43874

བསེ་བ་ལ་བྱམས་མགོན་སྐུ་ཕྲེང་དང་པོ་ངག་དབང་རྒྱལ་མཚན་ (1)

Part of speech

མིང་ཚིག

Definition

ཆོས་རྗེ་རྒྱ་རས་ཀྱི་སློབ་མ་གྲུབ་ཐོབ་གཏེར་ཁུངས་པའི་གདུང་རྒྱུད་སྡེ་སྲིད་དབུ་མཛད་ཆེན་མོའི་དབོན་སྲས་སུ། རབ་བྱུང་བཅུ་གཅིག་པའི་མེ་ཕག་ ༡༦༤༧ ལོར་འཁྲུངས། དགུང་ལོ་བཞི་ནས་སྐྱབས་མགོན་ཞབས་དྲུང་ངག་དབང་རྣམ་རྒྱལ་ལ་གཙུག་ཕུད་ཕུལ་ཏེ་མཚན་གསོལ། དྲུང་ཡིག་ཚེ་དབང་རྡོ་རྗེ་ལ་ཡིག་རིགས་སོགས་མཁས་པར་སྦྱངས་ཏེ་འདུས་སྡེར་ཞུགས། མཁན་པད་དཀར་འབྱུང་གནས་ལས་སོ་ཐར་སྡོམ་པའི་ཚིགས་སྔ་མ་གཉིས་དང༌། མཁན་ཆེན་བསོད་ནམས་འོད་ཟེར། ཁྲི་ཆེན་བསྟན་འཛིན་རིན་པོ་ཆེ། ཡོངས་འཛིན་པད་དཀར་ལྷུན་གྲུབ་སོགས་བསྟེན་ནས། བསླབ་ཚིགས་ཕྱི་མས་གཙོས་བཅུ་ཕྲག་རིག་པའི་གནས་སྤྱི་དང༌། འབྲུག་ལུགས་སྡོང་པོ་གསུམ་དྲིལ་སོགས་ལ་གསན་བསམ་དཔྱིས་ཕྱིན་པར་མཛད། དེ་སྐབས་མི་འགྱུར་བརྟན་པའི་ནང་ཟིང་གི་རྐྱེན་ལས་ཡབ་ཆད་པས་བཀྲོངས། ཡུམ་སྐུ་མཆེད་མཐའ་ལ་སྤྱུགས་པ་སོགས་མི་སྲིད་པའི་སྡུག་བསྔལ་ཆེན་པོས་ཐུགས་ཕྱུང་ནས། ཉིན་མཚན་གཡེལ་བ་མེད་པར་ཐོས་དོན་ཉམས་སུ་བཞེས་པས། ཉམས་རྟོགས་རྣལ་འབྱོར་བཞིའི་རིམ་པ་དང་མཐུན་པར་འཁྲུངས། ཕྲིན་ལས་ཀྱང་རྒྱས་ཏེ། ཁམས་སྡེ་དགེ་རྒྱལ་པོ་སངས་རྒྱས་བསྟན་པ་ནས་བཟུང༌། སྟོད་ལ་དྭགས་རྒྱལ་པོ་ཉི་མ་རྣམ་རྒྱལ་གྱི་བར་རྒྱལ་བློན་དུ་མས་བཀུར། རྒྱལ་པོ་གཉིས་ཀྱི་དབུ་བླར་ཡུན་རིང་བཞུགས་པ་ནས་ཐབས་མཁས་ཀྱིས་དགོངས་པ་བཀྲོལ་ཏེ་སླར་བྱོན། གཞུང་ནས་སྐུ་དྲིན་ལེགས་སོའི་བདག་རྐྱེན་དུ་རིན་སྤུངས་ཀྱི་སྤྱི་བླར་བསྐོས། དེར་མི་ཆོས་དང་འབྲེལ་བའི་བྱ་བྱེད་ཀྱིས་ཐུགས་སུན་ཏེ། ལོ་གཅིག་བཞུགས་ནས་དགོངས་པ་ཞུས་མཛད། དེ་ནས་སེ་ལ་རྡོ་རྗེ་གདན་གྱི་ཆོས་སྡེ་ཆེན་པོ་བཏབ། གཅུང་ཆོས་རྗེ་ངག་དབང་པད་དཀར། སྐུ་ཚ་ཆོས་རྗེ་ངག་དབང་ཕྲིན་ལས། ཐུགས་སྲས་ཤཱཀྱ་རིན་ཆེན་སོགས་རྗེས་སུ་བཟུང༌། གཞུང་གདན་ཕན་ཚུན་གཉིས་སུའང་མཆོག་སྤྲུལ་རྣམ་གསུམ་གྱི་དབུས་གདུལ་བྱ་མང་པོ་སྨིན་གྲོལ་ལ་བཀོད་པའི་མཐར། དགུང་ལོ་གྱ་དྲུག་པ་ཆུ་བྱི་ ༡༧༣༢ ལོའི་ཆུ་སྟོད་ཟླ་བའི་ཚེས་བཞི་ལ་དགའ་ལྡན་དུ་གཤེགས་སོ། །

{{#arraymap:བསེ་བ་ལ་བྱམས་མགོན་སྐུ་ཕྲེང་དང་པོ་ངག་དབང་རྒྱལ་མཚན་

|; |@@@ | | }}