13059

སྭསྟི་ཀ

Tibetan Definition

(ལེགས་སྦྱར) 1 བདེ་ལེགས་ཅན། བཀྲ་ཤིས་ལྡན་པའི་དོན། མངོན་བརྗོད་འཆི་མེད་མཛོད་ཀྱི་འགྲེལ་པ་འདོད་འཇོ་བ་མོ་ལས། སྭསྟི་ཀ། བདེ་ལེགས་ཅན་ནམ་བཀྲ་ཤིས་ལྡན་ནོ། །ཞེས་གསུངས་སོ། །2 རྟག་བརྟན་མི་འགྱུར་བ་མཚོན་བྱེད་ཀྱི་གཡས་སུ་འཁྱིལ་བའི་རིས་མོ་ཞིག རྒྱ་གར་སྐད་དུ་སྭསྟིཀ་ svastika ཟེར། དེང་སང་ཕྱི་རྒྱལ་བས་ swastika ཞེས་འབྲི་བར་བྱེད་དོ། །དེ་ཡང་ཕྱི་རྒྱལ་བའི་ཚིག་མཛོད་ནང་Sanskrit svastika, from svasti ‘well-being,’ from su ‘good’ + asti ‘being” ཞེས་བཤད་དོ། །3 དམག་ཆེན་གཉིས་པའི་སྐབས་ཀྱི་འཇར་མན་གྱི་མགོ་ཁྲིད་Adolf Hitler ཨེ་ཌོལཕ། ཧིཊ་ལར་གྱི་ལས་རྟགས་ཤིག ཧིཊ་ལར་གྱིས་དམག་ཆེན་གཉིས་པའི་སྐབས་འཇུའུ་མི་རིགས་ས་ཡ་མང་པོ་སྡེབ་གསོད་བཏང་བས། འཛམ་གླིང་སྤྱི་དང་ལྷག་པར་ནུབ་ཕྱོགས་པའི་མི་རིགས་རྣམས་ཀྱིས་རྟགས་འདི་ལ་མི་དགའ་བ་ཆེན་པོ་བྱེད་པས། གཡུང་དྲུང་གི་ལས་རྟགས་འཁོད་པའི་ཚོང་རྫས་ཅི་འདྲ་ཞིག་ཡིན་ཀྱང་སུས་ཀྱང་ཉོ་ཚོང་མི་བྱེད་ཅིང་མི་བྲིན་པས། འདི་ལ་ཡིད་གཟབ་བྱ་དགོས། ཞིབ་ཏུ་བརྟགས་ན་ཧིཊལར་གྱི་ལས་རྟགས་དང་། རྒྱ་གར་དང་བོད་ཀྱི་གཡུང་དྲུང་གི་རི་མོ་གཉིས་མི་འདྲ་སྟེ། ཧིཊལར་གྱི་དེ་གཡོན་འཁྱིལ་ལམ་གཡོན་སྐོར་དང་། བོད་དང་རྒྱ་གར་གྱི་དེ་གཡས་འཁྱིལ་ལམ་གཡས་སྐོར་ཡིན་པའི་ཁྱད་པར་ཡོད་དོ། །