9232

Tibetan	བྱང་ཆུབ་ཏུ་ཞུམ་པ་མེད་པའི་སེམས་བསྐྱེད་པ་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་ཏུ་ཞུམ་པ་མེད་པའི་སེམས་བསྐྱེད་པ་བཅུ་སྟེ། 1. འདི་ལ་བྱང་ཆུབ་སེམས་དཔས་འདི་ལྟར་བདུད་དང་བདུད་ཀྱི་རིས་ཀྱི་ལྷ་ཐམས་ཅད་རབ་ཏུ་ཕམ་པར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ། 2. མུ་སྟེགས་ཅན་གཞན་དང་། ཕས་ཀྱི་རྒོལ་བ་ཐམས་ཅད་ཆོས་དང་མཐུན་པར་ཚར་གཅད་དོ་སྙམ་སྟེ། ཞུམ་པ་མེད་པའི་སེམས་བསྐྱེད་པ། 3. ལེགས་པར་བཤད་པས་སེམས་ཅན་གྱི་ཁམས་ཐམས་ཅད་ཚིམ་པར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ། 4. ཆོས་ཀྱི་དབྱིངས་ཡོངས་སུ་རྫོགས་པར་བྱ་བ་ཐམས་ཅད་ཡོངས་སུ་རྫོགས་པར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ། 5. འགྲོ་བ་ཐམས་ཅད་ཀྱི་བསོད་ནམས་ཀྱི་ཕུང་པོ་ཡོངས་སུ་རྫོགས་པར་བྱའོ། ། ཡང་དག་པར་བསྡུ་བར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ། 6. གཏེར་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩམས་པ་ཆེན་པོ་དང་། བྱང་ཆུབ་སེམས་དཔའི་སྤྱོད་པ་རྫོགས་པར་དཀའ་བ་ཡོངས་སུ་རྫོགས་པར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ། 7. སེམས་ཅན་གྱི་ཁམས་ཐམས་ཅད་བླ་ན་མེད་པའི་ཡོངས་སུ་སྨིན་པར་བྱ་བ་དང་། བླ་ན་མེད་པའི་གདུལ་བས་ཡོངས་སུ་སྨིན་པར་བྱའོ། ། གདུལ་བར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ། 8. འཇིག་རྟེན་གྱི་ཁམས་ཐམས་ཅད་ཁ་དོག་དུ་མ་དང་། ཁ་དོག་སྣ་ཚོགས་དང་། བརྒྱ་སྟོང་དུ་མ་ལས་འདས་པའི་ཁ་དོག་ཏུ་མོས་པས་བསྒྱུར་ལ། བྱང་ཆུབ་མངོན་པར་འཚང་རྒྱ་བར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ། 9. གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་པ་དང་། བདག་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། གང་ལ་ལ་ཞིག་གིས་བདག་གི་ལུས་ལ་དམིགས་ཏེ། ལག་པ་དང་། རྐང་པ་དང་། རྣ་བ་དང་། སྣ་དང་། ཤ་དང་། ཁྲག་དང་། རུས་པ་དང་། རྐང་དང་། བུ་དང་། བུ་མོ་དང་། ཆུང་མ་དང་། གླང་པོ་དང་། རྟ་དང་། རྒྱལ་སྲིད་དང་། གཡོག་འཁོར་ཐམས་ཅད་སློང་བ་ཞིག་བྱུང་ན་དེ་ལ་བདག་གིས་ཐམས་ཅད་ཡོངས་སུ་བཏང་བར་བྱ་སྟེ། སེམས་ཅན་ཐམས་ཅད་ལོ་ཡོངས་སུ་སྐྱོ་བ་དང་ལྡན་པའི་སེམས་གཅིག་ཀྱང་མི་བསྐྱེད་དོ། ། སེམས་ཅན་ཐམས་ཅད་ལ་ཕན་པ་དང་། བདེ་བའི་ཕྱིར། རྣམ་པར་སྨིན་པ་ལ་རེ་བ་མེད་ཅིང་། སྙིང་རྗེ་ཆེན་པོ་སྔོན་དུ་འགྲོ་བ་དང་། བྱམས་པ་ཆེན་པོའི་མཐས་གཏུགས་པའི་སེམས་བསྐྱེད་པས། ལུས་ཐམས་ཅད་ཀྱང་ཡོངས་སུ་གཏང་སྙམ་སྟེ། ཞུམ་པ་མེད་པའི་སེམས་བསྐྱེད་པ། 10 .གཞན་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། དུས་གསུམ་གྱི་སངས་རྒྱས་ཐམས་ཅད་དང་། སངས་རྒྱས་ཀྱི་ཆོས་ཐམས་ཅད་དང་། སེམས་ཅན་ཐམས་ཅད་དང་། ཞིང་ཐམས་ཅད་དང་། འགྲོ་བ་ཐམས་ཅད་དང་། དུས་ཐམས་ཅད་དང་། ནམ་མཁའི་ཁམས་ཐམས་ཅད་དང་། སྤྱོད་པར་བརྟགས་པའི་ཁམས་ཐམས་ཅད་དང་། མྱ་ངན་ལས་འདས་པའི་ཁམས་ཞི་བ་གང་ཇི་སྙེད་པ་ཐམས་ཅད་དང་། ཆོས་ཐ་དད་པ་དེ་དག་ཐམས་ཅད་སེམས་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཤེས་པར་བྱ། རྟོགས་པར་བྱ། མངོན་པར་རྫོགས་པར་འཚང་རྒྱ་བར་བྱ། བལྟ་བར་བྱ། ཁོང་དུ་ཆུད་པར་བྱ། བསྒོམ་པར་བྱ། རྣམ་པར་བསྒོམ་པར་བྱ། མངོན་པར་ཤེས་པར་བྱ། ཡོངས་སུ་ཤེས་པར་བྱ། རབ་ཏུ་སྤང་བར་བྱ། མངོན་དུ་བྱ་སྟེ། དེ་དག་ཐམས་ཅད་ལ་མ་བརྟགས། རྣམ་པར་མ་བརྟགས། སྣ་ཚོགས་སུ་མ་བྱས། རྣམ་པ་ཐ་དད་དུ་མ་བྱས། ཆེད་དུ་བབསྐྱོད་པར་མ་བྱས། དམིགས་པར་མ་བྱས། བསྒོམ་པར་མི་བྱས། རྣམ་པར་བསྒོམ་པར་མ་བྱས། གཅིག་ཏུ་མ་བྱས། གཉིས་སུ་མ་བྱས་པའི་ཡེ་ཤེས་མི་གཉིས་པ་གཉིས་པོ་ཐམས་ཅད་རབ་ཏུ་ཤེས་པ་དང་། མཚན་ཉིད་མེད་པའི་ཡེ་ཤེས་མཚན་ཉིད་ཐམས་ཅད་རབ་ཏུ་ཤེས་པ་དང་། རྟོག་པ་མེད་པའི་ཡེ་ཤེས་རྟོག་པ་ཐམས་ཅད་རབ་ཏུ་ཤེས་པ་དང་། སྣ་ཚོགས་སུ་གྱུར་པ་མེད་པའི་ཡེ་ཤེས་སྣ་ཚོགས་ཐམས་ཅད་རབ་ཏུ་ཤེས་པ་དང་། རྣམ་པ་ཐ་དད་པར་གྱུར་པ་མེད་པའི་ཡེ་ཤེས་རྣམ་པ་ཐ་དད་པ་ཐམས་ཅད་རབ་ཏུ་ཤེས་པ་དང་། འཇིག་རྟེན་དུ་གྱུར་པ་མེད་པའི་ཡེ་ཤེས་འཇིག་རྟེན་ཐམས་ཅད་རབ་ཏུ་ཤེས་པ་དང་། འཇིག་རྟེན་གྱི་ཁམས་སུ་ཕྱིན་པ་མེད་པའི་ཡེ་ཤེས་འཇིག་རྟེན་གྱི་ཁམས་ཐམས་ཅད་དུ་རབ་ཏུ་ཤེས་པ་དང་། དུས་སུ་གྱུར་པ་མེད་པའི་ཡེ་ཤེས་དུས་ཐམས་ཅད་རབ་ཏུ་ཤེས་པ་དང་། སེམས་ཅན་གྱི་སར་གྱུར་པ་མེད་པའི་ཡེ་ཤེས་སེམས་ཅན་གྱི་ཁམས་ཐམས་ཅད་རབ་ཏུ་ཤེས་པ་དང་། མངོན་པར་ཤེས་པ་ཐམས་ཅད་ལས་གྱེན་དུ་འཕགས་པའི་ཡེ་ཤེས་མངོན་པར་ཆགས་པའི་སྤྱོད་ཡུལ་གྱི་མཐར་ཐུག་པ་དང་། གནས་མེད་པ་ལ་གཞོལ་བའི་ཡེ་ཤེས་གནས་ཐམས་ཅད་རབ་ཏུ་ཤེས་པ་དང་། ཀུན་ནས་ཉོན་མོངས་པ་མེད་པའི་ཡེ་ཤེས་ཀུན་ནས་ཉོན་མོངས་པ་ཐམས་ཅད་རབ་ཏུ་ཤེས་པ་དང་། མི་ཟད་པའི་མཐོར་ཕྱིན་པའི་ཡེ་ཤེས་ཟད་པ་ཐམས་ཅད་རབ་ཏུ་ཤེས་པ་དང་། ཆོས་ཀྱི་དབྱིངས་ལ་གཞོལ་བའི་ཡེ་ཤེས་འཇིག་རྟེན་གྱི་ཁམས་ཐམས་ཅད་དུ་ལུས་ཡོངས་སུ་སྟོན་པ་དང་། བརྗོད་པ་དང་། ཚིག་དང་། སྒྲ་དང་། དབྱངས་དང་བྲལ་བའི་ཡེ་ཤེས་སྒྲ་དབྱངས་བརྗོད་དུ་མེད་པ་རབ་ཏུ་བརྗོད་པ་དང་། རང་བཞིན་མེད་པའི་ཡེ་ཤེས་རབ་ཞིན་མེད་པ་རབ་ཏུ་རྟོགས་པ་དང་། སྤྱོད་ཡུལ་གཅིག་ལ་ཞུགས་པའི་ཡེ་ཤེས་སྤྱོད་ཡུལ་ཐ་དད་པ་ཡོངས་སུ་སྟོན་པས་བརྗོད་པ་ཆེན་པོའི་བྱིན་གྱི་རླབས་ཡང་དག་པར་བསྟན་པའི་ཕྱིར། བརྗོད་དུ་མེད་པའི་ཆོས་ཐམས་ཅད་མངོན་པར་རྫོགས་པར་འཚང་རྒྱ་བར་བྱའོ། ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་ཐམས་ཅད་མཁྱེན་པ་ཉིད་ཀྱིས་ཆེན་པོ་མངོན་པར་རྫོགས་པར་འཚང་རྒྱ་བར་བྱའོ། ཆོ་འཕྲུལ་ཆེན་པོ་དང་། རྣམ་པར་འཕྲུལ་བའི་ཆོ་འཕྲུལ་ཡང་འགྲོ་བ་ཐམས་ཅད་དུ་བསྟན་པར་བྱའོ་སྙམ་པ་འདི་ནི། ཞུམ་པ་མེད་པའི་སེམས་བསྐྱེད་པ་བཅུ་པའོ། ། བཅུ་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་ཞུམ་པ་མེད་པའི་སེམས་བསྐྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ལ་ཞུམ་པ་མེད་པ་བླ་ན་མེད་པ་འཐོབ་པར་འགྱུར་བ་དག་གོ །
Tibetan Source	《ཕལ་ཆེན་ང་པ་》ཤ་249ན་7ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number