From Rangjung Yeshe Wiki - Dharma Dictionary
Jump to navigation
Jump to search
| མ་ཅིག་ལབ་སྒྲོན
|
| Tibetan Definition
|
གཅོད་ཀྱི་གདམས་པའི་མཛོད་འཛིན་བོད་ཀྱི་གྲུབ་ཐོབ་མ་གྲགས་ཅན་མ་ཅིག་ལབ་ཀྱི་སྒྲོན་མ་ནི། རྨ་ལོ་ཙཱ་བ་དགུང་ལོ་བཅུ་དགུ་བཞེས་ཤིང་ཇོ་བོ་རྗེ་དཔལ་ལྡན་ཨ་ཏི་ཤ་སྙེ་ཐང་དུ་སྐུ་གཤེགས་ནས་ལོ་ལྔ་སོང་བ་ན་མ་ཅིག་འདི་འཁྲུངས། རྣལ་འབྱོར་མ་དེ་ཉིད་ནི། བཅོམ་ལྡན་འདས་ཀྱིས་འཇམ་དཔལ་རྩ་རྒྱུད་སོགས་ནས་ལུང་བསྟན་ཅིང༌། ཡེ་ཤེས་ཀྱི་མཁའ་འགྲོ་མ་མི་མོའི་གཟུགས་སུ་བྱོན་པ་སྟེ། སྐུ་ལུས་ལ་སྤྱིར་པདྨ་ཅན་གྱི་མཚན་རྣམས་དང༌། བྱེ་བྲག་ཏུ་ལྟེ་བ་ན་པདྨ་དམར་པོ་རྩ་བ་གསུམ་པ། ནུ་མ་གཉིས་ཀྱི་བར་ན་རིན་པོ་ཆེའི་ཕྲེང་བ་གསུམ་སྐོར་དུ་ཡོད་པས་ལྟེ་བར་སླེབས་པ། ཕྲག་སོ་གཉིས་ལ་གཡུང་དྲུང་རིས་རེ། རྣ་བ་གཉིས་ཀྱི་རྒྱབ་ན་དུང་པདྨ་ལྟར་འཁྱིལ་བ་རེ། ལྕེའི་འོག་ན་རལ་གྲི་ཨུཏྤལའི་མདོག་ཅན་ཏཱཾ་ཡིག་གིས་མཚན་པ། སྨིན་མཚམས་ན་ཉི་ཟླའི་རྒྱལ་མཚན་འཁོར་ལོ་ཏོག་དང་བཅས་པ་ཡོད་པ་ཞིག་གོ། མ་ཅིག་འདི་ལོ་བཅུ་བཞི་བཞེས་པའི་ཚེ། ཡུལ་དེའི་སྐྱེས་པ་ཨ་བ་ལྷ་རྒྱལ་བྱ་བ་ཞིག་ལ་བག་མར་བཏང་བས། ཁྱིམ་མ་འདོད་དེ། ཁྱོ་ལ། ཁྱོད་རང་ཡང་ཆོས་གྱིས་ང་ཡང་ཆོས་བྱེད་བྱས་པས་ཉན་དུ་མ་བཏུབ་པས་སྨྱོ་བརྫུ་མཛད་དེ། དེ་ནས་བྲལ། ལོ་བཅུ་བདུན་ནས་ཉི་ཤུ་རྩ་གཉིས་ཀྱི་བར་དུ་བླ་མ་རྨའི་ཕྱག་རྒྱ་མ་མཛད། རྨས་རྒྱུད་དང་སྒྲུབ་ཐབས་མང་པོའང་ཁོང་ལ་བསླབས། ནམ་ཞིག་ཚེ་ན་བླ་མ་རྨ་ཡི་དམ་ལ་དབང་ལེན་པའི་རིག་མ་མཛད་པའི་ཚེ། བདེ་ཆེན་གྱི་དཔའ་བོ་བཅུ་དྲུག་དང་ཞིང་སྐྱོང་གི་མཁའ་འགྲོ་མ་བཅུ་དྲུག་གི་ཞལ་མཐོང༌། རིག་མ་བརྒྱད་ཀའི་ཉམས་ཤར། བླ་མ་དང་རང་ཉིད་ཧེ་རུ་ཀ་ཡབ་ཡུམ་དུ་མཐོང༌། ཟླ་བ་བཅུ་དྲུག་ཏུ་ཐིག་ལེའི་ཉམས་འབར། དེ་ཕྱིན་ཆད་བླ་མ་དང་རང་ཉིད་ཐ་མལ་དུ་ནམ་ཡང་མ་མཐོང་གསུང༌། བླ་མའི་ཞལ་ནས་ལོ་བཞིར་མཚམས་ཆོད་ཅིག་གསུང་བ་བཞིན་བྱས་པས། རྨི་ལམ་དུ་སངས་རྒྱས་དང་བྱང་ཆུབ་སེམས་དཔའ་མང་པོའི་ཞལ་མཐོང༌། དེ་ནས་མཚམས་ཕྱེ་ལ་རི་ཁྲོད་དུ་སོང་ཞིག་གསུང་བ་བཞིན་བྱས་པས། བདུད་ཀྱི་བར་ཆད་ཐམས་ཅད་ཟིལ་གྱིས་གནོན། ཁྱད་པར་དུ་རྫོང་གོང་འོག་ལ་ཟླ་བ་བཞི་བཞི་བཞུགས་པའི་ཚེ་ཉི་ཟླ་འོག་ན་ནོན་པ། ལུས་གང་འདོད་དུ་སྤྲུལ་བསྒྱུར་ཤེས་པ། སེམས་ཅན་ཐམས་ཅད་ཀྱི་སྐད་གོ་བ། རླུང་གར་འདོད་དུ་འདྲོངས་པ་སྟེ། དངོས་གྲུབ་བཞི་ཐོབ། དེ་ནས་རྨ་ལོ་ཙཱ་བས་ཁྱུང་པོའི་ཐད་དུ་རབ་ཏུ་བྱུང་ནས། མ་ཅིག་གི་མིང་པོ་འཁོན་ཕུ་པ་ཉེ་གནས་སུ་ཁྲིད་དེ་ཤབ་ཏུ་བྱོན་ནས་ལོ་བཞི་བཅུ་རྩ་དྲུག་བཞེས་པའི་ཚེ་གཞན་གྱིས་དུག་དྲངས་པས་གྲོངས། དེའི་ཚེ་མ་ཅིག་གིས་ལོ་ཉི་ཤུ་རྩ་བརྒྱད་བཞེས། ཤབ་ཏུ་བྱོན་ནས་རྨའི་སྤུར་སྦྱོང་བ་སོགས་དགོངས་པ་རྫོགས་པའི་བྱ་བ་རྒྱ་ཆེར་མཛད། ལོ་གཅིག་ནས་བརྩམས་ནས་ལོ་གསུམ་གྱི་བར་དུ་བར་ཆད་དུ་གསལ་བ་བདུན་བྱུང་སྟེ་ཉིན་རེ་བཞིན་བྱང་ཆུབ་ཀྱི་སེམས་སྲན་མ་ཙམ་རེ་ཉམས་པ་དང༌། སྐུ་ལུས་ཤུ་བ་དང་འབྲུམ་བུས་ཁེངས་པ་དང༌། སྔར་གྱི་བདེ་བ་ཤོར་བ་དང༌། གཏོར་མ་བྱ་གཅན་གྱིས་མི་ཟ་བ་དང༌། སྦྱིན་སྲེག་གི་མེ་མི་འབར་བ་དང༌། ཐ་མལ་གྱི་ཆགས་པས་བརྒྱལ་བ་དང༌། མཁའ་འགྲོ་མ་རྣམས་ཀྱི་གསེབ་ཏུ་འགྲོ་མ་ནུས་པ་རྣམས་བྱུང༌། ཐབས་ལ་འདི་མ་བྱས་བྱ་བ་མེད་ཀྱང་མ་ཕན། མིང་པོ་རྗེ་འཁོན་ཕུ་བས་ཞབས་ཏོག་བྱས་ཏེ། དིང་རིར་ཕ་དམ་པ་སངས་རྒྱས་ཀྱི་དྲུང་དུ་ཕྱིན། དམ་པའི་ཞལ་ནས། ཨེ་རྣལ་འབྱོར་མ་ལོ་གསུམ་གྱི་གོང་ནས་བར་ཆད་བདུན་བྱུང་ནས་འདུག་པ་གསུང༌། དེ་ཁོ་ནར་ཞུར་མཆིས་པ་ལགས། ཞེས་ལན་ཞུས་པས། རྩ་བའི་བླ་མ་དང་དམ་ཚིག་ཉམས་འདུག་གསུང༌། བླ་མ་རྨ་ལགས་ཏེ། དམ་ཚིག་ཉམས་པར་མ་ཚོར་ཞུས་པས། བླ་མའི་བཀའ་མ་བྱུང་བར་གཞན་གྱི་ལས་རྒྱ་བྱས་འདུག་པ། དམ་ཚིག་ཉམས་པའི་ཟས་ཟོས་ནས་འདུག་པ། ཁས་བླངས་ཀྱི་དམ་བཅའ་ཉམས་ན་འདུག་པ། བླ་མའི་བཞུགས་སྟན་བཏིང་འདུག་པ། བླ་མ་ལ་དབང་ཡོན་མ་ཕུལ་བར་འདུག་པ། དམ་རྫས་མ་བསྟེན་པར་འདུག་པ་གསུང༌། ད་ཅི་ཕན་ཞུས་པས། ཐབས་ཡོད། ཆང་ཐོད་ཕོར་གང་དང༌། བུ་མོ་གཞོན་ནུ་མ་བདུན་དང༌། དེ་བཞིན་གཤེགས་པའི་སྐུ་གདུང་ཞིག་དང༌། རྒྱལ་པོའི་བཞུགས་སྟན་ཞིག་དང༌། རྩ་བའི་བླ་མའི་ཞབས་རྗེས་རྣམས་ཁྱེར་ལ་ཤོག་ཅིག་གསུངས་པས། རྗེ་འཁོན་ཕུ་བས་ཡུད་ཙམ་ཞིག་ལ་རྙེད་ནས་དམ་པའི་སྤྱན་སྔར་མཆིས་པས། རྒྱལ་པོའི་བཞུགས་སྟན་ང་ལ་ཕུལ་གསུང༌། བླ་མ་དང་མཉམ་པ་གསུམ་གྱི་ལས་རྒྱ་གྱིས། རྟེན་ལ་སྐོར་བ་གྱིས་ལ་ཁྱེད་རང་ཁྲུས། བུ་མོ་བདུན་ཞབས་རྗེས་ལ་ཕུལ། བྱ་མོ་ནག་མོའི་སྒོ་ང་མཚན་མར་བཅུག ལུག་ཤ་དང་ཆང་ལ་མཆོད་པ་གྱིས། དུས་ཀྱི་པཱ་ཛ་མ་བཅག དམ་རྫས་ཀྱི་རུ་མ་མ་བཅད་གསུང་ནས། ཤ་དེ་ལ་དཔོན་གཡོག་བཅུ་ལ་ཟ་ཚད་རེ། ཆང་ཐོད་ཕོར་གང་པོ་ལ་ཧུབ་སྐོར་བྱས་པས་འཐུང་ཚད་རེ་བྱུང་སྐད། དམ་པའི་ཞལ་ནས། ཁྱོད་ཀྱིས་ལྷ་སའི་གཙུག་ལག་ཁང་བརྩིགས་པ་དྲན་ནམ་གསུང་བ་ལ། ངས་མ་འཚལ་མི་ཤེས་མ་དྲན་ཞུས་པས། ཨེ་རྣལ་འབྱོར་མ་འདི་ང་ལ་རྫུན་ཟེར་བར་འདུག དེ་ཙུག་བྱ་དགོས་པ་དེ་ང་མིན་གསུང་ནས་ཕྱག་བརྒྱབ་པས་བརྒྱལ་སྐད། དེ་སངས་པ་དང་ཝལ་ལེ་བ་རེ་ཤེས་པར་བྱུང་བས། དམ་པའི་ཞལ་ནས། ཨེ་བདེན་གསུང༌། དེ་རྣམས་ཤིན་ཏུ་མད་པར་འདུག དེ་ལྟར་ཡིན་པ་ལ་བདག་རང་གིས་མི་དྲན་པ་ཅི་ལགས་ཞུས་པས། ཁྱོད་ཀྱིས་བླ་མ་ལ་དབང་ཞུས་ནས་དབང་ཡོན་མ་ཕུལ་བར་འདུག་པ་གསུང༌། བདག་གིས་ལུས་ལོངས་སྤྱོད་ཕུལ་བ་ལགས་ཞུས་པས། ཁྱོད་ཀྱི་རིན་དུ་ཕ་དང་མིང་པོ་གཉིས་ཀྱིས་ཁྲབ་དར་ལྗག་ཅན་དང་རྟ་ནག་གཅིག་བསྐྱུད་ནས་གདའ་བ་གསུང༌། བཀའ་བབས་ལགས་གསུང་བ་ཡིན་ཞུས་པ་ལ། ཁྱོད་ལ་བཀའ་བབས་ཡིན་ཀྱང་ཁོས་རིན་དུ་བཅུག་ནས་འདུག་པ་གསུང༌། ད་འོ་ན་ཇི་ལྟར་བགྱི་ཞུས་པ་ལ། རིགས་བརྒྱུད་ཚོགས་སོགས། གདུང་ལ་འབུལ་བ་གྱིས། ས་འབུམ་ལ་ཞལ་བ་གྱིས། མར་མེ་ཐོང་གསུང༌། དེ་ནས་ཁྱོད་ཀྱི་ཞབས་ཀྱི་སྒོ་ང་དེ་ཕྱུང་ལ་ང་ལ་ཐོང་ཞིག་གསུངས་པས། དེར་སྒོ་ང་བྱུང་ཙ་ན་ནག་ཧང་གིས་སོང་འདུག་པས། དེ་ཡང་ཕར་གསང་ནས་བཤོགས་དང་གསུང༌། བཤགས་པས་ནང་ནས་ཁྲག་ནག་ལྕིག་ལྕིག་པ་ཞིག་བྱུང་བས། དམ་པའི་ཞལ་ནས། ཁྱོད་ཀྱི་ཐིག་ལེ་དེ་ལོ་གསུམ་གྱི་གོང་ཟླ་བ་གསུམ་གྱི་མཚམས། ཉའི་རྒོངས་ཀས་མ་ཆལ་ཆིལ་ལ། སྔགས་པ་ནག་པོ་གནོད་སྦྱིན་བེ་བ་སྭ་ཏ་ལ་ཆོས་སྐྱོང་བྱེད་པ་ཞིག་གིས་ཁྱེར་ནས་འདུག་པས། ད་ངའི་རྟེན་འབྲེལ་འདིས་ཕན་ནས་འོང་ཞིག་གསུང༌། ད་དུང་ང་དང་ཕྲད་དུ་ཤོག་གསུང༌། དེར་བླ་མའི་རིགས་བརྒྱུད་ལ་ཚོགས་སོགས་གསུང་བས། ཕ་སྤུན་པོ་ཇོ་སྲས་དཀར་ཡུ་བྱ་བའི་བུ་རྨ་ཆུང་དགེ་བཤེས་ལ་གཡག་ཅིག་གིས་སྣ་དྲངས་པའི་འབུལ་བ་སྣ་བདུན་ཙམ་བྱས། གདུང་ལ་མར་མེ་བཙུགས། ཤབ་ཀྱི་འབུམ་པ་ལ་ཞལ་བ་བྱས། དཀོན་གཉེར་བཙུགས་པས། དེ་ནས་སྐུ་ཁམས་ཤིན་ཏུ་བཟང་བས་དམ་པ་དེ་དྲིན་ཆེ་བར་དགོངས། གསེར་ཞོ་གསུམ། ཚོགས་འཁོར་བཟང་བ་ཞིག ཁྲ་རྙན་གྱི་བཞུགས་སྟན་རྣམས་ཉེ་གནས་མ་དབོན་མོ་བཙུན་ཆུང་མས་བྱས་ནས་སྐྱེལ་དུ་བྱོན་པས། དམ་པ་དིང་རིའི་ཟུར་ཁང་ན་བཞུགས་ནས་གདའ་བས། དམ་པའི་ཞལ་ནས། ངའི་གསེར་ཚུར་ཐོང༌། ཚོགས་འདིར་གྱིས། དེ་ནས་འུ་ཅག་གཉིས་ལ་རིངས་པོ་ཡོད་གསུང༌། དེར་ཚོགས་ལ་འུར་གསོལ་ནས། བཙུན་ཆུང་མའི་ལག་པ་ནས་གཟུང་ནས་བོན་པོ་རྒན་རྒོན་ལ་བཅོལ། རྣལ་འབྱོར་མ། འུ་ཅག་གཉིས་འདེང་ངོ་གསུང་ནས། བལ་ཡུལ་དུ་ར་མ་དོ་ལིའི་དུར་ཁྲོད་དུ་སླེབས་པ་སོགས་གནས་མང་པོར་རྣལ་འབྱོར་པ་གྲུབ་ཐོབ་མང་པོ་དང་མཇལ་ཞིང་སྐད་ཅིག་ལ་ཕྱིན། ལྷ་མང་པོའི་ཞལ་ཡང་གཟིགས། ཕྱིར་དིང་རིར་འཁོར་དུས་ཞག་བཅུ་དགུ་ལོན། དུས་ཕྱིས་ཤིག་སེ་མཁར་ཆུང་པ་དིང་རིར་ཚོགས་འཁོར་ཞིག་ལ་བྱོན་པའི་དུས་ཁོང་དང་མཇལ། ཐིག་ལེའི་གེགས་བྱུང་བ་ཞུས་པས། དེའི་སྔ་རོལ་དུ་འདི་དང་འདི་རྣམས་བྱུང་ལ་ཆེ་གསུང་ནས། ཐིངས་བྱུང་བས་དད་པ་སྐྱེས་ཏེ། སངས་རྒྱས་སམ་དེ་ཁྱེད་ལགས་སམ་ཞེས་ཞུས། སེ་ན་རེ། ཞ་ཆུང་མ་ལ་བསྒོམ་འདུག་སྟེ་གདམས་པ་མི་འདུག སེ་རྒོད་པོ་ལ་གདམས་པ་འདུག་སྟེ་སྒོམ་མི་འདུག སྤྲང་པོ་དཔེ་དཀར་འདིས་ཀྱང་བར་ཆད་བྱེད་མ་ཉན་ཟེར། དེ་རྟིང་རྗེ་འཁོན་ཕུ་བ་དང་ལྕམ་སྲིང་གཉིས་ཀྱིས་སྔ་ཕྱི་ལན་གཉིས་སུ་སེ་ཅན་བྱོན། ཅི་ཡོད་ཕུལ་བས་མཉེས་ནས་དབང་ཆུང་ཞིག་མ་གཏོགས་གདམས་པ་རྫོགས་པར་གནང༌། ཕྱིས་ཡུལ་དུའང་སྤྱན་དྲངས། དབང་རྒྱས་པར་མཛད་པ་ཞུས། ལོངས་སྤྱོད་དཔག་ཏུ་མེད་པས་མཉེས་པར་བྱས། དེ་ནས་མ་ཅིག་ཉིད་གྲུབ་པ་བརྙེས་ཏེ། ཡུལ་ཉི་ཤུ་རྩ་བཞི་དང་མོན་བོད་ཀྱི་གནས་གཉན་ཟེར་བ་མང་པོར་བཞུགས་ཏེ་ཐུགས་དམ་མཛད་པ་དང༌། གཞན་ལ་དག་པའི་སྣང་བ་མང་པོ་བསྟན་པ་སོགས་ཤིན་ཏུ་མང་བར་མཛད། བླ་མ་ཡང་སྔར་སྨོས་པ་རྣམས་དང༌། པཎྜི་ཏ་བཻ་རོ་ཙ་ན་དང༌། དཔལ་ཆེན་རྒྭ་ལོ་དང༌། པུ་ཧྲངས་ལོ་ཙཱ་བ་དང༌། ཡེ་རབ་པ་རྣམས་ལ་ཡང་གཏུགས། མ་ཅིག་འདི་ལ་དཔལ་ཕག་མོ་གྲུ་པས་ཀྱང་ཐུག འཛེང་དྷརྨ་བོ་དྷི་ཞེས་བྱ་བའི་གྲུབ་ཐོབ་དེས་ཀྱང་མ་ཅིག་ཕུག་རོན་དུ་སྤྲུལ་པ་མཇལ། འགོས་ཁུག་པ་ལྷས་བཙས་ཆོས་འཁོར་ཞིག་གི་གྲལ་དབུ་མཛད་པའི་སར་སྡེ་སྣོད་འཛིན་པ་རྒྱ་མཚོ་ལྟ་བུ་འདུས་པ་ལ། ཁོང་གི་ཉེ་གནས་མས་བརྩད་ཅིང་རྒལ་ལན་བགྱིས་པས། མཁས་པ་རྣམས་ཀྱིས་མ་ཐུབ་པ་ན། མ་ཅིག་ཉིད་ལྟ་ཅི་སྨོས་པས་བཀའ་བསྟན་བཅོས་གང་ལ་ཡང་མཁས་པའི་ཕུལ་དུ་ཕྱིན་པར་ཀུན་ལ་མངོན་དུ་གྱུར། འགྲོ་དོན་རྒྱ་ཆེན་པོ་མཛད། དགུང་ལོ་བརྒྱད་ཅུ་རྩ་བརྒྱད་པའི་ཚེ་གཤེགས་པའི་ཚུལ་བསྟན་ཏེ། སྤུར་སྦྱངས་ཀྱང་གདུང་ཅུང་ཟད་ཀྱང་མ་བྱུང་སྟེ། མདོར་ན་མ་ཅིག་འདི་ནི་སྤྲུལ་པ་མོ། གསང་སྔགས་ཆགས་ལམ་ལ་བརྟེན་པ་རྣམས་ཀྱི་མིག་གཅིག་ཏུ་གྱུར་པ་ཡིན་ནོ། །དེ་ལྟ་བུའི་མ་ཅིག་འདི་འཁྲུངས་པའི་ལོ་དེ་རྗེ་བཙུན་མི་ལའི་ཉི་ཤུ་རྩ་གསུམ་པ། འཁོན་དཀོན་མཆོག་རྒྱལ་པོའི་ཉི་ཤུ་རྩ་དགུ་པ། རྗེ་མར་པའི་ལྔ་བཅུ་རྩ་གཅིག་པ་ཡིན་ཏེ། དེ་དུས་ནམ་བྱོན་པའི་བྱེ་བྲག་པར་ཤེས་པར་འགྱུར་རོ། །གཅོད་ཀྱི་གདམས་པས་བོད་ཡུལ་ཐམས་ཅད་ཁྱབ་པར་མཛད། མ་ཅིག་ལ་སྲས་དང་སྲས་མོ་འགའ་བྱུང་བ་ལོ་རྒྱུས་རྣམས་སུ་འདྲེན་ལུགས་མི་འདྲ་བར་སྣང་བ་ལས། ཐོད་སྨྱོན་བསམ་གྲུབ་ནི་ལ་ལས་མ་ཅིག་གི་སྲས་དང༌། འགའ་ཞིག་གིས་ཚ་བོ་དང་ཡང་ཚར་བཤད་ཀྱང་ལོ་རྒྱུས་ཁུངས་མ་ཕལ་ཆེར་ན་སྲས་ཡིན་པ་བྱས་འདུག གང་ལྟར་ཡང་གྲུབ་ཐོབ་ཆེན་པོར་གྱུར་པས་སློབ་མ་གྲུབ་ཐོབ་ཕོ་མོ་ཉི་ཤུ་རྩ་གཅིག སྲས་མོ་གྲུབ་ཐོབ་བཅོ་བརྒྱད་སོགས་བྱོན་ཅིང༌། དེ་དག་ལས་གདམས་པ་རྒྱ་ཆེར་དར་བར་གྱུར་ཏོ། །ལབ་སྒྲོན་ལ་སློབ་མ་མཆོག་བཞི་ཟེར་ཡང༌། གདམས་པའི་རྒྱུན་ཁུ་སྒོམ་ཆོས་སེང་ལས་བརྒྱུད་པ་དར་ཆེ་ཞིང༌། དེང་སང་གི་བར་དུ་མ་ནུབ་པར་བཞུགས་སོ། །དེབ་སྔོན་དང་ཐུའུ་བཀྭན་གྲུབ་མཐའ་ལྟར་བཀོད།
|