697

ཀརྨ་པ་བདུད་འདུལ་རྡོ་རྗེ་ (1)

Part of speech

མིང་ཚིག

Definition

རབ་བྱུང་བཅུ་གཉིས་པའི་ཤིང་སྟག་ཕྱི་ལོ་ ༡༧༣༤ ལོར་བོད་ཡུལ་དབུས་ཀྱི་ལྷོ་ཕྱོགས་སྙེན་ལྕ་བ་གྲོང་དུ་འཁྲུངས། དགུང་ལོ་གཅིག་གི་སྟེང་ཀུན་བཟང་འཇིགས་བྲལ་སོགས་ཀྱིས་གོང་མའི་ཡང་སྲིད་དུ་ངོས་བཟུང་། བཞི་པར་མཚུར་ཕུར་ཕེབས། རྒྱལ་བ་སྐལ་བཟང་རྒྱ་མཚོ་དང་། མི་དབང་བསོད་ནམས་སྟོབས་རྒྱས། བཀའ་བརྒྱུད་ཡབ་སྲས་རྣམས་ཀྱིས་ཁྲིར་མངའ་གསོལ། སི་ཏུ་བསྟན་པའི་ཉིན་བྱེད་ལས་རབ་བྱུང་དགེ་ཚུལ་གྱི་སྡོམ་པ་མནོས། མདོ་རྒྱུད་གསར་རྙིང་གི་དབང་ལུང་ཁྲིད་གསུམ་ཟབ་རྒྱས་གསན། གསང་མཚན་ལ་དབང་ཆེན་རྡོ་རྗེ་ཞི་བ་རྩལ་ཞེས་གསོལ། སི་ཏུ་བསྟན་པའི་ཉིན་བྱེད་མཁན་པོ་དང་། དཔའ་བོ་གཙུག་ལག་དགའ་བ་ལས་བསྙེན་པར་རྫོགས། སོ་དགུ་པར་མདོ་སྨད་སྡེ་དགེའི་ཕྱོགས་སུ་བྱོན། རྒྱལ་བའི་དབང་པོས་དབུ་མའི་ལྟ་བ་དང་ཐུགས་དམ་ཉིན་མཚན་ཁོར་ཡུག་མངའ་བའི་རྟོགས་འབུལ་མཛད། དབུས་སུ་བྱོན་པའི་ལམ་གྱི་གདུལ་བྱ་ཐམས་ཅད་བསྡུ་བའི་དངོས་པོ་བཞིས་ཚིམས་པར་མཛད། རིམ་བཞིན་མཚུར་ཕུར་ཕེབས། དབུ་མ་དང་། ཕར་ཕྱིན། འདུལ་བ། མཛོད་བཅས་ལ་གསན་རྒྱ་ཆེ། ལྷ་སའི་ཇོ་བོར་གསེར་ཞོ་ལྔ་བརྒྱ་ལས་གྲུབ་པའི་ཏིང་བདུན་དང་། ལྷ་ཆེན་ལ་དངུལ་སྲང་ཉིས་བརྒྱ་ལྔ་བཅུ་ལས་བཟོས་པའི་ཏིང་བདུན། མཎྚལ་རྡིལ་ཚད་དྲུག་ཅུ་ལས་མཆོད་རྟེན་རྣམ་བརྒྱད་དང་། གསེར་ཞོ་ལྔ་བརྒྱ་ལས་གྲུབ་པའི་སྟོན་པའི་སྐུ་བརྙན་སོགས་བཞེངས། རྒྱལ་ཚབ་ཏུ་སི་ཏུ་པདྨ་ཉིན་བྱེད་དབང་པོ་མངའ་གསོལ། མཆོག་སྤྲུལ་གང་བྱོན་གྱི་ཡུལ་དང་ཡབ་ཡུམ་སོགས་ལུང་དུ་བསྟན་པའི་ཕྱག་བྲིས་བཀའ་རྒྱས་བཏབ་པ་གནང་། རབ་བྱུང་བཅུ་གསུམ་པའི་ཆུ་རྟ་ཕྱི་ལོ་ ༡༧༩༨ ལོར་སྐུ་གཤེགས། སློབ་མ་ནི་ཀརྨ་པའི་སྐུ་ཕྲེང་བཅུ་གསུམ་པ་ཡིན། སི་ཏུ་པདྨ་ཉིན་བྱེད་དབང་པོ་དང་། འབྲུག་ཆེན་ཀུན་རིག་འཛིན་རྡོ་རྗེ་དྲག་པོ། རས་ཆུང་སྤྲུལ་སྐུ་ཤེས་རབ་རྒྱ་མཚོ། མཁས་གྲུབ་འཇིགས་མེད་སེང་གེ་སོགས་མང་། མཚན་གཞན། དབང་ཆེན་རྡོ་རྗེ་ཞི་བ་རྩལ།

{{#arraymap:ཀརྨ་པ་བདུད་འདུལ་རྡོ་རྗེ་

|; |@@@ | | }}