9000

Tibetan	ཐབས་ལ་མཁས་པ་བཅུ།
Tibetan Alternate
Tibetan Definition	དེ་ཡང་། འཕགས་པ་དཀོན་མཆོག་སྤྲིན་ཞེས་བྱ་བའི་མདོ་ལས་བྱུང་བ་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པ་བཅུ་སྟེ། 1. བྱང་ཆུབ་སེམས་དཔའ་ཡོངས་སུ་བསྔོ་བའི་ཐབས་མཁས་པ་ནི། འདི་ལ་བྱང་ཆུབ་སེམས་དཔའ་གང་འདི་དག་མེ་ཏོག་གི་རྣམ་པའམ། འབྲས་བུའི་རྣམ་པ་ང་ཡིར་བྱ་བ་མེད་པ། ཡོངས་སུ་བཟུང་བ་མེད་པ་དེ་རྣམས་ཉིན་ལན་གསུམ་མཚན་ལན་གསུམ་སངས་རྒྱས་དང་། བྱང་ཆུབ་སེམས་དཔའ་རྣམས་ལ་འབུལ་ལོ། ། དགེ་བའི་རྩ་བ་དེའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། ། དེ་གང་འདི་དག་བདུག་པའི་ཤིང་ངམ། སྤོས་ཀྱི་ཤིང་ངམ། རིན་པོ་ཆེའི་ཤིང་ངམ། དཔག་བསམ་གྱི་ཤིང་ངམ། མེ་ཏོག་གི་ཤིང་ངམ། འབྲས་བུའི་ཤིང་ང་ཡིར་བྱ་བ་མེད་པ་ཡོངས་སུ་བཟུང་བ་མེད་པ་དེ་དག་ཀྱང་ཉིན་ལན་གསུམ་མཚན་ལན་གསུམ་སངས་རྒྱས་དང་། བྱང་ཆུབ་སེམས་དཔའ་རྣམས་ལ་འབུལ་ལོ། ། དགེ་བའི་རྩ་བ་དེའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། ། དེ་མདོ་སྡེ་རྣམས་ལས་མཆོད་པ་དང་། རིམ་གྲོ་བྱ་བ་གང་འདི་དག་རྒྱ་ཆེན་པོ་རྒྱ་ཆེ་བ་དག་ཉན་ཅིང་དེ་དག་སྙིང་ཐག་པ་ནས་ལྷག་པའི་བསམ་པ་མཆོག་གིས་སངས་རྒྱས་དང་། བྱང་ཆུབ་སེམས་དཔའ་རྣམས་ལ་ཡོངས་སུ་བསྔོའོ། ། གང་ཕྱོགས་བཅུ་ན་བྱང་ཆུབ་སེམས་དཔའ་རྣམས་དང་། དེ་མ་ཡིན་པའི་སེམས་ཅན་དག་དགེ་བའི་ལས་རྣམས་བྱེད་ཅིང་བྱང་ཆུབ་ཀྱི་ཚོགས་རྣམས་ཡོངས་སུ་རྫོགས་པར་བྱེད་པ་དེ་དག་ལ་སྙིང་ཐག་པ་ནས་རྗེས་སུ་ཡི་རང་སྟེ། དགེ་བའི་རྩ་བ་དེའང་བླ་ན་མེད་པ་ཡང་དག་བར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། ། དེ་བཞིན་གཤེགས་པའི་མཆོད་རྟེན་ནམ། དེ་བཞིན་གཤེགས་པའི་སྐུ་གཟུགས་ལ་མེ་ཏོག་གམ། བདུག་པའམ། སྤོས་གསོལ་ན། སེམས་ཅན་ཐམས་ཅད་ཀྱི་ངང་ཚུལ་ངན་པའི་དྲི་ང་བ་བསལ་བ་དང་། དེ་བཞིན་གཤེགས་པའི་ཚུལ་ཁྲིམས་ཀྱི་དྲི་ཐོབ་པར་ཡོངས་སུ་བསྔོའོ། ། དེ་ཕྱག་དར་དང་། ཞལ་ཞལ་བྱེད་ན། སེམས་ཅན་ཐམས་ཅད་ཀྱི་སྤྱོད་ལམ་མི་སྡུག་པ་མེད་པར་འགྱུར་བ་དང་། སྤྱོད་ལམ་མཛེས་པ་ཕུན་སུམ་ཚོགས་པར་ཡོངས་སུ་བསྔོའོ། ། དེ་མེ་ཏོག་གི་གདུགས་གསོལ་ན། སེམས་ཅན་ཐམས་ཅད་ཀྱི་ཉོན་མོངས་པ་དང་། ཉེ་བའི་ཉོན་མོངས་པའི་གདུང་བ་མེད་པར་བྱ་བའི་ཕྱིར་ཡོངས་སུ་བསྔོའོ། ། དེ་གཙུག་ལག་ཁང་གི་ནང་དུ་འགྲོ་ན། འདི་ལྟར་སེམས་ཅན་ཐམས་ཅད་མྱ་ངན་ལས་འདས་པའི་གྲོང་ཁྱེར་དུ་གཟུད་དོ་སྙམ་དུ་སེམས་བསྐྱེད་དོ། ། དེ་ཕྱིར་འབྱུང་ན། འདི་ལྟར་སེམས་ཅན་ཐམས་ཅད་འཁོར་བའི་བཙོན་ར་ནས་འདྲེན་ཏོ་སྙམ་དུ་སེམས་བསྐྱེད་དོ། ། དེ་གནས་ཁང་གི་སྒོ་འབྱེད་ན། འདི་ལྟར་འཇིག་རྟེན་ལས་འདས་པའི་ཡེ་ཤེས་ཀྱིས་བདེ་འགྲོ་ཐམས་ཅད་ཀྱི་སྒོ་དབྱེའོ་སྙམ་དུ་སེམས་བསྐྱེད་དོ། ། དེ་སྒོ་གཅོད་ན། འདི་ལྟར་ངན་འགྲོ་ཐམས་ཅད་ཀྱི་སྒོ་རྣམས་གཅད་དོ་སྙམ་དུ་སེམས་བསྐྱེད་དོ། ། དེ་འདུག་ན། འདི་ལྟར་སེམས་ཅན་ཐམས་ཅད་བྱང་ཆུབ་ཀྱི་སེམས་སྙིང་པོ་ལ་དགོད་དོ་སྙམ་དུ་སེམས་བསྐྱེད་དོ། ། དེ་གློ་གཡས་པས་ཉལ་ན། འདི་ལྟར་སེམས་ཅན་ཐམས་ཅད་སངས་རྒྱས་ཀྱི་མྱ་ངན་ལས་འདས་པས་ཡོངས་སུ་མྱ་ངན་ལས་བཟླའོ་སྙམ་དུ་སེམས་བསྐྱེད་དོ། ། དེ་དེ་ནས་ལྡང་ན། འདི་ལྟར་སེམས་ཅན་ཐམས་ཅད་ཉོན་མོངས་པའི་ཀུན་ནས་ལྡང་བ་རྣམས་ལས་བསླང་ངོ་སྙམ་དུ་སེམས་བསྐྱེད་དོ། ། དེ་ལུས་ཀྱི་ཆེད་ལ་འགྲོ་ན། འདི་ལྟར་སེམས་ཅན་ཐམས་ཅད་སྐྱེས་བུ་ཆེན་པོའི་འགྲོས་སུ་འགྲོ་བར་གྱུར་ཅིག་སྙམ་དུ་སེམས་བསྐྱེད་དོ། ། དེ་དེར་འདུག་ན། འདི་ལྟར་སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ཟུག་རྔུ་དབྱུང་ངོ་སྙམ་དུ་སེམས་བསྐྱེད་དོ། ། དེ་བཀྲུ་བཤལ་བྱེད་ན། འདི་ལྟར་སེམས་ཅན་ཐམས་ཅད་ཀྱི་ཉོན་མོངས་པའི་དྲི་མའི་སྐྱོན་རྣམས་བཀྲུའོ་སྙམ་དུ་སེམས་བསྐྱེད་དོ། ། དེ་ལག་པ་བསྙལ་ན། འདི་ལྟར་སེམས་ཅན་ཐམས་ཅད་ཀྱི་ཉོན་མོངས་པའི་དྲི་ང་བ་རྣམས་བསལ་ལོ་སྙམ་དུ་སེམས་བསྐྱེད་དོ། ། དེ་རྐང་པ་འཁྲུ་ན། འདི་ལྟར་སེམས་ཅན་ཐམས་ཅད་ཀྱི་ཉོན་མོངས་པའི་རྡུལ་རྣམ་པ་སྣ་ཚོགས་བསལ་ལོ་སྙམ་དུ་སེམས་བསྐྱེད་དོ། ། དེ་སོ་ཤིང་ཟ་ན། འདི་ལྟར་སེམས་ཅན་ཐམས་ཅད་ཀྱི་དྲི་མ་རྣམ་པ་སྣ་ཚོགས་བསལ་ལོ་སྙམ་དུ་སེམས་བསྐྱེད་དོ། ། དེ་ལུས་ཀྱི་གཡོ་བ་ཐམས་ཅད་སེམས་ཅན་ཐམས་ཅད་ལ་ཕན་པ་དང་བདེ་བར་ཡོངས་སུ་བསྔོའོ། ། དེ་དེ་བཞིན་གཤེགས་པའི་མཆོད་རྟེན་ལ་ཕྱག་འཚལ་ན། འདི་ལྟར་སེམས་ཅན་ཐམས་ཅད་ལྷ་དང་བཅས་པའི་འཇིག་རྟེན་གྱིས་ཕྱག་བྱ་བར་ཤོག་ཅིག་སྙམ་དུ་སེམས་བསྐྱེད་དེ། བྱང་ཆུབ་སེམས་དཔའ་ཡོངས་སུ་བསྔོ་བའི་ཐབས་མཁས་པ་ཡིན་ནོ། ། 2. བྱང་ཆུབ་སེམས་དཔའ་མུ་སྟེགས་ཅན་རྣམ་པར་ཟློག་པའི་ཐབས་མཁས་པ་ནི། འདི་ལ་བྱང་ཆུབ་སེམས་དཔའ་འདི་ལྟ་སྟེ། མུ་སྟེགས་ཅན་སྤྱོད་བ་པ་དང་། ཀུན་ཏུ་རྒྱུ་དང་། གཅེར་བུ་བ་ལ་སོགས་པའི་མུ་སྟེགས་ཅན་གྱི་གནས་པ་དེ་དང་དེ་དག་ཏུ་འཕྲུལ་པ་དག་མངོན་པར་སྤྲུལ་ཏེ། དེ་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་ཐབས་བྱེད་ཅིང་དེ་འདི་སྙམ་དུ་སེམས་ཏེ། ཀྱེ་མའོ་སེམས་ཅན་འདི་རྣམས་ང་རྒྱལ་གྱི་ཟིལ་གྱིས་ནོན་པས་བདག་གིས་སྔར་སློབ་དཔོན་གྱི་ཚུལ་གྱིས་གདུལ་བར་མི་ནུས་པས་སློབ་མར་ཁས་བླང་ངོ་སྙམ་སྟེ། དེ་དག་གི་ཁྲོད་དུ་རབ་ཏུ་འབྱུང་ངོ་། ། དེ་རབ་ཏུ་བྱུང་ནས་ཇི་ལྟར་སྤྱོད་པ་དང་། སྤྱོད་ཡུལ་དང་། མང་དུ་ཐོས་པ་དང་། སྤྱོད་པ་དམན་ཚོགས་ཀྱིས་ཀྱང་མུ་སྟེགས་ཅན་གཞན་དེ་དག་ཟིལ་གྱིས་གནོན་པ་དེ་ལྟ་དེ་ལྟ་བུར་རྩོལ་ལོ། ། འབད་དོ། ། བརྩོན་འགྲུས་རྩོམ་མོ། ། དེ་དག་གི་ནང་ན་སློབ་དཔོན་དང་བླ་མ་ལྟ་བུར་བཀུར་བར་འགྱུར། ཚིག་གཟུང་ཞིང་ངག་མི་གཅོག་པར་འགྱུར་ཏེ། དེ་ཀྱེ་སེམས་ཅན་དེ་དག་ཉེ་བར་གྱུར་པའོ་སྙམ་དུ་ཤེས་ནས་གྲོགས་པོ་དག ། འདི་ནི། སྐྱོ་བ་དང་། འདོད་ཆགས་དང་བྲལ་བ་དང་། འགོག་པར་འགྱུར་བའི་ལམ་མ་ཡིན་ནོ། ། ཞེས་མུ་སྟེགས་ཅན་དེ་དག་གི་མ་ལེགས་པ་བརྗོད་པར་འགྱུར་ཏེ། དེས་མུ་སྟེགས་ཅན་གཞན་དེ་དག་གནས་དེ་རྣམས་ལས་བསླང་ནས་དེ་བཞིན་གཤེགས་པའི་ཆོས་འདུལ་བ་ལ་འགོད་དོ། ། དེ་ཕྱི་རོལ་གྱི་མངོན་པར་ཤེས་པ་ལྔ་དང་ལྡན་པ་དག་གི་གན་དུ་ཚངས་པར་སྤྱད་པ་སྤྱོད་དོ། ། དེ་ཚངས་པར་སྤྱད་པ་སྤྱོད་ཅིང་ཆོས་དེ་ཐོབ་པར་བྱ་བའི་ཕྱིར་སྤྱོད་ཅིང་རྩོལ་ལོ། ། འབད་དོ། རྩོལ་ཞིང་འབད་པས་བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་སྒྲུབ་སྟེ། ཅི་ནས་ཀྱང་མངོན་པར་ཤེས་པ་ལྔ་དང་ལྡན་པ་གཞན་དེ་དག་བས་ཆེས་མཆོག་ཏུ་འགྱུར་བ་དང་། ཆེས་འབར་བར་འགྱུར་བ་དང་། སློབ་དཔོན་གྱི་མཆོག་ཏུ་འགྱུར་བ་དང་། མཁས་པར་བཀུར་བར་འགྱུར་བ་དེ་ལྟར་སྒྲུབ་བོ། ། དེས་སེམས་ཅན་དེ་རྣམས་ཡོངས་སུ་སྨིན་པའི་དུས་དང་། ཚོད་ཤེས་ནས་གྲོགས་པོ་དག ། ལམ་འདི་ནི། སྐྱོ་བ་དང་། འདོད་ཆགས་དང་བྲལ་བ་དང་། འགོག་པར་འགྱུར་བའི་ལམ་མ་ཡིན་ནོ། ། ཞེས་བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་དེ་དག་གི་མ་ལེགས་པ་བརྗོད་པ་ཡིན་ཏེ། དེས་སེམས་ཅན་དེ་དག་གནས་དེ་ལས་བསླང་ནས་དེ་བཞིན་གཤེགས་པའི་ཆོས་འདུལ་བ་ལ་རབ་ཏུ་འགོད་དེ། དེ་ལྟར་ན། བྱང་ཆུབ་སེམས་དཔའ་མུ་སྟེགས་ཅན་རྣམ་པར་ཟློག་པའི་ཐབས་མཁས་པ་ཡིན་ནོ། ། 3. བྱང་ཆུབ་སེམས་དཔའ་ཡུལ་ལས་རྣམ་པར་ཟློག་པའི་ཐབས་མཁས་པ་ནི། འདི་ལ་བྱང་ཆུབ་སེམས་དཔའ་སེམས་ཅན་གང་རབ་ཏུ་འདོད་ཆགས་ཅན་རབ་ཏུ་འདོད་ཆགས་མང་བའི་སེམས་ཅན་རྣམས་མཐོང་ན། དེས་དེ་དག་གདུལ་བའི་ཐབས་གཞན་མེད་དོ་སྙམ་ནས་དེས་དེ་དག་གི་དྲུང་དུ་བུད་མེད་སྤྲུལ་པ་བཟང་མོ་བལྟ་ན་སྡུག་པ་བུད་མེད་ཐམས་ཅད་ཀྱི་མཆོག་དག་སྤྲུལ་ཏེ། སེམས་ཅན་དེ་རྣམས་དེ་དག་ལ་རབ་ཏུ་ཆགས་པར་རིག་ནས་སྤྲུལ་པའི་བུད་མེད་དེ་མལ་དེ་ཉིད་དུ་འཆི་བའི་དུས་བྱེད་དུ་འཇུག་གོ ། དེའང་སྐད་ཅིག་དེ་ཉིད་དང་། ཡུད་ཙམ་དེ་ཉིད་དང་། ཐང་གཅིག་དེ་ཉིད་ལ་རུལ་ཅིང་དྲི་ང་བ་དང་འཇིགས་པར་འགྱུར་ཏེ། དེ་དག་གིས་ཀྱང་དེ་མཐོང་ནས་དངངས་སྐྲག་སྐྱོ་བར་རེད་དེ། བདག་ཅག་འདི་འདྲ་བའི་དྲིད་པའི་ནང་ནས་གང་ཐར་པར་བྱེད་པ་སུ་ཞིག་ཡོད་ཅེས་ཉམ་ཐག་པར་འགྱུར་རོ། ། དེའི་ཚེ་ན་བྱང་ཆུབ་སེམས་དཔའ་སེམས་ཅན་དེ་དག་གི་མདུན་དུ་འདུག་སྟེ། དེ་བྱང་ཆུབ་གསུམ་ལས་གང་ཡང་རུང་བའི་བྱང་ཆུབ་ཏུ་ངེས་པར་འགྱུར་བ་དེ་ལྟར་སེམས་ཅན་དེ་དག་ལ་ཆོས་སྟོན་ཏེ། བྱང་ཆུབ་སེམས་དཔའ་ཡུལ་ལས་རྣམ་པར་ཟློག་པའི་ཐབས་མཁས་པ་ཡིན་ནོ། ། 4. བྱང་ཆུབ་སེམས་དཔའ་འགྱོད་པ་ཡིད་ལ་གཅགས་པ་སེལ་བའི་ཐབས་མཁས་པ་ནི། འདི་ལ་བྱང་ཆུབ་སེམས་དཔའ་སེམས་ཅན་སུ་མཚམས་མེད་པའི་ལས་བྱེད་པའམ། མི་དགེ་བའི་ལས་བྱེད་པ་མཐོང་ན། དེའི་གན་དུ་སོང་སྟེ་ཀྱེ་སྐྱེས་བུ། ཅིའི་ཕྱིར་ཡིད་མི་བདེ་ཞིང་མི་དགའ་བར་གནས་ཞེས་དེ་སྐད་ཟེར་རོ། ། དེས་ཀྱང་སྨྲས་པ། བདག་གིས་མཚམས་མེད་པའི་ལས་བྱས་པས་དེའི་ཕྱིར་བདག་ལ་ཡུན་རིང་པོར་གནོད་པ་དང་། ཕན་པ་མེད་པ་དང་། སྡུག་བསྔལ་བར་མི་འགྱུར་གྲང་ཞེས་ཡིད་མི་བདེ་ཞིང་མི་དགའ་བར་གནས་སོ། ། དེའི་ཕྱིར་དེ་ལ་བྱང་ཆུབ་སེམས་དཔའ་སྔོམ་པ་འཛིན་དུ་འཇུག་གོ ། ཉེས་པའང་འཆགས་སུ་འཇུག་གོ ། དེ་ལ་ཆོས་བསྟན་པ་ཟབ་མོ་ཟབ་མོའང་བྱེད་དེ། ། དེ་སྟེ་འགྱོད་པ་མི་གཏོང་ན། དེའི་ཕྱིར་དེ་ལ་བྱང་ཆུབ་སེམས་དཔའ་ཐོག་མ་འདི་ལྟ་སྟེ། རྫུ་འཕྲུལ་ལམ། སེམས་ཀུན་བསྟེན་པས་ཡང་དག་པར་ཡིད་ཆེས་པ་སྐྱེད་དོ། ། དེ་ནས་སེམས་ཅན་དེ་ཡང་དག་པར་ཡིད་ཆེས་པ་སྐྱེས་ནས་བྱང་ཆུབ་སེམས་དཔའ་དེ་ལ་དགའ་བ་དང་། མོས་པ་དང་། རངས་པ་རྙེད་པར་འགྱུར་རོ། ། དེ་དག་དགའ་བ་དང་། མོས་པ་དང་། རངས་པ་རྙེད་པས་དེ་ཆོས་བསྟན་དུ་རུང་བར་འགྱུར། བྱང་ཆུབ་སེམས་དཔའ་བདག་དང་མཐུན་པ་འཛིན་པར་འགྱུར་རོ། ། དེ་ནས་བྱང་ཆུབ་སེམས་དཔའ་དེས་དེའི་མདུན་དུ་འདི་ལྟ་སྟེ། ཕ་མར་སྤྲུལ་པ་མངོན་པར་སྤྲུལ་ཏེ་འདི་སྐད་ཟེར་རོ། ། ཀྱེ་སྐྱེས་བུ། ཁྱོད་ལྟོས་ལ་འགྱོད་པ་ཆོད་ཅིག ངའང་ཁྱོད་ཀྱི་གྲོགས་ཏེ། ལས་འདི་ལྟ་བུས་སུའང་ཤིན་ཏུ་སེམས་ཅན་དམྱལ་བར་འགྲོ་བའམ། དོན་ཐམས་ཅད་ལས་ཉམས་པར་འགྱུར་བ་མེད་དོ། ། ལས་དེ་ཡེ་ཤེས་ཀྱིས་བསམ་དུ་མི་ནུས་པའང་མ་ཡིན་ནོ། ། ཞེས་དེ་སྐད་སྨྲས་ནས་ཕ་མ་སྲོག་དང་ཕྲལ་ལོ། ། སྲོག་དང་ཕྲལ་ནས་ཀྱང་རྫུ་འཕྲུལ་དེ་སྟོན་ཏོ། ། དེ་ནས་སེམས་ཅན་དེ་འདི་སྙམ་དུ་སེམས་ཏེ། རྫུ་འཕྲུལ་དང་ལྡན་པས་ཀྱང་ཕ་མ་སྲོག་དང་ཕྲལ་ན། བདག་འདྲ་བ་ལྟ་ཅི་ཞིག་སྨོས་སྙམ་མོ། ། བྱང་ཆུབ་སེམས་དཔའ་དེའང་དེ་ཚེ་སེམས་ཅན་དེ་ལ་ཅི་ནས་ཀྱང་དེའི་ལས་དེ་སྦྲང་མའི་འདབ་མ་འདྲ་བར་འགྱུར་བ་དེ་ལྟ་དེ་ལྟ་བུའི་ཆོས་སྟོན་པར་བྱེད་དོ། ། བྱང་ཆུབ་སེམས་དཔའ་འགྱོད་པ་ཡིད་ལ་གཅགས་པ་སེལ་བའི་ཐབས་མཁས་པ་ཡིན་ནོ། ། 5. བྱང་ཆུབ་སེམས་དཔའ་སེམས་ཅན་ལ་དཔུང་གཉེན་བྱེད་པའི་ཐབས་མཁས་པ་ནི། འདི་ལ་བྱང་ཆུབ་སེམས་དཔས་སེམས་ཅན་གང་ཆོས་བསྟན་པར་རུང་ཞིང་ནུས་པ་དག་མཐོང་ལ། དེ་དག་ཀྱང་ཤིན་ཏུ་མི་དགེ་བའི་ལས་བྱེད་པར་གྱུར་ན། དེ་དག་གདུལ་བའི་ཐབས་སུ་བྱང་ཆུབ་སེམས་དཔས་འཕྲུལ་པ་དག་མངོན་པར་སྤྲུལ་ཏེ། དེ་ལ་སེམས་ཅན་གང་རྣམས་རྒྱལ་པོས་འདུལ་བར་འགྱུར་བ་དེ་དག་ལ་རྒྱལ་པོར་སྤྲུལ་པ་མངོན་པར་སྤྲུལ་པར་བྱེད་དོ། ། སེམས་ཅན་གང་རྣམས་བློན་པོ་ཆེན་པོས་འདུལ་བར་འགྱུར་བ་དེ་དག་ལ་བློན་པོ་ཆེན་པོར་སྤྲུལ་པ་མངོན་པར་སྤྲུལ་པར་བྱེད་དོ། ། སེམས་ཅན་གང་རྣམས་བྲམ་ཟེ་དང་། རྒྱལ་རིགས་དང་། གྲོང་པ་དང་། ཡུལ་མིས་འདུལ་བར་འགྱུར་བ་དེ་དག་ལ་བྲམ་ཟེ་དང་། རྒྱལ་རིགས་དང་། གྲོང་པ་དང་། ཡུལ་མིར་སྤྲུལ་པ་དང་། སེམས་ཅན་གང་རྣམས་ལྷས་འདུལ་བ་དེ་དག་ལ་ལྷར་སྦྲུལ་པ་དང་། གང་ལག་ན་རྡོ་རྗེས་འདུལ་བ་དེ་དག་ལ་ལག་ན་རྡོ་རྗེར་སྤྲུལ་པ་མངོན་པར་སྤྲུལ་པར་བྱེད་དོ། ། སེམས་ཅན་གང་རྣམས་འཇིགས་པས་འདུལ་བར་འགྱུར་བ་དེ་དག་ལ་འཇིགས་པ་སྟོན། སེམས་ཅན་གང་རྣམས་བརྡེགས་པ་དང་། བསྡིགས་པ་དང་། བཅད་པ་དང་། བཅིང་བས་འདུལ་བ་དེ་དག་ལ་དེ་འདྲ་བར་སྟོན། སེམས་ཅན་གང་རྣམས་དེས་པས་འདུལ་བ་དེ་དག་ལ་དེས་པས་འདུལ། སེམས་ཅན་གང་རྣམས་མཚམས་མེད་པ་བྱེད་འདོད་པ་དང་། བྱང་ཆུབ་སེམས་དཔའ་དག་ལ་བརྒྱད་པར་འདོད་པ་དེ་དག་ཐབས་སྣ་ཚོགས་ཀྱིས་བཟློག་ཅིང་ཟིལ་གྱིས་གནོན་པར་བྱེད། ཕྱོགས་གཞན་དུའང་བསྐོར་བར་བྱེད་དོ། ། མཚམས་མེད་པར་འགྱུར་བའི་དངོས་པོ་སྦས་ཏེ། དེ་འདྲ་བར་དེའི་མདུན་དུ་སྤྲུལ་པ་སྟོན་ཏེ། ། ཡང་ན་སེམས་ཅན་དམྱལ་བ་སྟོན་ཏོ། ། མངོན་པར་ཤེས་པ་མ་སྐྱེས་པའི་བྱང་ཆུབ་སེམས་དཔའ་ཚེའི་མཚན་མ་ཤེས་པ་ནི། བྱེད་འདོད་པ་དང་། གསོད་འདོད་པའི་སེམས་ཅན་དེ་དག་མཐོང་ནས་སྙིང་རྗེ་ཆེན་པོའི་སེམས་སྐྱེས་ཏེ། དེ་ཡང་འདི་སྙམ་དུ། ཀྱེ་མ་སེམས་ཅན་འདི་རྣམས་ནི། ཕུང་བར་འདོད་པའོ། ། ཀྱེ་མ་སེམས་ཅན་འདི་རྣམས་ནི། བརླག་པར་འདོད་པའོ་སྙམ་དུ་སེམས་ཤིང་། དེ་དག་དེས་ལག་མཐིལ་དུ་སྐྱུ་རུ་རའི་འབྲུ་བཞག་པ་ལྟར་མཐོང་ནས་མི་དགའ་བའི་སེམས་ཆེན་པོ་བསྐྱེད་དེ། དེའང་འདི་སྙམ་དུ་སེམས་སོ། ། བདག་སེམས་ཅན་གཅིག་གི་ཕྱིར་ཡང་སེམས་ཅན་དེ་ཕུང་པོའི་ལྷག་མ་མ་ལུས་པའི་མྱ་ངན་ལས་འདས་པའི་དབྱིངས་སུ་རབ་ཏུ་བཞག་པའི་བར་དུ་མནར་མེད་པའི་སྡུག་བསྔལ་བསྐུར་བར་བཟོད་ན། སེམས་ཅན་འདི་རྣམས་ཀྱང་མི་དགེ་བའི་ལས་བྱས་ཏེ་མནར་མེད་པའི་སེམས་ཅན་དམྱལ་བ་ཆེན་པོར་སྐྱེ་བར་འདོད་པ་ཐབས་གཞན་གྱིས་ནི། བཟློག་པར་མི་ནུས་ཏེ། སེམས་ཅན་དེ་རྣམས་ཚེའང་ཐུང་། དད་པའང་མེད་པ་དག་ཅིག་ལ་ཡུལ་གཞན་དུ་བསྐོར་བའམ། ཟིལ་གྱིས་མནན་པར་བྱ་བ་དེ་ལྟ་བུའི་དབང་ནི། བདག་ལ་མེད་ན། སེམས་ཅན་འདི་རྣམས་མི་དགེ་བའི་ལུས་ཞིག་ནས་མནར་མེད་པའི་སེམས་ཅན་དམྱལ་བ་ཆེན་པོ་ང་སྐྱེ་བར་མི་འགྱུར་གྲང་། དེའི་ཕྱིར་སྙིང་རྗེའི་སེམས་ཉེ་བར་བཞག་ནས་ལས་བདག་གིར་བྱ་བ་དང་འདྲ་བར་བྱས་ནས་སེམས་ཅན་དེ་རྣམས་ལ་བྱམས་པས་ཁྱབ་པར་བྱས་ཏེ། ཐབས་གཞན་གྱིས་མི་ནུས་ནས་ཆད་པ་རབ་ཀྱིས་འཆོས་ཏེ། དེ་ལྟར་བྱང་ཆུབ་སེམས་དཔའ་སེམས་ཅན་ལ་དཔུང་གཉེན་བྱེད་པའི་ཐབས་མཁས་པ་ཡིན་ནོ། ། 6. བྱང་ཆུབ་སེམས་དཔའ་སེམས་ཅན་འཚོ་བའི་ཐབས་ཉེ་བར་སྦྱོར་བ་ལ་མཁས་པ་ནི། འདི་ལ་བྱང་ཆུབ་སེམས་དཔའ་སེམས་ཅན་གང་རྣམས་འཕགས་པའི་ཆོས་འདུལ་བ་ཤེས་པར་མི་ལྕོགས་མི་ནུས་ཏེ། ཟས་དང་གོས་ལྷུར་འཛིན་ཅིང་དེ་ཁོ་ནས་ཆོག་པར་རྩི་བ་མཐོང་ན། དེ་རྣམས་ལ་བྱང་ཆུབ་སེམས་དཔའ་ཡི་གེ་དང་། གཙུག་ལག་དང་། རྒྱ་དང་། གྲངས་དང་། ཤོད་ཐབས་ལ་སོགས་པའི་ལས་དགེ་བ་དང་ལྡན་པ་དག་སྟོན་ཏེ། མི་དགེ་བ་དང་ལྡན་པ་མི་སྟོན་ཏོ། ། བྱང་ཆུབ་སེམས་དཔའ་སེམས་ཅན་འཚོ་བའི་ཐབས་ཉེ་བར་སྦྱོར་བ་ལ་མཁས་པ་ཡིན་ནོ། ། 7. བྱང་ཆུབ་སེམས་དཔའ་ལེན་པའི་ཐབས་མཁས་པ་ནི། འདི་ལ་བྱང་ཆུབ་སེམས་དཔའ་རིན་པོ་ཆེའི་ཕུང་པོ་རི་རབ་ཙམ་ཐོབ་ནའང་ལེན་ཏེ། དངོས་པོ་ངན་པ་ཞིག་ཐོབ་ནའང་ལེན་ཏོ། ། དེ་ཅིའི་ཕྱིར་ཞེ་ན། འདི་ལྟར་སེམས་ཏེ། སེམས་ཅན་འདི་དག་ནི། སེར་སྣ་ཅན། བརྐམ་པ། འདོད་པས་འཁོལ་བ། འཇུངས་པ་ཡིན་ཏེ། དེའི་རྒྱུ། དེའི་རྐྱེན། དེའི་གཞིས་ཆུའི་ཕུང་པོ་ཆེན་པོས་ནོན་པ་བཞིན་དུ་འཁོར་བའི་རྒྱ་མཚོར་འབྱུང་ནུབ་བྱེད་པ་དེ་དག་ལ་དེ་ནི། ཡུན་རིང་པོར་དོན་དང་། ཕན་པ་དང་། བདེ་བར་འགྱུར་རོ་སྙམ་སྟེ། དེ་བླངས་ནས་བདག་གིར་མི་བྱེད། ཆགས་པའི་སེམས་མི་བསྐྱེད་དེ། གཞན་དུ་ན་སེམས་ཅན་ཐམས་ཅད་དང་ཐུན་མོང་དུ་སངས་རྒྱས་དང་ཆོས་དང་། དགེ་འདུན་དག་ལ་བྱ་བ་བྱེད་དོ། ། སེམས་ཅན་སྡུག་བསྔལ་བ་རྣམས་ལའང་ཕན་པར་བྱེད་དོ། ། སྦྱིན་པའི་བདག་པོ་དེའང་གཟེངས་བསྟོད་པ་དང་། ཤིན་ཏུ་དགའ་བར་བྱེད་དེ། དེ་ལྟར་ན། བྱང་ཆུབ་སེམས་དཔའ་ལེན་པའི་ཐབས་མཁས་པ་ཡིན་ནོ། ། 8. བྱང་ཆུབ་སེམས་དཔའ་གནས་ནས་གནས་སུ་སློང་བའི་ཐབས་མཁས་པ་ནི། འདི་ལ་བྱང་ཆུབ་སེམས་དཔའ་སེམས་ཅན་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ལྕོགས་ཤིང་ནུས་པ་ཞིག་ལ། དེའང་ཉན་ཐོས་དང་། རང་སངས་རྒྱས་ཀྱི་ཐེག་པ་ཐོབ་པར་རྩོལ་ཞིང་འབད་དེ་བརྩོན་འགྲུས་རྩོམ་པ་མཐོང་ན། དེ་གནས་དེ་ནས་བསླང་སྟེ་ཐ་ན་འཁོར་དབྱེ་བའང་བྱས་ནས་ཐེག་པ་ཆེན་པོ་ལ་འཇོག་སྟེ། དེ་ལྟར་ན། བྱང་ཆུབ་སེམས་དཔའ་གནས་ནས་གནས་སུ་སློབ་བའི་ཐབས་མཁས་པ་ཡིན་ནོ། ། 9. བྱང་ཆུབ་སེམས་དཔའ་ཡང་དག་པར་འཛིན་དུ་འཇུག་པ་དང་། གཟེངས་བསྟོད་པ་དང་། ཤིན་ཏུ་དགའ་བར་བྱེད་པའི་ཐབས་མཁས་པ་ནི། འདི་ལ་བྱང་ཆུབ་སེམས་དཔའ་བྱང་ཆུབ་ཀྱི་སེམས་མ་བསྐྱེད་པའི་སེམས་ཅན་རྣམས་བྱང་ཆུབ་ཀྱི་སེམས་བསྐྱེད་དུ་འཇུག བྱང་ཆུབ་སེམས་བསྐྱེད་པའི་སེམས་ཅན་ལེ་ལོ་ཅན་བརྩོན་འགྲུས་ཆུང་བ། ཚུལ་ཁྲིམས་ཙམ་གྱིས་ཆོག་པར་འཛིན་པ་དག་ནི། བརྩོན་འགྲུས་ལ་འཇོག སེམས་ཅན་གང་རྣམས་བསླབ་པ་ཀུན་སྤྱོད་པ་ཕྲ་མོ་ལས་འགལ་བ་དག་དེའི་རྒྱུ། དེའི་རྐྱེན། དེའི་གཞིས་སེམས་ཅན་ཀུན་ཁེབས་ཤིང་འཁོད་དེ། དགའ་མགུ་རངས་པའང་མི་རྙེད་པ་དེ་དག་ལ་དེ་ཅི་ནས་ཀྱང་གནས་དེ་ནས་ལྡང་བ་དེ་ལྟ་དེ་ལྟ་བུར་ཆོས་སྟོན་པར་བྱེད་དེ། དེ་ལྟར་ན། བྱང་ཆུབ་སེམས་དཔའ་ཡང་དག་པར་འཛིན་དུ་འཇུག་པ་དང་། གཟེངས་བསྟོད་པ་དང་། ཤིན་ཏུ་དགའ་བར་བྱེད་པའི་ཐབས་མཁས་པ་ཡིན་ནོ། ། 10 .བྱང་ཆུབ་སེམས་དཔའ་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བྱ་བའི་ཐབས་མཁས་པ་ནི། འདི་ལ་བྱང་ཆུབ་སེམས་དཔའ་རབ་ཏུ་བྱུང་བར་འགྱུར་ཏེ། རྙེད་པ་ཆུང་ཡང་ཆོས་རྙེད་པས་ཆོག་པར་འཛིན་པ་ཡིན། དེ་གཅིག་པུ་ལྐོག་ཏུ་སོང་སྟེ་རབ་ཏུ་དབེན་པར་གནས་ནས་དེ་འདི་ལྟར་སེམས་ཏེ། མ་ལ་བདག་གིས་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བྱ་བ་བསམ་མོ་སྙམ་ནས་དེ་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བྱ་བ་རྣམ་པ་སྣ་ཚོགས་སེམས་ཏེ། དེ་ལྟར་དེའི་སེམས་ཕ་རོལ་ཏུ་ཕྱིན་པ་དྲུག་སྒོམ་པ་ཡོངས་སུ་རྫོགས་པར་འགྱུར་རོ། ། ཇི་ལྟར་ཕ་རོལ་ཏུ་ཕྱིན་པ་དྲུག་སྒོམ་པ་ཡོངས་སུ་རྫོགས་པར་འགྱུར་ཞེ་ན། དེ་ལ་གང་མཆོད་པ་དང་། རིམ་གྲོ་བྱ་བ་མངོན་པར་བྱེད་པ་འདི་ནི། དེའི་སྦྱིན་པའི་ཕ་རོལ་ཏུ་ཕྱིན་པའོ། ། མཆོད་པ་དང་། རིམ་གྲོ་བྱ་བ་དེ་ལ་གང་སེམས་ཅན་ཐམས་ཅད་ལ་དམིགས་པའི་སེམས་སྐྱེ་བ་འདི་ནི། དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། ། མཆོད་པ་དང་། རིམ་གྲོ་བྱ་བ་དེ་དག་ལ་གང་སེམས་མངོན་པར་མོས་ཤིང་ཤིན་ཏུ་དགའ་བ་འདི་ནི། དེའི་བཟོད་པའི་ཕ་རོལ་ཏུ་ཕྱིན་པའོ། ། མཆོད་པ་དང་། རིམ་གྲོ་བྱ་བ་དེ་ལ་གང་སེམས་ཅན་ཐམས་ཅད་ལ་དམིགས་པའི་སེམས་སྐྱེ་བ་འདི་ནི། དེའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། ། མཆོད་པ་དང་། རིམ་གྲོ་བྱ་བ་དེ་ཉིད་ལ་གང་ཉེ་བར་རྟོག་པ་འདི་ནི། དེའི་བསམ་གཏན་གྱི་ཕ་རོལ་ཏུ་ཕྱིན་པའོ། ། མཆོད་པ་དང་། རིམ་གྲོ་བྱ་བ་དེ་དག་ཉིད་ལ་གང་སྣ་ཚོགས་པ་འདི་ནི། དེའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། བྱང་ཆུབ་སེམས་དཔའ་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བྱ་བའི་ཐབས་མཁས་པ་ཡིན་ནོ། ། ཆོས་བཅུ་པོ་དེ་དག་དང་ལྡན་ན། བྱང་ཆུབ་སེམས་དཔའ་ཐབས་མཁས་པ་རྣམས་ཡིན་ནོ། །
Tibetan Source	《མདོ་ཚ་པ་》ཤ་43ན་7ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number