8488

Tibetan	ཐེག་པ་རིམ་པ་དགུ།
Tibetan Alternate
Tibetan Definition	འདི་ལ་ཁག་ལྔ་ཡོད་པ་སྟེ། ཁག་དང་པོ། སྡོམ་པ་གསུམ་རྣམ་པར་ངེས་པའི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ལས་བྱུང་བ་རྫོགས་པ་ཆེན་པོའི་རིང་ལུགས་ལྟར་ན། དང་པོ། མཚན་ཉིད་རྒྱུ་ཡི་ཐེག་པ་གསུམ་མམ་ཀུན་འབྱུང་འདྲེན་པའི་ཐེག་པ་གསུམ་ལས། 1. ཉན་ཐོས་ཀྱི་ཐེག་པ་ནི། ཆོས་བདག་བཟུང་འཛིན་དོན་དམ་དུ་གཏན་ལ་ཕབ་ནས། རང་ཉིད་ཞི་བདེའི་བསམ་པས། སོ་ཐར་རིགས་བརྒྱད་གང་རུང་གི་ཚུལ་ཁྲིམས་བླངས་སྟེ་ཉེས་སྤྱོད་སྤོང་ཞིང་། ཏིང་ངེ་འཛིན་གྱིས་སེམས་ལས་རུང་དུ་བསྒྲུབས་ཏེ། བདེན་བཞི་རྣམ་པ་བཅུ་དྲུག་སྒོམ་པའི་ཤེས་རབ་ཀྱིས། འབྲས་བུ་རྒྱུན་དུ་ཞུགས་པ་ནས་དགྲ་བཅོམ་པ་ཉིད་ཀྱི་བར་སྒྲུབ་པར་བྱེད་དོ། ། 2. རང་རྒྱལ་གྱི་ཐེག་པ་ནི། ཤེས་པ་སྐད་ཅིག་དོན་དམ་དུ་བལྟ་ཞིང་། བདེན་བཞི་རྣམ་པ་བཅུ་དྲུག་ཉན་ཐོས་དང་འདྲ་བའི་སྟེང་དུ་རྟེན་འབྲེལ་ཟབ་མོའི་ལམ་བསྣན་ཏེ་བསྒོམས་པས། འབྲས་བུ་རང་རྒྱལ་དགྲ་བཅོམ་ཐོབ་ནས། ལུས་ཀྱི་རྣམ་རིག་གིས་ཆོས་སྟོན་པར་མཛད་དོ། ། 3. བྱང་ཆུབ་སེམས་དཔའི་ཐེག་པ་ནི། ཆོས་ཐམས་ཅད་བདག་མེད་པར་གཏན་ལ་ཕབ་ནས། གཞན་ཕན་གྱི་བསམ་པས། ཕར་ཕྱིན་བཅུ་དང་བསྡུ་དངོས་བཞི་ལ་སྤྱོད་ཅིང་། རྣམ་པར་མི་རྟོག་པའི་ཏིང་ངེ་འཛིན་གྱིས་སློབ་ལམ་དུ་བྱུང་ཆུབ་ཀྱི་ཕྱོགས་ཆོས་སོ་བདུན་བསྒོམས་པས། འབྲས་བུ་མི་སློབ་པའི་ལམ་ཀུན་ཏུ་འོད་ཀྱིས་ས་བརྙེས་པར་འདོད་དོ། ། དེ་གསུམ་གྱིས་འབྲས་བུ་ལ་སྦྱོར་བའི་ལམ་མཚོན་པར་བྱེད་པས་མཚན་ཉིད་དང་། མཐར་ཐུག་སྔགས་ཀྱི་མྱང་འདས་ཟུང་འཇུག་གི་ཡེ་ཤེས་ལ་ལྟོས་ཏེ། དེའི་རྒྱུའི་ཆེད་ཙམ་དུ་སྦྱོར་བའི་ལམ་ཡིན་པས་རྒྱུ་དང་། ནང་གསེས་ཀྱི་དབྱེ་བས་ཐེག་པ་གསུམ་ཞེས་བྱའོ། ། གཉིས་པ། ཕྱི་རྒྱུད་ཐེག་པ་གསུམ་མམ་དཀའ་ཐུབ་རིག་བྱེད་ཀྱི་ཐེག་པ་གསུམ་ལས། 1. ཀྲི་ཡ་སྟེ་བྱ་རྒྱུད་དུ། ཆུ་དང་ཅོད་པན་གྱི་དབང་བསྐུར་བ་སྔོན་དུ་འགྲོ་བས། བདག་གི་དེ་ཁོ་ན་ཉིད་དོན་དམ་པར་མཐའ་བཞི་དང་བྲལ་བའི་དག་པར་རྟོགས་ནས། ལྷའི་དེ་ཁོ་ན་ཉིད་ལྷ་དྲུག་གི་སྒོ་ནས་བདག་དམ་ཚིག་པར་བསྐྱེད་པའི་མདུན་དུ་ཡེ་ཤེས་པ་སྤྱན་དྲངས་ཏེ་རྗེ་ཁོལ་གྱི་ཚུལ་དུ་བལྟས་ལ། སྒྲ་དང་སེམས་དང་གཞི་ལ་གཞོལ་བ་བཟླས་བརྗོད་ཀྱི་དེ་ཉིད་དང་། མེ་གནས་སྒྲ་གནས་སྒྲའི་མཐའི་དེ་ཉིད་གསུམ་གྱི་བསམ་གཏན་སྒོམ་ཞིང་། ཁུས་དང་གཙང་སྦྲ་ལ་གཙོ་བོར་སྤྱད་པས། རིགས་གསུམ་རྡོ་རྗེ་འཛིན་པའི་ས་ཐོབ་པར་འདོད་དོ། ། 2. ཨུ་པ་སྟེ་སྤྱོད་རྒྱུད་དུ། ཆུ་དང་ཅོད་པན་གྱི་སྟེང་ཕྱག་མཚན་དང་མིང་དབང་ཡང་བསྐུར་ནས། ལྟ་བ་ཡོ་ག་དང་། སྤྱོད་པ་ཀྲི་ཡ་ལྟར་སྤྱོད་ཅིང་། སྒོམ་པ་རང་ཉིད་དམ་ཚིག་ པར་བསྐྱེད་པའི་མདུན་དུ་ལྷ་ཡེ་ཤེས་པ་སྤུན་ནམ་གྲོགས་པོའི་ཚུལ་དུ་བལྟས་ནས། བཟླས་པ་དང་ཏིང་ངེ་འཛིན་བརྟན་པར་བྱས་པས། རིགས་བཞི་རྡོ་རྗེ་འཛིན་པའི་ས་ཐོབ་པར་འདོད་དོ། ། 3. ཡོ་ག་སྟེ་རྣལ་འབྱོར་གྱི་རྒྱུད་དུ། རྡོ་རྗེ་སློབ་མའི་དབང་གི་སྟེང་སློབ་དཔོན་གྱི་དབང་མཐའ་བརྟེན་དང་བཅས་པའང་བསྐུར་ནས། དོན་དམ་པར་མཚན་མ་མེད་པའི་ཆོས་ཉིད་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བལྟ་ཞིང་། མངོན་བྱང་ལྔ་དང་ཆོ་འཕྲུལ་བཞིའི་སྒོ་ནས་བདག་ལྷར་བསྒོམས་པ་ལ་ཡེ་ཤེས་པ་དགུག་ཅིང་བསྟིམ་ཏེ་ཕྱག་རྒྱ་བཞིས་རྒྱས་བཏབ་ནས་མཆོད་བསྟོད་བཟླས་པ་སོགས་བྱས་མཐར། ཕྱག་རྒྱ་བཀྲོལ་ནས་གཤེགས་སུ་གསོལ་བ་ཐབས་ཀྱི་རྣལ་འབྱོར་དང་། སེམས་ཀྱི་དེ་ཁོ་ན་ཉིད་སྒོམ་པ་ཤེས་རབ་ཀྱི་རྣལ་འབྱོར་ཏེ། ནང་གི་ཏིང་ངེ་འཛིན་ལ་གཙོ་བོར་འདོན་ཞིང་། གཙང་སྦྲ་སོགས་ཕྱིའི་སྤྱོད་པའང་གྲོགས་སུ་བསྟེན་པས། འབྲས་བུ་སྟུག་པོ་བཀོད་པའི་སར་གྲོལ་བར་འདོད་དོ། ། དེ་གསུམ་གྱིས་གང་དང་གང་ལ་བླང་དོར་དང་སྤང་གཉེན་གྱི་ཕྱི་མཚན་ཉིད་ཀྱི་ཐེག་པ་དང་ཚུལ་འདྲ་བས་ཕྱི་ཐུབ་པ་རྒྱུད་ཀྱི་ཐེག་པ་གསུམ་ཞེས་བྱའོ། ། གསུམ་པ། ནང་རྒྱུད་ཐེག་པ་གསུམ་མམ་དབང་སྒྱུར་ཐབས་ཀྱི་ཐེག་པ་གསུམ་ལས། 1. རྣལ་འབྱོར་བླ་མེད་ཕའི་རྒྱུད་ཅེས་བཏགས་པ་མཧཱ་ཡོ་ག་ནི། དབང་བཞིས་བསྡུས་པ་ཕན་ནུས་ཟབ་མོའི་དབང་གིས་སྨིན་པར་བྱས་ནས། གཞི་ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་ལྷག་པའི་ཆོས་སྐུ་ཆེན་པོར་རྟོགས་པས། ལམ་བསྒོམ་ཚུལ་མཧཱ་ལ་ནང་གསེས་ཀྱིས་ཕ་མ་གཉིས་མེད་ཀྱི་རྒྱུད་གསུམ་དུ་ཕྱེ་བ་ལས། གསང་འདུས་དང་གཤིན་རྗེ་གཤེད་སོགས་ཕ་རྒྱུད་རྣམས་སུ་ཐབས་བསྐྱེད་རིམ་གྱི་སྤྲོས་པ་དང་། རྫོགས་རིམ་གསང་དབང་གི་ཉམས་ལེན་རླུང་གཙོ་བོར་བྱེད་པས་གསལ་སྟོང་རྣམ་པར་མི་རྟོག་པའི་ཡེ་ཤེས། ཡང་དག་དང་འཁོར་ལོ་སྡོམ་པ་སོགས་མ་རྒྱུད་རྣམས་སུ་བསྐྱེད་རིམ་ཆ་ཙམ་ལས། རྫོགས་རིམ་ཤེར་དབང་གི་ཉམས་ལེན་ཁམས་བྱང་ཆུབ་ཀྱི་སེམས་ཐིག་ལེ་གཙོ་བོར་བྱེད་པས་བདེ་སྟོང་རྣམ་པར་མི་རྟོག་པའི་ཡེ་ཤེས། སྒྱུ་འཕྲུལ་དྲ་བ་སོགས་གཉིས་མེད་ཀྱི་རྒྱུད་རྣམས་སུ་བསྐྱེད་རྫོགས་ཟུང་འཇུག་དང་། ཁྱད་པར་རྫོགས་རིམ་དབང་བཞི་པའི་ཉམས་ལེན་བདེ་གསལ་རྣམ་པར་མི་རྟོག་པའི་ཡེ་ཤེས་ཆེན་པོ། བསམ་གྱིས་མི་ཁྱབ་པའི་ཆོས་ཉིད། མཆོག་ཏུ་མི་འགྱུར་བའི་འོད་གསལ་རང་བྱུང་གི་ཡེ་ཤེས་གཙོ་བོར་ཉམས་སུ་ལེན་ཅིང་། སྤྱོད་པ་གསུམ་གྱི་ཉེ་རྒྱུས་འབྲས་བུ་ཚེ་འདི་ཉིད་ལ་བླ་ ན་མེད་པའི་བྱང་ཆུབ་ཐོབ་པར་འདོད་དོ། ། 2. མ་རྒྱུད་ལུང་ཨ་ནུ་ཡོ་ག་ནི། ཕྱི་ནང་སྒྲུབ་གསང་བཞིས་བསྡུས་པའི་དབང་མཆོག་སུམ་ཅུ་རྩ་དྲུག་བསྐུར་ནས། གཞི་ཆོས་ཐམས་ཅད་ཀྱི་གཤིས་ལུགས་དཀྱིལ་འཁོར་རྣམ་གསུམ་མ་འདྲེས་ཡོངས་རྫོགས་སུ་གནས་པ་ཉིད་རྟོག་དཔྱོད་ཀྱི་རྗེས་སུ་འཇུག་པ་ལྟ་བས་གཏན་ལ་ཕབ་སྟེ། དོན་གྱི་རྗེས་སུ་འཇུག་པ་རྣམ་པར་མི་རྟོག་པའི་ཡེ་ཤེས་དང་། ཡི་གེའི་རྗེས་སུ་འཇུག་པ་ལྷའི་ཏིང་ངེ་འཛིན་སྒོམ་པ་གྲོལ་ལམ་དང་། སྟེང་འོག་གི་སྒོ་ལ་བརྟེན་ནས་བདེ་སྟོང་གི་ཡེ་ཤེས་བསྐྱེད་པ་ཐབས་ཀྱི་ལམ་རྣམས་བསྒོམས་པས། འགྱུར་བ་མ་ངེས་པ་ལ་སོགས་ཏེ་ས་བཅུས་བསྡུས་པའི་གྲོལ་ལམ་བཞི་མཐར་ཕྱིན་ནས། འབྲས་བུ་མི་སློབ་པའི་ལམ་ཚེ་འདིར་བདེ་བ་ཆེན་པོའི་སྐུ་མངོན་སུམ་དུ་བྱེད་པར་འདོད་དོ། ། 3. གཉིས་སུ་མེད་པའི་རྒྱུད་མན་ངག་ཨ་ཏི་ཡོ་ག་ནི། དབང་བཞི་པ་རྩལ་དུ་བཏོན་པ་རིག་པའི་རྩལ་དབང་སོགས་ཁྱད་པར་གྱི་དབང་བསྐུར་ནས། གཞི་སྣང་སྲིད་འཁོར་འདས་ཀྱིས་བསྡུས་པའི་ཆོས་སོ་ཅོག་ཡེ་ནས་སངས་རྒྱས་པའི་རང་བཞིན་དུ་གཏན་ལ་ཕབ་སྟེ། སེམས་ཀློང་མན་ངག་གི་སྡེ་གསུམ་སོ་སོའི་དགོངས་པ་ལྟར་ཀ་དག་གི་དོན་སོར་བཞག་གིས་ཉམས་སུ་ལེན་པ་དང་། ཁྱད་པར་ལྷུན་གྲུབ་ལུས་ཀྱི་དཀྱིལ་འཁོར་དེ་བཞིན་གཤེགས་པའི་གསང་མཛོད་སྒོ་ཕྱེ་ནས། རིག་པ་མངོན་སུམ་གྱི་དོན་དང་པོར་མཐོང་བ། བར་དུ་འཕེལ་ཞིང་ཚད་ལ་ཕེབས་པ། ཐ་མར་ཟད་པས་གདེངས་བཞིའི་ཚད་དུ་སྐྱེལ་བ་ཐོད་རྒལ་གྱི་ལམ་བསྒོམ་ཞིང་། གནས་སྐབས་ཐམས་ཅད་དུ་ཅིར་སྣང་ཆོས་ཉིད་རོལ་པར་བལྟས་ཏེ་དགག་སྒྲུབ་བླང་དོར་མེད་པར་སྤྱད་པས། འབྲས་བུ་ལྷུན་རྫོགས་ཀུན་ཏུ་བཟང་པོའི་ས་ལ་ད་ལྟ་ཉིད་ནས་གནས་པ་མཐར་ཕྱིན་ཏེ། གདོད་མའི་སར་གྲོལ་བར་བྱེད་པ་ཡིན་ནོ། ། དེ་གསུམ་གྱིས་སེམས་ཉིད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བས་དངོས་གྲུབ་གཞན་ནས་མི་འཚོལ་བར་རང་བྱུང་ཡེ་ཤེས་སུ་མཐོང་བས་ནང་རྒྱུད་གསུམ་ཞེས་བྱ་སྟེ། དེས་ན་རྫོགས་པ་ཆེན་པོའི་ལུགས་ལ་རྣམ་གྲོལ་གྱི་ལམ་ཐམས་ཅད་ཐེག་པ་དགུ་པོ་དེར་འདུ་ལ། དེ་ཐམས་ཅད་རང་བཞིན་རྫོགས་པ་ཆེན་པོའི་ཐེག་པ་འདིར་འདུས་ཤིང་རྫོགས་པ་ཡིན་ནོ། །
Tibetan Source	《སྔ་འགྱུར་བཀའ་མའི་》གླེགས་བམ་ཇི་པ་ཤ་12ན་1ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number