81067

རྣལ་འབྱོར་པ་རྒྱལ་མཚན་དམར་པོ་ (1)

Part of speech

མིང་ཚིག

Definition

ཁོང་ནི། ལྷོ་འབྲུག་ཀུར་སྟོད་སྨིན་རྒྱས་ནང༌། ཡབ་ངག་དབང་དང༌། ཡུམ་དངོས་གྲུབ་མོ་གཉིས་ཀྱི་སྲས་སུ། རབ་བྱུང་བཅོ་ལྔ་པའི་ཤིང་ཕག་ ༡༨༧༥ ལོར་འཁྲུངས། དགུང་གྲངས་བཅོ་བརྒྱད་བར་ཁྱིམ་ན་བཞུགས། བཅུ་དགུ་པར་རྐང་པ་ལ་སྟ་གྲིས་རྨས་རྐྱེན་ལོ་གཅིག་རིང་ཞ་བར་གྱུར་པས། དེའི་རིང་ཀློག་ཡིག་རང་སྦྱོང་གིས་ཤེས་པ་བྱུང༌། ཁྱིམ་པའི་བྱ་བར་ཡིད་སྐྱོ་ནས། དགོན་པ་བཀའ་བབ་ཆོས་གླིང་དུ་བླ་མ་ཆོས་ཉིད་རང་གྲོལ་གྱི་སྤྱན་སྔར་བཅར་ནས་ཐུན་མོང་སྔོན་འགྲོ་རྣམས་གསན། བླ་མས་ཐུགས་བརྩེ་ཆེན་པོས་ཁོང་དང་ཆོས་གྲོགས་གསུམ་ཙམ་ལ་དམིགས་བསལ་དུ་ཀུན་བཟང་བླ་མའི་ཞལ་ལུང་ལྟར་སྔོན་འགྲོའི་བསགས་སྦྱང་རྣམས་རིམ་གྱིས་གཏོང་། གྲུབ་དབང་ཤཱཀྱ་ཤྲཱིའི་སྙན་པ་ཐོས་པས་དད་དེ། བོད་ཁམས་ཕྱོགས། གདན་ས་གྲུ་གུ་གསོལ་སྡེར་ཁར་འབྱོར་ཚེ་གྲུབ་དབང་རིན་པོ་ཆེ་སྐུ་མཚམས་དང་ཁེལ་བས། བཀའ་བཞིན་རྫོགས་ཆེན་ཁྲིད་གཉེར་བླ་མ་ངག་དབང་ཐུབ་བསྟན་གྱི་དྲུང་དུ་ཟླ་བ་གསུམ་བཞུགས། མཐར་གྲུབ་དབང་མཆོག་གི་ཞལ་མཇལ། རིམ་གྱིས་ཕྱག་རྫོགས་ཀྱི་གདམས་པ་སྤྱི་དང༌། ཁྱད་པར་རྫོགས་ཆེན་སྙིང་ཐིག་ཐམས་ཅད་ཀྱི་བཅུད་བསྡུས་པའི་སྙིང་ཐིག་ཡིད་བཞིན་ནོར་བུ་ཞེས་གྲུབ་དབང་མཆོག་གི་དགོངས་པའི་ཟབ་ཆོས་སྙན་བརྒྱུད་ཀྱི་ཆོས་སྐོར་རྣམས་ཁམས་པ་ཐུབ་བསྟན་དང༌། བོད་པ་རྡོ་རྗེ་རིན་ཆེན། འབྲུག་པ་རྒྱལ་མཚན་གསུམ་མ་གཏོགས་གཞན་ལ་གནང་བ་མེད་དོ་གསུངས་ནས། མན་ངག་ཁྱད་པར་ཅན་ཐམས་ཅད་བསྩལ། མཚན་ཡང་ཀུན་བཟང་པདྨ་བདེ་ཆེན་རྩལ་ཞེས་གསོལ། འབྲུག་ཏུ་རི་ཁྲོད་བཏབ་ཅིང་མཚན་ཡང་འོད་གསལ་ཆོས་གླིང་ཞེས་གསོལ། སྤྲོས་མེད་འོད་གསལ་རྫོགས་པ་ཆེན་པོའི་ཉམས་ལེན་ལ་གནས་ངེས་མེད་རྣམས་སུ་བཞུགས་ཤིང་། སྐུ་ཚེའི་སྨད་དུ་ཕྱོགས་མཐའ་ནས་འདུས་པའི་སློབ་ཚོགས་ལ་གྲུབ་དབང་ཤཱཀྱ་ཤྲཱི་ནས་བརྒྱུད་པའི་རྫོགས་པ་ཆེན་པོའི་མན་ངག་གཙོ་བོར་གྱུར་པའི་སྨིན་གྲོལ་གྱི་རིམ་པ་མང་པོའི་ཆོས་ཆར་བསྙིལ། ཞལ་སློབ་ཀྱང་བརྒྱ་དང་བརྒྱད་ལས་མི་ཉུང་བ་བྱུང༌། གཙོ་བོ་སྔགས་སྟོན་ཀ་ལོ་དང༌། ཡ་ལོ། སློབ་དཔོན་པདྨ་དབང་ཕྱུག བཙུན་མ་འོད་གསལ་ཆོས་སྒྲོན། འཇིགས་མེད་སྒྲོལ་མ། ཡེ་ཤེས་བཟང་མོ་དང༌། གསང་ཡུམ་ཇོ་མོ་བསྟན་འཛིན་དཔལ་མོ་སོགས་ཚེ་དང་སྒྲུབ་པ་མཉམ་པའི་རྟོགས་ལྡན་དང་རྣལ་འབྱོར་པ་ཕོ་མོ་དུ་མ་ཞིག་བྱུང་། ལྷག་པར་གྲུབ་དབང་བསོད་ནམས་བཟང་པོས་ཀྱང་རྗེ་འདི་ལས་རྫོགས་ཆེན་སྙན་བརྒྱུད་ཀྱི་ཆོས་སྐོར་རྣམས་གསན་བཞེས་མཛད་ནས་འཆད་སྤེལ་གནང༌། སྐུ་དུས་དེར་གདན་སར་སྨྱུག་མའི་སྤྱིལ་བུ་ཙམ་ལས་ལྷ་ཁང་སོགས་ཀྱང་མ་བཞེངས་པར་སྤྲོས་མེད་གཉུག་མའི་རང་འགྲོས་བསྐྱངས་ནས་བཞུགས་པའི་མཐར། དགུང་ལོ་དོན་དྲུག་ལྕགས་སྟག་ ༡༩༥༠ ལོའི་བོད་ཟླ་བཅུ་གཅིག་པའི་ཚེས་ཉི་ཤུ་ལ་གཟུགས་སྐུ་བསྡུས། བདུན་ཕྲག་གཅིག་རྗེས་གདུང་མཇལ་ཞུས་པས། སྔར་སྐུ་བོངས་ཤིན་ཏུ་ཆེ་ཡང་བྱིས་པ་ལོ་བརྒྱད་ཙམ་གྱི་ཚད་དུ་གྱུར་ཅིང༌། ཞུགས་འབུལ་རྗེས་སྐུ་རུས་ལ་ཨ་ཡིག་གསལ་བ་སོགས་ངོ་མཚར་བ་བྱུང་ངོ༌། །

{{#arraymap:རྣལ་འབྱོར་པ་རྒྱལ་མཚན་དམར་པོ་

|; |@@@ | | }}