགས་སྲས་མཆོག་ལ་ཨ་མཁར་སྙན་བརྒྱུད་གནང་ཞིང་བསྟན་ལ་སྨིན་པར་འབྱུང་ཞེས་ལུང་བསྟན། མཐར་རབ་བྱུང་བཅུ་དྲུག་པའི་མེ་རྟ་ཕྱི་ལོ་ ༡༩༦༦ བོད་ཟླ་བཅུ་གཉིས་པའི་ནང་དགུང་གྲངས་བརྒྱད་ཆུར་སོན་ལ་ཉེ་སྐབས་གཟུགས་སྐུ་ཆོས་དབྱིངས་སུ་བསྡུ་བའི་ཚུལ་བསྟན། དེའི་ཚེ་ངོ་མཚར་བའི་ལྟས་སྣང་གདུལ་བྱ་སོ་སོར་ངེས་དང་མ་ངེས་སྣ་ཚོགས་སུ་བྱུང་བས་ཀུན་ཀྱང་ཆེས་དད་ཅིང་གུས་པས་ཐར་པའི་ས་བོན་རྒྱུད་ལ་བཞག་པར་མཛད་དོ། །

{{#arraymap:སྦས་པའི་རྣལ་འབྱོར་སྡེ་གསར་དབང་དགའ་

|; |@@@ | | }}