From Rangjung Yeshe Wiki - Dharma Dictionary
Jump to navigation
Jump to search
| པདྨ་རཱ་ག
|
| Tibetan Definition
|
(ལེགས་སྦྱར) པདྨའི་མདོག་ཅན། རིན་ཆེན་དམར་པོ་ཡང་ཟེར་ཏེ། རིན་ཐང་ཆེ་བའི་རྡོ་རིགས་དམར་པོ་ཞིག སྒྲོལ་བསྟོད་འཕགས་སྒྲོལ་མ་ལས། པདྨ་རཱ་གའི་མདངས་ལྡན་འོད་དཔག་མེད། །མཉམ་གཞག་བདུད་རྩིས་གང་བའི་ལྷུང་བཟེད་བསྣམས། །འཆི་མེད་དངོས་གྲུབ་སྩོལ་བས་སྤྱི་བོར་བརྒྱན། །བདག་གི་འཆི་བདག་འཇོམས་པ་ཁྱོད་ལ་འདུད། །ཅེས་གསུངས་པ་ལྟར་རོ། །ཕྱི་རྒྱལ་བས་འདི་ལ་ Ruby རུ་བྷི་ཟེར། འདི་ལ་ལོ་རྒྱུས་སྙན་པོ་ཞིག་མར་ཀོ་པོ་ལོའིMarco Polo ལམ་ཡིག་༢༨༢ནང་གསལ་བ་འདི་ལྟར། ཤྲཱི་ལངྐའི་ Sri Lanka (Ceylon) གླིང་ཕྲན་འདི་ནི་མཛེས་སྡུག་ལྡན་པའི་པདྨ་རཱ་གའི་འབྱུང་ཁུངས་ཤིག་ཡིན་ལ། འཛམ་གླིང་གི་ས་གནས་གང་དུའང་མི་རྙེད་པའི་པདྨ་རཱ་ག་འདི་རུ་རྙེད་ཀྱི་ཡོད། གཞན་ཡང་ཨིནྡྲ་ནཱི་ལ་ Sapphire དང༌། སྤྲིན་རྡོ་ topazes ཞེས་པའི་རིན་པོ་ཆེ་དང༌། སྔོ་དམར་རམ་ལི་ཝང་གི་མདོག་ཅན་གྱི་ཕྱི་གསལ་ནང་གསལ་གྱི་རིན་པོ་ཆེའི་རྡོ་རིགས་ amethysts ཞེས་པ་དང༌། པད་རག་བརྫུས་མ་ garnets ཞེས་པ་སོགས་རིན་པོ་ཆེའི་རྡོ་རིགས་མང་པོ་རྙེད་ཀྱི་ཡོད། ཡུལ་དེའི་རྒྱལ་པོར་སྔོན་སུས་ཀྱང་མཐོང་མ་མྱོང་བའི་ངོ་མཚར་ཅན་གྱི་པདྨ་རཱ་ག་རིན་ཐུང་འདོམ་གང་ཙམ་ལ། སྦོམ་ཚད་མིའི་དཔུང་པ་ཙམ་པ། ཡོན་ཏན་བརྗོད་དུ་མེད་ཅིང༌། སྐྱོན་གྱི་ཆ་སྤུ་ཙམ་ཡང་མེད་པ་ཞིག་ཡོད་ལ། མཚན་མོ་དེ་ལ་མེ་འབར་བའི་མདངས་ཡང་ཡོད་ཅིང༌། འདིའི་རིན་ཐང་དངུལ་ཐོག་རྩ་བ་ནས་དབབ་ཏུ་མེད་པ་ཞིག་ཡོད་པ་རེད། སོག་པོའི་རྒྱལ་པོ་ཀུབ་ལའི་ཁཱན་ Kublai Khan (ཀུབ་ལའི་ཁཱན་ཞེས་པ་རྒྱ་ནག་དབང་སྒྱུར་བྱེད་མཁན་གྱི་སོག་པོའི་རྒྱལ་པོ་ཞིག འགྲོ་མགོན་ཆོས་རྒྱལ་འཕགས་པའི་མཆོད་ཡོན་སྦྱིན་བདག་དང་ཕྱིས་སློབ་མར་གྱུར་ནས་ནང་པར་ཞུགས། བོད་ཀྱི་ལོ་རྒྱུས་རྣམས་སུ་སེ་ཆེན་རྒྱལ་པོ་ཞེས་འབོད་པ་དེའོ) གྱིས་འདིའི་སྙན་པ་ཐོས་ནས་དེ་བདག་གིར་བྱེད་འདོད་ཀྱི་བརྣབ་སེམས་སྐྱེས་ཏེ། ཁོ་རང་གི་སྐུ་ཚབ་ཅིག་བརྫངས་ནས་པདྨ་རཱ་ག་འདི་ང་ལ་བཙོངས་ན་དེའི་རིན་འབབ་ཏུ་ངས་ཁྱེད་ལ་གྲོང་ཁྱེར་ཞིག་སྤྲད་ཆོག་ཅེས་སྤྲིངས་ཡིག་བསྐུར་བའི་ལན་དུ། རྒྱལ་པོས་འཇིག་རྟེན་གྱི་ཁམས་ཀྱི་རིན་པོ་ཆེ་ཡོངས་རྫོགས་ང་ལ་སྟེར་ནའང་ངས་མི་བཙོང༌། འདི་ཕ་མེས་ཀྱི་རྒྱལ་རབས་མང་པོ་ནས་བརྒྱུད་པའི་རིན་པོ་ཆེ་ཞིག་ཡིན་སྟབས་རང་གི་རྒྱལ་ཁབ་ཀྱི་ཕྱི་རོལ་ཏུ་ནམ་ཡང་གཏོང་གི་མ་རེད་ཅེས་ལན་འདེབས་བྱས་ཏེ། པདྨ་རཱ་ག་འདི་ཀུབ་ལའི་ཁཱན་ལ་བདག་གིར་བྱེད་རྒྱུ་མ་བྱུང་བ་རེད་ཅེས་ལོ་རྒྱུས་རྣམས་སུ་གསལ། ཡང Camillus Learardus ཞེས་པའི་བརྗོད་གསལ། འདིས་ནད་རིགས་སེལ། བསམ་ངན་དང་འདོད་རྔམ་ཞི། དུས་མིན་གྱི་འཆི་བ་འགོག་ཅིང༌། མི་མཐུན་པ་འདུམ་པར་བྱེད་པར་བཤད། འདིའི་ཐོག་མའི་ཐོན་སྐྱེད་འབྱུང་ཁུངས་ནི། ཤྲཱི་ལངྐ་ Sri Lanka (Ceylon) ཡིན། འདིའི་གཏེར་ཁ་སྔོག་འདོན་རཏྣ་པ་པཱུ་ར་Ratnapura ཞེས་པའི་ཉེ་འགྲམ་དུ་བདག་ཅག་གི་སྟོན་པ་ཞལ་བཞུགས་དུས་ནས་འགོ་ཚུགས་པའི་ཚོད་དཔག་བྱེད། འཛམ་གླིང་གི་པདྨ་རཱ་ག་སྙན་གྲགས་ཆེ་ཤོས་ནི་བྷར་མའི་Burma རྒྱལ་ཁབ་ཀྱི་གྲོང་ལྗོངས་ Mogok ནས་འཐོན་གྱི་ཡོད་པར་ཡང་བཤད། ཡང་མར་ཀོ་པོ་ལོའིMarco Polo ལམ་ཡིག་༢༩༧ལེའུ་༡༩པའི་ནང་རྡོ་རྗེ་ཕ་ལམ་གྱི་ལོ་རྒྱུས་སྙན་པོ་ཞིག་ཀྱང་ཡོད་པས་གཟིགས་པར་ཞུ།
|