18611

ཇོ་ནང་རི་ཁྲོད་ཆེན་མོ་ (1)

Part of speech

མིང་ཚིག

Definition

དཔལ་རྒྱལ་བ་ཇོ་ནང་བའི་བསྟན་པའི་གནས་གཞི་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ཤིང༌། སྒོས་སུ་འཕགས་པ་སྤྱན་རས་གཟིགས་ཀྱི་ཞིང་མཆོག་ཏུ་བྱིན་གྱིས་བརླབས། ཐོག་མར་སློབ་དཔོན་ཆེན་པོ་པད་མ་འབྱུང་གནས་བོད་དུ་བྱོན་པའི་དུས། ཕྱི་ལོ་ ༨༡༠ ཡས་མས་སུ་བརྟན་མ་བཅུ་གཉིས་ཀྱི་གནས་རྣམས་སུ་བྱོན་ཞིང༌། ཁྱད་པར་ནགས་རྒྱལ་གྱི་རི་ལ་ལན་མང་དུ་ཕེབས་པ་དང༌། ཇོ་ནང་བའི་སྒྲུབ་ཕུག་གོང་འོག་རྣམས་སུ་བཞུགས་པར་གྲགས། གཞན་ཡང་རིག་པ་འཛིན་པའི་ས་ལ་བཞུགས་པ། སྣུབས་ཆེན་ནམ་མཁའི་སྙིང་པོ་དང༌། ངན་ལམ་ཀླུའི་རྒྱལ་མཚན། པ་ནམ་པ་ཚུལ་ཁྲིམས་འབྱུང་གནས་ལ་སོགས་པའི་སྐྱེས་ཆེན་དམ་པ་མང་པོས་སྒྲུབ་གནས་སུ་མཛད་ཅིང༌། བོད་འདིར་གསང་སྔགས་ཀྱི་བསྟན་པ་ཐོག་མར་བཀའ་དྲིན་ཆེ་བ་འབྲོག་མི་ལོ་ཙཱ་བའི་སློབ་མ། གྲུབ་ཐོབ་མ་བཞིའི་གཙོ་མོ་བཟང་སྒོམ་དཀོན་མཆོག་ཅེས་བྱ་བ་གནས་འདིར་བཞུགས་ཤིང་མཐར་འཇའ་ལུས་སུ་གཤེགས་ཤུལ་ད་ལྟ་ཡང་མཇལ་རྒྱུ་ཡོད། དེ་རྗེས་མ་ཅིག་སངས་རྒྱས་རི་མ་ཡུན་རིང་བཞུགས་ཤིང་བཀའ་གདམས་དང་རྫོགས་ཆེན་གྱི་སྒྲུབ་གྲྭ་བསྐྱངས། དེ་ཉིད་ཀྱི་སྒྲུབ་གྲྭ་མ་སྟོང་བའི་རྒྱུན་ལ། གྲུབ་ཐོབ་འདར་འཕྱར་རིན་ཆེན་བཟང་པོ་ཕེབས་ཏེ། གསང་འདུས་རིམ་ལྔ་གཙོ་བོར་གྱུར་བའི་གསར་རྙིང་གཉིས་འདུས་ཀྱི་སྒྲུབ་གྲྭ་མཛད། སེམས་འགྲེལ་སྐོར་གསུམ་ཉམས་སུ་བཞེས་པས་སྦྱོར་བ་ཡན་ལག་དྲུག་གི་ཉམས་རྟོགས་མཐར་ཕྱིན། གྲུབ་ཐོབ་ཆེན་པོ་ཀུན་སྤངས་ཐུགས་རྗེ་བརྩོན་འགྲུས་ཀྱིས་ཕྱི་ལོ་ ༡༢༩༣ ལོར་གདན་ས་བསྐྱངས་པས་གནས་མིང་ཆོས་རྒྱུད་ལ་ཐོགས་ནས་དཔལ་རྒྱལ་བ་ཇོ་ནང་བ་ཞེས་གྲགས། ཆོས་རྗེ་ཀུན་སྤངས་ཆེན་པོས་གནས་འདིར་ལོ་ཉི་ཤུ་རྩ་གཅིག་ཙམ་བཞུགས། དེ་ནས་བྱང་སེམས་རྒྱལ་བ་ཡེ་ཤེས་ཀྱིས་ལོ་བརྒྱད། མཁས་བཙུན་ཡོན་ཏན་རྒྱ་མཚོས་ལོ་བདུན། ཆོས་རྗེ་ཀུན་མཁྱེན་དོལ་པོ་པ་ཆེན་པོས་ལོ་བཅོ་ལྔའམ་བཅུ་གསུམ། ལོ་ཙཱ་བ་བློ་གྲོས་དཔལ་གྱིས་ལོ་ངོ་བཅོ་ལྔ། མཁན་ཆེན་ཕྱོགས་ལས་རྣམ་རྒྱལ་གྱིས་ལོ་དྲུག་བཅས་ཀྱི་གདན་ས་མཛད། དེ་རྗེས་ལོ་གསུམ་ཙམ་ནས་མཁས་གྲུབ་དཀོན་མཆོག་རྒྱལ་མཚན་གདན་སར་མངའ་གསོལ་མཛད་དེ། དེ་རྣམས་ཀྱི་རིང་ལ་ཡང་ཀུན་མཁྱེན་ཆོས་ཀྱི་རྒྱལ་པོ་ཉིད་གནས་མཆོག་དམ་པ་འདི་ཉིད་དུ་བཤད་སྒྲུབ་ཀྱི་རྒྱལ་མཚན་འཛིན་པ་དང༌། ཕྱོགས་བཞིའི་རི་ཁྲོད་སྣ་ཚོགས་སུ་སྒྲུབ་བརྒྱུད་ཀྱི་བསྟན་པ་སྤེལ་བ་དང༌། ཆོས་སྡེ་དང་གྲྭ་ས་ཐ་དད་པ་རྣམས་སུ་ཆོས་ཀྱི་འཁོར་ལོ་མཐའ་ཡས་པ་བསྐོར་བར་མཛད། དེ་ལྟར་ཀུན་མཁྱེན་ཆེན་པོ་འདིའི་སྐུ་ཐོག་ལ་ཚོགས་པ་ཉུང་དུས་སུ་ཡང་སྟོང་ཕྲག་གཉིས་རེ་འཚོགས། མང་བ་ལ་ཚོད་བཟུང་དུ་མེད། ནམ་ཞག་རྒྱུན་དུ་མདག་སྦྱར་མཚམས་བཅད་པ་རང་ཡང་སྟོང་ཕྲག་རེ་མི་འཆད་པ་འབྱུང༌བ་སོགས་རྒྱས་པ་ཇོ་ནང་གནས་བཤད་དུ་གཟིགས་པར་ཞུ།

{{#arraymap:ཇོ་ནང་རི་ཁྲོད་ཆེན་མོ་

|; |@@@ | | }}