89419

ཤིན་ཏུ་དབུགས་ཕྱིན་པར་རབ་ཏུ་རྙེད་པ་བཅུ་ (1)

Part of speech	མིང་ཚིག
Definition	ཕལ་ཆེན་ལེའུ་ཞེ་གསུམ་པ་ལས་བྱུང་བ་སྟེ། ༡ འདི་ལ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། མ་འོངས་པའི་དུས་ན་དེ་བཞིན་གཤེགས་པ་གང་ཇི་སྙེད་ཅིག་འབྱུང་བར་འགྱུར་བ་དེ་དག་ཐམས་ཅད་མཉེས་པར་བྱའོ་ཞེས་དབུགས་ཕྱིན་པ་ཆེན་པོ་རབ་ཏ་འཐོབ་བོ། །༢ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་སངས་རྒྱས་ཀྱི་ཚུལ་དང་འདྲ་བའི་རིམ་གྲོ་བླ་ན་མེད་པ་བྱའོ། །མཆོད་པ་དང་བསྙེན་བཀུར་བླ་ན་མེད་པ་བྱའོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། ། ༣ བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་མཆོད་ནས་ཀྱང་གདམས་ངག་གང་གིས་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སར་བྱུང་བར་གྱུར་པ་དང་། འབྱུང་བ་དང་། འབྱུང་བར་འགྱུར་བ་དེ་ལྟ་བུའི་གདམས་ངག་དང་། མན་ངག་བསྟན་པ་མཛད་ཀྱི། གདམས་ངག་དང་མན་ངག་དེ་ཡང་བདག་གིས་བསམ་པ་ཐག་པས་རིམ་གྲོར་བྱས་ཏེ། མཉན་པ་ཡང་དག་པར་ནན་ཏན་དུ་བྱའོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །༤ གཞན་ཡང་བྱང་ཆུབ་སེམས་དཔའ་རྣམས་དང་མི་འབྲལ་བར་འགྱུར་རོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །༥ གཞན་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། སྔོན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པའི་ཚེ། འདི་ལྟ་སྟེ། འཚོ་བ་མེད་པའི་འཇིགས་པའམ། གྲགས་པ་མེད་པའི་འཇིགས་པའམ། འཆི་བའི་འཇིགས་པའམ། ངན་སོང་གི་འཇིགས་པའམ། འཁོར་དུ་བག་ཚ་བའི་འཇིགས་པ་ཡང་རུང་སྟེ། ཇི་སྙེད་ཀྱི་འཇིགས་པར་གྱུར་པ་དེ་དག་ཐམས་ཅད་ནི་རྣམ་པར་བཟློག་པར་གྱུར། རིང་དུ་བྱས་པར་གྱུར། རྣམ་པར་བཅིལ་བར་གྱུར་ཏེ། བྱང་ཆུབ་ཀྱི་སེམས་བསྐྱེད་མ་ཐག་ཏུ་ཅིས་ཀྱང་མི་འཇིགས་པར་གྱུར་ཏོ། །མི་དངངས་པར་གྱུར་ཏོ། །སྐྱི་གཡའ་བ་མེད་པར་གྱུར་ཏོ། །ཅིས་ཀྱང་འཇིགས་པར་མི་འགྱུར་རོ། །དངངས་པར་མི་འགྱུར་རོ། །སྐྱི་གཡའ་བར་མི་འགྱུར་རོ། །དེ་བས་ན་བརྟན་ཞིང་རྣམ་པར་གནོན་ལ་ཟིལ་གྱིས་མི་ནོན་པས་བདུད་དང་། མུ་སྟེགས་ཅན་དང་། ཕས་ཀྱི་རྒོལ་བ་ཐམས་ཅད་ཀྱིས་མི་ཐུབ་པར་གྱུར་ཏོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །༦ གཞན་ཡང་བྱང་ཆུབ་སེམས་དཔའ་འདི་སྙམ་དུ་སེམས་བསྐྱེད་དེ། བདག་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་གྱི་ཁམས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱའོ། །རབ་ཏུ་དགོད་པར་བྱའོ། །དེ་དག་བྱང་ཆུབ་ཐོབ་པར་གྱུར་ནས་ཀྱང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་དད་པ་ཆེན་པོ་དང་ལྡན་པའི་སེམས་བསྐྱེད་པས། ཚེའི་ཚད་ཀྱི་མཐར་ཐུག་གི་བར་དུ་སངས་རྒྱས་ལ་འོས་པའི་རིམ་གྲོས་མཆོད་པ་དང་། བཀུར་སྟི་བྱའོ། །དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་ནས་ཀྱང་། སྐུ་གཟུགས་ལ་མཆོད་པའི་ལས་ཀྱི་ཕྱིར་མཆོད་རྟེན་ཚད་མེད་པ་མང་པོ་བྱའོ། །དེ་དག་གི་བསྟན་པ་ཡང་ཡོངས་སུ་བསྲུང་བར་བྱའོ། །དེ་དག་གི་དམ་པའི་ཆོས་ཀྱང་ཡོངས་སུ་བཟུང་བ་བླ་ན་མེད་པས་ཡོངས་སུ་གཟུང་བར་བྱའོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། ། ༧ གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། འཇིག་རྟེན་གྱི་ཁམས་ཐམས་ཅད་བླ་ན་མེད་པའི་མཛེས་པས་བརྒྱན་པར་བྱ། སྤུད་པར་བྱ། ཀླུབས་པར་བྱ། ཡོངས་སུ་སྦྱང་བར་བྱ། མཉམ་པར་བྱ། བསྒྱུར་བར་བྱ། བྱིན་གྱིས་བརླབ་པར་བྱ། བསྐྱོད་པར་བྱ། སྣང་བར་བྱ། རྫུ་འཕྲུལ་དང་། རྣམ་པར་འཕྲུལ་བས་དགང་བར་བྱའོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། ། ༨ གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། སེམས་ཅན་ཐམས་ཅད་ཀྱི་ཐེ་ཚོམ་གཅད་པར་བྱའོ། །ནེམ་ནུར་གཅད་པར་བྱའོ། །བསམ་པ་ཡོངས་སུ་སྦྱང་བར་བྱའོ། །སེམས་ཁོང་དུ་ཆུད་པར་བྱའོ། །ཉོན་མོངས་པ་རྣམ་པར་བཟློག་པར་བྱའོ། །ངན་སོང་གི་སྒོ་གཅད་པར་བྱའོ། །སེམས་ཁོང་དུ་ཆུད་པར་བྱའོ། །ཉོན་མོངས་པ་རྣམ་པར་བཟློག་པར་བྱའོ། །ངན་སོང་གི་སྒོ་གཅད་པར་བྱའོ། །བདེ་བའི་ལས་ཀྱི་སྒོ་དབྱེ་བར་བྱའོ། །མུན་པ་རྣམ་པར་བསལ་བར་བྱའོ། །འོད་ཀྱིས་སྣང་བར་བྱའོ། །བདུད་ཐམས་ཅད་དང་། བདུད་ཀྱི་ལས་རྣམས་རབ་ཏུ་གདུལ་བར་བྱའོ། །བླ་ན་མེད་པའི་བདེ་བ་ཆེན་པོ་འཐོབ་པ་འགྲོ་བ་ཐམས་ཅད་དུ་ཡང་དག་པར་བསྟན་པར་བྱའོ། །རབ་ཏུ་བསྐྱེད་པར་བྱའོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །༩ གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་གིས་སངས་རྒྱས་མཐོང་བ་ནི་དོན་ཡོད་པ་སྟེ། ཇི་ཙམ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྟ་བར་འདོད་པ་དེ་ཙམ་ན་མཐོང་བར་འགྱུར་གྱི། བདག་གིས་སངས་རྒྱས་མཐོང་བ་ནི་རྒྱུན་ཆད་པར་མི་འགྱུར་རོ། །དེ་བཞིན་གཤེགས་པ་མངོན་དུ་འགྱུར་བ་ནི་རྒྱུན་ཆད་པར་མི་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། ཨུ་དུམ་ཝ་རའི་མེ་ཏོག་ལྟ་བུར་བསྐལ་པ་ཐམས་ཅད་དུ་སྐྱེ་ཞིང་མཐོང་བར་དཀའ་བ་རྣམས་ལས་ཆོས་མཉན་པ་ཡང་རྒྱུན་མི་འཆད་པར་འགྱུར་ཏེ། དེ་ལྟར་བདག་གི་བསམ་པ་ཡོངས་སུ་དག་པས། སེམས་བསྐྱེད་པ་གཡོ་ཐམས་ཅད་ཡོངས་སུ་སྤངས་པ་དྲང་བའི་ཚུལ་དང་ལྡན་པ་སྒྱུའི་རྣམ་པ་མེད་པས། སེམས་ཀྱི་སྐད་ཅིག་རེ་རེ་ལ་སངས་རྒྱས་མཐོང་བའི་བྱིན་གྱི་རླབས་དང་ལྡན་པར་འགྱུར་རོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །༡༠ གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བ་དེའི་ཚེ། འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་ཞིང་རྣམ་པར་འཕྲུལ་པས་རྒྱས་པར་དགང་ངོ་། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་ཀྱང་། འགྲོ་བ་ཐམས་ཅད་རེ་རེར་སངས་རྒྱས་སྐྱེ་བ་ཡོངས་སུ་བསྟན་པར་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་ཆོས་ཀྱི་རྔ་ཆེན་པོ་བརྡུང་བར་བྱའོ། །ཆོས་ཀྱི་སྤྲིན་གྱི་ཆར་ཆེན་པོ་མངོན་པར་དབབ་པ་དང་། ཆོས་ཀྱི་སྦྱིན་པ་ཆེན་པོ་སྦྱིན་པ་དང་། མི་འཇིགས་པ་ཆེན་པོ་རྣམ་པར་དག་པར་བྱ་བའི་ཕྱིར་སེང་གེའི་ང་རོ་ཆེན་པོས་རྣམ་པར་སྤེལ་བའི་སྨོན་ལམ་ཆེན་པོས། ཆོས་དབྱིངས་སུ་གནས་པའི་བསྐལ་པར་ཆོས་བསྟན་པར་བྱའོ། །འོན་ཀྱང་སྙིང་རྗེ་ཆེན་པོའི་བྱིན་གྱི་རླབས་ཀྱིས་བདག་གི་ལུས་ལ་དུབ་པ་མེད་པར་འགྱུར། ངག་དང་། སེམས་ལ་དུབ་པ་མེད་པར་འགྱུར་རོ། །ཞེས་དབུགས་ཕྱིན་པ་ཆེན་པོར་རབ་ཏུ་འཐོབ་བོ། །བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་ཕྱིན་ཆེན་པོ་རབ་ཏུ་འཐོབ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ལ་མངོན་པར་འཚང་རྒྱ་བ་བླ་ན་མེད་པར་འཐོབ་པར་འགྱུར་བ་དག་གོ །
Domain	ཆོས་ལུགས།

{{#arraymap:ཤིན་ཏུ་དབུགས་ཕྱིན་པར་རབ་ཏུ་རྙེད་པ་བཅུ་

|; |@@@ | | }}