63103

འཁྲུལ་ཞིག་ཁྲི་འཛིན་དང་པོ་སྐུ་ཕྲེང་དང་པོ་ཕྲིན་ལས་རྒྱ་མཚོ་ (1)

Part of speech

མིང་ཚིག

Definition

འཁྲུལ་ཞིག་སྐུ་ཕྲེང་དང་པོ་ཕྲིན་ལས་རྒྱ་མཚོའམ་ཤ་བ་རང་གྲོལ་མཆོག་ནི། མདོ་སྟོད་ནང་ཆེན་ཕྱོགས་སུ། རབ་བྱུང་བཅུ་པའི་ནང་ཙམ་དུ་སྐུ་འཁྲུངས། གཞོན་དུས་སུ་མ་ཡིས་བཤོལ་ཀྱང་མ་ཉན་པར་རི་དྭགས་གཤོར་བ་སོགས་མཛད་སྤྱོད་ངེས་མེད་གནང༌། སྐབས་ཤིག་ཡུག་བིས་རུ་ཞེས་པའི་རི་སུལ་ཞིག་ནས་ཤ་བ་ཞིག་ལ་མདའ་བརྒྱབ་ནས་རྨས་པར་ཁྱིས་དེད་པའི་མཐར་ལྟོ་བ་ཕྲལ་ནས་རྒྱུ་མ་ཕྱུང་ཞིང༌། འདར་ཕྲིལ་ཕྲིལ་ངང་ཁོང་ལ་ལྟ་བཞིན་མཆི་མ་ཁྲོལ་ལེར་ཤི་བ་གཟིགས་པའི་རྐྱེན་གྱིས། ཤས་མི་བཟོད་པའི་སྙིང་རྗེ་དྲག་པོ་དང་འགྱོད་པ་ཚད་མེད་པ་སྐྱེས། ད་ནི་བླ་མ་བཟང་པོ་ཞིག་བཙལ་ནས་སྡིག་བཤགས་དགེ་བ་རེ་མ་བསྒྲུབ་ཐབས་མི་འདུག་སྙམ་པ་དགོངས། དེ་དུས་ཙམ་ལ་ཡོངས་འཛིན་ངག་དབང་བཟང་པོའི་དངོས་སློབ། ཁམས་པ་ཀརྨ་བསྟན་འཕེལ་ལྗོངས་དེར་ཕེབས་འདུག་པ་གསན་པས། མཚན་ཐོས་པ་ཙམ་གྱིས་མོས་གུས་བྱུང་ཞིང༌། ཁྱི་ར་བའི་ཚུལ་གྱིས་མཇལ་དུ་བྱོན། ཐོག་མར་ཉེ་གནས་ཀྱིས་རྔོན་པར་དོགས་ནས་ཕྱིར་བསློགས་ཀྱང༌། བླ་མས་ལས་ཅན་གྱི་སློབ་མར་གཟིགས་ནས་འབོད་དུ་བཏང་བས། ཞལ་མཇལ་བ་ཙམ་གྱིས་ཐ་མལ་གྱི་རྟོག་པ་འགག་པའི་མོས་གུས་བྱུང༌། རྗེས་སུ་བཟུང་ཞིང་རྒྱུན་གྱི་ཞབས་འབྲིང་མཛད། གདམས་ངག་བཀའ་རྒྱ་ཅན་ལྔས་གཙོས་སྨིན་གྲོལ་གྱི་གདམས་པ་མང་དུ་བསྩལ། ཐུགས་རྒྱུད་ལ་རྟོགས་པ་ཁྱད་པར་ཅན་འཁྲུངས་པས་བླ་མས་རྟོགས་པ་རང་དང་མཉམ་པར་བསྔགས་ཤིང༌། འཁྲུལ་ཞིག་ཅེས་པའི་མཚན་གསོལ། དེ་ནས་བླ་མའི་ལུང་ལྟར་གསང་གི་དགོན་ལུང་ཕུར་སྒྲུབ་པར་ཡུན་རིང་བཞུགས། རྡོ་ལ་ཕྱག་ཞབས་དང་སྐུ་ལུས་ཀྱི་རྗེས་དང༌། མི་མ་ཡིན་ལ་ཆོས་སྟོན་པ་སོགས་གྲུབ་པའི་སྤྱོད་པ་བསམ་ལས་འདས། སློབ་ཚོགས་མང་པོ་སྨིན་གྲོལ་གྱི་ལམ་ལ་བཀོད། ནང་ཆེན་རྒྱལ་པོའི་སྲས་མོ་ཤི་བར་འཕོ་བ་ཞུས་ཚེ། ཀ་ལི་ཚག་སྒྲ་དང་བཅས་བུག་པ་ཧ་རེར་གཏོར་བའི་འཕོ་རྟགས་ངོ་མཚར་ཅན་བྱུང་བས། རྒྱལ་པོ་ཤིན་ཏུ་དད་ནས་དབུའི་མཆོད་གནས་ཀྱི་གཙོ་བོར་བཀུར་ཅིང༌། མདུན་རི་གསང་ལུང་ཇོ་བོ་སྐེད་རྒྱལ་གྱི་ཞོལ། གསར་མ་ཡང་རྫོང་གི་འགུལ། ས་གནད་ཁྱད་པར་ཡོད་པ་དེར་གཙུག་ལག་ཁང་རྟེན་དང་བརྟེན་པར་བཅས་པ་བཞེངས་ནས་ཕུལ། ཕུན་ཚོགས་བདེ་ཆེན་གླིང་ཞེས་མཚན་གསོལ་ནས་གདན་ས་མཛད། ཕྱིས་བླ་མའི་མཚན་གྱིས་འཁྲུལ་ཞིག་དགོན་ཞེས་གྲགས། དེར་སློབ་ཚོགས་མང་དུ་འདུས་པ་རྣམས་ལ་སྐལ་བར་འཚམས་པའི་ཆོས་ཀྱི་བདུད་རྩི་སྩལ་བས་རང་གཞན་གྱི་དོན་གཉིས་སྒྲུབ་ནུས་པའི་བསྟན་འཛིན་མང་དུ་བྱུང་ནས། མཉམ་མེད་དཔལ་ལྡན་འབྲུག་པའི་རྟོགས་པ་དོན་གྱི་བརྒྱུད་འཛིན་ཆེན་པོར་གྱུར། མཐར་དགུང་ལོ་དྲུག་ཅུའི་སྟོད་ཙམ་ལ་གདན་ས་དེ་ཉིད་དུ་སྐུ་གཤེགས། སྐུ་གདུང་རིང་བསྲེལ་གྱི་ཕུང་པོར་གྱུར་པ་སོགས་འགྲོ་དོན་གྱི་ཕྲིན་ལས་བསམ་གྱིས་མི་ཁྱབ་བོ། །

{{#arraymap:འཁྲུལ་ཞིག་ཁྲི་འཛིན་དང་པོ་སྐུ་ཕྲེང་དང་པོ་ཕྲིན་ལས་རྒྱ་མཚོ་

|; |@@@ | | }}