78203

རྗེ་བཙུན་མཐུ་སྟོབས་ཞབས་ཡོན་ཏན་ཡེ་ཤེས་ (1)

Part of speech

མིང་ཚིག

Definition

(འབྲུག་པ་རིན་པོ་ཆེ་ངག་དབང་ཆོས་རྒྱལ་གྱི་ཞལ་སློབ་ཡིན་པས། འདིའི་འཁྲུངས་ལོ་རབ་བྱུང་བརྒྱད་པའི་ཤིང་བྱ་ ༡༤༦༥ ལོར་ཡིན) སྤ་མོ་ཆོས་སྡིངས་སུ་སྨད་འབྲུག་གི་མཁན་པོ་ཡེ་ཤེས་དབང་ཕྱུག་གི་དྲུང་དུ་རབ་ཏུ་བྱུང་སྟེ། མཚན་ཡོན་ཏན་ཡེ་ཤེས་གསོལ། ཆེན་པོ་རྩེ་ཉག་པ་ལས་ཕར་ཕྱིན། རྔོག་བྱང་ཆུབ་དཔལ་གྲུབ་ལ་རྔོག་དཀྱིལ་སྐོར། དུས་ཞབས་ཤཱཀྱ་དབང་ཕྱུག་ལས་ཡོ་ག་དང་དུས་འཁོར། གསང་འདུས་སོགས་ཀྱི་དབང་བསྐྱེད་རྫོགས། རྒྱུད་ཀྱི་བཤད་པ་ཇི་སྙེད་གསན་ཅིང་སྦྱངས་པ་ཕུལ་ཕྱིན་མཛད། ཁྱད་པར་འབྲུག་ཆེན་ངག་དབང་ཆོས་རྒྱལ་དང༌། འཇམ་དབྱངས་ཆོས་གྲགས། མཐུ་ཆེན་རྒྱལ་མཚན་ལྷུན་གྲུབ་རྣམས་ཀྱི་མདུན་ནས། བདེ་མཆོག་མཻ་ཏྲི་ལུགས་ཀྱི་སྨིན་གྲོལ་གདམས་སྐོར་སོགས། མཐའ་ཡས་པ་གསན། ཆོས་འཁོར་ལྷུན་པོར། བསྙེན་པར་རྫོགས། དཔལ་ལྷ་རྩེར་འཆད་ཉན་གྱི་གདན་ས་བཟུང་ནས། ལོ་བཅུ་བདུན་ཙམ་རྒྱུད་ཀྱི་བཤད་པ་དང་ཕྱག་ལེན་ཞིབ་མོར་བསྙད་པས། གདུལ་བྱ་བགྲང་ཡས་པ་མཁས་པའི་གོ་སར་བཀྲི་བར་མཛད། དེ་ནས་འཆད་ཉན་བཞག་སྟེ། རྡོ་རྗེ་གླིང་གི་ནགས་ཁྲོད་དུ་ལོ་བཞི་བཅུ་ཞེ་གཅིག་ཙམ་སྒྲུབ་པ་མཛད་པས་རྡོ་རྗེ་གླིང་པར་གྲགས། གཞན་ཡང་མོག་པ་རི་ཁྲོད་སོགས་སུ། ཡི་དམ་དང་ཆོས་སྐྱོང་མང་པོའི་བསྙེན་སྒྲུབ་མཐར་ཕྱིན་མཛད། རྡོ་རྗེ་རྣམ་པར་འཇོམས་པས་མངོན་སུམ་དུ་རྗེས་སུ་བཟུང་སྟེ་དབང་བསྐུར། ཁྱོད་ནི་ལས་ཀྱི་རྡོ་རྗེ་གསུམ་པའོ་ཞེས་ལུང་བྱིན། མཆོག་གི་དངོས་གྲུབ་བརྙེས། པདྨ་སཾ་བྷ་ཝས་ཕྱག་ཐོད་ཀྱི་བདུད་རྩི་གནང་བ་བཞེས་པས་སྐུ་འཕར་གཡོ་དང་ཉིན་ཞག་ཕྲུགས་གཅིག་ཏུ་ཟག་པ་མེད་པའི་ཏིང་ངེ་འཛིན་ལ་འབྱམས་ཤིང་བདུད་བཞིའི་གཡུལ་ལས་རྒྱལ་བའི་མཆོག་ཐོབ། ཁྱད་པར་དཔལ་ལྡན་འདོད་དབང་མས་དངོས་སུ་རྫོགས་པའི་རིམ་པ་སོགས་མན་ངག་བསྩལ། དྲེགས་པ་ཐམས་ཅད་བྲན་དུ་བཀོལ་ཞིང་། ཞལ་གཟིགས་མངོན་ཤེས་མཐའ་ཡས། རྫོགས་རིམ་མཐར་ཕྱིན་ཏེ། དཀར་དམར་གྱི་འཕོ་བ་དག་པའི་ཡེ་ཤེས་ཀྱི་སྐུ་བརྙེས་པའི་རྟགས་སུ། སྔར་དབུ་སྐྲ་ཞལ་རྒྱན་སྤྱན་སྨིན་ཐམས་ཅད་ནག་པོར་གྱུར་པ། ཚེམས་སླར་སྐྱེས་པ། ཆབ་གུར་གུམ་གྱི་ཁུ་བ་ལྟར་འབྱུང་བས། སྦྲང་མ་སེར་པོ་ཐིབ་ཐིབ་འདུ་བ། གཤང་བ་སྟར་ཀའི་སྙིང་པོ་ཙམ་ལན་རེ་ལས་མི་འཛག་ཅིང༌། གཟིམས་ཁང་ཐམས་ཅད་དུ། མི་ཡི་སྤོས་ལས་འདས་པའི་དྲི་བཟང་པོས་ཁོར་ཡུག་ཏུ་ཁྱབ་པ་སོགས་གར་བཞུགས་ལ། ངོ་མཚར་བའི་གཏམ་ཅི་ཡང་མངའ་བས་མཚན་མཐུ་སྟོབས་ཞབས་ཞེས་བསྔགས། དགུང་ལོ་གོ་ལྔ་པ་ལ་ལྕང་ལོ་ཅན་དུ་དཔའ་བོ་དང་མཁའ་འགྲོ་ནམ་མཁའ་གང་བས་བསུས་ཏེ་གཤེགས་སོ། ཞལ་སློབ་ཀྱི་གཙོ་བོར། ཀུན་མཁྱེན་པུཎྜ་རཱི་ཀ་ལ་དུས་ཀྱི་འཁོར་ལོའི་དབང་རྒྱུད་སོགས་གསར་རྙིང་གི་དཀྱིལ་འཁོར་དུ་མས་དབང་བསྐུར་ཞིང༌། ཟབ་མོའི་གདམས་པ་དང༌། ཆོས་སྐྱོང་གི་བཀའ་བབ་གཏད་པར་མཛད། གཞན་བྱ་པཎྜི་ཏ། ཀུན་སྤངས་སྒྱུ་མའི་གར་མཁན། བྱ་ཞབས་དྲུང་སྐུ་མཆེད། མཐུ་ཆེན་དཔའ་བོ་སོགས་བསམ་ལས་འདས་པ་ཞིག་སྨིན་གྲོལ་དུ་མཛད་དོ། །

{{#arraymap:རྗེ་བཙུན་མཐུ་སྟོབས་ཞབས་ཡོན་ཏན་ཡེ་ཤེས་

|; |@@@ | | }}