8193

Tibetan	ཚོགས་ཀྱི་ལམ་བཤད་པ་ལ་བརྒྱད།
Tibetan Alternate
Tibetan Definition	1.མཚན་ཉིད་གཞིག་པ་ནི། ཚོགས་ལམ་ཐར་པ་ཆ་མཐུན་དགེ་བས་བསྡུས། ། ཚོགས་ལམ་གྱི་ངོ་བོའམ་མཚན་གཞི་ནི། མྱ་ངན་ལས་འདས་པར་བགྲོད་པའི་གཞི་གང་ཞིག་ཐར་པ་ཆ་མཐུན་གྱི་དགེ་བས་བསྡུས་པའོ། ། 2. མཚན་གཞི་ངོས་བཟུང་བ་ནི། མཚན་གཞི་ཐོས་སྒོམ་སོགས་ལ་རྩོལ་བའོ། ། ལམ་དེའི་མཚན་གཞི་ནི། རྒྱུད་སྨིན་པར་བྱེད་པའི་གཉེན་པོ་སྟེ། དང་པོ་བྱང་ཆུབ་མཆོག་ཏུ་སེམས་བསྐྱེད་པ་ནས་བཟུང་དྲོད་ཀྱི་ཡེ་ཤེས་མ་སྐྱེས་བར་གྱི་ཐོས་བསམ་སྒོམ་གསུམ་ལ་རྩོལ་བ་དེའོ། ། 3. རབ་ཏུ་དབྱེ་བ་ནི། དྲན་པ་ཉེར་གཞག་ཡང་དག་སྤོང་བ་དང་། ། རྫུ་འཕྲུལ་རྐང་བཞི་སྒོམ་པ་ཆུང་འབྲིང་ཆེ། ། ཡང་ན་དང་པོའི་ས་སོགས་བཞི་རུ་དབྱེ། ། དེ་ལ་དྲན་པ་ཉེར་གཞག་བཞི་སྒོམ་པ་སྦྱོར་ལམ་ལ་འཇུག་པར་མ་ངེས་པ་ཚོགས་ལམ་ཆུང་ངུ་། ཡང་དག་པར་སྤོང་བ་བཞི་སྒོམ་པ་སྦྱོར་ལམ་ལ་འཇུག་པའི་དུས་ངེས་པ་ཚོགས་ལམ་འབྲིང་། རྫུ་འཕྲུལ་གྱི་རྐང་པ་བཞི་སྒོམ་པའི་ཚེ་སྦྱོར་ལམ་དྲོད་སྐྱེ་བར་ངེས་པ་ཚོགས་ལམ་ཆེན་པོ་སྟེ། དེ་ལྟར་ཆུང་འབྲིང་ཆེ་གསུམ་མམ། ཡང་ན་ལས་དང་པོ་བའི་ས། དད་པའི་ས། ཐར་པ་ཆ་མཐུན། གོ་ཆའི་སྒྲུབ་པ་སྟེ་བཞི་རུ་དབྱེར་ཡོད་དོ། ། 4. རང་བཞིན་གཏན་ལ་ཕབ་པ་ནི། སྐྱེ་བརྟེན་གང་ལ་དམིགས་པའི་ཁྱད་པར་གསུམ་སྟེ། (1)ལམ་དེ་རྟེན་གང་ལ་སྐྱེ་བ་ནི། གླིང་གསུམ་གྱི་སྐྱེས་པ་བུད་མེད་ཁོ་ན་ལ་ཚོགས་ལམ་སྐྱེ་ཡི། འགྲོ་བ་གཞན་དང་ཟ་མ་དང་མ་ནིང་ལ་མི་སྐྱེ་བར་བཞེད་དོ། ། (2)ས་གང་ལ་རྟེན་པ་ནི། དུས་དུས་སུ་རྣལ་འབྱོར་ལ་བརྩོན་པ་ནི་བསམ་གཏན་ས་དྲུག་གམ་འདོད་པའི་ཁམས་ཀྱི་བསམ་པ་རྩེ་གཅིག་པ་ལ་བརྟེན་ནོ། ། སོ་སོ་སྐྱེ་བོའི་ཚུལ་ཁྲིམས་རྒྱུར་གྱུར་པའི་དགེ་བ་གཞན་ནི་འདོད་པའི་ས་ལ་བརྟེན་ནོ། ། (3)ཡུལ་གང་ལ་དམིགས་པའི་ཁྱད་པར་ནི། སོ་སྐྱེའི་ཚུལ་ཁྲིམས་ལུས་དག་གི་འཇུག་ལྡོག་ལ་དམིགས། དུས་དུས་སུ་རྣལ་འབྱོར་ལ་བརྩོན་པས་ནི་མི་སྡུག་པ་ལ་སོགས་པ་སྤྱོད་པ་རྣམ་སྦྱོང་གི་དམིགས་པའམ། དྲན་པ་ཉེར་གཞག་གི་དམིགས་པ་ལུས་ལ་སོགས་པ་ལ་དམིགས། རྒྱུར་གྱུར་པའི་དགེ་བ་གཞན་ནི་གསུང་རབ་རྣམས་ཀྱི་ཚིག་དང་དོན་དུ་བཅས་པ་ལ་དམིགས་པའོ། ། 5. སྤང་རྟོགས་ཀྱི་ཁྱད་པར་ནི། རགས་པ་སྤོང་ཞིང་བདག་མེད་དོན་སྤྱིར་རྟོགས། ། སྤང་བྱ་ཤིན་ཏུ་རགས་པ་འཁོར་བར་སྡུག་བསྔལ་སྐྱེད་བྱེད་རྣམས་རྣམ་པར་སུན་འབྱིན་པའི་གཉེན་པོས་སྤངས་པ་དང་། བདག་མེད་གཉིས་ཤེས་རབ་གསུམ་གྱིས་དོན་སྤྱིའི་ཚུལ་དུ་རྟོགས་པའོ། ། 6. ཡོན་ཏན་བརྗོད་པ་ནི། རིགས་སེམས་སྤྱོད་པའི་གཞི་རུ་ཆོས་ལྔ་ལྡན། ། སྤྱན་དང་མངོན་ཤེས་ཏིང་འཛིན་ཆོས་རྒྱུན་ཐོབ། ། བྱང་ཆུབ་སེམས་དཔའ་ཚོགས་ལམ་པ་དེ་ལ་ཡོན་ཏན་གྱི་ཁྱད་པར་ཇི་ལྟ་བུ་དང་ལྡན་ན། ཐེག་ཆེན་གྱི་རིགས་སད། བྱང་ཆུབ་སེམས་རྣམ་པ་གཉིས་བསྐྱེད། སྤྱོད་པ་ཕར་ཕྱིན་དྲུག་ལ་བསླབ་པ་གཞིར་བྱས་པའི་སྟེང་དུ། སོ་སོ་སྐྱེ་བོའི་ཚུལ་ཁྲིམས་ལ་བརྟེན་པ། དབང་པོའི་སྒོ་སྡོམ་པ། ཟས་ཀྱི་ཚོད་རིག་པ། ནམ་གྱི་ཆ་སྟོད་སྨད་ལ་མི་ཉལ་བར་རྣལ་འབྱོར་ལ་བརྩོན་པ། ཤེས་བཞིན་དུ་གནས་པར་མངོན་པར་དགའ་བ་སྟེ་ཆོས་ལྔ་དང་ལྡན་པ་ཡིན་ལ། དེའི་དང་པོ་ལ་བསམ་གཏན་གྱི་ཚུལ་ཁྲིམས་སམ་སྡོམ་པ་མེད་པ་ནི་མ་ཡིན་མོད་ཀྱི་གཙོ་བོ་ཐེག་ཆེན་སོ་ཐར་རིས་བདུན་པོ་གང་ཡང་རུང་བ་ལ་བརྟེན་པའོ། ། གཉིས་པ་ལ་གུས་སྦྱོར་དང་རྟག་སྦྱོར་གྱི་དྲན་པ་སྟོབས་སུ་གྱུར་པའི་སྒོ་ནས་དབང་པོའི་སྒོ་བསྡམ་པ་སྤྱིར་བཞག་ནས། ཟབ་པ་དང་ཤེས་རབ་གཙོ་བོར་གྱུར་པ་དབང་པོ་ལྔའི་སྤྱོད་ཡུལ་དུ་གྱུར་པ་ཐམས་ཅད་ཤེར་ཕྱིན་གྱིས་ཟིན་པར་སྤྱོད་པ་དང་། རྒྱ་ཆེ་བ་ཐབས་གཙོ་བོར་གྱུར་པ་ཐམས་ཅད་གཞན་དོན་དུ་སྤྱོད་ཅིང་བྱང་ཆུབ་སེམས་དཔའི་སྤྱོད་ཡུལ་རྣམ་བྱང་གི་སྨོན་ལམ་མངོན་པར་འདུ་བྱེད་པ་དང་། གསུམ་པ་ཁ་ཟས་ལ་སོགས་པ་དད་པའི་སྒོ་ནས་ཕུལ་བ་རྣམས་གནང་བཀག་རིག་པར་བྱས་ཏེ་མང་ཉུང་ཚོད་ཤེས་པས། ། རང་ལུས་ལ་གནས་པའི་སྲིན་བུའི་རིགས་གྲོངས་མེད་གསོ་བའི་ཕྱིར་དང་། ཆོས་སྒྲུབ་པའི་རྟེན་ཡུལ་དུ་གནས་པའི་ཕྱིར་དུ་བསམ་སྟེ་བཟའ་བ་སོགས་སོ། ། བཞི་པ་ནི། ཐུན་སྟོད་སྨད་ལ་དྲན་པ་དང་ལྡན་པས་འདུ་འཛི་ལ་ཆགས་པ་སྤངས་ཏེ་མི་སྡུག་པ་དང་ཚད་མེད་པ་སྒོམ་པ་ལ་སོགས་པ་སྒྲིབ་པ་རྣམ་པར་སྦྱོང་བའི་རྣལ་འབྱོར་ལ་བརྩོན་པའོ། ། ལྔ་པ་ལ་སྒོ་གསུམ་གྱི་བླང་དོར་ལ་སོགས་པའི་འཇུག་ལྡོག་ཐམས་ཅད་དུ་ཤེས་བཞིན་གྱི་བྱ་ར་དང་མ་བྲལ་བར་བྱ་སྟེ། རུང་བ་སྤྱོད་ཅིང་མ་རུང་བ་སྤོང་བ་ཤེས་བཞིན་གནས་པ་ལ་མངོན་པར་དགའ་བའོ། ། གཞན་ཡང་ཚོགས་ལམ་པ་དེའི་གནས་སྐབས་ཀྱི་ཡོན་ཏན་སྤྱན་དང་མངོན་པར་ཤེས་པ་ལྔ་འཐོབ་ཅིང་། མཐར་ཐུག་པའི་ཁྱད་པར་གྱི་འབྲས་བུ་ཆོས་རྒྱུན་གྱི་ཏིང་ངེ་འཛིན་ཐོབ་པར་འགྱུར་ལ། དེའང་ཏིང་ངེ་འཛིན་དེ་ལས་མ་གཡོས་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་ཁམས་རྒྱ་མཚོར་འཇུག་ཅིང་། སངས་རྒྱས་རྒྱ་མཚོའི་ཞལ་ལས་དམ་པའི་ཆོས་མཉན་པ་ཐོབ་པར་འགྱུར་ཏེ། མདོ་སྡེ་རྒྱན་ལས། དེ་ཚེ་ཆོས་ཀྱི་རྒྱུན་ལས་ནི། ། སངས་རྒྱས་རྣམས་ལ་ཞི་གནས་དང་། ། ཡེ་ཤེས་ཡངས་ལ་འཐོབ་པའི་ཕྱིར། ། གདམས་ངག་རྒྱ་ཆེན་ནོད་པར་འགྱུར། ། ཞེས་གསུངས་པ་ལྟ་བུའོ། ། 7. བྱེད་ལས་གང་ཡིན་ནི། ཆུང་འབྲིང་ཆེན་པོར་བདེན་པ་བཞི་གཉིས་ལ། ། བློ་འཇུག་ཕྱིན་ལོག་བཞི་དང་དངོས་འཛིན་ལྡོག ། མི་མཐུན་ཕྱོགས་སྤང་དགེ་ཆོས་སྐྱེད་ཅིང་སྤེལ། ། རྣམ་རྟོག་བརྒྱད་སྤོང་ཏིང་འཛིན་རྩེ་གཅིག་བྱེད། ། ཆུང་འབྲིང་ཆེན་པོར་བྱེད་པའི་ལས་ཀྱང་རིམ་བཞིན་བཤད་ན། ཚོགས་ལམ་ཆུང་ངུར་དྲན་པ་ཉེར་བཞག་བཞིའི་བྱེད་ལས་ཉན་ཐོས་པ་འཕགས་པའི་བདེན་བཞི་ལ་བློ་འཇུག་ཅིང་ཕྱིན་ཅི་ལོག་བཞི་ལས་བློ་ལྡོག ཐེག་ཆེན་པ་བདེན་གཉིས་ལ་བློ་འཇུག་ཅིང་དངོས་པོར་འཛིན་པ་མཐའ་དག་ལས་བློ་ལྡོག འབྲིང་པོ་ཡང་དག་སྤོང་བ་བཞིའི་བྱེད་ལུས་ཡང་དག་པར་སྤོང་བ་སྔ་མ་གཉིས་ཀྱིས་མི་མཐུན་པའི་ཕྱོགས་རྣམས་སྤང་། ཕྱི་མ་གཉིས་ཀྱིས་དགེ་བའི་ཆོས་རྣམས་སྐྱེད་ཅིང་སྤེལ་བའོ། ། ཆེན་པོ་རྫུ་འཕྲུལ་རྐང་བཞིའི་བྱེད་ལས་འདོད་པའི་རྣམ་རྟོག་སོགས་འཇིག་རྟེན་གྱི་ཕྱིན་ཅི་ལོག་གི་རྣམ་རྟོག་བརྒྱད་སྤོང་ཞིང་སེམས་རྩེ་གཅིག་པའི་ཏིང་ངེ་འཛིན་ལ་དབང་བྱེད་པའོ། ། 8. ངེས་ཚིག་བསྟན་པ་ནི། ངེས་ཚིག་སྣོད་རུང་དགེ་ཚོགས་གསོག་པ་དང་། ། ཐར་པ་ཆ་མཐུན་དད་དང་སུན་འབྱིན་ལམ། ། ངེས་ཚིག་གམ་སྒྲ་དོན་ནི། དྲོད་ལ་སོགས་པའི་རྟོགས་པ་སྐྱེ་བའི་སྣོད་རུང་དུ་བྱ་བའི་ཕྱིར་དགེ་བའི་ཚོགས་རྒྱ་ཆེན་པོ་གསོག་པར་བྱེད་པའི་ལམ་ཡིན་པས་ཚོགས་ལམ་ཞེས་བྱ་ཞིང་ཐར་པ་མྱ་ངན་ལས་འདས་པའི་ཆ་དང་མཐུན་པར་ཡིད་ལ་བྱེད་པས་ཐར་པ་ཆ་མཐུན་གྱི་དགེ་རྩ་དང་། དཀོན་མཆོག་གསུམ་དང་སྟོང་པ་ཉིད་ལ་མོས་པ་སྟོབས་སུ་གྱུར་པས་དད་པའི་ས་དང་། ཉེར་ལེན་གྱི་ཕུང་པོ་ལ་ཉན་ཐོས་པས་ནད་དང་ཤུ་བ་སོགས་ལྟར་ཉེས་དམིགས་སུ་ལྟ་བ་དང་། ཐེག་ཆེན་པས་རང་བཞིན་མེད་པར་ལྟ་བས་སུན་འབྱིན་པའི་གཉེན་པོ་ཞེས་ཀྱང་བྱའོ། །
Tibetan Source	《ཤེས་བྱ་ཀུན་ཁྱབ་》དེབ་སྨད་ཆ་ཤ་466.22ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number