10292

Tibetan	དྲན་པ་བཅུ་གསུམ་དང་འབྲེལ་བར་ལེགས་པར་བསྒོམ་པ་བཅུ་གསུམ།
Tibetan Alternate
Tibetan Definition	དེ་ཡང་། འཕགས་པ་དམ་པའི་ཆོས་དྲན་པ་ཉེ་བར་གཞག་པ་ལས་བྱུང་བ་སྟེ། 1. འདི་ལ་བག་ཡོད་པ་དྲན་པ་དང་། ཉེ་བར་གནས་པ་དྲན་པ་དང་། བ།ཡེང་བ་མེད་པ་དྲན་པ་ཡིན་ཏེ། དྲན་པ་དེ་དག་ལ་ཉེ་བར་གནས་ནས་འདི་ལྟ་སྟེ། བུད་མེད་ཅེས་བྱ་བའི་ལུས་ཁ་དོག་བཟང་པོའམ། ཁ་དོག་ངན་པ་མཐོང་བ་དེའི་ནང་མི་གཙང་བ་མནམས་པའི་གཞི་དང་མི་བརྟན་པ་ཕྱི་སའི་ཁུང་ལྟར་དྲན་པ་ཉེ་བར་གནས་པ་དང་། དྲན་པ་མི་གཡོ་བ་ནི་གྲོང་ཁྱེར་གྱི་ཕྱོགས་སམ། གྲོང་གི་ཕྱོགས་དག་ཏུ་བསོད་སྙོམས་ཀྱི་ཕྱིར་རྒྱུ་བའམ། ཡུལ་དག་ཏུ་འགྲོ་བ་ན་བུད་མེད་ཀྱི་འདུ་ཤེས་ཀྱི་དབང་དུ་མི་འགྱུར་རོ། ། དེ་ཅིའི་ཕྱིར་ཞེ་ན། དྲན་པ་ཉེ་བར་གནས་པའི་ཕྱིར་ཏེ། འདི་ནི་དྲན་པ་དང་འབྲེལ་བ་དང་པོ་ཡིན་ནོ། ། 2. དྲན་པ་དང་འབྲེལ་བ་ནི་ཕྱི་རོལ་གྱི་ཚལ་ཉམས་དགའ་བ་དང་། ཆུ་བོ་ཉམས་དགའ་བ་དང་། ལྟེང་ཀ་ཉམས་དགའ་བ་དང་། སྐྱེད་མོས་ཚལ་ཉམས་དགའ་བ་རྣམས་མཐོང་ནས་ཀྱང་འདི་ལྟར་དྲན་པ་ཉེ་བར་འཇོག་སྟེ། ཉམས་དགའ་བའི་ངོ་བོ་གང་ཡིན་པ་དེ་དག་གིས་དུས་ནི་ཕྱིས་འབྱུང་སྟེ། བྱིས་པའི་སེམས་རབ་ཏུ་ཆགས་པར་བྱེད་པ་དེ་དག་ནི་རྙི་རྙི་པོར་འགྱུར། ལྷགས་པར་འགྱུར། མི་སྡུག་པར་འགྱུར། འདབ་མ་རྙེས་ཤིང་ལོ་མ་སིལ་སིལ་པོར་ལྷགས་པར་འགྱུར་རོ། ། དེ་དག་དེ་ལྟར་གྱུར་གྱིས་ཀྱང་ཐམས་ཅད་དུ་འབྱུང་བར་མི་འགྱུར་ལ། ཀྱེ་མ། འདི་དག་ལ་ཉམས་དགའ་བ་ཅི་ཞིག་ཡོད་སྙམ་སྟེ། དེ་ལྟར་དྲན་པ་དང་འབྲེལ་བར་བྱེད་དོ། ། དེ་ལྟར་དྲན་པ་ཉེ་བར་གནས་པ་བརྐུམ་པ་མེད་པ་དེ་ནི་ཕྱི་ནང་གི་ཡུལ་གྱི་གཟུགས་ཀྱིས་ཉམས་པ་མེད་ཅིང་བདུད་ཀྱིས་ཀྱང་གནོད་པ་མེད་དོ། ། 3. གཞན་ཡང་དེའི་དོན་དང་། ཕན་པར་བྱ་བའི་ཕྱིར་དྲན་པ་དང་འབྲེལ་པ་གསུམ་པ་དེ་དྲན་པར་བྱེད་དོ། །ཇི་་ལྟར་དྲན་པར་བྱེད། དྲན་པ་དང་འབྲེལ་པའི་དམིགས་པ་ནི་གང་ཡིན་ཞེ་ན། འདིས་སྔོན་ཟོས་པའམ། ཉལ་བའམ། དགའི་བར་བྱས་པའམ། དམིགས་པ་བསྟེན་པ་གང་ཡིན་པ་དེ་དག་དྲན་ནས་རྟོག་པར་མི་བྱེད་ཅིང་ཡིད་ལ་དམ་དུ་འཛིན་པར་མི་བྱེད་དེ། དེ་ལྟར་དེ་བྱིས་པ་སོ་སོའི་སྐྱེ་བོ་རྣམས་ཀྱི་དབང་པོ་དག་ནི་ཚིམ་པ་མེད་དོ་སྙམ་སྟེ། དེ་ལྟར་དྲན་པ་དང་འབྲེལ་པར་བྱེད་དོ། ། 4. དྲན་པོ་དང་འབྲེལ་བ་བཞི་པ་དྲན་པར་བྱེད་དེ། གང་དུ་རྙེད་པ་དང་། བཀུར་སྟི་དང་། མལ་དང་། ན་བའི་གསོས་སྨན་གྱི་རྐྱེན་གྱི་ཡོ་བྱད་རབ་ཏུ་མང་པོ་ཐོབ་པ་དེར་དགའ་བ་དང་འབྲེལ་པར་མི་བྱེད་ཅིང་ཀུན་ཏུ་ཆགས་པར་མི་བྱེད་དོ། ། འདི་ལྟར་རྙེད་པ་དང་། བཀུར་སྟི་ལྷུར་བྱེད་པོས་དགེ་སྦྱོང་ཉམས་པར་འགྱུར་ལ། གང་ཟག་དེ་འང་པགས་པོ་རལ་ནས་ཤ་རལ་བར་འགྱུར།, ཤ་རལ་ནས་ཆུ་རྒྱུས་ཆད་པར་འགྱུར། ཆུ་རྒྱུས་ཆད་ནས་རུས་པ་ཆག་པར་འགྱུར༔ རུས་པ་ཆག་ནས་རྐང་ཡང་ཟད་པར་འགྱུར་ཏེ། རྙེད་པ་དང་། བཀུར་སྟིས་ནི་དེ་ལྟར་བྱེད་པར་འགྱུར་རོ། རྙེད་པ་དང་། བཀུར་སྟེ་འདི་ནི་དགེ་བའི་ཆོས་ཐམས་ཅད་ཀྱི་བར་ཆད་བྱེད་པའི་རྒྱུ་ཡིན་ཏེ། ལེགས་པར་དྲན་པ་ཉེ་བར་གནས་པ་ནི་ཕྱོགས་གཅིག་ལ་གནས་པ་ཡིན་ནོ། ། 5. དྲན་པ་དང་འབྲེལ་བ་ལྔ་པ་དྲན་པར་བྱེད་དོ། ། གྲོང་དང་། གྲོང་ཁྱེར་དང་། ལྗོངས་སུ་རབ་ཏུ་རྒྱུ་བར་མི་བྱེད། གྲོང་ཁྱེར་དག་ལ་བསྟེན་པར་མི་བྱེད། ཡུལ་མི་དག་དང་འབྲེལ་བའི་གཏམ་སྨྲ་བའི་ངོ་བོར་མི་བྱེད། འདུ་འཛི་དང་དགའ་བར་གནས་པར་མི་བྱེད་དོ། ། འདི་ལྟར་གྲོང་དང་། གྲོང་ཁྱེར་དང་། ལྗོངས་སུ་གནས་པར་བྱེད་པ་གང་ཡིན་པ་དེ་དག་ནི་བློ་གཡེངས་པར་འགྱུར་ལ། རང་གི་དོན་ཡང་བྱེད་པར་མི་ནུས་སོ། ། དེ་ལྟར་དེ་དག་གི་དོན་ཇི་ལྟ་བ་བཞིན་མཐོང་བ་ཉིད་ཀྱིས་དྲན་པ་སྐྱེ་བར་འགྱུར་རོ། ། 6. དྲན་པ་དང་འབྲེལ་བ་དྲུག་པ་དྲན་པར་བྱེད་དེ། དེ་ལྟར་སྐྱོན་དུ་ལྟ་བ་དེ་ནི་དུར་ཁྲོད་དང་། ཤིང་དྲུང་དང་། སོག་ཁྲོད་དང་། རིའི་གསབ་གསེབ་དང་། ཁང་སྟོང་དུ་བསྟེན་པར་བྱེད་ཅིང་སུ་དང་ཡང་ལྷན་ཅིག་གནས་པར་མི་བྱེད། འདྲེ་བར་མི་བྱེད་དོ། ། འདི་ལྟར་འདྲེ་བར་མི་བྱེད་པའི་དགེ་སློང་དེ་ནི་དགེ་བའི་ཆོས་རྣམས་ཐོབ་པར་འགྱུར་ལ། སྤང་བར་བྱ་བའང་སྤོང་བར་འགྱུར་རོ། ། 7. གཞན་ཡང་དྲན་པ་དང་འབྲེལ་བ་བདུན་པ་དྲན་པར་བྱེད་དེ། ལྷའི་གཏམ་རྣམས་ལའང་ཆགས་པ་མི་སྐྱེད་ལ། སེམས་ཅན་དམྱལ་བའི་གཏམ་རྣམས་ལའང་ཡིད་འབྱུང་བར་མི་བྱེད་དོ། ། དེ་འདི་སྙམ་དུ་དྲན་པར་བྱེད་དོ། ལྷ་རྣམས་ཀྱི་མཐའ་ནི་ལྟུང་ཞིང་གནོད་པ་དང་བཅས་ལ་གཤིན་རྗེའི་མིའི་དབང་དུ་གྱུར་པ་ཡིན་ནོ། ། སེམས་ཅན་དམྱལ་བ་པའང་ལས་ཀྱིས་དྲངས་པ་ཡིན་ཏེ། རྗེས་སུ་དགའ་བར་མི་བྱ་ཞིང་གཞན་བྱེད་པའང་ཕྱིར་བཟློག་པར་བྱའོ་སྙམ་སྟེ། དེ་མཐོ་རིས་ལའང་མི་དགའ། སེམས་ཅན་དམྱལ་བ་ལའང་འཇིགས་པ་མེད་དེ། དགའ་བ་དང་། འཇིགས་པ་སྤངས་པ་དེ་ནི་དགེ་བ་དྲན་པའི་ངོ་བོར་འགྱུར་ཏེ། དྲན་པ་ཉེ་བར་གནས་པ་ཡིན་ནོ། ། 8. དྲན་པ་དང་འབྲེལ་བ་བརྒྱད་པ་དྲན་པར་བྱེད་དེ། བདག་གི་དྲན་པ་ཉེ་བར་གནས་པ་ནི་ལེགས་པ་ཡིན་ཏེ། མི་དགེ་བའི་ཆོས་སྣང་བ་རྣམས་ཉམས་ཤིང་ཟད་ལ་བཅོམ་ཞིང་སྤངས་པར་གྱུར་ཏོ། ། གཞན་ཡང་། – ཡིད་ལ་མི་དགེ་བ་སྐྱེས་པ་དེས། བདག་གི་དགེ་བ་དྲན་པ་ཉམས་ཤིང་བདག་གི་ཀུན་ནས་བར་ཆད་བྱུང་སྟེ། དེ་ལ་བདག་གིས་ཡང་དགེ་བའི་དྲན་པ་ཉིད་བསྐྱེད་པར་བྱའོ་སྙམ་ནས། དེ་ལྟར་དམིགས་པ་དང་། མཚན་ཉིད་དྲན་པ་དེ་གཅིག་ནས་གཅིག་ཏུ་འགྲང་བར་བྱེད་དོ། ། ཡིད་ལ་གཅིག་ཏུ་གྱུར་ཅིང་གཅིག་ཏུ་འདུས་པ་ནི་དྲན་པ་ལས་སུ་རུང་བར་འགྱུར་རོ། ། དེ་ནི་ཆུ་བོའི་ཤུགས་ཀྱི་རླབས་མི་བརྟན་པ། ཡུལ་ནོར་བདག་ལྟ་བུ་དག་ལས་སེམས་འཛིན་པར་ནུས་སོ། ། 9. དྲན་པ་དང་འབྲེལ་བ་དགུ་པ་དྲན་པར་བྱེད་དེ། ཉིན་གཅིག་བཞིན་སངས་རྒྱས་ཀྱི་ཡོན་ཏན་རྗེས་སུ་དྲན་པར་བྱེད། ་དམ་པའི་ཆོས་ལ་རྟག་ཏུ་གུས་པར་བྱེད། བླ་མ་རྣམས་ལ་དད་པར་བྱེད་ཅིང་དེའི་བསྒྲུབ་པ་ལའང་གནས་པར་བྱེད། བློ་ཤིན་ཏུ་མཉམ་པར་གཞོག་པར་བྱེད། གཉའ་ཤིང་གང་ཙམ་དུ་ལྟ་བར་བྱེད། སེམས་ཅན་ཐམས་ཅད་ལ་ཕན་པར་མོས་པ་དྲན་པར་བྱེད་དེ། དེའི་དྲན་པ་དང་འབྲེལ་བ་དེ་ནི་འབྲས་བུ་དང་བཅས་པ་མཐའ་མྱ་ངན་ལས་འདས་པར་འགྱུར་རོ། ། 10. དྲན་པ་དང་འབྲེལ་བ་བཅུ་པ་དྲན་པར་བྱེད་དེ། བློ་གྲོས་ཤིན་ཏུ་མཉམ་པར་གཞོག་པར་བྱེད་ལ། འདི་ལྟར་འཇིགས་པ་ཆེན་པོ་བཞི་པོ་འདི་དག་འོང་སྟེ། རྒ་བ་དང་། ན་བ་དང་། འཆི་བ་དང་། རྒྱུད་པ་དང་བཞིའོ། ། དེ་དགྲ་ཆེན་པོ་དག་གིས་རྟག་ཏུ་རྣམ་པར་འཇིགས་ཏེ། དགའ་བར་མི་སེམས་སོ། ། བཞི་ཞིག་ཀྱང་ཤིན་ཏུ་མི་བརྟན་པར་མཐོང་སྟེ། ཚེ་དང་། ནད་མེད་པ་དང་། ལང་ཚོ་དང་། ཕུན་སུམ་ཚོགས་པ་བཞིའོ། ། དེ་སྔར་བསྟན་པ་བཞི་པོ་དེ་དག་ལ་རྟག་ཏུ་འཇིགས་ཤིང་མི་བརྟན་པ་གཞན་ཡང་གོམས་པར་བྱེད་པ་ནི་ཡུལ་རྣམས་ཀྱིས་འཕྲོགས་པར་མི་འགྱུར་ཞིང་། དགའ་བའི་འདོད་ཆགས་ཀྱི་དབང་དུ་མི་འགྲོ་ལ། དྲན་པ་ཉེ་བར་གནས་པར་འགྱུར་ཏེ། ཉོན་མོངས་པའི་རི་ཟད་པར་ནུས་སོ། ། 11. དྲན་པ་དང་འབྲེལ་བ་བཅུ་གཅིག་པ་དྲན་པར་བྱེད་དེ། དགེ་འདུན་ལ་གང་ཟག་གིས་འབྱེད་པར་མི་བྱེད་པ། ལེ་ལོ་ལ་བརྩོན་ཞིང་སྤྱོད་པར་མི་བྱེད། གང་ཟག་གིས་གང་ཟག་རབ་ཏུ་འབྱེད་པར་བྱེད་པ་ནི་ཉམས་པར་འགྱུར་བས། གནོད་པར་མི་བྱེད་ལ་ཕན་པར་ཡང་མི་བྱེད་པ་དེ་ནི། དེ་ལྟར་སེམས་དང་བར་འགྱུར་ཞིང་དེའི་དྲན་པ་ཡང་ལས་སུ་རུང་བར་འགྱུར་ཏེ། གནོད་པ་མེད་པ་ལྷུར་ལེན་པར་བྱེད་དོ། ། 12. དྲན་པ་དང་འབྲེལ་བ་བཅུ་གཉིས་པ་དྲན་པར་བྱེད་དེ། རྟག་ཏུ་དམ་པའི་ཆོས་ཉན་པ་ལྷུར་ལེན་པར་བྱེད་དོ། ། དེ་ལྷུར་ལེན་པ་དང་ལྡན་པ་དེས་ཆོས་འཛིན་པར་བྱེད་པ་གང་ཡིན་པ་དེ་དག་ཕྱིར་ཞིང་དམ་དུ་འཛིན་པར་བྱེད་དོ། ། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པའི་ཆོས་རྣམས་རྣམ་པར་ཤེས་པར་བྱེད་དེ། དེ་མར་མེས་མུན་ནག་གི་གཟུགས་དག་མཐོང་བ་ལྟར་བཅོམ་ལྡན་འདས་ཀྱིས་གསུངས་པའི་ཆོས་ཀྱི་སྒྲོན་མས་ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དག་མཐོང་ངོ་། ། ། དེ་ལྟར་ཤིན་ཏུ་མཉམ་པར་བཞག་པའི་དྲན་པ་འབྱུང་བ་དེ་ནི་ཉོན་མོངས་པའི་དྲ་བའི་དབང་དུ་མི་འགྲོ་ཞིང་བདུད་ཀྱི་དབང་དུ་མི་འགྲོ་སྟེ། དེ་ལྟར་དྲན་པ་དང་འབྲེལ་བ་བཅུ་གཉིས་པའང་དྲན་པར་བྱེད་དོ། ། 13. དྲན་པ་དང་འབྲེལ་བ་བཅུ་གསུམ་པ་དྲན་པར་བྱེད་དེ། སྐད་ཅིག་སྐད་ཅིག་ལ་ལུས་དང་། སེམས་དང་། ཚོར་བའི་རང་གི་མཚན་ཉིད་སྒྲུབ་པའི་དྲན་པ་འབྱུང་སྟེ། དྲན་པ་ཉེ་བར་བཞག་པ་འདི་དག་སོ་སོར་ཤེས་པར་བྱེད་ཅིང་ཡིད་ལའང་དམ་དུ་འཛིན་པར་བྱེད་དོ། ། ཡིད་ལ་བྱས་པ་དེ་རྣམས་ཀྱང་བག་མེད་ལ་སྟེན་པར་མི་འགྱུར་ཞིང་། བག་ཡོད་པ་ལ་སྟེན་པར་བྱེད་པ་དེ་ནི་གཤིན་རྗེའི་མིའི་དབང་དུ་འགྲོ་བར་མི་འགྱུར་ལ་རང་དབང་དུ་འགྱུར། དྲན་པ་ཉམས་པར་མི་འགྱུར་བ་དང་། དུས་མ་ཡིན་པ་ལ་སྤྱོད་པར་མི་འགྱུར་བ་དང་། ཡུལ་མ་ཡིན་པར་སྤྱོད་པར་མི་འགྱུར་བ་དང་། སྤྱོད་ཡུལ་མ་ཡིན་པར་སྤྱོད་པར་མི་འགྱུར་ཏེ། འབྲེལ་བ་འདི་དག་ནི་དྲན་པ་ཐམས་ཅད་ཀྱི་ནང་དུ་འབྲེལ་པ་ཡིན་ནོ། །
Tibetan Source	《མདོ་འ་པ་》ཤ་382བ་4ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number