From Rangjung Yeshe Wiki - Dharma Dictionary
Jump to navigation
Jump to search
| བོད་ཡིག་དཔེ་མཛད་སའི་རྒྱ་གར་གྱི་ཡི་གེ
|
| Tibetan Definition
|
འདི་ལ་བཤད་སྲོལ་མི་འདྲ་བ་མང་དུ་ཡོད་ཀྱང་། མཁས་དབང་དགེ་འདུན་ཆོས་འཕེལ་གྱིས་གསུངས་པ་ལྟར། སློབ་དཔོན་ཐུ་མིས་རྒྱ་གར་གྱི་གུཔྟའི་ཡི་གེ་ལ་(གུཔྟའི་ཡི་གེ་ལ་རིགས་མི་འདྲ་བ་འགའ་ཤས་ཡོད་འདུག་ཅིང་། ཞྭ་སྒབ་པའི་རྒྱལ་རབས་ནང་གུཔྟའི་ཡི་གེ་ལ་“ཤ་ར་ད་sharada” ཟེར་བ་དེར་དཔེ་བྱས་ཚུལ་འཁོད་འདུག་ཀྱང་། འདི་ནི་དུས་རབས་བདུན་པའི་མཇུག་ཙམ་བྱུང་བར་གསུང་མཁན་ཡང་འདུག་པས་དཔྱད་དོ) དཔེ་མཛད་ནས་བོད་ཡིག་གསར་གཏོད་བྱས་པར་བཞེད་པ་ལྟར་ཡིན་ནོ། །དེབ་ཐེར་དཀར་པོ་༩༠ལས། དེ་ཡང་རྗེ་བུ་སྟོན་སོགས་ཀྱིས། ན་ག་རའི་ཡི་གེ་ལ་དཔེ་བྱས་ནས་ཐུ་མིས་མཛད་པར་བཞེད། རཉྫ་མདོག་ལྡན་བྱ་བ་ཟུར་ཆག་པའི་ལཉྫ་དང་ཝརྟུ་འཁྱིལ་བ་གཉིས་ལ་དཔེ་མཛད་ནས་དབུ་ཅན་དང་དབུ་མེད་མཛད་དོ་ཞེས་མཁས་པ་གཞན་དག་གིས་གསུངས། བོན་རྣམས་ཀྱི་ལྟར་ན། སྲོང་བཙན་གྱི་གོང་དུ་བོན་ཆོས་དེ་ཙམ་དར་བས་ཡི་གེ་མེད་ཟེར་བ་མི་བདེན་ཞིང་། དེ་ཡང་སྟག་གཟིག་གི་སྤུངས་ཡིག་བྱ་བ་ཞང་ཞུང་གི་ཡིག་རྒན་དུ་འགྱུར། དེ་སྨན་བྲག་ཏུ་འགྱུར། དེ་རིམ་གྱིས་དབུ་ཅན་དང་འབྲུ་མར་འགྱུར་སོགས་ཟེར། གང་ལྟར་ཡང་ཐུ་མི་དེ་རྒྱ་གར་ན་གུཔྟའི་རྒྱལ་རྒྱུད་དག་གིས་སྲིང་སྐྱོང་བའི་སྐབས་སུ་བྱོན་པ་ཡིན་ཞིང་། ཤིན་ཏུ་ངོ་མཚར་བ་ནི། ཐུ་མི་དང་དུས་མཉམ་པའི་རྒྱ་གར་གྱི་རྒྱལ་པོ་ཧརྵ་དང་། ཀུ་མར་གུཔྟ། (གཞོན་ནུ་སྦས་པ) སུརྱ་ཝརྨན། (ཉི་མའི་གོ་ཆ) སོགས་ཀྱི་དུས་སུ་བྱུང་བའི་ཟངས་ཀྱི་གླེགས་བུ་ལ་སོགས་པ་ད་ལྟའི་བར་རྒྱ་གར་གྱི་ཡུལ་སོ་སོར་ཡོད་པ་དག་ལ། ཡི་གེ་བཀོད་པ་རྣམས་བོད་ཡིག་དང་ཧ་ཅང་འདྲ་ཆེ་ཞིང་། ཅུང་ཟད་རྒྱང་ནས་བལྟས་ཚེ་ལག་མི་བདེ་བ་ཞིག་གིས་བོད་ཡིག་བྲིས་སམ་སྙམ་པ་འཆར། ཡིག་འབྲུ་ཕལ་ཆེར་མ་བསླབ་ཀྱང་ཐོར་རེ་བ་ཞིག་ཀློག་ཐུབ་པར་འདུག ཞེས་དང་། ཡང་དེ་ཉིད་ལས། དེས་ན་བོད་ཡིག་གང་ལ་དཔེར་བཅད་པའི་ཕྱི་མོ་དེ་ཡང་གུཔྟའི་ཡི་གེ་འདི་ཡིན་ནམ་སྙམ། དེར་མ་ཟད་རྙིང་མའི་གཏེར་ཡིག་གི་གྲས་ཀྱི་བརྡ་ཡིག་དེ་དག་ཀྱང་གུཔྟའི་ཡི་གེ་ལ་ཤིན་ཏུ་འདྲ་བ་མང་། གཞན་ཡང་ཞིབ་ཏུ་བརྟག་ཚེ། དབུ་ཅན་དབུ་མེད་གཉིས་ཀྱང་ཐོག་མ་ཞིག་ནས་མཉམ་དུ་མཛད་པ་མིན་པར། དབུ་ཅན་འདི་ཀ་རང་མགྱོགས་པར་བྲིས་པ་ལས་དབུ་མེད་རང་བཞིན་གྱིས་བྱུང་བ་ལྟར་མངོན་ཏེ། སྔོན་གྱི་ཡིག་རྙིང་མང་པོ་དང་། ད་ལྟ་ཡང་འབྲུག་ཡུལ་ན་དར་སྲོལ་ཆེ་བའི་ལྷོ་ཡིག་ཏུ་གྲགས་པའི་གཟུགས་རྣམས་ལ་བལྟས་ན། དབུ་ཅན་དབུ་མེད་དུ་འགྱུར་ཚུལ་མངོན་སུམ་དུ་མཐོང་བ་ལྟར་འདུག་སྟེ། ཞེས་སོགས་དཔེ་མཚོན་དང་བཅས་པ་རྒྱས་པར་གསུངས་སོ། །
|