Choying Dzo - Chapter 6

_ch 6_
//nyi ma'i snying po 'od rnams 'dus pa ltar/_
/chos kun rtsa ba byang chub sems su 'dus/_
/snang srid snod bcud ma dag 'khrul pa yang /_
/gang byung rten dang gnas pa'i dbyings brtags pas/_
/gzhi med ye grol sems kyi ngang du 'dus/_
/chos nyid ye klong yangs pa chen po'i ngang /_
/'khrul dang ma 'khrul ming don 'das par 'dus/_
/dag pa'i rang snang sku dang zhing khams dang /_
/ye shes phrin las ngo mtshar rol pa yang /_
/rang byung ngang la 'du 'bral med par 'dus/_
/snang srid 'khor 'das kun 'dus byang chub sems/_
/nyi mkha' bzhin du stong gsal 'dus ma byas/_
/gdod nas rang byung ye klong yangs pa yin/_
/sems nyid klong chen 'gyur med nam mkha'i ngang /_
/rol pa nges med byang chub sems kyi rtsal/_
/'khor 'das theg pa kun la dbang bsgyur ba'i/_
/byar med gcig gis thams cad zil gyis mnan/_
/mtha' ru gyur pa'i yul gzhan logs na med/_
/chos nyid byang chub sems las gar ma g.yos/_
/thams cad kun bzang lhun grub gcig shar bas/_
/ma lus kun 'dus 'gran zla bral ba'i mchog_
/che ba'i che ba kun bzang chos kyi dbyings/_
/rgyal po lta bur thams cad kun 'dus pas/_
/'khor 'das kun la dbang bsgyur gar ma g.yos/_
/thams cad kun bzang mi bzang gcig med pas/_
/bzang ngan med par kun tu bzang por gcig_
/grub dang ma grub thams cad dbyings gcig pas/_
/thams cad lhun grub mi g.yo mnyam pa'i gcig_
/gcig las kun shar ma lus chos kyi dbyings/_
/byar med ngang la sgrub med btsal du med/_
/rtsol sgrub rang gi dbyings las gzhan med pas/_
/gang las rtsol zhing gang du sgrub par byed/_
/btsal bas yul med bsgoms pas mthong ba med/_
/bsgrub pa'i gnas med gzhan nas 'ong ba med/_
/'gro 'ong med pas mnyam nyid chos kyi sku/_
/lhun rdzogs thig le chen po'i dbyings su 'dus/_
/nyan thos rang rgyal byang chub sems dpa'i lung /_
/bdag dang bdag gi med par thag bcad nas/_
/spros bral nam mkha' 'dra bar dgongs don gcig_
/a ti mchog gsang rnal 'byor chen po'i lung /_
/bdag gzhan dbyer med yangs pa'i nam mkha' la/_
/rang byung ye shes ji bzhin rnal 'jog pas/_
/dgongs don de kun snying po'i mchog 'dir 'dus/_
/krI ya u pa yo ga rigs gsum yang /_
/bdag dang lha dang ting 'dzin mchod sprin las/_
/sgo gsum rnam dag dngos grub 'dod par gcig_
/rdo rje rtse mo lung rgyal gsang ba yang /_
/snang grags rig pa rnam dag ye nas lha/_
/sgo gsum rnam dag dngos grub mngon gyur pas/_
/dgongs pa de kun snying po'i mchog 'dir 'dus/_
/ma hA a nu a ti rnam gsum yang /_
/snang srid snod bcud lha dang lha mo'i zhing /_
/dbyings dang ye shes rnam dag dbyer med pas/_
/chos nyid mi g.yo rang byung ye shes 'dod/_
/mchog gsang rab 'dir thams cad rnam dag pas/_
/ma byas gzhal yas ye klong bde ba'i zhing /_
/phyi dang nang med kun khyab gdal ba las/_
/blang dor bya rtsol mtshan ma'i chos med par/_
/thams cad ye 'byams chos sku'i klong du grol/_
/dgongs pa de kun gsang chen snying por 'dus/_
/gcig rdzogs kun rdzogs chos kun 'dus pa'i klong /_
/ye babs rang gsal lhun grub chen por 'dus/_
/chos dbyings rin po'i mdzod las/_
/thams cad byang chub sems su 'dus par bstan pa'i le'u ste drug pa'o//

back to Choying Dzo