11132

Tibetan	བྱང་ཆུབ་སེམས་དཔའ་རྣམས་ཀྱི་ལས་མ་འདྲེས་པ་སོ་གཉིས།
Tibetan Alternate
Tibetan Definition	དེ་ཡང་། འཕགས་པ་དེ་བཞིན་གཤེགས་པའི་སྙིང་རྗེ་ཆེན་པོ་ངེས་པར་བསྟན་པའི་མདོ་ལས་བྱུང་བ་སྟེ། 1.སེམས་ཅན་དག་གཏི་མུག་གི་གཉིད་ཀྱིས་ལོག་པ་དང་། བདག་ཤེས་རབ་ཀྱིས་སད་པར་མཐོང་ནས་ཤེས་རབ་ཀྱིས་སེམས་ཅན་རྣམས་སད་པར་བྱེད་པ་འདི་ནི། བྱང་ཆུབ་སེམས་དཔའི་ལས་མ་འདྲེས་པ་དང་པོའོ། ། 2.སེམས་ཅན་དག་ཆུང་ངུ་ལ་མོས་པ་དང་། བདག་རྒྱུ་ཆེན་པོ་ལ་མོས་པར་མཐོང་ནས་ཐེག་པ་ཆེན་པོ་ལ་སེམས་ཅན་རྣམས་ཡང་དག་པར་འཛིན་དུ་འཇུག་པ། 3.སེམས་ཅན་དག་ཆོས་མ་ཡིན་པ་འདོད་པ་དང་། བདག་ཆོས་ལ་གནས་པར་མཐོང་ནས་སེམས་ཅན་རྣམས་ཆོས་འདོད་པ་ལ་རབ་ཏུ་འགོད་པ། 4.སེམས་ཅན་དག་འཚོ་བ་ཡོངས་སུ་མ་དག་པ་དང་། བདག་འཚོ་བ་ཡོངས་སུ་དག་པར་མཐོང་ནས་སེམས་ཅན་རྣམས་འཚོ་བ་ཡོངས་སུ་དག་པར་སྦྱོར་བ། 5.སེམས་ཅན་དག་ལྟ་བར་གྱུར་པར་བྱིང་བ་དང་། བདག་ཡང་དག་པའི་ལྟ་བར་ཞུགས་པར་མཐོང་ནས་སེམས་ཅན་རྣམས་འཕགས་པའི་ཡང་དག་པའི་ལྟ་བ་ལ་རབ་ཏུ་འགོད་པ། 6.སེམས་ཅན་དག་མ་རིག་པར་གྱུར་ཅིང་ཚུལ་བཞིན་མ་ཡིན་པ་ཡིད་ལ་བྱེད་པ་བསགས་པར་མཐོང་ཞིང་བདག་རིག་པའི་རྗེས་སུ་མཐུན་པའི་ཚུལ་བཞིན་ཡིད་ལ་བྱེད་པ་ལ་གནས་པར་རིག་ནས་སེམས་ཅན་རྣམས་རིག་པའི་རྗེས་སུ་མཐུན་པའི་ཚུལ་བཞིན་ཡིད་ལ་བྱེད་པ་ལ་རབ་ཏུ་འགོད་པ། 7.སེམས་ཅན་དག་ལོག་པའི་ཆོས་ལ་གནས་པ་དང་། བདག་ཡང་དག་པའི་ཆོས་ལ་ཞུགས་པར་མཐོང་ནས་ཡང་དག་པའི་ཆོས་བསྒྲུབ་པར་བྱ་བའི་ཕྱིར་སེམས་ཅན་རྣམས་ལ་ཆོས་སྟོན་པ། 8.སེམས་ཅན་དག་སེར་སྣ་ཅན་དུ་གྱུར་ཏེ་ཀུན་ཏུ་འཛིན་པའི་སེམས་དང་ལྡན་པ་དང་། བདག་བདོག་པ་ཐམས་ཅད་ཡོངས་སུ་གཏོང་བར་མཐོང་ནས་སེམས་ཅན་རྣམས་བདོག་པ་ཐམས་ཅད་ཡོངས་སུ་གཏོང་བ་ལ་སྦྱོར་བ། 9.སེམས་ཅན་དག་ངང་ཚུལ་ངན་པ་ཅན་དུ་གྱུར་ཏེ་སྡོམ་པ་ལ་མི་གནས་པ་དང་། བདག་ཚུལ་ཁྲིམས་ཡོངས་སུ་དག་པར་གནས་ནས་སེམས་ཅན་རྣམས་ཚུལ་ཁྲིམས་ཀྱི་སྡོམ་པ་ལ་རབ་ཏུ་འགོད་པ། 10.སེམས་ཅན་དག་གནོད་སེམས་མང་ཞིང་ཁྲོ་བ་ཤས་ཆེ་བ་དང་། བདག་བཟོད་པའི་སྟོབས་དང་། བྱམས་པ་ལ་གནས་པར་མཐོང་ནས་སེམས་ཅན་རྣམས་བཟོད་པའི་སྟོབས་དང་། བྱམས་པ་ལ་གནས་པ་ཡང་དག་པར་འཛིན་དུ་འཇུག་པ། 11.སེམས་ཅན་དག་ལེ་ལོ་ཅན་དུ་གྱུར་ཏེ་བརྩོན་འགྲུས་ཆུང་བ་དང་། བདག་ལེ་ལོ་མེད་ཅིང་བརྩོན་འགྲུས་བརྩམས་པར་མཐོང་ནས་སེམས་ཅན་རྣམས་བརྩོན་འགྲུས་རྩོམ་པ་ལ་སྦྱོར་བ། 12.སེམས་ཅན་དག་སེམས་གཡེངས་ཤིང་དྲན་པ་ཉམས་པ་དང་། བདག་མཉམ་པར་བཞག་སྟེ་བསམ་གཏན་ལ་བསམ་གཏན་བྱེད་པར་མཐོང་ནས་སེམས་ཅན་རྣམས་སེམས་མི་གཡེང་པ་དང་། དྲན་པ་དང་། ཤེས་བཞིན་ལ་རབ་ཏུ་འགོད་པ། 13.སེམས་ཅན་དག་ཤེས་རབ་འཆལ་པར་གྱུར་ཏེ་དམན་ཞིང་གཏི་མུག་དང་ལྡན་པ་དང་། བདག་ཤེས་རབ་དང་ལྡན་ཞིང་གཏི་མུག་དང་བྲལ་བར་མཐོང་ནས་སེམས་ཅན་རྣམས་ཤེས་རབ་ཆེན་པོ་དང་། གཏི་མུག་དང་བྲལ་བ་ཡང་དག་པར་ཤིན་ཏུ་འཇུག་པ། 14.སེམས་ཅན་དག་རིགས་པ་མ་ཡིན་པར་ལྷུང་ཞིང་ཡང་མ་དག་པའི་བྱེད་པ་བརྩམས་པ་དང་། བདག་ཐབས་མཁས་པ་དང་ལྡན་ཞིང་ཡང་དག་པའི་ལས་བརྩམས་པར་མཐོང་ནས་སེམས་ཅན་རྣམས་ཐབས་མཁས་པ་དང་། ཡང་དག་པའི་ལས་རྩོམ་པ་ཡང་དག་པར་འཛིན་དུ་འཇུག་པ། 15.སེམས་ཅན་དག་ཉོན་མོངས་པས་བཅོམ་ཞིང་ཀུན་ཏུ་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པའི་སྤྱོད་ཡུལ་པར་གྱུར་པ་དང་། བདག་ཉོན་མོངས་པ་ཐམས་ཅད་ལས་ལོག་པར་མཐོང་ནས་སེམས་ཅན་རྣམས་ཉོན་མོངས་པ་ཐམས་ཅད་སྤོང་བ་ལ་རབ་ཏུ་འགོད་པ། 16.སེམས་ཅན་དག་འཇིག་ཚོགས་ལ་ལྟ་བའི་བཅིང་པས་བཅིངས་ཤིང་དམིགས་པ་ལ་རབ་ཏུ་གནས་པ་དང་། བདག་འཇིག་ཚོགས་ལ་ལྟ་བ་ཡོངས་སུ་མོས་པ་དང་ལྡན་ཞིང་དམིགས་པས་བཅིངས་པ་ལས་ཡོངས་སུ་གྲོལ་བར་མཐོང་ནས་སེམས་ཅན་རྣམས་འཇིག་ཚོགས་ལ་ལྟ་བ་ཡོངས་སུ་ཤེས་པ་དང་། དམིགས་པ་དང་བྲལ་བ་ལ་སྦྱོར་བ། 17.སེམས་ཅན་དག་མ་དུལ་ཞིང་མ་སྦས་ཏེ་བྱང་བ་མ་ཡིན་པ་དང་། བདག་དུལ་ཞིང་སྦས་ཏེ་བྱང་བར་མཐོང་ནས་སེམས་ཅན་རྣམས་དུལ་བ་དང་། སྦས་པ་དང་། བྱང་བ་ལ་རབ་ཏུ་འགོད་པ། 18.སེམས་ཅན་དག་བྱས་པ་མི་གཟོ་ཞིང་བྱས་པ་མི་ཤེས་ཏེ་དགེ་བའི་རྩ་བ་འཇོམས་པ་དང་། བདག་བྱས་པ་གཟོ་ཞིང་བྱས་པ་ཤེས་ཏེ་དགེ་བའི་རྩ་བ་སྲུང་བར་གནས་པར་མཐོང་ནས་སེམས་ཅན་རྣམས་བྱས་པ་གཟོ་བ་དང་། བྱས་པ་ཤེས་པ་དང་། དགེ་བའི་རྩ་བ་ཆུད་མི་གཟོན་པ་ལ་རབ་ཏུ་འགོད་པ། 19.སེམས་ཅན་དག་ཆུ་བོར་ལྷུང་ཞིང་སྡིག་པ་འདོད་པའི་དབང་དུ་སོང་བ་དང་། བདག་ཆུ་བོ་ཐམས་ཅད་ལས་ཡང་དག་པར་འདས་པར་མཐོང་ནས་སེམས་ཅན་རྣམས་ཆུ་བོ་ཐམས་ཅད་ལས་ཡང་དག་པར་འདའ་བ་ལ་སྦྱོར་བ། 20.སེམས་ཅན་དག་བཀའ་བློ་མི་བདེ་ཞིང་མཐུན་པར་འཛིན་པ་མ་ཡིན་པ་དང་། བདག་བཀའ་བློ་བདེ་ཞིང་མཐུན་པར་འཛིན་པར་མཐོང་ནས་སེམས་ཅན་རྣམས་ལ་བཀའ་བློ་བདེ་ཞིང་མཐུན་པར་འཛིན་པ་ཡང་དག་པར་འཛིན་དུ་འཇུག་པ། 21.སེམས་ཅན་དག་ཕོངས་པ་མང་ཞིང་དམ་པ་མ་ཡིན་པ་ལ་ཡོངས་སུ་ཞེན་པ་དང་། བདག་མ་ཕོངས་པ་མང་ཞིང་དགེ་བ་འཛིན་པ་ཡང་དག་པར་འཛིན་དུ་འཇུག་པ། 22.སེམས་ཅན་དག་ཕོངས་པ་མང་ཞིང་དམ་པ་མ་ཡིན་པ་ལ་ཡོངས་སུ་ཞེན་པ་དང་། བདག་མ་ཕོངས་པ་མང་ཞིང་དགེ་བ་བདུད་རྩི་ལ་གནས་པར་མཐོང་ནས་སེམས་ཅན་རྣམས་ཡོངས་སུ་ཞེན་པ་དང་བྲལ་ཞིང་དགེ་བའི་རྩ་བ་ལ་གནས་པར་སྦྱོར་བ། 23.སེམས་ཅན་དག་དབུལ་ཞིང་འཕགས་པའི་ནོར་དང་བྲལ་བ་དང་། བདག་འཕགས་པའི་ནོར་དང་མ་བྲལ་ཞིང་ནོར་བདུན་དང་ལྡན་པར་མཐོང་ནས་སེམས་ཅན་རྣམས་འཕགས་པའི་ནོར་ཐོབ་པར་བྱ་བ་ལ་རབ་ཏུ་འགོད་པ། 24.སེམས་ཅན་དག་རྟག་ཏུ་ན་ཞིང་ཁམས་རྣམ་པ་བཞི་པོའི་སྦྲུལ་གདུག་པས་ཟིན་པ་དང་། བདག་ནད་མེད་ཅིང་བདེ་ལ་འགྱུར་བ་མེད་པར་མཐོང་ནས་སེམས་ཅན་རྣམས་ནད་ཐམས་ཅད་སྤོང་བ་ཡང་དག་པར་འཛིན་དུ་འཇུག་པ། 25.སེམས་ཅན་དག་མི་ཤེས་པའི་མུན་པས་ཀུན་ཏུ་གཏིབས་ཤིང་ཡེ་ཤེས་ཀྱི་སྣང་བ་དང་བྲལ་བ་དང་། བདག་ཡེ་ཤེས་ཀྱི་སྣང་བ་ཐོབ་པར་མཐོང་ནས་སེམས་ཅན་རྣམས་ཡེ་ཤེས་ཀྱི་སྣང་བ་ཆེན་པོ་ལ་རབ་ཏུ་འགོད་པ། 26.སེམས་ཅན་དག་ཁམས་གསུམ་ལ་ཆགས་པས་ཆགས་ཤིང་རྒྱུད་ལྔའི་འགྲོ་བའི་འཁོར་བའི་འཁོར་ལོའི་རྗེས་སུ་འཇུག་པ་མཐོང་ཞིང་། བདག་ཁམས་གསུམ་ཡོངས་སུ་ཤེས་པ་ལ་མཁས་པར་ཤེས་ནས་སེམས་ཅན་རྣམས་ཁམས་གསུམ་ཡོངས་སུ་ཤེས་པ་ལ་མཁས་པ་ཡང་དག་པར་འཛིན་དུ་འཛུག་པ། 27.སེམས་ཅན་དག་གཡོན་ཕྱོགས་ཀྱི་ལམ་དུ་ཞུགས་ཤིང་གཡས་ཕྱོགས་ཀྱི་ལམ་དང་བྲལ་བ་དང་། བདག་གཡས་ཕྱོགས་ཀྱི་ལམ་ལ་གནས་པར་མཐོང་ནས་སེམས་ཅན་རྣམས་གཡས་ཕྱོགས་ཀྱི་ལམ་ལ་རབ་ཏུ་འགོད་པ། 28.སེམས་ཅན་དག་ལུས་དང་སྲོག་ལ་ཆགས་ཤིང་ཉེས་པ་མ་མཐོང་བ་དང་། བདག་ལུས་དང་སྲོག་ལ་མི་ལྟ་ཞིང་ཉེས་པ་མཐོང་བ་ཡིན་པར་མཐོང་ནས་སེམས་ཅན་རྣམས་ལུས་དང་སྲོག་ལ་མི་ལྟ་བ་དང་། ཉེས་པ་མཐོང་བ་ལ་རབ་ཏུ་འགོད་པ། 29.སེམས་ཅན་དག་སངས་རྒྱས་དང་། ཆོས་དང་། དགེ་འདུན་དང་བྲལ་བ་དང་། བདག་དཀོན་མཆོག་གསུམ་གྱི་རིགས་རྒྱུན་མི་གཅོད་པར་གནས་པར་མཐོང་ནས་སེམས་ཅན་རྣམས་དཀོན་མཆོག་གསུམ་གྱི་རིགས་རྒྱུན་མི་གཅོད་པ་ལ་འཛུད་པ། 30.སེམས་ཅན་རྣམས་དམ་པའི་ཆོས་ལས་ཉམས་པ་ དང་། བདག་དམ་པའི་ཆོས་ཡོངས་སུ་འཛིན་པར་གནས་པར་མཐོང་ནས་སེམས་ཅན་རྣམས་དམ་པའི་ཆོས་ཡོངས་སུ་འཛིན་པ་ལ་རབ་ཏུ་འགོད་པ། 31.སེམས་ཅན་དག་སྟོན་པ་རིན་པོ་ཆེ་དང་རིང་དུ་གནས་ཤིང་། རྗེས་སུ་དྲན་པ་དྲུག་དང་བྲལ་བ་དང་། བདག་རྗེས་སུ་དྲན་པ་དྲུག་མ་བཏང་བར་མཐོང་ནས་སེམས་ཅན་རྣམས་རྗེས་སུ་དྲན་པ་དྲུག་སྒོམ་པ་ལ་རབ་ཏུ་འགོད་པ། 32.སེམས་ཅན་དག་ལས་དང་ཉོན་མོངས་པའི་སྒྲིབ་པས་བསྒྲིབས་པ་དང་། བདག་ལས་དང་ཉོན་མོངས་པ་དང་བྲལ་བར་མཐོང་ནས་སེམས་ཅན་རྣམས་ལས་དང་ཉོན་མོངས་པ་དང་བྲལ་བ་ལ་རབ་ཏུ་འགོད་པ། 33.སེམས་ཅན་དག་མི་དགེ་བའི་ཆོས་ཐམས་ཅད་དང་ལྡན་ཞིང་དགེ་བའི་ཆོས་ཐམས་ཅད་སྤངས་པ་དང་། བདག་མི་དགེ་བའི་ཆོས་ཐམས་ཅད་སྤངས་ཤིང་དགེ་བའི་ཆོས་ཐམས་ཅད་དང་ལྡན་པར་མཐོང་ནས་སེམས་ཅན་རྣམས་མི་དགེ་བའི་ཆོས་ཐམས་ཅད་སྤོང་བ་དང་། དགེ་བའི་ཆོས་ཐམས་ཅད་ཡོངས་སུ་རྫོགས་པར་བྱེད་པ་ལ་རབ་ཏུ་འགོད་པའོ། ། (སྐབས་འདིར་ལས་གཅིག་འཕར་བ་དཔྱད།)
Tibetan Source	《མདོ་ད་པ་》ཤ་204ན་1ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number