18100

ཆོས་འབྱུང་གི་དབྱེ་བ་བཞི་ (1)

Part of speech	མིང་ཚིག
Definition	༡ ཆོས་ལུགས་སྤྱིའི་ཆོས་འབྱུང་ནི། ས་གནས་དང་ཆོས་ལུགས་སོ་སོའི་དབྱེ་བ་མ་ཕྱེ་བར་སངས་རྒྱས་ཆོས་ལུགས་སོགས་ཆོས་ལུགས་མི་འདྲ་བ་རྣམས་ཀྱི་བྱུང་ཚུལ་སྤྱིར་བཤད་པ་ཞིག་སྟེ། དཔེར་ན་བུ་སྟོན་རིན་པོ་ཆེས་མཛད་པའི་གསུང་རབ་རིན་པོ་ཆེའི་མཛོད་དང་། འགོས་ལོ་གཞོན་ནུ་དཔལ་གྱིས་མཛད་པའི་དེབ་ཐེར་སྔོན་པོ། དཔའ་བོ་གཙུག་ལག་ཕྲེང་བས་མཛད་པའི་ཆོས་འབྱུང་མཁས་པའི་དགའ་སྟོན། སུམ་པ་མཁན་ཆེན་ཡེ་ཤེས་དཔལ་འབྱོར་གྱིས་མཛད་པའི་ཆོས་འབྱུང་དཔག་བསམ་ལྗོན་བཟང་སོགས་ལྟ་བུ་ཡིན། ༢ ཆོས་ལུགས་སོ་སོའི་ཆོས་འབྱུང་ནི། བོད་དུ་ནང་པའི་གྲུབ་མཐའ་མི་འདྲ་བ་མང་དུ་བྱུང་སྟེ། དེ་ཚོ་སོ་སོའི་ལོ་རྒྱུས་གཙོ་བོར་བཤད་པ་ཞིག་ཡིན། དཔེར་ན་བོན་གྱི་མཁས་པ་ཤར་རྫ་བཀྲ་ཤིས་རྒྱལ་མཚན་གྱིས་མཛད་པའི་བོན་གྱི་ཆོས་ལེགས་བཤད་མཛོད། ཀུན་མཁྱེན་འཇིགས་མེད་གླིང་པས་མཛད་པའི་རྙིང་མ་རྒྱུད་འབུམ་གྱི་ཆོས་འབྱུང་། ལས་ཆེན་ཀུན་དགའ་རྒྱལ་མཚན་གྱིས་མཛད་པའི་བཀའ་གདམས་ཆོས་འབྱུང་། ས་སྐྱའི་བླ་མ་མང་པོས་མཛད་པའི་ས་སྐྱའི་ལམ་འབྲས་ཆོས་འབྱུང་། གཞན་ཡང་འབྲི་གུང་བཀའ་བརྒྱུད། ཀརྨ་བཀའ་བརྒྱུད། སྟག་ལུང་བཀའ་བརྒྱུད། འབྲུག་པ་བཀའ་བརྒྱུད། ཤངས་པ་བཀའ་བརྒྱུད། དགེ་ལུགས་པ་བཅས་སོ་སོའི་ཆོས་འབྱུང་ལོགས་སུ་ཡོད་པ་ལྟ་བུ་ཡིན། ༣ ས་གནས་སོ་སོའི་ཆོས་འབྱུང་ནི། ས་གནས་བྱེ་བྲག་པ་ཞིག་ལ་ནང་ཆོས་དར་ཚུལ་གཙོ་བོར་བཤད་པ་ཞིག་སྟེ། དཔེར་ན་ཇོ་ནང་ཏཱ་ར་ནཱ་ཐས་མཛད་པའི་རྒྱ་གར་ཆོས་འབྱུང་། གུ་ཤྲི་བློ་བཟང་ཚེ་འཕེལ་གྱིས་མཛད་པའི་ཆེན་པོ་ཧོར་གྱི་ཆོས་འབྱུང་། བྲག་སྒོམ་པ་བསྟན་པ་རབ་རྒྱས་ཀྱིས་མཛད་པའི་མདོ་སྨད་ཆོས་འབྱུང་ལྟ་བུ་དང་། གཞན་ཡང་མངའ་རིས། དྭགས་པོ། སྤོ་བོ། ཀོང་པོ། ཆབ་མདོ། ལྷོ་རོང་། འོད་ཁ། རྒྱལ་རྩེ། མི་ཉག་བཅས་ཀྱི་ཆོས་འབྱུང་ལོགས་སུ་ཡོད་པ་ལྟ་བུ་ཡིན། ༤ རིག་གནས་ཆེ་ཆུང་སོ་སོའི་ཆོས་འབྱུང་ནི། བོད་དུ་དར་རྒྱས་ཆེ་བའི་རིག་གནས་ཆེ་བ་ལྔ་དང་ཆུང་བ་ལྔ་སོ་སོའི་བྱུང་ཚུལ་གཙོ་བོར་བཤད་པའི་ཆོས་འབྱུང་ཞིག་སྟེ། དཔེར་ན་པཎ་ཆེན་བསོད་ནམས་གྲགས་པས་མཛད་པའི་འདུལ་བའི་ཆོས་འབྱུང་། ས་སྐྱའི་པཎ་ཆེན་ཤཱཀྱ་མཆོག་ལྡན་གྱིས་མཛད་པའི། དབུ་མའི་ཆོས་འབྱུང་། བོད་གྱི་སྨན་པ་མཁས་པ་མང་པོས་མཛད་པའི་གསོ་བ་རིག་པའི་ཆོས་འབྱུང་། བུ་སྟོན་རིན་པོ་ཆེ་སོགས་མཁས་པ་མང་པོས་མཛད་པའི་གསང་འདུས། བདེ་མཆོག འཇིགས་བྱེད། ཀྱཻ་རྡོར། དུས་འཁོར་སོགས་ཀྱི་ཆོས་འབྱུང་ཁག་མང་པོ་ཡོད་པ་ལྟ་བུའོ། །
Domain	ལོ་རྒྱུས།

{{#arraymap:ཆོས་འབྱུང་གི་དབྱེ་བ་བཞི་

|; |@@@ | | }}