20993

ཏྲེ་ཧོར་བློ་བཟང་བཀྲ་ཤིས་ (1)

Part of speech	མིང་ཚིག
Definition	རབ་བྱུང་བཅུ་གཉིས་པའི་ས་ལུག་ཕྱི་ལོ་ ༡༧༣༩ ལོར་མདོ་ཁམས་ཏྲེ་ཧོར་དུ་ཡབ་པདྨ་ཚེ་རིང་དང་། ཡུམ་བུ་མོ་མཆོག་གཉིས་ཀྱི་སྲས་སུ་འཁྲུངས། བརྒྱད་པར་དར་རྒྱས་དགོན་དུ་ཞུགས། ཐུན་མོང་རིག་གནས་དང་། འདོན་ཆོས་རྣམས་ལ་བྱང་པར་མཛད། ཉི་ཤུ་བར་དབུས་སུ་ཕེབས། སེར་བྱེས་གྲྭ་ཚང་དུ་ཞུགས། མཁས་གྲུབ་བྱམས་པ་སྨོན་ལམ་སོགས་བསྟེན། བསྡུས་གཞུང་དང་། གཞུང་བཀའ་པོད་ལྔ། ལེགས་བཤད་སྙིང་པོའི་བཤད་ལུང་བཅས་ལ་ཐོས་བསམ་མཛད། ལྷ་རམས་པའི་མཚན་བཏགས་བཞེས། ཏྲེ་ཧོར་བློ་བཟང་རྟེན་འབྲེལ་ལས་རབ་བྱུང་དང་། དགེ་ཚུལ་བསྒྲུབས། ཉེར་ལྔ་བར་པཎ་ཆེན་བློ་བཟང་དཔལ་ལྡན་ཡེ་ཤེས་ལས་བསྙེན་པར་རྫོགས། ལམ་རིམ་དང་། བདེ་ལམ། ལམ་རིམ་བསྡུས་དོན་གྱི་བཤད་ལུང་བཅས་དང་། གསང་བདེ་འཇིགས་གསུམ་སོགས་ཀྱི་དབང་ཆེན་རྣམས་ཞུས། གཞན་ཡང་བྲག་རི་ངག་དབང་དོན་གྲུབ་དང་། ཀློང་རྡོལ་བླ་མ་ངག་དབང་བློ་བཟང་། བློ་བཟང་སྙན་གྲགས་སོགས་བསྟེན། སྨད་རྒྱུད་ལུགས་ཀྱི་ཁྲིད་ཆེན་བརྒྱད། འགྲེལ་བ་བཞི་སྦྲགས། སྦས་དོན་ཀུན་གསལ། རིམ་ལྔ་གསལ་སྒྲོན། བསྐྱེད་རིམ་དངོས་གྲུབ་རྒྱ་མཚོ། སྒྲུབ་ཐབས་རྒྱ་མཚོ། མགོན་ཆེན་བཅུ་གསུམ་སོགས་ཀྱི་དབང་ལུང་ཁྲིད་གསུམ་མཐའ་ཡས་པ་གསན། སོ་གསུམ་པར་དཔལ་ལྡན་སྨད་རྒྱུད་གྲྭ་ཚང་དུ་ཞུགས། མཁན་ཆེན་ངག་དབང་དཔལ་ལྡན་སོགས་བསྟེན། གསང་སྔགས་ཀྱི་གཞུང་དང་། ཆོ་ག་ཕྱག་ལེན་བཅས་ལ་བྱང་བར་མཛད། སོ་བདུན་པར་རྒྱུད་པའི་བླ་མ་དབུ་མཛད་ཀྱི་ཁྲི་དང་། ཞེ་བདུན་པར་རྒྱུད་པའི་མཁན་ཁྲི། ཞེ་དགུ་བར་བྱང་རྩེའི་ཁྲི་བཅས་ལ་རིམ་བཞིན་བཞུགས། པེ་ཅིང་གྱི་གཡུང་དགོན་དང་། དར་མདོ་ལྔ་མཆོད་དགོན་པ། འབའ་ཆོས་སྡེ། ལི་ཐང་ཐུབ་ཆེན་བྱམས་པ་གླིང་། རྫི་མཐོ་དགོན་སོགས་སུ་བཀའ་ཆོས་གསུངས། ང་དྲུག་པ་རབ་བྱུང་བཅུ་གསུམ་པའི་ཤིང་སྟག་ཕྱི་ལོ་ ༡༧༩༤ ལོར་དགའ་ལྡན་གསེར་ཁྲིར་བཞུགས། གསེར་ཁྲི་ལོ་བརྒྱད་རིང་བསྐྱངས། སྐུ་གསུང་ཐུགས་རྟེན་མང་དུ་བཞེངས། ཡངས་པ་ཅན་གྱི་སྟེང་ཤོད་རྒྱ་ཕིབས་སོགས་ཀྱང་ཞིག་གསོས་མཛད། རེ་གསུམ་པ་རབ་བྱུང་བཅུ་གསུམ་པའི་ལྕགས་བྱ་ཕྱི་ལོ་ ༡༨༠༡ ལོར་ལྷ་ལྡན་ཁྲི་ཐོག་ཁང་དུ་སྐུ་གཤེགས། དགའ་ལྡན་གསེར་ཁྲིའི་ཁྲི་རབས་རེ་བཞི་བ་ཡིན།
Synonyms	བྱང་རྩེ་བློ་བཟང་བཀྲ་ཤིས།

{{#arraymap:ཏྲེ་ཧོར་བློ་བཟང་བཀྲ་ཤིས་

|; |@@@ | | }}