11124

Tibetan	དེ་བཞིན་གཤེགས་པའི་དབུ་ལ་མི་ཆེན་པོའི་མཚན་ཆོས་ཀྱི་རྒྱན་སུམ་ཅུ་སོ་གཉིས།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་སོ་དགུ་ལས་བྱུང་བ་སྟེ། ། 1.དེ་བཞིན་གཤེགས་པའི་དབུ་དེ་ནི་འཁོར་ཀུན་ནས་འོད་ཟེར་གྱི་དྲ་བ་ཤིན་ཏུ་འཕྲོ་བའི་སྤྲིན་རབ་ཏུ་འབྱུང་ཞིང་རྒྱས་པར་འབོད་པ་སྟེ། དེ་ལ་མི་ཆེན་པོའི་མཚན་རིན་པོ་ཆེ་དང་པོ་དབུའི་དབུ་མཚམས་ན་རིན་པོ་ཆེ་སྣ་ཚོགས་ཐམས་ཅད་ཀྱི་རྒྱལ་པོ་ལས་འཇིག་རྟེན་གྱི་ཁམས་ཐམས་ཅད་དུ་སྣང་བ་བཀྱེ་བས། དཔལ་གྱིས་ཡོངས་སུ་རྒྱས་ཤིང་ཡན་ལག་དང་། ཉིང་ལག་ཐམས་ཅད་ནས་དེ་བཞིན་གཤེགས་པའི་སྤྲིན་རྣམ་པར་བཀྱེ་བ་ཡོངས་སུ་འཁྱིལ་བའི་ཀློང་གི་དབྱིངས་ཀྱི་ཕྱོགས་ཐམས་ཅད་འོད་ཀྱིས་རྣམ་པར་སྣང་བ་ཞེས་བྱ་བ་མངའ་བ། 2.སངས་རྒྱས་ཀྱི་དབུ་ལ་འཕྲོ་བའི་འོད་ཀྱི་དཀྱིལ་འཁོར་གློག་གི་ཕྲེང་བ་ལྟ་བུར་འབྱུང་བས། ཕྱོགས་མཚམས་ཐམས་ཅད་དུ་དེ་བཞིན་གཤེགས་པ་སྙིང་པོ་བྱང་ཆུབ་ཏུ་བཞུགས་པ་སྟོན་ཅིང་། ཐམས་ཅད་མཁྱེན་པ་ཉིད་ཀྱི་ནམ་མཁའི་སྤྲིན་ཀུན་དུ་འདལ་བས་ཆོས་ཀྱི་དབྱིངས་ཀྱི་གཞི་དེ་བཞིན་གཤེགས་པའི་མཚན་རིན་པོ་ཆེའི་རྒྱལ་པོ་སྣ་ཚོགས་མཛོད་སྤུག་པས་ཕྱོགས་སུ་འཁྱིལ་བའི་དབྱིབས་ལས་གསེར་གྱི་ཁ་དོག་བཟང་པོར་འོད་ཟེར་འབར་བར་འཇིག་རྟེན་གྱི་ཁམས་སུ་བྱུང་བའི་འོད་ཀྱིས་ཆོས་ཀྱི་དབྱིངས་ཐམས་ཅད་དུ་དེ་བཞིན་གཤེགས་པའི་དབུ་དང་། དེ་བཞིན་གཤེགས་པའི་སྤྱན་གསལ་བའི་འོད་ཀྱི་སྤྲིན་ཅེས་བྱ་བ་མངའ་བ། ། 3.དེ་བཞིན་གཤེགས་པའི་དབུ་ལ་རིན་པོ་ཆེའི་འོད་ཀྱི་ཀློང་གཡས་ཕྱོགས་སུ་ཡོངས་སུ་འཁྱིལ་བ་ཆོས་ཀྱི་དབྱིངས་ཐམས་ཅད་དང་། འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པའི་བསོད་ནམས་དང་། ཡེ་ཤེས་ཀྱི་སྒྲོན་མ་སྣང་བས་འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་སངས་རྒྱས་ཀྱི་སྤྲིན་རྣམ་པར་འདལ་བ་བྱང་ཆུབ་སེམས་དཔའི་མཆོག་རྣམས་ལ་སྣང་བས། ཆོས་ཀྱི་དབྱིངས་རྒྱས་པར་ཁྱབ་པའི་སྤྲིན་ཅེས་བྱ་བ་མངའ་བ། 4.དེ་བཞིན་གཤེགས་པའི་མཚན་གསེར་ཡིད་དུ་འོང་བའི་སྤྲིན་སྣ་ཚོགས་ཀྱིས། དེ་བཞིན་གཤེགས་པའི་ཁྱུ་མཆོག་གི་མཐུ་ཕྱུང་རབ་ཏུ་འབར་བས་དེ་བཞིན་གཤེགས་པ་ཐམས་ཅད་ཀྱི་འོད་ཟེར་རྣམ་པར་སྣང་བར་བྱས་པས།སངས་རྒྱས་ཀྱི་ཞིང་བསམ་གྱིས་མི་ཁྱབ་པ་སྣང་བར་བསྟན་པའི་འོད་ཀྱི་སྤྲིན་ཅེས་བྱ་བ་མངའ་བ། 5.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་རིན་པོ་ཆེ་བཻཌཱུརྱའི་འོད་ཟེར་དང་། མེ་ཏོག་གི་མདོག་གིས་ཆོས་ཀྱི་དབྱིངས་ཐམས་ཅད་སྣང་བར་རྣམ་པར་འཕྲུལ་པའི་སྤྲིན་ནོར་བུ་རིན་པོ་ཆེའི་རྒྱལ་པོའི་མཚན་ཉིད་ལྟ་བུའི་དབུ་སྐྲ། རིན་པོ་ཆེས་ཚོགས་སྣང་བའི་མཚན་ཉིད་ཀྱི་འོད་ཆགས་པས། ཕྱོགས་ཐམས་ཅད་རྣམ་པར་སྣང་བར་བྱེད་པ། སངས་རྒྱས་ཀྱི་སྔོན་གྱི་དཀའ་ཐུབ་དང་། དཔལ་གྱི་ཡེ་ཤེས་ལས་རྣམ་པ་དེ་ལྟ་བུར་བྱུང་བའི་རིན་པོ་ཆེའི་འོད་ཟེར་རབ་ཏུ་བཀྱེ་བའི་སྤྲིན་ཅེས་བྱ་བ་མངའ་བ། 6.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་དང་། རིན་པོ་ཆེའི་འོད་ཟེར་གཡས་ཕྱོགས་སུ་འཁྱིལ་ཞིང་འཕྲོ་པས་བྱང་ཆུབ་སེམས་དཔའི་རྣམ་པར་འཕྲུལ་པ། རིན་པོ་ཆེའི་ཅོད་པན་གྱི་འོད་དེ་བཞིན་གཤེགས་པའི་སྟོབས་ཀྱི་རྣམ་པར་རྒྱས་པས། འཇིག་རྟེན་གྱི་ཁམས་ཐམས་ཅད་དུ་རིན་པོ་ཆེ་འོད་ཚད་མེད་པར་དེ་བཞིན་གཤེགས་པའི་ཆོས་ཀྱི་རང་བཞིན་གྱིས། རྣམ་པར་འཕྲུལ་པ་ཡང་དག་པར་སྟོན་པའི་སྤྲིན་ཅེས་བྱ་བ་མངའ་བ། 7.སངས་རྒྱས་ཀྱི་དབུ་དེ་ལ་དེ་བཞིན་གཤེགས་པའི་མཚན་རིན་པོ་ཆེ་རྣམ་པར་འཕྲུལ་པས། ནོར་བུ་རིན་པོ་ཆེ་རྒྱ་མཚོས་བཀྱེ་བའི་འོད་དང་འོད་ཟེར་དྲི་མ་མེད་པ་རབ་ཏུ་འཕྲོས་པས་བྱང་ཆུབ་སེམས་དཔའི་ཆོས་བསྟན་པ་རྒྱ་མཚོ་རྣམ་པར་སྣང་བ་འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱི་ཡེ་ཤེས་རྒྱ་མཚོ་ཤིན་ཏུ་ཡངས་པས་ཆོས་ཀྱི་དབྱིངས་ཀུན་ཏུ་དེ་བཞིན་གཤེགས་པའི་གསུང་གི་སྤྲིན་འབྱུང་བ་ཞེས་བྱ་བ་མངའ་བ། ། 8.དེ་བཞིན་གཤེགས་པའི་དབུ་ལ། རིན་པོ་ཆེའི་རྒྱལ་པོ་སེམས་ཀྱི་རྒྱལ་པོ་དང་། ཨིནྡྲ་ནི་ལ་ལས་འོད་བཀྱེ་བ་གཡས་ཕྱོགས་སུ་འཁྱིལ་བས་འཇིག་རྟེན་གྱི་ཁམས་དང་། ཆོས་ཀྱི་དབྱིངས་ཐམས་ཅད་དུ་སྣང་བའི་བྱང་ཆུབ་སེམས་དཔའི་འོད་འཕྲོ་བ་སྒྲོན་མའི་སྤྱན། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་རྒྱ་མཚོ་རབ་ཏུ་སྒྲོགས་པས་འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་ང་རོ་འབྱིན་ཅིང་། སངས་རྒྱས་ཀྱི་སྟོབས་ཡོངས་སུ་དག་པ་རྒྱ་མཚོ་དང་། སངས་རྒྱས་རྒྱ་མཚོ་འབྱིན་པའི་སྤྲིན་ཤིན་ཏུ་ཡངས་པའི་འོད་ཅེས་བྱ་བ་མངའ་བ། 9.དེ་བཞིན་གཤེགས་པའི་མཚན་རིན་པོ་ཆེའི་མེ་ཏོག་སྣ་ཚོགས་དང་། རིན་པོ་ཆེའི་རྒྱལ་པོ་བཻཌཱུརྱའི་འོད་ཟེར་རིན་པོ་ཆེ་ཐམས་ཅད་ཀྱི་འོད་ཟེར་ཀུན་ཏུ་འབྱུང་བའི་དྲ་བ་མངོན་པར་འཕགས་པ་ལས། ཆོས་ཀྱི་ལུས་དང་ལྡན་པའི་བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་དང་། ཕྱོགས་རྒྱ་མཚོར་དེ་བཞིན་གཤེགས་པའི་ས་ཡང་དག་པར་སྟོན་ཅིང་སངས་རྒྱས་ཀྱི་སྟོབས་ཆོས་ཀྱི་དབྱིངས་ལ་མངོན་དུ་གྱུར་པ་རབ་ཏུ་སྟོན་པར་བཞུགས་པ། སེམས་ཅན་ཐམས་ཅད་ལ་ཡོངས་སུ་སྟོན་པས་དེ་བཞིན་གཤེགས་པའི་ས་ཚད་མེད་མུ་མེད་པར་ཡང་དག་པར་འཕགས་ཤིང་ཡོངས་སུ་དག་ལ་དྲི་མ་མེད་པ་ཡོངས་སུ་མནན་ཏེ། རིན་པོ་ཆེ་ཐམས་ཅད་ཀྱི་འོད་ཀུན་ཏུ་སྣང་བའི་རང་བཞིན་རབ་ཏུ་བཀྱེ་བའི་འོད་ཟེར་དཀྱིལ་འཁོར་གྱི་སྤྲིན་ཅེས་བྱ་བ་མངའ་བ། 10.དེ་བཞིན་གཤེགས་པའི་མཚན་འཇིག་རྟེན་གྱི་ཁམས་ཚད་མེད་པ་ན་བཞུགས་པའི་དེ་བཞིན་གཤེགས་པ་རྣམས་ཀྱི་མཚན་རིན་པོ་ཆེ་ལས་འོད་རབ་ཏུ་བཀྱེ་བས། ཞིང་ཐམས་ཅད་ཀུན་ནས་གཡོག་ཅིང་བསྒྲིབས་པ་མེད་དེ། ཆོས་ཀྱི་དབྱིངས་ཐམས་ཅད་དུ་སངས་རྒྱས་ཀྱི་གསུང་རིན་པོ་ཆེའི་མེ་ཏོག་ཤིན་ཏུ་རྒྱས་པའི་འོད་ཟེར་འཕྲོ་བ་རབ་ཏུ་བཀྱེ་བས། ཆོས་ཀྱི་རྒྱ་མཚོ་ཆེན་པོ་རབ་ཏུ་སྦྱར་བ་ལས། བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་སྙིང་པོ་དང་། སྣང་བ་ཅན་གྱི་སྤྲིན་ལངས་པའི་འོད་ཅེས་བྱ་བ་མངའ་བ། 11.དེ་བཞིན་གཤེགས་པའི་མཚན་རིན་པོ་ཆེ་བིཌཱུརྱ་དང་། ཨིནྡྲ་ནཱི་དང་། རྡོ་རྗེ་མང་པོ་ལས་ནོར་བུ་རིན་པོ་ཆེ་རྣམ་པར་བཏོན་ཏེ། རབ་ཏུ་བཀྲམ་པའི་ཁ་དོག་མཐའ་ཡས་པའི་འོད་རྣམ་པར་དག་པ། རིན་པོ་ཆེ་བིཌཱུརྱའི་འོད་ཀུན་ཏུ་འབྱུང་བ་ལས་སྒྲ་སྐད་རྒྱ་མཚོ་ཐམས་ཅད་ཀྱིས་ཆོས་ཀྱི་དབྱིངས་སུ་སངས་རྒྱས་ཀྱི་སྣང་བ་རྣམ་པར་སྟོན་པའི་ཆོས་རྒྱ་མཚོའི་ཡེ་ཤེས་སངས་རྒྱས་སྤྲུལ་པའི་འོད་ཀུན་དུ་འགྱེད་པའི་སྤྲིན་རབ་ཏུ་སྣང་བ་ཞེས་བྱ་བ་མངའ་བ། 12.སངས་རྒྱས་ཀྱི་དབུ་ལ་དེ་བཞིན་གཤེགས་པའི་མཚན་རིན་པོ་ཆེའི་འོད་གཡས་ཕྱོགས་སུ་འཕྲོ་བའི་མེ་ཏོག་རིན་པོ་ཆེའི་ལྷབ་ལྷུབ་ཀྱིས་བརྒྱན་པས། འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པའི་སྙིང་པོ་བྱང་ཆུབ་ཀྱི་རྒྱན་གྱི་སྤྲིན་མངོན་པར་འཐོན་པ། ཆོས་ཀྱི་དབྱིངས་དང་། འཇིག་རྟེན་གྱི་ཁམས་ཐམས་ཅད་དུ་ཆོས་རྣམ་པར་དག་པ་སྟེ། བསྐལ་པ་ཐམས་ཅད་དུ་རྣམ་པར་ཐར་པས་ཆོས་ཀྱི་དབྱིངས་རྣམ་པར་སངས་རྒྱས་པའི་སྤྲིན་ཅེས་བྱ་བ་མངའ་བ། 13.སངས་རྒྱས་ཀྱི་དབུ་ལ་དེ་བཞིན་གཤེགས་པའི་མཚན་རིན་པོ་ཆེ་སེམས་ཀྱི་རྒྱལ་པོའི་འོད་ཟེར་དམ་པ་རྒྱ་མཚོས་བརྒྱན་པའི་ཆོས་ཀྱི་རྒྱུན་དུ་མཚན་རྣམ་པར་བཀོད་པ་ལས། འཇིག་རྟེན་གྱི་ཁམས་ན་འཁོད་པའི་བྱང་ཆུབ་སེམས་དཔའི་སྤྲིན་ལ་སྣང་བ་ཤིན་ཏུ་འབྱུང་ཞིང་ཡེ་ཤེས་ཀྱི་སྐུ་དང་། ཆོས་ཀྱི་སྐུས་དེ་བཞིན་གཤེགས་པ་ཐམས་ཅད་ཀྱི་མཚན་རྒྱ་མཚོ་ལ་སྤྱོད་པའི་བྱང་ཆུབ་སེམས་དཔས་ཡོངས་སུ་ཁྱབ་པའི་སྤྲིན་དང་། ཆོས་ཀྱི་དབྱིངས་ཀྱི་སྤྲིན་ཀྱི་འོད་ཅེས་བྱ་བ་མངའ་བ། 14.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་རྡོ་རྗེའི་གཞི། མེ་ཏོག་དང་ལྡན་པའི་བཻཌཱུརྱ་ཀུན་ཏུ་སྣང་བས་ཆོས་ཀྱི་དབྱིངས་ཐམས་ཅད་ཀྱི་རྒྱུན་དུ་གྱུར་ཏེ། རྣམ་པར་སྣང་བས་ཆོས་ཀྱི་དབྱིངས་རྒྱ་མཚོ་ཡོངས་སུ་རྒྱས་པར་འགེངས་ཤིང་། འཇིག་རྟེན་གྱི་ཁམས་སུ་རིན་པོ་ཆེ་ཐམས་ཅད་ཀྱི་པདྨོའི་འོད་ཀྱི་རྒྱན་ཐམས་ཅད་ཀྱིས་ཆོས་ཀྱི་དབྱིངས་ཐམས་ཅད་དུ་ཁེབས་པར་བྱང་ཆུབ་སེམས་དཔའི་སྤྱོད་པ་བཞིས་རྣམ་པར་འཕྲུལ་པ་དང་། ང་རོས་ཆོས་ཀྱི་དབྱིངས་ཐམས་ཅད་དུ་རྒྱས་པའི་མཚན་རྒྱ་མཚོས་ཐམས་ཅད་དུ་བརྒྱན་པའི་སྤྲིན་སྣང་བ་ཞེས་བྱ་བ་མངའ་བ། 15.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་ཆོས་ཀྱི་དབྱིངས་རྒྱ་མཚོའི་གཞི་གངས་ཆེན་མཚོ་ཐམས་ཅད་ཀྱི་རྒྱུན་དང་། དེ་བཞིན་གཤེགས་པའི་རྒྱན་ཚད་མེད་པ་ཐུགས་སྐད་ཅིག་གིས་ཡང་དག་པར་སྟོན་ཅིང་། ཆོས་ཀྱི་དབྱིངས་དང་། འཇིག་རྟེན་གྱི་ཁམས་ཐམས་ཅད་དུ་བསམ་གྱིས་མི་ཁྱབ་པར་འགེངས་པས། སངས་རྒྱས་ཀྱི་ཏིང་ངེ་འཛིན་རྒྱ་མཚོའི་སྤྱོད་པ་རྣམ་པར་གཟིགས་པའི་སྤྲིན་སྣང་བ་ཞེས་བྱ་བ་མངའ་བ། 16.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་པདྨོའི་གཞི་དང་། རྒྱུན་ཀྱི་མེ་ཏོག་རི་རབ་རྒྱ་མཚོའི་འོད་ཟེར་རིན་པོ་ཆེའི་གཞི་སངས་རྒྱས་ཀྱི་དགོངས་པ་ལས་བྱུང་བ་དང་། རྣམ་པར་སྣང་མཛད་ཀྱི་སྤྲུལ་པ་རྒྱ་མཚོ་མི་ཟད་པའི་འོད་ཀུན་ཏུ་སྣང་བའི་སྤྲིན་ཅེས་བྱ་བ་མངའ་བ། 17.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་དཔལ་རིན་པོ་ཆེ་དྲི་མ་མེད་པར་སངས་རྒྱས་ཀྱི་འོད་སྣ་ཚོགས་དེ་བཞིན་གཤེགས་པ་ཐམས་ཅད་ཀྱི་སེང་གེའི་ཁྲི་དང་རྒྱན་དང་། སངས་རྒྱས་ཀྱི་སྐུའི་གཟུགས་བརྙན་ཁོང་ན་སྲེལ་ཅིང་། རིན་པོ་ཆེའི་འོད་འཕྲོ་བའི་གཞི་རྒྱ་མཚོ་དང་། སངས་རྒྱས་ཀྱི་ཆོས་ཁྱུ་མཆོག་གི་མཐུ་ཕྱུང་བ་དང་། སངས་རྒྱས་ཀྱི་ཚུལ་གྱིས་ཞིང་རྒྱ་མཚོ་ཐམས་ཅད་དུ་སྣང་བའི་དེ་བཞིན་གཤེགས་པ་ཐམས་ཅད་ཀྱི་རྣམ་པར་གྲོལ་བའི་སྤྲིན་ཅེས་བྱ་བ་མངའ་བ། 18.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་བཻ་ཌཱུརྱ་རིན་པོ་ཆེའི་མེ་ཏོག་དང་། གསེར་གྱི་པདྨོ་ལས་ཆོས་ཀྱི་འོད་ཟེར་གྱི་སྤྲིན་དང་། རིན་པོ་ཆེའི་རྒྱལ་པོ་སྒྲོན་མ་ལྟར་དེ་བཞིན་གཤེགས་པ་ཐམས་ཅད་ཀྱི་འོད་རྣམ་པར་དག་པས་སྣང་བའི་རྒྱན་བསྟན་པས། ཆོས་ཀྱི་དབྱིངས་ཐམས་ཅད་དུ་དམིགས་ཤིང་རྣམ་པར་བཀྱེ་བས་ཐ་མི་དད་ཅིང་སངས་རྒྱས་ཀྱི་དབུའི་རིན་པོ་ཆེའི་སྤྲིན་དང་། རྡོ་རྗེའི་འོད་འཕྲོ་བའི་རི། འོད་ཟེར་སྟུག་པོའི་སྤྲིན་གྱིས་ཆོས་ཀྱི་དབྱིངས་ལ་འཇུག་ཅིང་། ཆོས་རྒྱ་མཚོའི་ཚུལ་གྱིས་རྣམ་པར་འཕྲུལ་པས་སྣང་བའི་སྤྲིན་ཅེས་བྱ་བ་མངའ་བ། 19.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་འཁོར་ལོ་རྩིབས་སྟོང་པ་རིན་པོ་ཆེའི་འོད་ཟེར་སྣ་ཚོགས་ཚད་མེད་པ་དང་ལྡན་ཅིང་རྣམ་པ་ཐམས་ཅད་དུ་རྣམ་པར་དག་ལ། དགེ་བའི་རྩ་བ་ཐམས་ཅད་ཀྱི་ཕྱོགས་བཅུ་ཐམས་ཅད་དུ་ཤེས་རབ་ཀྱི་ཉི་མ་ཤིན་ཏུ་གསལ་བ་དང་། ཡེ་ཤེས་ཀྱི་འོད་ཀྱི་ཆོས་རྒྱ་མཚོའི་དབྱངས་དང་ལྡན་པ་སངས་རྒྱས་ཀྱི་གདུང་རྣམ་པར་དག་པའི་སྤྲིན་ཅེས་བྱ་བ་མངའ་བ། 20.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་རིན་པོ་ཆེའི་ཕྲེང་བ་རྣམ་པར་བཀྱེ་བ་དང་། རིན་པོ་ཆེའི་མེ་ཏོག་དང་། རིན་པོ་ཆེ་བིཌཱུརྱའི་འོད་དུ་འཕྲོ་བའི་སངས་རྒྱས་ཀྱི་འོད་སེང་གེ་རྣམ་པར་སྣང་བའི་མཐུ་དང་ལྡན་པས། ཆོས་ཀྱི་དབྱིངས་ཐམས་ཅད་དུ་རྣམ་པར་གནོན་པའི་མཚན་རྒྱ་མཚོའི་སྤྲིན་གྱི་རྡུལ་གཅིག་ལས་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་སྙེད་དུ་ཡང་དག་པར་འཕྲོ་བས། སངས་རྒྱས་ཀྱི་མཚན་ཡང་དག་པར་སྟོན་ཅིང་དེའི་དཀྱིལ་འཁོར་གྱི་ཡེ་ཤེས་སྟོན་པས། དེ་བཞིན་གཤེགས་པ་ཐམས་ཅད་ཀྱི་མཚན་དང་། རྣམ་པར་འཕྲུལ་པའི་སྤྲིན་སྣང་བ་ཞེས་བྱ་བ་མངའ་བ། 21.སངས་རྒྱས་ཀྱི་དབུ་ལ་དེ་བཞིན་གཤེགས་པའི་མཚན་དེ་ཁོ་ན་ཐུགས་སུ་ཆུད་པའི་མཚན་ཉིད་རིན་པོ་ཆེའི་རྒྱན་རྣམ་པར་དག་པས་དེ་བཞིན་གཤེགས་པ་དང་། བྱང་ཆུབ་སེམས་དབའི་ཡེ་ཤེས་ཀྱི་སྙིང་པོ་ཚད་མེད་པ་དང་། ཆོས་ཀྱི་དབྱིངས་ཐམས་ཅད་དུ་སྣང་བའི་འོད་ལ་འཇུག་པ་ཞེས་བྱ་བ་མངའ་བ། 22.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་རིན་པོ་ཆེ་བཻཌཱུརྱའི་མེ་ཏོག་དང་། སེང་གེའི་ཟླ་བ་འོད་ཟེར་རྣམ་པར་སྣང་བ་དང་། རིན་པོ་ཆེའི་རྒྱལ་པོ་འོད་ཟེར་བརྒྱ་པ་ཀུན་ཏུ་སྙོམས་པར་དཔལ་གྱི་སྤྲིན་གྱིས། ཆོས་ཀྱི་དབྱིངས་དང་། ནམ་མཁའ་ཁྱབ་པའི་སངས་རྒྱས་ཀྱི་འོད་ཟེར་སྣང་བས། ཞིང་དང་འཇིག་རྟེན་མང་པོར་དེ་བཞིན་གཤེགས་པ་བཞུགས་པའི་འོད་རྣམ་པར་སྣང་བའི་སྤྲིན་ཅེས་བྱ་བ་མངའ་བ། 23.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་སངས་རྒྱས་ཀྱི་སྣང་བ་རིན་པོ་ཆེ་ཐམས་ཅད་ཀྱི་འོད་འཕྲོ་བའི་སྒྲོན་མ་ཆོས་ཀྱི་དབྱིངས་ཀྱི་འཁོར་ལོའི་རྒྱུད་ཀྱིས་ཀུན་ཏུ་རྣམ་པར་དག་པས། སངས་རྒྱས་ཀྱི་འོད་ཀྱི་སྤྲིན་ཕྱོགས་བཅུར་བཀྱེ་བ་ཀུན་ཏུ་སྣང་བའི་སྤྲིན་ཅེས་བྱ་བ་མངའ་བ། 24.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་རིན་པོ་ཆེའི་འོད་འཕྲོ་བའི་ན་བུན་གྱིས་བྱང་ཆུབ་སེམས་དཔའ་ཐམས་ཅད་དེ་བཞིན་གཤེགས་པའི་སྙིང་པོ་བྱང་ཆུབ་ཏུ་བཞུགས་ཏེ། ཆོས་ཀྱི་དབྱིངས་ཐམས་ཅད་ཐུགས་ཀྱི་སྐད་ཅིག་རེ་རེ་ལ་བྱང་ཆུབ་སེམས་དཔའི་དགེ་འདུན་ཡང་དག་པར་སྟོན་ཅིང་། རྒྱན་བརྗོད་དུ་མེད་པའི་ཡང་བརྗོད་དུ་མེད་པ་ཐམས་ཅད་ཡོངས་སུ་སྟོན་པའི་སྤྲིན་སྣང་བ་ཞེས་བྱ་བ་མངའ་བ། 25.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་རིན་པོ་ཆེ་རྒྱ་མཚོ་དང་། སྤོས་ཡིད་དུ་འོང་བ་སྣ་ཚོགས་ཀྱི་འོད་ཟེར་རིན་པོ་ཆེའི་དྲ་བ་རབ་ཏུ་འཕེལ་བས་སེམས་ཅན་གྱི་ཁམས་ཀྱི་ལས་རྒྱ་མཚོ་ཐམས་ཅད་སྒྲོག་པ་དང་། ཆོས་ཀྱི་དབྱིངས་ཐམས་ཅད་སྒྲོག་པའི་དབྱངས་ཀྱི་སྤྲིན་ཅེས་བྱ་བ་མངའ་བ། 26.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་དེ་བཞིན་གཤེགས་པའི་སྤྱན་ཡོངས་སུ་དག་པས། ཞིང་ཐམས་ཅད་ཀྱི་རྒྱན་རབ་ཏུ་སྣང་བ་རྣམ་པར་བཀོད་པའི་ཕྱིར་ཆོས་རྒྱ་མཚོའི་སྒྲ་བསམ་གྱིས་མི་ཁྱབ་པ་སངས་རྒྱས་ནས་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་ཀྱི་རང་བཞིན་གྱི་གཞི་སྣ་ཚོགས་ཀུན་ཏུ་སྣང་བས། སངས་རྒྱས་ཀྱི་སྤྲུལ་པ་མང་པོ་ཀུན་ཏུ་སྣང་བའི་སྤྲིན་ཅེས་བྱ་བ་མངའ་བ། 27.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་སངས་རྒྱས་རྒྱ་མཚོའི་སྤྲིན་ཆོས་ཀྱི་དབྱིངས་ཐམས་ཅད་དུ་བསྒྲུབས་པ་མི་མངའ་བ་ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་བཞུགས་པའི་འོད་རབ་ཏུ་སྣང་བའི་སྤྲིན་ཅེས་བྱ་བ་མངའ་བ། 28.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་བྱང་ཆུབ་སེམས་དཔའ་དང་། དེ་བཞིན་གཤེགས་པ་ཐམས་ཅད་དང་། སེམས་ཅན་རྒྱ་མཚོ་བསམ་གྱིས་མི་ཁྱབ་པའི་ཆོས་ཀྱི་དབྱིངས་ལ་འཇུག་པའི་ཚུལ་མང་པོ་ཆོས་ཀྱི་དབྱིངས་ཐམས་ཅད་དུ་སྣང་བའི་སངས་རྒྱས་ཀྱི་སྤྲིན་ཀུན་ཏུ་མཆེད་པ་དང་། རིན་པོ་ཆེའི་སྤྲིན་གྱི་སྒྲོན་མའི་སྤྲིན་ཅེས་བྱ་བ་མངའ་བ། 29.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་ཡེ་ཤེས་ཀུན་ཏུ་ཡངས་པའི་སངས་རྒྱས་ཀྱི་ས་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་། ཆོས་རྒྱ་མཚོའི་ལམ་ཚད་མེད་པ་དང་། ཞིང་གི་དཀྱིལ་འཁོར་དང་། བྱང་ཆུབ་སེམས་དཔའི་བསྔོ་བ་སེམས་ཅན་གྱི་རྒྱུད་ཐམས་ཅད་ཀྱི་བསམ་པ་ཇི་བཞིན་དུ་སངས་རྒྱས་ཀྱི་སྤྱོད་ཡུལ་གྱིས་ཞུགས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་དང་། སྤྱོད་པའི་ང་རོས་སངས་རྒྱས་གྱི་ཡེ་ཤེས་ཀྱི་གཞི་ཀུན་གྱི་མཐར་ཐུག་ཅིང་ཐམས་ཅད་མངོན་པར་མཁྱེན་པས། ཆོས་ཀྱི་དབྱིངས་ཀྱི་གཞི་ཀུན་ཏུ་ཐུག་པར་འབྱུང་བའི་སྤྲིན་ཅེས་བྱ་བ་མངའ་བ། 30.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་ཆོས་ཀྱི་དབྱིངས་དང་། ནམ་མཁའི་དབྱིངས་ཐམས་ཅད་དུ་རིན་པོ་ཆེ་སྣང་བའི་སྤྲིན་ཡིད་དུ་འོང་བ། སྙིང་པོ་བྱང་ཆུབ་ཀྱི་གཟུགས་བརྙན་ཡོངས་སུ་སྟོན་པར་མངོན་པར་འཕགས་པས། བྱང་ཆུབ་སེམས་དཔའ་དང་། དེ་བཞིན་གཤེགས་པའི་སྐུ་ཡང་དག་པར་སྟོན་པའི་སྤྲིན་ཀུན་ཏུ་བཀྱེ་བས། འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་སྤྲིན་གྱི་འོད་དུ་གནས་པ་ཞེས་བྱ་བ་མངའ་བ། 31.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་གཙུག་ཏོར་འོད་ཀུན་ཏུ་སྣང་བ་ཚད་མེད་པ་སྟོན་པས་བྱང་ཆུབ་སེམས་དཔའ་དང་། དེ་བཞིན་གཤེགས་པའི་འོད་རྣམ་པར་དག་པ་དང་། དེ་བཞིན་གཤེགས་པའི་རྣམ་པར་གནོན་པ་དང་། གཟི་ཆེན་པོས་ཆོས་ཀྱི་དབྱིངས་ཀྱི་གཞི་ཀུན་ཏུ་སྣང་བའི་རིན་པོ་ཆེའི་རྒྱལ་པོ་ལྟར་འོད་ཀུན་ནས་འབྱུང་བ་ཡོངས་སུ་གྲུབ་སྟེ། ཆོས་ཀྱི་དབྱིངས་ཐམས་ཅད་དུ་འོད་ཟེར་གྱི་སྤྲིན་དང་། འོད་ཀྱི་རྒྱུན་ཕྱོགས་ཐམས་ཅད་སྣང་བས་རྣམ་པར་སྣང་བར་བྱུང་ཞིང་། བྱང་ཆུབ་སེམས་དཔའ་རྒྱ་མཚོ་དང་། དེ་བཞིན་གཤེགས་པའི་སྟོབས་ཤིན་ཏུ་འཕེལ་བའི་མཐུ་དང་། སངས་རྒྱས་ཀྱི་རྣམ་པར་གནོན་པའི་སྤྲིན་གྱི་ཕྱོགས་བཅུའི་ཞིང་གི་དྲ་བ་དང་། ནམ་མཁའི་ཁམས་ཐམས་ཅད་རྒྱས་པར་ཁྱབ་པའི་བྱང་ཆུབ་ཀྱི་སེམས་རིན་པོ་ཆེའི་འོད་ཟེར་གྱི་སྤྲིན་ཅེས་བྱ་བ་མངའ་བ། 32.དེ་བཞིན་གཤེགས་པའི་དབུ་ལ་དེ་བཞིན་གཤེགས་པའི་མཚན་གཙུག་ཏོར་དབུའི་གཙུག་ནས་མཐོ་བ། རིམ་གྱིས་མངོན་པར་འཕགས་ཤིང་འཛམ་བུ་ཆུ་ཀླུང་གི་གསེར་དང་། རིན་པོ་ཆེའི་ཚོན་གྱིས་ཁ་དོག་བཟང་པོ་རྣམ་པ་སྣ་ཚོགས་ཀྱི་འོད་དང་ལྡན་པར་གྱུར་པ། གསེར་གྱི་ཐིག་ལེ་དྲི་མ་མེད་པའི་མིག་འཁྲུལ་གྱིས་ཀུན་ནས་ཤིན་ཏུ་བརྒྱན་པ། འཇིག་རྟེན་གྱི་ཁམས་ཐམས་ཅད་ན་བཞུགས་པའི་དེ་བཞིན་གཤེགས་པ་ཐམས་ཅད་ཐུགས་ཀྱི་སྐད་ཅིག་རེ་རེ་ལ་ཡོངས་སུ་སྟོན་པའི་སྤྲིན་གྱིས་ཀུན་ཏུ་རྒྱས་པར་ཁྱབ་ཅིང་། ཞིང་གི་དཀྱིལ་འཁོར་སྣང་བར་གྱུར་པས་ཞིང་གི་དཀྱིལ་འཁོར་བྱང་ཆུབ་སེམས་དཔའི་གནས་སུ་གྱུར་པ། རྒྱན་ཐམས་ཅད་ཀྱིས་རབ་ཏུ་བརྒྱན་པ་ཀུན་ཏུ་སྣང་བའི་དེ་བཞིན་གཤེགས་པའི་གཙུག་ཏོར་མཚན་སུམ་ཅུ་རྩ་གཉིས་ཀྱི་རྒྱན་དུ་གྱུར་ཅིང་། ཆོས་ཀྱི་དབྱིངས་ཐམས་ཅད་ཀྱི་རྒྱན་དུ་གྱུར་པའི་སྤྲིན་སྣང་བ་ཞེས་བྱ་བ་མངའ་བའོ། །
Tibetan Source	《ཕལ་ཆེན་ང་པ་》ཤ་57ན་6ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number