8723

Tibetan	དགའ་ལྡན་གྱི་གནས་ནས་འཆི་འཕོ་བ་སྟོན་པ་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དགའ་ལྡན་གྱི་གནས་ནས་འཆི་འཕོ་བ་སྟོན་པ་བཅུ་སྟེ། 1. འདི་ལ་བྱང་ཆུབ་སེམས་དཔའ་རྣམས་ལྷའི་རིས་དགའ་ལྡན་ནས་ཤི་འཕོ་བའི་ཚེ། རྐང་པའི་མཐིལ་གྱི་འོག་ནས་བདེ་བའི་རྒྱན་ཅེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བ་ཆེན་པོས་རྒྱས་པར་བཀང་ཞིང་། ངན་སོང་དང་མི་ཁོམ་པའི་རྒྱུད་དུ་སྐྱེས་པའི་སེམས་ཅན་རྣམས་ཀྱི་ལུས་ལ་འབབ་བོ། ། དེ་ལྟར་འོད་དེ་ལུས་ལ་བབ་མ་ཐག་ཏུ། དེ་ཉིད་ཀྱི་ཚེ། སེམས་ཅན་དེ་དག་བདེ་བ་ཐམས་ཅད་ཀྱིས་ཚིམ་ཞིང་སྡུག་བསྔལ་གྱི་ཚོར་བ་རྩེ་ཞིལ་བར་འགྱུར་རོ། ། བདེ་བའི་ཉམས་དེ་ཉམས་སུ་ཚོར་མ་ཐག་ཏུ་དེ་དག་གིས་འདི་ལྟར། གྲོགས་པོ་དག། སེམས་ཅན་གཞན་ཞིག་འཇིག་རྟེན་གྱི་ཁམས་འདིར་སྐྱེས་སོ་ཞེས་བྱ་བར་ཤེས་ཏེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་དང་པོའོ། ། 2. གཞན་ཡང་བྱང་ཆུབ་སེམས་དཔའ་དེའི་སྨིན་མཚམས་ཀྱི་མཛོད་སྤུ་ནས། ཡང་དག་པར་བསྐུལ་བ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་བཀང་ཞིང་། སྔོན་ལྷན་ཅིག་ཏུ་སྤྱོད་སྤྱོད་པའི་བྱང་ཆུབ་སེམས་དཔའ་རྣམས་ཀྱི་ལུས་ལ་བབ་བོ། ། འོད་ཟེར་དེས་དེ་ལྟར་ལུས་ལ་བབ་མ་ཐག་ཏུ་དེ་ཉིད་ཀྱི་ཚེ། བྱང་ཆུབ་སེམས་དཔའ་དེ་དག་གིས་བྱང་ཆུབ་སེམས་དཔའ་དགའ་ལྡན་གྱི་གནས་ནས་ཤི་འཕོ་བར་ཁོང་དུ་ཆུད་དེ། དེ་དག་ཐམས་ཅད་འདུས་ནས་བྱང་ཆུབ་སེམས་དཔའ་ལ་མཆོད་པའི་ལས་མངོན་པར་བསྒྲུབ་པ་འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་གཉིས་པའོ། ། 3. གཞན་ཡང་བྱང་ཆུབ་སེམས་དཔའ་ལག་པ་གཡས་པའི་མཐིལ་ནས་ཡོངས་སུ་དག་པའི་ཡུལ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་སྟོང་གསུམ་གྱི་སྟོང་ཆེན་ པོའི་འཇིག་རྟེན་གྱི་ཁམས་ཡོངས་སུ་སྦྱོང་ཞིང་། དེ་ན་ཟག་པ་མེད་པའི་རང་སངས་རྒྱས་འཁོད་པ་དེ་དག་འཇིག་རྟེན་གྱི་ཁམས་སུ་སེལ་ཏོ། ། མ་ཡིན་ན་ཡང་གང་གིས་ཤེས་པར་གྱུར་པ་དེ་དག་ཚེའི་འདུ་བྱེད་འདོར་རོ། ། གཞན་ཡང་འདུལ་བའི་དབང་དུ་དེ་བཞིན་གཤེགས་པའི་བྱིན་གྱིས་བྱིན་ཏུ་བརླབས་པའི་སེམས་ཅན་མ་གཏོགས་པར། བདུད་དང་མུ་སྟེགས་ཅན་གཞན་དང་། ཕས་ཀྱི་རྒོལ་བ་དང་། ཀུན་ཏུ་རྒྱུ་བ་དང་། དམིགས་པ་ལ་མངོན་པར་ཞེན་པའི་སེམས་ཅན་རྣམས་འཇིག་རྟེན་གྱི་ཁམས་གཞན་དུ་སེལ་ཏེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་གསུམ་པའོ། ། 4. གཞན་ཡང་བྱང་ཆུབ་སེམས་དཔའ་དེའི་པུས་མོ་གཉིས་ཀྱི་ལྷ་ང་གཉིས་ནས་དྲི་མ་མེད་ཅིང་བཟང་ལ་འོད་གསལ་བའི་རྒྱུན་ཅེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་ལྷའི་གནས་ཐ་མ་ཉེ་བར་བཟུང་བ་ཡན་ཆད། འོག་མིན་གྱི་ལྷའི་གནས་མ་ཆད་དུ་སྣང་བར་བྱེད་དེ། དེས་ལྷའི་བུ་དེ་དག་གིས་ཀྱང་། བྱང་ཆུབ་སེམས་དཔའ་དགའ་ལྡན་གྱི་གནས་ནས་ཤི་འཕོ་བར་ཤེས་ནས། དེ་དག་ཀུན་ཀྱང་སྐྱོ་བའི་ཡིད་ཀྱིས་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་ཐོགས་ཏེ། རོལ་མོ་བརྡུང་བ་དང་། དཀྲོལ་བའི་སྒྲ་རབ་ཏུ་ཕྱུང་ནས་སེམས་དཔའི་དྲུང་དུ་མཆོད་པའི་ལས་ཀྱི་ཕྱིར་འདོང་སྟེ། ཤི་འཕོ་བ་ཉེ་བར་བཟུང་བ་ནས། ཡོངས་སུ་མྱ་ངན་ལས་འདས་པ་ཆེན་པོ་བསྟན་གྱི་བར་དུ་བསྙེན་བཀུར་བྱེད་དོ། ཕྱི་བཞིན་འབྲང་ངོ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་བཞི་པའོ། ། 5. གཞན་ཡང་བྱང་ཆུབ་སེམས་དཔའ་དེ་དཔལ་གྱི་བེའུའི་རྒྱན་དང་ལྡན་པ། རྡོ་རྗེའི་ཁམས་ལྟར་སྲ་ཞིང་བརྟན་པའི་སྙིང་པོ་ཅན་གྱི་སྙིང་ག་ནས། གཞན་གྱིས་མི་ཐུབ་པའི་རྒྱལ་མཚན་ཞེས་བྱ་བའི་འོད་ཟེར་གཏོང་སྟེ། དེ་བཏང་ནས་ཀྱང་ལག་ན་རྡོ་རྗེའི་འཇིག་རྟེན་ཐམས་ཅད་ཡོངས་སུ་སྣང་བར་བྱེད་དོ། ། དེ་ནས་ལག་ན་རྡོ་རྗེ་ཁྲག་ཁྲིག་ཕྲག་བརྒྱ་འོངས་ཏེ། ཤི་འཕོ་སྟོན་པ་ཉེ་བར་བཟུང་བ་ནས། ཡོངས་སུ་མྱ་ངན་ལས་འདའ་བ་ཆེན་པོ་བསྟན་གྱི་བར་དུ་བྱང་ཆུབ་སེམས་དཔའི་ཕྱི་བཞིན་འབྲང་སྟེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་ལྔ་པའོ། ། 6. གཞན་ཡང་བྱང་ཆུབ་སེམས་དཔའ་དེའི་བ་སྤུའི་བུ་ག་ཐམས་ཅད་ནས་འགྲོ་བ་ཐམས་ཅད་དུ་རྣམ་པར་ཕྱེ་བ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་ནས། བྱང་ཆུབ་སེམས་དཔའི་ལུས་ལ་བབ་བོ། བྱང་ཆུབ་སེམས་དཔའི་ལུས་ལ་བབ་ནས། ལྷ་དང་། མིའི་གནས་སུ་འཆར་རོ། ། དེས་བྱང་ཆུབ་སེམས་དཔའ་དེ་དག་ཀྱང་བདག་ཅག་གིས་འདིར་གནས་ཏེ། སེམས་ཅན་ཡོངས་སུ་སྨིན་པར་བྱ་བ་དང་། དེ་བཞིན་གཤེགས་པ་མཆོད་པ་བྱ་བར་འགྱུར་རོ། ། སྙམ་དུ་ཁོང་དུ་ཆུད་པ་འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་དྲུག་པའོ། ། 7. གཞན་ཡང་བྱང་ཆུབ་སེམས་དཔའ་དེའི་ཁང་པ་ནོར་བུ་རིན་པོ་ཆེ་ཆེན་པོའི་སྙིང་པོ་ཅན་ནས་རྣམ་པར་བསགས་པ་ཤིན་ཏུ་གནས་པ་ཞེས་བྱའི་འོད་ཟེར་འབྱུང་སྟེ། དེ་བྱུང་ནས་ཀྱང་ཁྱིམ་གང་དུ་བྱང་ཆུབ་སེམས་དཔའ་སྐྱེ་བར་འགྱུར་བའི་ཁྱིམ་དེར་འཆར་རོ། ། འོད་ཟེར་དེ་དེ་ལྟར་ཤར་མ་ཐག་ཏུ་དེ་ཉིད་ཀྱི་ཚེ། བྱང་ཆུབ་སེམས་དཔའ་དེ་དག་ཁྱིམ་མམ། གྲོང་ཁྱེར་རམ། གྲོང་རྡལ་ལམ། འཛམ་བུའི་གླིང་དུ་སེམས་ཅན་འདུལ་བ་ཉེ་བར་བཟུང་ཞིང་སྐྱེ་བ་རབ་ཏུ་འཛིན་ཏེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་བདུན་པའོ། ། 8. གཞན་ཡང་བྱང་ཆུབ་སེམས་དཔའ་དེའི་ཁང་པ་བརྩེགས་པ་ལྷ་ཐམས་ཅད་ཀྱི་གནས་ཀྱི་རྒྱན་ཅེས་བྱ་བ་ལས། གནས་ཐམས་ཅད་རྣམ་པར་དག་པའི་རྒྱན་ཅེས་བྱ་བའི་འོད་ཟེར་འབྱུང་སྟེ། དེ་དག་བྱུང་མ་ཐག་ཏུ་ཡུམ་གང་གི་སྐུ་གཡས་པར་སྐྱེ་བར་འགྱུར་བ་དེའི་ལུས་ལ་འབབ་བོ། ། དེ་ལྟར་བབ་མ་ཐག་ཏུ་དེ་ཉིད་ཀྱི་ཚེ། བྱང་ཆུབ་སེམས་དཔའི་ཡུམ་བདེ་བ་ཐམས་ཅད་ཐོབ་པར་འགྱུར་ཏེ། ཡོན་ཏན་དང་སྡོམ་པ་ཐམས་ཅད་ལ་ཡང་གནས་པར་འགྱུར་རོ། ། ཡུམ་གྱི་སྐུ་དེར་ཡང་ཕོ་བྲང་བརྩེགས་པ་ཆེན་པོ་རིན་པོ་ཆེའི་དམ་པས་བརྒྱན་པས། བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་འབྱུང་སྟེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་བརྒྱད་པའོ། ། 9. གཞན་ཡང་བྱང་ཆུབ་སེམས་པའི་རྐང་པའི་མཐིལ་གྱི་འོག་ནས་གནས་པ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་མ་ཐག་ཏུ་ལྷའི་བུའམ། ཚངས་པ་གང་ལ་ལ་བྱང་ཆུབ་སེམས་ དཔའི་མཆོད་པའི་ལས་ཀྱི་དོན་དུ་ཤི་འཕོ་བར་འདོད་པར་གྱུར་ལ། བྱང་ཆུབ་སེམས་པས་ཀྱང་ལྷའི་བུ་དེ་དག་དེ་ན་འཁོད་བཞིན་དུ། དེ་བཞིན་གཤེགས་པ་ལ་མཆོད་པའི་ལས་མངོན་པར་སྒྲུབ་པར་ནུས་པར་ཤེས་པ་དེ་དག་གི་ལུས་ལ་བབ་བོ། ། དེ་ལྟར་འོད་ཟེར་དེས་བབ་པར་གྱུར་མ་ཐག་ཏུ་དེ་ཉིད་ཀྱི་ཚེ། ལྷའི་བུ་དེ་དག་ཤི་འཕོའི་ལས་དེ་ལས་རྣམ་པར་ལྡང་སྟེ། དེ་དག་དེ་ན་འཁོད་བཞིན་དུ་བྱང་ཆུབ་སེམས་དཔའ་ལ་ཤི་འཕོ་ཉེ་བར་བཟུང་བ་ནས་ཡོངས་སུ་མྱ་ངན་ལས་འདས་པ་བསྟན་གྱི་བར་དུ་མཆོད་པའི་ལས་བྱེད་དེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་དགུ་པའོ། ། 10 .གཞན་ཡང་བྱང་ཆུབ་སེམས་དཔའི་དཔེ་བྱད་བཟང་པོ་རྣམས་ལས་ཉི་མ་སྣ་ཚོགས་ཀྱི་ཚུལ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་བྱང་ཆུབ་སེམས་དཔའི་ལས་སྣ་ཚོགས་སྟོན་ཏོ། ། དེ་ལ་ལྷ་དང་མི་ལ་ལས་ནི་བྱང་ཆུབ་སེམས་དཔའ་དགའ་ལྡན་གྱི་གནས་རབ་ཉིད་ན་འདུག་པར་མཐོང་ངོ། ། ལ་ལས་ནི་ཡུམ་གྱི་སྐུར་བཞུད་པར་མཐོང་ངོ། ། ལ་ལས་ནི་སྐྱེ་བར་མཐོང་ངོ་། ། ལ་ལས་ནི་འབྱུང་བར་མཐོང་ངོ་། ། ལ་ལས་ནི་རྣམ་པར་འཚང་རྒྱ་བར་མཐོང་ངོ། ། ལ་ལས་ནི་ཆོས་ཀྱི་འཁོར་ལོ་བསྐོར་བར་མཐོང་ངོ། ། ལ་ལས་ནི་དེ་བཞིན་གཤེགས་པ་མྱ་ངན་ལས་འདའ་བར་མཐོང་སྟེ། འདི་ནི་དགའ་ལྡན་གྱི་གནས་གནས་ཤི་འཕོ་སྟེན་པ་བཅུ་པའོ། །
Tibetan Source	《ཕལ་ཆེན་ང་པ་》ཤ་358བ་6ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number