8521

གཙང་སྟོན་རྡོ་རྗེ་རྒྱལ་མཚན་ (1)

Part of speech

མིང་ཚིག

Definition

ཁོང་ནི་རབ་བྱུང་གཉིས་པའི་མེ་སྦྲུལ་ཕྱི་ལོ་ ༡༡༣༧ ལོར་བུ་འབོར་སྒང་གི་ས་ཆ། འབའ་རོང་གཙང་ཆེན་ཟེར་བའི་ཁྱིམ་དུ་ངོ་མཚར་བའི་ལྟས་དང་བཅས་སྐུ་བལྟམས། ཆུང་ནས་རང་ཡུལ་དུ་འབྲི་ཀློག་སོགས་ལ་མཁས་པར་བསླབ། དགུང་ལོ་བཅུ་བདུན་ཐོག་ཚེ་རབས་ཀྱི་དམ་པ་རིན་པོ་ཆེ་མཇལ། དེ་ནས་བཟུང་བླ་མའི་ཆག་ཕྱིར་མེ་ཉག་དང༌། གླིང་སོགས་ལ་ཕེབས། སློབ་གཉེར་དང༌། ཞབས་ཏོག་ཟུང་འབྲེལ་མཛད། དགུང་ལོ་ཉེར་གཅིག་ཐོག་འབྲི་དུས་རིར་འབྲི་ཏི་ར་དགོན་དུ་བཞུགས། ལོ་ཉི་ཤུ་རྩ་གསུམ་པར་ཀུན་མཁྱེན་དམ་པ་རིན་པོ་ཆེ་དང་ལྷན་དུ་ཀཿཐོག་འཚོལ་བར་བྱོན། གཙུག་ལག་ཁང་བཞེངས་པའི་གཙོ་བའི་ཁུར་གནང༌། ཐོས་བསམ་གྱི་སྒྲོ་འདོགས་དང༌། གདམས་ངག་ཞུན་ཐར་བཅད། བསྙེན་སྒྲུབ་སྒོམ་པའི་རྟགས་ཚད་བརྙེས། ཀུན་མཁྱེན་དམ་པ་རིན་པོ་ཆེས་འདའ་ཁར་པཎ་ཞུ་དང་བེར་ཐུལ་གནང་ནས་སློབ་ཚོགས་ཡོངས་ཀྱི་ནང་ནས་ཐུགས་ཀྱི་སྲས་དམ་པར་མངའ་གསོལ་བས་གདན་ཚབ་ཏུ་བཞུགས། ཆོས་རྗེ་ཉིད་ཀྱིས་ཀྱང༌། དབུ ས་གཙང་དང༌། མདོ་ཁམས་སྟོད་སྨད་ནས་བྱུང་བའི་སྐལ་ལྡན་སློབ་མ་སྟོང་ཕྲག་མང་པོ་ལ་སྣེ་ལེན་དང༌། བརྩེ་བ་ཆེན་པོས་རྗེས་སུ་བཟུང༌། རབ་བྱུང་དང་དབྱར་གནས་ཀྱི་མཁན་པོ་མཛད། ཚོགས་སྒྲུབ་ཀྱི་སྐབས་སུ་རྡོ་རྗེ་སློབ་དཔོན་གྱི་ཁུར་གནང༌། སློབ་ཚོགས་རྒྱ་མཚོ་ལྟ་བུའི་དབུས་སུ། ཕྱི་འདུལ་བ་དང་མཐུན་པའི་ཀུན་སྤྱོད་དུལ་ཞིང་ངུར་སྨྲིག་རྒྱན་གྱིས་མཛེས། ནང་བྱང་ཆུབ་སེམས་ཀྱིས་རྒྱུད་འབྱོངས་བས་གདུལ་བྱ་རྗེས་སུ་བཟུང་བའི་སྤོབས་པ་མཐོ། གསང་བ་སྔགས་ཀྱི་ལྟ་སྒོམ་རྣམ་པར་དག་པས་ས་ལམ་གྱི་ཡོན་ཏན་ཡོངས་སུ་རྫོགས། གྲུབ་མཐའ་རིས་སུ་མ་ཆད་པ་ལ་དག་སྣང་ཡུག་གཅིག་ཏུ་བརྡལ་བས་ཀུན་གྱི་གཙུག་ན་མངོན་པར་མཐོ། ཁྱད་པར་མདོ་སྒྱུ་དང་སེམས་ཕྱོགས་ཀྱི་བཤད་ཁྲིད་གནང་སྐབས། ཁོག་བཀྲོལ་དང༌། དོགས་གཅོད་གཏིང་ཟབ་མཛད་པས་མཁས་དབང་ཀུན་གྱི་ཡིད་འཕྲོག དགུང་ལོ་ང་དྲུག་ནས་དགུ་བཅུའི་བར་གདན་ས་བསྐྱངས། ཀཿཐོག་པ་ཆོས་རྗེ་རིན་པོ་ཆེ་ཞེས་གངས་ཅན་གྱི་ལྗོངས་ཀུན་ཏུ་སྙན་པའི་གྲགས་པས་ཁྱབ། རྗེ་སྤོམ་བྲག་པས་ཀཿཐོག་པ་ཆོས་རྗེ་རིན་པོ་ཆེའི་སྙན་གྲགས་ཤིན་ཏུ་ཆེ་གྲགས་པ་མ་བཟོད་ནས་དགོངས་པ་གཏད་དེ་བརྟགས་པས་ཐུགས་རབ་ཏུ་འཚེངས་ཏེ་ཀཿཐོག་ཏུ་བྱོན། ཆོས་རྗེ་རིན་པོ་ཆེ་ལས་སྒྱུ་འཕྲུལ་གྱི་དབང་གསན། བླ་སློབ་ཐུགས་ཡིད་གཅིག་ཏུ་འདྲེས། མཁས་དང་གྲུབ་པའི་ཡོན་ཏན་ངོ་མཚར་ཆེ་བའི་ལོ་རྒྱུས་ཀརྨ་པ་དུས་གསུམ་མཁྱེན་པའི་རྣམ་ཐར་གར་གྱི་ཕྲེང་བ་ལས་གསལ་བ་ལྟར་རོ། །དེ་ནས་ཐུགས་ཀྱི་སྲས་བྱམས་པ་རིན་པོ་ཆེ་ལ་གདན་ས་གཏད་དེ། དགུང་ལོ་དགུ་བཅུ་པ་རབ་བྱུང་བཞི་པའི་མེ་ཁྱི་རྒྱལ་ཟླ་ཚེས་ཉི་ཤུ་ཕྱི་ལོ་ ༡༢༢༦ ལ་ཡ་མཚན་གྱི་ལྟས་དང་བཅས་ཞི་བར་གཤེགས་པ་ལ་སྐུ་གདུང་ཀུན་མཁྱེན་དམ་པ་རིན་པོ་ཆེའི་གདུང་འབུམ་དང་ལྷན་དུ་བཞེངས་པའོ། །

{{#arraymap:གཙང་སྟོན་རྡོ་རྗེ་རྒྱལ་མཚན་

|; |@@@ | | }}