31129

དོལ་པོ་བ་ཤེས་རབ་རྒྱལ་མཚན་ (1)

Part of speech

མིང་ཚིག

Definition

རབ་བྱུང་ལྔ་པའི་ཆུ་འབྲུག་ཕྱི་ལོ་ ༡༢༩༢ ལོར་གཙང་སྟོད་མངའ་རིས་དོལ་པོ་གྲུ་གསུམ་གྱི་ནང་ཚན་སྤུ་མདོར་ཡབ་ནས་སྟོན་ཡེ་ཤེས་དབང་ཕྱུག་དང་། ཡུམ་ཚུལ་ཁྲིམས་རྒྱན་གཉིས་ཀྱི་སྲས་སུ་འཁྲུངས། བྱིས་དུས་ཀྱི་མཚན་ལ་ཤེས་རབ་མགོན་ཞེས་གསོལ། གཞོན་དུས་ནས་ཡབ་ཡུམ་གྱི་མདུན་ལས་ཡི་གེའི་འབྲི་ཀློག་སྦྱངས། བཅུ་གསུམ་པར་སྐྱི་སྟེངས་དགོན་དུ་ཕེབས། མཁན་པོ་ཚུལ་ཁྲིམས་སྙིང་པོ་ལས་རབ་ཏུ་བྱུང་། མཚན་ལ་ཤེས་རབ་རྒྱལ་མཚན་ཞེས་གསོལ། སྐྱི་སྟོན་འཇམ་དབྱངས་ལས་སྔགས་སྡོམ་བླངས། དབང་ལུང་ཡང་མང་པོ་ཞུས། མཁས་ཆེན་བྱང་ཆུབ་སེང་གེ་དང་། སྟག་ཤམ་པ་ཚུལ་ཁྲིམས་བཟང་པོ་གཉིས་ལས་རྙིང་ཆོས་མང་པོ་གསན། བཅུ་དགུ་པར་གློ་བོ་བསམ་རྫོང་དུ་ཕེབས། སྐྱི་སྟོན་གྲགས་པ་རྒྱལ་མཚན་ལས་གསན་སྦྱོང་ཟླ་གཅིག་རིང་མཛད། ས་སྐྱར་སློབ་དཔོན་ཤེས་རབ་བཟང་པོ་དང་། ཉི་ཕུ་པ་གཞོན་ནུ་བཟང་པོ་གཉིས་ལས་ཚད་མ་དང་། མཁན་པོ་བློ་གྲོས་བསྟན་པ་ལས་ཕར་ཕྱིན། བླ་མ་འཇམ་པའི་དབྱངས་ལས་བྱམས་ཆོས་སྡེ་ལྔ། དབུ་མའི་རིགས། བསྟོད་ཚོགས། གཏམ་ཚོགས། དབང་ལུང་རྗེས་གནང་བཅས་ལོ་བཞི་རིང་སྦྱངས། མདོ་སྔགས་གཞུང་ལུགས་མང་པོ་ཐུགས་སུ་ཆུད། གསུམ་པར་དབུས་གཙང་དུ་གྲྭ་སྐོར་ཕེབས། མཁན་པོ་བསོད་ནམས་གྲགས་པ་ལས་མཉེན་པར་རྫོགས། རྣལ་འབྱོར་པ་ནག་འབུམ་ལས་ཞི་བྱེད་དང་། གཅོད། རྫོགས་ཆེན་སྙན་བརྒྱུད་སོགས་ཞུས། སོ་གཅིག་པར་ཇོ་ནང་དུ་ཕེབས། ཆོས་རྗེ་ཡོན་ཏན་རྒྱ་མཚོ་ལས་དུས་འཁོར་སོགས་ཟབ་ཆོས་མང་དུ་ཞུས། སོ་བཞི་པར་ཇོ་ནང་པའི་གདན་སར་ཕེབས། མདོ་སྔགས་ཀྱི་འཆད་ཉན་མཛད། ཇོ་ནང་པའི་ལྟ་བའི་གཞི་བཏིངས། སོ་དགུ་པར་མཆོད་རྟེན་ཆེན་པོ་དཔལ་ཡོན་ཅན་རྨང་བཏིངས། ལོ་བཞིའི་རིང་ལེགས་པར་གྲུབ། རབ་གནས་ཀྱང་མཛད། ཞེ་ལྔ་པར་ས་སྐྱ་དང་། ཆུ་བཟང་། ལྷ་རྩེ་རྫོང་། ཤངས། སྣར་ཐང་སོགས་སུ་སྐུ་མཚམས་བཞུགས། ངོ་མཚར་བའི་རྟེན་མང་པོ་བཞེངས། ང་བདུན་པར་རྟ་ནག་ཏུ་ཕེབས། འཆད་ཉན་ལོ་གཅིག་རིང་མཛད། དབུས་སུ་ཆོས་འཁོར་བསྐོར། རབ་བྱུང་དྲུག་པའི་ལྕགས་གླང་ཕྱི་ལོ ༡༣༦༡ ལོར་སྐུ་གཤེགས། གསུང་རྩོམ་ནི་དུས་ཀྱི་འཁོར་ལོའི་སྐོར་ལ་བསྟན་བཅོས་སུམ་ཅུ་སོ་བརྒྱད། གྲུབ་མཐའི་སྐོར་ལ་བསྟན་བཅོས་བཅུ་དྲུག ཕར་ཕྱིན་སྐོར་ལ་བསྟན་བཅོས་བདུན། གསོལ་འདེབས་སྐོར་ལ་ཉེར་ལྔ། རྡོ་རྗེ་ཕྲེང་བའི་སྐོར་ལ་གསུམ། སྤྲིང་ཡིག་སྐོར་ལ་བརྒྱད། གདམས་ངག་དང་དྲིས་ལན་སྐོར་ལ་བཅུ་གཉིས། རྣམ་ཐར་སོགས་ཀྱི་སྐོར་ལ་བཅུ་དྲུག སྨོན་ལམ་སྐོར་ལ་གསུམ། བཀྲ་ཤིས་སྐོར་ལ་བཞི་བཅས་ཁྱོན་བསྡམས་བསྟན་བཅོས་ཚིག་བརྒྱ་བདུན་ཅུ་དོན་བཞི་ཡོད་པར་བཤད། སློབ་མ་གྲགས་ཆེ་བ་ནི་ལོ་ཙཱ་བ་བློ་གྲོས་དཔལ་བཟང་དང་། ས་བཟང་མ་ཏི་པཎ་ཆེན། དཀོན་མཆོག་རྒྱལ་མཚན། མཁན་ཆེན་ཕྱོགས་ལས་རྣམ་རྒྱལ་བཅས་ཡིན།

{{#arraymap:དོལ་པོ་བ་ཤེས་རབ་རྒྱལ་མཚན་

|; |@@@ | | }}