53449

མདོ་ཁམས་པ་རིན་ཆེན་སེང་གེའམ་རྡོ་གསོལ་བ་ (1)

Part of speech

མིང་ཚིག

Definition

ཁམས་ངམ་ཤོད་ཀློང་མོ་ཆེར། ཡབ་མེ་ཉག་སྤྱོད་པ་བྱ་བ་དང་། ཡུམ་ལྷ་མོ་འོད་ཟེར་ལྕམ་བྱ་བ་ལ། རབ་བྱུང་གསུམ་པའི་མེ་ལུག་ ༡༡༨༧ ལོར་བལྟམས། སྐུ་གཟུགས་བཟང་ཞིང། དབང་པོ་གསལ། ཐུགས་གཤིས་ཅུང་ཐུང་། ཡབ་ཀྱིས་དགུང་ལོ་བཅུ་གཉིས་ལོན་དུས། རྙིང་མའི་ཇོ་མོ་ཞིག་རྩར་བསྐྱལ། དེར་ལོ་གསུམ་རིང་ཡི་གེ་དང་། བཅུ་དྲུག་སྐབས་ཡབ་ཀྱིས་ཆུང་མ་གསར་དུ་བླངས་ནས། ལོ་གཅིག་མཉམ་དུ་བསྡད། བཅུ་བདུན་ལ་ཆོས་རྗེ་གཙང་པའི་དྲུང་དུ་རབ་ཏུ་བྱུང་། སྒོམ་པ་གཏེར་ཁུང་བའི་ཕྱག་ཕྱིར། བཙུན་ཆུང་ཉེར་ལྔ་བཏང་བའི་ནང་དུ་བཞུགས། བླ་མའི་སྤྱན་སྔར་ཕྱིན། ཐུབ་པ་ལྔའི་ཁྲིད་ཚང་བར་ཞུས། རི་ཁྲོད་དེར་ཟླ་བ་དྲུག་བསྒོམས་པས་སྣང་སེམས་གཉིས་མེད་དུ་ཤར། དེ་ནས་འབྲུག་ཏུ་བྱོན་ནས། བླ་མའི་དྲུང་དུ་རྟོགས་པ་ཕུལ་བས། ཆོས་པ་བྱ་བ་རི་ལ་སྒོམ་ནས། ཡོན་ཏན་སྐྱེད་དགོས་པ་ཡིན། གོ་བཅད་འདུག་གསུངས་ནས། གདམས་ངག་གི་ལྷག་མ་རྣམས་གནང་། ཉེར་ལྔ་ལ་མགྲོན་པོ་དང་འགྲོགས་ནས་ཚ་བ་སྒང་དུ་བྱོན། དེར་རྡོའི་བཅུད་ལེན་ཟླ་བ་དགུ་མཛད་པས། མཚན་ཡང་རྡོ་གསོལ་བར་ཐོག ། དཔོན་ཆེན་ཆབ་མདོ་བས། ཆབ་མདོར་གདན་དྲངས་ནས། ཡོན་བདག་ཏུ་ཁས་བླངས་ཤིང་། རུག་གྱམ་དུ་དགོན་གནས་ཕུལ་བ་ལ་ལོ་གཉིས་བཞུགས། པད་རུས་གདན་དྲངས་ནས་དངུལ་ཁ་དང་དགོན་པ་ཕུལ། རྫ་ངོམ་གཉིས་ན་ཆོས་འབྲེལ་མ་བྱས་པ་སུ་ཡང་མེད་དོ། དེ་ནས་རག་རྡོར་དགོན་དུ། ལོ་གཉིས་སྐུ་མཚམས་མཛད། སྐྱོ་བསངས་སྐབས་ན། སྐུ་ལུས་བཀོད་པ་གསུམ་མཛད། ཟད་པར་རླུང་གི་སྐྱེ་མཆེད་ལ་མངའ་བརྙེས་པ་ཡིན། དཔོན་འོད་ཟེར་གྱིས། ཞོ་ཏིའི་དགོན་ཕུལ་ནས། དེར་ལོ་མང་དུ་བཞུགས་པའི་ཚེ། གོང་སྟག་གཉིས། ལྡོང་། གྲོ་ལྷོ་ཡིས་ཞབས་ཏོག་བྱས། སྤྱི་དཔོན་སྨོན་པ་གྲགས་ཀྱིས་ལ་ངོམ་གཉིས་སུ་ཡང་ཡང་གདན་དྲངས་ནས་གནས་དགོན་ཕུལ། ཞོ་ཏི་ན་བཞུགས་པའི་དུས་ཆོས་དམར་བར་གནང་། ལྟ་སྒོམ་སྤྱོད་གསུམ་དང་། སྣང་བ་བཀག་མི་དགོས་པའི་མགུར་ཡང་བཞེངས། རོབ་ཏུ་བན་གཙོམ་གྱིས་གནས་ཕུལ། ཤར་བ་ལྷ་སྒྲས་མཚལ་ཀ་ཕུལ། ལྷོ་ནས་འཛིང་བ་ཐར་གྱིས་ཚ་བ་སྒང་དུ་སྤྱན་དྲངས་ཀྱང་མ་བཞུད། །དེ་ནས་སྒོམ་པ་དཀོན་མཆོག་གིས་ཡུམ་དང་སྲས་ལྕམ་གཞིས་དང་བཅས་པ་ཕུལ་ནས་ཁོ་རང་འདས། དེའི་ལུས་ལོངས་སྤྱོད་དང་བཅས་པ་སྔར་ནས་ཞབས་ཏོག་ལ་བསྔོས་པས། དེ་ལ་ཐུགས་ཉེ་བར་བརྩེ་བའི་སྒོ་ནས་བཞེས། དེ་ལ་མ་རྟོགས་པའི་སྐྱེ་བོ་ཕལ་པ་འགའ་ཞིག་ཅུང་མ་དད་པ་ལ། བླ་མའི་ཞལ་ནས། དཔལ་ནཱ་རོ་པས་འཆི་བ་ཆོས་སྐུ། བར་དོ་ལོངས་སྐུ། སྐྱེ་བ་སྤྲུལ་སྐུར་གསུངས་པས། དགག་སྒྲུབ་གང་ཡང་བྲལ་བའི་རྣལ་འབྱོར་པ་ཡིན་གསུངས། ཞེ་གསུམ་པ་ས་གླང་ ༡༢༢༩ ལོར། སྤྲུལ་པའི་གཟུགས་སྐུ་ཡལ། ཟླ་བ་ཕྱི་མའི་ཚེས་བརྒྱད་ཀྱི་ཉིན་པར། གདུང་ཞུགས་ལ་སྦྱངས་པ་ན། ཐུགས་དང་རིང་བསྲེལ། བདེ་མཆོག་གི་སྐུ། རྡོ་རྗེ། འཁོར་ལོ། པདྨ་སོགས་བཀྲ་ཤིས་པའི་རྟགས་མཚན་མང་དུ་བྱོན་ཏོ། །དེ་ལ་སློབ་མ་རྟོགས་ལྡན་གྱི་སྐྱེས་བུ་མང་དུ་བྱོན་པ་ལས། གཙོ་བོར་ཙ་རི་ཏ་པ་ཡིན་ནོ། །

{{#arraymap:མདོ་ཁམས་པ་རིན་ཆེན་སེང་གེའམ་རྡོ་གསོལ་བ་

|; |@@@ | | }}